Makabulig Ka Para Indi Madula ang Paghiusa sa Kongregasyon

Kon kaupod naton ang pareho naton nga mga Cristiano, mabatyagan naton ang nabatyagan ni Hari David: “Tuman kaayo kag tuman katahom kon ang mag-ulutod magkabuhi nga may paghiusa!” (Salmo 133:1) Ang aton paghiusa wala lang natabuan. Ang kada isa sa aton may mahimo para indi ini madula.

1. Ano ang dalayawon sa katawhan sang Dios?

Kon magtambong ka sa miting sang kongregasyon sa iban nga lugar, mahimo indi mo maintiendihan ang ila lenguahe, pero mabatyagan mo nga bahin ka sang kongregasyon. Ngaa? Bangod pareho ang ginagamit namon nga mga publikasyon para tun-an ang Biblia. Kag ginatinguhaan gid namon nga ipakita ang pagpalangga sa isa kag isa. Diin man kita nagaistar, ‘nagatawag kita sa ngalan ni Jehova, kag nagasimba kita sa iya sing nahiusa.’—Sofonias 3:9.

2. Ano ang mabulig mo para indi madula ang paghiusa?

“Maghigugmaanay kamo sing hanuot halin sa tagipusuon.” (1 Pedro 1:22) Paano mo masunod ini nga laygay? Imbes nga magpokus sa indi maayo nga batasan sang iban, tan-awa ang ila maayo nga mga kinaiya. Imbes nga mag-upod lang sa mga tawo nga pareho kamo sing hilig, tinguhai nga kilalahon ang mga kauturan nga lainlain ang ginhalinan. Likawan man naton ang pagpasulabi sa iban.—Basaha ang 1 Pedro 2:17.a

3. Ano ang himuon mo kon naglainay kamo sing buot sang pareho mo nga Cristiano?

Nahiusa kita, pero indi kita perpekto. Kon kaisa, masakit naton ang balatyagon sang isa kag isa. Gani ang Pulong sang Dios nagsiling: “Padayon nga . . . magpinatawaray kamo,” nagsiling pa ini: “Subong nga si Jehova nagpatawad sing kinabubut-on sa inyo, amo man sini ang himuon ninyo.” (Basaha ang Colosas 3:13.) Madamo nga beses nga nakasala kita kay Jehova, pero ginapatawad niya kita. Gani, gusto niya nga patawaron man naton ang aton mga kauturan. Kon nasakit mo ang balatyagon sang iban, makighidait ka sa iya.—Basaha ang Mateo 5:23, 24.b

USISAA PA GID

4. Likawi ang pagpasulabi

Gusto naton palanggaon ang tanan nga kauturan. Pero mahimo nabudlayan kita nga batunon ang mga tawo nga lain ang ginhalinan. Ano ang makabulig sa aton? Basaha ang Binuhatan 10:34, 35, dayon binagbinaga ini nga mga pamangkot:

• Ginabaton ni Jehova ang tanan nga klase sang tawo nga mangin iya Saksi. Bilang pag-ilog kay Jehova, paano mo dapat tamdon ang mga tawo nga lain ang ginhalinan?

• Ano nga klase sang pagpasulabi ang makita mo sa inyo lugar nga gusto mo likawan?

Basaha ang 2 Corinto 6:11-13, dayon binagbinaga ini nga pamangkot:

• Ano ang himuon mo para mangin malapit ka sa mga kauturan nga lain ang ginhalinan?

5. Magpatawad sing kinabubut-on kag makighidait

Si Jehova nagapatawad sa aton sing kinabubut-on bisan pa indi gid niya kinahanglan ang aton pagpatawad. Basaha ang Salmo 86:5, dayon binagbinaga ini nga mga pamangkot:

• Daw ano ka daku ang pagpatawad ni Jehova?

• Ngaa nagapasalamat ka kay nagapatawad sia?

• Ano nga mga sitwasyon ang mahimo mabudlay para sa aton nga makighidait sa iban?

Paano naton mailog si Jehova kag padayon nga nahiusa sa aton mga kauturan? Basaha ang Hulubaton 19:11, dayon binagbinaga ini nga pamangkot:

• Kon may nahimo ang iban nga nagpaakig ukon nakasakit sa imo, ano ang himuon mo para mag-ayuhay kamo liwat?

Kon kaisa, masakit naton ang balatyagon sang iban. Kon matabo ina, ano ang dapat naton himuon? Tan-awa ang VIDEO, dayon binagbinaga ang masunod nga pamangkot.

VIDEO: Ang Pagpakighidait Nagaresulta sa mga Pagpakamaayo (6:01)

• Sa video, ano ang ginhimo sang sister para makighidait sa isa pa ka sister?

6. Magpokus sa maayo nga kinaiya sang imo mga kauturan

Kon makilala pa gid naton ang aton mga kauturan, mabal-an naton ang ila maayo kag indi maayo nga mga kinaiya. Ano ang himuon naton para magpokus kita sa ila maayo nga mga kinaiya? Tan-awa ang VIDEO, dayon binagbinaga ang masunod nga pamangkot.

VIDEO: Mangin Mas Matahom! (5:10)

• Ano ang makabulig para makita mo ang maayo nga mga kinaiya sang imo mga kauturan?

Si Jehova nagapokus sa aton maayo nga mga kinaiya. Basaha ang 2 Cronica 16:9a, dayon binagbinaga ini nga pamangkot:

• Ano ang nabatyagan mo kay si Jehova nagapokus sa imo maayo nga mga kinaiya?

SUMARYO

Kon ginapatawad kag ginpalangga mo ang tanan nga kauturan, makabulig ka nga indi madula ang paghiusa sa kongregasyon.

Rebyu

• Paano mo malikawan ang pagpasulabi?

• Ano ang himuon mo kon naglainay ang buot ninyo sang pareho mo nga Cristiano?

• Ngaa gusto mo ilugon si Jehova nga nagapatawad sa iban?

DUGANG NGA IMPORMASYON

Hibalua kon paano ang isa sa mga ilustrasyon ni Jesus makabulig sa aton nga malikawan nga hukman ang iban.

Kuhaa ang Balayan (7:01)

Kinahanglan bala naton mangayo sing pasaylo bisan pa pamatyag naton indi kita ang may sala?

“Pagpangayo sing Pasaylo—Isa ka Epektibo nga Paagi sa Pagpakighidait” (Ang Lalantawan, Nobiembre 1, 2002)

Hibalua kon ano ang nakabulig sa iban nga malikawan ang pagpasulabi?

Indi Maghukom Base Lang sa Imo Makita (5:06)

Hibalua kon paano mo masolbar ang mga indi pag-intiendihanay antes madula sini ang kalinong sa kongregasyon.

“Husaya ang mga Indi Paghangpanay Paagi sa Gugma” (Ang Lalantawan, Mayo 2016)