Magahulag Bala Ikaw sa Gugma ni Jesus?

“Ang gugma ni Cristo nagapilit sa amon.”—2 CORINTO 5:14.

1. Paano malaragway ang gugma ni Jesus?

SA PAGKAMATUOD, katahom gid katama sang gugma ni Jesus! Kon binagbinagon naton ang daku niya nga pag-antos sa pag-aman sing gawad, nga sa sini lamang matigayon naton ang kabuhi nga walay katapusan, pat-od gid nga ang aton mga tagipusuon ginapahulag sa pag-apresyar sa iya! Si Jehova nga Dios kag si Jesus mismo ang naghimo sing inisyatibo. Sila ang una nga naghigugma sa aton, samtang makasasala pa kita. (Roma 5:6-8; 1 Juan 4:9-11) Ang paghibalo sa “gugma ni Cristo,” sulat ni apostol Pablo, “nagalabaw sa ihibalo.” (Efeso 3:19) Huo, ang gugma nga ginpakita ni Jesus labaw pa sa mataas nga edukasyon. Nagalabaw ini sa tanan nga nakita ukon naeksperiensiahan sang tawo.

2. Ano ang indi makapugong kay Jesus sa paghigugma sa aton?

² Nagasulat sa mga Cristiano sa Roma, si Pablo namangkot: “Sin-o bala ang magapahamulag sa aton sa gugma ni Cristo? Ang kangitngitan bala ukon kasakit ukon paghingabot ukon tiggulutom ukon kahubo ukon katalagman ukon espada?” Wala sini nga mga butang ang makapugong kay Jesus sa paghigugma sa aton. “Ginatalupangod ko,” padayon ni Pablo, “nga bisan ang kamatayon ukon kabuhi ukon mga anghel ukon mga punuan ukon mga butang nga palaabuton ukon mga gahom ukon kataasan ukon kadadalman ukon bisan ano nga iban nga tinuga indi sarang makapahamulag sa aton sa gugma sang Dios nga yara kay Cristo Jesus nga aton Ginuo.”—Roma 8:35-39.

3. Ano lamang ang kabangdanan nga biyaan kita ni Jesus kag sang iya Amay?

³ Ang gugma ni Jehova nga Dios kag ni Jesus sa imo amo sina ka gamhanan. Isa lamang ka butang ang makapugong sa ila nga higugmaon ikaw, kag ina amo ang imo kinabubut-on nga pagsikway sa ila gugma paagi sa indi paghimo sa ginapahimo nila. Ang manalagna sang Dios nagpaathag anay sa hari sang Judea: “Si Jehova nagaupod sa inyo samtang kamo nagaupod sa iya; kon pangitaon ninyo sia, makita sia ninyo, apang kon bayaan ninyo sia, sia magabiya sa inyo.” (2 Cronica 15:2) Sin-o sa aton ang maluyag magtalikod sa sinang tumalagsahon kag maluluy-on nga mga abyan kaangay ni Jehova nga Dios kag sang iya Anak, nga si Jesucristo?

Nagakaigo nga Paghulag sa Gugma ni Jesus

4, 5. (a) Paano ang gugma ni Jesus sa aton dapat mag-apektar sang aton mga kaangtanan sa aton isigkatawo? (b) Kay sin-o pa kita dapat mapahulag sa paghigugma bangod sang gugma ni Jesus sa aton?

⁴ Paano ikaw personal nga naapektuhan sang walay latid nga gugma ni Jesus sa imo? Paano ikaw dapat maapektuhan? Ti, ginpakita ni Jesus kon paano ang iya pagpasundayag sang gugma dapat magaapektar sang aton kaangtanan sa aton isigkatawo. Pagkatapos mapainubuson nga gin-alagaran ang iya mga apostoles paagi sa paghugas sang ila mga tiil, si Jesus nagsiling: “Naghatag ako sa inyo sing sulundan, agod nga kamo man maghimo suno sa nahimo ko sa inyo.” Sia nagdugang: “Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay.” (Juan 13:15, 34) Nakatuon ang iya mga disipulo, kag napahulag sila nga tinguhaan nga himuon ang ginhimo niya. “Sa sini nakilala ta ang gugma,” sulat ni apostol Juan, “kay ginhatag niya ang iya kalag tungod sa aton; kag dapat naton ihatag ang aton mga kalag tungod sa mga kauturan.”—1 Juan 3:16.

⁵ Apang, mawasi naton ang katuyuan sang kabuhi kag ministeryo ni Jesus kon ang iya huwaran nagapahulag lamang sa aton nga higugmaon kag atipanon ang mga kaayuhan sang isigkatawo. Indi bala dapat nga ang gugma ni Jesus sa aton magapahulag sa aton nga higugmaon man sia kag labi na ang iya Amay, nga nagtudlo sa iya sang tanan nga nahibaluan niya? Magahulag ka bala sa gugma ni Cristo kag magaalagad sa iya Amay subong sang ginhimo niya?—Efeso 5:1,2; 1 Pedro 1:8,9.

6. Paano si apostol Pablo naapektuhan sang gugma ni Jesus sa iya?

⁶ Binagbinaga ang natabo kay Saulo, nga nakilala sang ulihi nga si Pablo. Ginhingabot niya anay si Jesus, “nagasambo pa sa pagpahog kag pagpamatay batok sa mga disipulo.” (Binuhatan 9:1-5; Mateo 25:37-40) Sang nakilala ni Pablo si Jesus, nagpasalamat gid sia sing daku sa nabaton niya nga kapatawaran sa bagay nga indi lamang sia handa sa pag-antos tungod kay Jesus kundi handa man sia manginmatay tungod sa iya. “Ginlansang ako kaupod ni Cristo,” sulat niya. “Indi na ako ang nagakabuhi . . . Ang kabuhi nga ginakabuhi ko karon sa unod ginakabuhi ko sa pagtuo sa Anak sang Dios, nga naghigugma sa akon kag nagtugyan sang iya kaugalingon tungod sa akon.”—Galacia 2:20.

7. Ano dapat ang ipilit sang gugma ni Jesus sa aton nga himuon?

⁷ Ang gugma ni Jesus nagaimpluwensia gid sang aton kabuhi! “Ang gugma ni Cristo nagapilit sa amon,” sulat ni Pablo sa mga taga-Corinto, ‘nga indi na magkabuhi nga sa ila kaugalingon, kundi nga sa iya nga tungod sa ila napatay kag nabanhaw.’ (2 Corinto 5:14, 15) Sa pagkamatuod, ang pasalamat kay Jesus tungod sang paghatag niya sa aton sang iya kabuhi dapat magapahulag sa aton sa paghimo sang bisan ano nga ginapahimo niya. Sa sini lamang nga paagi nga mapamatud-an naton nga ginahigugma gid naton sia. “Kon nagahigugma kamo sa akon, magabantay kamo sang akon mga sugo,” siling ni Jesus. “Ang nagahupot sang akon mga sugo kag nagatuman sa ila, sia amo ang nagahigugma sa akon.” —Juan 14:15, 21; ipaanggid ang 1 Juan 2:3-5.

8. Paano ang gugma ni Jesus nag-apektar sa kabuhi sang madamong makasasala?

⁸ Sang nahibaluan nila ang mga sugo ni Jesus, ang mga makihilawason, mga makihilahion, mga homoseksuwal, mga makawat, mga palahubog, kag mga malugos sa dumaan nga Corinto naghulag sa gugma ni Jesus paagi sa pag-untat sa sining mga buhat. Si Pablo nagsulat tuhoy sa ila: “Ginhugasan kamo, . . . ginpakamatarong kamo sa ngalan ni Ginuong Jesucristo.” (1 Corinto 6:9-11) Sa kaanggid, ang gugma ni Jehova nagpilit sa madamo karon nga maghimo sing talalupangdon nga mga pagbalhin sa ila kabuhi. “Nakita ang matuod nga kadalag-an sang Cristianismo paagi sa paghimo nga maayong mga tawo sadtong nagaangkon sang iya mga doktrina,” sulat sang istoryador nga si John Lord. “May pamatuod kita sang ila walay dagta nga kabuhi, sang ila dimakahuluya nga mga moral, sang ila maayo nga pagkabanhawanon, kag sang ila Cristianong mga kinaiya.” Daw ano nga kinatuhayan ang nahimo sang mga panudlo ni Jesus!

9. Ano ang ginalakip sa pagpamati kay Jesus?

⁹ Sa pagkamatuod, ang pinakaimportante nga pagtuon nga mahimo sang isa ka tawo karon amo ang pagtuon sa kabuhi kag ministeryo ni Jesucristo. “Magtulok sing hanuot . . . kay Jesus,” laygay ni apostol Pablo. “Sa pagkamatuod talupangda sia.” (Hebreo 12:2, 3) Sang nagbaylo dagway si Jesus, ang Dios mismo nagsugo nahanungod sa iya Anak: “Pamati kamo sa iya.” (Mateo 17:5) Apang, dapat ipadaku nga ang pagpamati kay Jesus nagalakip sang labi pa sang sa pagpamati lamang sa ginasiling niya. Nagakahulugan ini sang pagpamati sa iya mga instruksion, huo, pagkopya sa iya paagi sa paghimo kon ano ang ginhimo niya sa paagi nga ginhimo niya ini. Nagahulag kita sa gugma ni Jesus paagi sa paghimo sa iya nga aton huwaran, paagi sa pagsunod sing maayo sang iya mga tikang.

Kon Ano ang Luyag ni Jesus nga Himuon Naton

10. Sin-o ang ginhanas ni Jesus kag tungod sa anong katuyuan?

¹⁰ Ang sugo ni Jesus halin sa Dios amo ang ibantala ang Ginharian sang iya Amay, kag ginhanas niya ang mga sumulunod nga himuon man ini nga hilikuton. “Makadto kita sa kasilingan nga mga banwa,” siling niya sa iya nahaunang mga disipulo, ”agod makawali man ako didto, kay bangod sini nagkari ako.” (Marcos 1:38; Lucas 4:43) Sang ulihi, pagkatapos nga nahanas sing maayo ang 12 ka apostoles, ginsugo sila ni Jesus: “Wali sa nagakadto kamo, nga nagasiling, ‘Ang ginharian sang langit malapit na.’” (Mateo 10:7) Mga pila ka pulan sang ulihi, sa tapos nahanas ang 70 pa, ginpalakat niya sila upod ang sugo: “Magsiling sa ila, ‘Ang ginharian sang Dios malapit sa inyo.’ ” (Lucas 10:9) Sing maathag, luyag ni Jesus nga ang iya mga sumulunod mangin mga manugwali kag mga manunudlo.

11. (a) Sa anong paagi ang mga disipulo ni Jesus nagahimo sing daku pa nga hilikuton sang sa ginhimo niya? (b) Ano ang natabo sa mga disipulo pagkatapos napatay si Jesus?

¹¹ Padayon nga ginhanas ni Jesus ang iya mga disipulo para sa sining hilikuton. Sadto sang katapusan nga gab-i sa wala pa sia mapatay, ginpalig-on niya sila paagi sa mga pinamulong: “Ang nagatuo sa akon magahimo man sia sang mga buhat nga ginahimo ko; kag magahimo sia sing dalagku pa sining mga buhat.” (Juan 14:12) Ang mga buhat sang iya mga sumulunod mangin dalagku pa sa iya bangod lab-uton nila ang madamo pa nga tawo sa daku pa nga lugar sang ila ministeryo kag sa malawig pa nga tion. Apang, pagkatapos napatay si Jesus, ang iya mga disipulo nangin diaktibo bangod sang kahadlok. Nagpanago sila kag wala nagbuhat sang hilikuton nga ginhanas niya sa ila nga himuon. Ang iban nagbalik sa pagpangisda. Apang, sa dimalipatan nga paagi, gintanum niya sa pito ang luyag niya nga himuon nila, subong man sa tanan niya nga mga sumulunod.

12. (a) Anong milagro ang ginhimo ni Jesus sa Dagat sang Galilea? (b) Sing maathag, ano ang buot silingon ni Jesus sang ginpamangkot niya si Pedro kon bala ginahigugma niya Sia “sing labi pa sa sini”?

¹² Nagmateryalisar si Jesus sa tawhanon nga lawas kag nagpakita sa Dagat sang Galilea. Ang pito ka apostoles didto sa sakayan apang wala sila sing nakuha nga isda sa bug-os nga gab-i. Si Jesus nagsiling sa ila gikan sa baybayon: “Iladlad ninyo ang pukut sa tuo sang sakayan kag makakita kamo.” Sang milagruso nga napuno sang isda ang pukot tubtob sa punto nga daw mabusdik ini, narealisar sang mga yara sa sakayan nga si Jesus gali ang yara sa baybayon, kag nagdalidali sila sa pagkadto sa iya. Sang nakapamahaw na sila, si Pedro, ayhan nagatan-aw sa madamong nakuha nga isda, namangkot kay Pedro: “Simon, anak ni Juan, ginahigugma mo bala ako sing labi sini sa ila?” (Juan 21:1-15) Walay duhaduha nga ang buot silingon ni Jesus, Mas naluyagan mo bala ang pagpangisda sang sa hilikuton nga pagbantala nga ginhanda ko nga himuon mo?

13. Paano ginpatudok sing makusog ni Jesus sa iya mga sumulunod ang paagi nga dapat sila maghulag sa iya gugma?

¹³ Si Pedro nagsabat: “Huo, Ginuo, ikaw nakahibalo nga ako nagahigugma sa imo.” Si Jesus nagsabat: “Pahalba ang akon mga kordero.” Sa ikaduha nga tion si Jesus namangkot: “Simon, anak ni Juan, ginahigugma mo bala ako?” Sa liwat si Pedro nagsabat nga may mas mabakod nga pasalig: “Huo, Ginuo; ikaw nakahibalo nga ako nagahigugma sa imo.” Sa liwat si Jesus nagsugo: “Tatapa ang akon mga karnero.” Sa ikatlo nga tion si Jesus namangkot: “Simon, anak ni Juan, ginahigugma mo bala ako?” Si Pedro nagkasubo. Mga pila lamang ka adlaw ang nagligad, tatlo ka beses nga ginpanghiwala niya si Jesus, gani mahimo nga ginpaligban niya kon bala ginapangduhaduhaan ni Jesus ang iya katutom. Gani, sa ikatlo nga tion, si Pedro nagsabat, ayhan sa nagapakiluoy nga tono: “Ginuo, ikaw nakahibalo sang tanan nga butang; ikaw nakahibalo nga ako nagahigugma sa imo.” Si Jesus nagsabat lamang: “Pahalba ang akon mga karnero.” (Juan 21:15-17) May pangduhaduha bala sa kon ano ang luyag nga ipahimo ni Jesus kay Pedro kag sa iya mga kaupod? Ginpatudok gid niya sa ila—subong man sa mangin mga disipulo niya karon—nga kon ginahigugma nila sia, magapakigbahin sila sa paghimo sing disipulo nga hilikuton!

14. Sa iban nga mga okasyon, paano ginpakita ni Jesus ang paagi nga ang iya mga disipulo dapat maghulag sa iya gugma?

¹⁴ Mga pila ka adlaw pagligad sang paghambalanay sa baybayon, nagpakita si Jesus sa isa ka bukid sa Galilea kag nagsugo sa mga 500 ka sumulunod nga nagtipon sing malipayon: “Busa lakat kamo kag himuon nga mga disipulo ang tanan nga kapungsoran, . . . nagapanudlo sa ila sa pagtuman sang tanan nga ginsugo ko sa inyo.” (Mateo 28:19, 20; 1 Corinto 15:6) Hunahunaa ini! Ang tanan nga mga lalaki, mga babayi, kag mga kabataan nakabaton sini nga sugo. Sang ulihi pa, bag-o magkayab sa langit, si Jesus nagsiling sa iya mga disipulo: “Mangin saksi ko kamo . . . tubtob sa ukbong sang duta.” (Binuhatan 1:8) Pagkatapos sining tanan nga laygay, indi katingalahan nga si Pedro, mga tuig sang ulihi, nagsiling: “Gintugnan kami [ni Jesus] sa pagwali sa katawhan kag sa pagpanaksi.”—Binuhatan 10:42.

15. Nahanungod sa ano nga wala gid sing pangduhaduha?

¹⁵ Wala sing pangduhaduha kon paano kita magahulag sa gugma ni Jesus. Subong sang ginsiling niya sa iya mga apostoles: “Kon magbantay kamo sang akon mga sugo, magapabilin kamo sa akon gugma . . . Kamo akon mga abyan kon nagahimo kamo sang ginsugo ko sa inyo.” (Juan 15:10-14) Ang pamangkot amo, Ipakita mo bala ang gugma kay Jesus paagi sa pagtuman sa iya mga sugo sa pagpakigbahin sa paghimo sing disipulo nga hilikuton? Matuod, mahimo nga indi ini mahapos para sa imo tungod sa lainlain nga rason. Apang indi man ini mahapos para kay Jesus. Binagbinaga ang mga pagbalhin nga ginkinahanglan sa iya.

Sunda ang Huwaran ni Jesus

16. Anong matahom nga huwaran ang ginhatag ni Jesus?

¹⁶ Ang bugtong nga Anak sang Dios nag-agom sing mataas nga position sa langitnon nga himaya nga labaw pa sa tanan nga mga anghel. Manggaranon sia sa pagkamatuod! Apang, kinabubut-on niya nga ginhatag ang iya kaugalingon, natawo subong miembro sang isa ka imol nga pamilya, kag nagdaku nga ginlibutan sang nagamasakit kag nagakapatay nga mga tawo. Ginhimo niya ini tungod sa aton, subong sang ginpaathag ni apostol Pablo: “Nahibaluan ninyo ang dibagay nga kaluoy sang aton Ginuong Jesucristo, nga bisan manggaranon sia nangin imol sia tungod sa inyo, agod nga paagi sa iya pagkaimol mangin manggaranon kamo.” (2 Corinto 8:​9; Filipos 2:​5-8) Isa gid ka huwaran! Isa gid ka daku nga pagpakita sing gugma! Wala sing isa ang nagbiya sing labi pa ukon nag-antos sing lapi pa tungod sa iban. Kag wala sing isa ang nagpaposible para sa iban nga mag-agom sing daku pa nga manggad, huo, sing kabuhi nga walay katapusan sa kahimpitan!

17. Anong dalanon ang ginhatag sa atubangan naton, kag ano ang mangin resulta sang pagsunod sa sini?

¹⁷ Sarang naton masunod ang huwaran ni Jesus kag makahimo man sing maayo sa iban. Sa liwat kag liwat, ginlaygayan ni Jesus ang mga tawo nga mangin mga sumulunod niya. (Marcos 2:14; Lucas 9:59; 18:22) Sa katunayan, si Pedro nagsulat: “Kay sa sini mga gintawag kamo, kay si Cristo man nag-antos tungod sa inyo, nga nagabilin sa inyo sing sulundan agod nga pagsundon ninyo ang iya mga tikang.” (1 Pedro 2:21) Magahulag ka bala sa gugma ni Cristo bisan pa nagakahulugan ini sing pag-antos agod maalagad ang iya Amay subong sang ginhimo niya? Daw ano ka mapuslanon ina nga dalanon para sa iban! Sa pagkamatuod, paagi sa pagsunod sa huwaran ni Jesus, paagi sa pag-aplikar sing bug-os sang mga panudlo nga nabaton niya sa iya Amay, “maluwas mo ang imo kaugalingon kag ang mga nagapamati sa imo.”—1 Timoteo 4:16.

18. (a) Anong huwaran ang ginhatag ni Jesus nahanungod sa iya panimuot sa katawhan? (b) Paano naghulag ang mga tawo sa personalidad ni Jesus?

¹⁸ Agod mabuligan sing labi ang mga tawo, dapat nga may balatyagon man kita sa ila kaangay sang kay Jesus. Ang isa ka tagna nagasiling nahanungod sa iya: “Magakaawa sia sa imol kag sa nawad-an.” (Salmo 72:13) Natalupangdan sang iya mga sumulunod nga si Jesus “naghigugma” sa mga ginasugilanon niya kag nga luyag gid niya sila buligan. (Marcos 1:40-42; 10:21) “Sang nakita niya ang mga kadam-an,” siling sang Biblia, “naluoy sia sa ila, kay ginlapyo sila kag nag-aplaag, subong sang mga karnero nga walay manugpahalab.” (Mateo 9:36) Bisan ang sobra ka makasasala nakatalupangod sang iya gugma kag nagpalapit sa iya. Paagi sa tono sang iya tingog, paggawi, kag paagi sa pagpanudlo, nagbatyag sila nga relaks. Subong resulta, bisan ang gintamay nga mga manugsukot sing buhis kag mga makihilawason nagpangita sa iya.—Mateo 9:9-13; Lucas 7:36-38; 19:1-10.

19. Paano gin-ilog ni Pablo si Jesus, kag ano ang mangin resulta sang paghimo man naton sini?

¹⁹ Ang mga disipulo ni Jesus sang nahaunang siglo nag-ilog sang iya mahigugmaon nga huwaran. Nagsulat si Pablo sa iban nga gin-alagaran niya: “Malulo kamo sa tunga ninyo, subong sang yaya nga nagabatiti sang iya mga magamay . . . Subong sang amay sa iya mga anak, naglaygay kami sa tagsa sa inyo kag nagpabaskog sa inyo kag nagpanugyan sa inyo.” (1 Tesalonica 2:7-11) Nabatyagan mo bala ang matuod nga pag-ulikid sa mga tawo sa inyo teritoryo kaanggid sang nabatyagan sang mahigugmaon nga mga ginikanan sa ila hinigugma nga mga kabataan? Ang pagpakita sinang pag-ulikid sa tono sang imo tingog, sa imo pangguyahon, kag sa imo buhat magahimo sang mensahe sang Ginharian nga makagalanyat sa mga katulad-karnero.

20, 21. Ano ang pila sang modernong-adlaw nga mga halimbawa sang mga tawo nga nagsunod sang huwaran ni Jesus sa gugma?

²⁰ Sang isa ka matugnaw nga adlaw sa Espanya, ang duha ka Saksi nakasugilanon sa isa ka tigulang nga babayi nga nagasaklay kag ang iya balay sobra gid katugnaw bangod naubos na ang kahoy. Nagahulat sia sa pagpauli sang iya anak nga lalaki halin sa obra agod makabis-ak sing dugang nga kahoy. Ang mga Saksi nagbis-ak sing kahoy, kag nagbilin man sila sing pila ka magasin agod mabasa niya. Sang nagpauli ang anak nga lalaki, nahamuot gid sia sa mahigugmaon nga pag-ulikid sang mga Saksi para sa iya iloy amo kon ngaa ginbasa niya ang literatura, nagsugod sa pagtuon sang Biblia, nabawtismuhan, kag nagsulod sang ulihi sa payunir nga ministeryo.

²¹ Sa Australia ginpaathag sang bana kag sang iya asawa sa nagaduaw nga mga Saksi nga wala sila sing kuwarta sa pagpakaon sang ila pamilya. Ang mag-asawa nga Saksi naglakat kag nagbakal sing pila ka groserya, lakip sing mga dulse para sa mga kabataan. Ang mga ginikanan naghibi, nagsiling nga wala na gid sila sing mahimo sa bagay nga naghunahuna sila sa paghikog. Nagsugod sila sa pagtuon sang Biblia, kag ang asawa nagpabawtismo sining karon lang. Ang isa ka babayi sa Estados Unidos nga naugot sa mga Saksi ni Jehova nagsiling pagkatapos nga nasugilanon niya ang isa sa ila: “Indi ko madumduman kon ano ang amon ginhambalan, apang ang nadumduman ko amo nga kabuot gid niya sa akon, kag maabiabihon kag mapainubuson gid sia. Nagsuod gid ako sa iya subong isa ka tawo. Ginahamili ko ang iya pagpakig-abyan tubtob karon.”

22. Pagkatapos nausisa ang kabuhi ni Jesus, ano ang aton konklusion nahanungod sa iya?

²² Kon nagahulag kita sa gugma ni Jesus paagi sa paghimo sang hilikuton sa paagi nga ginhimo niya ini, madamo gid nga mga pagpakamaayo ang maagom naton! Ang pagkadaku ni Jesus dimapangduhaduhaan kag bug-os. Ginapahulag kita sa pagpalanog sang pinamulong sang Romanong gobernador nga si Poncio Pilato: “Yari! Ang tawo!” Huo, sa pagkamatuod, “Ang tawo,” ang pinakabantog nga tawo nga nagkabuhi.—Juan 19:5.

Paano Mo Sabton?

◻ Daw ano ka daku ang gugma ni Jesus?

◻ Sin-o ang ginapahulag sang gugma ni Jesus nga higugmaon naton, kag ano ang dapat ipilit sang iya gugma nga himuon naton?

◻ Anong hilikuton ang luyag ni Jesus nga himuon naton?

◻ Daw ano ka manggaranon si Jesus, kag ngaa nag-imol sia?

◻ Paano naton dapat ilugon si Jesus sa iya paagi sang pag-alagad sa mga tawo?

[Laragway sa pahina 15]

Si Jesus naghatag sing sulundan sa pagpakita sing gugma

[Laragway sa pahina 17]

Ginpakita sing makusog ni Jesus kon paano dapat ipakita sang iya mga disipulo ang ila gugma para sa iya