“Isa ka Pagtilaw sa Pagkamatuod sang Imo Gugma”

ANO ang ginapahanumdom sa imo sang mga pulong sa ibabaw? Paghingabot kag kabudlayan? Pagkamartir? Ina nga mga pulong ginsulat anay ni apostol Pablo sa isa ka sulat nga ginpadala niya sa mga Cristiano sa dumaan nga Corinto. May daku ini nga pagkaimportante sa katawhan ni Jehova karon kay ang ‘pagkamatuod sang ila gugma’ ginatilawan man karon. Apang paano? Bilang sabat, usisaon naton ang danyag sang ginhambal ni Pablo.

Ang Sadsaran sang Pagtilaw

Mga duha ka dekada sa tapos mapasad ang Cristianismo, ang kongregasyon sa Jerusalem may daku nga problema sa pinansial. Nagapuyo sa sadto nga kuta sang pagpamatok kag pag-ihig-ihig sang mga Judiyo, ang mga Cristiano sa sulod sang mga tuig ‘nagbatas sing daku nga pagpakig-away nga may pag-antos,’ kag ang ila ‘mga pagkabutang gin-agaw’ pa gani. (Hebreo 10:​32-34) Nangin kinahanglan nga mangayo sila sing bulig sa guwa.

Sa pagkamatuod, ang ila Gentil nga kauturan pat-od nga napahulag sa pagbulig sa ila. Kay man, may pinasahi sila nga “utang” sa mga Cristiano sa Jerusalem. Indi bala nga gikan sa Jerusalem naglapnag ang maayong balita sa mga Gentil? Si Pablo nagsiling: “Kon ginpaambit sang Judiyong mga Cristiano ang ila espirituwal nga mga bahandi sa mga Gentil, ang mga Gentil may maathag nga katungdanan nga magbulig sa ila materyal nga mga kinahanglanon.”​—⁠Roma 15:​27, The New English Bible.

Pag-organisar sang Pagpanipon

Gintugunan si Pablo sang nagadumala nga hubon nga ‘dumdumon ang imol [nga mga Cristiano].’ (Galacia 2:10) Gani nagpadala sia sing sulat sa mga Cristiano sa Europa kag Asia Minor tuhoy sa kahimtangan sa Jerusalem. Yari ang tugon ni Pablo: “Karon nahanungod sa amot sa mga balaan, subong sa ginsugo ko sa mga kongregasyon sa Galacia, amo man ang himuon ninyo. Sa tagsa ka nahauna nga adlaw sang semana, ang tagsa sa inyo magpain sing kuwarta suno sa iya pagkabugana, agod nga sa pag-abot ko dira indi na kinahanglan nga magpanipon pa sang amot.”​—⁠1 Corinto 16:​1, 2.

Paagi sa pagbadyet sang ila kuwarta sa sining paagi, wala sing isa nga magbatyag nga ginapilit sia ukon ginaipit kon himuon ang pagpanipon. Wala mahangawa ang kauturan nga ang ila kuwarta laksamon ukon uyangan. Ang ‘nahamut-an nga mga lalaki’ lamang ang gintugutan sa pagdul-ong sang natipon nga mga kuwarta, kag kon kinahanglanon gin-updan pa sila ni Pablo.​—⁠1 Corinto 16:​3-5.

Ang sabat sang mga taga-Corinto? Bisan pa mahimo nga paborable ang reaksion sang kauturan sa laygay ni Pablo, wala ginpadala ang natipon nga kuwarta. (2 Corinto 8:​6, 10, 11) Ayhan masako ang mga gulang sa pagtinlo sa kongregasyon gikan sa pagbinahinbahin, imoralidad, kag iban pa nga mga problema nga ginsulat sa ila ni Pablo.

‘Magbugana Kamo sa Maluluy-on nga Paghatag’

Ano man ang natabo, ginpadalhan sila ni Pablo sing isa pa ka sulat nga nagasiling: “Ginapahibalo namon karon sa inyo, mga kauturan, ang nahanungod sa dibagay nga kaluoy sang Dios sa mga kongregasyon sang Macedonia, nga sa tion sang dakung pagtilaw sa kapipit-an ang kabugana sang ila kalipay kag ang ila daku nga kaimulon nagpabugana sang kamanggaran sang ila pagkaalwan. Kay suno sa ila ikasarang, huo, nagasaksi ako, kag labaw pa sa ila ikasarang, naghatag sila sing kinabubut-on, nga nagapangabay sa amon nga may dakung pakiluoy nahanungod sining pribilehiyo sa paghatag sing maluluy-on kag sa pagpakig-ambit sa ministeryo para sa mga balaan. Kag indi lamang subong sang ginpaabot namon, kundi una ginhatag nila ang ila kaugalingon sa Ginuo kag sa amon paagi sa kabubut-on sang Dios. Bangod sini ginpalig-on namon si Tito, subong nga nakapamuno na sa sini sa tunga ninyo, nga tapuson niya sa inyo ining maluluy-on nga paghatag. Karon subong nga nagabugana kamo sa tagsa ka butang, sa pagtuo kag sa pulong kag sa ihibalo kag sa bug-os nga pagkahanuot kag sa inyo gugma sa amon, kabay nga magbugana man kamo sa sining maluluy-on nga paghatag.”​—⁠2 Corinto 8:​1-7.

Ang huwaran sang nagasakripisyo sa kaugalingon nga mga taga-Macedonia nagpahunahuna sa mga taga-Corinto. Ang Corinto kilala sa iya manggad, luho, kag komersio. Ang iban sang kauturan didto mahimo nga imol, apang, sa kabilugan, ang kongregasyon wala sing duhaduha nga manggaranon sang sa mga Cristiano sa Macedonia nga yara sa “daku nga kaimulon.” Apang, ang mga taga-Macedonia nag-amot “labaw sa ila ikasarang.” Wala na sila gintiklod ni Pablo sa pag-amot. Ti ‘nakiluoy’ sila kay Pablo nga ‘may pagkahanuot’ nga paambiton sila sa sining pag-amot! Pamatuod ini nga ang taga-Macedonia nga mga Cristiano ‘naghatag [gid] sang ila kaugalingon sa Ginuo [sa wala sing hawid nga pagdedikar] kag kay [Pablo kag sa iya mga kaupod],’ nga nagapasakop sa ila teokratiko nga pagtuytoy.

Natilawan sa Ila Gugma kag Pagkaalwan

Mapahulag man bala ang mga taga-Corinto sa ‘pagbugana sa maluluy-on nga paghatag’? Sa iya una nga pagduaw sa Corinto, napilitan si Pablo sa pagsakdag sang iya kaugalingon subong manughimo sing tolda. (Binuhatan 18:​1-3) Padayon niya nga ginsakdag ang iya kaugalingon bisan sang may kongregasyon na didto, nga nagalikaw sa paggamit sang iya “awtoridad” subong bug-os tion nga ebanghelisador sa pagbaton sing pinansial nga bulig.​—⁠1 Corinto 9:​3-12.

Ang komentarista sa Biblia nga si Thomas Scott nagsiling: “Mahimo nga may nasaksihan sia nga pila ka butang sa disposisyon sang taga-Corinto nga mga Cristiano, nga una nga naghaylo sa iya nga indi magbaton sing bisan anong pagsakdag gikan sa ila.” Ayhan naimpluwensiahan sang makagod nga materyalismo sa palibot nila, ang manggaranon nga mga taga-Corinto mahimo nga indi maalwan. Mahimo nga nahangawa man si Pablo nga basi duhaduhaan sang mahuyog sa negosyo nga mga taga-Corinto ang iya motibo kon magbaton sia sing pinansial nga bulig. Mahimo nga may mga utod man nga, kaangay sang iban sa Tesalonica, tamaran kag luyag magsalig na lang sa ila mga masigka-Cristiano.​—⁠2 Tesalonica 3:​7-12.

Ano man ang kahimtangan, si Pablo kag ang iya mga kaupod nagdesisyon nga sakdagon ang ila kaugalingon, “agod nga indi kami magsablag sa maayong balita nahanungod kay Cristo.” (1 Corinto 9:12) Apang, sang ulihi, namigado si Pablo, nga wala malipod sa imol nga kauturan nga nagapuyo sa Filipos. Ginsilingan ni Pablo ang mga taga-Corinto: “Ginkawatan ko ang iban nga kongregasyon nga nagabaton sing bulig sa ila agod nga makaalagad ako sa inyo; kag sang yara ako kaupod ninyo kag sa kakulangan, wala ako mangin lulan sa bisan kay sin-o, kay ang mga kauturan nga nag-abot gikan sa Macedonia [mahimo gid Filipos] bugana nga naghimuno sang akon kakulangan. Huo, subong sang sa nagligad, amo man sa palaabuton, indi gid ako magpabug-at sa inyo sa tagsa ka butang.”​—⁠2 Corinto 11:​8, 9; ipaanggid ang Filipos 4:​15, 16.

Matuod, ginbaton ni Pablo nga indi sia ‘magbaton sing bulig’ gikan sa mga taga-Corinto. Apang sang ginpangindian ni Pablo ang pagkamaabiabihon sang taga-Filipos nga babayi nga si Lidia, ‘namilit gid sia.’ (Binuhatan 16:15) Nagpakita bala ang mga taga-Corinto sing subong man sina ka mapinadayunon nga kabalaka sa materyal nga kinahanglanon ni Pablo? Nagapalibog ang isa. Ano man ang natabo, nahantop ni Pablo nga ang kahimtangan sa kongregasyon sa Jerusalem naghatag sing kahigayunan sa pagtilaw kon bala ang mga taga-Corinto kuom ukon kon bala nag-uswag na sila sa pagkaalwan. Sa amo naglaygay sia:

“Nagapamulong ako indi subong nga sugo, kundi . . . nagatilaw sang pagkamatuod sang inyo gugma. Kay ginasiling ko ini indi agod nga ang iban mahapusan kag kamo mapiutan [kon sayoron, indi nga ang iban maumpawan kag kamo magaantos]; kundi sa pag-alangay sa karon nga tion ang inyo kabugana bulig sa kinawad-on nila, agod nga ang ila kabugana man mangin bulig sa inyo kinawad-on, agod nga may pag-alangay. Subong sang nasulat na: ‘Ang nagtipon sing madamo wala maglabi, kag ang nagtipon sing diutay wala makulangi.’ ”​—⁠2 Corinto 8:​8, 13-15.

Mahimo gid nga nakapasar ang mga taga-Corinto sa pagtilaw sa ila. Pila ka tion sang ulihi si Pablo nagreport: “Ang mga utod sa Macedonia kag Acaya [diin nahamtang ang Corinto] nahamuot sa pag-amot para sa mga imol sa mga balaan sa Jerusalem.”​—⁠Roma 15:⁠26.

Pag-atubang sa Pagtilaw Karon

Apang, nakapasar bala kita sa mga pagtilaw sa gugma kag kaalwan nga nagaatubang sa aton karon? Nagapuyo kita sa “ital-ital nga mga tion nga mabudlay pakigbagayan.” (2 Timoteo 3:​1-5) Madamo sa aton ang nabug-atan sa pinansial. Kag kon kaisa “ang kailigbon sang unod kag ang kailigbon sang mga mata kag ang bugal sang kabuhi” nagatuga sang ila kaugalingon nga mga pag-ipit. (1 Juan 2:16) Daw ano kahapos nga mangin maiyaiyahon, indi mabinatyagon sa kinahanglanon sang iban!

Sa kabilugan, ang mga Saksi ni Jehova sa karon nakapasar sa mga pagtilaw sa ila gugma sa ila mga utod sa isa ka talalupangdon nga paagi. Halimbawa, sang Marso 3, 1985, naglinog sa Santiago, Chile. Ginatos ka utod ang nadulaan sing balay kag mga pagkabutang. Sa gilayon, ang mga kongregasyon nag-organisar sing bulig. “Sa sulod sang mga inoras,” report sang mga utod, “ang iban nag-alabot nga may pagkaon, mga bayo, mga habol kag iban pa mapuslanon nga mga butang.” May mga amot man nga naghalin gikan sa bug-os nga kalibutan. Madamo sing subong sini nga mga hitabo ang natabo sa sulod sang mga tinuig.

Apang indi na naton dapat hulaton pa ang kalamidad agod pamatud-an ang aton gugma sa kauturan. Kon ang isa ka masigka-Cristiano mamigado, mahimo kita mangin sensitibo sa iya mga kinahanglanon, nga wala lamang nagasiling, “Magpainit-init ka kag magpakabusog.” (Santiago 2:​15, 16) Kag kamusta ang mga yara sa bug-os tion nga pag-alagad nga “nagakabuhi paagi sa maayong balita.” Kaangay ni Pablo, wala sila nagapangayo ukon nagapaabot sing pinansial nga bulig gikan sa ila ginaalagdan. Walay sapayan, madamo ang napahulag sa pagpakita sing kaalwan sa mga nagapangabudlay sa ‘pagsab-ug sing espirituwal nga mga butang’ para sa ila.​—⁠1 Corinto 9:​11, 14.

Kag kamusta ang kinahanglanon sang bug-os kalibutan nga organisasyon sang mga Saksi ni Jehova? Ang 1989 Yearbook of Jehovah’s Witnesses nagareport nga “sang 1988 nga tuig sang pag-alagad ang Watch Tower Society naghinguyang sing $29,834,676.97 sa pag-atipan sa mga espesyal payunir, mga misyonero, kag mga nagalakbay nga manugtatap sa ila mga tulumanon sa pag-alagad sa latagon.” Daku man ang nagasto sa pag-atipan kag sa pagbakal sing mga pasilidad sang sanga, mga kasangkapan, mga makina, mga papel​—⁠indi na pagsambiton pa ang gasto sa pagkabuhi sang bilog globo nga pamilya Bethel, nga sa karon may kadamuon nga kapin sa 9,000! Dugang pa, mga 18 ka proyekto sa pagpatindog kag pagkay-o ang ginahimo karon sa nanuhaytuhay nga mga sanga, kag 19 sa aton ulong-talatapan sa Brooklyn, Nueva York. May bahin ka ba­la sa paggasto sa sining bilog globo nga hilikuton?

Subong sang sa nahaunang siglo, ang tanan karon nagapakigbahin sa pagpas-an sining salabton, lakip ang mga imol, nga, paagi sa ila diutay nga mga amot, nangin daku nga panakdag sa Sosiedad sa pinansial. Nasapwan sang iban nga nakabulig ang pagsunod sa huwaran nga ginpahamtang sa 1 Corinto 16:2 kag regular nga nagabadyet sing personal nga kuwarta agod iamot sa lokal nga Kingdom Hall. Ang iban mahimo mamat-od sa pag-amot sing kuwarta direkta sa Watch Tower Society sa 25 Columbia Heights, Brooklyn, New York 11201, ukon sa isa sang mga sanga talatapan sini.

Saligi nga ginatalupangod ni Jehova sila nga, paagi sa ila pagkaalwan, nagapamatuod sa pagkamatuod sang ila gugma. Indi pagdinguti ang imo kaugalingon sang mga pagpakamaayo! Si Pablo nanaad: “Dugang pa, ang Dios makasarang sa pagpabugana sa inyo sang iya dibagay nga kaluoy, agod nga kamo pirme bastante sa tagsa ka butang, kag may bugana para sa tagsa ka maayo nga buhat.”​—⁠2 Corinto 9:⁠8.

[Kahon sa pahina 26]

KON PAANO ANG IBAN NAGAAMOT SA HILIKUTON SANG GINHARIAN

◻ MGA REGALO: Ang kuwarta nga amot mahimo ipadala sing direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad. Ang propiedad subong sang real estate, subong man mga alahas ukon iban pa nga bilidhon nga mga butang, sarang man madonar. Dapat ini updan sing malip-ot nga sulat nga nagasiling nga amot ini.

◻ MAY KONDISYON NGA AMOT: Ang kuwarta mahimo ihatag sa Watch Tower Society subong trust, upod ang kondisyon nga kon kinahanglan ini, ibalik ini sa nagdonar.

◻ SIGURO: Ang Watch Tower Society mahimo himuon subong benepisyaryo sang tubtob-buhi nga siguro ukon sa retiro/pension nga plano. Dapat pahibaluon ang Sosiedad tuhoy sa sina nga kahimusan.

◻ TRUST: Ang tinago sa bangko mahimo himuon subong trust para sa Sosiedad. Kon himuon ini, palihog pahibal-a ang Sosiedad. Ang mga stock, bond, kag propiedad sarang man madonar sa idalom sang kahimusan nga makabenepisyo ang nagdonar samtang nagakabuhi sia. Ginadula sini nga metodo ang gasto kag pagkawalay kalig-unan sang pagpamatuod sa testamento, samtang nagapasalig nga ang Sosiedad ang magabaton sa propiedad kon mapatay ang tag-iya.

◻ MGA TESTAMENTO: Ang propiedad ukon kuwarta mahimo ipapanubli sa Watch Tower Society paagi sa legal nga testamento. Dapat padalhan ang Sosiedad sing kopya.

Para sa dugang pa nga impormasyon kag laygay tuhoy sa sini nga bagay, magsulat sa Treasurer’s Office, ­Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad.