Pagsunod sa mga Prinsipio sang Biblia—Ang Superyor nga Dalanon

“KUNGSHI, kungshi fa tsai!” (Nagapanginbulahan ako sa imo, kabay nga magmanggaranon ikaw!) Ining kinabatasan nga pagtamyaw sang mga Intsik kon Bag-ong Tuig nagapadaku sang materyal nga kadalag-an nga kinaandan gid sa bug-os nga kalibutan. Agod mapadaku ang ikasarang sang isa nga magmanggaranon, ang edukasyon halos ginasimba. Sa madamo nga pungsod sa Sidlangan, ang masami nga ginakabalak-an gid sang mga ginikanan amo kon paano mapaeskwela ang ila kabataan sa pinakamaayo nga kindergarten agod nga makaeskwela man sila sa pinakamaayo nga primarya nga eskwelahan kag padayon sa kolehiyo ukon unibersidad. Subong man, sa mga pungsod sang Nakatundan madamo ang masako gid sa paghimud-os nga magmanggaranon kag sa mahulas nga pagkabuhi.

Ano ang kinabatasan nga pagkasako sa materyal nga paghimud-os kon ipaanggid sa mga prinsipio sang Biblia? “Ang mga determinado nga magmanggaranon nagakahulog sa pagsulay kag sa siod kag sa madamo nga walay pulos kag makahalalit nga mga kailigbon, nga nagatugdang sang mga tawo sa kalaglagan kag kapahamakan,” paandam ni apostol Pablo. Nagpadayon sia sa pagsiling: “Kay ang gugma sa kuwarta amo ang gamot sang tanan nga kalainan, kag bangod sang pagtinguha sa sini nga gugma ang iban nagtalang gikan sa ila pagtuo kag nagbuno sang ila kaugalingon sing madamo nga kasakitan.” (1 Timoteo 6:9, 10) Sa pagpakita sang kamatuoran nga sa masami maathag gid kon ginauna sang mga tawo ang materyal nga mga tulumuron sa ila kabuhi, ang Manugwali 5:10 nagasiling: “Ang nagahigugma sa pilak indi mabusog sa pilak, ukon ang nagahigugma sa manggad sa kinitaan. Ini man kadayawan.”

Daw ano kasunson nagakatabo nga ang bana kag asawa nagapangabudlay sing lakas sa pagtigayon sang tanan nga luho sang kabuhi apang tuman kasako sa ila agod makalipayan nila ang ila mga pagkabutang sa balay! Sa kabaliskaran, antes ihatag ang paandam kaina kay Timoteo, si Pablo nagsiling: “Sa pagkamatuod, isa gid ka daku nga daug, ining diosnon nga debosyon upod ang pagkakontento. Gani, may kalan-on kag panapton, mangin kontento kita sa sining mga butang.” (1 Timoteo 6:6, 8) Kag ang Hulubaton 28:20 nagadugang sining ideya: “Ang tawo sang matutom nga mga buhat magatigayon sing madamo nga pagpakamaayo, apang sia nga nagadali sa pagmanggaranon indi magapabilin nga wala sing sala.” Daw ano ka makapasubo nga makita ang mainabyanon kag matinahuron nga mga tawo nga nagasakripisyo sang mataas nga mga prinsipio sang pagkabunayag, dignidad, kag maayong paggawi sa ila panikasog nga makatipon sing daku pa nga manggad!

Sa Sulod sang Pamilya

Isa ka kinabatasan sa pila ka tribo kag katawhan nga magpaabot sa ila kabataan—labi na ang ila mga anak nga babayi, nga sa ulihi magabiya sa puluy-an agod mamana—nga magtrabaho kag dayon magpadala sa balay sing kuwarta kada bulan bilang pagpakita sang ila katutom kag bilang balos sa pagpadaku sa ila sang ila ginikanan. Halimbawa, sa isa ka pamilya sang mga Saksi ni Jehova, ang anak nga babayi nagsiling sa iya mga ginikanan nga luyag niya magkadto sa isa ka siudad agod magpayunir (bug-os tion nga ministro). Hunahunaa lamang ang iya kasubo sang ginsabat sia sang iya mga ginikanan nga luyag nila nga magtrabaho sia agod makapadala sia sa balay sing kuwarta kada bulan agod ibulig sa ila! Wala, wala sila nagakinahanglan sing materyal. Gani ang prinsipio nga ang kabataan mag-atipan sa mga tigulang, balatianon, ukon nagapamigado nga mga ginikanan wala naaplikar sa sini nga bahin. (Mateo 15:4-6; 1 Timoteo 5:8) Isa lamang yadto ka kinabatasan sa ila tribo nga ang kabataan magtipon sing manggad para sa pamilya. Bisan pa masami nga kinahanglanon bangod sang kakulang sing sosyal nga mga aman, ining kinabatasan ginasunod agod lamang indi mahuy-an sa komunidad ukon bangod nalatnan sang lapnag nga handom sa “fa tsai.”

Sang gindala sang amay ini nga bagay sa isa ka Cristianong gulang, ginpalig-on sia nga binagbinagon ang pila ka kasulatan kag dayon magdesisyon. Lakip sa mga teksto nga ginpakita sa iya amo ang 2 Corinto 12:14 nga sa diin ginsambit ni Pablo ining prinsipio: “Kay ang mga anak indi dapat magtipon tungod sa mga ginikanan, kundi ang mga ginikanan tungod sa mga anak.” Sa tapos mabinagbinag ini kag ang iban pa nga prinsipio sang Biblia, nagdesisyon ang mga ginikanan. Nalipay gid ang anak nga babayi nga gintugutan sia—kag ginhatagan pa sia sing pinansial nga bulig—agod mangin regular payunir!

Pagpasakop—Tubtob Diin?

Ang isa pa ka bahin nga sa diin ang lokal nga kinabatasan kag ang nagaluntad nga paggawi masami nga nagasumpakil sa mga prinsipio sang Biblia amo ang sa pagpasakop. Sa iban nga pungsod kinabatasan nga magpasakop sing bug-os sa mga ginikanan kag sa iban nga awtoridad sa tanan nga bahin sang kabuhi. Kinaandan sa sina nga mga pungsod sa mga tawo nga 40 ang edad ukon kapin pa nga magdumili sa pagbasa sing bisan anong literatura sang relihion nga tuhay sa relihion sang ila mga ginikanan ukon sa paghimo sing daku nga desisyon nga indi anay pagpamangkuton ang mga ginikanan, sa kahadlok nga basi maakig sila. Apang, sa sina nga mga pungsod dugang nga mga pamatan-on ang nagarebelde sa ila mga ginikanan. Ang Biblia upod ang balanse nga pagtamod sini sa mga butang nagabulig sa aton nga likawan ining duha ka sobra nga butang. Ang prinsipio sang relatibo nga pagpasakop sa awtoridad sang tawo maathag nga ginsambit sa Binuhatan 4:19 kag 5:29. Subong man, talupangda kon paano ginapalig-on ni Pablo ang kabataan nga magtuman sa mga ginikanan, apang ginapakita man niya nga may limitasyon ini sang magsiling sia: “Mga anak, tumana ang inyo mga ginikanan nga nahiusa sa Ginuo, kay ini matarong: ‘Tahura ang imo amay kag iloy’; nga amo ang nahauna nga sugo nga may saad.”—Efeso 6:1-3.

Ang isa pa ka prinsipio sang Biblia nga magaapektar sang kasangkaron sang pagpasakop sang isa sa mga ginikanan amo ang pagpasakop sang asawa sa iya bana. “Magpasakop ang mga asawa sa ila mga bana subong nga sa Ginuo, kay ang bana amo ang ulo sang iya asawa,” sulat ni apostol Pablo. Nian ginpasangkad niya ang prinsipio paagi sa pagdumdom sang ginsiling ni Jehova sa tapos sang una nga kasal sang tawo: “Bangod sini ang lalaki magabiya sang iya amay kag iloy kag magaunong sa iya asawa, kag ang duha mangin isa ka unod.”—Efeso 5:22-31.

Apang, kamusta ang kahimtangan nga nagaluntad sa madamo nga pungsod nga sa diin ang anak nagapuyo gihapon sa puluy-an sang iya mga ginikanan sa tapos sang iya pagminyo? Ginapakita sang Biblia nga, sa wala pa ang Cristianong panahon, masami ini nga ginhimo sang mga sumilimba ni Jehova. Sa idalom sadto nga mga kahimtangan ang amay sang panimalay amo gihapon ang patriarka nga ulo sang pamilya, apang ang mga asawa sakop sang ila mga bana. Apang sa iban nga pungsod, masami nga ang ulo sang umagad nga babayi amo ang iya ugangan nga babayi. Bangod sini, mabudlay nga maaplikar sing bug-os sang anak nga lalaki ang prinsipio sang pagkaulo bilang bana kag sang asawa ang iya pagpasakop sing bug-os sa iya bana. Walay sapayan, balansehon sang anak nga lalaki ang pagtahod sa iya mga ginikanan sa kinahanglanon nga mangin ulo sia sang iya kaugalingon nga panimalay kon luyag niya nga si Jehova mangin ikatlo nga higot sa simbuliko nga ‘tatlo ka lubid nga indi madali mabugto.’—Manugwali 4:12.

Sa iban nga pungsod mas mabudlay ang kahimtangan kon ang isa ka lalaki magminyo sing babayi nga wala sing lalaki nga manunubli sa ila pamilya. Ang masunod nga kaso isa ka halimbawa sang kahimtangan sang madamo sina nga lalaki nga sang ulihi nakatuon kag nagtinguha sa pag-aplikar sang mga prinsipio sang Biblia. Ang isa ka Katoliko nga lalaki nagminyo sa isa ka babayi nga may Katoliko nga pamilya. Sugod gid sa umpisa, nasapwan niya nga ginatamay sia sang pamilya kag daw subong sang wala ginabayaran nga trabahador nga ginalauman sa pag-anak sing mga anak agod nga ang ngalan sang pamilya matipigan. Subong isa ka kinabatasan sa sina nga kahimusan, dapat niya ihatag ang iya ngalan kag tugutan ang iya kabataan nga kabigon subong ang mga manunubli sang pagkabutang sang pamilya. Sang maton-an niya ang prinsipio sang pagkaulo sa pamilya kag nagtinguha sa pag-aplikar sini, ang sabat sang iya asawa kaangay sang sabat sang bug-os nga pamilya: ‘Wala ka sing gindala sa sini nga pamilya, gani indi ikaw ang masunod!’

Bisan pa indi tanan sang pag-asawahay subong sini kabudlay, madali mahangpan nga kon amo ini ang kinabatasan kag ang pagpasakop sang bana ginapaabot, magautwas ang mga problema sa pag-aplikar sang mga prinsipio sang Biblia tuhoy sa pagkaulo. Mangin mabudlay para sa isa ka Cristianong bana nga ipakita ang iya mahigugmaon nga pagkaulo sa iya pamilya kag subong man kabudlay para sa asawa nga magpasakop sa iya bana nga may “hanuot nga pagtahod,” sa baylo nga sa iya mga ginikanan nga ila ginalumunan.—Efeso 5:33.

Ang isa pa ka ilustrasyon kon paano ang mga prinsipio sang Biblia mahimo nga magsumpakil sa lokal nga kinabatasan amo ang paghimos sang mga ginikanan sang pag-asawahay sang ila mga anak. Para sa Cristianong mga anak nga may ditumuluo nga mga ginikanan, masami nga problema gid ini, bangod nagabatyag ang mga ginikanan nga napaslawan sila kon ang ila mga anak indi makaminyo kon malab-ot na ang isa ka edad. Sa amo, ginagamit ang daku nga pag-ipit kag pagsakit pa gani agod piliton ang mga anak, kag labi na ang mga babayi, sa pagminyo. Kon kulang sing sangkol nga Cristianong milinyuon, himuon sang ditumuluo nga mga ginikanan ang halos tanan nga butang agod mahimos ang pag-asawahay, samtang dumdumon sang Cristiano ang prinsipio sang pagminyo “lamang sa Ginuo.”—1 Corinto 7:39; Deuteronomio 7:3, 4.

Magbenepisyo Paagi sa Pagsunod sa mga Prinsipio sang Biblia

Ang talalupangdon nga katahom sang mga prinsipio sang Biblia amo nga mapauswag sini ang kabuhi sang bisan sin-o nga nagahandom sa pag-aplikar sini, bisan diin man sia nagapuyo. Wala ini nagabaylo kag ginatingob sini ang mga pamilya. Ginahimo sini ang mga tawo nga mangin kapin ka bunayag, ginahimo sila nga mas maayo nga mga bana kag mga amay, mas maayo nga mga asawa kag mga iloy, mas maayo nga mga anak, mas maayo nga mga empleyado. Sarang sini malandas ang mga problema nga ginatuga sang nagasumpakilay nga lokal nga kinabatasan kag balansehon ang pag-aplikar sang mga kinabatasan nga wala sing direkta nagasumpakil sa kabubut-on sang Dios para sa tawo apang ayhan magahimo sang pagsunod sa sina nga kabubut-on nga kapin kabudlay. Paano ini mahimo?

Una, subong sang ginhimo sang mga Cristiano anay sa Tesalonica, dapat mo batunon ang kamatuoran nga ang Biblia amo gid “ang pulong sang Dios.” Nagakahulugan ini nga kilalahon mo gid ang kaalam gikan sa pinakamataas nga Tuburan. Ikaduha, dapat ikaw magtinguha sa pagtuon kon ano ang masiling sinang “pulong sang Dios” para sa imo kaayuhan. Ton-i ang paghangop sa mga prinsipio kag mga sugo sang Dios samtang ginabasa mo kag ginaton-an ang Biblia. Nian, subong ikatlo nga tikang, dapat mo tugutan ina nga pulong nga “magpanghikot sa imo.” (1 Tesalonica 2:13) Kinahanglan sini ang suod nga pagpakig-upod sa mga kongregasyon sang katawhan sang Dios nga karon makita sa kapin sa 200 ka kadutaan kag mga pulo sang dagat. Amo ini ang naghimo sang bug-os kalibutan nga pag-ululutod sang mga Saksi ni Jehova nga mangin subong sina—isa ka matuod nga pag-ululutod kag indi sa ngalan lamang.

Labaw sa tanan, ang katawhan ni Jehova interesado sa pagpakighiusa sa Dios paagi sa pagtugot sa mga prinsipio sang Biblia nga magtuytoy sa ila kabuhi. Ano ang mga resulta? Amo ang matuod kag dayon nga paghiusa sa iban nga nahiusa man sa Dios, subong man malinong nga hunahuna nga nagapabaskog sa isa sa tanan nga kahimtangan nga nagaluntad sa sining sistema sang mga butang karon. (Filipos 4:6, 7) Ina nga paghiusa kag suod nga kaangtanan sa Dios kag sa isa kag isa positibo gid nga bulig sa pagpauswag sang kalidad sang kabuhi karon kag nagatanyag sing saad nga kabuhi nga walay katapusan sa matarong nga bag-ong sistema sang Dios nga sa diin ang tanan nga butang sa ulihi ipasakop sa kabubut-on sang Dios.—1 Timoteo 4:8; 1 Corinto 15:28.

[Mga Laragway sa pahina 7]

Batuna ang Biblia subong “pulong sang Dios”

Tinguhai nga tun-an kon ano ang masiling sang Pulong sang Dios para sa imo kaayuhan

Tuguti ina nga Pulong nga “magpanghikot sa imo”