“Isikway Ta Man ang Tagsa ka Kabug-atan”

“Masinulub-on gid ako kag maluya ang buot,” panalabiton ni Mary. Nagapatuhoy sa lulan sang Cristianong mga responsabilidad, ining Cristianong babayi nagdugang: “Nakita ko ang akon mga abyan nga nakaeksperiensia sing kalapyo. Nabatyagan ko man ang kalapyo kag kahuol. Palihog buligi ninyo ako sa paghangop kon ngaa.”

NAKABATYAG ka man bala nga ginahuulan, ginalapyo katama sa pag-atipan sing maayo sang imo teokratikong mga responsabilidad? Mahimo bala kon kaisa nga ang Cristianong ministeryo isa ka mabug-at nga lulan, isa ka dimadala nga lulan? Madamong matutom nga mga Cristiano ang nagaagi sa panag-on sang pagluya sing buot, kay masunson kita ginapalibutan sang negatibo nga mga puwersa nga makadula sang aton kalipay. Isa gid ka hangkat ang mangin matuod nga Cristiano karon. Busa, kon kaisa ang iban mahimo magabatyag nga ang Cristianong ministeryo isa ka mabug-at nga lulan.

Paghibalo sang Kabangdanan

Ginaathag sang Kasulatan nga si Jehova wala nagahimo sing dirasonable nga kinahanglanon sa aton. Si apostol Juan nagsiling nga “ang mga sugo [sang Dios] indi mabug-at.” (1 Juan 5:3) Si Jesus nagsiling man sa iya mga sumulunod: “Itakod ang akon gota sa inyo kag magtuon kamo sa akon, kay ako malum-ok sing panghunahuna kag malulo sa tagipusuon, kag makakita kamo sing kapahuwayan sa inyo mga kalag. Kay ang akon gota mahulas kag ang akon lulan mamag-an.” (Mateo 11:​29, 30) Sing maathag indi kabubut-on ni Jehova nga magabatyag kita nga nabug-atan ukon nalulanan sa aton pag-alagad sa iya.

Paano, nian, mahimo tamdon sang isa ka matutom nga Cristiano ang iya Cristianong mga responsabilidad subong mabug-at nga lulan? Mahimo nga madamong mga rason ang nadalahig. Talupangda ining mga pinamulong ni apostol Pablo: “Isikway ta man ang tagsa ka kabug-atan . . . , kag magdalagan kita nga may pagbatas sang dalaganon nga ginabutang sa aton atubang.” (Hebreo 12:1) Ginapakita sang mga pinamulong ni Pablo nga kon kaisa ang isa ka Cristiano nagabutang sing dikinahanglanon nga mga lulan sa iya kaugalingon. Wala gid man ini nagadalahig sa serioso nga mga sala. Apang ang isa ka Cristiano mahimo nga magsala sa desisyon nga labi nga nagapagarot sang iya pagkabuhi, labi nga nagapabudlay para sa iya sa pagdalagan sa dalaganon nga ginabutang sa aton atubang.

Timbang nga Pagtamod sa Materyal nga mga Butang

Binagbinaga, halimbawa, ang nahanungod sa sekular nga trabaho. Sa madamong kadutaan, ang kahimtangan sa pangabuhi nagatulod sa isa ka Cristiano sa pagtrabaho sa malawig nga inoras. Apang, sing masunson, ang mga tawo nagatrabaho agod lamang mag-uswag ukon magtipon sing mga luho. Paagi sa pag-usisa liwat sang ila aktuwal nga mga kinahanglanon, natukiban sang iban nga mga Cristiano nga maalamon ang paghimo sing mga pagbag-o sa kahimtangan sang ila trabaho. Amo sini ang natabo kay Debbie kag sa iya bana, nga lunsay mga Saksi ni Jehova. Si Debbie nagasiling: “Ang amon pinansial nga kahimtangan nagbag-o, kag indi na gid man kinahanglan nga magpadayon ako sa pagtrabaho sa bug-os nga tion. Apang mabudlay mag-untat.” Sang ulihi nabatyagan niya ang pag-ipit sang tuman kadamo nga hilimuon. Nagapaathag sia: “Sabado lamang ang akon libre nga adlaw sa pagtrabaho sa balay. Sa masunson daw indi ko luyag magguwa sa latagon. Nasubuan ako sa sini, kag gintublag ako sang akon konsiensia, apang mahal ko ang akon trabaho! Sang ulihi, dapat ko atubangon ang katunayan. Isa lamang ang solusyon. Nag-untat ako sa pagtrabaho.” Matuod, inang daku nga pagbag-o indi posible para sa iban. Apang, ang maayo nga pag-usisa sa imo iskedyul sang trabaho mahimo nagapakita sang pagkakinahanglanon sang pila ka pagbag-o.

May iban pa nga paagi sa pagkuha sa aton sang dikinahanglanon nga mga lulan. Kamusta ang pagbuhin sa kasunson sang aton paglingawlingaw, paghampang, ukon iban pa nga kalingawan​—⁠lakip ang oras nga ginahinguyang sa pagtan-aw sing telebisyon? Kag bisan pagkatapos matigayon ang ginahandum nga pagkatimbang sa sining mga bahin, ang dalayon nga pagbag-o liwat mahimo kinahanglanon sa paghupot sina nga pagkatimbang.

Ang Pagkarasonable Importante

Ang pagkarasonable sa sinang mga butang nagabulig sa aton sa pagpasibu sa bag-ong mga sirkunstansia kon ini magautwas. Busa, mahuptan naton ang positibo nga pagtamod sa aton ministeryo.​—⁠Efeso 5:​15-17; Filipos 4:⁠5.

Nasapwan mo bala ang imo kaugalingon nga ginaipit sa pagdungan sa kon ano ang ginahimo sang iban sa pag-alagad sa Dios? Makadugang man ini sing paghimud-os kag kabang-awan sa imo kabuhi. Samtang ang maayong halimbawa sang iban pat-od gid nga makapalig-on sa imo sa paghimo sing labi, ang pagkarasonable magabulig sa imo sa pagpahamtang sing realistiko nga mga tulumuron nahisuno sa imo kaugalingon nga mga sirkunstansia kag mga ikasarang. Ang Kasulatan nagasiling sa aton: “Ang tagsatagsa magtilaw sang iya buhat, kag nian ang kabangdanan niya sa pagpabugal mangin sa iya kaugalingon lamang kag indi sa iya isigkatawo. Kay ang tagsa ka tawo magdala sang iya kaugalingon nga lulan.”​—⁠Galacia 6:​4, 5.

Ang lokal nga mga kinabatasan kag mga tradisyon mahimo man nga magadugang sa aton mga lulan. Sang panahon ni Jesus ang mga tawo nabug-atan bangod sang pagsunod sa madamong relihioso nga mga pagsulundan kag mga tradisyon nga ginapatuman sang mga tawo. Karon, ang katawhan ni Jehova ginhilway gikan sa mga tradisyon sang butig nga relihion. (Ipaanggid ang Juan 8:⁠32.) Apang, ang isa ka Cristiano mahimo nga mangin dinakaigo nga masako sa lokal nga mga kinabatasan. Halimbawa, kon kaisa ang mga hitabo subong sang kasal ginapalibutan sang detalyado nga mga kinabatasan. Ining mga kinabatasan mahimo nga sayop, kag mahimo pa gani nga makahalam-ot kag makawiwili. Apang, ang mga Cristiano mahimo nga wala sing tion ukon kuwarta sa pagtuman sinang tanan nga mga butang, kag ang pagpanikasog nga tumanon ini makadugang sa iban pa dikinahanglanon nga mga lulan.

Binagbinaga ang natabo sang ginduaw ni Jesus ang isa ka babayi nga nagahingalan kay Marta. Sa baylo nga makabenepisyo sing bug-os gikan sa iya balaan nga kaalam, “si Marta nagpalibog nahanungod sa madamong pag-aman.” Nabug-atan sia sang madamong mga detalye. (Lucas 10:40) Apang nagpanugda sing malulo si Jesus nga simplehon lamang niya ang iya ginahimos nga pagkaon agod makabenepisyo gikan sa iya pagpanudlo. (Lucas 10:​41, 42) Nagailustrar ini sing maayo nga ang maayo nga desisyon kag pagkarasonable magabulig sa imo sa pagtigayon sing nagakaigo nga pagkatimbang sa imo Cristianong ministeryo.​—⁠Santiago 3:⁠17.

Kinahanglan man ang maayo nga desisyon kon nagapili sang imo mga kaupdanan. Ang Hulubaton 27:3 nagapaandam: “Ang bato mabug-at kag ang balas hanimbang​—⁠apang ang paggamo sang kulangkulang mabug-at pa sa ila nga duha.” Sa nanuhaytuhay nga paagi, ang imo suod nga mga kaupdanan makaimpluwensia sing daku sa imo panghunahuna. Ang padayon nga pagpakig-upod sa mga tawo nga madali makakita sing sala kag magamulay sa iban sa kongregasyon magasab-ug sang binhi sang pagluya sing buot kag negatibo nga panghunahuna sa imo. (1 Corinto 15:33) Kon nahantop mo nga isa ini ka problema, ang pila ka maalamon nga pagbaylo sang imo mga kaupdanan magapamag-an sang imo lulan.

Mangin Maugdang sa Paglakat Kaupod sang Dios

Sa Miqueas 6:​8, mabasa naton ining nagapukaw sing hunahuna nga pamangkot: “Ano bala ang ginakinahanglan sa imo ni Jehova kundi . . . ang paglakat sing maugdang kaupod sang imo Dios?” Ang pagkaugdang ginasaysay subong pagkaalisto sa mga limitasyon sang isa. Ang wala nagakilala sang ila mga limitasyon magapabug-at sang ila kaugalingon sing tuman kadamo nga mga obligasyon. Natabo ini sa hamtong nga mga Cristiano, bisan sa mga manugtatap, nga nagaresulta sa pagluya sing buot, kabang-awan, kag kasubo. Si Kenneth, isa ka Cristianong gulang, nagbaton: “Nakita ko ang akon kaugalingon nga nagapadulong sa kapung-aw, kag nagsiling ako, ‘Indi ko pagtugutan nga matabo ini sa akon.’ Gani ginbuhinan ko ang iban sang akon mga obligasyon kag nagkonsentrar sa kon ano ang masarangan ko nga himuon.”

Bisan ang mapainubuson nga si Moises nabudlayan sa paghibalo sang iya kaugalingon nga mga limitasyon. Gani si Jetro, ang iya ugangan nga lalaki, nagpaathag sing maayo kay Moises nahanungod sang sobra kadamo nga trabaho nga ginatinguhaan niya nga atipanon sing kinaugalingon. “Ano bala ining ginahimo mo tungod sa katawhan?” pamangkot ni Jetro. “Ang ginahimo mo indi maayo. Magaas-as kamo . . . kay ang butang tama kabug-at sa imo. Indi ka makasarang sa paghimo sini nga ikaw lamang. . . . Magpangita ka sa tunga sang katawhan sing mga tawo nga sangkol, . . . ang tagsa ka daku nga kasaba dalhon nila sa imo, apang ang tagsa ka kasaba nga magamay sila ila magahukom. Sa sini magalabi kahapos sa imo, kag sila magadala sang lulan upod sa imo.” Gilayon nga gintulin ni Moises ang iban niya nga hilikuton sa iban, busa nasulhayan gikan sa mabug-at kuntani nga lulan.​—⁠Exodo 18:​13-26.

Sang isa ka okasyon si Moises nagsiling kay Jehova: “Ako indi makadala nga isa lamang sini tanan nga katawhan, bangod nga tama kabug-at ini sa akon.” Sa liwat, ang sabat amo nga itulin sa iban. Mahimo nga amo man ini ang solus­yon sa imo problema kon ginabug-atan ka sang tama kadamo nga mga obligasyon.​—⁠Numeros 11:​14-17.

Si Jehova Nagabulig sa Aton sa Pagdala sang Lulan

Si Jesus nagsiling nga ang iya gota mahulas kag ang iya lulan mamag-an. Ang gota nga ginaagda ni Jesus nga itakod naton sa aton kaugalingon indi amo ang gota sang pagkawalay ginahimo. Isa ini ka gota sang bug-os nga dedikasyon sa Dios subong disipulo ni Jesucristo. Busa, ang pila ka kabug-aton ukon pag-ipit nagaupod sa pagkamangin isa ka matuod nga Cristiano. (Mateo 16:​24-26; 19:​16-29; Lucas 13:24) Samtang nagalain ang kahimtangan sa kalibutan, ang mga pag-ipit nagadugang. Apang, may rason kita nga mangin positibo sa aton panimuot bangod ang imbitasyon ni Jesus nagapakita nga ang iban magatakod sang iya gota kaupod niya kag nga sia magatabang sa ila.⁠a Busa, tubtob ginatuman naton ang panuytoy ni Cristo, ang aton lulan magapabilin nga masarangan bangod magatabang sia sa aton.

Ang Dios nagaulikid sa mga nagahigugma sa iya, kag nagaamlig sia sang tagipusuon kag panghunahuna sang tanan nga mapangamuyuon nga nagatugyan sang ila lulan sa iya. (Salmo 55:​22; Filipos 4:​6, 7; 1 Pedro 5:​6, 7) “Pakamaayuhon si Jehova, nga nagadala adlaw-adlaw sang aton mga lulan, ang Dios aton kaluwasan,” siling sang salmista. (Salmo 68:19) Huo, makasalig kamo nga ang Dios adlaw-adlaw nga magadala man sang lulan para sa imo kon isikway mo ang tagsa ka kabug-aton kag magdalagan sang dalaganon sa atubang mo.

[Footnote]

[Laragway sa pahina 24]

Ang maalamon nga mga gulang handa sa pagtulin sang iban nga mga hilikuton kag sa pagpaambit sang mga lulan