May Himuon Bala ang Dios Tuhoy sa Inhustisya?

“INDI ini makatarunganon.” Maathag nga ang lamharon nga estudyante natublag gid, puno sang kaakig bangod sang personal nga pag-eksperiensia sing athagon gid nga pagtapak sa hustisya. “Kon may Dios gid man,” padayon niya, “ngaa ginapahanugutan niya ang inhustisya?” Nahanuklog ka bala sa babayi? Mahimo nahanuklog ka. Apang masabat mo man bala ang iya pamatok?

Sang bata pa, mahimo nagbatyag ka nga kon kaisa ang imo mga ginikanan nagtugot nga tratuhon ka sing dimakatarunganon. Apang inang inhustisya wala nagapamatuod nga wala sila nagaluntad, indi bala? Sing kaanggid, ang pagpahanugot sang Dios sa inhustisya wala nagapamatuod sang indi niya pagluntad.

Apang, ang lamharon nga estudyante nagsabat nga tuhay ini nga butang. Ginpakita niya nga ang dihimpit tawhanon nga amay mahimo nga dimakatarunganon diutay sa iya kaugalingon. Ukon bangod wala niya mahibalui ang tanan nga katunayan, mahimo nga indi niya madiparahan ang inhustisya sang nakita niya ini. Dugang pa, bangod sang tawhanon nga mga limitasyon, mahimo wala sia sing ikasarang sa paglubad sa inhustisya nga nakita niya. Nangatarungan sia nga indi ini maaplikar sa isa ka makatarunganon nga Dios nga nakahibalo sang tanan nga butang kag labing gamhanan.

Mahimo nagabatyag man ikaw nga ang pagpahanugot sa inhustisya indi gid bagay sa mga kinaiya sang Dios. Apang, mahimo bala nga sa iya pinakamataas nga kaalam, ang Dios may makatarunganon nga rason sa pagpahanugot sing inhustisya sa isa ka kalawigon sang tion?

Ginakabig sang mga manunulat sang Biblia ang Dios nga “mahigugmaon sa pagkamatarong kag hustisya.” “Ang tanan niya nga dalanon hustisya. Dios sang katutom, nga sa iya wala sing inhustisya,” sulat ni Moises.​—⁠Salmo 33:​5; Deuteronomio 32:​4; Job 37:⁠23.

Luwas sa pagtamod kay Jehova subong isa ka makatarunganon nga Dios nga wala malipay sa inhustisya, ang mga manunulat sang Biblia nag-ugyon nga sa pila ka adlaw dulaon niya ini. Si Isaias, halimbawa, nagtagna sini nga kahimtangan: “Yari karon! Ang isa ka hari magahari sa pagkamatarong; kag ang mga prinsipe magagahom sa katarungan. Kag ang katarungan magapuyo sa kamingawan, kag ang pagkamatarong magapabilin sa latagon nga mabungahon.” (Isaias 32:​1, 16) Apang san-o? Kag kon luyag sang Dios dulaon ang kalibutan sang inhustisya, ngaa ginpahanugutan niya ini una sa tanan?

Inhustisya​—⁠Ngaa Ginpahanugutan?

May tion sadto anay nga wala sing inhustisya nga nagaluntad sa uniberso. Kutob lamang sang nagrebelde sanday Adan kag Eva sa idalom sang pag-ipit ni Satanas nga Yawa nga ang inhustisya nakilal-an sa katawhan. Wala gilayon paglaglaga si Satanas sadtong tion sang pagrebelde. Bangod sang iya kaugalingon maayong katuyuan, ginpahanugutan sang Dios ang isa ka panag-on sang tion nga ang tawo makahimo sing mga inhustisya, kag para ini sa katuyuan nga tilawan yadtong debotado sa Iya, sa kon bala magamatutom sila sa Iya. Ang pagpili nila nga mangin mga manughupot sing integridad mangin pagpanghiwala sa ikasarang ni Satanas nga patalikdon ang tanan tawhanon nga tinuga batok sa Dios. Bangod mabindikar sa sina ang pagkasoberano sang Dios, ang mga binuhatan ni Satanas pagalaglagon, kag ang tanan nga inhustisya dulaon.

Samtang, kon pakusog nga punggan sang Dios ang tawo gikan sa paggawi sing dimakatarunganon, mahimo nga ginakuhaan niya sila sing kahilwayan sa pagpili. Luwas pa, paagi sa pagtugot sa mga tawo nga mabatyagan ang dimakatarunganon nga mga resulta sang sayop nga mga buhat sang iban, ginailustrar sang Dios kon daw ano ka makahalalit nga sanday Adan kag Eva dimakatarunganon nga nagrebelde batok sa regulasyon sang Dios, nagtal-us sa sini sang ila kaugalingon sayop nga mga talaksan. Paagi sa pagtugot nga anihon sang katawhan kon ano ang ginsab-ug nila, ang Dios nagabulig sa mga bunayag nga marealisar ang pagkasuperyor sang paghimo sang mga butang sa iya paagi.​—⁠Jeremias 10:​23; Galacia 6:⁠7.

Dugang pa, ang mga buhat sang hustisya ukon inhustisya nga ginahimo sang mga indibiduwal nagahatag sing nagapahayag nga ebidensia. Nagahatag ini sa Dios sing sibu nga sadsaran nga sa sini hukman niya kon sin-o ang takus nga magkabuhi sa duta sa bag-ong kalibutan diin ang bug-os nga hustisya ipasag-uli. Nagapakita sina, aton mabasa: “Apang nahanungod sa malauton, kon magtalikod sia sa tanan niyang sala nga nahimo kag magbantay sang tanan nakon nga palatukuran kag maghimo sang hustisya kag katadlungan, sa pagkamatarong magakabuhi sia.”​—⁠Ezequiel 18:⁠21.

Matapos Bala ang Inhustisya?

Ang pagpakig-angot ni Jehova nga Dios sa katawhan pirme makatarunganon kag ginatandaan sing mahigugmaon nga kalulo. Nagailustrar sina, sang indi mahangpan sang matutom nga alagad sang Dios nga si Abraham kon ngaa may butang nga nagakatabo, nagsiling sia sa Dios: “Indi gid mahunahuna sa imo nga ikaw magapatay sang matarong upod sa malauton sa bagay nga ang matarong mangin subong sang malauton! Indi gid ina mahunahuna sa imo. Indi bala maghimo sing matarong ang Hukom sang bug-os nga duta?” (Genesis 18:25) Sa pagkari ni Cristo, napadaku ang mga kinaiya sang Dios nga hustisya kag mahigugmaon nga kalulo. Ang halad-gawad nga kahimusan paagi kay Cristo Jesus nagbukas sang dalan para sa tanan, Judiyo kag di-Judiyo, nga makatigayon sang kabuhi nga walay katapusan. Bangod sini si apostol Pedro nagsiling: “Matuod gid ginahantup ko nga ang Dios walay ginapasulabi sa mga tawo, apang sa tagsa ka pungsod ang nagakahadlok sa iya kag nagahimo sang katarungan kalahamut-an sa iya.”​—⁠Binuhatan 10:​34, 35.

Ang mga Saksi ni Jehova aktibo sa pagbantala nga ang Mesianikong Hari sang Dios nagsugod sang iya paggahom kag nga ang tion malapit na nga ang hustisya ipasag-uli sa aton duta sing himpit gid.⁠a Himuon ini kon laglagon sina nga Hari ang karon dimakatarunganon nga kalibutan kag dugmukon ang gahom sang iya dikitaon nga dios, si Satanas nga Yawa. Ginapakita sang Biblia nga mahanabo ini sa dili madugay sa “inaway sang dakung adlaw sang Dios nga Labing Gamhanan,” nga ginatawag Armagedon.​—⁠Bugna 16:​14, 16.

“Ang Dios indi dimakatarunganon kon ipabutyag niya ang iya kasingkal,” gani ang Armagedon mangin isa ka makatarunganon nga inaway. (Roma 3:5) Pagkatapos sina, si Cristo Jesus kag ang iya kaupod nga mga gumalahom, subong sang mga apostoles, magagahom gikan sa langit sa sulod sang isa ka libo ka tuig. (Bugna 20:4) Minilyon ka tawo nga nag-antos anay sing mga inhustisya ang banhawon pasulod sa matarong nga sistema sa duta, ang orihinal nga puluy-an sang Dios, agod makaagom sing himpit nga hustisya sa nahauna nga tion sa ila kabuhi.

“Nagakahulugan Bala Ina nga ang Dios Dimakatarunganon?”

Ginpamangkot ina ni apostol Pablo nahanungod sa isa sang mga pagpakig-angot sang Dios. Ang sabat? “Siempre indi,” sulat ni Pablo. Nagapaanggid sa mga tawo sa daga nga duta nga gindihon sang maninihon nga mangin mga suludlan nga nagakabagay sang kasingkal ukon kaluoy, si Pablo nagpaathag: “Bisan pa ang Dios buot magpakita sang iya kasingkal kag magpakilala sang iya gahom, apang nagbatas sia sing dakung pagpailob sa mga tawo nga nagapaakig sa iya, bisan pa nga sila takus sa kalaglagan. Nagbatas sia sa ila tungod sa iban nga tawo, nga sa ila luyag niya mangin maluluy-on, nga sa ila luyag niya ipakilala ang kamanggaran sang iya himaya.”​—⁠Roma 9:​14, 20-24, The Jerusalem Bible.

Nahanungod sa lamharon nga estudyante nga ginsambit kaina, masapwan mo kon kaisa nga mabudlay hangpon kon ngaa ginapahanugutan sang Dios ang inhustisya sa kabilugan ukon sa pila ka ispisipiko nga sala. Apang sin-o kita​—⁠nga mga gindihon sang iya kamot​—⁠ang magapangduhaduha sa iya pagpailob kag kaalam sa paghimo sina? Si Jehova nga Dios nagsiling kay Job: “Walaon mo bala ang akon hustisya? Tagudilian mo bala ako agod nga mapakamatarong ka?”​—⁠Job 40:⁠8.

Indi gid naton luyag nga himuon ina. Sa baylo, luyag naton magkalipay sa pagkahibalo nga bisan ang inhustisya yara gihapon sa aton, dulaon ini sa ulihi sang Dios sang hustisya sa bug-os nga duta.

[Footnote]

[Piktyur sa pahina 23]

Ang pagpahanugot sa inhustisya indi mahimo gamiton sa pagpamatuod nga ang Dios wala nagaluntad

Dios bala ang basulon kon indi paggamiton sang hubog nga tsuper ang iya mga kinaiya sang sentido-kumon, pagpugong sa kaugalingon, kag patugsiling?

Ang tion malapit na nga ang bug-os nga hustisya ipasag-uli sa aton duta