Pagtuo—Ang Kinaiya nga Nagapabakod sa Aton

ANG pagtuo makapabakod gid sa aton. Halimbawa, bisan gusto ni Satanas nga madula naton ang aton kaangtanan kay Jehova, ang pagtuo makabulig sa aton nga ‘mapalong ang tanan nga nagadabadaba nga baslay sang isa nga malauton.’ (Efe. 6:16) Kon may pagtuo kita, mabatas naton ang mga problema nga daw pareho sa mga bukid kadaku. Nagsiling si Jesus sa iya mga disipulo: “Kon may pagtuo kamo nga subong kadaku sang binhi sang mustasa, makasiling kamo sa sini nga bukid, ‘Saylo didto,’ kag magasaylo ini.” (Mat. 17:20) Bangod nakahibalo kita nga ang pagtuo makapabakod sang aton kaangtanan kay Jehova, dapat binagbinagon naton ini nga mga pamangkot: Ano ang pagtuo? Paano ang aton tagipusuon makaapekto sa aton pagtuo? Paano naton mapabakod ang aton patuo? Kag kay sin-o kita dapat magtuo?—Roma 4:3.

Ang pagtuo wala lang nagakahulugan sang pagpati sa mga ginasiling sang Biblia, kay bisan “ang mga demonyo nagapati man [nga may Dios] kag nagakurog pa gani.” (Sant. 2:19) Ti, ano ang pagtuo?

Duha ang aspekto sang pagtuo suno sa Biblia. Una, “ang pagtuo amo ang masaligan nga pagpaabot sa kon ano ang ginalauman.” (Heb. 11:1a) Kon may pagtuo ka, nagapati ka gid nga ang tanan nga ginasiling ni Jehova matuod kag matuman. Halimbawa, nagsiling si Jehova sa mga Israelinhon: “Kon maguba ninyo ang akon katipan tuhoy sa adlaw kag sa gab-i, agod wala na sing adlaw kag gab-i, maguba man ang akon katipan kay David nga akon alagad.” (Jer. 33:20, 21) Nabalaka ka bala nga indi na magbutlak kag magtunod ang adlaw, kag wala na sing adlaw kag gab-i? Kon wala ka nagaduhaduha nga may pisikal nga mga kasuguan nga nagapaposible sa duta nga magtiyog sa iya axis kag maglibot ini sa adlaw, indi bala nga indi ka man dapat magduhaduha nga matuman sang Manunuga sang sini nga mga kasuguan ang iya mga promisa?—Isa. 55:10, 11; Mat. 5:18.

Ikaduha, ang pagtuo amo “ang pamatuod nga ang imo ginapatihan matuod, bisan wala mo pa ini makita.” Ang pagtuo amo “ang pamatuod,” ukon “makapakumbinsi nga ebidensia,” sang mga butang nga indi makita sang mga mata pero matuod. (Heb. 11:1b; footnote) Ano ang halimbawa sini? Ano abi kon pamangkuton ka sang isa ka bata nga, ‘Matuod bala nga may hangin?’ Bisan indi mo makita ang hangin, mahimo sugiran mo ang bata parte sa pagginhawa, ang resulta kon maghuyop ang hangin, kag iban pa nga ebidensia nga nagapamatuod nga may hangin. Kon makumbinsi ang bata sang mga ebidensia, magapati sia nga may mga butang nga indi makita pero matuod. Sing kaanggid, ang pagtuo nabase sa mabakod nga ebidensia.—Roma 1:20.

Bangod ang pagtuo nabase sa ebidensia, ang isa dapat anay magtigayon sing “sibu nga ihibalo tuhoy sa kamatuoran” antes sia makapakita sang pagtuo. (1 Tim. 2:4) Pero indi bastante ang ihibalo lang. Si apostol Pablo nagsulat: “Ginapakamatarong ang tawo nga may pagtuo sa iya tagipusuon.” (Roma 10:10) Indi lang dapat patihan sang isa ang kamatuoran, dapat man niya ini pabaloran. Kon pabaloran niya ini, mapahulag sia nga ipakita ang iya pagtuo ukon magkabuhi sa paagi nga nagapahamuot sa Dios. (Sant. 2:20) Kon indi sinsero ang pagpabalor sang isa sa kamatuoran, mahimo isikway niya bisan ang makapakumbinsi nga ebidensia. Mahimo gusto gid niya tindugan ang iya mga ginapatihan ukon pasundan ang mga handum sang iya unod. (2 Ped. 3:3, 4; Jud. 18) Amo kon ngaa sa panahon sang Biblia, indi tanan nga nakakita sang mga milagro nagtuo. (Num. 14:11; Juan 12:37) Ang balaan nga espiritu sang Dios nagapatubas lang sang pagtuo sa mga tawo nga nagahigugma sang kamatuoran, indi sang kabutigan.—Gal. 5:22; 2 Tes. 2:10, 11.

Ang isa sa mga may mabakod nga pagtuo amo si Hari David. (Heb. 11:32, 33) Pero, indi tanan sa pamilya ni David may pareho sa iya nga pagtuo. Halimbawa, nagpakita sing maluya nga pagtuo ang pinakamagulang nga utod ni David nga si Eliab sang ginsaway niya si David kay nagalalain si David sa pagpangyaguta ni Goliat. (1 Sam. 17:26-28) Wala sang isa nga natawo nga may pagtuo na. Kag indi man mapapanubli sang mga ginikanan sa ila kabataan ang pagtuo. Gani ang pagtuo ni David resulta sang iya kaangtanan sa Dios.

Sa Salmo 27, ginsaysay ni David kon paano nagbakod ang iya pagtuo. (Bersikulo 1) Ginpamalandungan ni David ang mga eksperiensia niya sang una kag kon paano sia ginluwas ni Jehova sa iya mga kaaway. (Bersikulo 2, 3) Ginpabaloran gid niya ang tabernakulo ni Jehova. (Bersikulo 4) Ginsimba ni David ang Dios sa tabernakulo upod sang iya mga masigkatumuluo. (Bersikulo 6) Nangamuyo sia sing hanuot kay Jehova. (Bersikulo 7, 8) Luyag man ni David nga matudluan sia sa dalanon sang Dios. (Bersikulo 11) Importante gid ang pagtuo para kay David bangod nagsiling sia: “Ano ang matabo sa akon kon wala ako sing pagtuo?”—Bersikulo 13.

Mapakita mo ang pagtuo nga pareho kay David kon ilugon mo ang iya mga panghunahuna kag mga ginhimo nga ginlaragway sa Salmo 27. Bangod nabase sa sibu nga ihibalo ang pagtuo, mas mahapos mo mapakita ini nga kinaiya nga ginapatubas sang espiritu sang Dios kon pirme mo ginatun-an ang Pulong sang Dios kag ang mga publikasyon nga nabase sa Biblia. (Sal. 1:2, 3) Kon nagatuon ka, maghatag sing tion sa pagpamalandong. Ang pagpamalandong pareho sang duta kag ang apresasyon pareho sang isa ka tanom nga nagatubo sa sina nga duta. Kon ginapamalandungan mo ang imo ginatun-an, mas nagadugang ang imo apresasyon kay Jehova. Samtang nagadugang ang imo apresasyon kay Jehova, mas mapahulag ka nga ipakita ang imo pagtuo paagi sa pagsimba sa iya sa mga miting sang kongregasyon kag sa pagsugid sang imo paglaum sa iban. (Heb. 10:23-25) Mapamatud-an man naton nga may pagtuo kita kon padayon kita nga ‘magpangamuyo kag indi magpangampo.’ (Luc. 18:1-8) Gani, ‘padayon nga magpangamuyo’ kay Jehova, kag magsalig nga ‘nagaulikid sia sa imo.’ (1 Tes. 5:17; 1 Ped. 5:7) Kon may pagtuo kita, himuon naton ang husto. Kag kon ginahimo naton ang husto, magabakod ang aton pagtuo.—Sant. 2:22.

Sang gab-i antes napatay si Jesus, nagsiling sia sa iya mga disipulo: “Magtuo kamo sa Dios; kag magtuo man kamo sa akon.” (Juan 14:1) Gani magtuo kita indi lang kay Jehova kundi kay Jesus man. Paano mo mapakita ang imo pagtuo kay Jesus? Binagbinagon naton ang tatlo ka paagi.

Una, hunahunaa nga ang gawad isa ka personal nga regalo sang Dios para sa imo. Si apostol Pablo nagsiling: “[Nagakabuhi ako] sa pagtuo sa Anak sang Dios, nga naghigugma sa akon kag nagtugyan sang iya kaugalingon para sa akon.” (Gal. 2:20) Kon nagatuo ka kay Jesus, nagapati ka gid nga ang gawad makabulig sa imo, nga paagi sa sini mapatawad ang imo mga sala, nga nagahatag ini sa imo sang paglaum nga mabuhi sing wala sing katapusan, kag amo ini ang pinakadaku nga pamatuod sang gugma sang Dios sa imo. (Roma 8:32, 38, 39; Efe. 1:7) Mapabakod ka sini nga indi magpadaug sa negatibo nga mga balatyagon parte sa imo kaugalingon.—2 Tes. 2:16, 17.

Ikaduha, magpalapit kay Jehova paagi sa pagpangamuyo, nga nangin posible bangod sang halad ni Jesus. Bangod sang gawad, makapangamuyo kita kay Jehova “nga may kahilwayan sa paghambal, agod matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.” (Heb. 4:15, 16; 10:19-22) Ang pagpangamuyo nagabulig sa aton nga mangin mas determinado nga sikwayon ang mga pagsulay nga magpakasala.—Luc. 22:40.

Ikatlo, tumana si Jesus. Si apostol Juan nagsulat: “Ang isa nga nagatuo sa Anak makatigayon sang kabuhi nga wala sing katapusan; ang isa nga wala nagatuman sa Anak indi makatigayon sang kabuhi, kundi ang kasingkal sang Dios magapabilin sa iya.” (Juan 3:36) Ginpakita ni Juan nga ang kabaliskaran sang pagpakita sang pagtuo amo ang indi pagtuman. Gani, nagatuo ka kay Jesus kon ginatuman mo sia. Ginatuman mo si Jesus kon ginasunod mo “ang kasuguan sang Cristo,” nga amo ang tanan niya nga gintudlo kag ginsugo. (Gal. 6:2) Ginatuman mo man si Jesus kon ginasunod mo ang mga panuytoy nga iya ginahatag paagi sa “matutom kag mainandamon nga ulipon.” (Mat. 24:45) Kon ginatuman mo si Jesus, mapabakod ka nga mabatas ang daw bagyo nga mga problema.—Luc. 6:47, 48.

Isa ka bes, may isa ka lalaki nga nagsinggit kay Jesus: “May pagtuo ako! Buligi ako nga magbakod pa ang akon pagtuo!” (Mar. 9:24) May pagtuo ini nga lalaki, pero mapainubuson sia kay nagsiling sia nga kinahanglan niya pabakuron ang iya pagtuo. Pareho sa sini nga lalaki, tanan kita makaatubang sang mga kahimtangan sa aton kabuhi nga kinahanglan naton ang mabakod nga pagtuo. Mapabakod naton tanan ang aton pagtuo subong. Natun-an naton nga para magbakod ang aton pagtuo, dapat naton tun-an ang Pulong sang Dios kag pamalandungan ini. Samtang ginahimo naton ini, nagadugang ang aton apresasyon kay Jehova. Magabakod man ang aton pagtuo kon ginasimba naton si Jehova upod ang aton mga masigkatumuluo, kon ginasugid naton sa iban ang aton paglaum, kag kon nagapadayon kita sa pagpangamuyo. Dugang pa, kon ginapabakod naton ang aton pagtuo, mabaton naton ang pinakadaku sa tanan nga padya. Ginapalig-on kita sang Pulong sang Dios: “Mga hinigugma, palig-una ang inyo kaugalingon sa inyo labing balaan nga pagtuo . . . agod makapabilin kamo sa gugma sang Dios.”—Jud. 20, 21.