Kapitulo 13

“Ang Pulong sang Dios Buhi”

Sa nagligad nga kapitulo, nakita naton nga ang laygay sang Biblia makabulig sa aton sa paglubad sang mga palaligban kag malikawan ang mga sayop. Ang wala sing katapusan nga kaalam sang laygay sang Biblia isa ka malig-on nga ebidensia nga gin-inspirar ini. Ang Biblia gid nagasiling: “Ang bug-os nga Kasulatan gin-inspirar sang Dios kag mapuslanon sa pagtudlo, sa pagsaway, sa pagtadlong sang mga butang, sa pagdisiplina sa pagkamatarong.” (2 Timoteo 3:​16) Apang kapin pa ang ginahimo sang Biblia sang sa paghatag sa aton sing maalamon nga laygay. Subong amo ang Pulong sang Dios, aktuwal nga ginapabag-o sini ang mga tawo.

Mapabag-o gid bala sang Biblia ang mga tawo? Huo, mapabag-o pa gani sini ang ila personalidad? Binagbinaga ining laygay nga narekord sa Biblia: “Dapat ninyo ubahon ang daan nga personalidad nga nagapauyon sa inyo anay dalanon sang paggawi kag nangin malaut suno sa ila malimbungon nga mga kailigbon; kundi . . . dapat kamo mapabag-o sa kusog nga nagapahikot sang inyo hunahuna, kag dapat ninyo isul-ob ang bag-ong personalidad nga gintuga suno sa kabubut-on sang Dios sa matuod nga pagkamatarong kag pagkatutom.”​—Efeso 4:​22-24.

² Posible gid bala ang magsul-ob sing bag-ong personalidad? Huo, posible ini! Sa kamatuoran, ang mangin Cristiano kon kaisa nagakinahanglan sing hinali nga pagpasibu sang personalidad. (1 Corinto 6:​9-11) Halimbawa, ang isa ka bata nga lalaki sa Bagatnan nga Amerika nailo sa edad nga nuebe. Nagdaku nga wala sing mga ginikanan nga nagatuytoy, nakatigayon sia sing daku nga mga problema sa personalidad. Sia nagaasoy: “Sang disi-18 ako, nagiyan gid ako sa mga droga kag nakasulod na sa bilangguan bangod sa pagpangawat agod sakdagon ang akon bisyo.” Apang, ang iya tiya isa sang mga Saksi ni Jehova, kag nabuligan niya sia.

³ Sia nagpaathag: “Ginsugdan sang akon tiya nga tun-an ang Biblia upod sa akon, kag pagligad sang pito ka bulan nautod ko ang bisyo sa droga.” Nagbulag man sia sa iya mga kaupod anay kag nangita sing bag-o nga mga abyan sa tunga sang mga Saksi ni Jehova. Nagpadayon sia: “Ining bag-o nga mga kaupod, upod ang akon regular nga pagtuon sa Biblia, nakabulig sa akon sa pag-uswag kag sang ulihi sa pagdedikar sang akon kabuhi sa pag-alagad sa Dios.” Huo, ining isa ka giyan anay sa droga kag kawatan nangin isa ka aktibo nga Cristiano, kag ining hinali nga pagbag-o nahimo paagi sa gahom sang Biblia. Sa pagkamatuod, subong ginasiling ni apostol Pablo, ”Ang pulong sang Dios buhi kag gamhanan.”​—Hebreo 4:12.

Nagbag-o Paagi sa Ihibalo

⁴ Paano ginapabag-o sang Biblia ang mga tawo? Ang sabat makita sa ginasiling sang Biblia: “Huklasa sila tanan gikan sa imo, kasingkal, kaakig, kalautan, pasipala, kag malaw-ay nga pululungon sang inyo baba. Dili kamo magbinutigay. Ubaha ang daan nga personalidad upod ang mga buhat sini, kag isul-ob ang bag-ong personalidad, nga paagi sa sibu nga ihibalo ginabag-o suno sa larawan sang Isa nga nagtuga sini.”​—Colosas 3:​8-10.

⁵ Talupangda ang importante nga papel sang sibu nga ihibalo sa Biblia. Ginapaathag sang Biblia kon ano nga mga kinaiya ang dapat naton sikwayon kag kon ano ang dapat naton palambuon. Ina nga ihibalo lamang may yara gamhanan nga epekto, subong nasapwan sang isa ka pamatan-on nga lalaki sa bagatnan nga Europa. May daku sia nga problema: ang sobra nga pag-init sang ulo. Samtang nagadaku sia, pirme lang sia nagapakig-away, kag agod may mapaukpan sia sang iya kaakig, nagtuon sia sing boksing; apang indi niya gihapon makontrol ang iya pagkamaakigon. Sang yara sia sa armada, daku ang nangin problema niya sang ginsakit niya ang iya kaupod nga soldado. Sang magbiya na sia sa armada, nagpangasawa sia apang ginasakit niya ang iya asawa. Sa isa ka pagbaisay sang pamilya, ginsakit pa gani niya ang iya kaugalingon nga amay, amo kon ngaa nag-uy-oy sia sa duta. Isa sia matuod ka maakigon kag masingki nga tawo!

⁶ Apang, sang ulihi, gintun-an niya ang Biblia upod sa mga Saksi ni Jehova kag nabatian niya ang laygay subong sang masunod: “Dili magbayad sa bisan kay sin-o sing malaut sang malaut. . . . Kon mahimo, sa masarangan ninyo, magpakighidait sa tanan nga tawo. Dili kamo magtimalos, mga hinigugma, kundi pabayai ini sa kasingkal sang Dios.” (Roma 12:​17-19) Nakabulig ini sa iya sa pagrealisar kon daw ano kalain nga kaluyahon ang iya pagkamaakigon. Ginbiyaan niya ang boksing, sang marealisar niya nga wala ini nagahisanto sa mahidaiton nga Cristianong personalidad. Apang nagapakig-away gihapon sia sing mabaskog batok sa iya pagkamaakigon.

⁷ Apang, nabuligan sia sang iya nagauswag nga ihibalo tuhoy sa mga prinsipio sang Biblia. Ginpasibu sini ang iya konsiensia, nga nagpanghikot man sa pagpamatok sa iya pagkamaakigon. Isa ka bes, sang nakahimo na sia sing pila ka pag-uswag sa iya pagtuon sang Biblia, isa ka dumuluong ang naakig kag ginsinggitan sia sing mga insulto. Nabatyagan sini nga tawo ang kinaandan nga pagsilabo sang kaakig sa sulod niya. Nian, nabatyagan niya ang isa pa ka kusog: ang pagbatyag sing kahuya; kag nagpugong ini sa iya sa pagpaguwa sang iya kaakig. Sa baylo nga ‘bayaran ang malaut sing malaut,’ ginkontrol niya ang iya kaakig. Karon, isa na sia ka nagbag-o nga tawo, nga may bag-ong personalidad, bangod sa sibu nga ihibalo gikan sa Biblia.

Pagkilala sa Dios

⁸ Matuod, madamo nga tawo ang nakahibalo sang husto nga butang nga himuon, apang nagapadaug sila sa undanon nga mga kaluyahon. Maathag nga ang sibu nga ihibalo tuhoy sa husto kag sayop indi lamang ang kinahanglanon. May lain pa nga butang nga nakabulig sa duha ka indibiduwal nga ginlaragway sa pagbag-o. Ano ini? Ang dinalan nga ginpatuhuyan kaina nagsiling: “Magsul-ob kamo sing bag-ong personalidad, nga paagi sa sibu nga ihibalo ginapabag-o suno sa larawan sang Isa nga nagtuga sini.” (Colosas 3:16) Talupangda nga, subong nga si Adan sa ginsuguran ginhimo sa larawan sang Dios, ang bag-o nga personalidad ginahimo man sa larawan sang Dios. (Genesis 1:26) Busa, ang sibu nga ihibalo nga nakabulig sa sining duha ka tawo naglakip sa ihibalo tuhoy sa Dios. Ginapahanumdom kita sini sang mga pulong ni Jesus: “Ini nagakahulugan sing kabuhi nga wala sing katapusan, ang pagtigayon nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

⁹ Paano ang ihibalo tuhoy sa Dios nagabulig sa aton sa pagbag-o sang aton personalidad? Nagahatag ini sa aton sing motibo sa pagbag-o. Kon makilala naton ang Dios paagi sa aton pagtuon sang Biblia matun-an naton ang iya balaan nga mga kinaiya kag makita ang gugma nga ginpakita niya para sa aton. Nagadul-ong ini sa aton sa paghigugma man sa iya. (1 Juan 4:19) Nian, matuman naton ang ginsiling ni Jesus sa nahauna kag labing daku nga sugo: “Dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Ang paghigugma sa Dios nagapahulag sa aton nga handumon ang pagsul-ob sing bag-ong personalidad nga nagapahamuot sa iya. Ginapahulag kita sini nga mangin kaangay sa iya sing kapin pa, bisan pa mabudlayan kita sa paghimo sini.

Tudok nga mga Kaluyahon

¹⁰ Sa pila ka kaso, isa gid ini ka daku nga pagpanikasog. Ang isa ka babayi sa Aminhan nga Amerika mabaskog nga nakig-away agod magbag-o sia. Isa ka biktima sang seksuwal nga pag-abuso sa bata, nagdaku sia sa isa ka masingki nga pamilya kag sang ulihi nagliso sia sa mga droga. Apang, mahal ang mga droga, gani ginbaligya niya ang iya kaugalingon subong pampam agod mabayaran ang bisyo. Ginagamo man niya kag ginakawatan ang mga turista kag gani kapin nga tion ang ginhinguyang niya sa bilangguan kag sa bilyaran sang sa iya puluy-an.

¹¹ Sang makilala sia sang mga Saksi ni Jehova, sia​—sa tapos sang pila ka aborsion​—nangin iloy sang isa ka bata nga wala sing amay. Walay sapayan, naluyagan niya ang iya nabatian gikan sa Biblia kag nagsugod sia sa pagtuon sini. Wala madugay nagpalambo sia sing kaangtanan sa Dios kag naghimo sing mga pagpasibu sa iya kabuhi.

¹² Apang, isa ka mabaskog nga pagpakig-away ang yara sa unhan niya, bangod tudok gid ang daan nga personalidad. Sang isa ka okasyon, nasaklaw sia sa laygay nga maayo sing katuyuan, nag-untat sa pagtuon sang Biblia, kag nagbalik sa iya dimatinlo nga paggawi. Apang indi niya malipatan ang kamatuoran sang Biblia nga gintanom sa iya, kag ginbaton niya: “Sa tion kag tion ginabatyag ko nga nakasala ako, kag ang ginasiling sang 2 Pedro 2:​22 nagalabad sa akon hunahuna: ‘Ang ido nagabalik sa iya kaugalingon nga suka kag ang nayon nahugasan lamang sa pagtubog sa lunang.’ ”

¹³ Sang ulihi, ining ihibalo nagpahulag sa iya sa paghimo sing isa pa ka determinado nga panikasog. Sia nagsiling: “Ginbuksan ko ang puwertahan kay Jehova kag pirme ako nagapangayo sing bulig sa iya sa pangamuyo.” Sini nga tion, ang bag-ong personalidad mas malig-on nga gintanom, bisan pa nagapanikasog gihapon sia sing mabaskog. Isa ka bes, bangod sang kaluyahon, nagbalik sia liwat sa pagpahubog kag imoralidad. Apang, sini nga tion, ang iya reaksion nagpakita nga nagabag-o na gid sia. Nangil-ad sia sa iya kaugalingon kag nagsiling: “Madamo nga beses ako nga nangamuyo kag nagtuon.” Sang ulihi, ang Pulong sang Dios naghatag sing gahom sa iya kabuhi tubtob sa kasangkaron nga sia nangin isa ka aktibo nga Cristiano, nga nagakabuhi sing isa ka matinlo kag dungganon nga kabuhi. Sa sulod sang pila ka tuig na karon, sia isa na ka tuhay sing bug-os nga tawo gikan sa gin-abusuhan, giyan sa droga, magamo-sing-kabuhi nga indibiduwal nga amo sia anay.

Isa ka Katawhan nga Ginpabag-o sang Pulong sang Dios

¹⁴ Ang gahom nga ginahatag sang Biblia sa kabuhi sang mapainubuson nga mga tawo nagapakita nga indi ini binuhatan sang tawo lamang. Subong inspirado nga Pulong sang Dios, amo ini ang alagyan para sa pagpanghikot sang espiritu sang Dios. Amo man nga espiritu nga nagpahanabo sang mga milagro nga ginhimo ni Jesus ang nagabulig sa aton karon sa pagdaug sa malain nga mga kinaiya kag magpalambo sing isa ka Cristianong personalidad. Sa pagkamatuod, ang sadsaran nga mga kinaiya nga dapat palambuon sang mga Cristiano​—gugma, kalipay, paghidait, pagbatas, pagkalulo, pagkaayo, pagtuo, pagkamapainubuson, kag pagpugong sa kaugalingon​—gintawag sa Biblia nga “mga bunga sang espiritu.”​—Galacia 5:​22, 23.

¹⁵ Sa karon, ining espiritu nagapanghikot indi lamang sa pila ka indibiduwal kundi sa minilyon nga “gintudluan ni Jehova” kag nagaagom sing ‘bugana nga paghidait’ gikan sa Iya. (Isaias 54:13) Sin-o ini sila? Naghatag si Jesus sing isa ka paagi nga makilala sila, sa pagsiling: “Sa sini makilala sang tanan nga kamo mga disipulo ko, kon maghigugmaanay kamo.” (Juan 13:35) Ang Cristianong gugma isa ka bunga sang espiritu kag isa ka importante nga bahin sang Cristianong bag-ong personalidad. May yara bala grupo sang mga tawo nga nagapakita sing gugma suno sa paagi nga ginsiling ni Jesus?

¹⁶ Ti, pamatii ining binalikwat gikan sa isa ka sulat nga ginpadala sa New Haven Register, isa ka pamantalaan sa Aminhan nga Amerika: “Kon naugot man kamo ukon nagapagot, [naakig], subong ko, sa ila pagpangombertir, dapat ninyo dayawon ang ila dedikasyon, ang ila kaayo, ang ila talalupangdon nga halimbawa sa tawhanon nga paggawi kag maayo nga pagkabuhi.” Amo man nga grupo ang ginapatuhuyan sang Aleman nga pamantalaan nga Münchner Merkur sang magsiling ini: “Sila ang labing bunayag kag labing sibu sa tion nga manugbayad sing buhis sa Republika Pederal [sang Alemanya]. Ang ila pagtuman sa kasuguan makita sa ila pagmaneho subong man sa estadistika sang krimen.”

¹⁷ Sin-o ang ginahambalan sining duha ka pamantalaan? Amo gihapon nga grupo nga ginhambalan sa Herald sang Buenos Aires, Argentina. Ining pamantalaan nagsiling: “Napamatud-an sang mga Saksi ni Jehova sa pagligad sang tinuig nga sila mapisan, serioso, makinuton kag mahinadlukon-sa-Dios nga mga banwahanon nga amo ang sahi nga ginakinahanglan sang pungsod.” Ang sosyolohiko nga pagtuon gikan sa Zambia nga ginbalhag sa American Ethnologist nagapatuhoy sa amo man nga grupo: “Ang mga Saksi ni Jehova nagaeksperiensia sing mas daku nga kadalag-an sang sa mga katapo sang iban nga mga denominasyon sa paghupot sing malig-on nga pag-asawahay.”

¹⁸ Ang pamantalaan nga La Stampa sa Italya nagahambal man tuhoy sa mga Saksi ni Jehova sang magsiling ini: “Sila ang labing matutom nga mga banwahanon nga mahandum sang bisan sin-o: wala sila nagalikaw sa buhis ukon nagatinguha sa paglikaw sa indi kombenyente nga mga kasuguan para sa ila kaugalingon nga bentaha. Ang maayo nga mga talaksan sang gugma sa isigkatawo, pagpangindi sa gahom, wala sing kasingki kag personal nga pagkabunayag (nga para sa kalabanan nga mga Cristiano ‘pang-Domingo nga mga talaksan’ nga maayo lamang pamatian gikan sa pulpito) nagasulod sa ila ‘adlaw-adlaw’ nga pagkabuhi.”

¹⁹ Ang isa ka propesor sa unibersidad sa Bagatnan nga Aprika nga nakaeksperiensia sing diskriminasyon sa idalom sang kasuguan sa rasa sadto nga pungsod nagtawag sa mga Saksi ni Jehova nga isa ka “katawhan nga naedukar sa mataas nga mga talaksan sang Biblia agod mangin ‘color-blind (indi makakilala sang kolor).’ ” Nagapaathag sini, sia nagdugang: “Yari ang mga tawo nga makakita sa iban kon ano sila sa sulod, indi lamang sa kolor sang ila panit. Ang mga Saksi ni Jehova karon nagaporma sang amo lamang ang matuod nga paghiliutod sang katawhan.”

²⁰ Ining mga komento nagapakita nga may yara isa ka hubon sang katawhan nga nagbukas sang ila tagipusuon sa Biblia kag sa ila nangin aktibo ang espiritu sang Dios. Takus talupangdon nga amo man ini ang katawhan nga ginkilala naton sa nagligad subong nagatuman sa sugo ni Jesus nga ibantala ang maayong balita sang Ginharian sa bug-os nga kalibutan. (Mateo 24:14) Ngaa talalupangdon gid ang mga Saksi ni Jehova sa sining mga paagi? Sa madamo nga bahin indi sila tuhay sa iban nga mga tawo. May pareho sila nga undanon nga kaluyahon, pareho nga problema sa ekonomiya, kag pareho nga sadsaran nga mga kinahanglanon. Apang subong isa ka grupo, ginahigugma nila ang Dios, serioso nga ginatamod nila ang Biblia, kag ginatugutan nila ini nga maggahom sa ila kabuhi.

²¹ Minilyon ka mga Saksi ni Jehova ang masapwan sa kapin sa 200 ka kadutaan. Nagalakip sila sa mga tawo gikan sa tanan nga rasa, hambal, kag kahimtangan sa katilingban nga nagaluntad. Apang isa sila ka nahiusa, mahidaiton, internasyonal nga paghiliutod. Maayo sila nga mga banwahanon sang bisan anong pungsod nga natabuan nga ginapuy-an nila, apang una sa tanan, mga sakop sila sang Ginharian sang Dios, kag sila tanan aktibo gid sa pagsugid sa iban sang maayong balita sinang Ginharian. Talalupangdon gid nga sa sining nabahinbahin, puno sing dumot nga kalibutan, ang isa ka grupo subong sang mga Saksi ni Jehova nagaluntad. Ang kamatuoran nga nagaluntad sila isa ka mabaskog nga ebidensia nga ang espiritu sang Dios aktibo gihapon sa tunga sang katawhan. Kag pamatuod ini nga ang Biblia gid “buhi kag gamhanan.”

[Mga Pamangkot sa Pagtinuon]

1-3. (a) Paano ginapadaku sang Biblia ang kinahanglanon nga bag-uhon ang personalidad? (b) Ano nga eksperiensia ang nagapakita sang gahom sang Biblia sa pagbag-o sang mga personalidad?

4, 5. Suno sa Colosas 3:​8-10, ano ang kinahanglanon sa pagpalambo sing bag-o nga personalidad?

6, 7. Paano ang sibu nga ihibalo sa Biblia nakabulig sa pamatan-on nga lalaki sa bagatnan nga Europa sa pagbag-o sang iya personalidad?

8. (a) Sa kay sin-o larawan ginahimo ang bag-ong personalidad? (b) Ang sibu nga ihibalo nga nagadihon sing bag-o nga personalidad dapat nga nagalakip sing ihibalo tuhoy kay sin-o?

9. Paano ang ihibalo tuhoy sa Dios nagabulig sa aton sa pagbag-o sang aton personalidad?

10, 11. Paano ang sibu nga ihibalo nakabulig sa isa ka babayi sa Aminhan nga Amerika nga magsugod sa pagbag-o sang iya personalidad?

12, 13. Ilaragway kon paano ang sibu nga ihibalo, sa tion nga matanom, nagahikot subong kusog para sa pagbag-o.

14, 15. (a) Ano nga kusog gikan sa Dios ang nagapanghikot paagi sa Biblia? (b) Ano ang pila ka kinaiya sang matuod nga mga Cristiano karon?

16, 17. Balikwata ang pila ka komento sang mga pamantalaan nga nagabulig sa pagkilala sang mga “gintudluan ni Jehova” kag nagaagom sing ‘bugana nga paghidait.’

18, 19. Paano ginlaragway ang mga Saksi ni Jehova sa Italya kag sa Bagatnan nga Aprika?

20. Paano ang mga Saksi ni Jehova talalupangdon nga tuhay?

21. Ano ang ginapamatud-an sang kamatuoran nga ang isa ka katawhan subong sang mga Saksi ni Jehova makaluntad sa karon nga kalibutan nga puno sing dumot?