Diosnon nga Pagkamatinumanon sa isa ka Nabahinbahin sa Relihion nga Pamilya

“MASAKIT pa ini sangsa bisan anong pisikal nga tuk-ap. . . . Pamatyag ko nga daw may labhag ang bug-os ko nga kalawasan, apang wala sing isa nga nakakita sini.” “Luyag ko na gid mag-ampo kon kaisa . . . ukon maglayas sa balay kag indi na magbalik pa.” “Mabudlay ang maghunahuna sing matadlong kon kaisa.”

Ginapakita sinang puno sing emosyon nga mga pinamulong ang pagkawalay pasingadtuan kag masubo nga balatyagon. Balatyagon ini sang mga biktima sang berbal nga pag-abuso​—⁠mga sumbong, pamahog, pagbuyayaw, dipagsapak⁠—​kag bisan sang pisikal nga pag-buso gikan sa mga tiayon kag katapo sang pamilya. Ngaa ginatratar gid sing malain ini nga mga tawo? Bangod lamang sang magkatuhay nga mga pagtuluuhan sa relihion. Sa idalom sining mga kahimtangan, ang pagpuyo sa isa ka nabahinbahin sa relihion nga pamilya nagahimo sa pagsimba kay Jehova nga isa ka daku nga hangkat. Apang, madamo sang nabiktima nga mga Cristiano ang madinalag-on nga nagpakita sing diosnon nga pagkamatinumanon.

Sing mapinasalamaton, ina nga kaakig kag kahuol indi masapwan sa tanan nga pamilya nga nabahinbahin sa relihion. Walay sapayan, nagaluntad ini. Amo bala sini ang kahimtangan sa imo puluy-an? Nian, mahimo nga mabudlayan ka sa paghupot sing pagtahod sa imo tiayon ukon sa imo mga ginikanan. Kon isa ikaw ka asawa sa amo nga kahimtangan ukon isa ka anak sa amo nga palibot, paano ka magmadinalag-on sa pagpakita sing diosnon nga pagkamatinumanon sa isa ka nabahinbahin sa relihion nga puluy-an? Ano nga suporta ang mahatag sang iban? Kag paano ginatamod sang Dios ang mga bagay?

Ngaa Mabudlay Gid ang Mangin Matinumanon?

Ang pagkamaiyaiyahon kag pagkadimapinasalamaton sang kalibutan nagaimpluwensia sa imo kaugalingon dihimpit nga mga huyog kag nagahimo sa diosnon nga pagkamatinumanon nga isa ka padayon nga paghimakas. Nahibaluan ini ni Satanas, kag determinado sia nga gub-on ang imo determinasyon nga mangin isa ka Cristiano. Ginagamit niya sa masami ang mga katapo sang pamilya nga may diutay ukon wala sing pag-apresyar kag pagtahod sa diosnon nga mga talaksan. Ang imo mataas espirituwal kag moral nga mga kabilihanan masami nga tuhay sangsa iya sang imo dimatinuuhon nga pamilya. Nagakahulugan ini sing magkatuhay nga mga pagtamod sa pagginawi kag hilikuton. (1 Pedro 4:4) Ang pag-ipit sa paghimo sa imo nga magtalikod sa Cristianong talaksan mahimo nga mabaskog, bangod nga gintuman nimo ang sugo: “Dili kamo magpakig-ambit sa ila dimabungahon nga buhat sang kadudulman.” (Efeso 5:11) Ginatamod nila nga wala na ikaw sing ginahimo nga husto. Bangod ini tanan sang imo relihion. Isa ka iloy, ang nangayo sing bulig sa iya bana bangod ginabudlayan sia sa iya nagamasakit nga kabataan ang nakatigayon sing masakit nga sabat, “May tion ka gani sa imo relihion; indi mo kinahanglan ang bulig.” Ang subong sina nga mga komento nagadugang sa hangkat nga mangin matinumanon.

May mga tion man nga ayhan wala ikaw nagaugyon tuhoy sa pila ka butang nga indi sing talangkod supak sa Kasulatan. Apang, narealisar mo nga bahin ikaw sang isa ka pamilya kag sa amo may pila ikaw ka obligasyon. “Naugot gid ako sa paghunahuna kon paano kami ginatratar sang akon amay bangod narealisar ko nga nagabatyag sia nga nagaisahanon,” siling ni Connie. Dapat ko pirme pahanumdumon ang akon kaugalingon nga indi magkaugot sa pagpamatok sang akon amay. Kinahanglan ko hambalan ang akon kaugalingon nga may malig-on sia nga rason kon ngaa indi sia ugyon ukon ginasikway ang amon tindog. Si Satanas amo ang manuggahom sining sistema sang mga butang.” Si Susan, nga nakapamana sing isa ka ditumuluo, nagpanugiron: “Sang primero luyag ko makigbulag sa akon bana​—⁠apang indi na karon. Nahibaluan ko nga ginagamit sia ni Satanas sa pagtilaw sa akon.”

Ang mga panikasog ni Satanas agod pabatyagon ikaw nga wala sing pulos daw wala nagauntat. Pila ka adlaw ang nagalipas nga wala ikaw ginabugno sang imo tiayon. Mangin masubo gid ang kabuhi. Ginadula sini ang pagsalig kag pagtahod sa kaugalingon kag nagatilaw sang imo pagkamatinumanon sa Dios. Ang mga kabataan nagabatyag man sing emosyonal kag pisikal nga pagluya. Sang isa ka tion, bisan pa namatok ang ila mga ginikanan, ang tatlo ka pamatan-on nga alagad sang Dios matutom nga nagtambong sa Cristianong mga miting. Ang isa sa ila, isa na karon ka bug-os tion nga ministro, nagsiling: “Nagbatyag kami sing kakapoy sa emosyon; indi kami matulugan; masinulub-on gid kami.”

Ano ang Ginapaabot sang Dios sa Imo?

Ang pagkamatinumanon sa Dios pirme nga una sa tanan, kag ang relatibo nga pagkamatinumanon sa pagkaulo sang bana mangin suno pirme sa panuytoy ni Jehova. (Binuhatan 5:29) Mahimo nga mabudlay ina, apang posible ini. Pirme magpangayo sing bulig sa Dios. Luyag niya ikaw nga “magsimba sa espiritu kag kamatuoran” kag mamati kag magpasakop sa iya panuytoy. (Juan 4:24) Ang ihibalo gikan sa Pulong sang Dios, samtang ginapuno sini ang husto nga sahi sang tagipusuon, nagapahulag sing kinabubut-on nga pagkamatinumanon. Bisan pa nga mahimo magbag-o ang imo mga kahimtangan, si Jehova kag ang iya Pulong wala nagabag-o. (Malaquias 3:​6; Santiago 1:17) Gintangdo ni Jehova ang pagkaulo sa bana. Matuod ini bisan kon ginabaton niya ang pagkaulo ni Cristo ukon wala. (1 Corinto 11:3) Bisan pa nga mabudlay batunon ukon batason kon nagaatubang ikaw sing padayon nga pag-abuso ukon sing pagpakahuya, si disipulo Santiago nagasiling: “Ang kaalam nga gikan sa hitaas . . . matinumanon.” (Santiago 3:17) Ang pagkilala sining pagkaulo sing walay duhaduha kag ang pagbaton sa sini nagakinahanglan sing espiritu sang Dios, ilabi na sa bunga sini nga gugma.​—⁠Galacia 5:​22, 23.

Kon ginhigugma mo ang isa, mas madali ang magpakita sing diosnon nga pagkamatinumanon sa ginpatok sang Dios nga awtoridad. Ang Efeso 5:​33 nagalaygay: “Ang tagsatagsa sa inyo maghigugma sang iya asawa subong sang iya kaugalingon; sa pihak nga bahin, ang asawa dapat magtahod sa iya bana.”

Binagbinaga si Jesus. Gin-abusuhan sia sing berbal kag sing pisikal, apang wala sia sing may gintamay. Nagpabilin sia nga wala sing sala. (1 Pedro 2:​22, 23) Agod malandas ni Jesus ang subong sadto ka daku nga kahuy-anan, kinahanglan niya ang daku nga kaisog kag matutom nga gugma sa iya Amay, si Jehova. Apang, ang gugma “nagabatas sang tanan nga butang.”​—⁠1 Corinto 13:​4-8.

Ginpahanumdom ni Pablo ang iya masigkamanugpangabudlay nga si Timoteo, kag ginapahanumduman niya kita karon: “Ang Dios wala maghatag sa aton sing espiritu sang katalaw, kundi sang gahom kag sang gugma kag sang maligdong nga panghunahuna.” (2 Timoteo 1:7) Ang hanuot nga gugma kay Jehova kag kay Jesucristo makapahulag sa imo sa diosnon nga pagkamatinumanon kon ang kahimtangan daw imposible nga mabatas. Ang maligdong nga hunahuna makabulig sa imo nga mahuptan ang balanse nga pagtamod kag mahuptan ang imo igtalupangod sa imo kaangtanan kay Jehova kag kay Jesucristo.​—⁠Ipaanggid ang Filipos 3:​8-11.

Mga Tiayon nga Nagmadinalag-on sa Pagpakita sing Diosnon nga Pagkamatinumanon

Kon kaisa kinahanglan mo nga maghulat sing malawig nga tion agod makita kon paano atipanon ni Jehova ang imo mga palaligban. Apang, indi malip-ot ang iya mga kamot. “Himua pirme ang mga butang nga ginhatagan ikaw ni Jehova sing kinamatarong kag pribilehiyo nga himuon​—⁠sa pagsimba sa iya sa mga miting kag mga asambleya, sa pagtuon, sa pag-alagad, kag sa pagpangamuyo,” laygay sang isa nga nagmadinalag-on sa pagpakita sing diosnon nga pagkamatinumanon. Ang imo mga panikasog amo ang ginapakamaayo ni Jehova, indi lamang ang imo mga nahimuan. Sa 2 Corinto 4:​17, si apostol Pablo nagsiling nga ‘ang kapipit-an umalagi lamang, apang nagaaman ini sa amon sang dayon nga himaya.’ Pamalandungi ini. Makapaumpaw ini sa imo. Ang isa ka asawa naghinumdom: “Wala sing kaayuhan ang akon kabuhi sa pamilya, kag kon kaisa nagaduhaduha ako kon bala nahamuot sa akon si Jehova. Apang ang isa ka butang nga ginakabig ko nga iya pagpakamaayo amo ang katunayan nga nalandas ko ining mabudlay nga mga kahimtangan nga may maayong panghunahuna sangsa akon bana. Ang pagkahibalo nga ang aton mga buhat nagapahamuot kay Jehova nagahimo nga takus sa bug-os nga panikasog.”

Si Jehova nanaad nga indi niya ikaw pagtugutan nga makaeksperiensia sing mga kahimtangan nga indi mo masarangan. Magsalig sa iya. Kapin ang iya nahibaluan sangsa imo, kag kilala niya ikaw sing maayo sangsa imo pagkakilala sa imo kaugalingon. (Roma 8:​35-39; 11:33; 1 Corinto 10:​13) Ang pagpangamuyo kay Jehova sa mabudlay nga mga kahimtangan makabulig. Mangamuyo para sa panuytoy sang iya espiritu, ilabi na kon wala mo mahibaluan kon diin ka mapadulong ukon paano atubangon ang isa ka kahimtangan. (Hulubaton 3:​5; 1 Pedro 3:12) Padayon nga mangamuyo sa iya para sa pagpaumod, pagpugong sa kaugalingon, kag pagkamapainubuson sa pagsunod sa awtoridad sa imo kabuhi. Ang salmista nagsiling: “Si Jehova akon igang, kag akon kuta, kag akon Manluluwas.” (Salmo 18:2) Ang pagdumdom sini isa ka makapalig-on nga bulig para sa sadtong yara sa nabahinbahin sa relihion nga mga panimalay.

Labaw sa tanan, tinguhai nga himuon ang imo pag-asawahay nga malipayon. Huo, nakita ni Jesus nga ang maayong balita magatuga sing pagbinahinbahin. Apang, mangamuyo, nga ang bisan anong pagbinahinbahin indi resulta sang imo panimuot ukon pagginawi. (Mateo 10:​35, 36) Sa sini nga katuyuan, ginapahaganhagan sing pagbinuligay ang mga problema sa pag-asawahay. Bisan kon ikaw lamang ang nagapakita sining nagakaigo nga panimuot, may daku ini nga mahimo sa pagtapna sing mga problema nga maglab-ot sa tuman nga pagbanggianay kag pagbinahinbahin. Ang paumod kag gugma tuman ka importante. “Mangin malulo” kag “magmapainumuron.”​—⁠2 Timoteo 2:⁠24.

Si apostol Pablo nangin “tanan nga butang sa tanan nga sahi sang tawo.” (1 Corinto 9:22) Sing kaanggid, samtang wala ginakompromiso ang Cristianong mga obligasyon, mahimo nga kinahanglan mo kon kaisa nga bag-uhon ang imo eskedyul agod maghinguyang sing mas madamo nga tion upod sa imo tiayon kag pamilya. Maghatag sing mas madamo nga tion kon posible sa isa nga imo ginpili nga ipaambit ang imo kabuhi. Magpakita sing Cristianong pagkamapatugsilingon. Isa ini ka ekspresyon sang diosnon nga pagkamatinumanon.

Masapwan sang mahinadlukon sa Dios kag mapinasakupon nga asawa nga mapasibusibuon kag mahinuklugon nga mahapos ang magpakita sing diosnon nga pagkamatinumanon. (Efeso 5:​22, 23) Ang malulo nga mga tinaga, “naunawan sing asin,” makabulig sa pagpahaganhagan sa kasunson sang posible nga mga pagbanggianay.​—⁠Colosas 4:​6; Hulubaton 15:⁠1.

Ang diosnon nga kaalam nagalaygay sa imo nga husayon ang mga dipaghangpanay sa gilayon kag ipasag-uli ang paghidait upod sa maayong mga tinaga nga makapalig-on, sa baylo nga magtulog nga may “kaakigon.” (Efeso 4:​26, 29, 31) Nagakinahanglan ini sing pagkamapainubuson. Magsalig sing hanuot kay Jehova para sa kusog. Ang isa ka Cristianong asawa nagbaton sing mapainubuson: “Pagkatapos makapangamuyo sing hanuot, nabatyagan ko nga gin-alsa sang espiritu ni Jehova ang akon butkon sa paghakos sa akon bana.” Ang Pulong sang Dios nagalaygay: “Dili magbayad sa kay bisan sin-o sing malaut sa malaut. . . . Dag-a ang malaut paagi sa maayo.” (Roma 12:​17-21) Maalamon ini nga laygay kag dalanon sang diosnon nga pagkamatinumanon.

Mga Kabataan nga Nagapakita sing Diosnon nga Pagkamatinumanon

Ang laygay ni Jehova sa inyo mga kabataan nga yara sa nabahinbahin sa relihion nga pamilya amo: “Mangin matinumanon sa inyo mga ginikanan sa tanan nga butang, kay kalahamut-an ini sa Ginuo.” (Colosas 3:⁠20) Talupangda nga ginsambit ang Ginuong Jesucristo agod binagbinagon. Busa, ang pagkamatinumanon sa mga ginikanan indi bug-os. Ang laygay sang Binuhatan 5:​29, nga “sundon ang Dios subong manuggahom sa baylo sangsa tawo,” sa isa ka kahulugan nagapatuhoy man sa Cristianong mga pamatan-on. Magautwas ang mga kahimtangan diin dapat kamo mamat-od kon ano ang himuon pasad sa kon ano ang imo nahibaluan nga husto suno sa mga Kasulatan. Mahimo ini magresulta sa pila ka porma sang pagsilot bangod sang pagdumili sa paghimo sing isa ka buhat sang butig nga pagsimba. Walay sapayan nga indi ini maayo nga hitabo, maumpawan ikaw kag malipay pa gani sa katunayan nga nagaantos ikaw bangod sa paghimo sang kon ano ang matarong sa panulok sang Dios.​—⁠1 Pedro 2:​19, 20.

Sanglit ang imo hunahuna ginatuytuyan sang mga prinsipio sang Biblia, mahimo nga mangin tuhay ikaw sa imo mga ginikanan sa pila ka hulusayon. Wala ini nagahimo sa ila nga imo mga kaaway. Bisan pa kon indi sila dedikado nga mga alagad ni Jehova, takus sila sing nagakaigo nga pagpadungog. (Efeso 6:2) Si Solomon nagsiling: “Pamatii ang imo amay nga nagpakatawo sa imo, kag dili paghikayi ang imo iloy.” (Hulubaton 23:22) Tinguhai nga hangpon ang kalain sing buot nga ila nabatyagan bangod sang pagtigayon mo sing pagtuo nga tuhay sangsa ila. Makig-angot sa ila, kag ‘ipakita ang inyo pagkamakatarunganon.’ (Filipos 4:5) Ipaambit ang imo balatyagon kag pag-ulikid. Mangin malig-on sa pagsunod sa diosnon nga mga prinsipio, apang, “kon mahimo, suno sa masarangan ninyo, magpakighidait sa tanan nga tawo.” (Roma 12:18) Ang katunayan nga ginasunod ninyo karon ang pagsulundan sang mga ginikanan nagapakita kay Jehova nga luyag ninyo magpadayon nga magmatinumanon subong isa ka sakop sang Ginharian.

Kon Ano ang Mahimo sang Iban

Ang mga Cristiano nga nagakabuhi sa isa ka nabahinbahin sa relihion nga mga pamilya nagakinahanglan sing pagsakdag kag paghangop gikan sa mga masigkatumuluo. Makita ini sa mga pinamulong sang isa nga nagsiling: “Nagbatyag ako nga wala sing paglaum kag wala sing mahimo, bangod wala sing may mahimo ang bisan sin-o, kag wala ako sing mahimo agod bag-uhon ini. Nagasalig ako kay Jehova sa paghimo sang iya kabubut-on sa amon pamilya, bisan ano man ini.”

Ang pagpakig-upod sa mga kauturan nga lalaki kag babayi sa Cristianong mga miting isa ka dalangpan. Ginlaragway sini man nga babayi ang iya kabuhi subong sing “duha ka magkatuhay nga kalibutan. Ang isa dapat nga didto ako kag ang isa amo ang naluyagan ko nga didto ako.” Ang gugma sang paghiliutod amo ang nagahimo nga posible sa sining mga ginabudlayan sa pagbatas kag sa pag-alagad sa tanan nga sirkunstansia. Ilakip sila sa inyo mga pangamuyo. (Efeso 1:16) Sing regular, sa tanan nga okasyon, maghambal sing makapalig-on, positibo, kag sing makapaumpaw nga tinaga sa ila. (1 Tesalonica 5:14) Kon praktikal kag nagakaigo, ilakip sila sa imo teokratiko kag sosyal nga mga hilikuton.

Mga Pagpakamaayo kag mga Benepisyo sang Diosnon nga Pagkamatinumanon

Pamalandungi adlaw-adlaw ang mga pagpakamaayo kag mga benepisyo sang pagpakita sing diosnon nga pagkamatinumanon sa nabahinbahin sa relihion nga puluy-an. Padayon nga panikasugi nga mangin matinumanon. “Indi magkalapyo.” (Galacia 6:9) Ang pagbatas sa dimaayo nga mga kahimtangan kag sa walay katarungan ‘bangod sa konsensia sa Dios . . . ini kalahamut-an’ sa Dios. (1 Pedro 2:​19, 20) Mangin matinumanon tubtob sa kasangkaron nga ang matarong nga mga prinsipio kag mga kasuguan ni Jehova wala nagakakompromiso. Nagapakita ini sing katutom sa mga kahimusan ni Jehova. Ang imo diosnon nga paggginawi mahimo gani makaluwas sa kabuhi sang imo tiayon, kabataan, ukon mga ginikanan.​—⁠1 Corinto 7:​16 1 Pedro 3:⁠1.

Samtang ginatinguhaan mo nga mahatag ang mga ginapangayo kag mga ginapaabot sang isa ka nabahinbahin sa relihion nga pamilya, dumduma ang importansia sang paghupot sing integridad kay Jehova nga Dios kag kay Jesucristo. Mahimo nga magpalutos ka sa pila ka pagbanggianay, apang ang ipalutos ang integridad kalutusan sang tanan, lakip ang kabuhi mismo. Si apostol Pablo nagsiling: “Ang Dios . . . sa sining ulihi nga mga adlaw naghambal sa aton paagi sa Anak, nga ginhimo niya nga manunubli sang tanan nga butang, nga paagi sa iya man gintuga niya ang kalibutan.” Ang pagkilala sining “daku nga kaluwasan” magapalig-on sa imo nga mangin matinumanon.​—⁠Hebreo 1:​1, 2; 2:⁠3.

Ang imo wala nagakompromiso nga pagkamatinumanon kag kalig-on para sa matarong nga moralidad kag mga kabilihanan isa ka mapuslanon nga proteksion sa imo kag sa imo dimatinuuhon nga tiayon. Ang katutom nagahimo sing isa ka malig-on nga hugpong sang pamilya. Ang Hulubaton 31:​11 nagasiling tuhoy sa isa ka sangkol kag matutom nga asawa: “Ang tagipusuon sang iya bana nagasalig sa iya.” Ang imo putli nga pagginawi kag hanuot nga pagtahod mahimo makapamuklat sa mga mata sang imo dimatinuuhon nga bana. Mahimo ini magdul-ong sa iya nga batunon ang kamatuoran sang Dios.

Ang diosnon nga pagkamatinumanon matuod gid nga hamili kag makaluwas-kabuhi. Ipangamuyo ini para sa inyo kabuhi sa pamilya. Magaresulta ini sa paghidait sa hunahuna kag magadala sing pagdayaw kay Jehova.