Paano Mo Mapalipay si Jehova sa Imo Ginahambal?

Sang gintuga kita ni Jehova, ginhatagan niya kita sing pinasahi nga regalo—ang ikasarang sa paghambal. Importante bala sa iya kon paano naton ginagamit ini nga regalo? Siempre huo! (Basaha ang Santiago 1:26.) Gani paano naton gamiton ang aton ikasarang sa paghambal nga makapalipay kay Jehova?

1. Paano naton dapat gamiton ang aton ikasarang sa paghambal?

Ang Biblia nagasiling nga ‘padayon naton nga palig-unon kag pabaskugon ang isa kag isa.’ (1 Tesalonica 5:11) May kilala ka bala nga kinahanglan sang pagpalig-on? Ano ang himuon mo para mapalig-on sia? Ihambal sa iya nga nagaulikid ka sa iya. Puede mo ihambal ang mga nanamian mo sa iya. Magpamensar sing isa ka bersikulo nga makapalig-on sa iya. Dumduma man nga may daku nga epekto sa iban ang imo paagi sa paghambal. Gani, tinguhai pirme nga maghambal sing malulo.—Hulubaton 15:1.

2. Ano nga klase sang paghambal ang dapat naton likawan?

Ang Biblia nagasiling: “Indi maggua ang dunot nga pinamulong sa inyo baba.” (Basaha ang Efeso 4:29.) Buot silingon, indi kita mamuyayaw ukon maghambal sing mga tinaga nga makasakit sa balatyagon sang iban. Dapat man naton likawan ang pagkutsokutso kag pagpakalain sa iban.—Basaha ang Hulubaton 16:28.

3. Ano ang makabulig nga mangin makapalig-on ang aton ginahambal?

Sa masami, ginapakita sang aton ginahambal kon ano ang ara sa aton tagipusuon ukon hunahuna. (Lucas 6:45) Gani, tudluan naton ang aton kaugalingon nga hunahunaon ang maayo nga mga butang—mga butang nga matarong, matinlo, hiligugmaon, kag dalayawon. (Filipos 4:8) Para mahimo ini, dapat naton pilion sing maayo ang aton kalingawan kag mga abyan. (Hulubaton 13:20) Makabulig man kon mamensar kita anay antes maghambal. Pamensara kon ano ang mangin epekto sini sa iban. Ang Biblia nagasiling: “Ang paghambal nga wala ginahunahuna sing maayo kaangay sang buno sang espada, apang ang pulong sang maalamon makapaayo.”—Hulubaton 12:18.

USISAA PA GID

4. Maghalong sa imo ginahambal

Kon kaisa, may nahambal kita nga ginhinulsulan naton sa ulihi. (Santiago 3:2) Basaha ang Galacia 5:22, 23, dayon binagbinaga ini nga pamangkot:

• Diin sa sini nga mga kinaiya ang ipangamuyo mo nga makabulig sa imo nga maghalong sa imo ginahambal?

Basaha ang 1 Corinto 15:33, dayon binagbinaga ini nga pamangkot:

• Paano ang imo mga abyan kag kalingawan makaimpluwensia sa imo paagi sang paghambal?

Basaha ang Manugwali 3:1, 7, dayon binagbinaga ini nga pamangkot:

• Sa ano nga sitwasyon mas maayo nga maghipos ukon maghulat sang husto nga tion sa paghambal?

5. Maghambal sing maayo parte sa iban

VIDEO: Magpamulong sing ‘Maayo nga Makapabakod’ sa Iban (4:07)

• Sa video, ngaa gusto bag-uhon sang isa ka brother ang iya paagi sang paghambal parte sa iban?

• Ano ang ginhimo niya para mabag-o ini?

Basaha ang Manugwali 7:16, dayon binagbinaga ini nga pamangkot:

• Ano ang dapat naton tandaan kon daw makahambal kita sing malain parte sa iban?

Basaha ang Manugwali 7:21, 22, dayon binagbinaga ini nga pamangkot:

• Paano ini nga mga bersikulo makabulig sa imo nga indi dayon mangakig kon may nahambal ang iban nga indi maayo parte sa imo?

6. Mangin malulo kon nagaistorya sa imo pamilya

VIDEO: Ang Gugma kag Pagtahod Nagapahiusa sa Pamilya (3:08)

• Ano ang makabulig sa imo nga mangin malulo kon nagaistorya sa imo pamilya?

Basaha ang Efeso 4:31, 32, dayon binagbinaga ini nga pamangkot:

• Ano nga klase sang paghambal ang makapalig-on sang pamilya?

Ginhambal ni Jehova kon ano ang iya ginabatyag parte sa iya Anak nga si Jesus. Basaha ang Mateo 17:5, dayon binagbinaga ini nga pamangkot:

• Paano mo mailog si Jehova kon nagapakig-istorya sa imo pamilya?

SUMARYO

Ang aton ginahambal makapalig-on ukon makasakit sa iban. Dapat pamensaron naton anay sing maayo kon ano ang aton ihambal, san-o ini ihambal, kag kon paano ini ihambal.

Rebyu

• Ano ang pila ka paagi nga mapalig-on mo ang iban sa imo ginahambal?

• Ano nga klase sang paghambal ang gusto mo likawan?

• Ano ang makabulig para mangin malulo kag makapalig-on pirme ang aton ginahambal?

DUGANG NGA IMPORMASYON

Ano ang makabulig sa aton nga makahambal sing makapalig-on sa iban?

Tinguhai nga ang Imo Pulong Iya sang Maalamon (8:04)

Hibalua kon ano ang makabulig sa imo para indi makapamuyayaw.

“Malain Gid Bala ang Pagpamuyayaw?” (Artikulo sa website)

Tan-awa kon paano mo malikawan ang pagtsismis.

Paano Ko Malikawan ang Tsismis? (2:36)

Hibalua kon paano ginbuligan ni Jehova ang isa ka lalaki nga mauntatan ang iya pagpamuyayaw.

“Nagpalibog Ako Kon Diin Pakadto ang Akon Kabuhi” (Ang Lalantawan, Agosto 1, 2013)