Si Jehova isa ka organisado nga Dios. (1 Corinto 14:33) Gani mapaabot naton nga ang iya katawhan organisado man. Paano naorganisar ang Cristianong kongregasyon? Ano ang himuon naton para padayon ini nga organisado?

1. Sin-o ang ulo sang kongregasyon?

“Ang Cristo amo ang ulo sang kongregasyon.” (Efeso 5:23) Halin sa langit, ginadumalahan niya ang mga ginahimo sang katawhan ni Jehova sa bilog nga kalibutan. Nagtangdo si Jesus sang “matutom kag mainandamon nga ulipon”—isa ka gamay nga grupo sang madugay na nga mga gulang nga ginatawag man Nagadumala nga Hubon. (Basaha ang Mateo 24:45-47.) Pareho sa mga apostoles kag mga gulang sa Jerusalem sang unang siglo, ang Nagadumala nga Hubon nagahatag man sing direksion sa mga kongregasyon sa bilog nga kalibutan. (Binuhatan 15:2) Pero indi sila ang lider sang amon organisasyon. Nagapagiya sila kay Jehova kag sa iya Pulong, kag nagapasakop sila sa pagdumala ni Jesus.

2. Sin-o ang mga gulang kag ano ang ila responsibilidad?

Ang mga gulang amo ang matutom nga mga Cristianong lalaki nga nagatudlo base sa Biblia kag nagatatap sa katawhan ni Jehova paagi sa pagbulig kag pagpabakod sa ila. Wala sila ginasuelduhan. Nagaalagad sila “sing kinabubut-on sa atubangan sang Dios; indi tungod sa gugma sa mga bentaha, kundi sing malangkagon.” (1 Pedro 5:1, 2) Ang mga gulang ginabuligan sang mga ministeryal nga alagad, nga puede man mangin mga gulang sa ulihi.

Ang Nagadumala nga Hubon nagatangdo sang pila ka gulang para mangin manugtatap sang sirkito. Nagabisita sila sa lainlain nga kongregasyon para giyahan kag pabakuron ang mga kauturan. Sila ang nagatangdo sang mga gulang kag mga ministeryal nga alagad, nga nakasunod sa mga kalipikasyon nga ginasiling sang Biblia.—1 Timoteo 3:1-10, 12; Tito 1:5-9.

3. Ano ang responsibilidad sang kada Saksi ni Jehova?

Ang tanan sa kongregasyon ‘nagadayaw sa ngalan ni Jehova’ paagi sa pagpartisipar sa mga miting sa kongregasyon kag pagbantala depende sa ila sitwasyon.—Basaha ang Salmo 148:12, 13.

USISAA PA GID

4. Si Jesus maayo nga lider

Makapaumpaw gid ang imbitasyon ni Jesus sa aton. Basaha ang Mateo 11:28-30, dayon binagbinaga ini nga pamangkot:

• Ano ang gusto ni Jesus nga mabatyagan naton sa iya pagpanguna?

VIDEO: Nagbulig ang mga Gulang sang Naglinog sa Nepal (4:56)

Mabasa sa Biblia kon paano dapat himuon sang mga gulang ang ila responsibilidad.

Basaha ang Isaias 32:2 kag 1 Pedro 5:1-3, dayon binagbinaga ini nga mga pamangkot:

• Ano ang masiling mo kay ginailog sang mga gulang si Jesus nga nagapaumpaw sa iban?

• Ano pa ang iban nga paagi nga ginailog sang mga gulang si Jesus?

5. Ang mga gulang nagatudlo paagi sa ila halimbawa

VIDEO: Nagapanguna ang mga Gulang! (7:39)

Nangin halimbawa si Jesus sa mga nagapanguna sa kongregasyon. Basaha ang Mateo 23:8-12, dayon binagbinaga ini nga mga pamangkot:

• Ano ang ginasiling sang Biblia nga dapat himuon sang mga gulang? Pero ano ang nakita mo nga ginahimo sang mga lider sang relihion?

1. Ginatinguhaan gid sang mga gulang nga mangin mabakod sila sa espirituwal kag ang ila pamilya

2. Ginaatipan gid sang mga gulang ang tanan sa kongregasyon

3. Nagabantala pirme ang mga gulang

4. Ang mga gulang wala lang nagatudlo, nagabulig man sila sa pagpaninlo kag sa iban pa nga ulubrahon

6. Makabulig kita sa mga gulang

Ang Biblia nagahatag sa aton sing importante nga rason kon ngaa dapat kita magbulig ukon magtuman sa mga gulang. Basaha ang Hebreo 13:17, dayon binagbinaga ini nga mga pamangkot:

• Ngaa nagsiling ang Biblia nga dapat kita magtuman kag magpasakop sa mga nagapanguna? Sa banta mo, insakto bala ang ginasiling sang Biblia?

Basaha ang Lucas 16:10, dayon binagbinaga ini nga pamangkot:

• Ngaa importante nga magtuman sa mga gulang bisan sa gamay nga mga butang?

SUMARYO

Si Jesus ang ulo sang kongregasyon. Nalipay kita nga magtuman sa mga gulang nga ginadumalahan niya kay ginapaumpawan nila kita kag ginatudluan paagi sa ila halimbawa.

Rebyu

• Sin-o ang ulo sang kongregasyon?

• Paano ginabuligan sang mga gulang ang kongregasyon?

• Ano ang responsibilidad sang kada sumilimba ni Jehova?

DUGANG NGA IMPORMASYON

Tan-awa ang ebidensia nga nagaulikid gid ang Nagadumala nga Hubon kag ang mga gulang sa mga Cristiano subong.

Pagpabakod sa mga Kauturan sa mga Lugar nga Ginadumilian ang Hilikuton (4:22)

Hibalua kon ano ang ginahimo sang mga manugtatap sang sirkito.

Ang Kabuhi sang Manugtatap sang Sirkito nga Malayo sa Siudad (4:51)

Basaha kon ano ang responsibilidad sang mga babayi sa kongregasyon.

“Ang mga Saksi ni Jehova Bala May Babayi nga mga Ministro?” (Ang Lalantawan, Septiembre 1, 2012)

Hibalua kon paano nagatinguha ang mga gulang nga pabakuron ang ila mga kauturan.

“Cristianong mga Gulang​—‘Masigkamanugpangabudlay Para sa Aton Kalipay’” (Ang Lalantawan, Enero 15, 2013)

1. Ano ang laygay sang Biblia para sa mga bana?

Ginhatagan ni Jehova sing responsibilidad ang bana nga mangin ulo sang pamilya. (Basaha ang Efeso 5:23.) Gusto ni Jehova nga maghimo sia sing mga desisyon nga makabenepisyo ang iya pamilya. Ang Biblia naglaygay sa mga bana: “Padayon nga higugmaa ang inyo asawa.” (Efeso 5:25) Ano ang buot silingon sini? Ginatratar sing maayo sang mapinalanggaon nga bana ang iya asawa, bisan sila lang nga duha ukon may upod sila nga iban. Ginaproteksionan niya ang iya asawa kag ginahimo gid ang iya masarangan para mahatag ang pisikal kag emosyonal nga kinahanglanon sini. (1 Timoteo 5:8) Importante sa tanan, sia ang nagapanguna sa paghatag sing espirituwal nga kinahanglanon sang iya asawa. (Mateo 4:4) Halimbawa, puede sia mangamuyo kag magbasa sang Biblia upod ang iya asawa. Kon palangga gid sang bana ang iya asawa, padayon sia nga mangin abyan ni Jehova.—Basaha ang 1 Pedro 3:7.

Si Jesus ang Ulo sang Cristianong kongregasyon. (Efeso 5:23) Si Jesus ara subong sa langit, kag ginagiyahan niya ang iya mga sumulunod sa duta paagi sa “matutom kag mainandamon nga ulipon.” (Basaha ang Mateo 24:45.) Si Jesus mismo ang nagtangdo sa sini nga “ulipon” kag ginhatagan ini sing awtoridad, pero dapat ini gihapon magtuman sa Cristo kag mag-alagad sa mga utod sang Cristo. Sin-o ini nga ulipon? Paano kita ginatatap sini?