Kapitulo Beinte-uno

Ang Katuyuan ni Jehova Magatigayon Sing Mahimayaon nga Kadalag-an

1, 2. (a) Ano ang katuyuan ni Jehova bahin sa iya intelihente nga mga tinuga? (b) Sin-o ang nalakip sa nahiusa nga pamilya sang mga sumilimba sang Dios?

ANG tanan nga intelihente nga tinuga nahiusa nga nagasimba sa lamang matuod nga Dios, kag sila tanan nagaagom sing mahimayaon nga kahilwayan subong mga anak sang Dios​—amo ini ang mahigugmaon nga katuyuan ni Jehova. Amo man sini ang ginahandum gid sang mga nagahigugma sa pagkamatarong.

² Ginsugdan ni Jehova nga tumanon ining daku nga katuyuan sang nagsugod sia sa pagpanuga. Ang iya una nga gintuga amo ang Anak nga sugod sang ginbanhaw sia amo “ang banaag sang himaya [sang Dios] kag ang eksakto nga laragway sang iya mismo kaugalingon.” (Hebreo 1:​1-3) Ining Anak pinasahi, kay sia lamang ang gintuga sang Dios mismo. Pagkatapos sini, ang tanan nga iban pa nagluntad paagi sa sining Anak: una ang mga anghel sa langit, nian ang mga tawo sa duta. (Job 38:7; Lucas 3:​38) Sila tanan nagahuman sa isa ka bug-os uniberso nga pamilya. Para sa ila tanan, si Jehova amo ang Dios, ang Soberano sa Bug-os nga Uniberso, kag ang ila mahigugmaon nga Amay.

 3. (a) Ano pa ang napanubli naton tanan gikan sa aton unang mga ginikanan? (b) Anong mahigugmaon nga kahimusan ang ginhimo ni Jehova para sa mga kaanakan ni Adan?

³ Sang ang aton unang tawhanon nga mga ginikanan ginpakamalaut sa kamatayon subong hungod nga mga makasasala, gintabog sila sa Eden kag ginsikway sang Dios. Indi na sila bahin sang iya bug-os uniberso nga pamilya. (Genesis 3:​22-​24; Deuteronomio 32:​4, 5) Kita tanan kaliwat nila, gani natawo kita nga may huyog sa pagpakasala. Apang nahibaluan ni Jehova nga ang pila gikan sa mga kaliwat ni Adan kag ni Eva magahigugma sang pagkamatarong. Gani mahigugmaon nga naghimo Sia sing kahimusan nga sa kalalangan sini makaagom sila sing “mahimayaon nga kahilwayan sang mga anak sang Dios.”​—Roma 8:​20, 21.

Nadula Sang Israel ang Kalahamut-an nga Tindog

 4. Ano nga pribilehiyo ang ginhatag ni Jehova sa dumaan nga Israel?

⁴ Mga 2,500 ka tuig sa tapos gintuga si Adan, ginhatag ni Jehova sa pila ka tawo ang pribilehiyo nga makatigayon sing pinasahi nga kaangtanan sa Iya. Ginpili niya ang dumaan nga Israel nga mangin katawhan niya kag ginhatag sa ila ang iya Kasuguan. (Genesis 12:​1, 2) Ginhimo niya sila nga isa ka pungsod kag gingamit sila may kaangtanan sa iya katuyuan. (Deuteronomio 14:​1, 2; Isaias 43:1) Apang, ulipon gihapon sila sang sala kag kamatayon, gani wala nila maagom ang mahimayaon nga kahilwayan anay ni Adan kag ni Eva.

 5. Paano nadula sang mga Israelinhon ang ila pinasahi nga tindog sa Dios?

⁵ Walay sapayan sini, ang mga Israelinhon may kalahamut-an nga tindog sa Dios. May salabton man sila nga tahuron si Jehova subong ila Amay kag magpanghikot suno sa iya katuyuan. Ginpadaku ni Jesus ang pagkaimportante sang pagtuman nila sini nga obligasyon. (Mateo 5:​43-​48) Apang, wala ini ginhimo sang pungsod sang Israel. Bisan pa ang mga Judiyo nagsiling nga “may isa kami ka Amay, ang Dios,” si Jesus nagsiling nga ang ila ginhimo kag ang ila ginpakita nga espiritu nagahimutig sini. (Juan 8:​41, 44, 47) Sang 33 C.E., ang Kasuguan gin-untat sang Dios, kag ang pinasahi nga kaangtanan sang Israel sa iya natapos. Apang nagkahulugan bala ini nga indi na gid maagom sang katawhan ang kalahamut-an nga kaangtanan sa Dios?

Pagtipon sa “mga Butang sa Langit”

 6. Ano ang katuyuan sang “pagdumalahan” nga ginsambit ni Pablo sa Efeso 1:​9, 10?

⁶ Ginpakita ni apostol Pablo nga ang pila sa tunga sang katawhan magaagom sing pinasahi nga kaangtanan sa Dios. Halimbawa, bahin sa kahimusan ni Jehova diin ang mga nagatuo mahimo mangin mga katapo sang Iya panimalay, si Pablo nagsulat: “Ginpahibalo [sang Dios] sa aton ang sagrado nga likom sang iya kabubut-on. Nahisanto ini sa iya kahamuot nga gintuyo niya sa iya kaugalingon para sa isa ka pagdumalahan sa bug-os nga latid sang gintalana nga mga tion, nga amo, agod tipunon liwat ang tanan nga butang kay Cristo, ang mga butang sa langit kag ang mga butang sa duta.” (Efeso 1:​9, 10) Ining “pagdumalahan” nasentro kay Jesucristo. Paagi sa iya, ang katawhan nakatigayon sing kalahamut-an nga kahimtangan sa atubangan sang Dios. Ang limitado nga kadamuon sa ila may paglaum nga makakadto sa langit. Ang mas madamo magakabuhi sa duta sing dayon.

 7. Sin-o ang “mga butang sa langit”?

⁷ Una, sugod sang Pentecostes 33 C.E., ginhatagan sing igtalupangod ang “mga butang sa langit,” nga amo, ang mangin kaupod nga mga manunubli ni Cristo sa langitnon nga Ginharian. Pasad sa ila pagtuo sa balor sang halad ni Jesus, ginpahayag sila nga matarong sang Dios. (Roma 5:​1, 2) Sang ulihi, ang mga Judiyo kag mga Gentil ginlakip, kag ang “mga butang sa langit” magadamo sing 144,000. (Galacia 3:​26-​29; Bugna 14:1) Nagkalabilin na lamang sa ila ang yari pa sa duta.

Pagtipon sa “mga Butang sa Duta”

 8. Sin-o ang “mga butang sa duta,” kag ano ang ila kaangtanan kay Jehova?

⁸ Amo man nga pagdumalahan ang nagatipon sang “mga butang sa duta.” Minilyon ka tawo ang ginatipon karon nga may paglaum nga mabuhi sing dayon sa duta. Nahiusa sa nagkalabilin sang mga manunubli sang Ginharian, ginapakadaku nila ang ngalan ni Jehova kag ginabayaw ang pagsimba sa iya. (Isaias 2:​2, 3; Sofonias 3:9) Ginatawag man nila si Jehova nga “Amay” bangod ginakilala nila sia subong ang ginahalinan sang kabuhi. Kag may kalahamut-an nga tindog sila sa iya pasad sa pagtuo nila sa ginpaagay nga dugo ni Jesus. (Bugna 7:​9, 14) Apang sanglit di-himpit gihapon sila, ang pagkilala sing bug-os sa ila subong mga anak sang Dios yara pa sa palaabuton.

 9. Ano ang ginasaad sang Roma 8:​21 sa katawhan?

⁹ Ining may dutan-on nga paglaum malangkagon nga nagahulat sa tion nga ang tawhanon nga tinuga ‘mahilway gikan sa pagkaulipon sa pagkadimadinulunton.’ (Roma 8:​21) Ini nga kahilwayan magasugod kon tapuson na ni Cristo kag sang iya langitnon nga mga kasuldadusan ang dakung kapipit-an paagi sa Armagedon nga talipuspusan sini. Magakahulugan ini sang kalaglagan sang bug-os nga malauton nga sistema sang mga butang ni Satanas, nga pagasundan sang mga pagpakamaayo sang Isa ka Libo ka Tuig nga Paggahom ni Cristo sa Ginharian.​—Bugna 19:17-​21; 20:6.

10. Ang mga alagad ni Jehova magaamba sing anong ambahanon sang pagdayaw?

¹⁰ Makalilipay kon ang mga alagad ni Jehova sa duta nahiusa nga magapalanog sang ginabatyag sang iya mga alagad sa langit, nga masadya nga nagapahayag: “Dalagku kag kalatingalahan ang imo mga binuhatan, Jehova nga Dios, nga Labing Gamhanan. Matarong kag matuod ang imo mga dalanon, Hari nga dayon. Sin-o bala ang indi mahadlok kag indi maghimaya sa imo ngalan, Jehova, kay ikaw lamang ang mainunungon? Kay ang tanan nga pungsod magakari kag magasimba sa imo, bangod ang imo mga paghukom napahayag.” (Bugna 15:3, 4) Huo, ang tanan nga alagad ni Jehova mahiusa sa pagsimba sa lamang matuod nga Dios. Bisan ang mga patay banhawon kag hatagan sing kahigayunan nga magbuylog sa pagbayaw sang ila mga tingog sa pagdayaw kay Jehova.​—Binuhatan 24:15.

Makalilipay nga Kahilwayan sa Palaabuton

11. Anong makalilipay nga kahilwayan ang maagom sang mga makalampuwas sa dakung kapipit-an?

¹¹ Sa tapos madula sa duta ang kalautan paagi sa dakung kapipit-an kag sa Armagedon nga talipuspusan sini, si Satanas nga Yawa indi na mangin “dios sining sistema sang mga butang.” Ang mga nagasimba kay Jehova indi na makigsumpong sa malaut nga impluwensia ni Satanas. (2 Corinto 4:4; Bugna 20:​1, 2) Ang butig nga relihion indi na magarepresentar sing sayop kay Jehova kag magabahinbahin sa tawhanon nga katilingban. Ang mga alagad sang matuod nga Dios indi na makaeksperiensia sing inhustisya kag paghingalit sa kamot sang tawhanon nga mga awtoridad. Makalilipay nga kahilwayan ang maagom nila!

12. Paano ang tanan mahilway sa sala kag sa mga epekto sini?

¹² Subong “Kordero sang Dios nga nagakuha sang sala sang kalibutan,” gamiton ni Jesus ang balor sang iya halad sa pagdula sa mga sala sang katawhan. (Juan 1:​29) Sang si Jesus yari sa duta kag ginpatawad niya ang mga sala sang isa ka tawo, gin-ayo niya ining ginpatawad nga tawo subong pamatuod sini. (Mateo 9:​1-7; 15:30, 31) Sa amo man nga paagi, si Cristo Jesus, subong langitnon nga Hari sang Ginharian sang Dios, milagruso nga magaayo sang mga bulag, apa, bungol, kag piang, nasit-an sa hunahuna, kag sang may iban pa nga balatian. (Bugna 21:​3, 4) Dulaon sang tanan nga matinumanon ang “kasuguan sang sala” agod ang ila hunahuna kag buhat mangin kalahamut-an, para sa ila kaugalingon kag sa Dios. (Roma 7:​21-​23) Pagkatapos sang Milenyo, mangin himpit na sila, sa ‘larawan kag kaanggid’ sang lamang matuod nga Dios.​—Genesis 1:​26.

13. Sa tapos sang Isa ka Libo ka Tuig nga Paggahom, ano ang himuon ni Cristo, kag ano ang resulta?

¹³ Kon mahimpit na ni Cristo ang katawhan, nian ibalik niya sa Amay ang awtoridad nga ginhatag sa iya para sa sining hilikuton: “Itugyan niya ang ginharian sa iya Dios kag Amay, kon nalaglag na niya ang tanan nga panguluhan kag ang tanan nga awtoridad kag gahom. Kay kinahanglan sia maghari tubtob nga mabutang sang Dios ang tanan nga kaaway sa idalom sang iya mga tiil.” (1 Corinto 15:24, 25) Sa sina nga tion matuman na sing bug-os sang Isa ka Libo ka Tuig nga Paggahom sang Ginharian ang katuyuan sini; gani indi na kinahanglan nga magpabilin pa ining kabulig nga panguluhan sa ulot ni Jehova kag sang katawhan. Kag sanglit ang sala kag kamatayon nadula na sing bug-os kag ang katawhan nagawad na, indi na kinahanglan si Jesus subong Manunubos. Ang Biblia nagapaathag: “Nian ang Anak man magapasakop sa Isa nga nagpasakop sang tanan nga butang sa iya, agod ang Dios mangin tanan nga butang sa tagsatagsa.”—1 Corinto 15:28.

14. Ano ang himuon sa tanan nahimpit nga katawhan, kag ngaa?

¹⁴ Pagkatapos sini, ang nahimpit nga katawhan hatagan sing kahigayunan agod ipakita ang ila desisyon nga mag-alagad sa lamang matuod nga Dios sing dayon. Gani, antes ayupon sila sing bug-os subong mga anak niya, ining tanan nahimpit nga katawhan pagatilawan ni Jehova sa katapusan nga tion. Si Satanas kag ang iya mga demonyo buy-an gikan sa kadadalman. Indi ini magahalit sing dayon sa mga tunay nga nagahigugma kay Jehova. Apang ang bisan sin-o nga masulay sa paglalis kay Jehova laglagon sing dayon, upod sa orihinal nga rebelde kag sa iya mga demonyo.​—Bugna 20:​7-​10.

15. Ano nga kahimtangan ang magaluntad liwat sa tunga sang tanan nga intelihente nga mga tinuga ni Jehova?

¹⁵ Nian ayupon ni Jehova subong mga anak niya ang tanan nga himpit nga katawhan nga nagsakdag sang pagkasoberano sang Dios sa tion sang katapusan nga pagtilaw. Kutob sa sina nga tion, matigayon nila sing bug-os ang mahimayaon nga kahilwayan sang mga anak sang Dios subong bahin sang bug-os uniberso nga pamilya sang Dios. Ang tanan nga intelihente nga mga tinuga sa langit kag sa duta mahiusa liwat sa pagsimba sa iya subong ang lamang matuod nga Dios. Ang katuyuan ni Jehova makatigayon sing mahimayaon nga kadalag-an! Luyag mo bala mangin bahin sining malipayon, walay katapusan, bug-os uniberso nga pamilya? Kon amo, ginapalig-on ka namon nga sundon ang ginasiling sang Biblia sa 1 Juan 2:​17: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”

Repaso nga Paghinun-anon

• Antes sang pagrebelde sa Eden, ano ang kaangtanan sang tanan nga sumilimba ni Jehova sa iya?

• Ano ang salabton sang mga alagad sang Dios?

• Sin-o pa ang mangin mga anak sang Dios, kag paano ini naangot sa katuyuan ni Jehova bahin sa nahiusa nga pagsimba?

[Retrato sa pahina 190]

Ang matinumanon nga katawhan magakabuhi sa tugob-globo nga paraiso