Paano Ka Amligan ni Jehova?

 1. Ngaa ginpangabay ni Jesus si Jehova nga bantayan ang iya mga disipulo?

SANG gab-i antes ginpatay si Jesus, ginpamensar niya ang mga kabudlayan nga maeksperiensiahan sang iya mga disipulo. Bangod palangga niya sila, ginpangabay niya ang iya Amay nga ‘bantayan sila bangod sa isa nga malauton.’ (Juan 17:14, 15) Kabalo si Jesus nga kon makabalik na sia sa langit, indi mag-untat si Satanas nga Yawa sa pagsalakay sa tanan nga luyag mag-alagad kay Jehova. Gani, kinahanglan amligan ang katawhan ni Jehova.

 2. Ngaa makasalig kita nga sabton ni Jehova ang aton mga pangamuyo?

² Ginsabat ni Jehova ang pangamuyo ni Jesus bangod palangga Niya ang Iya Anak. Kon himuon naton ang aton bug-os nga masarangan para malipay si Jehova, palanggaon man niya kita, kag sabton niya ang aton mga pangamuyo nga buligan kita kag amligan. Si Jehova isa ka mahigugmaon nga Amay, gani padayon niya nga atipanon ang iya mga anak. Kon indi niya ini paghimuon, mapakahuy-an ang iya ngalan ukon maguba ang iya reputasyon.

 3. Ngaa kinahanglan naton ang pangamlig ni Jehova subong?

³ Kinahanglan gid naton ang pangamlig ni Jehova subong. Gintagbong si Satanas halin sa langit kag ‘may daku sia nga kaakig.’ (Bug. 12:12) Napapati niya ang pila ka tawo nga kon ginahingabot nila kita, nagahimo sila sing “sagrado nga pag-alagad sa Dios.” (Juan 16:2) Ang iban nga wala nagapati sa Dios nagahingabot sa aton bangod lain kita sa mga tawo sa kalibutan. Ano man ang rason sang ila paghingabot sa aton, wala kita nahadlok. Ngaa? Bangod ang Pulong sang Dios nagasiling: “Ang Ginuo matutom, kag palig-unon niya kamo kag amligan kamo sa isa nga malauton.” (2 Tes. 3:3) Paano kita ginaamligan ni Jehova? Binagbinagon naton ang duha ka paagi.

 4. Suno sa Efeso 6:13-17, ano ang ginhatag ni Jehova sa aton para maamligan kita?

⁴ Ginhatagan kita ni Jehova sang kompleto nga hinganib nga makaamlig sa aton sa mga pagsalakay ni Satanas. (Basaha ang Efeso 6:13-17.) Mabakod gid kag makaamlig ini nga hinganib. Pero para maamligan kita sini, dapat kompleto ini kag pirme naton ini ginasuksok. Ano ang ginapatuhuyan sang kada hinganib? Binagbinagon naton ang kada isa sini.

 5. Ano ang paha sang kamatuoran, kag ngaa dapat naton ini isuksok?

⁵ Ang paha sang kamatuoran amo ang mga kamatuoran nga mabasa sa Pulong sang Dios, ang Biblia. Ngaa dapat naton isuksok ini nga paha? Para indi kita mapatalang ni Satanas nga “amay sang kabutigan.” (Juan 8:44) Linibo ka tuig na sia nga nagabinutig kag napatalang niya ang “bug-os napuy-an nga duta.” (Bug. 12:9) Pero ginaamligan kita sang mga kamatuoran nga mabasa sa Biblia. Paano naton masuksok ini nga paha sang kamatuoran? Mahimo naton ini paagi sa pagtuon sang kamatuoran parte kay Jehova, paagi sa pagsimba sa iya “sa espiritu kag kamatuoran,” kag paagi sa pagkabuhi sing bunayag sa tanan nga butang.—Juan 4:24; Efe. 4:25; Heb. 13:18.

 6. Ano ang panaming sang pagkamatarong sa dughan, kag ngaa dapat naton ini isuksok?

⁶ Ang panaming sang pagkamatarong sa dughan amo ang matarong nga mga kasuguan ni Jehova. Ngaa dapat naton isuksok ini nga panaming sa dughan? Ginasuksok sang soldado ang panaming sa dughan para maamligan ang iya tagipusuon. Gani ang panaming sang pagkamatarong sa dughan nagaamlig sang aton malaragwayon nga tagipusuon, ukon nasulod nga pagkatawo, para indi kita mahalitan sang malain nga mga impluwensia sa sini nga kalibutan. (Hulu. 4:23) Gusto ni Jehova nga higugmaon naton sia kag alagaron sa bug-os naton nga tagipusuon. (Mat. 22:36, 37) Gani ginatinguhaan ni Satanas nga tungaon ang aton tagipusuon paagi sa paghaylo sa aton nga higugmaon ang mga butang sa sini nga kalibutan nga ginadumtan ni Jehova. (Sant. 4:4; 1 Juan 2:15, 16) Kag kon indi niya kita mahaylo, hingabuton naman niya kita kay gusto niya nga indi naton pagsundon ang mga kasuguan ni Jehova.

 7. Paano naton masuksok ang panaming sang pagkamatarong sa dughan?

⁷ Masuksok naton ang panaming sang pagkamatarong sa dughan paagi sa pagtuman sa matarong nga mga kasuguan ni Jehova parte sa husto kag sala. (Sal. 97:10) Ang iban nagasiling nga estrikto katama ang mga kasuguan ni Jehova. Pero kon indi naton pagsundon ang mga prinsipio sa Biblia, daw pareho kita sa isa ka soldado nga naghukas sang iya panaming sa dughan samtang nagapakig-away sia, kay mabug-at ini kuno katama. Kabuangan gid ini! Pero kon palangga naton si Jehova, kabigon naton nga “indi mabug-at” ang iya mga sugo, kundi makaluwas sang kabuhi.—1 Juan 5:3.

 8. Ano ang buot silingon nga may kahanda kita sa pagbantala sing maayong balita sang paghidait nga nasuksok sa aton mga tiil?

⁸ Ginpalig-on man kita ni Pablo nga dapat may kahanda kita sa pagbantala sing maayong balita sang paghidait nga nasuksok sa aton mga tiil. Buot silingon, dapat handa kita pirme nga ibantala ang maayong balita sang Ginharian. Kon ginasugid naton sa iban ang mensahe sang Biblia, nagabakod ang aton pagtuo. Makapalig-on gid ang ginahimo sang katawhan ni Jehova sa bilog nga kalibutan kay nagapangita sila sang kahigayunan nga mabantala ang maayong balita. Halimbawa, nagabantala sila kon ara sila sa ulubrahan ukon sa eskwelahan, kon nagakadto sila sa mga balay ukon sa mga lugar sang negosyo, kon nagapamalaklon sila, kon nagabisita sila sa ila mga paryente nga indi Saksi, kon nagaistorya sila sa ila mga kakilala, kag bisan ara lang sila sa ila mga balay bangod indi sila makahalin. Kon mahadlok kita kag mag-untat sa pagbantala, daw pareho kita sa isa ka soldado nga naghukas sang iya mga sandalyas samtang nagapakig-away sia. Indi gid ini maayo kay posible mapilasan ang iya mga tiil, mabudlayan sia sa pag-amlig sa iya kaugalingon, kag indi na niya matuman ang mga sugo sang iya kumander.

 9. Ngaa dapat naton dalhon ang daku nga taming sang pagtuo?

⁹ Ang daku nga taming sang pagtuo amo ang pagtuo naton kay Jehova. Nagatuo kita nga tumanon niya ang tanan niya nga promisa. Ini nga pagtuo makabulig sa aton nga ‘mapalong ang tanan nga nagadabadaba nga baslay sang isa nga malauton.’ Ngaa dapat naton dalhon ining daku nga taming? Bangod ginaamligan kita sini nga indi mapatalang sang mga panudlo sang mga apostata, kag indi magluya ang aton buot kon ginapakalain sang mga tawo ang aton mga ginapatihan. Kon wala kita sang pagtuo, mabudlayan kita nga makabato kon ginasulay kita sang iban nga indi pagtumanon ang mga kasuguan ni Jehova. Pero sa kada tion nga nabatuan naton ang mga pagsulay sa ulubrahan ukon sa eskwelahan nga indi pagtumanon si Jehova, ginaamligan kita sang aton pagtuo. (1 Ped. 3:15) Sa kada tion nga ginapangindian naton ang obra nga daku ang sueldo pero makasablag sa aton pag-alagad kay Jehova, ginaamligan kita sang aton pagtuo. (Heb. 13:5, 6) Kag sa kada tion nga ginapamatukan kita pero padayon kita gihapon nga nagaalagad kay Jehova, ginaamligan kita sang aton pagtuo.—1 Tes. 2:2.

10. Ano ang helmet sang kaluwasan, kag ngaa dapat naton ini isuksok?

¹⁰ Ang helmet sang kaluwasan amo ang paglaum nga ginahatag ni Jehova sa aton. Ginalauman naton nga padyaan niya ang tanan nga nagahimo sang iya kabubut-on kag banhawon niya kita kon mapatay kita. (1 Tes. 5:8; 1 Tim. 4:10; Tito 1:1, 2) Pareho sa helmet sang soldado nga nagaamlig sa iya ulo, ang aton paglaum nagaamlig man sa aton ikasarang sa paghunahuna. Paano? Bangod sang aton paglaum, makapokus kita sa mga promisa sang Dios kag indi magluya ang aton buot bisan pa may mga problema kita. Paano naton masuksok ini nga helmet? Mahimo naton ini paagi sa pag-ilog sa panghunahuna sang Dios. Halimbawa, wala kita nagasalig sa manggad kay wala ini sing kasiguruhan. Sa baylo, nagasalig kita sa Dios nga nagahatag sa aton sang matuod nga paglaum.—Sal. 26:2; 104:34; 1 Tim. 6:17.

11. Ano ang espada sang espiritu, kag ngaa dapat naton ini gamiton?

¹¹ Ang espada sang espiritu amo ang Pulong sang Dios, ang Biblia. Gamhanan gid ini nga espada kay mabuyagyag sini ang mga kabutigan, kag mahilway sini ang mga tawo sa butig nga mga panudlo kag makahalalit nga mga bisyo. (2 Cor. 10:4, 5; 2 Tim. 3:16, 17; Heb. 4:12) Paagi sa personal nga pagtuon kag paagi sa paghanas sang organisasyon sang Dios, magamit naton sing maayo ini nga espada. (2 Tim. 2:15) Magluwas sa kompleto nga hinganib, may ginagamit pa gid si Jehova para amligan kita. Ano ini?

12. Ano pa ang kinahanglan naton, kag ngaa?

¹² Kabalo ang isa ka soldado nga madamo na sing eksperiensia sa pagpakig-away nga indi niya masarangan ang madamo nga kaaway kon sia lang isa. Kinahanglan niya ang bulig sang iya kaupod nga mga soldado. Indi man naton masarangan si Satanas kag ang mga nagasakdag sa iya kon nagaisahanon lang kita nga magpakig-away. Kinahanglan naton ang bulig sang aton mga kauturan. Gani ginagamit ni Jehova ang “tanan nga kauturan” sa bilog nga kalibutan para buligan kita.—1 Ped. 2:17.

13. Suno sa Hebreo 10:24, 25, paano makabulig sa aton ang pagtambong sa mga miting?

¹³ Ang isa ka paagi para mabuligan kita sang aton mga kauturan amo ang pagtambong sa mga miting. (Basaha ang Hebreo 10:24, 25.) Kon magluya ang aton buot, mapalig-on kita sa mga miting. Mapalig-on kita sang tinagipusuon nga mga komento sang aton mga kauturan. Paagi sa ila mga pamulongpulong kag mga demonstrasyon nga nabase sa Biblia, mapalig-on kita nga padayon nga mag-alagad kay Jehova. Kag nagalig-on kita kon maistorya naton sila antes kag pagkatapos sang miting. (1 Tes. 5:14) Ang aton mga miting nagahatag man sa aton sang kahigayunan nga mabuligan ang iban, kag nagapahalipay ini sa aton. (Binu. 20:35; Roma 1:11, 12) May mabulig pa gid ang aton mga miting. Makabulig ini para mangin maayo pa gid kita sa aton pagbantala kag pagtudlo sa iban. Halimbawa, ginatudluan kita kon paano naton gamiton sing maayo ang mga publikasyon nga ara sa aton Teaching Toolbox. Gani handai sing maayo ang mga miting sang kongregasyon. Mamati sing maayo sa tion sang miting. Kag pagkatapos sang miting, iaplikar ang mga nabaton mo nga paghanas. Kon himuon mo ini, mangin “maayo [ka] nga soldado ni Cristo Jesus.”—2 Tim. 2:3.

14. Paano pa gid kita ginabuligan ni Jehova?

¹⁴ Ginabuligan man kita sang minilyon ka gamhanan nga mga anghel. Hunahunaa bala ang mahimo sang bisan isa lang ka anghel. (Isa. 37:36) Ti, hunahunaa naman ang mahimo sang madamo nga gamhanan nga mga anghel. Wala sing tawo ukon demonyo nga makasarang sa gamhanan nga kasuldadusan ni Jehova. Si Jehova ang pinakagamhanan. Gani kon kaupod mo si Jehova, indi ka masarangan sang mga nagapamatok sa imo bisan ano pa sila kadamo. (Huk. 6:16) Matuod gid ini! Hunahunaa ini kon nagaluya ang imo buot bangod sang ginsiling ukon ginhimo sang imo kaupod sa ulubrahan, sa eskwelahan, ukon sang imo paryente nga indi Saksi. Tandai nga wala ka nagaisahanon sa imo pagpakig-away. Ginasunod mo ang panuytoy ni Jehova, gani buligan ka niya.

15. Suno sa Isaias 54:15, 17, ngaa indi mapauntat ang katawhan sang Dios sa ila pagbantala?

¹⁵ Madamo sing rason kon ngaa ginadumtan kita sang kalibutan nga ginakontrol ni Satanas. Neutral kita sa pulitika kag wala kita nagaentra sa inaway. Ginapakilala naton ang ngalan sang Dios, ginabantala naton nga ang iya Ginharian amo lang ang makahatag sang paghidait, kag ginatuman naton ang iya matarong nga mga kasuguan. Ginabuyagyag naton nga butigon kag manugpatay ang manuggahom sini nga kalibutan. (Juan 8:44) Kag ginapabalo naton nga dali na lang laglagon ang kalibutan ni Satanas. Pero indi gid kita mapauntat ni Satanas kag sang mga nagasakdag sa iya sa aton pagbantala. Sa baylo, padayon naton nga dayawon si Jehova sa bug-os naton nga masarangan. Bisan pa gamhanan si Satanas, wala niya mapunggan ang pagbantala sing mensahe sang Ginharian sa bilog nga kalibutan. Nangin posible ini bangod ginaamligan kita ni Jehova.—Basaha ang Isaias 54:15, 17.

16. Paano luwason ni Jehova ang iya katawhan sa tion sang dakung kapipit-an?

¹⁶ Ano ang mapaabot naton nga matabo sa palaabuton? Sa tion sang dakung kapipit-an, luwason kita ni Jehova sa duha ka tumalagsahon nga paagi. Una, luwason niya ang iya matutom nga mga alagad kon pahanabuon na niya nga laglagon sang mga hari sang duta ang Babilonia nga Daku, ukon ang emperyo sang butig nga relihion. (Bug. 17:16-18; 18:2, 4) Dayon, luwason niya ang iya katawhan kon laglagon na niya sa Armageddon ang mga nabilin sa kalibutan ni Satanas.—Bug. 7:9, 10; 16:14, 16.

17. Ano ang benepisyo kon magpabilin kita nga suod kay Jehova?

¹⁷ Kon magpabilin kita nga suod kay Jehova, limitado lang ang halit nga mahimo ni Satanas sa aton. Pero laglagon si Satanas kag indi na gid sia makapanghalit. (Roma 16:20) Gani isuksok ang kompleto nga hinganib kag indi gid ini paghuksa! Indi magpakig-away nga nagaisahanon. Buligi ang imo mga kauturan. Kag sunda ang panuytoy ni Jehova. Kon himuon mo ini, makasalig ka nga palig-unon ka kag amligan sang imo mahigugmaon nga Amay sa langit.—Isa. 41:10.