“Ang mga Bunga sang Espiritu” Nagahimaya sa Dios

“Ang akon Amay ginahimaya sa sini, nga padayon kamo nga nagapamunga sing madamo.”—JUAN 15:8.

1, 2. (a) Paano naton mapalig-on ang iban? (b) Ano nga dulot gikan kay Jehova ang makapauswag sang aton ikasarang sa pag-alagad sa iya?

BINAGBINAGA ining duha ka sitwasyon: Natalupangdan sang isa ka utod nga babayi nga daw may problema ang isa ka bataon nga utod. Nangita sia sing paagi nga mangin partner niya ini sa pag-alagad sa latagon. Samtang nagalakat sila pakadto sa masunod nga balay, ginsugid sini nga utod ang iya problema. Pagkagab-i sina, nagpasalamat sia kay Jehova sa mahigugmaon nga pag-ulikid sa iya sang hamtong nga utod; nakabulig gid yadto sa iya. Sa isa pa ka lugar, may mag-asawa nga bag-o lang nagpauli halin sa pagbantala sa iban nga pungsod. Sa isa ka pagtinipon, samtang malipayon nila nga ginasugid ang ila mga eksperiensia, may isa ka pamatan-on nga utod nga lalaki nga nagapamati gid sing maayo. Pagligad sang pila ka tuig, samtang nagahanda sia para sa iya asaynment sa iban nga pungsod, nadumduman niya yadtong mag-asawa kag ang ila eksperiensia nga nagpahulag sa iya nga maghandum man nga mangin misyonero.

² Ayhan ini nga mga sitwasyon nagapahanumdom man sa imo sang pila ka kauturan nga may positibo nga impluwensia sa imo kabuhi. Huo, talagsa lang nagakatabo nga ang isa ka bes nga pag-istoryahanay makapabag-o sa kabuhi sang isa ka tawo, apang kada adlaw madamo kita sing kahigayunan nga palig-unon kag pabakuron ang iban. Hunahunaa nga may isa ka butang nga makapauswag sang imo mga ikasarang kag mga kinaiya nga magamit mo sa pagbulig sa iban kag sa pag-alagad sa Dios. Indi bala nga makalilipay gid ina? Sa pagkamatuod, ginahatagan kita ni Jehova sina nga dulot—ang iya balaan nga espiritu. (Luc. 11:13) Samtang nagapanghikot sa aton kabuhi ang espiritu sang Dios, nagapatubas ini sang matahom nga mga kinaiya nga makapauswag sang aton pag-alagad sa Dios. Daw ano ka dalayawon ina nga dulot!—Basaha ang Galacia 5:22, 23.

 3. (a) Paano nagahimaya sa Dios ang pagpalambo naton sang “mga bunga sang espiritu”? (b) Ano nga mga pamangkot ang aton binagbinagon?

³ Ginapadayag sang mga kinaiya nga ginapatubas sang balaan nga espiritu ang personalidad sang Ginhalinan sini, si Jehova nga Dios. (Col. 3:9, 10) Ginsugid ni Jesus sa iya mga apostoles ang panguna nga rason kon ngaa dapat tinguhaan sang mga Cristiano nga ilugon ang Dios. Nagsiling sia: “Ang akon Amay ginahimaya sa sini, nga padayon kamo nga nagapamunga sing madamo.”a (Juan 15:8) Samtang ginapalambo naton “ang mga bunga sang espiritu,” makita ini sa aton panghambal kag buhat, kag magadala ini sing kadayawan sa aton Dios. (Mat. 5:16) Ano ang kinatuhayan sang mga bunga sang espiritu kag sang panimuot sang kalibutan ni Satanas? Paano naton mapalambo ang mga bunga sang espiritu? Ngaa mabudlay ini himuon? Sabton naton ini nga mga pamangkot samtang ginabinagbinag naton ang tatlo ka bunga sang espiritu—gugma, kalipay, kag paghidait.

Gugma nga Napasad sa Mas Mataas nga Prinsipio

 4. Ano nga sahi sang gugma ang gintudlo ni Jesus sa iya mga sumulunod?

⁴ Ang gugma nga ginapatubas sang balaan nga espiritu tuhay gid sa gugma nga ginapakita sang kalibutan. Ngaa? Bangod napasad ini sa mas mataas nga prinsipio. Ginpadaku ni Jesus ang kinatuhayan sini sa iya Sermon sa Bukid. (Basaha ang Mateo 5:43-48.) Nagsiling sia nga bisan ang mga makasasala nagapakig-angot sing maayo sa mga tawo nga maayo makig-angot sa ila. Ina nga “gugma” indi masinakripisyuhon kundi nagapangita lang sang bentaha. Kon luyag naton nga ‘mangin anak kita sang aton Amay nga yara sa langit,’ dapat kita mangin tuhay. Sa baylo nga pakig-angutan lang ang iban kaangay sang pagpakig-angot nila sa aton, dapat naton sila tamdon kag pakig-angutan subong sang pagtamod kag pagpakig-angot sa ila ni Jehova. Apang, paano naton mahigugma ang aton mga kaaway suno sa sugo ni Jesus?

 5. Paano naton mapakita ang gugma sa mga nagahingabot sa aton?

⁵ Binagbinaga ang isa ka halimbawa sa Biblia. Samtang nagabantala sanday Pablo kag Silas sa Filipos, gindakop sila, ginbunal, kag ginbilanggo sa nasulod nga bahin sang bilangguan kag ginbutang ang ila mga tiil sa mga pandog. Mahimo nga ginmaltratar pa gani sila sang manugbilanggo. Sang hinali lang nga nahilway sila bangod sa linog, ginkalitan bala nila ini nga kahigayunan agod balusan ang tawo? Wala. Ang ila hanuot nga kabalaka sa iya—ang ila masinakripisyuhon nga gugma—amo ang nagpahulag sa ila nga buligan sia, kag amo ini ang nagbukas sang kahigayunan nga mangin tumuluo sia kag ang iya bug-os nga panimalay. (Binu. 16:19-34) Sing kaanggid, madamo sa aton mga kauturan sa karon ang ‘nagapakamaayo man sa mga nagahingabot sa ila.’—Roma 12:14.

 6. Sa ano nga mga paagi mapakita naton ang masinakripisyuhon nga gugma sa aton mga kauturan? (Tan-awa ang kahon sa pahina 21.)

⁶ Apang, labaw pa nga gugma ang dapat naton ipakita sa aton mga masigkatumuluo. “Obligado kita nga ihatag ang aton kalag tungod sa aton mga kauturan.” (Basaha ang 1 Juan 3:16-18.) Sa masami, ginapakita naton ang gugma sa gagmay nga paagi. Halimbawa, kon may nahambal kita ukon nahimo nga nakasaklaw sa aton utod, mapakita naton ang gugma kon mangita kita sing paagi nga mapasag-uli ang paghidait. (Mat. 5:23, 24) Ano abi kon kita naman ang nasaklaw? ‘Handa bala kita nga magpatawad,’ ukon may huyog kita nga maghinakit? (Sal. 86:5) Ang hanuot nga gugma nga ginapatubas sang balaan nga espiritu makabulig sa aton nga tabunan ang magagmay nga mga sayop, kag mangin mapinatawaron sa iban “subong nga si Jehova nagpatawad sing kinabubut-on” sa aton.—Col. 3:13, 14; 1 Ped. 4:8.

7, 8. (a) Paano ang aton gugma sa Dios nagaapektar sa aton gugma sa mga tawo? (b) Paano naton mapatudok ang aton gugma kay Jehova? (Tan-awa ang laragway sa ubos.)

⁷ Paano naton mapalambo ang masinakripisyuhon nga gugma sa aton mga kauturan? Paagi sa pagpatudok sang aton gugma sa Dios. (Efe. 5:1, 2; 1 Juan 4:9-11, 20, 21) Ang tion nga ginahatag naton kay Jehova kon nagabasa kita sang Biblia, nagapamalandong kag nagapangamuyo, nagapalig-on kag nagapatudok sang aton gugma sa aton langitnon nga Amay. Apang, kinahanglan gid nga magpain kita sang tion para mangin suod sa Dios.

⁸ Sa pag-ilustrar: Hunahunaa nga sa kada adlaw may espesipiko lang nga tion nga puede ka makabasa sang Pulong sang Dios, makapamalandong, kag makapangamuyo kay Jehova. Indi mo bala pagbantayan sing maayo ina nga tion agod wala sing makasablag sa imo personal nga tion kay Jehova? Sa pagkamatuod, wala sing makapugong sang aton pangamuyo sa Dios, kag kalabanan sa aton makabasa sang Biblia kon san-o naton gusto. Apang dapat kita maghalong nga indi maupangan sang aton masako nga hilikuton kada adlaw ang aton personal nga tion sa Dios. Nagapain ka bala sing tion kada adlaw agod mangin suod kay Jehova?

“Kalipay Gikan sa Balaan nga Espiritu”

 9. Paano mo ilaragway ang kalipay nga ginapatubas sang balaan nga espiritu?

⁹ Ang kalipay nga isa ka bunga sang espiritu sarang naton mahuptan bisan sang mga kabudlayan. Ang kalipay mapaanggid sa isa ka mahunit nga tanom nga nagakabuhi bisan sa indi maayo nga palibot. Sa bug-os nga duta, madamo nga alagad sang Dios ang ‘nagbaton sang pulong sa idalom sang madamo nga kapipit-an nga may kalipay gikan sa balaan nga espiritu.’ (1 Tes. 1:6) Ang iban nagaatubang sang mga kabudlayan. Apang, ginapabaskog sila ni Jehova paagi sa iya espiritu “agod makabatas sing bug-os kag mangin mapinasensiahon nga may kalipay.” (Col. 1:11) Sa diin nagahalin ini nga kalipay?

10. Sa diin nagahalin ang aton kalipay?

¹⁰ Indi kaangay sa “wala kapat-uran nga manggad” sang kalibutan ni Satanas, ang espirituwal nga bahandi nga nabaton naton gikan kay Jehova magapabilin sing dayon. (1 Tim. 6:17; Mat. 6:19, 20) Nagsaad sia sa aton sing makalilipay nga paglaum nga kabuhi nga wala sing katapusan. Nalipay kita nga mangin bahin sang bug-os kalibutan nga Cristianong paghiliutod. Labaw sa tanan, ang aton kalipay nasandig sa aton kaangtanan sa Dios. Nagbatyag kita kaangay ni David, nga bisan pa napilitan sia nga maglaaslaas, gindayaw niya si Jehova sa ambahanon nga nagasiling: “Bangud nga ang imo malig-on nga paghigugma labi pa kaayo sa kabuhi, ang akon bibig magadayaw sa imo. Gani magapakamaayo ako sa imo samtang nagakabuhi ako.” (Sal. 63:3, 4) Bisan pa nakaeksperiensia kita sang mga kabudlayan, malipayon naton nga ginadayaw ang Dios.

11. Ngaa importante nga alagdon naton si Jehova nga may kalipay?

¹¹ Ginpalig-on ni apostol Pablo ang mga Cristiano: “Magkasadya kamo pirme sa Ginuo. Sa liwat ginasiling ko, Magkasadya kamo!” (Fil. 4:4) Ngaa importante para sa mga Cristiano nga mag-alagad kay Jehova nga may kalipay? Bangod sa isyu nga ginpautwas ni Satanas tuhoy sa pagkasoberano ni Jehova. Nagsiling sia nga wala sang tawo nga magaalagad sa Dios sing kinabubut-on. (Job 1:9-11) Kon nagaalagad kita kay Jehova bangod lamang sa obligasyon apang wala sing kalipay, ang aton halad sang pagdayaw indi bug-os. Gani, maayo nga sundon naton ang laygay sang salmista: “Mag-alagad kamo kay Jehova nga may kasadya. Magkadto kamo sa atubangan niya nga may paghugyaw sa kalipay.” (Sal. 100:2, NW) Ang pag-alagad sing kinabubut-on kag may kalipay nagahimaya sa Dios.

12, 13. Ano ang aton mahimo agod mabatuan ang negatibo nga balatyagon?

¹² Ang matuod, may mga tion nga bisan ang matutom nga mga alagad ni Jehova ginaluyahan man kag nagahunahuna sing negatibo. (Fil. 2:25-30) Ano ang makabulig sa aton sa sini nga mga tion? Ang Efeso 5:18, 19 nagasiling: “Padayon kamo nga mapuno sing espiritu, nga nagahambalanay sang mga salmo kag mga pagdayaw sa Dios kag espirituwal nga mga ambahanon, nga nagaamba kag nagadayaw kay Jehova paagi sa ambahanon sa inyo tagipusuon.” Paano naton maaplikar ina nga laygay?

¹³ Kon may negatibo kita nga balatyagon, mahimo kita mangayo sing bulig kay Jehova paagi sa pangamuyo kag pamalandungan ang dalayawon nga mga butang. (Basaha ang Filipos 4:6-9.) Ang pag-ugoy-ugoy sang aton mga ambahanon sang Ginharian nakabulig sa pila nga madula ang ila kasubo kag maghunahuna sing positibo. Ang isa ka utod nga lalaki nga nakaatubang sang problema kag nakabatyag sang kapaslawan kag kaluya sing buot, naghinumdom: “Luwas sa regular kag hanuot ko nga pagpangamuyo, ginasaulo ko ang pila ka ambahanon sang Ginharian. Ang pagkanta sining matahom nga mga ambahanon sang pagdayaw kay Jehova nakahatag sa akon sing kalinong sa hunahuna. Sadto man nga tion ginpagua ang libro nga Mangin Suod kay Jehova. Duha ka beses ko ini nga nabasa sa sulod sang isa ka tuig. Nakapaumpaw gid ini sa akon tagipusuon. Nahibaluan ko nga ginapakamaayo gid ni Jehova ang akon mga panikasog.”

“Nagapahiusa nga Higot sang Paghidait”

14. Ano ang talalupangdon sa paghidait nga ginapatubas sang balaan nga espiritu?

¹⁴ Sa aton internasyonal nga mga kombension, nalipay sa pagpakig-upod sa ila mga kauturan ang mga delegado nga may nanuhaytuhay nga ginhalinan. Ginapakita sini ang paghidait nga ginaagom sang katawhan sang Dios sa karon—ang aton bug-os kalibutan nga paghiusa. Sa masami nagakatingala ang iban kon makita nila nga ang mga tawo nga ginahunahuna nila nga magkaaway “nagatinguha gid nga tipigan ang pag-isa sa espiritu sa nagapahiusa nga higot sang paghidait.” (Efe. 4:3) Ini nga paghiusa tumalagsahon gid bangod madamo ang nabudlayan sa paghimo sini.

15, 16. (a) Ano anay ang pagtamod ni Pedro, kag paano ini nangin hangkat sa iya? (b) Paano ginbuligan ni Jehova si Pedro nga bag-uhon ang iya panimuot?

¹⁵ Isa gid ka hangkat ang pagpahiusa sa mga tawo nga may nanuhaytuhay nga ginhalinan. Agod mahangpan naton kon ano ang dapat himuon para matigayon ina nga paghiusa, binagbinagon naton ang halimbawa ni apostol Pedro sang unang siglo. Makita naton ang iya panimuot sa wala matuli nga mga Gentil sang nagsiling sia: “Nahibaluan gid ninyo nga indi tugot sa kasuguan nga makig-upod ukon magpalapit ang isa ka Judiyo sa isa ka tawo nga tuhay sing rasa; apang ginpakita sa akon sang Dios nga indi ko dapat tawgon nga nadagtaan ukon di-matinlo ang bisan sin-o nga tawo.” (Binu. 10:24-29; 11:1-3) Subong pagsunod sa kinaandan nga pagtamod sadto, ayhan nagdaku si Pedro nga nagapati nga ginapatuman sang Kasuguan nga higugmaon lamang niya ang iya mga masigka-Judiyo. Amo nga daw normal na lang kay Pedro nga tamdon ang mga Gentil subong mga kaaway.b

¹⁶ Hunahunaa kon ano ang ginbatyag ni Pedro sang nagsulod sia sa puluy-an ni Cornelio. Posible bala nga ang isa nga may negatibo anay nga pagtamod sa mga Gentil ‘makapakig-angot sing nahisanto’ sa ila paagi sa “nagapahiusa nga higot sang paghidait”? (Efe. 4:3, 16) Huo. Bangod pila pa lang ka adlaw ang nagligad, ginbuksan sang espiritu sang Dios ang tagipusuon ni Pedro amo nga ginbag-o niya ang iya panimuot kag wala na nagabatyag sing pagpasulabi. Paagi sa isa ka palanan-awon, ginpakita ni Jehova kay Pedro nga ang Iya pagtamod sa mga tawo wala nagadepende sa ila rasa ukon nasyonalidad. (Binu. 10:10-15) Amo nga nakasiling si Pedro kay Cornelio: “Matuod gid nga nahantop ko nga ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binu. 10:34, 35) Nagbag-o ang panimuot ni Pedro, kag nahiusa sia sa “bug-os nga paghiliutod.”—1 Ped. 2:17.

17. Ngaa talalupangdon gid ang paghiusa sang katawhan sang Dios?

¹⁷ Ang eksperiensia ni Pedro makabulig sa aton nga maapresyar ang talalupangdon nga pagbag-o nga nagakatabo sa katawhan sang Dios sa karon. (Basaha ang Isaias 2:3, 4.) Minilyon ka tawo “gikan sa tanan nga pungsod kag tribo kag katawhan kag hambal” ang nagbag-o sang ila panghunahuna agod ipahisuno sa “maayo kag kalahamut-an kag himpit nga kabubut-on sang Dios.” (Bug. 7:9; Roma 12:2) Madamo sa ila ang naimpluwensiahan anay sang dumot, kaawayon, kag pagkanabahinbahin sang kalibutan ni Satanas. Apang paagi sa pagtuon sa Pulong sang Dios kag sa bulig sang balaan nga espiritu, natun-an nila nga “tinguhaan . . . nga himuon ang mga butang nga nagadala sang paghidait.” (Roma 14:19) Nagresulta ini sa paghiusa nga nagadala sing kadayawan sa Dios.

18, 19. (a) Paano ang kada isa sa aton makaamot sa paghidait kag paghiusa sang kongregasyon? (b) Ano ang binagbinagon naton sa masunod nga artikulo?

¹⁸ Paano ang kada isa sa aton makaamot sa paghidait kag paghiusa sang katawhan sang Dios? Madamo nga kongregasyon ang may mga katapo nga naghalin sa iban nga pungsod. Ang iban mahimo nga tuhay ang kinabatasan ukon indi makahambal sang aton lenguahe. Ginatinguhaan bala naton nga makilala sila? Ginapalig-on kita sang Pulong sang Dios nga himuon ini. Sa iya sulat sa kongregasyon sang Roma nga may Judiyo kag Gentil nga mga tumuluo, si Pablo nagsiling: “Batuna ninyo ang isa kag isa, subong nga ginbaton man kita ni Cristo, agod mahimaya ang Dios.” (Roma 15:7) May yara bala sa inyo kongregasyon nga dapat mo makilala sing labi pa?

¹⁹ Ano pa ang mahimo naton agod makapanghikot ang balaan nga espiritu sa aton kabuhi? Sabton ini sa masunod nga artikulo nga magabinagbinag sang nabilin pa nga bahin sang mga bunga sang espiritu.

[Mga Nota]

Ano ang Imo Sabat?

• Paano naton mapakita ang masinakripisyuhon nga gugma sa aton mga kauturan?

• Ngaa importante nga alagdon naton ang Dios nga may kalipay?

• Paano kita makaamot sa paghidait kag paghiusa sang kongregasyon?

[Kahon sa pahina 21]

“Sila ang Matuod nga mga Cristiano”

Mabasa sa libro nga Between Resistance and Martyrdom—Jehovah’s Witnesses in the Third Reich ang komento sang isa ka priso nga pamatan-on nga Judiyo tuhoy sa iya una nga pagkakilala sa mga Saksi ni Jehova sang gindala sia sa kampo konsentrasyon sa Neuengamme:

“Sang pag-abot namon nga mga Judiyo sa kampo halin sa Dachau, ginpangtago sang iban nga Judiyo ang ila mga pagkabutang agod wala sila sing mahatag sa amon. . . . Sa gua [sang kampo konsentrasyon], nagabuligay kami. Pero diri nga tuman kabudlay ang sitwasyon, ginahunahuna lang sang kada isa ang iya kaluwasan kag wala na nagakabalaka sa iban. Apang hunahunaa ang ginhimo sang mga Estudyante sa Biblia. Sadto nga tion, nagpangabudlay sila sing lakas sa pagkay-o sang mga tubo sang tubig. Tuman ka tugnaw sang tiempo kag bug-os nga adlaw sila nga nagatrabaho sa nagayelo nga tubig. Madamo ang natingala kon paano nila ini nabatas. Nagsiling sila nga ginhatagan sila ni Jehova sang kusog. Kaangay namon, kinahanglan gid nila ang ila tinapay bangod sa gutom. Apang ano ang ila ginhimo? Gintipon nila ang tanan nila nga tinapay, gintunga ini, kag ginhatag ang katunga sa ila mga masigkatumuluo nga bag-o lang nag-abot halin sa Dachau. Gin-abiabi nila sila kag ginhalukan. Antes sila nagkaon, nangamuyo sila. Nabusog sila kag malipayon. Nagsiling sila nga naumpawan na ang ila gutom. Gani, nakahunahuna gid ako: “Sila ang matuod nga mga Cristiano.”

[Mga Retrato sa pahina 19]

Nagapain ka bala sing tion kada adlaw agod mangin suod kay Jehova?