Mangin Makatarunganon sa Imo mga Tulumuron, kag Mangin Malipayon

“NAPASLAWAN na naman ako!” Pila ka beses na bala nga nahambal mo ini bangod wala matuman ang imo ginplano? Mahimo nga amo sini ang mabatyagan sang isa ka lamharon nga Cristianong iloy bangod kapoy gid sia sa padayon nga pag-atipan sa iya lapsag, kag naluyahan sia sing buot kay daw indi sia makakonsentrar sa espirituwal nga mga butang. Ang isa ka utod mahimo magbatyag nga diutay lang ang iya mahimo bangod sang iya gindak-an, kag nagahunahuna nga kulang gid ang iya ginahimo para sa kongregasyon. Mahimo nga masubuan ang isa ka tigulang nga utod bangod indi na sia makapakigbahin sing bug-os sa Cristiano nga mga hilikuton subong sang ginahimo niya sang mapagsik pa sia. Si Christiane nga indi makaalagad kay Jehova sing labi pa bangod sa kahimtangan sang iya pamilya, nagsiling: “Ang pamulongpulong nga nagapalig-on nga magpayunir nagapahibi kon kaisa sa akon.”

Ano ang aton himuon kon makabatyag kita sing subong sini? Ano ang himuon sang mga Cristiano agod mangin realistiko ang ila pagtamod sa ila mga kahimtangan? Ano ang mga kaayuhan kon mangin makatarunganon kita sa aton mga tulumuron?

Mangin Makatarunganon

Si apostol Pablo nanugda kon ano ang himuon agod indi madula ang aton kalipay: “Magkasadya kamo pirme sa Ginuo. Sa liwat ginasiling ko, Magkasadya kamo! Ipakita sa tanan nga tawo ang inyo pagkamakatarunganon.” (Fil. 4:4, 5) Agod mabatyagan naton ang kalipay kag kaayawan sa aton pag-alagad sa Dios, kinahanglan nga makatarunganon ang aton mga tulumuron depende sa aton mga ikasarang kag mga kahimtangan. Magaresulta lamang sa kahuol kon ginatinguhaan gid naton nga lab-uton ang indi makatarunganon nga mga tulumuron. Sa pihak nga bahin, mag-andam man kita sa paghunahuna nga wala na gid kita sing may masarangan, amo nga mangin uyaya na lang kita sa aton Cristiano nga ministeryo kay may balibad kita nga mga limitasyon.

Bisan ano man ang aton mga kahimtangan, luyag ni Jehova nga Dios nga ihatag naton sa iya ang aton pinakamaayo​—ang aton bug-os kalag kag bug-os tagipusuon nga pag-alagad. (Col. 3:23, 24) Kon indi bug-os ang aton pag-alagad kay Jehova, wala man naton ginatuman ang aton dedikasyon sa iya. (Roma 12:1) Isa pa, mahimo nga indi naton mabatyagan ang kaayawan, matuod nga kalipay, kag iban pa bugana nga mga pagpakamaayo nga resulta sang bug-os kalag nga pag-alagad.​—Hulu. 10:22.

Sa Biblia, ang tinaga nga ginbadbad nga “makatarunganon” may kahulugan nga pagpasunaid. Ang literal sini nga kahulugan amo ang pagpaumod. (Sant. 3:17) Ginapahangop man sini nga tinaga nga indi mangin sobra ka estrikto. Gani, kon makatarunganon kita, makahibalo kita magbagay sa aton mga kahimtangan. Mabudlay bala ini himuon? Ang iban nga tawo nabudlayan sa paghimo sini, apang madasig sila maglaygay sa iban. Halimbawa, kon ginakapoy pirme ang imo suod nga abyan bangod madamo sia sing ginahimo, indi mo bala sia pagbuligan agod mahangpan niya nga dapat sia maghimo sing pila ka pagbag-o sa iya kabuhi? Sa amo man nga paagi, kinahanglan naton mahibaluan kon bala nagahimo na kita sang indi naton masarangan.​—Hulu. 11:17.

Ang pagbaton sang aton limitasyon mangin hangkat pa gid kon ginpadaku kita sang sobra ka estrikto nga mga ginikanan. Sang bata pa ang iban, nagbatyag sila nga dapat may himuon pa gid sila ukon mangin mas maayo nga mga bata agod higugmaon sila sang ila ginikanan. Kon amo sini ang aton kahimtangan, mahimo nga magahunahuna kita sing sayop tuhoy sa pagtamod ni Jehova sa aton. Ginahigugma kita ni Jehova kay ginaalagad naton sia sing bug-os tagipusuon. Ang Pulong sang Dios nagapasalig sa aton nga “nakilala [ni Jehova] ang aton kahimtangan; nagadumdum sia nga kita yab-ok.” (Sal. 103:14) Kahibalo sia sang aton mga limitasyon, apang walay sapayan sini, ginahigugma niya kita kon makugi kita nga nagaalagad sa iya. Indi sobra ka estrikto ang aton Dios. Ang pagdumdom sini makabulig sa aton nga mangin makatarunganon sa aton mga tulumuron, nga nakahibalo sa aton mga limitasyon.​—Miq. 6:8.

Walay sapayan sini, nabudlayan ang iban nga mangin makatarunganon. Kon amo sini ang imo ginabatyag, maayo nga mangayo sing bulig sa eksperiensiado nga Cristiano nga nakakilala gid sa imo. (Hulu. 27:9) Halimbawa, luyag mo bala magregular payunir? Maayo gid ina nga tulumuron! Nabudlayan ka bala sa paglab-ot sina? Basi kinahanglan mo lang pasimplehon ang imo kabuhi. Ukon mahimo nga istoryahan ninyo sang imo ginasaligan nga Cristianong abyan kon bala praktikal nga magregular payunir ka subong kay madamo ang imo mga responsibilidad sa pamilya. Mabuligan ka niya sa pagbinagbinag kon bala masarangan mo ang dugang nga mga hilikuton nga luyag mo himuon, ukon kon ano ang himuon mo nga pagbag-o agod makapanghikot sing labi pa. Mabuligan man sang bana ang iya asawa sa paghibalo kon ano nga mga tulumuron ang masarangan niya. Halimbawa, puede sia makapanugda sa iya asawa nga magpahuway anay antes niya sugdan ang dugang nga mga hilikuton sa masunod nga bulan. Sa amo, indi sia madali kapuyon kag mangin malipayon gihapon sa pagministeryo.

Hibalua ang mga Butang nga Masarangan Mo

Ang pagtigulang ukon pagbalatian makabuhin sa aton mahimo sa pag-alagad kay Jehova. Kon ginikanan ka, mahimo magahunahuna ka nga diutay lang ang mabenepisyuhan mo sa personal nga pagtuon ukon sa Cristianong mga miting bangod ang daku mo nga tion kag kusog yara sa imo magamay nga mga kabataan. Apang, indi ayhan nga ang sobra nga pagpamensar sang imo mga limitasyon amo kon kaisa ang makaupang sa imo nga himuon ang imo masarangan?

Linibo ka tuig na ang nagligad, ginpabutyag sang isa ka Levinhon ang handum nga indi niya malab-ot. May pribilehiyo sia nga mag-alagad sa templo sing duha ka semana kada tuig. Apang, ginpabutyag pa gid niya ang dalayawon nga handum nga magpuyo sing permanente malapit sa altar. (Sal. 84:1-3) Apang ano ang nagbulig sining matutom nga tawo nga mangin kontento? Narealisar niya nga pinasahi na nga pribilehiyo ang bisan isa lang ka adlaw nga yara sia sa mga luwang sang templo. (Sal. 84:4, 5, 10) Sing kaanggid, sa baylo nga mamensar sang indi naton masarangan, dapat naton hantupon kag apresyahon ang mga butang nga malab-ot naton.

Binagbinaga ang halimbawa ni Nerlande, isa ka utod nga babayi nga taga-Canada. Naga-wheelchair na sia kag pamatyag niya, diutay lang ang iya mahimo sa pagministeryo. Apang, ginbag-o niya ang iya pagtamod kay nahunahuna niya nga puede gali mangin personal nga teritoryo ang shopping mall nga malapit lang sa ila. Nagsiling sia: “Nagapungko ako sa wheelchair malapit sa isa ka pulungkuan sa shopping mall. Nalipay ako sa pagpanaksi sa mga tawo nga mapungko agod magpahuwayhuway.” Nalipay gid si Nerlande bangod nakigbahin sia sa sining importante nga paagi sang pagministeryo.

Maghimo sing mga Pagbag-o Kon Kinahanglanon

Ang de-layag nga sakayan mahimo nga nagalayag sing tuman ka dasig samtang ginahuyop sang hangin ang mga layag sini. Apang, kon masumalang sang manuglayag ang mabaskog nga bagyo, mapilitan sia nga bag-uhon ang posisyon sang layag. Indi niya mapauntat ang bagyo, apang paagi sa pagbag-o sang posisyon sang layag, makontrol niya gihapon ang sakayan. Sing kaanggid, indi naton mapauntat ang kaangay bagyo nga mga kahimtangan nga aton masumalang sa kabuhi. Apang makontrol naton sing maayo ang aton kabuhi kon kahibalo kita magbagay sang aton pisikal, mental, kag emosyonal nga mga ikasarang. Kon batunon naton ang aton mga kahimtangan subong, mabuligan kita nga mahuptan ang aton kaayawan kag kalipay sa pag-alagad sa Dios.​—Hulu. 11:2.

Binagbinaga ang pila ka halimbawa. Kon madali kita makapoy, maayo nga likawan naton ang makakalapoy nga mga hilikuton sa adlaw agod nga pagkagab-i may kusog pa kita sa pagtambong sa miting. Sa amo, makabenepisyo kita sing bug-os sa pagpakig-upod sa aton mga kauturan. Kon ang isa naman ka iloy indi makapakigbahin sa pagbantala sa mga balay bangod nagamasakit ang iya bata, maayo nga agdahon niya sa iya balay ang isa ka utod nga babayi agod makapanaksi sila nga duha sa telepono samtang nagakatulog ang bata.

Ano abi kon ginaupangan ka sang imo mga kahimtangan nga tun-an ang mga pagabinagbinagon sa mga miting? Mahimo mo pilion kon pila lang ang imo mahandaan, kag handai ini sing maayo. Kon himuon naton ini tanan, mangin aktibo kita kag malipayon sa gihapon.

Ang pagbag-o sa aton mga tulumuron nagakinahanglan sing determinasyon kag panikasog. Ang taga-Pransia nga mag-asawa nga sanday Serge kag Agnès naghimo sing daku nga pagbag-o sa ila mga plano. “Sang nahibaluan namon ni Agnès nga nagabusong sia, naalimunaw ang handum namon nga mangin misyonero,” siling ni Serge. Subong amay na karon sang duha ka masinadyahon nga bata nga babayi, nagpaathag si Serge kon paano nila ginbag-o ang ila tulumuron nga mag-asawa. Nagsiling sia: “Bangod indi na kami makaalagad sa iban nga pungsod, nagdesisyon kami nga himuon ang hilikuton sang mga misyonero sa amon mismo nga pungsod. Nakig-upod kami sa dumuluong sing lenguahe nga grupo.” Nakabenepisyo bala sila bangod ginbag-o nila ang ila tulumuron? Si Serge nagsiling: “Nabatyagan namon nga madamo ang amon mahimo para sa kongregasyon.”

Si Odile isa ka utod nga babayi sa Pransia kag mga 70 anyos na. Indi sia makapadugay tindog bangod sang osteoarthritis sa iya tuhod. Naluyahan sia sing buot kay ginapunggan sia sang iya kasablagan sa lawas nga magbantala sa mga balay. Apang, wala sia mangampo. Ginbag-o niya ang iya mga hilikuton paagi sa pagpanaksi sa telepono. Nagsiling sia: “Abi ko mabudlay ini himuon, pero mahapos lang gali, kag makalilipay gid!” Bangod sini nga pamaagi, nabatyagan niya liwat ang kalipay sa pagministeryo.

May mga Pagpakamaayo Kon Makatarunganon ang mga Tulumuron

Malikawan naton ang pagluya sing buot kon makatarunganon ang aton mga tulumuron. Kon makatarunganon ang aton mga tulumuron, magabatyag kita sing kadalag-an walay sapayan sang aton mga limitasyon. Magakalipay kita sa aton hinimuan, bisan diutay lang ini.​—Gal. 6:4.

Samtang ginapalambo naton ang pagkamakatarunganon, labi pa gid kita nga magapasunaid sa aton mga kauturan. Bangod nahibaluan naton nga may mga limitasyon man sila, magapasalamat kita pirme kon ano ang mahimo nila para sa aton. Paagi sa pag-apresyar sa mga ginabulig sa aton, ginapasanyog naton ang kooperasyon kag pag-isa sang aton panghunahuna. (1 Ped. 3:8) Dumduma, subong mahigugmaon nga Amay, wala nagapangayo si Jehova nga Dios sang indi naton masarangan. Kag kon magpahamtang kita sing makatarunganon nga mga tulumuron kag lab-uton ini, labi pa gid nga makaalayaw kag makalilipay ang aton mga hilikuton sa pag-alagad.

[Blurb sa pahina 29]

Agod mabatyagan naton ang kalipay kag kaayawan sa aton pag-alagad sa Dios, kinahanglan nga makatarunganon ang aton mga tulumuron depende sa aton mga ikasarang kag mga kahimtangan

[Piktyur sa pahina 30]

Nalipay si Nerlande sa paghimo sang iya masarangan sa pagministeryo

[Piktyur sa pahina 31]

Tun-i nga “bag-uhon ang posisyon sang layag”

[Credit Line]

© Wave Royalty Free/​age fotostock

[Piktyur sa pahina 32]

Sanday Serge kag Agnès nakabenepisyo sa pagbag-o sang ila mga tulumuron