Higugmaa Pa Gid si Jehova kag ang Iban

1. Ano ang mga natun-an mo sang nag-umpisa ka sa pag-Bible study?

ANO ang mga natun-an mo sang nag-umpisa ka sa pag-Bible study? Mahimo nga nakibot ka sang natun-an mo nga may ngalan gali ang Dios. Mahimo nga nakabatyag ka sang kalinong sa hunahuna sang natun-an mo nga wala ginapaantos sang Dios ang mga tawo sa impierno. Kag mahimo nga nalipay ka sang natun-an mo nga posible mo pa makita liwat ang imo mga pinalangga nga napatay kag makaupod mo sila sa paraiso sa duta.

2. Magluwas nga natun-an mo ang mga kamatuoran sa Biblia, ano pa ang nahimo mo nga pag-uswag? (Efeso 5:1, 2)

² Samtang padayon mo nga ginatun-an ang Pulong sang Dios, mas ginhigugma mo pa gid si Jehova. Ini nga gugma amo ang nagpalig-on sa imo nga iaplikar ang imo mga natun-an. Nakahimo ka sing mas maayo nga mga desisyon nga nabase sa mga prinsipio sa Biblia. Naghimo ka sang mga pagbag-o sa imo mga ginahunahuna kag ginahimo kay gusto mo nga malipay sa imo ang Dios. Pareho sa isa ka bata nga nagailog sa iya mahigugmaon nga ginikanan, ginailog mo ang imo Amay sa langit.—Basaha ang Efeso 5:1, 2.

3. Ano ang mga puede naton ipamangkot sa aton kaugalingon?

³ Puede naton pamangkuton ang aton kaugalingon: ‘Kon ikumparar sa tion nga ginbawtismuhan ako, mas mabakod bala ang akon gugma kay Jehova subong? Sugod sang ginbawtismuhan ako, amat-amat ko na bala nga nailog si Jehova ilabi na sa pagpakita sang gugma sa akon mga kauturan?’ Kon daw nagbugnaw “ang imo una nga gugma,” indi ka dapat maluyahan sang buot. Natabo man ini sa mga Cristiano sang unang siglo. Pero wala sila ginsikway ni Jesus, gani indi man niya kita pagsikwayon. (Bug. 2:4, 7) Kabalo sia nga may mahimo kita para mabatyagan naton liwat ang gugma nga nabatyagan naton sang natun-an naton ang kamatuoran.

4. Ano ang binagbinagon naton sa sini nga artikulo?

⁴ Binagbinagon sa sini nga artikulo kon ano ang himuon naton para mas higugmaon pa gid naton si Jehova kag ang iban. Kon pabakuron naton ang aton gugma, maayo gid ang mangin resulta sini sa aton kag sa iban. Binagbinagon man naton ang pila sa sining maayo nga mga resulta.

5-6. Ano nga mga kabudlayan ang naeksperiensiahan ni apostol Pablo sa tion sang iya pagministeryo, kag ano ang nakabulig sa iya nga padayon nga mag-alagad kay Jehova?

⁵ Nalipay si apostol Pablo sa pag-alagad kay Jehova, pero nakaeksperiensia man sia sang madamo nga kabudlayan. Pirme nagalakat kag nagabiyahe sing malayo si Pablo, kag indi ini mahapos himuon sadto. May mga tion nga nakaeksperiensia sia sing ‘mga katalagman sa mga suba kag sa mga kawatan.’ May mga tion man nga ginbunal sia sang mga nagapamatok sa iya. (2 Cor. 11:23-27) Kag bisan pa sang mga pagpanikasog ni Pablo para buligan ang iya mga kauturan, may mga tion nga wala nila sia ginapasalamatan.—2 Cor. 10:10; Fil. 4:15.

⁶ Ano ang nakabulig kay Pablo nga padayon nga mag-alagad kay Jehova? Madamo sing natun-an si Pablo parte sa mga kinaiya ni Jehova paagi sa Kasulatan kag paagi sa iya mga naeksperiensiahan. Gani nakumbinsi si Pablo nga ginahigugma sia ni Jehova nga Dios. (Roma 8:38, 39; Efe. 2:4, 5) Bangod sini, mas ginhigugma pa gid niya si Jehova. Ginpakita ni Pablo ang iya gugma kay Jehova “paagi sa pag-alagad kag sa padayon nga pag-alagad sa mga balaan.”—Heb. 6:10.

7. Ano ang isa ka paagi para mas higugmaon pa gid naton si Jehova?

⁷ Para mas higugmaon pa gid naton ang Dios, dapat naton tun-an sing maayo ang iya Pulong. Samtang ginabasa mo ang Biblia, panikasugi nga makita kon ano ang ginatudlo sang kada teksto parte kay Jehova. Pamangkuta ang imo kaugalingon: ‘Paano ginapakita sini nga kasaysayan nga palangga ako ni Jehova? Paano ako ginapalig-on sini nga palanggaon si Jehova?’

8. Paano makabulig ang pangamuyo para mas higugmaon pa gid naton ang Dios?

⁸ Ang isa pa ka paagi para mas higugmaon pa gid naton si Jehova amo ang regular nga pagpangamuyo sa iya para isugid sa iya ang tanan naton nga ginabatyag. (Sal. 25:4, 5) Ginasabat gid ni Jehova ang aton mga pangamuyo. (1 Juan 3:21, 22) Si Khanh, nga isa ka sister sa Asia, nagsiling: “Sang primero, ginpalangga ko si Jehova bangod sang mga natun-an ko parte sa iya. Pero sang nakita ko kon paano niya ginasabat ang akon mga pangamuyo, mas ginpalangga ko pa gid sia. Bangod sini, napalig-on ako nga himuon ang mga butang nga makapalipay sa iya.”b

9. Ano ang ginsiling ni Pablo nga nagapakita nga nagapanikasog gid si Timoteo para mas higugmaon pa gid niya ang iya mga kauturan?

⁹ Mga pila ka tuig pagkatapos nangin Cristiano si Pablo, nakilala niya ang isa ka matutom nga pamatan-on nga si Timoteo. Palangga ni Timoteo si Jehova kag ang mga tawo. Ginsilingan ni Pablo ang mga taga-Filipos: “Wala na ako sing mapadala nga may panimuot kaangay [kay Timoteo] nga magaulikid gid sa inyo.” (Fil. 2:20) Wala ginsambit ni Pablo ang parte sa ikasarang ni Timoteo sa pag-organisar kag sa pagpamulongpulong, gani maathag nga nagdayaw gid si Pablo sa gugma ni Timoteo sa mga kauturan. Sigurado gid nga excited ang mga kongregasyon nga gin-alagaran ni Timoteo sa iya pagbisita liwat sa ila.—1 Cor. 4:17.

10. Paano ginpakita ni Anna kag sang iya bana ang ila gugma sa ila mga kauturan?

¹⁰ Nagapangita man kita sang mga paagi kon paano naton mabuligan ang aton mga kauturan. (Heb. 13:16) Binagbinaga ang eksperiensia ni Anna nga ginsambit sa nagligad nga artikulo. Pagkatapos sang isa ka mabaskog nga bagyo, ginbisitahan niya kag sang iya bana ang isa ka pamilya nga Saksi. Ginguba sang bagyo ang atop sang balay sang sini nga pamilya, gani wala sila sang matinlo nga mga bayo. Nagsiling si Anna: “Gindala namon ang ila mga bayo kag ginlabhan. Dayon ginbalik namon ini nga naplantsa na kag napiod. Simple lang ang amon ginhimo para sa ila. Pero bangod sini, nangin suod kami nga mag-abyanay asta subong.” Bangod palangga ni Anna kag sang iya bana ang ila mga kauturan, ginbuligan nila sila.—1 Juan 3:17, 18.

11. (a) Kon ginapakita naton sa iban nga ginahigugma naton sila, ano ang posible nga mabatyagan nila? (b) Suno sa Hulubaton 19:17, ano ang himuon ni Jehova kon ginapakitaan naton sang gugma ang iban?

¹¹ Kon palanggaon naton ang iban kag pakitaan sila sang kaayo, matalupangdan nila nga ginatinguhaan naton nga ilugon si Jehova. Kag posible nga wala lang kita kabalo nga nagapasalamat gid sila sa kaayo nga ginpakita naton sa ila. Indi malipatan ni Khanh, nga ginsambit kaina, ang mga kauturan nga nagbulig sa iya. Nagsiling sia: “Nagapasalamat gid ako sa tanan nga sister nga nagbulig sa akon. Ginasugat nila ako para mag-preaching, ginahagad nila ako para mag-snacks ukon manyaga, kag ginadul-ong nila ako sa balay. Narealisar ko nga grabe gali ang ila pagpanikasog para mahimo nila ini, kag ginhimo nila ini bangod palangga nila ako.” Posible nga may mga tion nga indi kita mapasalamatan sang aton mga ginbuligan. Amo ini ang ginsiling ni Khanh parte sa mga nagbulig sa iya: “Gusto ko gid balusan ang tanan nga kaayo nga ginpakita nila sa akon, pero wala ako kabalo kon diin na sila nagaistar subong. Pero kabalo si Jehova kon diin sila subong, gani nagapangamuyo ako sa iya nga balusan niya ang ila kaayo.” Husto si Khanh. Makita ni Jehova ang tanan nga kaayo nga ginapakita naton sa iban bisan pa nga gamay lang ang aton ginhimo. Para kay Jehova, daw pareho lang nga naghalad kita sa iya kag may utang sia sa aton. Ginapabaloran gid niya ini nga halad kag bayaran gid niya kita.—Basaha ang Hulubaton 19:17.

12. Paano mapakita sang mga brother nga ginahigugma nila ang mga kauturan sa kongregasyon? (Tan-awa man ang mga piktyur.)

¹² Kon isa ikaw ka brother, paano mo mapakita nga ginahigugma mo ang iban kag gusto mo sila buligan? Binagbinaga ang isa ka pamatan-on nga brother nga si Jordan. Ginpamangkot niya ang isa ka gulang kon ano ang puede niya himuon para mas makabulig sia sa kongregasyon. Gindayaw sang gulang ang iya pag-uswag kag naghatag sia sang pila ka panugda. Halimbawa, ginsilingan sang gulang si Jordan nga mas maayo kon temprano pa sia mag-abot sa Kingdom Hall para abiabihon ang iban, magkomento sia sa mga miting, regular sia nga magbantala upod sa iya grupo, kag mangita sia sang mga paagi kon paano sia makabulig sa iban. Sang gin-aplikar ni Jordan ini nga mga panugda, madamo sia sang bag-o nga natun-an kag mas ginhigugma pa gid niya ang iya mga kauturan. Natun-an ni Jordan nga kon mangin ministeryal nga alagad ang isa ka brother, indi buot silingon sini nga nagaumpisa pa lang sia sa pagbulig sa iban, kundi ginapadayon niya ang pagbulig sa ila.—1 Tim. 3:8-10, 13.

13. Paano napalig-on ang isa ka brother nga si Christian sang iya gugma para mag-alagad liwat bilang isa ka gulang?

¹³ Ano abi kon isa ikaw ka ministeryal nga alagad ukon gulang sang una? Ginadumdom ni Jehova ang imo mga ginhimo sang una kag ang imo gugma nga nagpalig-on sa imo nga himuon ini. (1 Cor. 15:58) Nakita man niya ang gugma nga padayon mo nga ginapakita sa iban. Nasubuan gid ang isa ka brother nga si Christian sang ginkuha sa iya ang iya pribilehiyo bilang isa ka gulang. Pero nagsiling sia: “May pribilehiyo man ako ukon wala, alagaron ko si Jehova sa bug-os ko nga masarangan. Himuon ko ini bangod palangga ko sia.” Sang ulihi, gintangdo sia liwat bilang isa ka gulang. Nagsiling si Christian: “Daw nag-alang-alang ako nga mangin isa ka gulang liwat. Pero nahunahuna ko nga ginapakitaan ako ni Jehova sang kaayo kay gusto niya nga mag-alagad ako liwat bilang isa ka gulang. Gani nagdesisyon ako nga batunon ini bangod palangga ko sia kag ang akon mga kauturan.”

14. Ano ang natun-an mo sa ginsiling sang isa ka sister sa Georgia?

¹⁴ Ginahigugma man sang mga alagad ni Jehova ang mga indi Saksi. (Mat. 22:37-39) Halimbawa, ang isa ka sister nga si Elena nga nagaistar sa pungsod sang Georgia, nagsiling: “Sang primero, naga-preaching lang ako bangod palangga ko si Jehova nga akon Amay sa langit. Pero sang mas ginpalangga ko pa gid sia, ginpalangga ko man ang mga tawo. Gani ginatinguhaan ko nga hunahunaon kon ano ang ila mga problema kag kon ano nga topiko ang gusto nila istoryahan. Pirme ko ini ginahunahuna, gani napalig-on ako nga buligan sila.”—Roma 10:13-15.

15-16. Base sa mga piktyur nga reenactment lang, ano ang maayo nga mga resulta kon ginapakitaan naton sang gugma ang iban?

¹⁵ Kon ginapakitaan naton sang gugma ang aton mga kauturan, indi lang sila ang nagabenepisyo. Sang nag-umpisa ang COVID-19 nga pandemic, ginbuligan sang isa ka brother nga si Paolo kag sang iya asawa ang madamo nga tigulang nga mga sister kon paano gamiton ang ila mga gadyet sa pagbantala. May isa ka sister nga nabudlayan sa sini sa umpisa, pero nasarangan gid niya nga himuon ini. Paagi sa iya gadyet, gin-agda niya ang iya mga paryente sa Memoryal, kag 60 sa ila ang nag-attend paagi sa videoconference. Bangod sa pagpanikasog ni Paolo kag sang iya asawa, nakabenepisyo ang sister kag ang iya mga paryente. Sang ulihi, ginsulatan sang sister si Paolo. Nagsiling sia: “Salamat gid sa pagtudlo mo sa amon nga mga tigulang. Indi ko gid malipatan ang kaayo ni Jehova kag ang imo mga sakripisyo para buligan kami.”

¹⁶ Paagi sa mga eksperiensia pareho sini, nakatuon si Paolo sang isa ka importante nga leksion. Nagpahanumdom ini sa iya nga mas importante ang gugma sangsa kaalam ukon ikasarang. Nagsiling sia: “Circuit overseer ako sang una. Narealisar ko subong nga bisan pa nalipatan na sang mga kauturan ang akon mga pamulongpulong, madumduman nila gihapon ang akon mga ginhimo para buligan sila.”

17. Sin-o pa ang nagabenepisyo kon nagapakita kita sang gugma?

¹⁷ Kon ginapakitaan naton sang gugma ang iban, nagabenepisyo man kita sa paagi nga wala naton ginapaabot. Naeksperiensiahan ini ni Jonathan nga taga-New Zealand. Isa ka bes, nakita niya ang isa ka brother nga payunir nga isahanon nga nagabantala. Sabado sadto sang hapon kag mainit ang tiempo. Nagdesisyon si Jonathan nga updan ang payunir sa pagbantala kada Sabado sang hapon. Sa umpisa, wala niya marealisar nga makabenepisyo gid sia sa ginpakita niya nga kaayo. “Sadto nga tion,” siling ni Jonathan, “wala ako nanamian mag-preaching. Pero sang nakita ko kon daw ano ka epektibo ang paagi sini nga payunir sa pag-preaching kag pagtudlo sa iban, nakabulig ini sa akon nga manamian sa sini nga hilikuton. Nangin suod ko man sia nga abyan kag ginbuligan niya ako nga mag-uswag sa espirituwal, manamian mag-preaching, kag mangin suod pa gid kay Jehova.”

18. Ano ang gusto ni Jehova nga himuon naton?

¹⁸ Gusto ni Jehova nga mas higugmaon pa gid naton sia kag ang iban. Natun-an naton nga mapabakod naton ang aton gugma kay Jehova paagi sa pagbasa kag pagpamalandong sa iya Pulong kag paagi sa regular nga pagpangamuyo sa iya. Mas higugmaon pa gid naton ang aton mga kauturan paagi sa pagbulig sa ila. Samtang nagabakod ang aton gugma, mangin suod pa gid kita kay Jehova kag sa aton mga kauturan. Kag mangin abyan naton sila asta sa wala sing katapusan.