Mga Tinangduan nga Lalaki—Magtuon Kamo kay Timoteo

SANG nagligad nga tuig, linibo ka lalaki ang gintangdo nga mga gulang kag ministeryal nga mga alagad sa mga kongregasyon sang mga Saksi ni Jehova sa bilog nga kalibutan. Kon lakip ka sa sining pinalangga nga mga kauturan, sigurado gid nga nalipay ka sa imo bag-o nga pribilehiyo.

Pero, mahimo nga nabalaka ka man. Si Jason, nga isa ka batan-on nga gulang, nagsiling, “Sang gintangdo ako, pamatyag ko daw indi ko masarangan ang bag-o nga mga responsibilidad.” Sanday Moises kag Jeremias nagbatyag sadto nga indi nila masarangan ang bag-o nga asaynment halin kay Jehova. (Ex. 4:10; Jer. 1:6) Kon amo man sini ang imo ginabatyag, paano mo ini madaug kag padayon nga mag-uswag? Binagbinaga ang halimbawa sang Cristiano nga disipulo nga si Timoteo.—Binu. 16:1-3.

Mahimo nga tin-edyer ukon beintehon si Timoteo sang ginpangabay sia ni apostol Pablo nga updan sia sa iya paglakbay. Mahimo nga sang primero wala sing kompiansa ang pamatan-on nga si Timoteo kag daw ginakulbaan sia sa iya bag-o nga katungdanan. (1 Tim. 4:11, 12; 2 Tim. 1:1, 2, 7) Pero, pagligad sang napulo ka tuig, amo ini ang ginsiling ni Pablo sa kongregasyon sa Filipos: “Nagalaum ako kay Ginuong Jesus nga sa indi madugay, mapadala ko sa inyo si Timoteo . . . Kay wala na ako sing mapadala nga may panimuot kaangay sa iya.”—Fil. 2:19, 20.

Ngaa dalayawon gid nga gulang si Timoteo? Binagbinaga ang anom ka leksion nga matun-an mo sa iya halimbawa.

1. Nagaulikid gid sia sa mga tawo. Ginsilingan ni Pablo ang mga kauturan sa Filipos: “[Si Timoteo] magaulikid gid sa inyo.” (Fil. 2:20) Huo, interesado gid si Timoteo sa espirituwal nga kaayuhan sang iban, kag ginhimo niya ang iya bug-os nga masarangan para sa ila.

Likawi nga mangin pareho sa drayber sang bus nga mas ginapasulabi ang pag-abot sa oras sa kada terminal sangsa magpasakay sang mga pasahero. Si William, nga ginataha nga gulang sing sobra na 20 ka tuig, naglaygay sa bag-o nga mga gintangdo: “Palanggaa ang mga kauturan. Magpokus sa ila kinahanglanon, indi sa kon paano himuon ang mga hilikuton.”

2. Gin-una niya ang espirituwal nga mga hilikuton. Ginsambit ni Pablo kon ngaa tuhay si Timoteo sa iban. Nagsiling sia: “Ang iban nagapangita sang ila kaugalingon lang nga kaayuhan, indi ang iya ni Jesucristo.” (Fil. 2:21) Ginsulat ini ni Pablo sang ara sia sa Roma, kag nakita niya nga ang mga kauturan didto masako sa ila personal nga mga hilikuton. Wala nila ginahimo ang ila bug-os nga masarangan sa pagbantala. Pero tuhay si Timoteo! Kon may kahigayunan nga mapalapnag ang maayong balita, ginailog niya ang panimuot ni Isaias, nga nagsiling: “Yari ako! Ipadala ako!”—Isa. 6:8.

Paano mo mabalanse ang personal kag espirituwal nga mga obligasyon? Una, hibalua kon ano ang pinakaimportante. ‘Pat-ura ninyo ang mas importante nga mga butang,’ laygay ni Pablo. (Fil. 1:10) Unaha kon ano ang pinakaimportante sa Dios. Ikaduha, pasimpleha ang imo kabuhi. Likawi ang mga hilikuton nga nagauyang sang imo tion kag kusog. Ginpalig-on ni Pablo si Timoteo: “Palagyo ka sa mga kailigbon sang pagkapamatan-on, apang tinguhai nga ipakita ang pagkamatarong, pagtuo, gugma, kag paghidait.”—2 Tim. 2:22.

3. Mapisan sia sa sagrado nga pag-alagad. Ginpahanumdom ni Pablo ang mga taga-Filipos: “Nahibaluan ninyo nga ginpamatud-an [ni Timoteo] nga takus sia, nga kaangay sa anak nga nagapaulipon sa iya amay, nagpaulipon sia upod sa akon sa pagpauswag sang maayong balita.” (Fil. 2:22) Indi matamad si Timoteo. Mapisan niya nga ginhimo ang iya hilikuton upod kay Pablo, gani nangin suod sila nga duha.

Madamo sing makalilipay nga hilikuton sa organisasyon sang Dios subong, kag magapasuod ini sa imo sa mga kauturan. Gani, tinguhai nga “madamo [ka] pirme sing ginahimo sa hilikuton sang Ginuo.”—1 Cor. 15:58.

4. Gin-aplikar niya ang iya natun-an. Nagsulat si Pablo kay Timoteo: ‘Ginsunod mo sing maayo ang akon panudlo, dalanon sang kabuhi, katuyuan, pagtuo, pagkamapinasensiahon, gugma, kag pagbatas.’ (2 Tim. 3:10) Bangod gin-aplikar ni Timoteo ang iya natun-an, ginhatagan sia sing dugang nga responsibilidad.—1 Cor. 4:17.

May ara ka bala abyan nga magulang sa imo kag mas eksperiensiado nga puede mo ilugon? Kon wala, mas maayo kon mangita ka. Si Tom, nga madugay na nga gulang, nagsiling: “Ginbuligan ako sang isa ka eksperiensiado nga gulang kag ginhanas niya ako sing maayo. Pirme ako nagapangayo sa iya sang laygay kag ginaaplikar ko ini. Bangod sini, madasig ako nga nag-uswag.”

5. Padayon sia nga naghanas. Ginlaygayan ni Pablo si Timoteo: “Hanasa ang imo kaugalingon nga ang imo tulumuron amo ang diosnon nga debosyon.” (1 Tim. 4:7) Bisan pa may coach ang isa ka atleta, kinahanglan niya gihapon hanason ang iya kaugalingon. Ginpalig-on ni Pablo si Timoteo: “Mag-ukod ka sa pagbasa sing dayag, sa paglaygay, kag sa pagpanudlo . . . Hunahunaa sing maayo ini nga mga butang; mag-ukod sa sini, agod ang imo pag-uswag makita sang tanan nga tawo.”—1 Tim. 4:13-15.

Dapat padayon mo nga pauswagon ang imo mga ikasarang. Magtuon sing maayo kag hibalua ang bag-o nga mga panuytoy sang organisasyon. Likawi man ang sobra nga pagsalig sa kaugalingon nga nagahunahuna nga madamo ka na sing eksperiensia gani masolbar mo ang bisan ano nga sitwasyon bisan indi ka na mag-research sing maayo. Iluga si Timoteo paagi sa ‘paghatag sang dalayon nga igtalupangod sa imo kaugalingon kag sa imo panudlo.’—1 Tim. 4:16.

6. Nagsalig sia sa espiritu ni Jehova. Ginpahanumdom ni Pablo kay Timoteo ang iya ministeryo: “Bantayi ining maayo nga butang nga ginsalig sa imo paagi sa balaan nga espiritu nga yara sa aton.” (2 Tim. 1:14) Para mabantayan ukon mapabaloran ni Timoteo ang iya ministeryo, dapat sia magsalig sa espiritu sang Dios.

Si Donald, nga madugay na nga gulang, nagsiling: “Dapat pabaloran sang mga gintangdo ang ila kaangtanan sa Dios. Ang mga nagahimo sini ‘nagabaskog.’ Kon ipangamuyo nila ang espiritu sang Dios kag palambuon ang mga kinaiya nga ginapatubas sini, mangin pagpakamaayo gid sila sa mga kauturan.”—Sal. 84:7; 1 Ped. 4:11.

Makapalig-on gid makita ang madamo nga bag-o gintangdo nga mga utod, pareho sa imo, nga padayon nga nagauswag sa pag-alagad kay Jehova. Si Jason, nga ginsambit sa umpisa, nagsiling: “Sugod sang nangin gulang ako, madamo ako sing natun-an kag nadugangan ang akon kompiansa. Subong, nalipay gid ako sa akon asaynment kag isa gid ini ka dalayawon nga pribilehiyo!”

Gusto mo bala mag-uswag sa imo pag-alagad? Magtuon kay Timoteo, kag mangin pagpakamaayo ka man sa katawhan sang Dios.