Si Tiquico—Isa Ka Masaligan Nga Masigkaulipon

SA LAINLAIN nga okasyon, si Tiquico naglakbay kaupod ni apostol Pablo kag nag-alagad subong iya mensahero. Isa sia ka emisaryo nga mahimo saligan sing kuwarta kag sing mga responsabilidad sa pagdumala. Sanglit ginapatalupangod sang Kasulatan ang iya pagkamasaligan​—⁠isa ka kinaiya nga kinahanglanon para sa tanan nga Cristiano​—⁠ayhan luyag mo nga makilala sia sing maayo pa.

Ginlaragway ni Pablo si Tiquico subong ang iya “hinigugma nga utod kag matutom nga ministro kag masigkaulipon sa Ginuo.” (Colosas 4:​7) Ngaa amo sina ang pagtamod sang apostol sa iya?

Ang Misyon sa Pagbulig sa Jerusalem

Sang mga 55 C.⁠E. ang mga Cristiano sa Judea nagkinahanglan sing materyal nga bulig. Paagi sa bulig sang mga kongregasyon sa Europa kag Asia Minor, si Pablo naghimo sing kahimusan sa pagpangolekta sing bulig para sa ila. Si Tiquico, nga tagadistrito sang Asia, may daku nga nabulig sa sini nga misyon.

Sa tapos mahatag ang mga instruksion kon ano ang himuon sa sining amot, si Pablo nagpanugda nga palakton sa Jerusalem ukon paupdon sa iya didto ang masaligan nga mga tawo, nga dala ang kuwarta nga nakolekta. (1 Corinto 16:​1-4) Sang ginsugdan niya ang malawig nga paglakbay halin sa Gresya pakadto sa Jerusalem, gin-updan sia sang pila ka lalaki, ang isa sa ila mahimo nga amo si Tiquico. (Binuhatan 20:4) Ang subong sini kadamo nga kaupdanan mahimo nga kinahanglanon bangod dala nila ang kuwarta nga ginsalig sa ila sang pila ka kongregasyon. Ang pagkinahanglan sing seguridad nagakaigo gid, kay mahimo sila makasumalang sing mga kawatan sa dalanon.​—⁠2 Corinto 11:⁠26.

Sanglit nag-upod sanday Aristarco kag Trofimo kay Pablo sa Jerusalem, ang iban nagahunahuna nga mahimo nga nag-upod man si Tiquico kag ang iban pa. (Binuhatan 21:​29; 24:​17; 27:​1, 2) Bangod kaupod si Tiquico sa sining misyon sa pagbulig, isa sia sang pila nga ginpanugda subong ang “utod” nga nangabudlay kaupod ni Tito sa Gresya sa paghimo sing kahimusan sa pagpangolekta kag “gintangdo sang mga kongregasyon nga mangin kaupod [ni Pablo] sa paglakbay may kaangtanan sa sini nga sahi sang malulo nga dulot.” (2 Corinto 8:​18, 19; 12:18) Kon ang una nga asaynment nga ginhimo ni Tiquico isa ka mabug-at nga salabton, ang iya ikaduha nga asaynment amo man.

Halin sa Roma Pakadto sa Colosas

Lima ukon anom ka tuig sang ulihi (60-61 C.⁠E.), si Pablo nagalaum nga mahilway gikan sa iya nahaunang pagkabilanggo sa Roma. Kaupod niya si Tiquico, mga ginatos ka kilometro halin sa puluy-an. Manugpauli na sadto si Tiquico sa Asia. Bangod sini, nagpadala si Pablo sing mga sulat sa Cristianong mga kongregasyon sa sadto nga lugar kag ginpapauli niya ang naglayas nga ulipon ni Filemon, si Onesimo, sa Colosas. Dimagkubos tatlo ka sulat ang dala nanday Tiquico kag Onesimo nga nalakip na karon sa kanon sang Biblia​—⁠ang isa sa mga taga-Filipos, ang isa sa mga taga-Colosas, kag ang isa kay Filemon. Ayhan may isa man ka sulat nga gindul-ong sa kongregasyon sa Laodicea, isa ka siudad nga mga 18 kilometros ang kalayuon halin sa Colosas.​—⁠Efeso 6:​21; Colosas 4:​7-9, 16; Filemon 10-12.

Si Tiquico indi lamang manugdul-ong sing sulat. Isa sia ka masaligan nga personal nga mensahero, kay si Pablo nagsulat: “Ang tanan ko nga hilikuton ipahibalo sa inyo ni Tiquico, nga akon hinigugma nga utod kag matutom nga ministro kag masigkaulipon sa Ginuo. Tungod mismo sa katuyuan nga mahibaluan ninyo ang mga butang nga may kaangtanan sa amon kag agod malugpayan niya ang inyo mga tagipusuon, ginapadala ko sia sa inyo.”​—⁠Colosas 4:​7, 8.

Ginpakita sang iskolar nga si E. Randolph Richards nga ang isa ka manugdala sing sulat “amo sa masami ang personal nga koneksion sa ulot sang nagsulat kag sang mga ginsulatan dugang pa sa nasulat nga koneksion. . . . Ang [isa ka rason] kon ngaa kinahanglan ang isa ka masaligan nga manugdala amo [nga] sa masami may dala sia nga dugang pa nga impormasyon. Mahimo ilaragway sang sulat ang kahimtangan sa malip-ot, sa masami suno sa pagbulubanta sang nagsulat, apang ang nagadala ginapaabot nga magasugid sang tanan nga detalye sa ginpadalhan sing sulat.” Walay sapayan nga ang isa ka sulat mahimo magahinun-anon sa mga panudlo kag hilingagawon nga mga butang, ang dugang pa nga mga impormasyon mahimo masugid sang isa ka masaligan nga mensahero.

Diutay lamang ang ginasambit sang mga sulat sa mga taga-Efeso, sa mga taga-Colosas, kag kay Filemon kon kamusta na si Pablo. Gani dapat ipaalinton ni Tiquico ang personal nga impormasyon, ipaathag ang kahimtangan ni Pablo sa Roma, kag hangpon sing maayo ang mga kahimtangan sa mga kongregasyon agod mapalig-on sila. Ini nga sahi sang mga mensahe kag mga responsabilidad ginatulin lamang sa mga tawo nga masaligan nga makatiglawas sing maayo sa nagpadala. Si Tiquico amo sina nga tawo.

Pagdumala sa Malayo nga mga Asaynment

Pagkatapos nahilway gikan sa pagkabilanggo sa balay sa Roma, nahunahuna ni Pablo nga ipadala ayhan si Tiquico ukon si Artemas kay Tito sa isla sang Creta. (Tito 1:​5; 3:12) Sa ikaduha nga pagkabilanggo ni Pablo sa Roma (ayhan sang mga 65 C.⁠E.), ginpadala liwat sang apostol si Tiquico sa Efeso, ayhan agod magbulos kay Timoteo, nga sadto nga tion mahimo nga naglakbay agod updan si Pablo.​—⁠2 Timoteo 4:​9, 12.

Indi maathag kon bala nagkadto si Tiquico sa Creta kag sa Efeso sini nga tion. Walay sapayan sina, ang mga paghinambit subong sini nagapahangop nga nagpabilin sia nga isa sang suod nga mga kaupdanan ni Pablo tubtob sa katapusan nga tinuig sang ministeryo sang apostol. Kon nahunahuna ni Pablo nga ipadala sia sa mabug-at kag ayhan mabudlay nga mga misyon bilang tal-us kanday Timoteo kag Tito, maathag nga si Tiquico nangin isa ka hamtong nga Cristianong manugtatap. (Ipaanggid ang 1 Timoteo 1:​3; Tito 1:​10-13.) Bangod sang iya kahanda nga maglakbay kag magamit sa malayo nga mga asaynment, nangin daku sia nga bulig para kay Pablo kag sa bug-os nga Cristianong kongregasyon.

Sa karon, ang masinakripisyuhon-sa-kaugalingon nga mga Cristiano kinabubut-on nga nagaalagad sa Dios sa lokal nga mga kongregasyon sang mga Saksi ni Jehova ukon handa sila sa pagpasanyog sang mga interes sang Ginharian sa iban nga lugar. Linibo ang malipayon nga nagbaton sa mga asaynment subong mga misyonero, nagalakbay nga mga manugtatap, internasyonal nga mga alagad sa mga proyekto sa pagpatindog, sa bug-os kalibutan nga ulong-talatapan sang Watch Tower Society, ukon sa isa sang mga sanga sini. Kaangay ni Tiquico, indi sila kilala, apang mapisan sila nga mga manugpangabudlay, ‘matutom nga mga ministro’ nga palangga sang Dios kag ginahigugma sang iban pa nga mga Cristiano subong masaligan nga ‘mga masigkaulipon sa Ginuo.’