‘Padayon nga Bantayi ang Ministeryo nga Ginbaton Mo sa Ginuo’

“Padayon ka nga magbantay nga ginatuman mo ang ministeryo, nga ginbaton mo sa Ginuo.”—COL. 4:17, NW.

1, 2. Ano ang salabton sang mga Cristiano sa mga tawo?

DAKU ang salabton naton sa mga tawo sa palibot naton. Ang ila kabuhi sa “dakung kapipit-an” nagadepende sa desisyon nga ginahimo nila karon. (Bug. 7:14, NW) Ang inspirado nga manunulat sang Hulubaton nagsiling: “Luwasa ang mga gindala sa kamatayon; ang mga palatyon tan-awa nga mahawiran mo sila.” Daw ano gid ka importante nga sugo! Kon indi naton mapaandaman ang mga tawo, makasala kita sa dugo. Sa pagkamatuod, ang amo gihapon nga teksto nagpadayon: “Kon magsiling ka, ‘Yari karon, wala kami makahibalo sini,’ wala bala nagapatugsiling sini ang nagatimbang sang mga tagiposoon? Ang nagabantay sang imo kalag wala bala sia makahibalo sini, kag indi sia bala maghatag sa tagsa ka tawo sono sa iya binuhatan?” Huo, indi gid makasiling ang mga alagad ni Jehova nga ‘wala sila nakahibalo’ sa katalagman nga magaabot sa mga tawo.—Hulu. 24:11, 12.

² Ginapabaloran gid ni Jehova ang kabuhi. Ginapalig-on niya ang iya mga alagad nga magpanikasog nga mabuligan nga maluwas ang pinakamadamo nga tawo sa bug-os nila nga masarangan. Dapat ipahibalo gid sang kada ministro sang Dios ang nagaluwas kabuhi nga mensahe sa Pulong sang Dios. Ang aton hilikuton kaangay sang hilikuton sang manugbantay nga nagapahibalo kon may manug-abot nga katalagman. Indi naton luyag nga manabat sa dugo sang mga pagalaglagon. (Ezeq. 33:1-7) Busa, daw ano gid ka importante nga magpadayon kita sa ‘pagbantala sang pulong’!—Basaha ang 2 Timoteo 4:1, 2, 5, NW.

 3. Ano nga mga topiko ang pagabinagbinagon sa sini kag sa masunod nga mga artikulo?

³ Binagbinagon sining artikulo kon paano mo malandas ang mga balagbag sa imo nagaluwas-kabuhi nga ministeryo kag kon paano ka makabulig sa mas madamo nga tawo. Binagbinagon sang masunod nga artikulo kon paano mo mapalambo ang kalantip sa pagpanudlo sang importante nga mga kamatuoran. Ipakita naman sang ikatlo nga tulun-an nga artikulo ang pila ka makapalig-on nga resulta nga natigayon sang mga manugbantala sang Ginharian sa bug-os nga kalibutan. Apang, antes naton binagbinagon ining mga topiko, maayo nga repasuhon naton anay ang pila ka rason kon ngaa makahalanguyos gid ang aton tion.

Ngaa Madamo ang Walay Paglaum?

4, 5. Ano ang naeksperiensiahan karon sang katawhan, kag ano ang reaksion sang madamo nga tawo sa sini?

⁴ Ginapakita sang mga nagakatabo sa kalibutan nga nagakabuhi na kita sa “katapusan sang sistema sang mga butang” kag nga malapit na gid ini matapos. Naeksperiensiahan na karon sang katawhan ang mga hitabo kag mga kahimtangan nga ginsiling ni Jesus kag sang iya mga disipulo nga mahanabo sa “katapusan nga mga adlaw.” Ang mga “pagpasakit,” subong sang mga inaway, kakulang sa kalan-on, linog, kag iban pa nga mga kalamidad, nagapaantos sa katawhan. Makita naton bisan diin lang ang pagkamalinapason, kakagod, kag di-diosnon nga mga panimuot. Bisan sa mga tawo nga nagatuman sa mga talaksan sang Biblia, “makahalanguyos [gid ini] nga mga tion nga mabudlay atubangon.”—Mat. 24:3, 6-8, 12, NW; 2 Tim. 3:1-5, NW.

⁵ Apang, ang kalabanan nga tawo wala sing hinalung-ong kon ano ang matuod nga kahulugan sang mga nagakatabo karon sa kalibutan. Bangod sini, madamo sa ila ang nabalaka gid sa ila kaugalingon nga kaayuhan kag sa kaayuhan sang ila pamilya. Ang iban nagabatyag sing kasakit bangod napatyan sila sing hinigugma ukon nakaeksperiensia sing personal nga mga trahedya. Bangod wala sila sing sibu nga ihibalo kon ngaa nagakatabo ining mga butang kag kon diin masapwan ang solusyon, nadulaan sila sing paglaum.—Efe. 2:12.

 6. Ngaa wala gid nakabulig ang “Babilonia nga Daku” sa mga sumulunod sini?

⁶ Ang “Babilonia nga Daku,” ang bug-os kalibutan nga imperyo sang butig nga relihion wala gid nakahatag sing matuod nga lugpay sa katawhan. Sa baylo, paagi sa “alak sang iya pagpakighilawas,” ginpatalang niya ang madamo nga tawo sa espirituwal. Dugang pa, kaangay sang isa ka makihilawason nga babayi, ginasulay kag ginakontrol sang butig nga relihion “ang mga hari sang duta” paagi sa butig nga mga doktrina kag espiritistiko nga mga buhat agod nga ang kalabanan nga tawo magpaayon na lang sa ila mga gobierno. Busa, ang butig nga relihion nangin gamhanan kag maimpluwensia, apang ginsikway sini sing bug-os ang kamatuoran.—Bug. 17:1, 2, 5 NW; 18:23.

 7. Ano ang mahanabo sa kalabanan nga tawo, apang paano mabuligan ang iban?

⁷ Gintudlo ni Jesus nga ang kalabanan nga mga tawo magalakbay sa masangkad nga dalan nga nagapadulong sa kalaglagan. (Mat. 7:13, 14) Ang iban nga tawo yara sa masangkad nga dalan bangod hungod nila nga ginasikway kon ano ang ginatudlo sang Biblia, apang ang iban yara sa sini bangod nalimbungan sila ukon wala sila natudluan kon ano gid ang ginapatuman ni Jehova sa ila. Ayhan ang iban sa ila magabag-o kon hatagan lang sing maathag nga rason gikan sa Biblia. Apang yadtong nagapabilin sa Babilonia nga Daku kag padayon nga nagasikway sa mga talaksan sang Biblia indi gid maluwas sa “dakung kapipit-an.”—Bug. 7:14, NW.

Magbantala nga ‘Walay Untat’

8, 9. Ano ang ginhimo sang unang siglo nga mga Cristiano sang ginpamatukan sila, kag ngaa?

⁸ Nagsiling si Jesus nga ang iya mga disipulo magabantala sang maayong balita sang Ginharian kag magahimo sing mga disipulo. (Mat. 28:19, 20) Busa, ginakabig sang matuod nga mga Cristiano ang pagpakigbahin sa pagbantala nga pamatuod sang ila pagkamainunungon sa Dios kag importante gid sa ila pagtuo. Bangod sini, nagpadayon sa pagbantala ang una nga mga sumulunod ni Jesus bisan pa nagaatubang sila sing mga pagpamatok. Nagpangayo sila sing kusog kay Jehova, paagi sa pagpangamuyo nga buligan sila nga padayon nga “maghambal sang [iya] pulong nga may bug-os nga kaisog.” Bilang sabat, ginpasagahay ni Jehova sa ila ang iya balaan nga espiritu, kag nangin maisog sila sa pagbantala sang pulong sang Dios.—Binu. 4:18, 29, 31, NW.

⁹ Nag-ugdaw bala ang pagbantala sang mga sumulunod ni Jesus sa maayong balita sang nangin masingki na ang pagpamatok? Wala gid. Bangod naakig sa pagbantala sang mga apostoles, gindakop sila sang Judiyong relihioso nga mga lider, ginpahog, kag ginbunal. Apang, ang mga apostoles padayon nga “wala nagauntat sa pagpanudlo kag sa pagbantala sing maayong balita tuhoy sa Cristo, si Jesus.” Nahangpan nila nga dapat nila “tumanon ang Dios subong manuggahom sa baylo sang mga tawo.”—Binu. 5:28, 29, 40-42, NW.

10. Ano nga mga kabudlayan ang ginaatubang sang mga Cristiano karon, apang ano ang mahimo mangin resulta sang ila maayo nga paggawi?

¹⁰ Ang kalabanan karon nga alagad sang Dios wala ginabakol ukon ginabilanggo bangod sa ila pagbantala. Apang, ang tanan nga matuod nga Cristiano nagaatubang sing nanuhaytuhay nga mga pagtilaw. Halimbawa, ano abi kon pahulagon ka sang imo nahanas sa Biblia nga konsiensia nga maggawi sing tuhay sangsa ginahimo sang iban. Mahimo magpensar ang imo mga katrabaho, mga kaeskwela, ukon mga kaingod nga indi ka normal bangod ginabase mo ang imo mga desisyon sa mga prinsipio sa Biblia. Bisan ano pa ka negatibo ang ila ihambal, indi ka dapat maluyahan sing buot. Ang kalibutan yara sa espirituwal nga kadulom, apang ang mga Cristiano dapat magsiga “subong mga suga.” (Fil. 2:15, NW) Himal-i mo, ang pila ka sinsero nga mga nagapanilag magaapresyar sang imo maayo nga mga buhat kag magahatag sing himaya kay Jehova.—Basaha ang Mateo 5:16.

11. (a) Ano ang mahimo mangin reaksion sang iban sa pagbantala nga hilikuton? (b) Ano nga pagpamatok ang gin-atubang ni apostol Pablo, kag ano ang iya reaksion sa sini?

¹¹ Kinahanglan naton ang kaisog agod makapadayon kita sa pagbantala. Ang iban nga tawo, bisan gani ang imo mga paryente, mahimo magyaguta sa imo ukon magpaluya sang imo buot. (Mat. 10:36) Si apostol Pablo indi lang makaisa ginkastigo bangod sa iya matutom nga pagbantala. Talupangda ang iya reaksion sa sinang pagpamatok: “Sa tapos kami mag-antos anay kag ginmaltrato,” sulat niya, “nagtipon kami sang kaisog paagi sa aton Dios agod masugid sa inyo ang maayong balita sang Dios nga may daku nga pagpanikasog.” (1 Tes. 2:2, NW) Kinahanglan gid ni Pablo sing kaisog agod makapadayon sia sa pagbantala sang maayong balita pagkatapos sia dakpon, ubahan, bunalon sing mga bilugon, kag ilupot sa bilangguan. (Binu. 16:19-24) Paano sia nakatigayon sing kaisog nga magpadayon? Bangod sang iya nagapangibabaw nga handum nga tumanon ang sugo sang Dios nga magbantala.—1 Cor. 9:16.

12, 13. Ano nga mga hangkat ang ginaatubang sang pila ka Cristiano, kag ano ang ginahimo nila agod malandas ini?

¹² Mabudlay man huptan ang aton kakugi sa ministeryo kon ang mga tawo sa aton teritoryo pirme lang wala sa balay ukon wala nagasapak sa mensahe sang Ginharian. Ano ang aton himuon sa sini? Mahimo kinahanglan kita magtipon sing dugang pa nga kaisog nga magpanaksi sing di-pormal. Puede man naton bag-uhon ang aton iskedyul sa iban nga oras ukon adlaw ukon magkonsentrar sa pagbantala sa mga duog nga mas madamo kita sing masugilanon.—Ipaanggid ang Juan 4:7-15; Binuhatan 16:13; 17:17.

¹³ Ang iban pa nga kabudlayan nga ginaatubang sang madamo amo ang katigulangon kag problema sa panglawas, nga mahimo magalimite sa ila sa pagbantala sing kapin pa. Kon amo sini ang imo kahimtangan, indi dapat magluya ang imo buot. Nahibaluan ni Jehova ang imo mga limitasyon kag ginapabaloran niya kon ano ang imo masarangan. (Basaha ang 2 Corinto 8:12.) Ano man nga kapipit-an ang imo ginaatubang—pagpamatok man ini, di-pagsapak, ukon balatian—himua ang bug-os mo nga masarangan nga ipaambit ang maayong balita sa iban.—Hulu. 3:27; ipaanggid ang Marcos 12:41-44.

‘Padayon nga Bantayi ang Imo Ministeryo’

14. Ano nga halimbawa ang ginpahamtang ni apostol Pablo sa iya masigka-Cristiano, kag ano nga laygay ang iya ginhatag?

¹⁴ Mapisan gid nga gintuman ni apostol Pablo ang iya ministeryo, kag ginpalig-on niya ang iya masigkatumuluo nga amo man sini ang himuon. (Binu. 20:20, 21; 1 Cor. 11:1) Ang isa ka tawo nga espesipiko nga ginpalig-on ni Pablo amo ang unang-siglo nga Cristiano nga si Arquipo. Sa iya sulat sa mga taga-Colosas, si Pablo nagsiling: “Isiling ninyo kay Arquipo: ‘Padayon ka nga magbantay nga ginatuman mo ang ministeryo, nga ginbaton mo sa Ginuo.’” (Col. 4:17, NW) Wala kita nakahibalo kon sin-o si Arquipo ukon kon ano ang iya kahimtangan, apang maathag nga nakabaton sia sing asaynment nga magbantala. Kon isa ikaw ka dedikado nga Cristiano, nakabaton ka man sing asaynment nga magbantala. Padayon mo bala nga ginabantayan ang imo ministeryo agod matuman ini?

15. Ano ang nadalahig sa Cristianong dedikasyon, kag ano ang dapat naton ipamangkot sa aton kaugalingon?

¹⁵ Antes kita nagpabawtismo, gindedikar naton ang aton kabuhi kay Jehova paagi sa tinagipusuon nga pangamuyo. Buot silingon determinado kita nga himuon ang iya kabubut-on. Busa, dapat naton pamangkuton ang aton kaugalingon, ‘Ang paghimo bala sang kabubut-on sang Dios amo gid ang labing importante nga butang sa akon kabuhi?’ Mahimo madamo kita sing salabton nga ginapaabot ni Jehova nga tungdan naton, subong sang pag-aman sing mga kinahanglanon sang aton pamilya. (1 Tim. 5:8) Apang paano naton ginagamit ang nabilin naton nga tion kag kusog? Ano ang aton prioridad sa kabuhi?—Basaha ang 2 Corinto 5:14, 15.

16, 17. Ano nga mga posibilidad ang mahimo binagbinagon sang Cristiano nga mga pamatan-on ukon yadtong may diutay lamang nga salabton?

¹⁶ Isa bala ikaw ka dedikado nga Cristianong pamatan-on nga nakatapos na ukon manugtapos sa pag-eskwela? Mahimo nga wala ka pa sing mabug-at nga mga salabton sa pamilya. Ti, ano ang imo plano sa kabuhi? Ano nga desisyon ang makabulig sa imo sa pagtuman sang imo pangako nga himuon ang kabubut-on ni Jehova? Madamo ang nag-organisar sang ila mga hilikuton agod makapayunir, sa amo nakaagom sila sing daku nga kalipay kag kaayawan.—Sal. 110:3; Man. 12:1.

¹⁷ Ayhan isa ikaw ka lamharon nga adulto. May bug-os tion ka nga trabaho apang wala ka sing ginasagod kundi imo lamang kaugalingon. Walay duhaduha nga nalipay ka sa pagpakigbahin sa mga hilikuton sang kongregasyon samtang ginatugot sang imo iskedyul. Puede mo bala madugangan ang imo pagpakigbahin agod makatigayon ka sing dugang pa nga kalipay? Nahunahuna mo na bala nga pasangkaron ang imo ministeryo? (Sal. 34:8; Hulu. 10:22) Sa pila ka teritoryo, madamo pa sing kinahanglan himuon agod mapalab-utan ang tanan sing nagahatag-kabuhi nga mensahe sang kamatuoran. Mapasibu mo bala ang imo kabuhi, agod makaalagad sa duog nga mas daku ang kinahanglanon nga mga manugbantala sing Ginharian?—Basaha ang 1 Timoteo 6:6-8.

18. Ano nga mga pagbag-o ang ginhimo sang lamharon nga mag-asawa, kag ano ang nangin resulta?

¹⁸ Binagbinaga ang halimbawa nanday Kevin kag Elena nga nagapuyo sa Estados Unidos.a Kaangay sang masami ginahimo sang mga bag-ong kasal sa ila lugar, naghunahuna sila nga kinahanglan sila magbakal sing balay. Pareho sila nga nagatrabaho sing bug-os tion, busa masarangan nila ang komportable nga pagkabuhi. Apang bangod sang ila iskedyul sa trabaho, kag mga hilikuton sa balay, diutay lamang ang tion nila para sa pagministeryo. Narealisar nila nga ginahinguyang nila ang halos tanan nila nga tion kag kusog sa ila mga trabaho. Apang, sang naobserbahan nila ang simple nga pagkabuhi sang isa ka malipayon nga payunir nga mag-asawa, nagdesisyon sanday Kevin kag Elena nga bag-uhon ang ila prioridad sa kabuhi. Pagkatapos sila mangayo sing panuytoy kay Jehova paagi sa pangamuyo, ginbaligya nila ang ila balay kag nagsaylo sa isa ka apartment. Ginbuhinan ni Elena ang oras sang iya pagtrabaho kag nagpayunir. Bangod napalig-on sia sa mga eksperiensia sang iya asawa, naghalin si Kevin sa iya bug-os tion nga trabaho kag nagpayunir man. Sang ulihi, nagsaylo sila sa isa ka pungsod sa Bagatnan nga Amerika agod mag-alagad sa duog nga daku sing kinahanglanon nga mga manugbantala sang Ginharian. “Malipayon na ang amon pag-asawahay,” siling ni Kevin, “apang sang gintinguhaan namon ang espirituwal nga mga tulumuron, labi nga nagdalom ang kalipay nga amon nabatyagan.”—Basaha ang Mateo 6:19-22.

19, 20. Ngaa ang pagbantala sang maayong balita amo ang labing importante nga hilikuton karon?

¹⁹ Ang pagbantala sang maayong balita amo ang labing importante nga hilikuton nga ginahimo karon sa duta. (Bug. 14:6, 7) Nagabulig ini sa pagpakabalaan sa ngalan ni Jehova. (Mat. 6:9) Ang mensahe sang Biblia nagapauswag sang kabuhi sang linibo ka mga tawo nga nagabaton sini kada tuig, kag makadul-ong ini sa ila kaluwasan. “Apang, paano sila . . . makabati kon wala sing isa nga magbantala?” pamangkot ni apostol Pablo. (Roma 10:14, 15, NW) Indi bala mabudlay gid kon wala sing magabantala? Busa, kabay nga mangin determinado ikaw nga himuon ang imo bug-os nga masarangan nga tumanon ang imo ministeryo.

²⁰ Ang isa pa ka paagi nga mabuligan mo ang mga tawo nga mahangpan kon ano ang kahulugan sining makahalanguyos nga mga tion kag ang mahimo nga resulta sang ila mga desisyon amo ang pagpauswag sang imo ikasarang sa pagpanudlo. Binagbinagon sa masunod nga artikulo kon paano mo ini mahimo.

[Footnote]

Ano ang Imo Sabat?

• Ano ang salabton sang mga Cristiano sa mga tawo?

• Paano naton malandas ang mga balagbag sa aton pagbantala?

• Paano naton matuman ang aton asaynment nga magbantala?

[Piktyur sa pahina 5]

Importante ang kaisog agod makabantala bisan pa nagaatubang sing pagpamatok

[Piktyur sa pahina 7]

Ano ang sarang mo mahimo kon ang mga tawo sa inyo teritoryo pirme lang wala sa balay?