Ubaha kag Isikway ang Daan nga Personalidad

1, 2. Ano ang natalupangdan sang iban sa mga Saksi ni Jehova?

MADAMO ang nakatalupangod sa tumalagsahon nga mga kinaiya sang katawhan ni Jehova. Halimbawa, amo ini ang ginsulat sang awtor nga si Anton Gill parte sa aton mga kauturan sa Nazi Germany: “Akig gid ang mga Nazi sa mga Saksi ni Jehova. . . . Sang 1939, [napriso] ang 6,000 sa ila.” Nagsiling man sia nga bisan pa nag-antos sing grabe nga paghingabot ang mga Saksi, nakilala sila nga masaligan, kalmado, matutom sa ila Dios, kag nahiusa.

² Natalupangdan man sang mga taga-South Africa ang maayo nga mga kinaiya sang katawhan sang Dios. Sang una, indi tugot nga mag-updanay ang mga Saksi nga indi pareho sing kolor sa sini nga pungsod. Pero sang Domingo, Disiembre 18, 2011, katahom gid tulukon sang sobra 78,000 ka kauturan nga sarisari sing rasa halin sa South Africa kag sa iban pa nga pungsod. Nagtipon sila sa pinakadaku nga istadyum sa siudad sang Johannesburg para mamati sa espirituwal nga programa. Nagsiling ang isa ka manedyer sang istadyum sa ila: “Kamo ang pinakamabuot nga tawo nga nakita ko sa sini nga istadyum. Tanan kamo mahipid mamayo. Gintinluan man ninyo sing maayo ang istadyum. Pero labaw sa tanan, talalupangdon gid kamo kay sarisari ang inyo rasa.”

 3. Ngaa pinasahi ang aton paghiliutod?

³ Ginapakita sini nga mga komento sang mga indi Saksi nga pinasahi ang aton paghiliutod sa bilog nga kalibutan. (1 Ped. 5:9, footnote) Pero ngaa tuhay gid kita sa iban nga organisasyon? Paagi sa bulig sang Pulong sang Dios kag sang iya balaan nga espiritu, ginpanikasugan naton nga ‘ubahon ang daan nga personalidad.’ Dayon, ‘ginsuksok naton ang bag-o nga personalidad.’—Col. 3:9, 10.

 4. Ano ang binagbinagon sa sini nga artikulo, kag ngaa?

⁴ Kon mauba na naton ang daan nga personalidad, dapat naton ini isikway. Sa sini nga artikulo, binagbinagon naton kon paano naton mauba ang daan nga personalidad, kon ngaa dapat gid ini himuon dayon, kag kon ngaa posible ini bisan pa nanggamot na sa isa ang malain nga mga buhat. Binagbinagon man naton kon paano masikway sang madugay na sa kamatuoran ang daan nga personalidad. Ngaa dapat naton ini binagbinagon? Makapasubo nga bangod wala maghalong ang iban nga nagaalagad anay kay Jehova, nagbalik sila sa ila malain nga paggawi sang una. Gani dapat gid naton tanan dumdumon ini nga paandam: “Ang nagahunahuna nga nagatindog mag-andam nga indi sia matumba.”—1 Cor. 10:12.

 5. (a) Maghatag sing ilustrasyon kon ngaa dapat ubahon dayon ang daan nga personalidad. (Tan-awa ang piktyur sa umpisa sini nga artikulo.) (b) Suno sa Colosas 3:5-9, ano nga mga buhat ang bahin sang daan nga personalidad?

⁵ Ano ang himuon mo kon nahigkuan ang imo bayo kag mabaho na? Ubahon mo ini dayon kag islan. Gani dapat man naton tumanon dayon ang sugo nga isikway ang mga batasan nga wala nahisuno sa personalidad sang Dios. Sundon naton ang ginsiling ni Pablo sa mga Cristiano sang una: “Dapat ninyo isikway ini tanan.” Binagbinagon naton ang duha sa malain nga mga buhat nga ginsambit ni Pablo, ang seksuwal nga imoralidad kag ang kahigkuan.—Basaha ang Colosas 3:5-9.

6, 7. (a) Suno sa ginsiling ni Pablo, ngaa masiling naton nga dapat gid magpanikasog para mauba ang daan nga personalidad? (b) Ano anay ang kabuhi ni Sakura, kag ano ang nakabulig sa iya nga magbag-o?

⁶ Seksuwal nga imoralidad. Nalakip sa kahulugan sang orihinal nga tinaga sa Biblia nga gin-translate nga “seksuwal nga imoralidad” ang pagpakigsekso sang mga indi mag-asawa kag ang homoseksuwalidad. Nagsiling si Pablo nga dapat ‘patyon’ sang mga Cristiano ‘ang mga bahin sang ila lawas,’ ukon dulaon ang bisan ano nga handum, nga may kaangtanan sa “seksuwal nga imoralidad.” Maathag sa ginsiling ni Pablo nga dapat gid kita magpanikasog para madula ining malain nga mga handum. Mabudlay ini, pero puede kita magmadinalag-on.

⁷ Binagbinaga ang natabo kay Sakuraa nga taga-Japan. Grabe gid ang ginabatyag niya nga kasubo samtang nagadaku sia. Sugod sang 15 anyos sia, nakigsekso sia sa madamo nga tawo para madula ang iya kasubo. “Bangod sini, tatlo ka beses ako nga nagpahulog,” tu-ad niya. Nagsiling sia: “Sang primero, daw nagakadula ang akon kabalaka kon nagapakigsekso ako, kay nagpensar ako nga may nagapabalor kag nagapalangga sa akon. Pero sang padayon ko na ini nga ginahimo, labi ako nga nabalaka.” Amo ini ang kabuhi ni Sakura asta sang nag-23 anyos sia. Dayon, nagtuon sia sang Biblia sa mga Saksi, kag nanamian sia sa iya natun-an. Paagi sa bulig ni Jehova, nasikway ni Sakura ang seksuwal nga imoralidad kag wala na sia ginakonsiensia kag nagabatyag sing kahuya sa daan niya nga pagkabuhi. Subong, nagaalagad si Sakura bilang regular payunir kag indi na sia masubo. Nagsiling sia: “Nalipay gid ako nga mabatyagan nga ginapalangga ako ni Jehova sa tanan nga tion.”

 8. Ano ang pila ka buhat nga nagapahigko sa aton sa panulok sang Dios?

⁸ Kahigkuan. Ang orihinal nga tinaga sa Biblia nga gin-translate nga “kahigkuan” isa ka termino nga may masangkad nga kahulugan kag wala lamang nagapatuhoy sa mga sala may kaangtanan sa sekso. Nagapatuhoy man ini sa pagpanigarilyo ukon sa malaw-ay nga linahog. (2 Cor. 7:1; Efe. 5:3, 4) Nagapatuhoy man ini sa indi matinlo nga ginahimo sang isa kon nagaisahanon sia, pareho sang pagbasa sang libro nga nagapukaw sang handum sa sekso ukon pagtan-aw sang pornograpiya, nga mahimo magresulta sa masturbasyon.—Col. 3:5.b

 9. Ano ang resulta sang “indi mapunggan nga kailigbon sa sekso”?

⁹ Ginapabaskog sang pirme nga pagtan-aw sang pornograpiya ang “indi mapunggan nga kailigbon sa sekso” kag mahimo ini magresulta sa pagkagiyan sa sekso. Suno sa mga research, ang mga nag-aku nga indi nila mapunggan ang pagtan-aw sang pornograpiya pareho sing ginabatyag sa mga palahubog kag mga adik sa droga. Gani ang pirme nga pagtan-aw sang pornograpiya may makahalalit nga resulta, pareho sang pagbatyag sing kahuya, indi maayo nga pagtrabaho, indi malipayon nga pamilya, diborsio, kag paghikog. Pagligad sang isa ka tuig nga nag-untat ang isa ka lalaki sa pagtan-aw sang pornograpiya, nagsulat sia: “Nabatyagan ko na liwat ang dignidad nga nadula sa akon.”

10. Paano nauntatan ni Ribeiro ang iya pagtan-aw sang pornograpiya?

¹⁰ May mga tawo nga dapat gid padayon nga magpanikasog sa pagsikway sa pornograpiya. Pero puede sila magmadinalag-on, pareho sang natabo kay Ribeiro nga taga-Brazil. Tin-edyer pa si Ribeiro sang naghalin sia sa ila balay kag nagtrabaho sa pabrika nga naga-recycle sang papel, diin nakakita sia sang mga magasin sa pornograpiya. Nagsiling sia: “Amat-amat ako nga nagiyan sa sini. Grabe gid ini amo nga indi ako mahim-os sa balay kon indi pa makalakat ang ginapuyopuyo ko nga babayi kay gusto ko na gid magtan-aw sang mga video sa pornograpiya.” Isa ka adlaw sa iya ginaubrahan, samtang ginahanda niya nga i-recycle ang nagatangkas nga mga libro, nakita niya ang libro nga Ang Sekreto sang Kalipay sa Pamilya. Ginkuha niya ini kag ginbasa. Bangod sini, nagtuon sia sang Biblia sa mga Saksi ni Jehova. Pero madugay pa niya nga nauntatan ang iya pagtan-aw sang pornograpiya. Ano ang nakabulig sa iya? Nagsiling sia: “Paagi sa pangamuyo, pagtuon sang Biblia, kag pagpamalandong sa akon natun-an, labi ko nga naapresyar ang mga kinaiya sang Dios kag nangin mas mabakod ang akon gugma kay Jehova sangsa handum ko sa pornograpiya.” Paagi sa bulig sang Pulong sang Dios kag sang iya balaan nga espiritu, nauba ni Ribeiro ang iya daan nga personalidad, nabawtismuhan sia, kag isa na ka gulang sa kongregasyon.

11. Ano ang dapat himuon sang isa para masikway ang pornograpiya?

¹¹ Nagmadinalag-on si Ribeiro indi lang paagi sa pagtuon sang Biblia. Ginpamalandungan man niya ang mensahe sang Biblia kag ginpatudok ini sa iya tagipusuon. Paagi sa pangamuyo kag pagpamalandong, nangin mas mabakod ang iya gugma sa Dios sangsa handum niya sa pornograpiya. Para masikway ang pornograpiya, dapat naton pabakuron ang aton gugma kay Jehova kag dumtan ang malaut.—Basaha ang Salmo 97:10.

12. Ano ang nakabulig kay Stephen nga masikway ang kaakig kag masakit nga hambal?

¹² May mga tawo nga madali maakig kag nagahambal sing masakit sa iban. Nagresulta ini sa indi malipayon nga pamilya. Nagsiling ang isa ka amay nga taga-Australia nga si Stephen: “Palapamuyayaw gid ako anay kag hinali lang nga maakig bisan sa indi importante nga butang. Tatlo ka beses na kami nga nagbulagay sang akon asawa kag malapit na magdiborsio.” Dayon, nagtuon sila sang Biblia sa mga Saksi. Ano ang resulta sang ginsunod ni Stephen ang mga laygay sang Biblia? Nagsiling sia: “Nangin maayo na ang kahimtangan sang amon pamilya. Paagi sa bulig ni Jehova, nangin mahidaiton na ako kag kalmado, indi pareho sang una nga daw bomba ako nga gulpi lang malupok sa kaakig kon mairitar ako.” Subong, isa na ka ministeryal nga alagad si Stephen, kag pila ka tuig na nga regular payunir ang iya asawa. Ang mga gulang sa ila kongregasyon nagsiling: “Si Stephen isa ka utod nga kalmado, mapisan, kag mapainubuson.” Wala gid nila sia makita nga naakig. Ginasiling bala ni Stephen nga nahimo niya ini sa iya lang panikasog? Nagsiling sia: “Nabaton ko ining matahom nga mga pagpakamaayo bangod ginbuligan ako ni Jehova nga bag-uhon sing bug-os ang akon personalidad.”

13. Ngaa makahalalit ang kaakig, kag ano ang ginpaandam sang Biblia?

¹³ Nagpaandam ang Biblia nga dapat naton likawan ang kaakig, masakit nga hambal, kag sininggitanay. (Efe. 4:31) Masami ini nagaresulta sa bayolente nga buhat. Mahimo nga normal lang sa kalibutan ang mangin maakigon, pero wala ini nagapadungog sa aton Manunuga. Dapat isikway sang madamo ining makahalalit nga paggawi antes nila masuksok ang bag-o nga personalidad.—Basaha ang Salmo 37:8-11.

14. Posible bala nga mangin mabuot ang bayolente nga tawo?

¹⁴ Binagbinaga ang halimbawa ni Hans, isa ka gulang sa kongregasyon sa Austria. “Sia ang pinakamabuot nga utod nga makilala mo,” siling sang koordenitor sang hubon sang mga gulang sa ila kongregasyon. Pero indi amo sini si Hans sang una. Sang tin-edyer pa sia, nangin palahubog na sia kag bayolente. Isa ka bes sang nahubog sia, ginpatay niya ang iya nobya. Gani ginsentensiahan sia nga mapriso sing 20 ka tuig. Pero wala magbag-o ang iya bayolente nga personalidad bisan pa napriso sia. Sang ulihi, ginpangabay sang iya iloy ang isa ka gulang nga kadtuan sia sa prisuhan, kag nagtuon sia sang Biblia. Nagsiling sia: “Nabudlayan gid ako nga mauba ang akon daan nga personalidad. Napalig-on ako sang teksto sa Biblia sa Isaias 55:7, nga nagasiling: ‘Magbiya ang malauton sa iya dalanon,’ kag sa 1 Corinto 6:11, nga nagsiling parte sa mga nagbiya sa ila malain nga paggawi: ‘Amo sina anay ang iban sa inyo.’ Sa malawig nga tion, mapinasensiahon si Jehova nga nagbulig sa akon paagi sa iya balaan nga espiritu para masuksok ko ang bag-o nga personalidad.” Nabawtismuhan si Hans sang ara pa sia sa prisuhan, kag ginpagua sia sa tapos mapriso sing 17 ka tuig kag tunga. Nagsiling sia: “Nagapasalamat ako kay Jehova bangod ginkaluuyan gid niya ako kag ginpatawad.”

15. Ano ang kinaandan na lang subong, pero ano ang ginasiling sang Biblia parte sa sini?

¹⁵ Bahin man sang daan nga personalidad ang pagbutig. Halimbawa, kinaandan na lang sa iban ang indi husto nga pagdeklarar sang ila mga balayran sa buhis ukon ang pagbutig para indi sila manabat sa ila sala. Pero si Jehova “ang Dios sang kamatuoran.” (Sal. 31:5) Gani ginapatuman niya sa “kada isa” nga nagasimba sa iya nga “maghambal sang kamatuoran sa iya isigkatawo” kag ‘indi magbutig.’ (Efe. 4:25; Col. 3:9) Dapat naton ihambal ang matuod bisan pa mahuy-an kita ukon mabudlay ini himuon.—Hulu. 6:16-19.

16. Paano kita magamadinalag-on sa pag-uba sang daan nga personalidad?

¹⁶ Indi naton mauba ang daan nga personalidad sa aton kaugalingon lang nga kusog. Nagpanikasog gid sanday Sakura, Ribeiro, Stephen, kag Hans para masikway ang ila malain nga mga buhat. Nagmadinalag-on sila bangod gintugutan nila ang gahom sang Pulong sang Dios kag ang iya balaan nga espiritu nga maggiya sa ila hunahuna kag tagipusuon. (Luc. 11:13; Heb. 4:12) Para mabaton ini nga gahom, dapat naton basahon ang Biblia kada adlaw, pamalandungan ini, kag pirme ipangamuyo nga hatagan kita sang kaalam kag kusog nga masunod ang mga laygay sang Biblia. (Jos. 1:8; Sal. 119:97; 1 Tes. 5:17) Makabenepisyo man kita sa Pulong sang Dios kag sa iya balaan nga espiritu kon handaan naton kag tambungan ang mga miting sang kongregasyon. (Heb. 10:24, 25) Dapat man naton gamiton ang iban pa nga paagi sang Dios sa pag-aman sang espirituwal nga pagkaon sa iya katawhan.—Luc. 12:42.

17. Ano ang binagbinagon sa masunod nga artikulo?

¹⁷ Ginbinagbinag naton ang pila ka malain nga buhat nga dapat naton likawan kag isikway. Pero ano pa ang himuon naton para mapahamut-an ang Dios? Dapat man naton isuksok ang bag-o nga personalidad. Sa masunod nga artikulo, binagbinagon naton ang pila ka kinaiya sang bag-o nga personalidad nga dapat mangin permanente nga bahin sang aton kabuhi.