Bahin 9
Kon Paano Naton Nahibaluan nga Yari Na Kita sa “Katapusan nga mga Adlaw”
1, 2. Paano naton mahibaluan kon bala yari na kita sa katapusan nga mga adlaw?
PAANO naton mapat-od nga nagakabuhi kita sa tion nga ang Ginharian sang Dios magahikot batok sa sistema sang paggahom sang tawo karon? Paano naton mahibaluan nga malapit na gid kita sa tion nga tapuson sang Dios ang tanan nga kalautan kag pag-antos?
2 Luyag mahibaluan sang mga disipulo ni Jesucristo ining mga butang. Ginpamangkot nila sia kon ano ang mangin “tanda” sang iya presensia sa paggahom sa Ginharian kag “sang katapusan sang sistema sang mga butang.” (Mateo 24:3) Nagsabat si Jesus paagi sa pagtul-id sang nagatay-ug-kalibutan nga mga hitabo kag mga kahimtangan nga magatingob agod ipakita nga ang katawhan nagsulod na sa “tion sang katapusan,” “ang katapusan nga mga adlaw” sining sistema sang mga butang. (Daniel 11:40; 2 Timoteo 3:1) Nakita bala naton sa sini nga siglo inang mga tanda? Huo, kag kadamo gid!
Mga Inaway Kalibutanon
3, 4. Paano ang mga inaway sining siglo nagasibu sa tagna ni Jesus?
3 Gintagna ni Jesus nga ang ‘pungsod magatindog batok sa pungsod kag ang ginharian batok sa ginharian.’ (Mateo 24:7) Sang 1914 ang kalibutan nadalahig sa inaway nga nakasaksi sang paghanda sang mga pungsod kag mga ginharian sa isa ka paagi nga tuhay sa bisan anong inaway antes sini. Sa pagkilala sining kamatuoran, gintawag ini sang mga istoryador sadto nga Dakung Inaway. Amo yadto ang una nga lain nga sahi sang inaway sa maragtas, ang una nga inaway kalibutanon. Mga 20,000,000 ka soldado kag sibilyan ang napatay, labaw sa bisan anong inaway sang una.
4 Gintandaan sang Inaway Kalibutanon I ang pamuno sang katapusan nga mga adlaw. Si Jesus nagsiling nga ini kag ang iban pa nga mga hitabo mangin “pamuno sang mga kasakit.” (Mateo 24:8) Nagmatuod ina, kay ang Inaway Kalibutanon II nangin labi pa ka makamamatay, mga 50,000,000 ka soldado kag sibilyan ang napatay. Sa sining ika-20 nga siglo, kapin sa 100,000,000 ka tawo ang napatay sa mga inaway, apat ka beses ang kalabawon sang sa mga napatay sang una kon tingubon ang 400 ka tuig! Daw ano ka daku nga kahuy-anan sang paggahom sang tawo!
Iban Pa nga mga Pamatuod
5-7. Ano ang iban pa nga mga pamatuod nga yari na kita sa katapusan nga mga adlaw?
5 Ginlakip ni Jesus ang iban pa nga mga tanda nga magaupod sa katapusan nga mga adlaw: “May mabaskog nga mga linog, kag sa nagakalainlain nga mga duog mga pesti [epidemya nga mga balatian] kag kakulang sing kalan-on.” (Lucas 21:11) Nagasibu gid ina sa mga hitabo sugod sang 1914, kay nagdugang sing daku ang kasisit-an bangod sining mga kalamidad.
6 Ang mabaskog nga mga linog kinaandan na nga nagakatabo, nga nagakutol sing madamo nga kabuhi. Ang trangkaso Espanyola lamang nagpatay sing mga 20,000,000 ka tawo pagkatapos sang Inaway Kalibutanon I—ginabanta sang iban nga mga 30,000,000 ukon kapin pa. Ang AIDS nagkutol sing ginatos ka libo ka kabuhi kag mahimo nga magakutol sing minilyon pa sa malapit nga palaabuton. Kada tuig minilyon ka tawo ang nagakapatay sa mga balatian sa tagipusuon, kanser, kag iban pa nga mga balatian. Minilyon pa ang nagakapatay sing amat-amat bangod sa gutom. Sa wala sing duhaduha ang ‘mga manugkabayo sang Apokalipsis’ paagi sa ila mga inaway, kakulang sing kalan-on, kag epidemya nga mga balatian nagapatay sing daku nga kadamuon sa pamilya sang tawo sugod sang 1914.—Bugna 6:3-8.
7 Gintagna man ni Jesus ang pagbuad sang krimen sa tanan nga pungsod. Sia nagsiling: “Bangod sang pagbuad sang pagkamalinapason ang gugma sang kalabanan magabugnaw.”—Mateo 24:12.
8. Paano ang tagna sa 2 Timoteo kapitulo 3 nagasibu sa aton tion?
8 Dugang pa, gintagna sang Biblia ang pagkalusod sang moral nga tuman kaathag sa bug-os nga kalibutan karon: “Sa katapusan nga mga adlaw magaabot ang makahalanguyos nga mga tion nga mabudlay pakigbagayan. Kay ang mga tawo mangin mahigugmaon sang kaugalingon, mahigugmaon sang kuwarta, bugalon, palabilabihon, mapasipalahon, malalison sa mga ginikanan, dimapinasalamaton, dimatutom, wala sing kinaugali nga gugma, indi tampad sa bisan anong kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, mga maluib, dasudaso, nagahabok sa pagpadayaw, mga mahigugmaon sa kinasadya sa baylo sang sa Dios, nga may dagway sang pagkadiosnon apang nagapanghiwala sang gahom sini . . . Ang malaut nga mga tawo kag mga malimbong magalain kag magalain pa.” (2 Timoteo 3:1-13) Ini tanan nakita naton nga nagmatuod.
Isa Pa ka Kabangdanan
9. Ano ang natabo sa langit nga nagdungan sa pamuno sang katapusan nga mga adlaw sa duta?
9 May isa pa ka kabangdanan ang daku nga pagdugang sang pag-antos sa sining siglo. Nahisanto sa pamuno sang katapusan nga mga adlaw sang 1914, may natabo nga nagbutang sang katawhan sa daku nga katalagman. Sadto, subong ginasaysay sang isa ka tagna sa katapusan nga tulun-an sang Biblia: “May inaway sa langit: si Miguel [Cristo nga nagagahom sa langit] kag ang iya mga anghel nagpakig-away batok sa dragon [Satanas], kag ang dragon kag ang iya mga anghel [mga demonyo] nagpakig-away apang gindaug sila, kag wala na sing duog sa ila sa langit. Kag ginhulog ang dakung dragon, ang dumaan nga man-ug, ang isa nga gintawag Yawa kag Satanas, nga nagapatalang sa bug-os napuy-an nga duta; ginhulog sia sa duta, kag ang iya mga anghel ginhulog kaupod niya.”—Bugna 12:7-9.
10, 11. Paano naapektuhan ang katawhan sang si Satanas kag ang iya mga demonyo gintagbong sa duta?
10 Ano ang nangin mga resulta sa pamilya sang tawo? Ang tagna nagapadayon: “Kailo sa duta kag sa dagat, kay ang Yawa nagpanaug sa inyo nga may dakung kasingkal, bangod nahibaluan niya nga malip-ot na lamang ang iya tion.” Huo, nahibaluan ni Satanas nga nagahingapos na ang iya sistema, gani ginahimo niya ang tanan nga masarangan niya nga patalikuron ang mga tawo sa Dios antes sia kag ang iya kalibutan madula. (Bugna 12:12; 20:1-3) Daw ano kalaut yadtong espiritu nga mga tinuga bangod gin-abusuhan nila ang ila kahilwayan sa pagbuot! Daw ano kalain ang mga kahimtangan sa duta sa idalom sang ila impluwensia, labi na sugod sang 1914!
11 Indi katingalahan nga si Jesus nagtagna tuhoy sa aton tion: “Sa duta may kalisang sa mga pungsod, nga wala makahibalo sang dalan paguwa . . . Ang mga tawo nagakapunaw sa kahadlok kag sa kalangkag sa magaabot sa napuy-an nga duta.”—Lucas 21:25, 26.
Ang Katapusan sang Paggahom sang mga Tawo kag sang mga Demonyo Malapit Na
12. Ano ang isa sang katapusan nga nabilin pa nga mga tagna nga matuman antes matapos ining sistema?
12 Pila pa ka tagna sa Biblia ang nabilin nga matuman antes laglagon sang Dios ining sistema karon? Diutay na lamang! Ang isa sang katapusan amo ang sa 1 Tesalonica 5:3, nga nagasiling: “Samtang nagahambalanay sila tuhoy sa paghidait kag kalig-unan, sa hinali ang kalamidad magaabot sa ila.” (The New English Bible) Ginapakita sini nga ang katapusan sining sistema magasugod “samtang nagahambalanay sila.” Bangod indi makita sang kalibutan, ang kalaglagan magabunal sa tion nga wala gid nila ginapaabot, kon ang igtalupangod sang katawhan yara sa ila ginalauman nga paghidait kag kalig-unan.
13, 14. Ano nga tion sang kasisit-an ang gintagna ni Jesus, kag paano ini magahinakop?
13 Ang tion nagakaubos na para sa sining kalibutan sa idalom sang impluwensia ni Satanas. Sa indi madugay malaglag ini sa tion sang kasisit-an nga tuhoy sini si Jesus nagsiling: “Nian magaabot ang dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo liwat.”—Mateo 24:21.
14 Ang talipuspusan sang “dakung kapipit-an” amo ang inaway sang Armagedon sang Dios. Amo ina ang tion nga ginsambit ni manalagna Daniel nga ‘dugmukon kag papason [sang Dios] ini tanan nga ginharian.’ Magakahulugan ini sang katapusan sang tanan nga paggahom sang tawo sa karon nga independiente sa Dios. Nian ang paggahom sang Iya Ginharian gikan sa langit magabulos sa pagkontrol sing bug-os sa tanan nga hilikuton sang tawo. Indi na liwat, subong gintagna ni Daniel, ang awtoridad sa paggahom ibilin “sa iban nga katawhan.”—Daniel 2:44; Bugna 16:14-16.
15. Ano ang matabo sa impluwensia ni Satanas kag sang iya mga demonyo?
15 Sa amo nga tion ang tanan nga impluwensia ni Satanas kag sang mga demonyo madula man. Ining rebelyuso nga mga espiritu nga tinuga bilangguon agod indi na nila ‘mapatalang ang mga pungsod.’ (Bugna 12:9; 20:1-3) Napamatbatan sila sing kamatayon kag nagahulat sing kalaglagan. Daw ano nga paumpaw para sa katawhan nga mahilway sila gikan sa ila malaut nga impluwensia!
Sin-o ang Maluwas? Sin-o ang Indi Maluwas?
16-18. Sin-o ang maluwas sa katapusan sining sistema, kag sin-o ang indi maluwas?
16 Kon hukman na sang Dios ining kalibutan, sin-o ang maluwas? Sin-o ang indi maluwas? Ginapakita sang Biblia nga ang nagahandum sang paggahom sang Dios pagaamligan kag maluwas. Ang mga wala nagahandum sa paggahom sang Dios indi pag-amligan kundi laglagon upod sa kalibutan ni Satanas.
17 Ang Hulubaton 2:21, 22 nagasiling: “Ang mga matadlong [sila nga nagapasakop sa paggahom sang Dios] amo ang magapuyo sa duta, kag ang mga himpit amo ang mga mabilin sa sini. Tuhoy sa mga malauton [sila nga wala nagapasakop sa paggahom sang Dios], sila pagautdon gikan sa duta; kag tuhoy sa mga maluib, sila pagagabuton gikan sa sini.”
18 Ang Salmo 37:10, 11 nagasiling man: “Kay sa diutay pa nga tion, kag ang malauton wala na . . . Apang ang mga mahagop magapanag-iya sang duta, kag magakalipay sila sa kabuganaan sang paghidait.” Ang bersikulo 29 nagadugang: “Ang mga matarong magapanag-iya sang duta, kag magapuyo sing dayon sa sini.”
19. Ano nga laygay ang dapat naton batunon sing tinagipusuon?
19 Dapat naton batunon sing tinagipusuon ang laygay sang Salmo 37:34, nga nagasiling: “Hulata si Jehova kag bantayi ang iya dalanon, kag sia magapataas sa imo sa pagpanag-iya sang duta. Kon ang mga malauton utdon, makita mo ini.” Ang bersikulo 37 kag 38 nagasiling: “Bantayi ang himpit nga tawo kag tan-awa ang matadlong, kay ang palaabuton sina nga tawo mangin mahidaiton. Apang ang mga malalison laglagon sing tingob; ang palaabuton sang mga malauton utdon sa pagkamatuod.”
20. Ngaa masiling naton nga makakulunyag ini nga mga tion sa aton kabuhi?
20 Daw ano ka makapaumpaw, huo, daw ano ka makapapagsik mahibaluan nga ang Dios nagaulikid gid kag nga sa indi madugay tapuson niya ang tanan nga kalautan kag pag-antos! Daw ano ka makakulunyag mahibaluan nga ang katumanan sining makalilipay nga mga tagna malapit na!
[Retrato sa pahina 20]
Gintagna sang Biblia ang mga hitabo nga magahuman sang “tanda” sang katapusan nga mga adlaw
[Retrato sa pahina 22]
Sa indi madugay, sa Armagedon, ang mga wala nagapasakop sa paggahom sang Dios pagautdon. Ang mga nagapasakop maluwas pasulod sa matarong nga bag-ong kalibutan