Si Jehova​—⁠Isa ka Dios nga Nagapahayag sing Mga Sekreto

“May isa ka Dios sa mga langit nga Nagapahayag sing mga sekreto.”​​—⁠DANIEL 2:⁠28.

1, 2. (a) Paano nangin tuhay si Jehova sa iya dakung Kaaway? (b) Paano mapakita sang mga tawo ining kinatuhayan?

SI Jehova, ang supremo kag mahigugmaon nga Dios sang uniberso, ang nagaisahanon kag lamang nga Manunuga, isa ka Dios sang kaalam kag katarungan. Indi kinahanglan nga ihinago ang iya identidad, ang iya mga hilikuton, ukon ang iya mga katuyuan. Sa iya kaugalingon nga tion kag kaugalingon nga luyag, ginapahayag niya ang iya kaugalingon. Sa sining paagi tuhay sia sa iya Kaaway, si Satanas nga Yawa, nga nagatinguha nga ihinago ang iya matuod nga identidad kag mga tinutuyo.

² Subong nga magkatuhay si Jehova kag si Satanas, amo man ang ila mga sumilimba. Ang mga nagasunod kay Satanas makilal-an paagi sa daya kag limbong. Ginatinguhaan nila nga ipakilala ang ila kaugalingon subong maayo, samtang nagahimo sing mga buhat nga iya sang kadudulman. Ang mga Cristiano sa Corinto ginsilingan nga indi makibot sa sining katunayan. “Kay ining mga tawo butig nga mga apostoles, malimbungon nga mga manugpangabudlay, nagapakunukuno subong mga apostoles ni Cristo. Kag indi katingalahan, kay si Satanas mismo padayon nga nagapakunukuno nga isa ka anghel sang kapawa.” (2 Corinto 11:​13, 14) Ang mga Cristiano, sa pihak nga bahin, nagasunod kay Cristo subong ila Lider. Sang yari sia sa duta himpit nga ginpabanaag niya ang personalidad sang iya Amay, si Jehova nga Dios. (Hebreo 1:​1-3) Sa amo, paagi sa pagsunod kay Cristo, ginailog sang mga Cristiano si Jehova, ang Dios sang kamatuoran, sang pagkadayag, kag kapawa. Indi man nila kinahanglan nga ihinago ang ila identidad, ang ila mga hilikuton, ukon ang ila mga katuyuan.​—⁠Efeso 4:​17-19; 5:1 2.

3. Paano naton mapamatud-an nga butig ang panumbungon nga ang mga tawo nga nangin mga Saksi ni Jehova ginpilit sa pagsulod sa isa ka “sekreto nga sekta”?

³ Sa pinakamaayo nga tion nga iya nahibaluan, ginapahibalo ni Jehova ang mga detalye tuhoy sa iya mga katuyuan kag tuhoy sa palaabuton nga wala anay mahibaluan sang tawo. Sa sining kahulugan isa sia ka Dios nga nagapahayag sing mga sekreto. Sa amo, ang mga tawo nga luyag mag-alagad sa iya ginaagda​—⁠huo ginasugo​—⁠nga tun-an inang napahayag nga impormasyon. Ginpakita sang isa ka surbe nga ginhimo sa kapin sa 145,000 ka Saksi sa isa ka pungsod sa Europa sang 1994, nga sa promedyo, ang tagsa sa ila personal nga nag-usisa sa mga panudlo sang mga Saksi ni Jehova sa sulod sang tatlo ka tuig antes sila mamat-od nga mangin isa ka Saksi. Nagdesisyon sila suno sa ila kaugalingon nga pagbuot nga wala ginpilit. Kag padayon nila nga nahuptan ang ila kahilwayan sa pagbuot kag paghulag. Halimbawa, bangod pila ang wala nagaugyon sa mataas nga mga talaksan sa moralidad para sa mga Cristiano, sang ulihi nagdesisyon sila nga indi na magpadayon subong mga Saksi. Apang, talalupangdon, nga sang nagligad nga lima ka tuig, madamo sining mga Saksi anay ang nagbalik sa pagpakig-upod kag pagpanghikot subong mga Saksi.

4. Ano ang indi dapat magpaduhaduha sa matutom nga mga Cristiano, kag ngaa?

⁴ Sa pagkamatuod, wala magbalik ang tanan anay nga mga Saksi, kag ang pila sa ila nagauyat anay sang responsable nga mga posisyon sa sulod sang Cristianong kongregasyon. Indi ini makapakibot, kay bisan ang isa sang pinakasuod nga mga sumulunod ni Jesus, si apostol Judas, nagtalikod sa iya. (Mateo 26:​14-16, 20-25) Apang rason bala ini nga duhaduhaan naton ang Cristianismo mismo? Ginahimo bala sini nga wala sing pulos ang kadalag-an sang mga Saksi ni Jehova sa ila edukasyunal nga hilikuton? Wala gid, subong nga wala man mapadulog sang traidor nga buhat ni Judas Iscariote ang katuyuan sang Dios.

Labing Gamhanan Apang Mahigugmaon

5. Paano naton mahibaluan nga si Jehova kag si Jesus nagahigugma sa mga tawo, kag paano nila ginpasundayag ini nga gugma?

⁵ Si Jehova isa ka Dios sang gugma. Nagaulikid sia sa mga tawo. (1 Juan 4:​7-11) Walay sapayan sang iya mataas nga posisyon, nalipay sia makig-abyan sa mga tawo. Tuhoy sa isa sang iya dumaan nga mga alagad, aton mabasa: “ ‘Si Abraham nagtuo kay Jehova, kag ginkabig ini sa iya subong pagkamatarong,’ kag gintawag sia nga ‘abyan ni Jehova.’ ” (Santiago 2:​23; 2 Cronica 20:​7; Isaias 41:8) Subong nga ang tawhanon nga mga mag-abyan nagasugiray sing kompidensial nga mga butang, ukon mga sekreto, amo man si Jehova kag ang iya mga abyan. Tuhoy sini gin-ilog ni Jesus ang iya Amay, kay nakig-abyan sia sa iya mga disipulo kag ginsugiran sila sing mga sekreto. “Indi ko na kamo pagtawgon nga mga ulipon,” siling niya sa ila, “bangod ang ulipon wala makahibalo sang ginahimo sang iya agalon. Apang tawgon ko kamo nga mga abyan, bangod ang tanan nga butang nga nabatian ko gikan sa akon Amay ginsugid ko sa inyo.” (Juan 15:15) Ang pribado nga impormasyon, ukon “mga sekreto,” nga nahibaluan ni Jehova, sang iya Anak, kag sang ila mga abyan nagahiusa sa ila sa isa ka dimabungkag nga higot sang gugma kag debosyon.​—⁠Colosas 3:⁠14.

6. Ngaa indi dapat ihinago ni Jehova ang iya mga tinutuyo?

⁶ Ang kahulugan sang ngalan nga Jehova, “Sia nga Nagapahanabo,” nagapakita sang iya ikasarang sa pagpahanabo sing kon ano ang kinahanglan niya nga pahanabuon agod tumanon ang iya katuyuan. Indi kaangay sang mga tawo, indi kinahanglan nga ihinago ni Jehova ang iya mga tinutuyo bangod sang kahadlok nga basi upangan sia sang iban sa pagpatuman sini. Wala sia nagakapaslawan, gani dayag nga ginapahayag niya sa iya Pulong, ang Biblia, ang madamo sang luyag niya nga himuon. Sia nagasaad: “Ang akon pulong . . . indi magabalik sa akon nga wala sing mga resulta, kundi himuon sini ang akon nahamut-an, kag magamadinalag-on ini sa akon ginpadalhan sini.”​—⁠Isaias 55:⁠11.

7. (a) Ano ang gintagna ni Jehova sa Eden, kag paano ginpamatud-an ni Satanas nga matuod ang Dios? (b) Paano ang prinsipio sa 2 Corinto 13:8 pirme mapamatud-an nga matuod?

⁷ Wala madugay pagkatapos sang pagrebelde sa Eden, ginpahibalo sing malip-ot ni Jehova kon ano ang mangin resulta sang kaawayon sa tunga niya kag sang iya Kaaway, si Satanas. Ang ginsaad nga Binhi sang Dios makaeksperiensia sing masakit, apang indi sing dayon nga pagdugmok, apang si Satanas pagadugmukon sing bug-os. (Genesis 3:15) Sang 33 C.⁠E., aktuwal nga gindugmok sang Yawa ang Binhi, si Cristo Jesus, paagi sa pagpahanabo nga mapatay sia. Sa sining paagi, gintuman ni Satanas ang Kasulatan, kag sa amo man nga tion ginpamatud-an si Jehova subong ang Dios sang kamatuoran, bisan pa nga indi amo sadto ang tuyo ni Satanas. Ang iya kaugot sa kamatuoran kag pagkamatarong, subong man ang iya matinaastaason, dimahinulsulon nga panimuot, nagdul-ong sa iya sa paghimo sing gintagna gid sang Dios nga iya himuon. Huo, sa tanan nga kaaway sang kamatuoran, bisan kay Satanas mismo, ang prinsipio nangin matuod: “Wala kita sing mahimo batok sa kamatuoran, kundi tungod lamang sa kamatuoran.”​—⁠2 Corinto 13:⁠8.

8, 9. (a) Ano ang nahibaluan ni Satanas, apang ini bala nga ihibalo nagaupang sa pagtuman ni Jehova sa iya mga katuyuan? (b) Anong maathag nga paandam ang wala ginasapak sang mga nagapamatok kay Jehova, kag ngaa?

⁸ Kutob sang ang Ginharian sang Dios dikitaon nga gintukod sang 1914, ang Bugna 12:​12 nangin matuod: “Gani magkalipay kamo, mga langit kag kamo nga nagapuyo sa sini! Kailo para sa duta kag para sa dagat, kay ang Yawa nagpanaug sa inyo, nga nagabalingaso sa kaakig, kay nahibaluan niya nga diutay na lang ang iya tion nga nabilin.” Apang, ang pagkahibalo bala nga malip-ot na lamang ang iya tion nagpahulag kay Satanas nga bag-uhon ang iya dalanon? Mangin isa ina ka pagbaton sa bahin ni Satanas nga si Jehova amo ang Dios sang kamatuoran kag subong ang Supremo nga Manuggahom, sia lamang ang takus nga simbahon. Apang, indi mabaton sang Yawa ang kalutusan, indi bisan nahibaluan na niya ini.

⁹ Dayag nga ginpahibalo ni Jehova kon ano ang matabo kon pagahukman na ni Cristo ang sistema sang kalibutan ni Satanas. (Mateo 24:​29-31; 25:​31-46) Tuhoy sini, ang Iya Pulong nagapahibalo tuhoy sa mga manuggahom sa kalibutan: “Sa tion nga magasiling sila: ‘Paghidait kag kalig-unan!’ nian sa hinali ang kalaglagan magaabot sa ila subong nga ang kasakit sa pag-anak nagaabot sa babayi nga nagadala.” (1 Tesalonica 5:3) Wala ginasapak sadtong nagasunod kay Satanas ining maathag nga paandam. Nabulagan sila bangod sang ila malaut nga mga tagipusuon, kag nag-upang ini sa ila sa paghinulsol sa ila malauton nga dalanon kag sa pagbag-o sang ila mga plano kag paagi nga buot mag-upang sa mga katuyuan ni Jehova.

10. (a) Tubtob sa anong kasangkaron matuman ang 1 Tesalonica 5:​3, apang ano dapat ang mangin reaksion sang katawhan ni Jehova? (b) Ngaa ang mga tawo nga wala sing pagtuo mahimo nga mangin masupog sa pagpamatok sa katawhan sang Dios sa palaabuton?

¹⁰ Ilabi na kutob sang 1986, sang gindeklarar sang Nasyones Unidas ang Internasyonal nga Tuig sang Paghidait, ang kalibutan puno sing mga sugilanon tuhoy sa paghidait kag kalig-unan. May pila ka tikang nga ginhimo sa pagtinguha nga paluntaron ang paghidait sa bug-os nga kalibutan, kag daw nangin madinalag-on ini. Amo na bala ini ang bug-os nga katumanan sini nga tagna, ukon makapaabot bala kita sing isa ka makapakibot nga sahi sang pahibalo sa palaabuton? Athagon ina ni Jehova sa iya gintalana nga tion. Samtang wala pa, magpabilin kita nga nagamata sa espirituwal, “nagahulat kag ginadumdom ang presensia sang adlaw ni Jehova.” (2 Pedro 3:12) Samtang nagaligad ang tion upod sang dugang pa nga mga paghambalanay para sa paghidait kag kalig-unan, ang pila ka indibiduwal nga nakahibalo tuhoy sining paandam, apang wala magsapak sini, mahimo mangin labi ka masinupakon sa paghunahuna nga si Jehova indi, ukon indi makasarang, sa pagtuman sang iya pulong. (Ipaanggid ang Manugwali 8:​11-13; 2 Pedro 3:​3, 4.) Apang nahibaluan sang matuod nga mga Cristiano nga tumanon ni Jehova ang iya katuyuan!

Nagakaigo nga Pagtahod sa mga Ahensia nga Ginagamit ni Jehova

11. Ano ang natun-an nanday Daniel kag Jose tuhoy kay Jehova?

¹¹ Sang si Hari Nabocodonosor, manuggahom sang Emperyo sang Neo-Babilonia, nagdamgo sing makatulublag nga damgo nga indi niya madumduman, nangayo sia sing bulig. Ang iya mga saserdote, mga babaylan, kag mga salamangkero indi man makasugid sa iya kon ano ang iya damgo ukon makapaathag sang kahulugan sini. Apang, nahimo ini sang alagad sang Dios nga si Daniel, walay sapayan nga ginbaton niya gilayon nga ang pagsugid sang damgo kag sing kahulugan sini indi resulta sang iya kaugalingon nga kaalam. Si Daniel nagsiling: “May isa ka Dios sa mga langit nga Nagapahayag sing mga sekreto, kag ginpahibalo niya kay Hari Nabocodonosor ang mga mahanabo sa ulihi nga mga adlaw.” (Daniel 2:​1-30) Pila ka siglo antes sini, si Jose, isa pa ka manalagna sang Dios, nakaeksperiensia man nga si Jehova isa ka Manugpahayag sing mga sekreto.​—⁠Genesis 40:​8-22; Amos 3:​7, 8.

12, 13. (a) Sin-o ang labing daku nga manalagna sang Dios, kag ngaa amo sina ang imo sabat? (b) Sin-o karon ang nagaalagad subong “mga tulugyanan sing balaan nga mga sekreto sang Dios,” kag paano naton sila dapat tamdon?

¹² Ang labing daku nga manalagna ni Jehova nga nag-alagad sa duta amo si Jesus. (Binuhatan 3:​19-24) Si Pablo nagpaathag: “Ang Dios sadtong dumaan nga mga tion naghambal sa madamo nga kahigayunan kag sa lainlain nga paagi sa aton mga katigulangan paagi sa mga manalagna, naghambal sa aton sining ulihing mga adlaw paagi sa Anak, nga gintangdo subong manunubli sang tanan nga butang, kag paagi sa iya ginhimo niya ang sistema sang mga butang.”​—⁠Hebreo 1:​1, 2.

¹³ Si Jehova nakighambal sa unang mga Cristiano paagi sa iya Anak, si Jesus, nga nagpahayag sa ila sing mga sekreto sang Dios. Si Jesus nagsiling sa ila: “Sa inyo ginhatag ang paghangop sa mga sekreto sang ginharian sang Dios.” (Lucas 8:10) Ginpatuhuyan sang ulihi ni Pablo ang hinaplas nga mga Cristiano subong “mga nasakupan ni Cristo kag mga tulugyanan sing balaan nga mga sekreto sang Dios.” (1 Corinto 4:1) Sa karon, ang hinaplas nga mga Cristiano padayon nga nagaalagad sa sini nga paagi, nga nagahuman sa matutom kag mainandamon nga ulipon nga klase nga paagi sa Nagadumala nga Hubon sini nagaaman sing espirituwal nga pagkaon sa nagakaigo nga tion. (Mateo 24:​45-47) Kon ginatahod naton sing daku ang inspirado nga mga manalagna sang Dios sang dumaan nga mga tion, kag ilabi na ang Anak sang Dios, indi man bala naton dapat tahuron ang tawhanon nga ahensia nga ginagamit karon ni Jehova sa pagpahayag sing mga impormasyon sa Biblia nga importante gid para sa iya katawhan sa sining ital-ital nga mga tion?​—⁠2 Timoteo 3:​1-5, 13.

Pagkadayag Ukon Pagkanatago?

14. San-o ginahimo sang mga Cristiano ang hilikuton sing patago, busa ginailog ang halimbawa ni sin-o?

¹⁴ Ang pagkadayag bala ni Jehova sa pagpahayag sing mga butang nagakahulugan nga dapat ipahibalo sang mga Cristiano ang tanan nga ila nahibaluan sa tanan nga paagi kag sa idalom sang tanan nga kahimtangan? Ti, ginasunod sang mga Cristiano ang laygay ni Jesus sa iya mga apostoles nga mangin “mahalungon kaangay sang mga man-ug apang mangin inosente kaangay sang mga salampati.” (Mateo 10:16) Kon suguon nga indi nila masimba ang Dios suno sa ginasiling sang ila konsiensia, ang mga Cristiano padayon nga “magatuman sa Dios,” kay nahibaluan nila nga wala sing tawhanon nga ahensia ang may kinamatarong sa pagdumili sa pagsimba kay Jehova. (Binuhatan 5:29) Ginpakita mismo ni Jesus nga nagakaigo ini. Aton mabasa: “Sa tapos sining mga butang nagpadayon si Jesus sa pagpanlakatan sa Galilea, kay indi niya luyag maglibot sa Judea, bangod luyag sang mga Judiyo nga patyon sia. Apang, ang kapiestahan sang mga Judiyo, ang kapiestahan sang mga kayangkayang, malapit na. Gani si Jesus nagsiling sa ila [sa iya ditumuluo nga mga kauturan sa unod]: . . . ‘Taklad kamo sa kapiestahan; ako indi pa magtaklad sa sining kapiestahan, bangod ang akon tion wala pa mag-abot sing bug-os.’ Gani sa tapos niya masiling sa ila ining mga butang, nagpabilin sia sa Galilea. Apang sang nakataklad na ang iya mga kauturan sa kapiestahan, nian sia man nagtaklad, indi sing dayag kundi sing tago.”​—⁠Juan 7:​1, 2, 6, 8-10.

Isugid Bala Naton Ukon Indi?

15. Paano ginpakita ni Jose nga kon kaisa ang paghupot sing isa ka sekreto isa ka mahigugmaon nga butang nga himuon?

¹⁵ Sa pila ka kahimtangan, ang pagsekreto sing isa ka butang indi lamang maalamon kundi mahigugmaon man. Halimbawa, ano ang nangin reaksion ni Jose, ang nag-adoptar nga amay ni Jesus sang mahibaluan niya nga ang iya palangasaw-on, si Maria, “nagmabdos paagi sa balaan nga espiritu”? Aton mabasa: “Apang, si Jose nga iya bana, sanglit matarong kag indi luyag nga mahuy-an sia, nagbuko nga bulagan sia sing patago.” (Mateo 1:​18, 19) Daw ano ka dimahigugmaon kuntani kon ginpakahuy-an niya sia!

16. Ano ang responsabilidad sang mga gulang, kag sang tanan nga katapo sang kongregasyon, kon tuhoy sa kompidensial nga mga butang?

¹⁶ Ang kompidensial nga mga butang nga makatuga sing kahuy-anan ukon kalain sing buot indi dapat pag-isugid sa mga tawo nga wala sing labot. Ginadumdom ini sang Cristianong mga gulang kon nagahatag sila sing personal nga laygay ukon lugpay sa mga masigka-Cristiano ukon bisan kon ginadisiplina sila bangod sang serioso nga sala batok kay Jehova. Ang pag-uyat sining mga butang sa Makasulatanhon nga paagi kinahanglanon; ang pagsugid sing kompidensial nga mga detalye sa mga wala sing labot indi kinahanglanon kag indi mahigugmaon. Sa pagkamatuod, ang mga katapo sang Cristianong kongregasyon indi dapat magpamangkot sing kompidensial nga mga impormasyon gikan sa mga gulang kundi tahuron ang katungdanan sang mga gulang nga huptan nga sekreto ang kompidensial nga mga butang. Ang Hulubaton 25:9 nagasiling: “Ipakigbais ang imo kasaba sa imo isigkatawo, kag indi pag-ibuyagyag ang sekreto sang iban.”

17. Ngaa ginahuptan nga sekreto sa kalabanan nga tion sang mga Cristiano ang kompidensial nga mga butang, apang ngaa indi nila pirme mahimo ini?

¹⁷ Naaplikar man ini nga prinsipio sa sulod sang pamilya ukon sa tunga sang suod nga mga mag-abyan. Ang paghinago sing kompidensial nga mga butang kinahanglanon agod malikawan ang mga dipaghangpanay kag pagkaguba sang relasyon. “Ang amihan nagadala sing ulan; kag ang dila nga malibakon, sing nawong nga maakigon.” (Hulubaton 25:23) Sa pagkamatuod, ang pagkamainunungon kay Jehova kag sa iya matarong nga mga prinsipio, subong man ang gugma sa nakasala nga mga indibiduwal, mahimo magpahulag kon kaisa nga isugid sa mga ginikanan, Cristianong mga gulang, ukon sa may awtoridad nga mga tawo bisan ang kompidensial nga mga butang.⁠a Apang sa kalabanan nga kaso, ginatago sang mga Cristiano ang personal nga mga sekreto sang iban, ginabantayan ini subong nga ginabantayan man nila ang ila mga sekreto.

18. Anong tatlo ka Cristianong kinaiya ang makabulig sa aton nga mahibaluan kon ano ang aton dapat isugid kag kon ano ang indi dapat isugid?

¹⁸ Sa pagsumaryo, ginailog sang isa ka Cristiano si Jehova paagi sa pagtago sing kompidensial nga mga butang kon kinahanglanon, ginasugid lamang ini kon nagakaigo. Sa pagdesisyon kon ano ang iya dapat isugid kag dapat itago, ang pagkamapainubuson, pagtuo, kag gugma, amo ang nagatuytoy sa iya. Ang pagkamapainubuson nagapugong sa iya gikan sa pagpadaku sang iya kaugalingon nga importansia, nagapadayaw sa iban ayhan paagi sa pagsugid sa ila sang tanan nga iya nahibaluan ukon sa pagsunlog sa ila sing mga sekreto nga indi niya masugid. Ang pagtuo sa Pulong ni Jehova kag sa Cristianong kongregasyon nagapahulag sa iya nga ibantala ang ginhatag sang Dios nga impormasyon sa Biblia samtang nagalikaw sa paghambal sing mga butang nga mahimo makasaklaw sa ulihi sa iban. Huo, ang gugma nagapahulag sa iya nga isugid sing dayag ang mga butang nga nagahimaya sa Dios kag nga dapat mahibaluan sang mga tawo agod matigayon nila ang kabuhi. Sa pihak nga bahin, ginabantayan niya ang kompidensial personal nga mga butang, nakahibalo nga sa kalabanan nga kaso ang pagsugid sini magapakita nga ang isa indi mahigugmaon.

19. Anong dalanon ang makabulig nga makilala ang matuod nga mga Cristiano, kag ano ang resulta sini?

¹⁹ Ining balanse nga tikang nagabulig sa pagpakilala sa matuod nga mga Cristiano. Wala nila ginatago ang identidad sang Dios paagi sa indi paggamit sang iya ngalan ukon paagi sa pagbaton sing makatalanhaga, indi mapaathag nga doktrina sang Trinidad. Ang wala sing ngalan nga mga dios nagapakilala sa butig nga relihion, indi sa matuod. (Tan-awa ang Binuhatan 17:​22, 23.) Matuod nga ginaapresyar sang hinaplas nga mga Saksi ni Jehova ang pribilehiyo nga mangin “mga tulugyanan sing balaan nga mga sekreto sang Dios.” Paagi sa dayag nga pagpahayag sining mga sekreto sa iban, ginabuligan nila ang bunayag sing tagipusuon nga mga tawo nga matigayon ang pagpakig-abyan ni Jehova.​—⁠1 Corinto 4:​1; 14:​22-25; Zacarias 8:​23; Malaquias 3:⁠18.

[Footnote]

Paano Mo Sabton?

◻ Ngaa indi kinahanglan nga itago ni Jehova ang iya mga tinutuyo?

◻ Kay sin-o ginasugid ni Jehova ang iya mga sekreto?

◻ Ano ang responsabilidad sang mga Cristiano kon tuhoy sa kompidensial nga mga butang?

◻ Anong tatlo ka kinaiya ang magabulig sa mga Cristiano nga mahibaluan kon ano ang isugid kag kon ano ang indi pag-isugid?

[Kapsion sa pahina 8]

Ginapahayag ni Jehova ang mga sekreto paagi sa iya Pulong