Pagpakilala sa “Tawo sang Pagkamalinapason”

“Ipahayag ang malinapason, nga patyon ni Ginuong Jesus.”​—⁠2 TESALONICA 2:⁠8.

 1, 2. Ngaa importante nga makilala naton ang tawo sang pagkamalinapason?

NAGAKABUHI kita sa dag-on sang pagkamalinapason. Lapnag ini sa kalibutan. Sa bisan diin, ginakahadlukan ang malinapason nga mga kriminal kag ang peligro nga ginapresentar nila sa aton kag sa aton propiedad. Apang, may isa ka malinapason nga elemento nga nagapanghikot sing malalangon sa sulod sang madamo nga siglo. Ginatawag ini sa Biblia nga “tawo sang pagkamalinapason.”

² Importante nga makilala naton ining tawo sang pagkamalinapason. Ngaa? Bangod desidido sia nga gub-on ang aton maayo nga tindog sa Dios kag ang aton ginalauman nga kabuhi nga dayon. Paano? Paagi sa paghaylo sa aton nga biyaan ang kamatuoran kag patihan sa baylo ang mga kabutigan, sa amo ginapalisa kita gikan sa pagsimba sa Dios “sa espiritu kag kamatuoran.” (Juan 4:23) Kitaon gid sa iya mga buhat nga ining partikular nga malinapason nga elemento nagapamatok sa Dios kag sa iya mga katuyuan, subong man sa iya dedikado nga katawhan.

 3. Paano ginapatalupangod sa aton sang Biblia ang malinapason nga isa?

³ May ginasugid ang Biblia tuhoy sining tawo sang pagkamalinapason sa 2 Tesalonica 2:⁠3. Gin-inspirar sang espiritu sang Dios, si apostol Pablo nagsulat: “Indi pagtuguti ang bisan sin-o nga patalangon kamo sa bisan anong paagi, kay [ang adlaw ni Jehova sa paglaglag sa sining malaut nga sistema] indi magaabot kon indi anay mag-abot ang apostasya kag mapahayag ang tawo sang pagkamalinapason.” Gintagna diri ni Pablo nga ang apostasya magatubo kag ang tawo sang pagkamalinapason magaabot sa wala pa malaglag ining sistema. Sa kamatuoran, si Pablo nagsiling sa bersikulo 7: “Ang misteryo sining pagkamalinapason nagapanghikot na.” Gani sang nahaunang siglo, ining malinapason nagsugod sa pagpadayag sang iya kaugalingon.

Ang Ginhalinan sang Malinapason nga Tawo

 4. Sin-o ang nagtuga kag nagasakdag sa tawo sang pagkamalinapason?

⁴ Sin-o ang nagtuga kag nagasakdag sa sining tawo sang pagkamalinapason? Si Pablo nagasabat: “Ang pag-abot sang malinapason nahisuno sa pagpanghikot ni Satanas upod ang tagsa ka gamhanan nga buhat kag butig nga mga tanda kag mga katingalahan nga buhat kag upod sa tanan nga sahi sang malauton nga daya para sa mga malaglag, subong silot bangod wala nila pagbatuna ang gugma sa kamatuoran agod nga maluwas sila.” (2 Tesalonica 2:​9, 10) Gani si Satanas amo ang amay kag manugsakdag sa tawo sang pagkamalinapason. Kag subong nga si Satanas nagapamatok kay Jehova, sa Iya mga katuyuan, kag sa Iya katawhan, amo man ang tawo sang pagkamalinapason, narealisar man niya ukon wala.

 5. Ano nga kaulihian ang nagahulat sa malinapason nga isa kag sa mga nagasunod sa iya?

⁵ Ang mga nagaupod sa tawo sang pagkamalinapason may pareho sa iya nga kaulihian​—⁠kalaglagan: “Ipahayag ang malinapason, nga patyon ni Ginuong Jesus . . . kag laglagon niya sa iya pag-abot.” (2 Tesalonica 2:8) Ina nga tion sa paglaglag sa tawo sang pagkamalinapason kag sa iya mga sumalakdag (“mga malaglag”) magaabot sa dili madugay “sa pagpahayag ni Ginuong Jesus gikan sa langit upod sa iya gamhanan nga mga anghel nga may nagadabdab nga kalayo, sa pagsilot sa mga wala nagakilala sa Dios kag sa mga wala nagatuman sang maayong balita nahanungod sa aton Ginuong Jesus. Magaantos sila sang silot sang walay katapusan nga kalaglagan.”​—⁠2 Tesalonica 1:​6-9.

 6. Anong dugang pa nga impormasyon ang ginhatag ni Pablo nahanungod sa malinapason nga isa?

⁶ Dugang pa nga ginalaragway ni Pablo ining malinapason, nga nagasiling: “Sia magasumpong kag magapakataas sang iya kaugalingon batok sa tanan nga ginatawag ‘dios’ ukon ginasimba, sa bagay nga nagalingkod sia sa templo sang Dios, nga nagapakadios sang iya kaugalingon.” (2 Tesalonica 2:4) Gani nagapaandam si Pablo nga si Satanas magabangon sing malinapason, isa ka dimatuod nga silimbahon, nga magapakataas pa gani sang iya kaugalingon sa kasuguan sang Dios.

Pagpakilala sa Malinapason

 7. Ngaa nagahinakop kita nga indi isa ka indibiduwal ang ginahambal ni Pablo, kag ano ang ginalaragway sang tawo sang pagkamalinapason?

⁷ Isa bala ka indibiduwal ang ginahambal ni Pablo? Indi, kay nagsiling sia nga ining “tawo” hayag sang adlaw ni Pablo kag magapadayon sa pagluntad tubtob laglagon sia ni Jehova sa katapusan sining sistema. Sa amo, nagaluntad sia sa madamo nga tuig. Maathag nga wala sing literal nga tawo ang nabuhi sing subong sina kalawig. Gani ang ekspresyon nga “tawo sang pagkamalinapason” nagalaragway sa isa ka hubon, ukon klase, sang katawhan.

 8. Sin-o ang tawo sang pagkamalinapason, kag ano ang pila sang nagapakilala nga mga bahin sini?

⁸ Sin-o sila? Ginapakita sang ebidensia nga sila ang hubon sang bugalon kag ambisyuso nga mga klerigo sang Cristiandad, nga sa sulod sang mga siglo nagpatok sang ila kaugalingon subong kasuguan sa ila kaugalingon. Makita ini sa kamatuoran nga may yara linibolibo ka nanuhaytuhay nga relihion kag mga sekta sa Cristiandad, ang tagsatagsa may kaugalingon nga klero, apang ang tagsatagsa nagasumpakilay sa pila ka bahin sang doktrina ukon buhat. Ining nabahinbahin nga kahimtangan isa ka maathag nga pamatuod nga wala nila ginasunod ang kasuguan sang Dios. Indi mahimo nga sila gikan sa Dios. (Ipaanggid ang Miqueas 2:12; Marcos 3:24; Roma 16:17; 1 Corinto 1:10.) Ang kinaandan sa sining tanan nga relihion amo nga wala sila nagasunod sa mga panudlo sang Biblia, kag ginalalis nila ang pagsulundan: “Indi maglabang sa mga butang nga nasulat na.”​—⁠1 Corinto 4:6; tan-awa man ang Mateo 15:3, 9, 14.

 9. Anong dimakasulatanhon nga mga pagtuluohan ang ginbulos sang malinapason nga isa sa mga kamatuoran sang Biblia?

⁹ Sa amo, ining malinapason isa ka kabilugan nga tawo: ang relihioso nga klero sang Cristiandad. Sila tanan, kon bala papa, pari, patriarka, ukon Protestante nga mga predikador, may salabton man sa relihioso nga mga sala sang Cristiandad. Ginbaylo nila ang mga kamatuoran sang Dios sa pagano nga mga kabutigan, nga nagatudlo sing dimakasulatanhon nga mga doktrina subong sang pagkadimamalatyon sang tawhanon nga kalag, kalayuhon nga impierno, purgatoryo, kag Trinidad. Kaangay sila sang relihioso nga mga lider nga ginsilingan ni Jesus: “Kamo iya sang inyo amay nga Yawa, kag buot ninyo himuon ang mga kailigbon sang inyo Amay. . . . Butigon sia kag amay sang kabutigan.” (Juan 8:44) Ang ila mga buhat nagabuyagyag man sa ila subong malinapason, kay nagapakigbahin sila sa mga buhat nga nagalalis sa kasuguan sang Dios. Si Jesus nagasiling sa ila sina: “Palayo sa akon, kamo nga mga manugbuhat sang kalautan.”​—⁠Mateo 7:​21-23.

Nagabayaw sang Ila Kaugalingon

10. Ano ang kaangtanan sang malinapason nga isa sa politikal nga mga manuggahom?

¹⁰ Ginapakita sang maragtas nga ang mga katapo sining tawo sang pagkamalinapason nga klase nagpasundayag sing bugal kag pagkamatinaastaason nga sila aktuwal nga nagdikta sa mga manuggahom sang kalibutan. Sa idalom sang balibad sang doktrina nga ‘balaan nga kinamatarong sang mga hari,’ ang klero nagpangangkon nga sila ang kinahanglanon nga manugpatunga sa ulot sang mga manuggahom kag sang Dios. Nagkorona sila kag nagpahalin sa trono sing mga hari kag mga emperador kag nahaylo nila ang mga masa dampig ukon batok sa mga manuggahom. Daw subong bala nga ang ginsiling nila kaanggid sa ginsiling anay sang Judiyong mataas nga mga saserdote nga nagsikway kay Jesus: “Wala kami sing hari kundi si Cesar.” (Juan 19:15) Apang, si Jesus maathag nga nagpanudlo: “Ang akon ginharian indi bahin sining kalibutan.”​—⁠Juan 18:⁠36.

11. Paano ginbayaw sang klero ang ila kaugalingon?

¹¹ Agod bayawon ang ila kaugalingon sa kinaandan nga mga tawo, ining malinapason nga klase nagpili sing tuhay nga panapton, sa masami itom. Dugang pa, ginpunihan nila ang ila kaugalingon sing tanan nga sahi sang talalupangdon nga mga panapton, upod sa mga korona, mga krus, kag mga mitra. (Ipaanggid ang Mateo 23:​5, 6.) Apang si Jesus kag ang iya mga sumulunod wala sing subong sina nga panapton; nagpanapot sila subong sang kinaandan nga mga tawo. Ang klero naggamit man sing mga titulo subong sang “Father,” “Holy Fa­ther,” “Reverend,” “Most Reverend,” “His Excellency,” kag “His Eminence,” nga dugang pa sa ‘pagbayaw nila sang ila kaugalingon sa tanan.’ Apang, si Jesus nagtudlo tuhoy sa relihioso nga mga titulo: “Indi kamo magtawag bisan kay sin-o nga tawo diri sa duta nga amay.” (Mateo 23:9) Sing kaanggid, si Elihu, sang ginpamatukan niya ang salimpapaw nga mga manuglugpay ni Job, nagsiling: “Wala ako sing apinan sa sini nga pagbinaisay; kag indi ko pagdayawdayawon ang bisan sin-o.”​—⁠Job 32:⁠21.

12. Sin-o siling ni Pablo ang aktuwal nga ginaalagdan sang klero?

¹² Sang magsiling si Pablo sang adlaw niya nga ang tawo sang pagkamalinapason nagapanghikot na, nagsiling man sia tuhoy sa mga nagpakita sang malinapason nga panimuot sadtong isa: “Kay ina nga mga tawo indi gid matuod nga mga apostoles, madaya nga mga manugpangabudlay, nga nagapakaapostoles ni Cristo. Kag indi katingalahan, kay bisan si Satanas nagapakaanghel sang kapawa. Busa indi katingalahan nga kon ang iya mga alagad man nagapakamanug-alagad sang pagkamatarong. Apang ang ila katapusan mangin suno sa ila mga buhat.”​—⁠2 Corinto 11:​13-15.

Pagrebelde Batok sa Matuod nga Pagsimba

13. Ano ang apostasya nga gintagna?

¹³ Nagsiling si Pablo nga ining tawo sang pagkamalinapason magatubo upod sa apostasya. Sa kamatuoran, ang nahauna nga ideya nga ginhatag ni Pablo tuhoy sa identidad sining malinapason nga klase amo nga “ang adlaw ni Jehova [kon laglagon ni Jehova ining malaut nga sistema sang mga butang] . . . indi magaabot kon indi anay mag-abot ang apostasya.” (2 Tesalonica 2:​2, 3) Apang ano ang kahulugan sang “apostasya”? Sa sining konteksto, wala ini nagakahulugan sing pagkahulog lamang ukon pagtalikod bangod sang espirituwal nga kaluyahon. Ang Griegong tinaga diri nga gingamit para sa “apostasya” nagkahulugan, lakip sa iban nga mga butang sing, “pagsaylo” ukon “pag-alsa.” Ang pila ka badbad nagabadbad sini subong “pagrebelde.” Ang bersion ni William Barclay nagasiling: “Ina nga adlaw indi magaabot tubtob matabo ang Daku nga Pagrebelde.” Ginatawag ini sang The Jerusalem Bible nga “ang Dakung Pag-alsa.” Busa, sa konteksto sang ginapaathag ni Pablo, ang “apostasya” nagakahulugan sing pag-alsa batok sa matuod nga pagsimba.

14. San-o nagsugod sa pagtubo ang apostasya sing serioso?

¹⁴ Paano nagtubo ining apostasya, ining pagrebelde? Sa 2 Tesalonica 2:​6, si Pablo nagsulat, tuhoy sa iya adlaw, nahanungod sa “butang nga nagapugong” sa malipanason. Ano yadto? Amo ang nagapugong nga puwersa sang mga apostoles. Ang ila presensia, upod ang ila gamhanan nga mga dulot sang balaan nga espiritu, nagpugong sa apostasya nga maglapta sadto. (Binuhatan 2:​1-4; 1 Corinto 12:28) Apang sang mapatay ang mga apostoles, sang mga katapusan sang nahaunang siglo, ang butang nga nagapugong nadula.

Ang Dimakasulatanhon nga Klero nga Klase Nagatubo

15. Anong kahimusan ang gintukod ni Jesus para sa Cristianong kongregasyon?

¹⁵ Ang kongregasyon nga gintukod ni Jesus nagtubo sang nahaunang siglo sa idalom sang pagtuytoy sang mga gulang (mga manugtatap) kag ministeryal nga mga alagad. (Mateo 20:​25-27; 1 Timoteo 3:​1-13; Tito 1:​5-9) Ginpili ini sila gikan sa kongregasyon. Sila sangkol nga espirituwal nga mga lalaki nga wala sing pinasahi nga paghanas sa teolohiya, subong nga si Jesus wala man ginhanas sa sini. Sa pagkamatuod, ang iya mga kasumpong natingala: “Ngaa bala kaalam gid sini nga tawo nga wala man gani ini sia makaeskwela?” (Juan 7:15) Kag tuhoy sa mga apostoles, amo man ang napanilagan sang relihioso nga mga manuggahom: “Karon sang nakita nila ang kasidla ni Pedro kag ni Juan, kag nahantupan nga sila walay tinun-an kag dimaalam nga mga tawo, natingala sila. Kag natalupangdan nila nga ini sila mga kaupdanan anay ni Jesus.”​—⁠Binuhatan 4:⁠13.

16. Paano ang apostasya nagtuga sing pagsipak gikan sa Cristianong sulundan para sa pangkongregasyon nga organisasyon sang nahaunang siglo?

¹⁶ Apang, ang apostasya nagpakilala sing mga ideya nga ginkuha sa Judiyong klero kag sang ulihi gikan sa relihioso nga kahimusan sang paganong Roma. Samtang nagaligad ang tion kag ang pagtalikod gikan sa matuod nga pagtuluuhan nagakatabo, ang dimakasulatanhon nga klero nga klase nagtubo. Ang ginakoronahan nga papa nagsugod sa paggahom sa kolehiyo sang mga kardinal, nga ginkuha man gikan sa ginatos ka mga obispo kag mga arsobispo, nga ginkuha man bilang promosyon gikan sa mga pari nga ginhanas sa seminaryo. Sa amo, wala pa lang madugay sa tapos sang nahaunang siglo, ang isa ka mistiko nga klase sang klero naggahom sa Cristiandad. Ini nga klase wala ginsunod sa Cristianong mga gulang kag ministeryal nga mga alagad sang nahaunang siglo kundi ginsunod sa pagano nga relihiosong mga sistema.

17. San-o, labi na, nagbaskog ang gahom sang malinapason nga isa?

¹⁷ Sang ikatlo pa lang nga siglo C.⁠E., ang ordinaryo nga mga tumuluo ginpaubos sa segunda-klase nga kahimtangan sang lego. Ang apostata nga tawo sang pagkamalinapason amat-amat nga nag-uyat sing gahom. Ining gahom nagbaskog sang tion sang paghari sang Romanong emperador nga si Constantino, labi na sa tapos sang Konsilyo sang Nicaea sang 325 C.⁠E. Sadto ang Iglesia kag ang Estado naghiusa. Sa amo, ang tawo sang pagkamalinapason​—⁠ang klero sang Cristiandad⁠—​nangin sa sulod sang mga siglo linya sang mga apostata nga nagrebelde batok sa matuod nga Dios, si Jehova. Ang kasuguan kag mga kahimusan nga ginsunod nila ila kaugalingon kag indi sa Dios.

Pagano nga mga Panudlo

18. Anong mapasipalahon nga paganong mga panudlo ang ginbaton sang malinapason nga isa?

¹⁸ Ang nagatubo nga tawo sang pagkamalinapason naghulam man sing pagano nga mga panudlo. Halimbawa, ang misteryuso kag indi mahangpan nga dios sang Trinitaryo ginbulos sa Isa nga nagasiling: “Ako si Jehova. Ina amo ang akon ngalan; kag indi ko pag-ihatag sa iban ang akon himaya.” “Ako amo si Jehova, kag wala na gid sing iban. Luwas sa akon wala sing Dios.” (Isaias 42:​8; 45:5) Ining pagbulos sing tawhanon, kag pagano pa gani, nga mga ideya sa mga kamatuoran sang Dios ginpasangkad sa paglakip sa dugang pa nga pagpasipala: ang pagsimba sa mapainubuson nga si Maria sang Biblia subong “Iloy sang Dios” sang Cristiandad. Sa amo, ang mga sumalakdag sang butig nga mga panudlo, ang klero nga klase, nangin amo ang pinakamataas sa “mga gamhon” nga ginsab-ug ni Satanas sa pagtinguha nga lumsan ang maayong binhi nga ginsab-ug ni Cristo.​—⁠Mateo 13:​36-39.

19. Paano nabahinbahin ang Cristiandad sa sulod sang mga siglo, apang ano ang ginpadayon?

¹⁹ Sang matabo ang pagbinulagay kag pagsipakay, ang Cristiandad nabahinbahin sa ginatos ka relihion kag mga sekta. Apang ang tagsa ka bag-o nga relihion ukon sekta, luwas sa pila lamang, naghupot sang klero-lego nga dibisyon. Sa amo, ang tawo sang pagkamalinapason nagpadayon tubtob karon. Kag padayon ini gihapon sa pagbayaw sang iya kaugalingon sa ordinaryo nga mga tawo paagi sa talalupangdon nga panapton kag mataas nga mga titulo. Sing maathag, indi pagpahabok ang ginsiling ni Pablo sang magsiling sia nga ang tawo sang pagkamalinapason magahimaya sang iya kaugalingon kag magabayaw sang iya kaugalingon sa isa ka tulad-dios nga posisyon.

Ang Pagkapapa

20. Paano ginlaragway sang isa ka Katoliko nga balasahon ang papa?

²⁰ Ang isa ka halimbawa sina nga paghimaya amo ang pagkapapa sa Roma. Ang eklesiastiko nga diksionaryo ni Lucio Ferraris, nga ginbalhag sa Italya, nagalaragway sa papa subong “may daku nga dungog kag pagkahalangdon nga sia indi isa ka tawo lamang kundi, daw, Dios, kag amo ang Tiglawas sang Dios.” Ang iya korona isa ka triple nga korona “subong hari sang langit, sang duta kag sang impierno.” Ang amo gihapon nga diksionaryo nagapadayon: “Ang papa, daw, Dios sa duta, ang lamang nga prinsipe sang matutom kay Cristo, ang labing daku nga hari sa tanan nga hari.” Nagdugang pa ini: “Kon kaisa mahimo pamatukan sang papa ang balaan nga sugo.” Subong man, ang The New Catholic Dictionary nagasiling tuhoy sa papa: “Ang iya mga embahador mas mataas sa iban nga mga katapo sang diplomatiko nga hubon.”

21. Ipatuhay ang mga ginahimo sang papa sa ginhimo ni Pedro kag sang anghel.

²¹ Indi kaangay sang mga disipulo ni Jesus, ang papa pirme nagasul-ob sing tama ka makagalanyat nga panapton kag luyag niya nga dayawdayawon sia sang mga tawo. Ginatugutan sang papa ang mga tawo nga magsaludo sa iya, maghalok sa iya singsing, kag pas-anon sia sa isa ka pinasahi nga pulungkuan. Daw ano nga pagpabugal ang ginapasundayag sang mga papa sa sulod sang mga siglo! Baliskad gid sa mapainubuson nga pagkasimple ni Pedro, nga nagsiling kay Cornelio, ang Romano nga opisyal sang hangaway nga nagluhod sa tiilan ni Pedro sa pagyaub sa iya: “Tindog ka, . . . Ako tawo man”! (Binuhatan 10:​25, 26, ang Katoliko nga Jerusalem Bible) Kag daw ano man ka tuhay sa anghel nga naghatag sing Bugna kay apostol Juan! Nagyaub si Juan sa pagsimba sa anghel, apang ang anghel nagsiling: “Maghalong ka! Dili ina paghimua! Isa lamang ako ka masigkaulipon mo kag sang imo mga kauturan nga mga manalagna kag sang mga nagatuman sang mga pulong sining tulun-an. Simbaha ang Dios.”​—⁠Bugna 22:​8, 9.

22. Paagi sa anong Makasulatanhon nga talaksan makilal-an ang malinapason nga isa?

²² Matigdas gid bala ini nga pagtamod sa klero? Mahibaluan naton ini paagi sa pag-aplikar sang talaksan nga ginhatag ni Jesus agod makilala ang dimatuod nga mga manalagna: “Sa ila mga bunga makilala ninyo sila.” (Mateo 7:​15, 16) Ano, nian, ang nangin bunga sang klero sa nagligad nga mga siglo kag sa aton ika-20 nga siglo? Ano ang palaabuton sining tawo sang pagkamalinapason, kag sin-o ang magaambit sa sina nga palaabuton? Ano ang salabton sang mga nagakahadlok gid sa Dios sa sining malinapason nga isa? Ipaathag sang masunod nga mga artikulo ining mga punto.

Mga Pamangkot Para sa Repaso:

◻ Ano ang tawo sang pagkamalinapason, kag san-o ini nagpadayag?

◻ Paano ginapakilala sang Biblia ang awtor sining malinapason nga klase?

◻ Paano ginbayaw sang klero ang ila kaugalingon sa katawhan?

◻ Anong apostata nga mga panudlo kag mga buhat ang ginpatubo sang klero?

◻ Paano ang panimuot sang mga papa tuhay sa panimuot ni Pedro kag sang anghel?

[Piktyur sa pahina 14]

Indi kaangay sang mga papa, wala pagtuguti ni apostol Pedro ang tawo sa pagyaub sa iya