Paghupot sang Paghidait kag Katinlo sang Kongregasyon

KADA tuig, linibo ka tawo ang nagadugok sa balay sang matuod nga pagsimba kay Jehova, bilang katumanan sang tagna sang Biblia. (Miq. 4:​1, 2) Nalipay gid kita sa pagbaton sa ila sa “kongregasyon sang Dios”! (Binu. 20:28) Ginaapresyar nila ang kahigayunan nga mag-alagad kay Jehova kaupod naton kag maeksperiensiahan ang aton matinlo kag mahidaiton nga espirituwal nga paraiso. Ang balaan nga espiritu sang Dios kag ang maalamon nga laygay sang iya Pulong nagabulig sa aton nga mahuptan ang paghidait kag katinlo sang kongregasyon.​—Sal. 119:105; Zac. 4:6.

² Paagi sa pag-aplikar sa mga prinsipio sang Biblia, ginasuksok naton ang “bag-o nga personalidad.” (Col. 3:​10) Wala naton ginasapak ang magagmay kag personal nga indi paghangpanay. Paagi sa pag-ilog sang pagtamod ni Jehova, malandas naton ang nagapabahinbahin nga impluwensia sang kalibutan kag makapanghikot sing nahiusa subong internasyonal nga paghiliutod.​—Binu. 10:34, 35.

³ Pero kon kaisa, nagautwas gihapon ang mga problema nga nagaapektar sa paghidait kag paghiusa sang kongregasyon. Ngaa? Bangod sa masami, wala naton masunod ang laygay sang Biblia. Dapat naton gihapon pakigbatuan ang aton indi himpit nga huyog. Tanan kita makasasala. (1 Juan 1:​10) Ayhan ang isa makahimo sing sayop nga tikang nga mangin kabangdanan sang pagsulod sang moral kag espirituwal nga kahigkuan sa kongregasyon. Mahimo naton masaklaw ang iban bangod sa aton wala mapamensaran nga ginhambal ukon ginhimo, ukon mahimo man kita masandad bangod sang ginsiling ukon ginhimo sang iban. (Roma 3:23) Sa sini nga mga sitwasyon, ano ang aton himuon agod masolbar ini?

⁴ Ini tanan mahigugmaon nga ginahatagan ni Jehova sing konsiderasyon. Ang iya Pulong nagahatag sing laygay kon ano ang dapat himuon kon mag-utwas ang mga problema. Nagahatag man sing personal nga bulig ang mahigugmaon nga espirituwal nga mga manugbantay, ang mga gulang. Paagi sa pag-aplikar sa ila laygay gikan sa Kasulatan, mangin maayo liwat ang aton kaangtanan sa iban kag mahuptan ang maayo nga tindog kay Jehova. Kon gindisiplina kita ukon ginsabdong bangod sang aton kasaypanan, makapat-od kita nga ina nga pagtadlong pagpakita nga ginahigugma kita sang aton Amay sa langit.​—Hulu. 3:​11, 12; Heb. 12:6.

⁵ May mga tion nga nagautwas ang personal nga mga binais ukon magagmay nga mga problema sa mga yara sa kongregasyon. Dapat ini dayon solbaron sa paagi nga nagapakita sing gugma sa aton mga utod. (Efe. 4:​26; Fil. 2:​2-4; Col. 3:​12-​14) Sa masami, ang kalabanan nga personal nga mga problema nga nagaapektar sa imo kaangtanan sa imo masigka-Cristiano masolbar paagi sa pagsunod sa laygay ni apostol Pedro nga “maghigugmaanay kamo sing tudok, bangod ang gugma nagatabon sang madamo nga sala.” (1 Ped. 4:8) Ang Biblia nagasiling: “Kita tanan nagakasandad sing madamong beses.” (Sant. 3:2) Paagi sa pag-aplikar sa Bulawanon nga Pagsulundan, nga amo ang paghimo sa iban sang luyag naton nga himuon nila sa aton, masami nga mapatawad naton kag malimtan ang magamay nga mga sala.—Mat. 6:14, 15; 7:12.

⁶ Kon nahantop mo nga may nasaklaw sa imo ginsiling ukon ginhimo, dapat ka gilayon maghimo sing tikang agod makighidait. Dumduma nga ang imo kaangtanan kay Jehova apektado man. Si Jesus naglaygay sa iya mga disipulo: “Kon nagadala ka sang imo dulot sa halaran kag madumduman mo nga ang imo utod may malain nga buot sa imo, ibilin ang imo dulot sa atubangan sang halaran, kag maglakat ka. Makighidait ka anay sa imo utod, kag sa pagbalik mo, ihalad ang imo dulot.” (Mat. 5:23, 24) May yara gid indi paghangpanay. Kon amo, hupti nga bukas ang linya sang komunikasyon. Daku gid ang mabulig sang maayo nga komunikasyon sang tanan sa kongregasyon agod malikawan ang indi paghangpanay kag masolbar ang mga problema nga resulta sang pagkadihimpit.

⁷ Kon kaisa, kinahanglan sang mga manugtatap nga laygayan ang isa agod tadlungon ang iya panghunahuna. Indi ini pirme mahapos. Si apostol Pablo nagsulat sa mga Cristiano sa Galacia: “Mga kauturan, kon ang isa ka tawo makahimo sang sayop nga tikang antes niya matalupangdan ini, kamo nga may espirituwal nga mga kalipikasyon magtinguha nga tadlungon ina nga tawo sa espiritu sang kalulo.”—Gal. 6:1.

⁸ Paagi sa pag-atipan sa panong, maamligan sang mga manugtatap ang kongregasyon gikan sa espirituwal nga katalagman kag malikawan ang mabug-at nga mga problema. Nagapanikasog ang mga gulang nga ang ila pag-alagad sa kongregasyon nahisanto sa saad ni Jehova paagi kay Isaias: “Ang tagsa sa ila mangin kaangay sang palalipdan sa hangin, isa ka duog nga palanaguan sa unos, kaangay sang sapa nga nagailig sa desyerto, kaangay sang landong sang daku nga igang sa kigas nga duta.”—Isa. 32:2.

⁹ Si apostol Pablo nagpaandam tuhoy sa pila nga makaimpluwensia sing malain sa kongregasyon. Nagsiling sia: “Ginahatagan namon kamo sing instruksion . . . nga magpalayo sa utod nga indi matinumanon kag wala nagasunod sa tradisyon nga nabaton ninyo sa amon.” Gin-athag pa gid niya ini paagi sa pagsulat: “Kon may isa nga indi matinumanon sa amon ginasiling sa sini nga sulat, tandai ninyo sia kag untati ninyo ang pagpakig-upod sa iya, agod mahuya sia. Apang indi ninyo sia pagkabiga nga kaaway, kundi padayon ninyo sia nga laygayi subong isa ka utod.”​—2 Tes. 3:​6, 14, 15.

¹⁰ Kon kaisa, may isa nga wala man nakahimo sing mabug-at nga sala diin puede sia mapagua sa kongregasyon, pero hungod niya nga ginabalewala ang talaksan sang Dios nga nagatuytoy sa mga Cristiano. Mahimo ini maglakip sang sobra nga katamaron, pagkamamulayon, ukon kahigko. Mahimo man nga ‘nagapasilabot sia sa mga butang nga wala sia sing labot.’ (2 Tes. 3:11) Ukon mahimo nagapamentaha sia sa materyal ukon nawili sa indi nagakaigo nga kalingawan. Bangod sini nga mga paggawi, posible gid nga mabutang sa kahuy-anan ang kongregasyon, kag mahimo ini makaimpluwensia sa iban nga Cristiano.

¹¹ Dapat anay buligan sang mga gulang ining magamo nga tawo paagi sa paghatag sa iya sing laygay halin sa Biblia. Apang kon padayon niya nga ginabalewala ang mga prinsipio sa Biblia sa tapos sang sulitsulit nga laygay, ang mga gulang mahimo magdesisyon sa paghatag sing nagapaandam nga pamulongpulong sa kongregasyon. Dapat nga mangin mahinantupon ang mga gulang sa pagpat-od kon bala ang isa ka sitwasyon serioso gid kag makatulublag amo nga kinahanglan ang nagapaandam nga pamulongpulong. Ang humalambal magahatag sing nagakaigo nga laygay parte sa magamo nga paggawi, apang indi niya paghinambitan ang iya ngalan. Sa amo, ang mga may nahibaluan parte sa ginalaragway sa pamulongpulong magahalong sa pagpakig-angot sa amo nga indibiduwal, bisan pa magapadayon gihapon sila sa espirituwal nga pagpakig-upod sa iya, nga ‘nagalaygay sa iya subong isa ka utod.’

¹² Ginalauman nga ang malig-on nga tindog sang matutom nga mga Cristiano magapahulag sa isa nga magamo nga mahuya sa iya ginahimo kag magbag-o. Kon maathag nga gintalikdan na niya ang iya magamo nga dalanon, indi na kinahanglan nga tamdon sia subong natandaan.

¹³ Ang kahanda nga palampason ang mga sala kag magpatawad wala nagakahulugan nga ginabalewala naton ukon ginaugyunan ang sala. Indi tanan nga sala mabasol sa pagkadihimpit; ukon nga mas maayo nga indi na lang pagsapakon ang dalagku nga mga sala. (Lev. 19:17; Sal. 141:5) Ginapakita sang Kasuguan nga katipan nga ang pila ka sala mas mabug-at sangsa iban, kag amo man sini sa Cristianong kahimusan.—1 Juan 5:16, 17.

¹⁴ Ginsambit ni Jesus ang espesipiko nga pamaagi sa pagsolbar sa mabug-at nga mga problema nga mahimo mag-utwas sa tunga sang duha ka Cristiano. Talupangda ang mga tikang nga ginsiling niya: “Kon ang imo utod nakasala sa imo, [1] kadtui sia kag sugiri sang iya sala nga kamohanon lang. Kon magpamati sia sa imo, nadaug mo ang imo utod. Apang kon indi sia magpamati sa imo, [2] mag-upod ka sang isa ukon duha pa agod ang tanan nga ginsiling mapamatud-an sang duha ukon tatlo ka saksi. Kon indi sia magpamati sa ila, [3] isugid mo sa kongregasyon. Kon indi sia magpamati bisan sa kongregasyon, kabiga sia nga kaangay sang tawo sang mga pungsod kag kaangay sang manugsukot sing buhis.”—Mat. 18:15-17.

¹⁵ Ginapakita sang masunod nga ilustrasyon ni Jesus sa Mateo 18:23-35, nga ang isa sa mga sala nga ginapatuhuyan sa Mateo 18:15-17 may kahilabtanan sa kuarta ukon propiedad, subong sang wala mabayaran nga utang ukon pagpanunto. Ukon posible nga ang sala pagpasipala, nga makaapektar sing daku sa reputasyon sang isa.

¹⁶ Kon may pamatuod ka nga ini nga sala nahimo sa imo sang isa ka utod, indi ka magdalidali kadto sa mga gulang agod pangabayon sila nga magpatunga. Subong sang ginlaygay ni Jesus, istoryaha anay ang imo ginareklamo. Tinguhai nga solbaron ang problema nga kamo lamang nga duha kag wala ginadalahig ang iban. Dumduma nga si Jesus wala magsiling nga ‘kadto ka sing makaisa lamang, kag isugid ang iya sala.’ Buot silingon, kon wala niya gin-aku ang sala kag wala sia nangayo sing patawad, maayo nga palapitan sia liwat sa ulihi. Kon ang problema masolbar sa sini nga paagi, apresyahon gid sang isa nga nakasala nga wala mo ginsugid sa iban ang iya sala ukon ginguba ang iya maayo nga reputasyon sa kongregasyon. Natigayon mo ang imo tulumuron nga ‘madaug ang imo utod.’

¹⁷ Kon nag-aku sia, nangayo sing patawad, kag naghimo sing tikang agod matadlong ini, indi na kinahanglan himuon ang masunod nga tikang. Bisan pa mabug-at ang nahimo nga sala, ini nga sala sarang na malubad sang mga indibiduwal nga nadalahig.

¹⁸ Kon indi mo madaug ang imo utod paagi sa pagsugid sang iya sala nga “kamohanon lang,” mahimo mo himuon ang ginsiling ni Jesus nga “mag-upod ka sang isa ukon duha pa,” kag istoryaha liwat ang imo utod. Dapat tulumuron man sang imo gin-upod nga madaug ang imo utod. Mas maayo kon nakasaksi sila sa ginaalegar nga nahimo nga sala, apang kon wala sing nakasaksi, mahimo mo pangabayon ang isa ukon duha nga updan ka para saksihan ang inyo paghambalanay. Ayhan may eksperiensia na sila parte sa problema kag mahimo makabulig sila sa pagpat-od kon bala ang natabo sala gid man. Kon mga gulang ang ginpili nga mangin saksi, wala nila ginatiglawas ang kongregasyon, kay wala sila gin-asayn sang hubon sang mga gulang nga himuon ini.

¹⁹ Kon ang problema wala masolbar pagkatapos sang sulitsulit nga panikasog—nakighambal ka na sa iya nga kamohanon lang kag nagbalik sa iya upod ang isa ukon duha ka utod—kag nagabatyag ka nga indi mo ini mapalampas, dapat mo ini ireport sa mga manugtatap sang kongregasyon. Dumduma nga tulumuron nila nga mahuptan ang paghidait kag katinlo sang kongregasyon. Bangod nagpalapit ka na sa mga gulang, ginatugyan mo na ini nga butang sa ila kag ginasalig mo na ini kay Jehova. Indi gid pagtuguti ang ginhimo sang iban nga magpasandad sa imo ukon magkuha sang imo kalipay sa pag-alagad kay Jehova.​—Sal. 119:165.

²⁰ Usisaon sang mga manugbantay sang panong ang problema. Kon maathag nga nakahimo sia sing mabug-at nga sala sa imo kag indi sia mahinulsulon kag indi handa nga maghimo sing rasonable kag nagakaigo nga pagbag-o, mahimo nga kinahanglan sikwayon sang komite sang mga manugtatap ang nakasala sa kongregasyon. Sa amo, maamligan nila ang panong kag mapabilin ang katinlo sang kongregasyon.​—Mat. 18:17.

²¹ Ang pila ka mabug-at nga sala, subong sang seksuwal nga imoralidad, pagpakighilahi, homoseksuwal nga mga buhat, pagpasipala, apostasya, pagsimba sa mga diosdios, kag ang iban pa nga kaanggid sini, nagakinahanglan indi lamang sang pagpatawad sang nahimuan sang sala. (1 Cor. 6:9, 10; Gal. 5:19-21) Bangod nabutang sa katalagman ang espirituwal kag moral nga katinlo sang kongregasyon, ining mabug-at nga mga sala dapat ireport sa mga gulang kag asikasuhon nila. ​(1 Cor. 5:6; Sant. 5:14, 15) Ang iban mahimo man magpalapit sa mga gulang agod itu-ad ang ila sala ukon ireport ang nahibaluan nila parte sa sala sang iban. (Lev. 5:1; Sant. 5:16) Sa ano man nga paagi nga una nabatian sang mga gulang ang report parte sa mabug-at nga sala sang bawtismado nga Saksi, ang una nga imbestigasyon himuon sang duha ka gulang. Kon mapamatud-an nga may basihan ang report kag may ebidensia nga nahimo gid man ang mabug-at nga sala, ang hubon sang mga gulang magaasayn sang hudisyal nga komite nga ginahuman sang indi magkubos tatlo ka gulang para asikasuhon ini.

²² Ginabantayan sing maayo sang mga gulang ang panong kag ginatinguhaan nila nga amligan ini sa bisan ano nga makahalit sa espirituwal. Ginapanikasugan man nila nga gamiton sing malantipon ang Pulong sang Dios agod sabdungon ang bisan sin-o nga nakasala kag mapasag-uli ang ila espirituwal nga kapagros. (Jud. 21-​23) Nahisanto ini sa mga instruksion ni apostol Pablo kay Timoteo: “Sa atubangan sang Dios kag ni Cristo Jesus, nga magahukom sa mga buhi kag sa mga patay, . . . ginasugo ko ikaw, . . . Magsabdong ka, magsaway, kag maglaygay nga may bug-os nga pagkamapinasensiahon kag kalantip sa pagpanudlo.” (2 Tim. 4:1, 2) Mahimo nagakinahanglan ini sing daku nga tion, apang bahin ini sang pagpangabudlay sang mga gulang. Ginaapresyar sang kongregasyon ang ila mga panikasog kag ginakabig sila nga “takus padunggan sing doble.”—1 Tim. 5:17.

²³ Sa tagsa ka sitwasyon nga napamatud-an nga nahimo ang sala, ang panguna nga tulumuron sang mga manugtatap amo nga mapasag-uli ang espirituwal nga kapagros sang nakasala. Kon mahinulsulon gid sia kag mabuligan nila sia, ang ila pagsabdong, ayhan sing pribado ukon sa atubangan sang posible nga mga saksi nga nagtestigo sa tion sang judicial hearing, mangin disiplina sa iya kag magapabatyag sing nagakaigo nga kahadlok sa bisan sin-o nga nakahibalo. (2 Sam. 12:13; 1 Tim. 5:20) Sa tanan nga kaso sang hudisyal nga pagsabdong, may mga pagdumili nga ginapatuman. Sa amo, ang nakasala mabuligan sa ‘pagtadlong sa mga banas sang iya mga tiil.’ (Heb. 12:13) Sa ulihi, ini nga mga pagdumili ginakuha kon makita nga ginapasag-uli niya ang iya espirituwalidad.

²⁴ Kon ang hudisyal nga komite nagdesisyon nga ang indibiduwal mahinulsulon apang ang problema posible mahibaluan sang kongregasyon ukon sang komunidad ukon kon kinahanglan paandaman ang kongregasyon parte sa naghinulsol nga nakasala, ang simple nga pahibalo himuon sa tion sang Pagkabuhi kag Pagministeryo nga Miting. Dapat nagasiling ini: “Si [iya ngalan] ginsabdong.”

²⁵ Sa pila ka sitwasyon, ang nakasala mahimo nagapakatig-a, amo nga ginabalewala niya ang mga panikasog nga buligan sia. Sa tion sang judicial hearing, mahimo nga indi makita sa iya ang nagakaigo nga “buhat nga takus sa paghinulsol.” (Binu. 26:20) Ano dayon ang himuon? Sa sini nga mga sitwasyon, kinahanglan isikway sa kongregasyon ang indi mahinulsulon nga nakasala, gani indi na sia makapakig-upod sa matinlo nga katawhan ni Jehova. Ang malain niya nga impluwensia ginkuha sa kongregasyon, amo nga mapabilin ang moral kag espirituwal nga katinlo sang kongregasyon kag maamligan ang maayo nga ngalan sini. (Deut. 21:20, 21; 22:23, 24) Sang nahibaluan ni apostol Pablo ang makahuluya nga paggawi sang isa ka tawo sa kongregasyon sang Corinto, ginlaygayan niya ang mga gulang nga ‘itugyan ang tawo kay Satanas agod ang espiritu sang kongregasyon maluwas.’ (1 Cor. 5:5, 11-13) Ginsambit man ni Pablo ang pag-disfellowship sa mga nagrebelde sa kamatuoran sang unang siglo.—1 Tim. 1:20.

²⁶ Kon nakapamat-od na nga dapat i-disfellowship ang indi mahinulsulon nga nakasala, dapat ini ipahibalo sa iya sang hudisyal nga komite, nga nagapaathag sang (mga) rason gikan sa Kasulatan sang pag-disfellowship sa iya. Kon ginapahibalo na sa iya ang desisyon, ihambal sa iya sang hudisyal nga komite nga kon sa banta niya indi husto ang desisyon kag gusto niya mag-apelar, dapat sia magsulat, nga nagapaathag sang mga rason sang iya pag-apelar. Hatagan sia sing pito ka adlaw para himuon ini, nga magasugod sa tion nga ginpahibalo sa iya ang desisyon sang komite. Kon mabaton ang iya apelasyon, ang hubon sang mga gulang magakontak sa manugtatap sang sirkito, nga magapili sang kalipikado nga mga gulang nga magaalagad sa appeal committee agod pamatian liwat ang kaso. Panikasugan nila nga himuon ang appeal hearing sa sulod sang isa ka semana sa tapos mabaton ang iya sulat. Kon nag-apelar sia, wala anay ginapahibalo ang pag-disfellowship sa iya. Sa sini nga mga tion, indi sia pagtugutan nga magkomento kag mangamuyo sa mga miting kag wala sia ginahatagan sing pinasahi nga pribilehiyo sa pag-alagad.

²⁷ Ang pag-apelar ginatugot bilang pagpakita sing kaayo sa gin-akusar kag agod mapamatian pa sing maayo ang iya kaso. Gani, kon ang nakasala wala nagkadto sa appeal hearing, ang pag-disfellowship ipahibalo sa tapos sang makatarunganon nga mga panikasog agod makontak sia.

²⁸ Kon ang nakasala indi na gusto mag-apelar, ipaathag sa iya sang hudisyal nga komite nga kinahanglan sia maghinulsol kag ang mga tikang nga iya himuon para makapanumbalik sa ulihi. Makabulig gid ini sa nakasala kag pagpakita ini sing kaayo sa iya, kag dapat himuon ini sa paglaum nga magabag-o sia kag mangin kalipikado sa ulihi nga makabalik sa organisasyon ni Jehova.—2 Cor. 2:6, 7.

²⁹ Kon dapat i-disfellowship sa kongregasyon ang indi mahinulsulon nga nakasala, ginahimo ang isa ka malip-ot nga pahibalo, nga nagasiling: “Si [iya ngalan] indi na isa sa mga Saksi ni Jehova.” Magapaandam ini sa kongregasyon nga indi na makig-upod sa sina nga tawo.—1 Cor. 5:11.

³⁰ Ang termino nga “pag-disassociate” nagapatuhoy sa hungod nga pagtalikod sang isa ka bawtismado nga Saksi sa iya Cristianong tindog paagi sa pagsiling nga indi na niya luyag nga kilalahon ukon tawgon nga Saksi ni Jehova. Ukon ginpakita niya ini paagi sa buhat subong sang pagpakigbahin sa sekular nga organisasyon nga ang tulumuron supak sa mga panudlo sang Biblia kag pagahukman sa ulihi ni Jehova nga Dios.—Isa. 2:4; Bug. 19:17-21.

³¹ Si apostol Juan nagsulat tuhoy sa mga nagtalikod sa ila Cristianong pagtuo sang iya panahon: “Nagbiya sila sa aton, apang indi sila matuod nga katapo naton; kay kon matuod sila nga katapo naton, kuntani nagpabilin sila sa aton.”—1 Juan 2:19.

³² Kon nag-disassociate ang isa, ang iya kahimtangan sa atubangan ni Jehova indi pareho sa di-aktibo nga Cristiano, ang isa nga wala na nagapakigbahin sa ministeryo sa latagon. Ang isa mahimo nangin di-aktibo bangod wala na niya ginatun-an sing regular ang Pulong sang Dios. Ukon basi tungod sang personal nga mga problema ukon paghingabot, nadula niya ang iya kakugi sa pag-alagad kay Jehova. Ang mga gulang kag ang iban pa sa kongregasyon padayon nga magahatag sing nagakaigo nga espirituwal nga bulig sa di-aktibo nga Cristiano.—Roma 15:1; 1 Tes. 5:14; Heb. 12:12.

³³ Sa pihak nga bahin, kon ang isa ka Cristiano nag-disassociate, ginahimo ang isa ka malip-ot nga pahibalo sa kongregasyon, nga nagasiling: “Si [iya ngalan] indi na isa sa mga Saksi ni Jehova.” Ginakabig sia kaangay sang isa nga na-disfellowship.

³⁴ Ang isa nga gin-disfellowship ukon nag-disassociate sa kongregasyon mahimo makapanumbalik kon magpakita sia sing maathag nga pamatuod nga naghinulsol sia kag sa sulod sang rasonable nga kalawigon sang tion ginbiyaan na niya ang iya makasasala nga dalanon. Ginapakita niya nga luyag niya matigayon ang maayo nga kaangtanan kay Jehova. Mahinalungon ang mga gulang sa paghatag sing bastante nga tion—binulan, isa ka tuig, ukon mas malawig pa, depende sa kahimtangan—para mapamatud-an nga matuod ang iya paghinulsol. Kon ang hubon sang mga gulang makabaton sing sulat nga nagapangabay sang pagpanumbalik ukon reinstatement, isa ka reinstatement committee ang makighambal sa iya. Timbangtimbangon sang komite ang pamatuod sang iya ‘mga buhat sang paghinulsol’ kag magadesisyon kon bala ipanumbalik sia sa sini nga tion ukon indi.—Binu. 26:20.

³⁵ Kon ang nagapangabay nga manumbalik na-disfellowship sa iban nga kongregasyon, ang lokal nga reinstatement committee makigkita sa iya kag usisaon sing maayo ang iya pangabay. Kon nagapati ang mga miembro sang lokal nga reinstatement committee nga dapat sia i-reinstate, ipadala nila ang ila rekomendasyon sa hubon sang mga gulang sang kongregasyon nga nag-uyat sang kaso. Ang duha ka komite dapat magbuligay agod pat-uron nga natipon nila ang tanan nga impormasyon para makahimo sing husto nga desisyon. Pero, ang desisyon sa pag-reinstate dapat himuon sang reinstatement committee sang kongregasyon nga nag-uyat sang kaso.

³⁶ Kon ang reinstatement committee kumbinsido nga ang na-disfellowship ukon nag-disassociate mahinulsulon kag dapat ipanumbalik, ang pahibalo ginahimo sa kongregasyon nga nag-uyat sa kaso. Kon yara na sia sa iban nga kongregasyon, ang pahibalo himuon man didto. Ang pahibalo dapat simple lang, nga nagasiling: “Si [iya ngalan] nakapanumbalik na subong isa sa mga Saksi ni Jehova.”

³⁷ Ang mabug-at nga sala nga nahimo sang bawtismado nga menor-de-edad dapat ireport sa mga gulang. Kon ginauyatan sang mga gulang ang kaso sang menor-de-edad nga nakahimo sing mabug-at nga sala, mas maayo nga yara ang iya bawtismado nga mga ginikanan. Luyag nila magkooperar sa hudisyal nga komite, kag wala nagatinguha nga mahilway ang ila nakasala nga anak sa disiplina. Kaangay kon nagapakig-angot sa nakasala nga mga adulto, panikasugan sang hudisyal nga komite nga sabdungon kag ipasag-uli ang nakasala. Apang, kon ang pamatan-on indi mahinulsulon, dapat sia i-disfellowship.

³⁸ Ano naman ang himuon kon isa ka di-bawtismado nga manugbantala ang nakahimo sing mabug-at nga sala? Bangod indi pa sila bawtismado nga mga Saksi, indi sila mahimo i-disfellowship. Apang, basi wala nila mahangpan sing bug-os ang mga talaksan sang Biblia, kag mahimo makabulig sa ila ang mainayuhon nga laygay agod ‘matadlong ang ila banas.’—Heb. 12:13.

³⁹ Kon ang di-bawtismado nga nakasala indi mahinulsulon sa tapos maistorya sang duha ka gulang kag matinguhaan nga buligan, kinahanglan ini ipahibalo sa kongregasyon. Ginahimo ang isa ka malip-ot nga pahibalo, nga nagasiling: “Si [iya ngalan] indi na isa ka di-bawtismado nga manugbantala.” Sa amo, tamdon sang kongregasyon ang nakasala subong kalibutanon nga tawo. Bisan pa indi sia disfellowship, ang mga Cristiano dapat maghalong sa pagpakig-upod sa iya. (1 Cor. 15:33) Ang iya report sa pag-alagad sa latagon indi na pagbatunon.

⁴⁰ Sa ulihi, ang di-bawtismado nga tawo nga ginkuha subong manugbantala mahimo luyag liwat mangin isa ka manugbantala. Kon amo sini, duha ka gulang ang makighambal sa iya kag hibaluon ang iya espirituwal nga pag-uswag. Kon kalipikado sia, ginahimo ang isa ka malip-ot nga pahibalo, nga nagasiling: “Si [iya ngalan] isa na liwat ka di-bawtismado nga manugbantala.”

⁴¹ Sa karon, ang tanan nga nagapakig-upod sa kongregasyon sang Dios nagakalipay gid sa espirituwal nga kabuganaan nga ginahatag ni Jehova sa iya katawhan. Ang aton espirituwal nga mga halalban madabong katama, kag bugana kita sing makapaumpaw nga tubig sang kamatuoran. Ginaamligan man kita kag ginaatipan ni Jehova paagi sa iya teokratiko nga kahimusan sa idalom sang pagpanguna sang Cristo. (Sal. 23; Isa. 32:1, 2) Bangod nagapuyo kita sa espirituwal nga paraiso sa sining magamo nga katapusan nga mga adlaw, nabatyagan naton ang kalig-unan.

⁴² Paagi sa paghupot sang paghidait kag katinlo sang kongregasyon, padayon naton nga ginapaiwag ang kapawa sang kamatuoran sang Ginharian. (Mat. 5:16; Sant. 3:18) Paagi sa pagpakamaayo sang Dios, malipay kita nga makita ang madamo pa nga tawo nga makakilala kay Jehova kag magaalagad upod sa aton sa paghimo sang iya kabubut-on.