Ang Pagtamod sang Biblia

Isa bala ka Tulumanon para sa Cristianong mga Ministro ang Selibasiya?

ANG selibasiya, sa estrikto nga paghambal, amo ang pagkadiminyo. Apang, suno sa The New Encyclopædia Britannica, ang termino “masami ginagamit may kaangtanan sa katungdanan sang diminyo nga indibiduwal subong isa ka relihioso nga opisyal, espesyalista, ukon debotado.” Ang tinaga nga “selibasiya” nagapatuhoy sa “mga tawo nga ang ila pagkadiminyo resulta sang isa ka sagrado nga panaad ukon pagdingot sa kaugalingon ukon sa pagpati nga maayo ini para sa isa ka tawo bangod sang iya relihioso nga posisyon ukon sang kadalumon sang iya pagkarelihioso.”

Sadto anay, ginbaton sang pila ka prominente nga relihion ang selibasiya subong isa ka tulumanon para sa ila mga ministro. Apang, nangin tuman gid ini ka importante sa Katolisismo sangsa bisan ano nga relihion sa Cristiandad. Sa karon, may daku nga binais tuhoy sa selibasiya sa tunga sang mga Katoliko. Ang The Wilson Quarterly nagsiling nga “madamo sa ginhimo nga pagtuon sining karon lang nga mga dekada ang naghinakop nga ang obligado nga selibasiya, nga isa ka tulumanon para sa Katolikong mga pari kutob pa sang ika-12 nga siglo, amo ang gamot sang mga problema sa pagrecruit kag paghupot sa mga pari nga magpadayon sa pagkapari.” Suno sa sosyologo nga si Richard A. Schoenherr, “ang mga katunayan sang maragtas kag pagbag-o sa katilingban nagasumpakil sa pagtamod nga mga diminyo lamang nga mga lalaki ang ginatugutan nga mangin isa ka Katoliko nga pari.” Ano ang pagtamod sang Biblia tuhoy sa selibasiya?

Pagminyo Ukon Pagkadiminyo?

Sa bug-os nga maragtas madamong debotado nga lalaki kag babayi, sa lainlain nga mga relihion, ang namat-od nga indi magminyo. Ngaa? Sa madamo nga kaso ini bangod nagapati sila nga ang undanon, materyal nga mga butang amo “ang sentro sang kalautan.” Amo ini ang ginhalinan sang pilosopiya nga ang espirituwal nga kaputli matigayon lamang paagi sa paglikaw sa tanan nga seksuwal nga hilikuton. Apang, indi amo sini ang pagtamod sang Biblia. Sa Biblia, ang pag-asawahay ginatamod nga matinlo, balaan nga regalo gikan sa Dios. Maathag nga ginapakita sang rekord sang Genesis tuhoy sa pagpanuga ang pag-asawahay subong “maayo” sa panulok sang Dios kag maathag nga indi sablag sa isa ka espirituwal putli nga kaangtanan sa Dios.​—⁠Genesis 1:​26-​28, 31; 2:​18, 22-​24; tan-awa man ang Hulubaton 5:​15-​19.

Si apostol Pedro kag ang iban pa nahamut-an nga mga alagad sang Dios nga may awtoridad sa unang Cristianong kongregasyon mga lalaki nga minyo. (Mateo 8:​14; Binuhatan 18:​2; 21:​8, 9; 1 Corinto 9:⁠5) Ginaathag ini sang mga panugyan ni Pablo kay Timoteo tuhoy sa pagtangdo sing mga manugtatap sa kongregasyon, ukon “mga obispo.” Sia nagsulat: “Ang obispo dapat nga wala sing kasawayan, bana sang isa ka asawa.” (Italiko amon; 1 Timoteo 3:​2, Revised Standard Version, Katoliko nga Edisyon) Talupangda nga wala gid ini nagapahangop nga indi nagakaigo para sa “isa ka obispo” nga magminyo. Simple nga ginpahangop ni Pablo nga ang “isa ka obispo” indi isa ka poligamista; kon minyo sia, dapat nga isa lamang ang iya asawa. Sa katunayan, ang Cyclopedia of Biblical, Theological, and Ecclesiastical Literature, ni McClintock kag Strong, nagahinakop: “Wala sing dinalan sa B[ag-ong] T[estamento] ang nagapahangop nga nagadumili ini sa pagpangasawa sang klero sa idalom sang kahimusan sang Ebanghelyo.”

Samtang ginahatagan sing daku nga dungog ang pag-asawahay, wala gid ginapakamalaut sang Biblia ang pagkadiminyo kon ginpili ini sing kinabubut-on. Ginarekomendar ini sang Biblia subong maayo nga dalanon para sa iban. (1 Corinto 7:​7, 8) Si Jesucristo nagsiling nga ang iban nga lalaki kag babayi kinabubut-on nga nagpili nga indi magminyo. (Mateo 19:12) Ngaa? Indi bangod nga mahigko ang pag-asawahay nga makasablag sa ila pag-uswag sa espirituwal. Ginpili nila ini nga dalanon agod masentro ang ila mga panikasog sa paghimo sang kabubut-on sang Dios sa ginakabig nila nga hilingagawon nga mga tion.

Ang Ginhalinan Sang Obligado nga Selibasiya

Apang, mga siglo ang nagligad pagkatapos sang mga adlaw ni Cristo, nagbag-o ang mga kahimtangan. Sa sulod sang unang tatlo ka siglo sang aton Komon nga Dag-on, “may yara minyo kag diminyo nga mga ministro,” paathag ni David Rice, isa ka Dominikano nga nagguwa sa pagkapari agod mangasawa. Nian, ang nagapangangkon nga mga Cristiano naimpluwensiahan sang ginalaragway sang isa ka relihioso nga manunulat nga “pagsimpunanay sang Griego kag biblikanhon nga mga pagtamod” nga nagpatubas sing tiko nga pagtamod sa sekso kag pag-asawahay.

Ang iban, padayon nga nagpabilin nga diminyo agod “makatigayon sing bug-os nga kahilwayan nga idedikar ang ila [kaugalingon] sa hilikuton sang ginharian sang Dios.” Apang, ang iban, labi nga ginpahulag sang ila ginbaton nga pagano nga mga pilosopiya. Ang The New Encyclopædia Britannica nagasiling: “Ang pagpati nga ang seksuwal nga paghulid mahigko kag supak sa pagkabalaan naglutaw [sa nagapangangkon nga Cristianong simbahan] subong panguna nga rason sa pagsunod sa selibasiya.”

Sang ikap-at nga siglo, siling ni Rice, ang simbahan “nagdumili sa minyo nga pari nga makigsekso sa gab-i antes sang pagsaulog sing Eukarista.” Sang ginpatuman sang simbahan ang adlaw-adlaw nga Eukarista, nagkahulugan ini nga ang mga pari indi na dapat makigsekso sing permanente. Sang ulihi, ang pagpangasawa sang mga pari bug-os nga gindumilian. Sugod sadto ang selibasiya nangin obligado para sa kay bisan sin-o nga isa ka ministro sang simbahan.

Si apostol Pablo nagpaandam tuhoy sini nga hitabo. Sia nagsulat: “Ang Espiritu maathag nga nagasiling nga sa ulihi nga dag-on sang tion ang iban magabulag sa pagtuo nga magapamati sa nagapatalang nga mga espiritu kag mga doktrina nga halin sa mga yawa . . . Magasiling sila nga ang pag-asawahay ginadilian.”​—⁠1 Timoteo 4:​1, 3, Jerusalem Bible.

“Ang kaalam ginapamatud-an nga matarong paagi sa iya mga buhat,” siling ni Jesucristo. (Mateo 11:19) Ang kabuangan sang paglisa sa mga talaksan sang Dios napamatud-an paagi sa mga buhat ukon mga resulta sini. Ang awtor nga si David Rice nag-interbyu sa madamo nga pari sa bilog nga kalibutan sa topiko tuhoy sa obligado nga selibasiya. Ang iban sang iya nasugilanon nagsiling: “Magpabilin sa pagkapari, himua ang masarangan mo himuon nga maayo, kag maalamon nga paayawi ang imo kaugalingon sa debotado nga mga babayi, nga nagahangad kag nagapasugot nga makigsekso sa imo.”

Ginakutlo ang Mateo 7:​20, si Rice nagsiling: “ ‘Makilala mo sila paagi sa ila mga bunga,’ siling ni Jesus.” Nian nagkomento sia tuhoy sa kalisod nga resulta sang obligado nga selibasiya: “Ang mga bunga sang obligado nga selibasiya amo ang linibo ka lalaki nga nagakabuhi sing doble-kara, linibo ka babayi nga may naguba nga pagkabuhi, linibo ka kabataan nga ginsikway sang ila amay nga mga pari, dugang pa sa mga pari nga nagaantos sa emosyon bangod sining kahimtangan.”

Ang dungganon nga pag-asawahay isa ka pagpakamaayo halin sa Dios. Ang obligado nga selibasiya nangin makahalalit sa espirituwal. Ang ginpili sing kinabubut-on nga pagkadiminyo, sa pihak nga bahin, walay sapayan nga indi kinahanglanon para matigayon ang pagkabalaan ukon kaluwasan, nangin makapaladya kag makaalayaw sa espirituwal nga dalanon sang kabuhi sa iban.​—⁠Mateo 19:12.

[Credit Line sa pahina 28]

Life