Mga Manugtatap nga Nagabantay sa Panong

SA TION sang ministeryo ni Jesus, ginpamatud-an niya nga sia “ang maayo nga manugbantay.” (Juan 10:11) Sang makita niya ang kadam-an nga nagasunod sa iya, “naluoy sia sa ila, kay ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Nakita ni Pedro kag sang iban nga apostoles ang iya mahigugmaon nga pag-ulikid. Tuhay gid si Jesus sa butig nga mga manugbantay sang Israel, nga nagpabaya sa panong amo nga nag-alaplaag ini kag nagutman sa espirituwal! (Ezeq. 34:7, 8) Ang maayo nga halimbawa ni Jesus sa pagtudlo kag pagtatap sa mga karnero, bisan tubtob sa punto nga ihalad niya ang iya kabuhi tungod sa ila, nagtudlo sa mga apostoles kon paano buligan ang mga may pagtuo nga magbalik kay Jehova, ang “manugbantay kag manugtatap sang [ila] kalag.”—1 Ped. 2:25.

² Isa ka bes, sang nagapakig-istorya si Jesus kay Pedro, ginpadaku niya nga importante gid ang pagpakaon kag pagbantay sa mga karnero. (Juan 21:15-17) Napahulag gid sini si Pedro kag sang ulihi ginlaygayan niya ang mga gulang sa Cristianong kongregasyon sadto: “Bantayi ninyo ang panong sang Dios nga yara sa inyo pag-atipan, nga nagaalagad subong mga manugtatap, indi nga napilitan, kundi sing kinabubut-on sa atubangan sang Dios; indi tungod sa gugma sa mga bentaha, kundi sing malangkagon; wala nagapakaginuo sa mga ginapanag-iyahan sang Dios, kundi mangin mga halimbawa sa panong.” (1 Ped. 5:1-3) Ang ginsiling ni Pedro maaplikar man sa mga manugtatap sa kongregasyon karon. Bilang pag-ilog kay Jesus, kinabubut-on kag malangkagon nga nagaalagad ang mga gulang subong halimbawa sa panong, nga nagapanguna sa pag-alagad kay Jehova.—Heb. 13:7.

³ Mapinasalamaton gid kita sa gintangdo sang espiritu nga mga manugtatap sang kongregasyon. Madamo kita sing nabaton nga benepisyo sa ila pagtatap. Halimbawa, ang mga manugtatap nagapalig-on kag personal nga nagaatipan sa mga kinahanglanon sang tanan sa kongregasyon. Kada semana mapisan nga ginadumalahan nila ang mga miting sang kongregasyon, diin ang tanan ginapabakod sa pagtuo. (Roma 12:8) Ang ila panikasog sa pag-amlig sa panong gikan sa makahalalit nga mga butang, subong sang malauton nga mga tawo, nagahatag sa aton sing kalig-unan. (Isa. 32:2; Tito 1:9-11) Ang ila pagpanguna sa pag-alagad sa ministeryo nagapalig-on sa aton nga magpabilin nga aktibo sa pagbantala sang maayong balita sing regular kada bulan. (Heb. 13:15-17) Ining “mga dulot nga mga lalaki” gin-aman ni Jehova para pabakuron ang kongregasyon.—Efe. 4:8, 11, 12.

⁴ Agod mapat-od nga maatipan sing maayo ang kongregasyon, dapat malab-ot sang mga lalaki nga gintangdo subong manugtatap ang mga kinahanglanon nga makita sa Pulong sang Dios. Masiling lamang nga gintangdo sila sang balaan nga espiritu kon malab-ot nila ini. (Binu. 20:28) Mataas ang mga talaksan sa Kasulatan para sa Cristianong mga manugtatap, bangod isa ini ka serioso nga responsibilidad. Pero indi ini tuman kataas nga indi malab-ot sang Cristianong mga lalaki nga nagahigugma gid kay Jehova kag handa nga magpagamit sa iya. Dapat makita sang tanan nga ang mga manugtatap nagaaplikar sang mga laygay sang Biblia sa ila adlaw-adlaw nga pagkabuhi.

⁵ Ginsambit ni apostol Pablo ang panguna nga mga kinahanglanon sa Kasulatan para sa mga manugtatap sa iya nahauna nga sulat kay Timoteo kag sa iya sulat kay Tito. Sa 1 Timoteo 3:1-7, aton mabasa: “Kon ang isa ka lalaki nagatinguha nga mangin manugtatap, nagahandum sia sang maayo nga buhat. Ang manugtatap dapat indi salawayon, isa lang ang asawa, makahibalo magpugong sang kaugalingon, maligdong sing hunahuna, mahim-ong, maabiabihon, kalipikado sa pagpanudlo, indi palahubog, indi masingki, kundi makatarunganon, indi palaaway, indi mahigugmaon sa kuarta, nagadumala sing maayo sa iya panimalay, may mga anak nga serioso gid nga nagapasakop (kay kon ang isa ka lalaki indi makahibalo magdumala sang iya panimalay, paano niya maatipan ang kongregasyon sang Dios?), indi bag-uhan nga tumuluo, kay basi magpahambog sia kag makabaton sing paghukom kaangay sang paghukom nga nabaton sang Yawa. Dapat nga may maayo man sia nga reputasyon sa mga tawo nga indi bahin sang kongregasyon, agod indi sia pagtamayon sang mga tawo kag masiod sang Yawa.”

⁶ Si Pablo nagsulat kay Tito: “Ginbilin ko ikaw sa Creta agod matadlong mo ang mga butang nga may depekto kag suno sa instruksion ko sa imo magtangdo ka sang mga gulang sa tagsa ka siudad: Kon may lalaki nga hilway sa panumbungon, isa lang ang asawa, may tumuluo nga mga anak nga wala ginasumbong nga mapinatuyangon ukon rebelyuso. Kay subong tulugyanan sang Dios, ang isa ka manugtatap dapat nga hilway sa panumbungon, indi puguso, indi madali maakig, indi palahubog, indi masingki, wala nagatinguha nga mamentaha sa makagod kag indi bunayag nga paagi, kundi dapat maabiabihon sia, mahigugmaon sa maayo, maligdong sing hunahuna, matarong, mainunungon, may pagpugong sa kaugalingon, nagapanguyapot sing malig-on sa matutom nga pulong may kaangtanan sa iya kalantip sa pagpanudlo, agod makapalig-on sia paagi sa maayo nga panudlo kag makasabdong sa mga nagahambal batok sa sini.”—Tito 1:5-9.

⁷ Bisan daw mabudlay malab-ot ang mga kinahanglanon sang Kasulatan para sa mga manugtatap, indi ini dapat magpugong sa Cristianong mga lalaki sa pagtinguha. Kon magpakita sila sing maayo nga Cristianong mga kinaiya nga kinahanglanon para mangin manugtatap, ginapalig-on nila ang iban sa kongregasyon nga himuon man ini. Si Pablo nagsulat nga ini nga “mga dulot nga mga lalaki” gin-aman “agod pasibuon ang mga balaan sa husto nga dalan, para sa hilikuton sa pag-alagad, sa pagpabakod sa lawas sang Cristo, tubtob makadangat kita tanan sa nahiusa nga pagtuo kag sibu nga ihibalo tuhoy sa Anak sang Dios, kag mangin hamtong gid nga tawo, kaangay sang bug-os nga kahamtong sang Cristo.”—Efe. 4:8, 12, 13.

⁸ Ang mga manugtatap indi mga bata ukon bag-uhan nga tumuluo nga mga lalaki. Sa baylo, eksperiensiado sila nga mga Cristiano, nga may masangkad nga ihibalo sa Biblia, madalom nga paghangop sa Kasulatan, kag matuod nga gugma sa kongregasyon. May kaisog sila sa paghambal kag pagtadlong sa mga nagahimo sing sayop para maamligan ang mga karnero batok sa bisan ano nga magahingalit sa ila. (Isa. 32:2) Ang mga manugtatap makilal-an gilayon sang tanan sa kongregasyon subong hamtong sa espirituwal nga mga lalaki, kag may matuod nga pag-ulikid sa panong sang Dios.

⁹ Ang mga kalipikado para matangdo subong manugtatap nagapakita sing praktikal nga kaalam sa ila pagkabuhi. Kon may asawa, dapat sundon sang manugtatap ang Cristianong talaksan para sa pag-asawahay, nga isa lang ang asawa, kag nagadumala sing maayo sa iya panimalay. Kon ang manugtatap may tumuluo nga mga anak nga serioso gid nga nagapasakop kag wala ginasumbong nga mapinatuyangon ukon rebelyuso, ang kongregasyon may pagsalig nga makapangayo sing laygay kag panugda sa ila parte sa pagkabuhi subong pamilya kag subong Cristiano. Ang manugtatap indi man salawayon kag hilway sa panumbungon kag may maayo man sia nga reputasyon bisan sa mga tawo nga indi bahin sang kongregasyon. Indi sia masumbong nga nagagawi sing indi nagakaigo nga makaguba sa reputasyon sang kongregasyon. Wala sia ginsabdong sining karon lang bangod sang mabug-at nga sala. Ang iban sa kongregasyon nagailog sa iya maayo nga halimbawa kag nalipay sa pagsalig sang ila espirituwal nga kaayuhan sa iya.—1 Cor. 11:1; 16:15, 16.

¹⁰ Ining kalipikado nga mga lalaki makaalagad sa Cristianong kongregasyon pareho sang ginahimo sang mga gulang sa Israel nga ginlaragway subong “maalam, mainandamon, kag may ikasarang.” (Deut. 1:13) Ang mga gulang indi himpit, pero kilala sila sa kongregasyon kag sa komunidad nga matarong kag mahinadlukon sa Dios nga madugay na nga nagapakita nga nagakabuhi sila suno sa diosnon nga mga prinsipio. Bangod wala sila sing kasawayan, may kahilwayan sila sa paghambal sa kongregasyon.—Roma 3:23.

¹¹ Ang mga lalaki nga kalipikado subong manugtatap nagapakita sing pagpugong sa kaugalingon kag makatarunganon sa ila pagpakig-angot sa iban. Indi sila mga panatiko. Sa baylo, ang ila pagkabuhi balanse kag may pagpugong sa kaugalingon. Ang ila pagpugong makita sa ila pagkaon, pag-inom, pagliwaliwa, paglingawlingaw, kag paglipaylipay. Ginapunggan nila ang ila kaugalingon sa sobra nga pag-inom sing alkoholiko nga ilimnon agod indi sila masumbong nga nagapahubog ukon palahubog. Ang isa nga naulipon sang makahulubog nga ilimnon madali madulaan sing pagpugong sa kaugalingon kag indi na makaatipan sa espirituwal nga intereses sang kongregasyon.

¹² Agod matatap ang kongregasyon, ang isa ka lalaki kinahanglan nga mahim-ong. Ang iya maayo nga pamatasan makita sa iya panagway, puluy-an, kag mga hilikuton kada adlaw. Wala sia nagapabuyanbuyan; makita niya kon ano ang ginakinahanglan kag nagaplano nahisanto sa sini. Ginasunod niya ang diosnon nga mga prinsipio.

¹³ Ang manugtatap dapat mangin makatarunganon. Makapanghikot sia sing nahiusa upod sa iban nga katapo sang hubon sang mga gulang kag nagakooperar sa ila. Dapat may nagakaigo sia nga pagtamod sa iya kaugalingon kag wala sia nagapaabot sing tuman sa iban. Subong makatarunganon nga tawo, indi dapat ipilit sang manugtatap ang iya opinyon, nga ginakabig ang iya mga pagtamod nga mas maayo sangsa kaupod niya nga mga gulang. Ang iban mahimo may nagalabaw nga mga kinaiya ukon ikasarang nga wala sa iya. Ang gulang makatarunganon kon ginabase gid niya sa Kasulatan ang iya ginasiling kag ginapanikasugan nga mailog ang halimbawa ni Jesucristo. (Fil. 2:2-8) Ang gulang indi palaaway ukon masingki kundi nagapakita sia sing nagakaigo nga pagtahod sa iban, nga nagakabig sa iban nga labaw sa iya. Indi sia puguso, nga ginainsister pirme nga dapat batunon ang iya paagi ukon pagtamod. Indi sia madali maakig, kundi mahidaiton sia sa pagpakig-angot sa iban.

¹⁴ Para mangin kalipikado ang isa sa pag-alagad subong manugtatap dapat man sia maligdong sing hunahuna. Nagakahulugan ini nga nagapamensar sia sing maayo, wala nagapadasudaso sa paghukom. Nahangpan niya sing maayo ang mga prinsipio ni Jehova kag kon paano ini iaplikar. Ang isa nga maligdong sing hunahuna mabinatunon sang laygay kag panuytoy. Indi sia salimpapaw.

¹⁵ Ginpahanumdom ni Pablo si Tito nga ang manugtatap dapat mahigugmaon sa maayo. Dapat sia mangin matarong kag mainunungon. Ini nga mga kinaiya makita sa iya pagpakig-angot sa iban kag sa iya malig-on nga panindugan kon ano ang matarong kag maayo. Mabakod ang iya debosyon kay Jehova kag pirme niya ginasunod ang matarong nga mga prinsipio. Masaligan sia sa kompidensial nga mga butang. Nagapakita man sia sing matuod nga pagkamaabiabihon, nga handa sa paghatag sang iya kaugalingon kag pagkabutang para sa kaayuhan sang iban.—Binu. 20:33-35.

¹⁶ Agod epektibo nga makaalagad subong manugtatap, kinahanglan mangin kalipikado sia sa pagpanudlo. Suno sa ginsiling ni Pablo kay Tito, ang manugtatap “nagapanguyapot sing malig-on sa matutom nga pulong may kaangtanan sa iya kalantip sa pagpanudlo, agod makapalig-on sia paagi sa maayo nga panudlo kag makasabdong sa mga nagahambal batok sa sini.” (Tito 1:9) Makahibalo sia mangatarungan, magpamatuod, magsabat sa mga pagpamatok, kag mag-aplikar sang Kasulatan nga makapakumbinsi sa iban kag makapabakod sang ila pagtuo. Ginapakita sang manugtatap ini nga ikasarang sa pagpanudlo sa maayo kag mabudlay nga panahon. (2 Tim. 4:2) May pagpailob sia sa pagsabdong nga may kalulo sa isa nga nakasala ukon sa pagkumbinsi sa nagaduhaduha kag pagpahulag sa iya sa paghimo sing maayo nga mga hilikuton nga nabase sa pagtuo. Bangod kalipikado sia sa pagtudlo sa atubangan sang tumalambong ukon sa isa ka indibiduwal, nagapakita ini nga nalab-ot sang manugtatap ining importante nga kinahanglanon.

¹⁷ Importante man nga makigbahin sing makugi sa ministeryo ang mga gulang. Dapat man nga nagatinguha sila sa pag-ilog kay Jesus, nga ginauna gid ang pagbantala sang maayong balita. Interesado si Jesus sa pagbulig sa iya mga disipulo nga mangin epektibo nga ebanghelisador. (Mar. 1:38; Luc. 8:1) Ang determinasyon sang mga gulang sa pagministeryo bisan pa masako sila sa ila mga hilikuton nagapalig-on sa bilog nga kongregasyon nga ipakita man ina nga kakugi. Kag kon kaupod sang mga gulang ang iya pamilya sa pagbantala kag ang iban sa kongregasyon, nagaresulta ini sa ‘pagpalig-unay.’—Roma 1:11, 12.

¹⁸ Tanan ini daw nagapakita nga mataas gid ang ginapaabot sa isa ka manugtatap. Pat-od gid nga wala sing manugtatap nga makasunod sing himpit sa mataas nga talaksan nga ginpahamtang sa Biblia, apang dapat mapakita sang gintangdo nga mga gulang sa kongregasyon sa nagakaigo nga kasangkaron ini nga mga kinaiya kay kon kulang gid sia sa isa sini nga mga kinaiya makabig ini nga daku nga kaluyahon. Ang pila ka gulang mahimo nga may tumalagsahon nga mga kinaiya, samtang ang iban naman maayo sa lain nga mga kinaiya. Bangod sini, makita sa hubon sang mga gulang ini tanan nga maayo nga kinaiya nga ginakinahanglan sa nagakaigo nga pagdumala sa kongregasyon sang Dios.

¹⁹ Kon ang mga gulang subong hubon nagarekomendar sing mga lalaki agod mangin mga manugtatap, dapat dumdumon nila ang ginsiling ni apostol Pablo: “Ginasilingan ko ang tagsatagsa sa inyo nga indi kamo magpakataas sa inyo kaugalingon, kundi ipakita ninyo nga may maligdong kamo nga panghunahuna suno sa pagtuo nga ginhatag sang Dios sa tagsatagsa sa inyo.” (Roma 12:3) Dapat tamdon sang kada gulang ang iya kaugalingon nga kubos. Dapat wala sing mangin “tuman ka matarong” kon nagausisa sa mga kalipikasyon sang iban. (Man. 7:16) Ginahunahuna sing maayo ang mga kinahanglanon sa Kasulatan para sa mga manugtatap, kinahanglan pat-uron sang hubon sang mga gulang kon bala nalab-ot sang utod ang mga talaksan sa makatarunganon nga kasangkaron. Ginahatagan nila sing konsiderasyon ang pagkadihimpit sang tawo kag ginalikawan ang pagdampig kag pagkasalimpapaw. Gani ang mga gulang nagarekomendar sa paagi nga nagapakita sing pagtahod sa mataas nga mga talaksan ni Jehova kag sa kaayuhan sang kongregasyon. Ginapangamuyuan kag ginabinagbinag nila sing maayo ang tagsa ka rekomendasyon kag ginasunod ang panuytoy sang balaan nga espiritu sang Dios. Isa ini sa ila serioso nga mga responsibilidad, kag dapat nila ini himuon suno sa laygay ni Pablo: “Indi magpadalidali sa pagtungtong sang imo mga kamot sa kay bisan sin-o.”—1 Tim. 5:21, 22.

²⁰ Ginapakita sang kalipikado sa espirituwal nga mga lalaki nga ginagiyahan sila sang balaan nga espiritu, kag ginapakita nila ang mga kinaiya sini sa ila pagkabuhi. Nagsiling si Pablo nga ang siam ka kinaiya nga ginapatubas sang espiritu amo ang “gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.” (Gal. 5:22, 23) Ini nga mga manugtatap makapaumpaw sa kauturan kag makapahiusa sa kongregasyon sa paghimo sang sagrado nga pag-alagad. Ang ila paggawi kag ang resulta sang ila pagpangabudlay nagapakita nga gintangdo sila sang balaan nga espiritu.—Binu. 20:28.

²¹ Importante gid nga ang mga gulang magabuligay sa pagpasanyog sang paghiusa sa kongregasyon. Mahimo nga magkatuhay gid ang ila mga personalidad, pero ginaamligan nila ang paghiusa sang hubon paagi sa pagpamati sing matinahuron sa isa kag isa, bisan pa mahimo nga wala sila nagaugyon sa tagsa ka butang nga ila ginahambalan. Mientras wala sing nalapas nga prinsipio sa Biblia, ang tagsatagsa dapat handa magpasugot kag magsakdag sa desisyon sang hubon sang mga gulang. Ang pagpasugot nagapakita nga ang isa ginagiyahan sang “kaalam nga halin sa langit,” nga “mahidaiton, makatarunganon.” (Sant. 3:17, 18) Wala sing gulang ang dapat maghunahuna nga mas labaw sia sangsa iban, kag wala sing gulang ang dapat magtinguha sa pagdominar sa iban. Ang mga gulang nagakooperar gid kay Jehova kon nagabuligay sila subong hubon para sa kaayuhan sang kongregasyon.—1 Cor., kap. 12; Col. 2:19.

²² Ang hamtong nga Cristianong mga lalaki dapat magtinguha nga mangin manugtatap. (1 Tim. 3:1) Apang, ang pag-alagad subong gulang nagakinahanglan sing pagpanghikot kag pagsakripisyo. Nagakahulugan ini nga handa ang isa sa pag-alagad sa mga kinahanglanon sang kauturan, nga nagaatipan sang ila espirituwal nga mga kaayuhan. Ang pagtinguha nga mangin manugtatap nagakahulugan sang pagpanikasog para malab-ot ang mga kalipikasyon nga ginsambit sa Kasulatan.

²³ Ang utod nga nag-alagad sing matutom sa madugay na nga tion mahimo nga magmasakit ukon magluya ang lawas. Ayhan bangod sang katigulangon, indi na niya maatipan ang iya mga responsibilidad subong manugtatap. Bisan pa sa sini, dapat gihapon sia tahuron kag tamdon subong gulang samtang tinangdo pa sia. Indi kinahanglan nga mag-untat sia sa iya katungdanan bangod sang iya mga limitasyon. Takus gihapon sia padunggan sing doble nga ginahatag sa tanan nga mapisan nga mga gulang nga nagaalagad sa bug-os nila nga masarangan sa pagbantay sa panong.

²⁴ Apang kon ang isa ka utod nagabatyag nga labing maayo para sa iya nga mag-untat sa iya katungdanan bangod nagbag-o ang iya kahimtangan kag limitado na ang iya ikasarang sa pag-alagad, puede niya ini himuon. (1 Ped. 5:2) Dapat gihapon sia tahuron. Madamo sia sing mahimo sa kongregasyon, bisan pa wala na sia sing mga asaynment kag katungdanan nga ginahatag sa mga gulang.

²⁵ Ang mga gulang nagatatap sing lainlain nga responsibilidad sa kongregasyon. May koordenitor sang hubon sang mga gulang, sekretaryo, manugtatap sang pag-alagad, konduktor sa Pagtinuon sa Ang Lalantawan, kag manugtatap sang Pagkabuhi kag Pagministeryo nga Miting. Ang madamo nga gulang, nagaalagad subong manugtatap sang grupo. Ang mga gulang nagapangalagad sa sini nga katungdanan sa sulod sang wala napat-od nga tion. Siempre, kon ang utod magsaylo, indi na makasarang sa pagtatap sang iya mga responsibilidad bangod sa pagbalatian, ukon indi na kalipikado bangod wala na niya nalab-ot ang mga kinahanglanon sa Kasulatan, dapat magpili sing iban nga gulang para mag-uyat sini nga katungdanan. Sa mga kongregasyon nga gamay lang ang manugtatap, mahimo nga kinahanglan uyatan sang isa ka gulang ang sobra sa isa ka katungdanan tubtob may kalipikado nga mga utod nga matangdo subong mga gulang.

²⁶ Ang koordenitor sang hubon sang mga gulang amo ang tsirman sa miting sang hubon sang mga gulang. Mapainubuson sia nga nagapanghikot upod sa iban nga gulang sa pag-atipan sa panong sang Dios. (Roma 12:10; 1 Ped. 5:2, 3) Dapat maayo sia mag-organisar kag maukod sa pagdumala.—Roma 12:8.

²⁷ Ang sekretaryo amo ang nagauyat sang mga rekord sang kongregasyon kag nagapahibalo sa mga gulang tuhoy sa importante nga mga sulat. Kon kinahanglanon, mahimo tangduan nga magbulig sa iya ang isa pa ka gulang ukon isa ka sangkol nga ministeryal nga alagad.

²⁸ Ang mga kahimusan para sa pag-alagad sa latagon kag iban pa nga butang may kaangtanan sa pagbantala ginaatipan sang manugtatap sang pag-alagad. Nagaiskedyul sia sing regular nga pagduaw sa tanan nga grupo sang pag-alagad sa latagon agod nga sa isa ka talipuspusan sang semana kada bulan, mabisita niya ang lainlain nga grupo. Sa gamay nga kongregasyon nga may pila lang ka grupo sang pag-alagad, mahimo niya mabisita ang tagsa ka grupo sing makaduha sa isa ka tuig. Sa tion sang iya pagbisita, sia ang magadumala sang mga miting para sa pag-alagad sa latagon, magapanghikot upod sa grupo, kag buligan niya ang mga manugbantala sa ila mga pagduaw liwat kag pagtuon sa Biblia.

²⁹ Ang isa ka maayo gid nga pribilehiyo sa kongregasyon amo ang pag-alagad subong manugtatap sang grupo. Ang iya mga responsibilidad nagalakip sang (1) pagtatap sa espirituwalidad sang tagsa ka miembro sang grupo sang pag-alagad sa latagon; (2) pagbulig sa tagsa ka miembro sang grupo para mangin regular, epektibo, kag malipayon sa pagministeryo; kag (3) pagbulig kag paghanas sa mga ministeryal nga alagad sa grupo nga magtinguha kag mangin kalipikado sa mga responsibilidad sa kongregasyon. Binagbinagon sang hubon sang mga gulang kon sin-o ang labing kalipikado sa pagtatap sa sini nga asaynment.

³⁰ Bangod serioso ini nga asaynment, kon posible, dapat gulang ang manugtatap sang grupo. Ukon mahimo ini iasayn sa sangkol nga ministeryal nga alagad tubtob nga may gulang na nga magabulos sa iya. Ang ministeryal nga alagad nga itangdo sa sini nga katungdanan tawgon nga alagad sang grupo, bangod indi sia manugtatap sang kongregasyon. Sa baylo, manghikot sia sa panuytoy sang mga gulang sa pag-atipan sang iya responsibilidad.

³¹ Ang importante nga bahin sa katungdanan sang manugtatap sang grupo amo ang pagpanguna sa pagministeryo. Ang iya regular nga pagpakigbahin, kakugi, kag kapagsik nagapalig-on sa iya kaupod sa grupo. Bangod ginaapresyar sang mga manugbantala ang pagpalig-on kag bulig nga nagahalin sa pag-inupdanay, mas maayo kon maghimo sing iskedyul sa pagbantala sang grupo nga kombeniente sa kalabanan. (Luc. 10:1-16) Kinahanglan pat-uron sang manugtatap nga pirme may bastante nga teritoryo. Kinaandan na nga sia ang magadumala sang miting para sa pag-alagad sa latagon kag organisahon ang mga manugbantala para sa hilikuton sa sina nga adlaw. Kon wala sia, dapat sia maghimo sing kahimusan nga may iban nga gulang, ministeryal nga alagad, kag kon wala, isa ka kalipikado nga manugbantala ang magatungod sa sini nga mga responsibilidad agod mahatag ang kinahanglanon nga panuytoy sa mga manugbantala.

³² Dapat magplano sing abanse ang manugtatap sang grupo sa pagbisita sang manugtatap sang pag-alagad. Ipahibalo niya sa iya grupo ang pagduaw, kag pukawon ang ila kalangkag sa mga benepisyo sini. Kon mahibaluan sang grupo ang kahimusan, mapagsik nila ini nga suportahan.

³³ Ang tagsa ka grupo sang pag-alagad dapat huptan nga gamay lang. Magatugot ini sa manugtatap sang grupo nga makilala sing maayo ang mga naasayn sa iya grupo. Ang mahigugmaon nga manugbantay interesado gid sa kada isa sa ila. Nagapanikasog sia sa paghatag sing personal nga bulig kag pagpalig-on para sa pagministeryo kag pagsuporta sa mga miting sang kongregasyon. Ginatinguhaan man niya nga mabuligan ang kada isa nga magpabilin nga mabakod sa espirituwal. Ang mga nagamasakit ukon napung-awan makabenepisyo sa iya pagduaw. Ang pagpalig-on ukon laygay mahimo magpahulag sa pila nga tinguhaan ang dugang nga pribilehiyo sa kongregasyon para mabuligan gid nila ang ila mga utod. Ang kalabanan nga hilikuton sang manugtatap sang grupo amo ang pagbulig sa miembro sang iya grupo. Pero, subong gulang kag manugbantay, mahigugmaon sia nga nagakabalaka sa tanan sa kongregasyon kag handa sa pagbulig sa mga nagakinahanglan.—Binu. 20:17, 28.

³⁴ Ang isa ka responsibilidad sang manugtatap sang grupo amo ang pagtipon sang report sang pag-alagad sa latagon sang iya grupo. Ini nga report ginahatag sa sekretaryo. Mahimo makabulig sa manugtatap sang grupo ang mga manugbantala paagi sa paghatag gilayon sang ila report sang pag-alagad sa latagon. Mahimo nila ini paagi sa direkta nga paghatag sang ila report sa manugtatap sang grupo kada katapusan sang bulan ukon paghulog sini sa kahon sa Kingdom Hall nga napartiniser para sa report sang pag-alagad.

³⁵ May pila ka katungdanan nga ginatatap sang Komite sang Pag-alagad sang Kongregasyon, nga ginatapuan sang koordenitor sang hubon sang mga gulang, sekretaryo, kag manugtatap sang pag-alagad. Halimbawa, ginaaprobahan sang komite sang pag-alagad ang paggamit sang Kingdom Hall para sa kasal kag lubong kag sila ang nagaasayn sang mga manugbantala sa mga grupo sang pag-alagad sa latagon. Ginaaprobahan man nila ang mga aplikasyon para sa pagregular kag pag-auxiliary payunir kag iban pa nga bahin sang pag-alagad. Ang komite sang pag-alagad nagapanghikot sa panuytoy sang hubon sang mga gulang.

³⁶ Ang espesipiko nga mga katungdanan sini nga mga utod—lakip ang konduktor sa Pagtinuon sa Ang Lalantawan, manugtatap sang Pagkabuhi kag Pagministeryo nga Miting, kag iban pa nga nagahuman sa hubon sang mga gulang—ginahatag sang sanga talatapan.

³⁷ Ang hubon sang mga gulang sa tagsa ka kongregasyon regular nga nagamiting para binagbinagon ang mga butang may kaangtanan sa espirituwal nga pag-uswag sang kongregasyon. Dugang sa miting sang mga gulang sa tion sang pagduaw sang manugtatap sang sirkito, ini nga miting dapat hiwaton man mga tatlo ka bulan sa tapos sang tagsa ka pagduaw sang manugtatap sang sirkito. Siempre pa, mahimo nga magmiting ang mga gulang sa bisan ano nga tion kon kinahanglanon.

³⁸ Ang mga manugtatap indi himpit pero ang tanan sa kongregasyon ginapalig-on nga mangin mapinasakupon sa ila bangod kahimusan ini ni Jehova. Manabat sa Iya ang mga manugtatap sa ila ginahimo. Ginarepresentar nila sia kag ang iya teokratiko nga paggahom. Ang Hebreo 13:17 nagasiling: “Mangin matinumanon sa mga nagapanguna sa inyo kag mangin mapinasakupon, kay ginabantayan nila kamo subong nga sila ang manabat, agod himuon nila ini nga may kalipay kag wala nagapanghayhay, kay makahalit ini sa inyo.” Subong nga ginagamit ni Jehova ang iya balaan nga espiritu sa pagtangdo, gamiton man niya ini sa pagtaktak sa isa subong manugtatap kon mapaslawan sia sa pagpakita sang mga kinaiya sang espiritu kag ang iya pagkabuhi wala nakalab-ot sa mga kinahanglanon sa Kasulatan.

³⁹ Ginaapresyar gid bala naton ang pagpangabudlay kag maayo nga halimbawa sang mga manugtatap sang kongregasyon? Sang nagsulat si Pablo sa kongregasyon sang Tesalonica, ginpalig-on niya ang kauturan: “Ginapangabay namon kamo, mga kauturan, nga tahuron ninyo ang mga nagapangabudlay sing lakas para sa inyo kag nagadumala sa hilikuton sang Ginuo kag nagalaygay sa inyo; ipakita sa ila ang labaw sa kinaandan nga kaayo lakip ang gugma bangod sa ila buluhaton.” (1 Tes. 5:12, 13) Ang kalabanan nga pagpangabudlay sang mga manugtatap sang kongregasyon nagapahapos kag nagapahalipay sa aton pag-alagad sa Dios. Sa iya nahauna nga sulat kay Timoteo, si Pablo nagsambit man sang mga panimuot nga dapat palambuon sang mga yara sa kongregasyon sa mga manugtatap, nga nagasiling: “Ang mga gulang nga nagadumala sa maayo nga paagi kabigon nga takus padunggan sing doble, ilabi na ang mga nagapangabudlay sing lakas sa paghambal kag pagpanudlo tuhoy sa pulong.”—1 Tim. 5:17.

⁴⁰ Kon kaisa, ang pila ka gulang ginatangdo nga mangin miembro sang mga Patient Visitation Group. Ang iban naman nagaalagad subong miembro sang mga Hospital Liaison Committee kag nagabisita sa mga ospital kag mga doktor para palig-unon nga padayunon kag pasangkaron ang pagbulong sa mga Saksi ni Jehova nga wala nagagamit sing dugo. Ang iban nga manugtatap nagapauswag sang intereses sang Ginharian paagi sa pagbulig sa pagpatindog kag pagmentinar sang mga Kingdom Hall ukon paagi sa pag-alagad subong miembro sang mga Komite sang Kombension. Ginaapresyar gid sang tanan sa organisasyon ang pagpangabudlay sini nga mga utod kag ang ila kahanda sa paggamit sang ila kaugalingon sa sini nga paagi. Sa pagkamatuod, ‘padayon naton nga ginapalangga ang subong sina nga mga tawo.’—Fil. 2:29.

⁴¹ Ang Nagadumala nga Hubon nagahimo sing kahimusan sa pagtangdo sang kalipikado nga mga gulang subong mga manugtatap sang sirkito. Ginaasayn sila sang sanga talatapan sa pagduaw sa mga kongregasyon sa ila mga sirkito, nga sa masami sing makaduha sa isa ka tuig. Regular man nila nga ginaduaw ang mga payunir sa naligwin nga mga teritoryo. Sila ang nagahimo sang ila iskedyul kag abanse nga ginapahibalo ini sa kada kongregasyon agod mangin mapuslanon gid ang pagduaw.

⁴² Ginapangunahan sang koordenitor sang hubon sang mga gulang ang paghimo sing mga kahimusan sa tion sang pagduaw agod ang tanan mapaumpawan sa espirituwal. (Roma 1:11, 12) Pagkatapos mabaton ang pahibalo parte sa pagduaw kag ang impormasyon tuhoy sa mga kinahanglanon sang manugtatap sang sirkito kag (kon minyo) sang iya asawa, ang koordenitor nagahimo sing mga kahimusan sa bulig sang kauturan agod mahanda ang mga dalayunan kag iban pa nga kinahanglanon. Ginapat-od niya nga ang tanan, lakip ang manugtatap sang sirkito, napahibalo sini nga mga kahimusan.

⁴³ Kontakon sang manugtatap sang sirkito ang koordenitor sang hubon sang mga gulang parte sa iskedyul sang mga miting, lakip ang mga miting para sa pag-alagad sa latagon. Himuon ini nahisanto sa mga panugda sang manugtatap sang sirkito kag sang direksion gikan sa sanga talatapan. Ang tanan dapat pahibaluon sing abanse tuhoy sa oras kag duog nga pagahiwatan sang mga miting sang kongregasyon, sang mga payunir, kag sang mga gulang kag ministeryal nga alagad, subong man ang oras kag ang lugar nga pagahiwatan sang mga miting para sa pag-alagad sa latagon.

⁴⁴ Sa Martes sang hapon, usisaon sang manugtatap sang sirkito ang Congregation’s Publisher Records, rekord parte sa tumalambong sang mga miting, teritoryo, kag mga kuenta. Magahatag ini sa iya sing ideya kon ano ang posible nga kinahanglanon sang kongregasyon kag mahimo niya mabuligan ang mga nagatatap sa sini nga mga rekord. Dapat magahimo sing kahimusan ang koordenitor sang hubon sang mga gulang para mabaton sang manugtatap sang sirkito ang mga rekord sing abanse.

⁴⁵ Sa iya pagduaw, ang manugtatap sang sirkito nagahinguyang sing tion agod masugilanon sing personal ang kauturan sa bug-os niya nga masarangan—sa mga miting, sa pag-alagad sa latagon, sa tion sang pagkaon, kag sa iban pa nga tion. Dugang pa, mitingon niya ang mga gulang kag ministeryal nga alagad, nga nagapaambit sang nagakaigo nga laygay sa Kasulatan, mga panugda, kag pagpalig-on nga magabulig sa ila sa pag-atipan sang ila mga responsibilidad sa pagbantay sang panong nga ila ginaatipan. (Hulu. 27:23; Binu. 20:26-32; 1 Tim. 4:11-16) Mitingon man niya ang mga payunir agod palig-unon sila sa ila hilikuton kag hatagan sila sing personal nga bulig parte sa bisan ano nga problema nila sa pagministeryo.

⁴⁶ Kon may iban pa nga kinahanglan talupangdon, himuon sang manugtatap sang sirkito ang iya bug-os nga masarangan para mabuligan sila sa sina nga semana. Kon indi ini matapos sa sina nga tion, mahimo buligan sang manugtatap sa sirkito ang mga gulang ukon ang mga indibiduwal sa pagpanalawsaw kon ano nga panuytoy sa Kasulatan ang maaplikar. Kon may dugang pa nga dapat himuon ang sanga talatapan, sia kag ang mga gulang magapadala sa sanga talatapan sing detalyado nga report parte sini.

⁴⁷ Samtang nagaduaw sa kongregasyon, ginatambungan sang manugtatap sang sirkito ang regular nga mga miting sang kongregasyon. Mahimo ini bag-uhon kon kaisa nahisanto sa panuytoy sang sanga talatapan. Magahatag sia sing mga pamulongpulong agod palig-unon, pahulagon, tudluan, kag pabakuron ang kongregasyon. Panikasugan niya nga pabakuron ang gugma kag apresasyon kay Jehova, kay Jesucristo, kag sa organisasyon.

⁴⁸ Ang isa sa mga tulumuron sang pagduaw sang manugtatap sang sirkito amo ang pagpalig-on sa makugi nga pagministeryo kag paghatag sing praktikal nga mga panugda. Mahimo madamo sa kongregasyon ang makabag-o sang ila iskedyul agod makapakigbahin sing bug-os sa pag-alagad sa latagon sa sina nga semana, ayhan paagi sa pag-aplay subong auxiliary payunir sa bulan sang iya pagduaw. Mahimo makapangabay ang bisan sin-o nga gusto mag-upod sa iya ukon sa iya asawa. Madamo sing benepisyo kon maupod mo ang manugtatap sang sirkito ukon ang iya asawa sa mga pagtuon sa Biblia kag pagduaw liwat. Ginaapresyar gid ang imo dugang nga panikasog agod suportahan sing bug-os ini nga bahin sang semana sang pagduaw.—Hulu. 27:17.

⁴⁹ Kada tuig, duha ka sirkito nga asembleya ang ginahiwat sa kada sirkito. Ang manugtatap sang sirkito amo ang responsable sa pagpanghikot sang assembly organization sa sini nga mga pagtilipon. Nagatangdo sia sang manugtatap sang asembleya kag sang kabulig nga manugtatap sang asembleya. Nagapanghikot sila upod sa iya para tatapon ang mga kahimusan sa asembleya. Daku ini nga bulig sa manugtatap sang sirkito para mas mahatagan niya sing atension ang programa sang asembleya. Ang manugtatap sang sirkito nagapili man sang iban pa nga sangkol nga lalaki sa pag-atipan sa lainlain nga departamento. Nagahimo man sia sing kahimusan agod ma-awdit ang kuenta sang sirkito sa tapos sang tagsa ka asembleya. Magaalagad ang isa ka tiglawas sang sanga sa isa ka sirkito nga asembleya kada tuig subong nagaduaw nga humalambal. Bangod sang kalayuon ukon sang gamay nga pasilidad para sa asembleya, ginatunga sang pila ka sirkito ang ila sirkito nga asembleya.

⁵⁰ Ang manugtatap sang sirkito direkta nga nagareport sang iya pag-alagad sa latagon sa sanga talatapan sa katapusan sang bulan. Kon may nagasto sia—subong sang pamasahe, pagkaon, dalayunan, kag iban pa nga kinahanglanon agod mahimo niya ang iya hilikuton—kag kon indi ini maulian sang kongregasyon nga iya ginaduaw, mahimo niya ini isumiter sa sanga talatapan. Ang mga nagalakbay nga tiglawas nagasalig nga kon unahon nila ang intereses sang Ginharian ni Jehova, iaman ang ila materyal nga mga kinahanglanon, suno sa ginsaad ni Jesus. (Luc. 12:31) Dapat mangin maabtik ang mga kongregasyon sa ila pribilehiyo nga abiabihon ining mapisan nga mga gulang nga nagaalagad sa ila.—3 Juan 5-8.

⁵¹ Sa kada sanga talatapan sang mga Saksi ni Jehova sa bug-os nga kalibutan, tatlo ukon kapin pa ka kalipikado kag hamtong sa espirituwal nga mga utod ang nagaalagad subong Komite sang Sanga agod matatap ang pagbantala nga hilikuton sa pungsod ukon mga pungsod nga sakop sini. Ang isa sa mga miembro sang komite nagaalagad subong koordenitor sang Komite sang Sanga.

⁵² Ang mga miembro sang Komite sang Sanga nagaatipan sang mga butang may kaangtanan sa tanan nga kongregasyon sa ila teritoryo. Ginatatap sang komite ang pagbantala sang maayong balita sang Ginharian sa bilog nga teritoryo sang sanga kag ginapat-od nga ang mga kongregasyon kag mga sirkito maorganisar para matatap sing nagakaigo ang mga kinahanglanon sa latagon. Ang Komite sang Sanga nagahatag man sing igtalupangod sa hilikuton sang mga misyonero sa latagon, kag sang mga espesyal, regular, kag auxiliary payunir. Kon may mga asembleya kag mga kombension, ang komite nagahimo sing mga kahimusan kag mga asaynment agod mapat-od nga ‘mahimo ang tanan sing nagakaigo kag suno sa kahimusan.’—1 Cor. 14:40.

⁵³ Ang Komite sang Pungsod gintangdo sa pila ka kadutaan nga ginatatap sang Komite sang Sanga sa iban nga pungsod. Nagabulig ini agod madumalahan sing maayo ang hilikuton sa ginaalagaran sang Komite sang Pungsod. Ginaatipan sini ang mga hilikuton sa Bethel Home kag opisina, ginatatap ang mga sulat kag mga report, kag ang mga hilikuton sa latagon. Ang Komite sang Pungsod nagakooperar sa Komite sang Sanga para sa pagpauswag sang intereses sang Ginharian.

⁵⁴ Ang Nagadumala nga Hubon ang nagatangdo sang mga magaalagad subong miembro sang mga Komite sang Sanga kag mga Komite sang Pungsod.

⁵⁵ Sa tion kag tion, ang Nagadumala nga Hubon nagahimo sing kahimusan agod maduaw sang kalipikado nga mga utod ang kada sanga sa bug-os nga duta. Ang utod nga nagaalagad sa sini nga pribilehiyo ginatawag nga tiglawas sang ulong talatapan. Ang iya panguna nga hilikuton amo ang pagpalig-on sa pamilya Bethel kag pagbulig sa Komite sang Sanga sa ila posible nga mga problema ukon mga pamangkot parte sa pagbantala kag paghimo sing disipulo nga hilikuton. Magapakigkita man sia sa ginpili nga mga manugtatap sang sirkito kag sa pila ka tion sa mga misyonero sa latagon nga nagapanghikot sa idalom sang sanga nga iya ginaduaw. Kon ginahimo ini, ginasugilanon niya sila tuhoy sa ila mga problema kag mga kinahanglanon, nga nagahatag sing kinahanglanon nga pagpalig-on parte sa ila pinakaimportante nga hilikuton, nga amo ang pagbantala sang Ginharian kag paghimo sing disipulo.

⁵⁶ Interesado man ang tiglawas sang ulong talatapan sa nahimo sa latagon parte sa pagbantala sang Ginharian kag sa iban pa nga hilikuton sang kongregasyon. Kon may tion pa, bisitahon man niya ang mga remote translation office. Kon ginaduaw sang tiglawas sang ulong talatapan ang sanga talatapan, tubtob sa iya masarangan, nagapakigbahin man sia sa pagbantala sang Ginharian.

⁵⁷ Nagabenepisyo gid kita sa pagpangabudlay kag mahigugmaon nga pag-atipan sang hamtong nga Cristianong mga lalaki. Samtang padayon kita nga nagapasakop sa gintangdo nga mga manugtatap nga gintulinan sa pagbantay sa panong, nahiusa kita sa Ulo sang kongregasyon, si Cristo Jesus. (1 Cor. 16:15-18; Efe. 1:22, 23) Subong resulta, ang espiritu sang Dios magaimpluwensia sa tanan nga kongregasyon sa bilog nga kalibutan, kag ang Pulong sang Dios magagiya sa hilikuton sa bug-os nga duta.—Sal. 119:105.