Mga Ministeryal nga Alagad nga Nagahimo sing Mapuslanon nga Pag-alagad

SI APOSTOL Pablo nagsulat sa kongregasyon sa Filipos: “Halin kay Pablo kag kay Timoteo, nga mga ulipon ni Cristo Jesus, para sa tanan nga balaan nga yara sa Filipos nga nahiusa kay Cristo Jesus, upod sa mga manugtatap kag mga ministeryal nga alagad.” (Fil. 1:1) Talupangda nga gintamyaw niya ang mga ministeryal nga alagad. Ini nga mga lalaki maathag nga may importante nga katungdanan sa pagbulig sa mga gulang sa kongregasyon sadto. Amo man sa aton tion. Ginabuligan nila ang mga manugtatap para mangin mahim-ong ang kongregasyon.

² Kilala mo bala ang mga ministeryal nga alagad sa inyo kongregasyon? Nahibaluan mo bala ang ila ginahimo para sa imo kaayuhan kag sa bug-os nga kongregasyon? Ginaapresyar gid ni Jehova ang ila mga panikasog. Si Pablo nagsulat: “Ang mga lalaki nga nagaalagad sa maayo nga paagi makatigayon sang maayo nga tindog kag daku nga kahilwayan sa paghambal tuhoy sa ila pagtuo kay Cristo Jesus.”—1 Tim. 3:13.

³ Ang mga ministeryal nga alagad ginapaabot nga magkabuhi sing matadlong subong mga Cristiano, mangin responsable, kag magaatipan sing maayo sang ila mga asaynment. Maathag gid ini kon binagbinagon naton ang ginsiling ni Pablo sa iya sulat kay Timoteo parte sa ila mga kalipikasyon: “Ang mga ministeryal nga alagad dapat mangin serioso, indi duha sing hinambalan, indi palainom sing alak, wala nagatinguha nga mamentaha sa makagod kag indi bunayag nga paagi, kag matutom nga nagasunod sa sagrado nga likom sang pagtuo upod ang matinlo nga konsiensia. Dapat man sila tilawan anay kon bala takus sila; kag kon hilway sila sa panumbungon, mahimo sila mag-alagad subong mga ministro. Ang mga ministeryal nga alagad dapat isa lang ang asawa, kag nagadumala sing maayo sa ila mga anak kag panimalay.” (1 Tim. 3:8-10, 12) Ang pagpahamtang sang mataas nga talaksan para sa mga ministeryal nga alagad magaamlig sa kongregasyon batok sa akusasyon parte sa sahi sang mga lalaki nga ginasaligan sang pinasahi nga mga responsibilidad.

⁴ Pamatan-on man ukon tigulang, ang mga ministeryal nga alagad aktibo sa ministeryo kada bulan. Bilang pag-ilog kay Jesus, makugi sila sa pagministeryo. Paagi sa ila kakugi, ginapakita nila ang interes ni Jehova nga luwason ang katawhan.—Isa. 9:7.

⁵ Ang mga ministeryal nga alagad huwaran man sa ila pamayo, pamustura, panghambal, panimuot, kag paggawi. Maligdong ang ila hunahuna, amo nga ginatahod sila sang iban. Isa pa, ginakabig nila nga importante gid ang ila kaangtanan kay Jehova kag ang ila mga pribilehiyo sa pag-alagad sa kongregasyon.—Tito 2:2, 6-8.

⁶ Ini nga mga lalaki ‘natilawan kon bala takus sila.’ Bisan antes pa nila nabaton ang pagtangdo sa ila, ginpamatud-an nila nga dedikado gid sila. Ginpakita nila nga ginauna nila ang intereses sang Ginharian kag ginatinguhaan nga malab-ot ang mga pribilehiyo sa pag-alagad nga bukas para sa ila. Mga huwaran gid sila nga dapat ilugon sang iban sa kongregasyon.—1 Tim. 3:10.

⁷ Ang mga ministeryal nga alagad nagahimo sing lainlain nga praktikal nga pag-alagad para sa kauturan, gani makahinguyang sing mas madamo nga tion ang mga manugtatap sa ila responsibilidad nga pagtudlo kag pagbantay. Kon ginahatagan sila sang mga asaynment, ginabinagbinag sang hubon sang mga gulang ang ila indibiduwal nga mga ikasarang kag ang mga kinahanglanon sang kongregasyon.

⁸ Binagbinaga ang pila sa ila ginahimo: Ang isa ka ministeryal nga alagad mahimo iasayn sa pagtatap sang literatura agod makakuha kita sini para magamit naton sing personal kag sa ministeryo. Ang iban naman gin-asayn sa pag-atipan sang mga rekord sang kuenta ukon teritoryo sang kongregasyon. Ang pila gin-asayn sa pagtatap sa mga mikropono, mangin opereytor sang sound, mangin atendant, kag magbulig sa mga gulang sa iban nga paagi. Daku nga hilikuton ang pagmentinar sa Kingdom Hall kag paghupot sini nga matinlo, gani masami nga ginapangabay ang mga ministeryal nga alagad nga magbulig sa pagtatap sini.

⁹ Sa pila ka kongregasyon, posible nga lainlain nga ministeryal nga alagad ang maasayn sa tagsa ka katungdanan. Sa iban naman, mahimo nga madamo sing asaynment ang isa ka ministeryal nga alagad. Sa pila ka kahimtangan, sobra sa isa ka ministeryal nga alagad ang nagatatap sa isa ka hilikuton. Kon wala sing bastante nga ministeryal nga alagad sa pagtatap sang pila sa sini nga mga responsibilidad ang hubon sang mga gulang magahimo sing kahimusan agod ipatatap sa iban nga huwaran kag bawtismado nga mga utod nga lalaki ini nga hilikuton. Paagi sini, makatigayon sila sing mapuslanon nga eksperiensia kon mangin kalipikado sila sa ulihi nga matangdo subong mga ministeryal nga alagad. Kon wala sing utod nga lalaki nga magamit, ang huwaran nga utod nga babayi mahimo pangabayon nga magbulig, bisan pa indi sila matangdo subong ministeryal nga alagad. Makabig ang isa nga huwaran kon ang iya paggawi kag pagsimba takus nga ilugon. Ang iya pagtambong sa miting, pagpakigbahin sa ministeryo, pagkabuhi sang pamilya, ginapili nga mga kalingawan, pamayo kag pamustura, kag iban pa maayo nga halimbawa para sa iban.

¹⁰ Sa mga kongregasyon nga may pila lang ka gulang, ang sangkol nga mga ministeryal nga alagad mahimo pangabayon sa pagrepaso sang mga pamangkot parte sa mga doktrina para sa mga magapabawtismo. Makita ini sa Apendise “Bahin 1: Ang Ginapatihan sang mga Cristiano.” Bangod ang “Bahin 2: Cristianong Pagkabuhi” nagadalahig sing sensitibo kag personal nga mga butang, dapat binagbinagon ini sang isa ka gulang.

¹¹ Kon may maayo nga rason, mahimo nga makita sang hubon sang mga gulang nga mapuslanon nga magbayluhanay sang pila ka asaynment ang mga ministeryal nga alagad kon kaisa. Apang, may daku nga bentaha kon uyatan sang mga utod ang amo gihapon nga mga asaynment sa malawig nga tion agod mangin eksperiensiado kag lantip sila sa sini.

¹² Depende sa kahimtangan sang kongregasyon, mahimo itangdo ang iban pa nga hilikuton sa mga ministeryal nga alagad nga ang “pag-uswag makita sang tanan nga tawo.” (1 Tim. 4:15) Kon wala sing bastante nga mga gulang, mahimo iasayn ang ministeryal nga alagad subong kabulig sang manugtatap sang grupo, ukon sa pila ka kahimtangan, subong alagad sang grupo, nga nagapanghikot sing suod sa panuytoy sang mga gulang. Mahimo hatagan ang mga ministeryal nga alagad sing pila ka bahin sa Pagkabuhi kag Pagministeryo nga Miting, lakip ang pagkondukta sang Pagtinuon sang Kongregasyon sa Biblia kon kinahanglanon, kag sa paghatag sing mga pamulongpulong publiko. Mahimo hatagan sing iban pa nga pribilehiyo ang mga ministeryal nga alagad kon may partikular nga kinahanglanon kag kon nalab-ot nila ang mga kinahanglanon para sa sina nga asaynment. (1 Ped. 4:10) Sa pagbulig sa mga gulang, dapat kinabubut-on nga ihatag sang mga ministeryal nga alagad ang ila kaugalingon.

¹³ Bisan pa nga ang ila hilikuton tuhay sa hilikuton sang mga gulang, sagrado ini nga pag-alagad sa Dios kag importante para sa mahim-ong nga pagpanghikot sang kongregasyon. Sa ulihi, kon ginatuman sing maayo sang mga ministeryal nga alagad ang ila mga obligasyon kag mangin kalipikado nga mag-alagad subong mga manugbantay kag manunudlo, mahimo sila irekomendar subong mga gulang.

¹⁴ Kon tin-edyer ka nga utod nga lalaki ukon bag-o lang nabawtismuhan, ginatinguhaan mo bala nga makalipikar subong ministeryal nga alagad? (1 Tim. 3:1) Madamo ang nagasulod sa kamatuoran kada tuig, gani kinahanglan ang kalipikado nga mga lalaki sa pag-atipan sang mga katungdanan sa kongregasyon. Makatinguha ka paagi sa pagpalambo sang handum nga buligan ang iban. Ang isa ka paagi para mahimo ini amo ang pagpamalandong sa maayo nga halimbawa ni Jesus. (Mat. 20:28; Juan 4:6, 7; 13:4, 5) Magabaskog ang imo handum samtang mabatyagan mo ang kalipay sa paghatag sa iban. (Binu. 20:35) Gani, magboluntaryo sa pagbulig sa iban, sa pagmentinar sang Kingdom Hall, ukon pagtal-us sa asaynment sang estudyante sa tion sang Pagkabuhi kag Pagministeryo nga Miting. Ang pagtinguha nagalakip sa pagpalambo sang espirituwal nga mga kinaiya paagi sa maayo nga rutina sa personal nga pagtuon. (Sal. 1:1, 2; Gal. 5:22, 23) Isa pa, ang utod nga nagatinguha nagapakita nga masaligan kag matutom kon ginahatagan sia sing mga asaynment sa kongregasyon.—1 Cor. 4:2.

¹⁵ Ang mga ministeryal nga alagad gintangdo sang balaan nga espiritu para sa kaayuhan sang kongregasyon. Ang tanan sa kongregasyon makapakita sing apresasyon sa pagpangabudlay sang mga ministeryal nga alagad paagi sa pagkooperar sa ila samtang ginatatap nila ang ila mga asaynment. Sa sining paagi, mapakita sang kongregasyon ang ila apresasyon sa aman ni Jehova agod mahuptan nga mahim-ong ang panimalay.—Gal. 6:10.