Ngaa Dapat Naton Tanan Dayawon Ang Dios?

HALLELUJAH! Ining mga tinaga bantog sa kalabanan nga mga sumilimba sang Cristiandad. Mabaskog ini nga ginasinggit sang pila sa kon nagasimba sila kon Domingo. Apang, pila ang nakahibalo sang matuod nga kahulugan sang tinaga? Sa katunayan, amo ini ang Hebreo nga tinaga sang “Dayawa si Jah!” Isa ini ka malipayon, mabaskog nga pagkilala sa Manunuga, nga ang iya ngalan amo si Jehova.a

Ang tinaga nga “Hallelujah” masami makit-an sa Biblia. Ngaa? Bangod madamo sing rason agod dayawon ang Dios. Si Jah (Jehova) amo ang Manunuga kag Manugsustento sang bug-os nga uniberso. (Salmo 147:4, 5; 148:3-6) Sia ang nagtuga sang sistema sang ekolohiya nga nagapaposible sang kabuhi sa duta. (Salmo 147:8, 9; 148:7-10) Kag interesado gid sia sa katawhan. Kon himuon naton ang iya kabubut-on, pakamaayuhon kag sakdagon niya kita sa sining pagkabuhi kag tanyagan kita sing isa ka pat-od mas maayo nga kabuhi sa palaabuton. (Salmo 148:11-14) Si Jah (Jehova) amo ang nag-inspirar sang mga pinamulong: “Ang mga matarong magapanubli sang duta, kag magapuyo sa sini sa walay katubtuban.”—Salmo 37:29.

Sa amo, ang sugo ginahatag sa tanan: “Hallelujah!” “Dayawa ninyo si Jah, kamo nga katawhan!” (Salmo 104:35; footnote) Apang, sing makapasubo, indi tanan ang may huyog sa paghimo sini. Sa karon, ang katawhan nagaantos. Madamo ang ginagutom, nagabalatian, ukon ginapigos. Madamo ang nagaantos sing daku nga kalisod bangod sang pag-abuso sa droga ukon sa alkohol ukon resulta sang ila imoralidad ukon pagrebelde. May rason bala kon ngaa dapat nila dayawon ang Dios?

‘Si Jehova Lamang ang Makahatag sa Akon sing Paglaum’

Huo, may yara. Ginaagda ni Jehova ang tanan nga kilalahon sia, tun-an ang paghimo sang iya kabubut-on, kag tigayunon ang mga pagpakamaayo nga nagapahulag sa mga tawo nga dayawon sia. Kag madamo ang naghimo sini. Binagbinaga halimbawa, si Adriana sa Guatemala. Sang nagaedad sing pito ka tuig si Adriana, napatay ang iya iloy. Sang ulihi ginbiyaan sia sang iya amay. Sang nag-edad sia sing napulo, nagsugod na sia sa pagtrabaho. Sanglit gintudluan sia sang iya iloy nga mag-alagad sa Dios kag sa simbahan, nagsulod si Adriana sa nanuhaytuhay Katolikong mga grupo, apang sang 12 anyos sia, ginlas-ayan sia kag nagsulod sa isa ka gang. Nagpanigarilyo sia, nagdroga, kag nagpangawat. Ngaa luyag magdayaw sa Dios ang isa ka pamatan-on nga babayi kaangay niya?

Ang utod nga babayi ni Adriana nagtuon sing Biblia upod sa mga Saksi ni Jehova, apang ginkadlawan lang sia ni Adriana. Nian napatay ang ila tiya. Sa lubong sang iya tiya, gintublag si Adriana sang makalilibog nga mga pamangkot. Sa diin nagpadulong ang iya tiya? Sa langit na ayhan sia? Nagkadto ayhan sia sa impierno? Makalilibog gid ini, gani nagkadto si Adriana sa kapelya sang sementeryo agod mangayo sing bulig paagi sa pangamuyo, nga ginagamit ang ngalan ni Jehova nga Dios, subong sang gintudlo sa iya sang iya utod nga babayi.

Sang ulihi nagtuon sia sing Biblia upod sa mga Saksi ni Jehova kag nagtambong sa ila Cristianong mga miting. Nakahatag ini sa iya sing bag-o nga pagtamod sa kabuhi, kag maisugon sia nga nagguwa sa mga gang. Si Adriana, karon mga beintehon na ang edad nagasiling: “Ang gugma lamang kay Jehova amo ang nakabulig sa akon nga mabiyaan yadtong malain nga paagi sang kabuhi. Si Jehova lamang paagi sa iya dakung kaluoy ang makahatag sa akon sing paglaum nga kabuhi nga walay katapusan.” Si Adriana, walay sapayan sang iya mabudlay nga panugod sa kabuhi, may daku nga rason nga dayawon ang Dios.

Ginreport gikan sa Ukraine ang labi ka walay paglaum nga kahimtangan. Isa ka lalaki ang nagahulat nga patyon sa bilangguan. Naluoy bala sia sa iya kaugalingon? Napung-awan? Wala, baliskad sa sini. Bangod nakilala niya sining karon lang ang mga Saksi ni Jehova kag bangod nakatigayon sia sing pila ka ihibalo tuhoy kay Jehova, ginpangabay niya sila nga kadtuan ang iya iloy. Ginsulatan niya sila bangod nabatian niya nga gintuman nila ang iya ginpangabay. Sia nagasiling: “Salamat sa pagduaw ninyo sa akon iloy. Amo yadto ang pinakamakalilipay nga balita nga akon nabatian sang nagligad nga tuig.”

Tuhoy sa iya kaugalingon kag sa iya kaupod nga mga bilanggo nga iya napanaksihan, sia nagsulat: “Nagatuo na kami karon sa Dios kag ginatinguhaan namon nga maghulag nahisuno sa amon pagtuo.” Ginhinakpan niya ang iya sulat: “Salamat sa pagbulig ninyo sa amon nga matun-an kon ano ang gugma kag matigayon ang pagtuo. Kon mabuhi pa ako, buligan ko man kamo. Salamat sa Dios nga yara kamo kag nga ginabuligan ninyo ang iban nga higugmaon ang Dios kag magtuo sa iya.” Gin-apelar sini nga tawo ang iya sentensia nga kamatayon. Apang kon patyon man sia ukon maghinguyang sing madamong tinuig sa bilangguan, maathag nga may rason sia nga dayawon ang Dios.

‘Bisan Pa Bulag Ako, Makakita Ako’

Binagbinaga man ang isa ka mapagsik nga tin-edyer nga babayi nga hinali nga nabulag. Amo sina ang natabo kay Gloria, nga taga-Argentina. Hinali nga nabulag si Gloria sang nagaedad sia sing 19, kag wala na sia makakita pa liwat. Sa edad nga 29 nagpuyo sia upod sa isa ka lalaki kag nagbusong. Nabatyagan niya karon nga may kahulugan ang iya kabuhi. Apang sang mapatay ang iya anak, madamo sia sing pamangkot. Nagpalibog sia, ‘Ngaa natabo ini sa akon? Ano ang nahimo ko? May Dios gid bala?’

Sa sini nga tion, duha ka Saksi ni Jehova ang nagduaw sa iya. Nagtuon sia sing Biblia kag natun-an ang saad sini nga sa bag-ong kalibutan, ang mga bulag makakita liwat. (Isaias 35:5) Daw ano katahom nga paglaum para kay Gloria! Nalipay gid sia, ilabi na sang magpasugot ang iya bana nga iparehistro ang ila pag-asawahay. Nian naaksidente ang iya bana kag nangin inutil, nagapungko na lamang sa wheelchair. Dapat karon magtrabaho sing lakas ining bulag nga babayi agod mabuhi sila. Dugang pa, sia ang nagahimo sang tanan nga trabaho sa sulod sang balay, subong man sang pag-atipan sa iya bana. Apang ginadayaw gihapon ni Gloria si Jehova! Sa bulig sang iya Cristianong mga kauturan nga lalaki kag babayi, ginatun-an niya ang Braille nga Biblia, kag ginapalig-on sia sing daku sa Cristianong mga miting sa Kingdom Hall. Sia nagasiling: “Mabudlay ipaathag, apang bisan pa bulag ako, daw subong bala nga makakita ako.”

Kon kaisa ang mga tawo ginahingabot kon ginadayaw nila ang Dios. Nalipay ang isa ka babayi sa Croatia sang matun-an niya ang tuhoy sa Dios, apang ginpamatukan sang iya bana ang iya bag-ong pagtuo kag ginbiyaan niya sia nga dala ang ila isa ka tuig nga bata nga babayi. Wala sing balay, ginbiyaan sang iya bana kag pamilya, wala sing puluy-an, trabaho, kag nadulaan pa gani sang anak, ginsubuan gid sia sang primero. Apang ang iya gugma sa Dios amo ang nakabulig sa iya, walay sapayan nga talagsa lamang niya makita ang iya anak nga babayi tubtob nagdaku ini. Nasapwan sining babayi ang “malahalon nga perlas” kag indi niya luyag nga madula ini. (Mateo 13:45, 46) Paano niya nahuptan ang iya kalipay sa sulod sining mabudlay nga mga tion? Sia nagasiling: “Ang kalipay isa ka bunga sang espiritu sang Dios. Sarang ini mapalambo walay sapayan sang nagguwa nga mga kahimtangan, subong nga ang mga tanom sarang magtubo sa isa ka greenhouse walay sapayan sang panahon sa guwa.”

Sa Finland, ang anom ka tuig nga si Markus natukiban nga may indi mabulong nga balatian sa kaunuran. Sang ulihi ginbutang sia sa wheelchair. Pila ka tuig sang ulihi, gindala sia sang iya iloy sa isa ka Pentecostal nga nangin bantog sa pagbulong sa mga balatianon. Apang wala sia mag-ayo. Bangod sini nadulaan sing interes si Markus sa Dios kag nagtuon sia sang siensia kag iban pa sekular nga edukasyon. Nian mga lima ka tuig ang nakaligad, isa ka babayi nga nakawheelchair upod sa isa ka solterito ang nagkadto sa balay nanday Markus. Mga Saksi ni Jehova sila. Sadto nga tion si Markus isa na ka ateista, apang wala niya ginadumilian ang makigsugilanon tuhoy sa relihion kag ginpadayon niya sila.

Sang ulihi, isa ka mag-asawa ang nagduaw sa iya, kag isa ka pagtuon sa Biblia ang nasugdan. Sang ulihi, ginbag-o sang kusog sang kamatuoran sang Biblia ang mga pagtamod ni Markus sa mga butang, kag narealisar niya nga walay sapayan sang iya kasablagan, may mga rason gid sia nga dayawon ang Dios. Sia nagsiling: “Malipayon gid ako bangod nasapwan ko ang kamatuoran kag ang organisasyon nga ginagamit ni Jehova. May direksion na karon kag kahulugan ang akon kabuhi. Isa naman ka nadula nga karnero ang nasapwan kag indi luyag magbiya sa panong ni Jehova!”—Ipaanggid ang Mateo 10:6.

Ang Tanan “Magadayaw kay Jah”

Pila lamang ini sang dimaisip nga mga eksperiensia nga sarang masugid agod ipakita nga ang mga tawo sa karon, walay sapayan sang ila mga kahimtangan, may rason sa pagdayaw sa Dios. Ginpaathag ini ni apostol Pablo sa sining paagi: “Ang diosnon nga debosyon mapuslanon sa tanan nga butang, kay nagasaad ini sing kabuhi karon kag sa palaabuton.” (1 Timoteo 4:8) Kon himuon naton ang kabubut-on sang Dios, tumanon niya ang “saad sang kabuhi karon.” Sa pagkamatuod, indi niya paghimuon nga manggaranon ang imol ukon ang masakiton nga magmapagros sa sining sistema sang mga butang. Apang ginahatag niya ang iya espiritu sa sadtong nagaalagad sa iya agod mangin malipayon sila kag kontento walay sapayan sang ila mga kahimtangan. Huo, bisan sa ‘karon nga kabuhi,’ ang balatianon, ang ginapigos, kag ang imol may rason sa pagdayaw sa Dios.

Apang kamusta sa kabuhi “sa palaabuton”? Ti, bisan ang paghunahuna lamang sa sini nagapahulag sa aton nga dayawon ang Dios sing mapagsik! Nalangkag kita sa paghunahuna sang tion nga wala na ang kaimulon; nga “wala sing pumuluyo nga magasiling: ‘Nagamasakit ako’ ”; kag sang tion nga si Jehova nga Dios ‘magapahid sang tagsa ka luha sa ila mga mata, kag wala na sing kamatayon, ukon sing kalisod ukon sing paghibi ukon sing kasakit pa. Ang nahaunang mga butang nagtaliwan na.” (Isaias 33:24; Bugna 21:3, 4; Salmo 72:16) Paano mo ginatamod ining mga saad sang Dios?

Ginbaton sang isa ka solterito sa El Salvador ang isa ka tract sa Biblia nga nagapaathag sang pila sining mga butang. Nagsiling sia sa Saksi nga naghatag sini sa iya, “Abi mo day, daw indi mapatihan ang ginasiling sining tract.” Madamo ang nagsiling sing subong sina. Apang, mga saad ini sang Isa nga nagtuga sang uniberso, nga nagapahulag sa kinaugali nga siklo sang aton duta, kag nagabulig bisan sa mga imol kag balatianon nga magmalipayon. Mapatihan naton ang iya ginasiling. Ang ginsambit nga solterito nagtuon sa Biblia upod sa mga Saksi ni Jehova kag nasapwan ini nga matuod. Kon wala pa ikaw nagatuon sang Biblia, ginapalig-on namon kamo nga himuon man ini. Nian, kabay nga mangin didto kamo kon madula na ining sistema sang mga butang, kag ang tanan nga tinuga tingob nga magasinggit: “Hallelujah!” “Dayawa ninyo si Jah, kamo nga katawhan!”—Salmo 112:1; 135:1.

[Footnote]

[Kapsion sa pahina 5]

Kabay nga mangin didto kamo kon ang tanan nga tinuga tingob nga magasinggit: “Hallelujah”