Sunda ang Huwaran ni Jesus sa Diosnon nga Debosyon

“Ang balaan nga tinago sining diosnon nga debosyon daku: ‘Ginpahayag sia [Jesus] sa unod.’ ”​—⁠1 TIMOTEO 3:⁠16.

 1. (a) Ano nga pamangkot ang wala masabat sa kapin sa 4,000 ka tuig? (b) San-o kag paano ginhatag ang sabat?

ISA ini ka pamangkot nga wala masabat sa kapin sa 4,000 ka tuig. Sugod sang mapaslawan ang nahauna nga tawo, si Adan, sa paghupot sing integridad, ang pamangkot amo: Paano mapakita ang diosnon nga debosyon sa tunga sang katawhan? Sang ulihi, sang nahaunang siglo C.⁠E., sang magkari sa duta ang Anak sang Dios, ang sabat ginhatag. Sa tagsa ka panghunahuna, pulong, kag buhat, ginpasundayag ni Jesucristo ang iya personal nga gugma kay Jehova. Sa amo ginpadayag niya ang ‘balaan nga tinago sang diosnon nga debosyon,’ nga ginapasundayag ang paagi agod mahuptan sang dedikado nga mga tawo ina nga debosyon.​—⁠1 Timoteo 3:⁠16.

 2. Sa pagtinguha sang diosnon nga debosyon, nga dapat naton binagbinagon sing maayo ang huwaran ni Jesus?

² Sa pagtinguha sang diosnon nga debosyon subong dedikado kag bawtismado nga mga Cristiano, nagakaigo nga “talupangda” ang huwaran ni Jesus. (Hebreo 12:3) Ngaa? Bangod sa duha ka rason. Nahauna, ang huwaran ni Jesus makabulig sa aton sa pagpalambo sang diosnon nga debosyon. Kilala ni Jesus ang iya Amay sing maayo sang sa bisan kay sin-o. (Juan 1:18) Kag gin-ilog gid ni Jesus ang mga dalanon kag mga kinaiya ni Jehova amo kon ngaa sia nakasiling: “Ang nakakita sa akon nakakita man sa Amay.” (Juan 14:9) Gani, paagi sa kabuhi kag ministeryo ni Jesus, makatigayon kita sing madalom pa nga paghangop sa mahigugmaon nga mga kinaiya ni Jehova, sa amo nagapalig-on sang aton personal nga gugma sa aton mahigugmaon nga Manunuga. Ikaduha, ang huwaran ni Jesus makabulig sa aton sa pagpakita sing diosnon nga debosyon. Nagpakita sia sing himpit nga huwaran sang paggawi nga nagapakita sing diosnon nga debosyon. Sa amo nagakaigo nga binagbinagon naton kon paano ‘masuklob si Cristo,’ kon sayoron, masunod sia subong sulundan, kag ilugon ang iya huwaran.​—⁠Roma 13:⁠14.

 3. Ang aton programa sang personal nga pagtuon sa Biblia dapat maglakip sing ano, kag ngaa?

³ Indi tanan sang ginsiling kag ginhimo ni Jesus ginsulat. (Juan 21:25) Busa, dapat gid kita mangin interesado sa mga butang nga ginrekord sa idalom sang balaan nga inspirasyon. Ang programa sang personal nga pagtuon sa Biblia dapat busa maglakip sang regular nga pagbasa sang rekord sang Ebanghelyo tuhoy sa kabuhi ni Jesus. Apang agod ina nga pagbasa makabulig sa aton sa pagtinguha naton sang diosnon nga debosyon, dapat kita maghinguyang sing tion sa pagpamalandong sing mainapresyahon sang aton nabasa. Dapat man kita mangin alisto sa pagtan-aw sang palaabuton.

Kaangay sang Amay ang Anak

 4. (a) Ano ang nagapakita nga si Jesus isa ka tawo nga may mainit kag sinsero nga balatyagon? (b) Sa pagpakig-angot sa iban, si Jesus ang nag-una sa paghimo sing ano?

⁴ Binagbinaga ang isa ka halimbawa. Si Jesus isa ka tawo nga may mainit kag sinsero nga balatyagon. Talupangda sa Marcos 10:​1, 10, 13, 17, kag 35 nga nasapwan sia sang mga tawo sang tanan nga edad kag ginhalinan nga madali sia palapitan. Sa kapin sa isa ka okasyon, ginkugos niya ang mga kabataan. (Marcos 9:​36; 10:16) Ngaa mamag-an ang buot sang mga tawo, bisan sang kabataan, kay Jesus? Bangod sang iya sinsero kag matuod nga interes sa ila. (Marcos 1:​40, 41) Dayag gid ini bangod sia sa masami ang nagauna sa pagpalapit sa iban nga nagakinahanglan sing bulig. Sa amo, mabasa naton nga “nakita” niya ang babayi nga balo sang Nain nga ang iya patay nga anak nga lalaki inuglubong. Nian “nagpalapit” sia kag ginbanhaw niya ang bata nga lalaki, kag wala ginasambit nga ginpangabay sia sa paghimo sini. (Lucas 7:​13-15) Bisan wala sia ginpangabay, gin-ayo man niya ang babayi nga buktot kag ang lalaki nga bilbilon.​—⁠Lucas 13:​11-13; 14:​1-4.

 5. Ano ang ginatudlo sa aton sining mga rekord tuhoy sa ministeryo ni Jesus nahanungod sa mga kinaiya kag mga dalanon ni Jehova?

⁵ Kon mabasa mo ina nga mga hitabo, magdulog kag pamangkuta ang imo kaugalingon: ‘Sanglit gin-ilog sing himpit ni Jesus ang iya Amay, ano ang ginasugid sa akon sining mga rekord nahanungod sa mga kinaiya kag mga dalanon ni Jehova?’ Dapat ini magpasalig sa aton nga si Jehova isa ka Dios nga may mainit kag sinsero nga balatyagon. Ang kabaskugon sang iya dayon nga interes sa pamilya sang tawo nagpahulag sa iya nga sia ang mag-una sa pagpakig-angot sa ila. Indi kinahanglan nga piliton sia sa paghatag sang iya Anak subong “isa ka gawad sa baylo sang madamo.” (Mateo 20:​28; Juan 3:16) Nagapangita sia sing mga kahigayunan nga “mapalapit” sa mga nagaalagad sa iya bangod sang gugma. (Deuteronomio 10:15) Subong ginasiling sang Biblia: “Ang mga mata [ni Jehova] nagapanuluktulok sa bug-os nga duta agod ipakita ang iya kusog para sa ila nga may tagipusuon nga bug-os ayon sa iya.”​—⁠2 Cronica 16:⁠9.

 6. Ano ang resulta kon binagbinagon naton ang mainit kag sinsero nga balatyagon ni Jehova nga ginpakita sang iya Anak?

⁶ Ang pagbinagbinag sa sini nga paagi sang mainit kag sinsero nga balatyagon ni Jehova, subong ginpakita sang iya Anak, magatandog sang imo tagipusuon, nga ginapuno ini sing daku pa nga apresasyon sa Iya mahigugmaon kag makagalanyat nga mga kinaiya. Ini, man, magapalapit sa imo sa iya. Mapahulag ka sa pagpalapit sa iya sing hilway sa pangamuyo sa tanan nga tion kag sa idalom sang tanan nga kahimtangan. (Salmo 65:2) Palig-unon sini ang imo personal nga kaangtanan sa iya.

 7. Sa tapos mabinagbinag ang mainit kag sinsero nga balatyagon ni Jehova, ano ang dapat mo ipamangkot sa imo kaugalingon, kag ngaa?

⁷ Apang, dumduma, nga ang diosnon nga debosyon nagadalahig sing kapin pa sa balatyagon sa pagsimba. Subong ginpatalupangod sang eskolar sa Biblia nga si R. Lenski, ini “nagalakip sang aton bug-os nga panimuot sa pagyaub kag sa pagsimba kag sang mga buhat nga resulta sini.” (Italiko amon.) Gani sa tapos mabinagbinag ang mainit kag sinsero nga balatyagon ni Jehova subong ginpakita ni Jesus, pamangkuta ang imo kaugalingon: ‘Paano ako mangin kaangay ni Jehova sing dugang pa sa sini nga butang? Madali bala ako palapitan para sa iban?’ Kon ikaw isa ka ginikanan, dapat nga madali ka palapitan sang imo mga kabataan. Kag kon ikaw isa ka gulang sa kongregasyon, sa pagkamatuod dapat nga madali ka palapitan. Ano, nian, ang magahimo sa imo nga madali palapitan? Amo ang mainit kag sinsero nga balatyagon. Dapat ka magpalambo sing sinsero kag matuod nga interes sa iban. Kon may pag-ulikid gid ikaw sa iban kag handa ka nga ihatag ang imo kaugalingon para sa ila, mabatyagan nila ini kag mangin malapit sila sa imo.

 8. (a) Ano ang dapat mo tandaan samtang ginabasa mo ang mga rekord sang Biblia nahanungod kay Jesus? (b) Ano ang matun-an naton nahanungod kay Jehova gikan sa mga rekord nga ginsambit sa footnote?

⁸ Gani samtang ginabasa mo ang mga rekord sang Biblia nahanungod kay Jesus, tandai nga daku ang imo mahibaluan tuhoy kay Jehova subong isa ka persona gikan sa mga butang nga ginsiling kag ginhimo ni Jesus.⁠a Kag kon ang imo pag-apresyar sa mga kinaiya sang Dios, subong sang ginpakita ni Jesus, magpahulag sa imo nga ilugon Sia sing dugang pa, naga­hatag ka sing pamatuod sa imo diosnon nga debosyon.

Pagpakita sing Diosnon nga Debosyon sa mga Katapo sang Pamilya

 9, 10. (a) Paano ginpakita ang gugma kag pag-ulikid ni Jesus sa iya iloy, nga si Maria, sang mga tinion antes sia mapatay? (b) Ngaa, mahimo gid nga gintugyan ni Jesus si Maria sa pag-atipan ni apostol Juan kag indi sa isa sang iya undanon nga mga utod?

⁹ Daku ang ginapahayag sang kabuhi kag ministeryo ni Jesucristo nahanungod sa kon paano mapakita ang diosnon nga debosyon. Ang isa ka makatalandog nga halimbawa ginrekord sa Juan 19:​25-27, nga sa diin aton mabasa: “Apang sa tupad sang usok sang pag-antos ni Jesus, nagatindog ang iya iloy kag ang utod nga babayi sang iya iloy; si Maria nga asawa ni Cleofas, kag si Maria Magdalena. Busa, sang makita ni Jesus ang iya iloy kag ang disipulo nga hinigugma niya [Juan] nga nagatindog sa luyo, nagsiling sia sa iya iloy: ‘Babayi, yari karon! Ang imo anak!’ Nian nagsiling sia sa disipulo: ‘Yari karon! Ang imo iloy!’ Kag sugod sadto, gindala sia sang disipulo sa pagpuyo sa iya balay.”

¹⁰ Hunahunaa ina! Mga tinion lamang antes niya gin-ampo ang iya dutan-on nga kabuhi, ang gugma kag kabalaka ni Jesus nagpahulag sa iya nga itugyan ang iya iloy, si Maria, (mahimo gid nga balo na sa sini nga tion) sa iya hinigugma nga si apostol Juan. Apang ngaa si Juan pa sa baylo sang isa sa undanon nga mga utod ni Jesus? Bangod nabalaka si Jesus indi lamang sa pisikal kag materyal nga mga kinahanglanon ni Maria kundi labi na sa iya espirituwal nga kaayuhan. Kag napamatud-an na ni apostol Juan (mahimo nga pakaisa ni Jesus) ang iya pagtuo, samtang wala sing pamatuod nga ang undanon nga mga utod ni Jesus, mga tumuluo na sadto.​—⁠Mateo 12:​46-50; Juan 7:⁠5.

11. (a) Suno kay Pablo, paano ang isa ka Cristiano makapakita sing diosnon nga debosyon sa iya kaugalingon nga panimalay? (b) Ngaa ang matuod nga Cristiano nagaaman para sa tigulang nga mga ginikanan?

¹¹ Karon, paano ini isa ka pagpakita sang diosnon nga debosyon? Si apostol Pablo nagapaathag: “Tahura ang balo nga mga babayi nga matuod gid nga mga balo. Apang kon ang balo nga babayi may mga kabataan ukon mga apo, patun-a sila sing una sa paghimo sing diosnon nga debosyon sa ila kaugalingon nga panimalay kag sa pagbalos sa ila mga ginikanan kag mga katigulangan, kay ini kalahamut-an sa itululok sang Dios.” (1 Timoteo 5:​3, 4) Ang pagtahod sa mga ginikanan sang isa paagi sa paghatag sing materyal nga supurta kon kinahanglanon ina, suno kay Pablo, isa ka pagpabutyag sing diosnon nga debosyon. Sa anong paagi? Si Jehova, ang Manugpamuno sang kahimusan sang pamilya, nagasugo sa kabataan nga tahuron ang ila mga ginikanan. (Efeso 3:​14, 15; 6:​1-3) Busa, ginakilala sang matuod nga Cristiano nga ang pag-atipan sina nga salabton sa pamilya wala lamang nagapakita sing gugma sa mga ginikanan sang isa kundi nagapakita man sing pagkamatinahuron sa Dios kag pagkamatinumanon sa iya mga sugo.​—⁠Ipaanggid ang Colosas 3:⁠20.

12. Paano ka makapakita sing diosnon nga debosyon sa tigulang nga mga ginikanan, kag ano dapat ang motibo?

¹² Nian, paano ka makapakita sing diosnon nga debosyon sa mga katapo sang imo pamilya? Sa pagkamatuod nagadalahig ini sing paghimo sing kahimusan para sa pag-atipan sa espirituwal kag materyal nga mga kinahanglanon sang tigulang nga mga ginikanan, subong sang ginhimo ni Jesus. Ang kapaslawan sa paghimo sini magapakita sing kakulang sing diosnon nga debosyon. (Ipaanggid ang 2 Timoteo 3:​2, 3, 5.) Ang dedikado nga Cristiano nagaaman para sa nagakinahanglan nga mga ginikanan indi lamang bangod sang kaluoy ukon katungdanan kundi bangod ginahigugma niya ang iya pamilya, kag ginakilala niya ang mataas nga pagtamod ni Jehova sa pagtuman sina nga salabton. Sa amo, ang iya pag-atipan sa iya tigulang nga mga ginikanan isa ka pagpabutyag sing diosnon nga debosyon.⁠b

13. Paano ang isa ka Cristiano nga amay makapakita sing diosnon nga debosyon sa iya pamilya?

¹³ Ang diosnon nga debosyon mahimo ipakita sa puluy-an sa iban nga mga paagi. Halimbawa, ang isa ka Cristiano nga amay may salabton nga amanan ang iya pamilya sa materyal, emosyonal, kag sa espirituwal. Busa, dugang sa pag-aman sing materyal nga supurta, mahigugmaon nga nagahimo sia sing kahimusan para sa regular nga pagtuon sang pamilya sa Biblia. Nagaiskedyol sia sing tion sa pagpakigbahin sing regular sa pag-alagad sa latagon upod sa iya pamilya. Balanse sia, kay ginakilala niya nga kinahanglan man ang pahuway kag paglingawlingaw. Maalamon nga ginapahamtang niya ang mga butang nga ulunahon, nga wala ginatugutan ang hilikuton niya para sa kongregasyon nga mangin kabangdanan sang pagpatumbaya niya sa iya pamilya. (1 Timoteo 3:​5, 12) Ngaa ginahimo niya ini tanan? Indi lamang bangod katungdanan niya ini kundi bangod ginahigugma niya ang iya pamilya. Ginakilala niya nga ang pag-atipan sa pamilya sang isa ginatamod ni Jehova nga importante. Paagi sa sina nga pagtuman sang iya salabton subong bana kag amay, nagapakita sia sing diosnon nga debosyon.

14. Paano ang isa ka Cristiano nga asawa makapakita sing diosnon nga debosyon sa puluy-an?

¹⁴ Ang Cristiano nga mga asawa may salabton man sa pagpakita sing diosnon nga debosyon sa puluy-an. Paano? Ang Biblia nagasiling nga ang asawa dapat “magpasakop” sa iya bana kag dapat magpakita sing “hanuot nga pagtahod” sa iya. (Efeso 5:​22, 33) Bisan pa kon ang iya bana indi tumuluo, dapat sia “magpasakop” sa iya. (1 Pedro 3:1) Ginapasundayag sang Cristiano nga babayi ina nga pagkamapinasakupon sang asawa paagi sa pagsakdag sa iya bana sa mga desisyon nga ginahimo niya basta wala ini nagasumpakil sa mga kasuguan sang Dios. (Binuhatan 5:29) Kag ngaa ginabaton niya ining papel? Indi lamang bangod ginahigugma niya ang iya bana kundi labi na bangod ginakilala niya nga ini “nagakaigo sa Ginuo”​—⁠kon sayoron, kahimusan ini sang Dios para sa pamilya. (Colosas 3:18) Sa amo ang iya kinabubut-on nga pagpasakop sa iya bana isa ka pagpabutyag sang iya diosnon nga debosyon.

“Bangod Sini Nagkari Ako”

15. Sa anong talalupangdon nga paagi nagpakita si Jesus sing diosnon nga debosyon?

¹⁵ Ang isa sang talalupangdon nga mga paagi nga si Jesus nagpakita sing diosnon nga debosyon amo ang ‘pagwali sing maayong balita sang ginharian sang Dios.’ (Lucas 4:43) Sa tapos sang iya bawtismo sa Jordan sang 29 C.⁠E., si Jesus tatlo ka tuig kag tunga nga masako gid sa sining labing importante nga hilikuton. “Bangod sini nagkari ako,” paathag niya. (Marcos 1:​38; Juan 18:37) Apang paano ini isa ka pagpakita sang iya diosnon nga debosyon?

16, 17. (a) Ano ang nagpahulag kay Jesus nga mangin masako gid sa pagbantala kag sa pagpanudlo? (b) Ngaa ang ministeryo ni Jesus sa pagbantala kag sa pagpanudlo isa ka pagpakita sang iya diosnon nga debosyon?

¹⁶ Dumduma nga ang diosnon nga debosyon nagadalahig sing pagkabuhi sa isa ka paagi nga nagapahamuot sa Dios bangod ginahigugma mo sia kag ginaapresyar mo sing hanuot ang iya hiligugmaon nga mga kinaiya. Ano, nian, ang nagpahulag kay Jesus nga ihinguyang ang iya hingapusan nga mga tuig sa duta nga masako gid sa pagbantala kag sa pagpanudlo? Amo lamang bala ang pagtuman sang katungdanan ukon obligasyon? Indi maduhaduhaan nga sia may pag-ulikid sa katawhan. (Mateo 9:​35, 36) Kag nahangpan niya sing bug-os nga ang paghaplas sa iya sing balaan nga espiritu nagtangdo kag nagsugo sa iya nga tumanon ang iya ministeryo. (Lucas 4:​16-21) Apang, kapin pa sa sini ang iya mga motibo.

¹⁷ “Ginahigugma ko ang Amay,” maathag nga ginsiling ni Jesus sa iya mga apostoles sang hingapusan nga gab-i sang iya kabuhi sa duta. (Juan 14:31) Yadto nga gugma napasad sa madalom gid kag suod nga pagkakilala sa mga kinaiya ni Jehova. (Lucas 10:22) Ginpahulag sang tagipusuon nga ginpukaw sang daku nga apresasyon, si Jesus nakasapo sing kalipay sa paghimo sang kabubut-on sang Dios. (Salmo 40:8) Amo ini ang iya “pagkaon”​—⁠nga kinahanglanon gid para sa kabuhi kag manamit kaunon. (Juan 4:34) Nagpahamtang sia sing himpit nga huwaran sa ‘pagpangita anay sa ginharian’ sa baylo nga unahon ang kaugalingon. (Mateo 6:33) Gani indi lamang ang kon ano ang iya ginhimo ukon kon daw ano ang iya nahimo kundi kon ngaa ginhimo niya ini ang naghimo sang iya ministeryo sa pagbantala kag pagpanudlo nga isa ka pagpabutyag sang iya diosnon nga debosyon.

18. Ngaa ang makapakigbahin lamang sa ministeryo indi isa ka pagpakita sing diosnon nga debosyon?

¹⁸ Paano naton masunod ang huwaran sang “modelo,” si Jesus, sa sini nga bahin? (1 Pedro 2:21) Ang tanan nga nagabaton sa imbitasyon ni Jesus nga “kari, magsunod sa akon” may tulumanon gikan sa Dios nga ibantala ang maayong balita sang Ginharian kag maghimo sing mga disipulo. (Lucas 18:​22; Mateo 24:​14; 28:​19, 20) Nagakahulugan bala ini nga kon makapakigbahin lamang kita sa pagwali sing maayong balita, ginatinguhaan naton ang diosnon nga debosyon? Indi naman. Kon magpakigbahin kita sa ministeryo sa isa ka rutina lamang ukon pakitakita nga paagi, ukon agod lamang pahamut-an ang mga katapo sang pamilya ukon ang iban pa, indi ini makabig nga isa ka ‘buhat sang diosnon nga debosyon.’​—⁠2 Pedro 3:⁠11.

19. (a) Ano dapat ang una nga rason sang aton ginahimo sa ministeryo? (b) Ano ang resulta kon ginapahulag kita sang tudok nga gugma sa Dios?

¹⁹ Kaangay ni Jesus, ang aton motibo dapat mangin tudok sa tagipusuon. Si Jesus nagsiling: “Dapat mo higugmaon si Jehova nga imo Dios sa bug-os mo nga tagipusuon [ang mga emosyon, mga handum, kag ang balatyagon sang nasulod nga tawo] kag sa bug-os mo nga kalag [ang imo kabuhi kag bug-os nga pagkatawo] kag sa bug-os mo nga hunahuna [ang imo mga ikasarang sa paghunahuna] kag sa bug-os mo nga kusog.” Sa sini, ang isa ka mahinantupon nga escriba nagdugang: “Ini . . . labi pa sa tanan nga dulot nga sinunog kag mga halad.” (Marcos 12:​30, 33, 34) Gani indi lamang kon ano ang aton ginahimo ang importante kundi kon ngaa man ginahimo naton ini. Ang tudok nga gugma sa Dios nga nagadalahig sang aton bug-os nga pagkatawo dapat mangin amo ang una nga rason sa aton ginahimo sa ministeryo. Kon amo sina, indi kita mangin kontento sa pakitakita lamang nga bahin, kundi mapahulag kita sa pagpasundayag sang pagkatudok sang aton diosnon nga debosyon paagi sa paghimo naton sang aton labing masarangan. (2 Timoteo 2:15) Sa amo man nga tion, kon ang gugma sa Dios amo ang aton motibo, indi kita mangin palahikay, nga ginapaanggid ang aton ministeryo sa iya sang iban.​—⁠Galacia 6:⁠4.

20. Paano kita makabenepisyo sing bug-os gikan sa huwaran ni Jesus sa pagtinguha sang diosnon nga debosyon?

²⁰ Daw ano kita ka mapinasalamaton nga ginpahayag sa aton ni Jehova ang balaan nga tinago sang diosnon nga debosyon! Paagi sa mahalungon nga pagtuon sang mga butang nga ginsiling kag ginhimo ni Jesus kag paagi sa pagtinguha nga ilugon sia, mabuligan kita sa pagpalambo kag sa pagpakita sing diosnon nga debosyon sing bug-os pa. Pakamaayuhon kita ni Jehova sing bugana samtang ginasunod naton ang huwaran ni Jesus sa pagtinguha sang diosnon nga debosyon subong dedikado kag bawtismado nga mga Cristiano.​—⁠1 Timoteo 4:​7, 8.

[Mga footnote]

Nadumduman Mo Bala?

◻ Sa pagtinguha sang diosnon nga debosyon, ngaa dapat naton binagbinagon ang huwaran ni Jesus?

◻ Ano ang matun-an naton nahanungod kay Jehova gikan sa mainit kag sinsero nga balatyagon nga ginpakita ni Jesus?

◻ Paano naton mapakita ang diosnon nga debosyon sa mga katapo sang aton pamilya?

◻ Ano dapat ang aton motibo agod ang aton ministeryo mangin isa ka pagpabutyag sing diosnon nga debosyon?

[Piktyur sa pahina 21]

Ang Cristiano nga amay amo ang may salabton sa pag-aman para sa iya pamilya sa materyal, sa emosyonal, kag sa espirituwal

[Piktyur sa pahina 23]

“Apang kon ang balo nga babayi may mga kabataan ukon mga apo, patun-a ini sila . . . sa pagbalos sa ila mga ginikanan kag mga katigulangan.”