Paano Mangin Malipayon ang Imo Pamilya?—Bahin 1

Nagalaum ang bag-o nga mag-asawa nga ang ila kalipay nga nabatyagan sa tion sang ila kasal magapadayon sing wala katapusan. Kag posible gid ini. Kabalo gid sini ang madugay na nga mag-asawa nga mga Cristiano nga nagatinguha gid nga sundon ang laygay sang Biblia.

1. Ano ang laygay sang Biblia para sa mga bana?

Ginhatagan ni Jehova sing responsibilidad ang bana nga mangin ulo sang pamilya. (Basaha ang Efeso 5:23.) Gusto ni Jehova nga maghimo sia sing mga desisyon nga makabenepisyo ang iya pamilya. Ang Biblia naglaygay sa mga bana: “Padayon nga higugmaa ang inyo asawa.” (Efeso 5:25) Ano ang buot silingon sini? Ginatratar sing maayo sang mapinalanggaon nga bana ang iya asawa, bisan sila lang nga duha ukon may upod sila nga iban. Ginaproteksionan niya ang iya asawa kag ginahimo gid ang iya masarangan para mahatag ang pisikal kag emosyonal nga kinahanglanon sini. (1 Timoteo 5:8) Importante sa tanan, sia ang nagapanguna sa paghatag sing espirituwal nga kinahanglanon sang iya asawa. (Mateo 4:4) Halimbawa, puede sia mangamuyo kag magbasa sang Biblia upod ang iya asawa. Kon palangga gid sang bana ang iya asawa, padayon sia nga mangin abyan ni Jehova.—Basaha ang 1 Pedro 3:7.

2. Ano ang laygay sang Biblia para sa mga asawa?

Ang Pulong sang Dios nagasiling nga ang asawa “dapat may tudok nga pagtahod sa iya bana.” (Efeso 5:33) Paano ini mahimo sang asawa? Puede niya pamensaron ang maayo nga mga batasan sang iya bana kag ang pagtinguha sini nga maatipan ang ila pamilya. Mapakita man niya nga ginarespeto niya ang iya bana paagi sa pagsuporta sa mga desisyon sini kag wala niya ginapakalain ang iya bana kon nagaistorya sia sa iya kag sa iban, bisan pa wala ini nagasimba kay Jehova.

3. Paano mapabakod sang mag-asawa ang ila relasyon?

Ang Biblia nagasiling parte sa mag-asawa: “Sila nga duha mangin isa ka unod.” (Mateo 19:5) Buot silingon, dapat nila likawan ang bisan ano nga makapaluya sang ila gugma sa isa kag isa. Mahimo nila ini paagi sa pirme nga pag-updanay kag mapinalanggaon nga pagpabutyag sang ila ginahunahuna kag ginabatyag sa kada isa. Wala nila ginatugutan ang bisan ano ukon bisan sin-o—luwas kay Jehova—nga mangin mas importante sa ila bana ukon asawa. Ginalikawan man nila nga mangin sobra ka suod sa iban.

USISAA PA GID

4. Mga bana—palanggaa kag atipana ang inyo asawa

VIDEO: Mga Bana, Higugmaa ang Inyo Asawa Subong sang Inyo Kaugalingon (9:53)

• Ano ang pila ka paagi nga mapakita sang bana nga ginapalangga niya kag ginaatipan ang iya asawa?

Basaha ang Colosas 3:12, dayon binagbinaga ini nga pamangkot:

• Paano mapakita sang bana ini nga mga kinaiya sa iya asawa?

5. Mga asawa—palanggaa kag respetuha ang inyo bana

Ang Biblia nagasiling nga dapat respetuhon sang asawa ang iya bana, nagaalagad man ini kay Jehova ukon wala. Basaha ang 1 Pedro 3:1, 2, dayon binagbinaga ini nga mga pamangkot:

• Kon lain ang relihion sang imo bana, gusto mo gid nga mag-alagad man sia kay Jehova. Ano sa banta mo ang mas maayo—pirme mo sia istoryahan parte sa Biblia ukon ipakita mo ang maayo nga batasan kag pagrespeto sa iya? Ngaa?

Ang mag-asawa makahimo sing maayo nga mga desisyon. Pero kon kaisa, indi mag-ugyon ang asawa sa iya bana. Kon amo sini, puede mapabutyag sang asawa sa iya bana ang iya ginahunahuna sing kalmado kag may pagrespeto. Pero dapat niya batunon nga si Jehova ang naghatag sing responsibilidad sa iya bana sa pagdesisyon kon ano ang pinakamaayo para sa ila pamilya. Dapat niya suportahan ang desisyon sang iya bana. Paagi sini, makabulig gid ang asawa nga mangin malipayon ang ila pamilya. Basaha ang 1 Pedro 3:3-5, dayon binagbinaga ini nga pamangkot:

• Ano ang batyagon ni Jehova kon ginarespeto sang asawa ang iya bana?

6. Masarangan ninyo ang mga problema sa pag-asawahay

VIDEO: Kon Paano Pabakuron ang Pag-asawahay (5:44)

• Sa video, ano ang nagapakita nga nagalayuay na ang buot sang mag-asawa?

• Ano ang ila ginhimo para pabakuron ang ila pag-asawahay?

Basaha ang 1 Corinto 10:24 kag Colosas 3:13. Pagkatapos mabasa ang kada bersikulo, binagbinaga ini nga pamangkot:

• Paano ini nga laygay makapabakod sang pag-asawahay?

Ang Biblia nagasiling nga dapat naton padunggan ang isa kag isa. Ginapadunggan naton ang isa kon ginatratar naton sia sing maayo kag ginarespeto. Basaha ang Roma 12:10, dayon binagbinaga ini nga mga pamangkot:

• Dapat bala maghulat ang bana ukon asawa nga sia anay ang padunggan? Ngaa?

SUMARYO

Ang bana kag asawa mangin malipayon kon nagapalanggaanay sila, ginarespeto ang isa kag isa, kag ginasunod nila ang mga prinsipio sa Biblia.

Rebyu

• Paano ang bana makabulig para mangin malipayon ang ila pag-asawahay?

• Paano ang asawa makabulig para mangin malipayon ang ila pag-asawahay?

• Kon may bana ka ukon asawa, ano nga prinsipio sa Biblia ang makabulig para magbakod ang inyo pag-asawahay?

DUGANG NGA IMPORMASYON

Hibalua ang pila ka suhestyon nga makabulig para mangin malipayon ang imo pamilya.

Paano Mangin Malipayon ang Imo Pamilya? (brosyur)

Tan-awa ang music video kon ano nga mga pagpakamaayo ang inyo mabaton kon ginasunod ninyo ang laygay sang Dios sa pag-asawahay.

Matuod nga Gugma (4:26)

Usisaa kon ano ang buot silingon sang pagpasakop sa pagkaulo sang bana.

“Mga Babayi, Ngaa Dapat Kamo Magpasakop sa Kahimusan sa Pagkaulo?” (Ang Lalantawan, Mayo 15, 2010)

Ano ang nakabulig sa isa ka mag-asawa nga masolbar ang ila mga problema, lakip na ang ila pagbulagay?

Nagbakod Liwat ang Amon Pag-asawahay sa Bulig sang Dios (5:14)