Pagbakal sing Kalipay nga Wala sing Kuwarta

Uhaw gid kaayo sa tapos sang malawig nga paglakat sa idalom sang mainit nga adlaw, nag-abot ka sa isa ka diutay nga minuro. Sa imo kalipay nakita mo ang isa ka karatula nga nagapasayod sing mabugnaw nga mga ilimnon. Apang nian narealisar mo nga wala ka sing kuwarta nga ibakal sing pabugnaw.

Sang makita ang imo makaluluoy nga kahimtangan, ang manugbaligya nagsiling, ‘Dali diri, magbakal ka sing ilimnon—indi ka magbayad sing kuwarta.’ Sa gilayon, nakabatyag ka sing daku nga pasalamat sa sini nga tanyag. Apang, mamangkot ka, ‘Paano ina matabo? Paano ako makabakal nga wala sing kuwarta?’

Pagbakal nga Wala sing Kuwarta

Bisan pa daw pantasya ini, amo sina ang naeksperiensiahan nanday Karel kag Julian, nga ginsambit sa pahina 3. Nagpati sila nga ang kuwarta magahatag sa ila sing kalipay. Apang suno sa paathag ni Karel: “Ang akon pagtuon sa Biblia nagbalhin sang akon pagtamod sa kuwarta. Naghatag ini sing paglaum nga kabuhi nga walay katapusan sa paraiso nga duta, butang mga mas importante sang sa bisan ano nga mabakal sang kuwarta.” Si Julian nga luyag anay magmilyonaryo nag-asoy: “Nagapadulong na ako sa tulumuron sang maton-an ko ang kamatuoran gikan sa Biblia.”

Subong man, ang manugpalakat anay sang isa ka supermarket nga si Kiyoshi Tomomitsu nga taga-Hapon nagauna anay sang iya trabaho, samtang “ikaduha” lamang ang pag-atipan sa iya pamilya. Sia nagpangatarungan: ”Nagdumdom ako nga mapahalipay ko ang akon pamilya paagi sa pag-aman sing bastante nga materyal nga mga butang para sa ila palaabuton.” Sang ginpamangkot kon ano ang nagpabalhin sang iya pagtamod sa kuwarta kag materyal nga mga butang, si Kiyoshi nagsabat: “Ang mga kasulatan gikan sa Biblia, subong sang Hulubaton 23:23, nga nagasiling, ‘Bakla ang kamatuoran kag dili pag-ibaligya.’”

‘Apang,’ mamangkot ka, ‘paano ko “mabakal ang kamatuoran”?’

Ang Bili sang Kalipay

Magabili ini sang pila sang imo tion. ‘Himusli ang nagakaigo nga tion,’ laygay sang Cristiano nga si apostol Pablo, ‘kay ang mga adlaw malaut.’ (Efeso 5:15-17) Ang mga Saksi ni Jehova sa inyo duog malipay sa paghimos sang pagpakighambal sa imo nahanungod sa mga kamatuoran gikan sa Pulong sang Dios, ang Biblia sa oras nga kombenyente sa imo, kag wala sing bayad.

Nagapangalag-ag ka bala nga ‘madalahig’? Kon amo ka sina, magkuha sing kaisog gikan sa mga pulong ni Jesus: “Malipayon ang mga ginagutom kag ginauhaw sa pagkamatarong, kay sila busgon.” Ginpatuhoy ang igtalupangod sang iya mga manugpalamati sa paagi nga sila makatigayon sing kalipay, si Jesus nagsiling: “Malipayon ang mga mahunahunaon sang ila espirituwal nga kinahanglanon, kay ila ang ginharian sang mga langit.” (Mateo 5:3, 6) Ining langitnon nga pangulohan, ang Ginharian sang Dios, amo lamang ang awtoridad nga makahatag sa imo sing “pasaporte sa kalipay.”

Ano, nian, ang dapat mangin papel sang kuwarta sa imo kabuhi? Sing makawiwili, ang Biblia nagatanyag sing praktikal nga mga gabayan sa sini.

Maalamon nga Paggamit sa kuwarta karon

“Padunggi si Jehova sang imo hamili nga mga butang,” laygay sang Pulong sang Dios. (Hulubaton 3:9) Busa, ang mga nagapaabot sing matuod nga kalipay gikan sa Dios naggamit sang ila kuwarta sa isa ka paagi nga nagapahamuot sa iya. Ginatinguhaan nila nga atipanon sing nagakaigo ang materyal nga mga kinahanglanon sang ila pamilya. (1 Timoteo 5:8) Nagahatag sila sing bunayag nga aman para sa iban pa nga may kaangtanan sa ila pagtuo. Kag nagahatag man sila sing boluntaryo nga mga amot sa pagsakdag sa hilikuton sang pag-aman sing makapalig-on sa espirituwal nga impormasyon sa porma sang mga Biblia kag napasad sa Biblia nga mga publikasyon, subong sining magasin.

Bangod nahibaluan nila nga laglagon sang Ginharian sang Dios ang materyalistiko kag makagod nga komersial nga mga elemento gikan sa tawhanon nga katilingban, ginalikawan nila nga mahaylo sa pagbutang sang ila kuwarta sa mga plano nga buot na mapaslawan. (Daniel 2:44) “May pagkaon kag panapton,” kontento na sila sa estilo sang pagkabuhi nga nagaatipan sang una mga mga butang sa kabuhi.—1 Timoteo 6:8.

Kalipay Karon—Isa ka Katunayan

“Ang isa sang mga butang nga akon natalupangdan sang makaupod ko ang mga Saksi ni Jehova,” saysay ni Sue nga taga-Inglaterra, “amo kon paano ang mga nagakabuhi suno sa mga prinsipio sang Biblia, nga nadalahig sing bug-os sa ila pagsimba, daw may yara sang mga butang nga ginakinahanglan nila.” Amo man ang natalupangdan sang iya bana, nga si John. Sia nagpaathag:

“Nakita ko lamang ang nagakatabo sa kalabanan nga tawo sang mahibaluan ko ang mga kamatuoran sang Biblia. Ang ila ginapangabudlayan nasandig sing bug-os sa kuwarta. Nabuligan ako sini sa paghibalo nga ang kalipay wala nagagikan sa sinang paagi. Naton-an ko karon nga ang kalipay bunga sang paghimo sing mga butang para sa iban kag indi ini ang katuyuan.”

Si John kag si Sue duha lamang sa kapin sa tatlo ka milyon ka Saksi ni Jehova nga nagapamatuod sa pagkamaminatud-on sang saad ni Jesus nga kon pangitaon sing una ang Ginharian sang Dios kag ang iya pagkamatarong, ang tanan nga materyal nga mga kinahanglanon ‘pagaidugang sa imo.’—Mateo 6:33.

Ginapangita mo bala ang makabulong sang kauhaw nga mga tubig sang kamatuoran? Manggaranon man ukon imol, mangin imo ang kalipay paagi sa pagpamati sa matagnaon nga panawag sang Dios: “Ho, ang tagsatagsa nga ginauhaw! Kari kamo sa mga tubig. Kag ang wala sing kuwarta! Kari kamo, magbakal . . . sa wala sing kuwarta kag sa wala sing bili.” (Isaias 55:1) Nagapadayon gihapon ining tanyag. Himusli ini samtang mahimo mo pa.

[Mga piktyur sa pahina 10]

Kalipay ang bunga sang paggamit sa kuwarta para sa pag-aman sa aton pamilya kag sa pagbulig sa iban