Ano nga Gugma ang Makahatag sing Matuod nga Kalipay?

 1. Ngaa pinasahi ang aton tion subong?

PINASAHI gid ang aton tion subong. Gintagna sa Biblia nga ginatipon ni Jehova ‘ang daku nga kadam-an halin sa tanan nga pungsod kag tribo kag katawhan kag hambal.’ Sila amo ang ‘gamhanan nga pungsod’ sang sobra walo ka milyon ka malipayon nga tawo nga ‘nagahimo sang sagrado nga pag-alagad sa Dios sa adlaw kag gab-i.’ (Bug. 7:9, 15; Isa. 60:22) Subong pa lang natabo nga amo sini kadamo ang nagahigugma sa Dios kag sa ila isigkatawo.

 2. Ano nga sahi sang gugma ang ginapakita sang mga indi abyan sang Dios? (Tan-awa ang piktyur sa umpisa sini nga artikulo.)

² Pero, ang Kasulatan nagtagna man nga sa aton tion subong, ang mga indi abyan sang Dios magapakita sang indi husto nga sahi sang gugma. Ini amo ang maiyaiyahon nga gugma. Si apostol Pablo nagsulat: “Sa katapusan nga mga adlaw . . . , ang mga tawo mangin mahigugmaon sa kaugalingon, mahigugmaon sa kuarta, . . . mahigugmaon sa kinasadya sa baylo nga mahigugmaon sa Dios.” (2 Tim. 3:1-4) Ini nga sahi sang gugma kabaliskaran sang Cristianong gugma. Ang maiyaiyahon nga gugma wala nagahatag sing kalipay nga ginapaabot sang mga tawo. Sa baylo, nagaresulta ini sa maiyaiyahon nga kalibutan nga “mabudlay atubangon.”

 3. Ano ang hibaluon naton sa sini nga artikulo, kag ngaa?

³ Nahibaluan ni Pablo nga ang maiyaiyahon nga gugma magalapnag kag makahalit ini sa mga Cristiano. Gani, nagpaandam sia nga “magpalayo” sa mga nagapakita sang indi husto nga gugma. (2 Tim. 3:5) Pero, indi naton malikawan sing bug-os ini nga mga tawo. Gani ano ang himuon naton para indi kita maimpluwensiahan sang mga panimuot sang kalibutan kag mapahamut-an naton si Jehova, ang Dios sang gugma? Hibaluon naton ang kinatuhayan sang diosnon nga gugma kag sang gugma nga ginlaragway sa 2 Timoteo 3:2-4. Makabulig ini sa aton nga mausisa ang aton kaugalingon kag mapakita sing maayo ang gugma nga makahatag sing matuod nga kalipay kag pagkakontento.

 4. Ngaa indi sala nga higugmaon naton ang aton kaugalingon sing nagakaigo?

⁴ “Ang mga tawo mangin mahigugmaon sa kaugalingon,” sulat sang apostol. Sala bala nga higugmaon ang aton kaugalingon? Indi, normal lang kag nagakaigo nga higugmaon ang kaugalingon. Amo sini ang pagtuga sa aton ni Jehova. Si Jesus nagsiling: “Higugmaa ang imo isigkatawo subong sang imo kaugalingon.” (Mar. 12:31) Kon wala naton ginahigugma ang aton kaugalingon, indi naton mahigugma ang aton isigkatawo. Ang Kasulatan nagasiling man: “Ang mga bana dapat maghigugma sang ila asawa kaangay sang ila kaugalingon nga lawas. Ang nagahigugma sang iya asawa nagahigugma sang iya kaugalingon, kay wala sing tawo nga nagadumot sa iya kaugalingon nga lawas, kundi ginapakaon kag ginapalangga niya ini.” (Efe. 5:28, 29) Gani dapat naton higugmaon ang aton kaugalingon sing nagakaigo.

 5. Paano mo ilaragway ang mga tawo nga sobra ang paghigugma sa kaugalingon?

⁵ Ang gugma sa kaugalingon nga ginsambit sa 2 Timoteo 3:2 indi nagakaigo. Maiyaiyahon ini. Ang mga tawo nga sobra ang paghigugma sa kaugalingon nagapakataas sa ila kaugalingon. (Basaha ang Roma 12:3.) Ang pinakaimportante sa ila amo ang ila kaugalingon. Wala sila nagaulikid sa iban. Kon may indi maayo nga matabo, ginabasol nila ang iban imbes nga akuon ini. Ini nga klase sang mga tawo indi gid malipayon.

 6. Ano ang mga resulta kon higugmaon naton ang Dios?

⁶ Ang gugma sa kaugalingon amo ang una sa listahan sang indi maayo nga mga kinaiya nga magalapnag sa katapusan nga mga adlaw. Ang mga iskolar sa Biblia nagsiling nga una ini nga ginsambit ni Pablo bangod ang iban pa nga kinaiya resulta sini nga sahi sang gugma. Sa kabaliskaran, ang mga tawo nga nagahigugma sa Dios nagapakita sang maayo nga mga kinaiya. Sa Biblia, ang diosnon nga gugma naangot sa kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon. (Gal. 5:22, 23) “Malipayon ang katawhan nga ang ila Dios amo si Jehova!” sulat sang salmista. (Sal. 144:15) Si Jehova malipayon nga Dios, kag ginapakita sang iya katawhan ini nga kinaiya. Dugang pa, indi pareho sa mga mahigugmaon sa kaugalingon kag sa mga interesado lang sa ila mabaton, ang mga alagad ni Jehova nalipay sa paghatag sang ila tion kag kusog para sa kaayuhan sang iban.—Binu. 20:35.

 7. Ano nga mga pamangkot ang makabulig sa aton nga mausisa ang aton gugma sa Dios?

⁷ Paano naton mahibaluan kon mas ginahigugma na naton ang aton kaugalingon sangsa Dios? Binagbinaga ang laygay nga mabasa sa Filipos 2:3, 4: “Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo, samtang ginapangita ninyo indi lamang ang inyo personal nga kaayuhan, kundi ang iya man sang iban.” Pamangkuton naton ang aton kaugalingon: ‘Ginaaplikar ko bala ini sa akon kabuhi? Ginahimo ko gid bala ang kabubut-on sang Dios? Nagapanikasog gid bala ako nga buligan ang iban sa kongregasyon kag sa ministeryo?’ Ang paghatag sang aton tion kag kusog indi pirme mahapos. Nagakinahanglan ini sang pagpanikasog kag pagsakripisyo. Pero, may makalabaw pa bala sa kalipay nga resulta sang paghibalo nga nahamuot sa aton ang Soberano sang bug-os nga uniberso?

 8. Bangod sang gugma sa Dios, ano ang ginhimo sang iban?

⁸ Ang gugma sa Dios nagpahulag sa iban nga isakripisyo ang daku sing sueldo nga mga propesyon para maalagad si Jehova sing bug-os. Si Ericka, nga taga-Estados Unidos, isa ka doktora. Pero imbes nga panikasugan nga mangin bantog nga doktora, nagregular payunir sia kag nakaalagad sia sa madamo nga pungsod upod ang iya bana. Nagsiling sia: “Madamo kami sing eksperiensia sa pagbulig sa kongregasyon nga tuhay sing lenguahe, kag madamo man kami sing nangin abyan. Nalipay gid kami sa sini. Doktora gihapon ako, pero bangod mas ginagamit ko ang akon tion kag kusog sa pagbulig sa mga tawo sa ila espirituwal nga kinahanglanon kag pagbulig sa kongregasyon, naghatag ini sa akon sang matuod nga kalipay kag pagkakontento.”

 9. Ngaa ang gugma sa kuarta wala nagahatag sing kalipay?

⁹ Si Pablo nagsulat nga ang mga tawo mangin “mahigugmaon sa kuarta.” Sang nagligad nga pila ka tuig, isa ka payunir sa Ireland ang nakaistorya sa isa ka tawo parte sa Dios. Ginpagua sang tawo ang iya kahita, nagkuha sing kuarta, kag bugalon nga nagsiling, “Amo ini ang akon dios!” Bisan pa indi mag-aku ang iban, madamo nga tawo ang nagahigugma sa kuarta kag sa mga butang nga mabakal sini. Pero, ang Biblia nagpaandam: “Ang nagahigugma sa pilak indi maayawan sa pilak, kag ang nagahigugma sa manggad indi makontento sa kinitaan.” (Man. 5:10) Ini nga klase sang mga tawo gusto sang mas madamo nga kuarta, kag bangod sang ila pagtinguha nga makatipon sini, nagresulta ini sa “madamo nga kasakit.”—1 Tim. 6:9, 10.

10. Ano ang ginasiling sang Biblia parte sa manggad kag kaimulon?

¹⁰ Siempre, kinahanglan naton tanan ang kuarta. Makahatag ini sing pangamlig. (Man. 7:12) Pero mangin malipayon gid bala ang isa ka tawo nga ang ginapanag-iyahan iguigo lang sa iya mga kinahanglanon? Huo! (Basaha ang Manugwali 5:12.) Si Agur nga anak ni Jakeh nagsulat: “Indi ako pagpaimula ukon pagpamanggara. Hatagi lamang ako sing pagkaon nga akon kinahanglanon.” Nahangpan naton kon ngaa indi niya gusto mangin tama kaimol. Ginpaathag niya nga indi niya gusto nga masulay nga magpangawat kay mapakahuy-an sini ang Dios. Pero ngaa nangamuyo sia nga indi magmanggaranon? Nagsulat sia: “Agod indi ako mabusog kag ipanghiwala ko ikaw kag magsiling, ‘Sin-o si Jehova?’” (Hulu. 30:8, 9) Mahimo may mahunahuna ka nga mga tawo nga nagsalig sa ila manggad imbes nga sa Dios.

11. Ano ang ginlaygay ni Jesus parte sa kuarta?

¹¹ Ang mga nagahigugma sa kuarta indi makapahamuot sa Dios. Si Jesus nagsiling: “Wala sing tawo nga makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa. Indi kamo makapaulipon sing dungan sa Dios kag sa Manggad.” Nagsiling man sia: “Untati ninyo ang pagtipon sing mga bahandi para sa inyo kaugalingon diri sa duta nga sa diin may sapatsapat kag tuktok nga nagapang-ut-ot, kag sa diin may kawatan nga nagasulod kag nagapangawat. Sa baylo, magtipon kamo sing mga bahandi para sa inyo kaugalingon didto sa langit nga sa diin wala sing sapatsapat kag tuktok nga nagapang-ut-ot, kag sa diin wala sing kawatan nga nagasulod kag nagapangawat.”—Mat. 6:19, 20, 24.

12. Ngaa ang pagpasimple sang kabuhi nagapahapos sang pag-alagad sa Dios? Maghatag sing halimbawa.

¹² Madamo ang nakarealisar nga nangin mas malipayon sila sang nagkabuhi sila sing simple kag mas madamo na sila sing tion sa pag-alagad kay Jehova. Si Jack, nga taga-Estados Unidos, nagbaligya sang iya daku nga balay kag negosyo para makapayunir sia upod ang iya asawa. Nagsiling sia: “Nabudlayan ako nga biyaan ang amon matahom nga balay kag propiedad sa uma. Pero, sa sulod sang pila ka tuig, nagapauli ako nga indi malipayon bangod sang mga problema sa trabaho. Ang akon asawa nga regular payunir pirme malipayon. Pirme niya ginasiling, ‘Ang akon boss ang pinakamaayo!’ Subong nga payunir naman ako, nagaalagad kami sa isa lang ka Persona, si Jehova.”

13. Paano naton mausisa ang aton pagtamod sa kuarta?

¹³ Para mausisa ang aton pagtamod sa kuarta, mahimo naton pamangkuton ang aton kaugalingon: ‘Nagapati gid bala ako sa ginasiling sang Biblia parte sa kuarta kag makita bala ini sa akon pagkabuhi? Ginauna ko bala ang pagtigayon sing kuarta? Mas ginapabaloran ko bala ang materyal nga mga butang sangsa akon kaangtanan kay Jehova kag sa mga tawo? Nagasalig gid bala ako nga iaman ni Jehova ang akon mga kinahanglanon?’ Makasalig kita nga indi gid niya pagpaslawon ang mga nagalaum sa iya.—Mat. 6:33.

14. Ano ang nagakaigo nga pagtamod sa kinasadya?

¹⁴ Suno gid sa gintagna, madamo nga tawo subong ang “mahigugmaon sa kinasadya.” Wala sing malain sa nagakaigo nga pagtamod sa kaugalingon kag sa kuarta, gani wala man sing malain sa nagakaigo kag balanse nga pagtamod sa kinasadya. Indi gusto ni Jehova nga dingutan naton ang aton kaugalingon ukon likawan ang maayo nga mga kalingawan nga makahatag sing kalipay. Ang Biblia nagapalig-on sa mga matutom: “Lakat ka, magkaon nga may kasadya, kag mag-inom sang alak nga may malipayon nga tagipusuon.”—Man. 9:7.

15. Ano nga mga kinasadya ang ginapatuhuyan sang 2 Timoteo 3:4?

¹⁵ Ang ginapatuhuyan sa 2 Timoteo 3:4 amo ang mga kinasadya nga nagabalewala sa Dios. Talupangda nga ini nga teksto wala nagsiling nga mas higugmaon sang mga tawo ang kinasadya sangsa Dios, nga mahimo magpahangop nga may gugma man sila sa Dios. Nagsiling ini nga ‘sa baylo nga sa Dios.’ Ang isa ka iskolar nagsulat: “Wala gid ginapahangop sini [nga teksto] nga ginahigugma man nila ang Dios. Ginapahangop sini nga wala gid sila sing gugma sa Dios.” Isa gid ini ka paandam sa mga tawo nga mahigugmaon sa kinasadya! Ang ekspresyon nga “mahigugmaon sa kinasadya” nagakaigo nga nagalaragway sa mga “nadaug sang . . . kalipayan sini nga kabuhi.”—Luc. 8:14.

16, 17. Ano nga halimbawa ang ginpakita ni Jesus parte sa kinasadya?

¹⁶ Ginpakita ni Jesus ang nagakaigo kag balanse nga pagtamod sa kinasadya. Nagtambong sia sa “punsion sa kasal” kag sa “daku nga sinalusalo.” (Juan 2:1-10; Luc. 5:29) Sang naubos ang alak sa kasal, naghimo sia sing milagro paagi sa paghimo sang tubig nga mangin alak. Kag sa isa pa ka higayon, sang ginpakalain si Jesus sang mga tawo bangod sang iya pagkaon kag pag-inom, maathag nga ginsiling niya nga indi nagakaigo ang ila pagtamod.—Luc. 7:33-36.

¹⁷ Pero, indi kinasadya ang pinakaimportante kay Jesus. Gin-una niya si Jehova kag ginhimo niya ang tanan para buligan ang iban. Para mabuhi ang madamo, kinabubut-on niya nga ginbatas ang masakit nga kamatayon sa usok. Nagsiling si Jesus sa mga gusto magsunod sa iya: “Malipayon kamo kon ginapakahuy-an kamo kag ginahingabot kag ginabutangbutangan sang tanan nga sahi sang kalautan tungod sa akon. Magkasadya kamo kag magkalipay, kay daku ang inyo padya sa langit, bangod amo man sina ang paghingabot nila sa mga manalagna nga nauna sa inyo.”—Mat. 5:11, 12.

18. Ano nga mga pamangkot ang makabulig sa aton nga mausisa ang aton gugma sa kinasadya?

¹⁸ Paano naton mausisa ang aton gugma sa kinasadya? Pamangkuton naton ang aton kaugalingon: ‘Mas importante bala sa akon ang kalingawan sangsa mga miting kag pagbantala? Handa bala ako nga dingutan ang akon kaugalingon para maalagad ang Dios? Kon nagapili sing kalingawan, ginabinagbinag ko bala ang pagtamod ni Jehova?’ Kon ginahigugma gid naton ang Dios, likawan naton indi lang ang mga butang nga wala niya nahamut-an kundi pati man ang mga butang nga indi kita sigurado kon bala nahamut-an niya ukon wala.—Basaha ang Mateo 22:37, 38.

19. Sin-o ang indi gid mangin malipayon?

¹⁹ Pagligad sang mga 6,000 ka tuig nga pag-antos sang katawhan, malapit na ang katapusan sang kalibutan ni Satanas. Madamo nga tawo ang sobra nga nagahigugma sa kaugalingon, kuarta, kag kinasadya. Sila ang mga tawo nga ang ginapamensar lang amo ang matigayon nila, kag ginauna nila ang ila mga handum. Ini nga mga tawo indi gid mangin malipayon. Pero, ang salmista nagsulat: “Malipayon ang tawo nga ang iya manugbulig amo ang Dios ni Jacob, nga ang iya paglaum yara kay Jehova nga iya Dios.”—Sal. 146:5.

20. Paano ang gugma sa Dios naghatag sa imo sing kalipay?

²⁰ Ang gugma sa Dios ginapakita sang mga katawhan ni Jehova, kag nagadamo kita kada tuig. Pamatuod ini nga nagagahom na ang Ginharian sang Dios kag malapit na sini ihatag ang dalayawon nga mga pagpakamaayo. Ang matuod kag nagapadayon nga kalipay resulta sang paghimo sang kabubut-on sang Dios, kag sang paghibalo nga ginapahamut-an naton ang Isa nga Supremo. Kag ang mga nagahigugma kay Jehova mangin malipayon sing wala sing katapusan! Sa masunod nga artikulo, binagbinagon naton ang pila ka kinaiya nga resulta sang maiyaiyahon nga gugma, kag hibaluon naton ang kinatuhayan sini sa mga kinaiya nga makita sa mga alagad ni Jehova.