Maglakat Suno sa Gintudlo sang Dios

“Magtukad kita sa bukid ni Jehova . . . , kag tudluan niya kita sang iya mga dalanon, kag magalakat kita sa iya mga banas.”​—⁠MIQUEAS 4:⁠2.

 1. Suno kay Miqueas, ano ang pagahimuon sang Dios para sa iya katawhan sa katapusan nga mga adlaw?

ANG manalagna sang Dios nga si Miqueas nagtagna nga sa “ulihi nga bahin sang mga adlaw,” ang aton tion, madamo nga tawo ang mapagsik nga magapangita sa Dios, sa pagsimba sa iya. Magapalig-unay sila sa isa kag isa, nga nagasiling: “Magtukad kita sa bukid ni Jehova . . . , kag tudluan niya kita sang iya mga dalanon, kag magalakat kita sa iya mga banas.”​—⁠Miqueas 4:​1, 2.

 2, 3. Paano ang tagna ni Pablo tuhoy sa mga tawo nga mangin mga mahigugmaon sa kuwarta natuman karon?

² Ang aton pagtuon sa 2 Timoteo 3:​1-5 nagabulig sa aton nga makita ang mga resulta sang pagkanatudluan sang Dios sa “katapusan nga mga adlaw.” Sa nagligad nga artikulo, nagsugod kita paagi sa pagtalupangod sang mga benepisyo nga matigayon sadtong nagapamati sa paandam ni Pablo nga indi “magmangin mahigugmaon sang kaugalingon.” Gindugang ni Pablo nga sa tion naton ang mga tawo magmangin “mahigugmaon [man] sang kuwarta.”

³ Ang isa indi kinahanglan nga makatapos sa kolehiyo sa modernong maragtas agod mahangpan kon paano gid nagakaigo ina nga mga pinamulong sa mga tion naton. Wala ka bala nakabasa tuhoy sa mga kapitalista kag mga pangulo sang mga korporasyon nga indi kontento nga makaganar sing minilyon kada tuig? Ining mga mahigugmaon sang kuwarta padayon nga maluyag sang madamo pa, bisan sa ilegal nga paagi. Ang mga pinamulong ni Pablo nagakabagay man sa madamo nga tawo karon nga, bisan indi manggaranon, pareho man ka mahamkunon, nga wala gid nagakakontento. Ayhan kilala mo ang madamo sang amo sina nga mga tawo sa inyo lugar.

 4-6. Paano ginabuligan sang Biblia ang mga Cristiano nga malikawan ang mangin mga mahigugmaon sang kuwarta?

⁴ Ang ginsambit bala ni Pablo isa lamang ka dimalikawan nga bahin sang tawhanon nga kinaugali? Indi suno sa Awtor sang Biblia, nga madugay na nga nagpamulong sini nga kamatuoran: “Ang gugma sa kuwarta amo ang gamot sang tanan nga sahi sang makahalalit nga mga butang, kag paagi sa paglab-ot sa sini nga gugma ang iban nagtalang gikan sa pagtuo kag nagsuntok sang ila mga tagipusuon sing madamong kasakitan.” Talupangda, ang Dios wala magsiling, ‘Ang kuwarta amo ang gamot sang tanan nga sahi sang makahalalit nga mga butang.’ Nagsiling sia nga ini amo ang “gugma sa kuwarta.”​—⁠1 Timoteo 6:⁠10.

⁵ Sing makawiwili, ang konteksto sang mga pinamulong ni Pablo nagkilala nga ang iban nga maayong mga Cristiano sang unang siglo mga manggaranon sa karon nga sistema sang mga butang, ayhan napanubli nila ang manggad ukon naganar ini. (1 Timoteo 6:17) Maathag, nian, nga ano man ang aton kahimtangan sa pinansial, ang Biblia nagapaandam sa aton batok sa katalagman nga mangin mahigugmaon sa kuwarta. Nagahatag bala ang Biblia sing dugang pa nga panudlo tuhoy sa paglikaw sining mabug-at kag kinaandan nga depekto? Nagahatag gid ini, subong sang Sermon sa Bukid ni Jesus. Ang kaalam sini bantog sa kalibutan. Talupangda, halimbawa, ang ginsiling ni Jesus sa Mateo 6:​26-33.

⁶ Subong sang ginrekord sa Lucas 12:​15-21, si Jesus nagpamulong tuhoy sa manggaranon nga tawo nga padayon nga nagtinguha sa pagtipon sing dugang nga manggad apang hinali nga nadula ang iya kabuhi. Ano ang punto ni Jesus? Sia nagsiling: “Magbantay batok sa tanan nga sahi sang pagkahamkon, bangod bisan ang isa ka tawo may kabuganaan ang iya kabuhi indi resulta sang mga butang nga ginapanag-iyahan niya.” Lakip sa paghatag sina nga laygay, ginapakamalaut sang Biblia ang katamad kag ginapadaku ang balor sang bunayag nga pagpangabudlay. (1 Tesalonica 4:​11, 12) O, ayhan magapamatok ang iban nga ining mga panudlo indi naaplikar sa aton panahon​—⁠apang naaplikar gid ini, kag ini madinalag-on.

Gintudluan kag Nakabenepisyo

 7. Ano ang rason naton sa pagsalig nga maaplikar naton sing madinalag-on ang laygay sang Biblia nahanungod sa mga manggad?

⁷ Sa madamong kapungsuran, makita mo ang matuod nga mga halimbawa sang kalalakin-an kag kababayin-an gikan sa tanan nga tindog sa katilingban kag pangabuhi nga nag-aplikar sang balaan nga mga prinsipio nahanungod sa kuwarta. Sila mismo kag ang ila mga pamilya nakabenepisyo, nga nakita bisan sang mga tagaguwa. Halimbawa, sa libro nga Religious Movements in Contemporary America, ang isa ka antropologo nagsulat: “Sa [Saksi] nga mga publikasyon kag mga pamulongpulong sa kongregasyon ginapahanumdom sila nga ang ila kahimtangan sa kabuhi wala nasandig sa bag-ong mga awto, malahalon nga mga panapton, ukon maluho nga pangabuhi. Sa amo man nga tion ang isa ka Saksi dapat maghatag sing nagakaigo nga pagtrabaho sa isa ka adlaw sa iya amo [kag dapat mangin] bunayag gid . . . Ina nga mga kinaiya nagahimo bisan sa isa ka tawo nga wala sing madamong mga ikasarang nga isa ka mapuslanon nga empleyado, kag ang iban nga mga Saksi sa ­North Philadel­phia [E.U.A.] ginhatagan sing mga posisyon nga may daku nga responsabilidad sa trabaho.” Sing maathag, ang mga tawo nga nagbaton sing panudlo gikan sa Dios paagi sa iya Pulong ginpaandaman sang mga panimuot nga labi nga nagapabudlay sa pag-atubang sa karon nga mga kahimtangan. Ang ila inagihan nagapamatuod nga ang panudlo sang Biblia nagadul-ong sa mas maayo, mas malipayon nga kabuhi.

 8. Ngaa maangot ang “bugalon,” “palabilabihon,” kag “mapasipalahon,” kag ano ang kahulugan sining tatlo ka tinaga?

⁸ Maangot naton ang masunod nga tatlo ka butang nga ginalista ni Pablo. Sa katapusan nga mga adlaw, ang mga tawo mangin “bugalon, palabilabihon, mapasipalahon.” Ining tatlo indi palareho, apang ang tanan naangot sa bugal. Ang una amo ang “bugalon.” Ang diksionaryo nagasiling nga ang sadsaran nga Griegong tinaga diri nagakahulugan: “ ‘Ang isa nga nagakabig sang iya kaugalingon nga labaw sangsa ginapakita sang katunayan,’ ukon ‘nagasaad sing labi sangsa mahimo niya.’ ” Mahangpan mo kon ngaa ginagamit sang iban nga mga Biblia ang tinaga nga “matinaastaason.” Ang masunod amo ang “palabilabihon,” ukon sing literal “superyor tan-awon.” Ang katapusan, “mapasipalahon.” Ayhan ginahunahuna sang iban ang mga mapasipalahon subong yadtong nagapamulong sing dimatinahuron sa Dios, apang ang sadsaran nga tinaga nagalakip sang mahaliton, mamulayon, ukon malaw-ay nga pamulong batok sa mga tawo. Gani ginapatuhuyan ni Pablo ang pasipala nga ginapatuhoy batok sa Dios kag sa tawo.

 9. Kabaliskaran sa nagaluntad nga makahalalit nga mga panimuot, ano nga mga panimuot ang ginalaygay sang Biblia nga palambuon sang mga tawo?

⁹ Ano ang balatyagon mo kon ginapalibutan ka sang mga tawo nga nagahisanto sa paglaragway ni Pablo, ayhan mga kaupod mo man sila sa trabaho, mga kabutho, ukon mga paryente? Labi bala ini nga nagapahapos sang imo kabuhi? Ukon ginapasibod bala sina nga mga tawo ang imo kabuhi, labi nga ginapabudlay ang pag-atubang mo sa aton mga tion? Apang, ang Pulong sang Dios nagatudlo sa aton nga likawan ining mga panimuot, nagahatag sang panudlo subong sang makita sa 1 Corinto 4:7; Colosas 3:​12, 13; kag Efeso 4:⁠29.

10. Ano ang nagapakita nga ang katawhan ni Jehova nakabenepisyo gikan sa pagbaton sa panudlo sang Biblia?

¹⁰ Bisan ang mga Cristiano dihimpit, ang pag-aplikar nila sa sining maayo nga panudlo nagabulig sing daku sa ila sa sining makahalanguyos nga mga tion. Ang Italyano nga magasin nga La Civiltà Cattolica nagsiling nga ang isa ka rason kon ngaa padayon nga nagadamo ang mga Saksi ni Jehova “amo nga ang hublag nagahatag sa iya mga katapo sing husto kag mabakod nga pagkilala.” Apang, ang buot silingon bala sang manunulat sa “mabakod nga pagkilala” amo ang “bugalon, palabilabihon, mapasipalahon”? Sa kabaliskaran, ang Jesuita nga magasin nagasiling nga ang hublag “nagahatag sa iya mga katapo sing husto kag mabakod nga pagkilala, kag isa ini ka duog para sa ila diin ginaabiabi sila sing mapagsik kag may paghiliutod kag paghiusa.” Indi bala maathag nga ang mga butang nga gintudlo sa mga Saksi nagabulig sa ila?

Ang Panudlo Nagabulig sa mga Katapo sang Pamilya

11, 12. Paano ginpakita sing husto ni Pablo kon mangin kaangay sang ano ang kahimtangan sang madamong mga pamilya?

¹¹ Mahimo naton magrupo ang masunod nga apat ka butang, nga may labot diutay sa isa kag isa. Si Pablo nagtagna nga sa katapusan nga mga adlaw, madamo ang mangin “malalison sa mga ginikanan, mga dimapasalamaton, mga dimatutom, mga wala sing kinaugali nga pagpalangga.” Nahibaluan mo nga ang duha sining mga depekto​—⁠ang dimapasalamaton kag dimatutom​—⁠lapnag. Sa gihapon, madali naton mahangpan kon ngaa ginlakip ini ni Pablo sa “malalison sa mga ginikanan” kag sa “mga wala sing kinaugali nga pagpalangga.” Ang apat may kaangtanan sa isa kag isa.

¹² Dapat gid batunon sang bisan sin-o nga mapanilagon nga tawo, bata man ukon tigulang, nga ang paglalis sa mga ginikanan lapnag, kag ini labi nga nagalain. Madamong mga ginikanan ang nagareklamo nga ang mga pamatan-on daw dimapasalamaton sa tanan nga ginahimo para sa ila. Madamong mga pamatan-on ang nagaprotesta nga ang ila mga ginikanan indi gid matutom sa ila (ukon sa pamilya sa kabilugan) kundi masako sa ila mga trabaho, mga kalipayan, ukon sa ila kaugalingon. Sa baylo nga tinguhaan nga hibaluon kon sin-o ang may sala, tan-awa ang mga resulta. Ang kal-ang sa ulot sang mga hamtong kag mga pamatan-on masunson nga nagadul-ong sa paghimo sang mga tin-edyer sang ila kaugalingon nga talaksan sa moralidad, ukon imoralidad. Ano ang resulta? Nagatimbuok nga kataason sang pagmabdos sang mga tin-edyer, mga aborsion, kag mga balatian nga tuga sang paghuliray. Sa masami, ang kakulang sing kinaugali nga pagpalangga sa puluy-an nagadul-ong sa kasingki. Ayhan masugid mo ang mga halimbawa gikan sa inyo lugar, pamatuod nga ang kinaugali nga pagpalangga nagakadula.

13, 14. (a) Bangod sang pag-usmod sang madamong mga pamilya, ngaa dapat naton hatagan sing igtalupangod ang Biblia? (b) Anong sahi sang maalamon nga laygay ang ginahatag sang Dios tuhoy sa pagkabuhi sang pamilya?

¹³ Ayhan amo ini ang rason kon ngaa dugang kag dugang nga mga tawo ang nagatalikod sa daw bahin anay sang ila tapik nga pamilya, sang pareho nga pamilya, tribo, ukon grupo. Apang, dumduma nga wala namon ginasambit ining mga butang agod padakuon ang mga negatibo sa kabuhi karon. Interesado kita sa duha ka butang: Ang mga panudlo sang Biblia makabulig bala sa aton nga malikawan ang pag-antos gikan sa mga sala nga ginlista ni Pablo, kag makabenepisyo bala kita gikan sa pag-aplikar sa mga panudlo sang Biblia sa aton kabuhi? Huo ang sabat, subong nga maathag sa sadtong apat ka punto sa listahan ni Pablo.

¹⁴ Ang kabilugan nga pinamulong makatarunganon: Wala sing panudlo ang nagalabaw sa Biblia sa pagpatubas sing pagkabuhi sang pamilya nga nagapahalipay sa tagipusuon kag may maayo nga kadalag-an. Ginapamatud-an ina sang isa lamang ka halimbawa sang laygay sini nga makabulig sa mga katapo sang pamilya indi lamang sa paglikaw sa mga siod kundi nga magmadinalag-on. Ginailustrar ina sing maayo sang Colosas 3:​18-21, bisan nga madamong iban pa nga matahom kag praktikal nga mga kasulatan ang ginpatuhoy sa mga bana, mga asawa, kag mga kabataan. Ina nga panudlo madinalag-on sa aton mga adlaw. Matuod, bisan sa mga pamilya sang matuod nga mga Cristiano, may mga problema kag mga hangkat. Apang, ang kabilugan nga mga resulta nagapamatuod nga ang Biblia nagaaman sing mabuligon gid nga panudlo sa mga panimalay.

15, 16. Ano nga kahimtangan ang nasapwan sang isa ka mananalawsaw sang gintun-an niya ang mga Saksi ni Jehova sa Zambia?

¹⁵ Sa isa ka tuig kag tunga, gintun-an sang mananalawsaw gikan sa University of Leth­bridge, Can­a­da, ang sosyal nga pangabuhi sa Zambia. Sia naghinakop: “Ang mga Saksi ni Jehova nakaagom sing mas daku nga kadalag-an sangsa mga katapo sang iban nga mga denominasyon sa paghupot sing malig-on nga pag-asawahay. . . . Ang ila kadalag-an nagarepresentar sang simple nga pagbayluhanay sing kaangtanan sa ulot sang bana kag asawa, nga, sa ila bag-ong natukiban, dimakatalagam, nagabuligay nga mga panikasog, nangin may salabton sa pagtratar nila sa isa kag isa sa bag-o nga pangulo, ang Dios. . . . Ang Saksi ni Jehova nga bana gintudluan nga maghamtong sa pag-abaga sang responsabilidad para sa ikaayo sang iya asawa kag kabataan. . . . Ang bana kag asawa ginapalig-on nga mangin mga indibiduwal nga may integridad . . . Ining nagapangibabaw nga pagkinahanglan sing integridad nagapabakod sang pag-asawahay.”

¹⁶ Ina nga pagtuon ginpasad sa madamong matuod nga mga eksperiensia. Halimbawa, ining mananalawsaw nagsiling nga kabaliskaran sa kinaandan nga kinabatasan, “ang mga Saksi ni Jehova nga mga lalaki mas masunson nga makita nga nagabulig sa ila mga asawa sa mga hardin, indi lamang sa tion sang paghawan, kundi sa pagtanom man kag sa paghabok.” Busa maathag nga ang dimaisip nga mga eksperiensia sa bug-os nga duta nagapakita nga ang panudlo sang Biblia nagatandog sang kabuhi.

17, 18. Ano ang makapakibot nga mga resulta sang isa ka pagtuon sa relihiosong tradisyon kag paghulid antes sang kasal?

¹⁷ Ginsambit sang naunang artikulo ang mga natukiban sang Journal for the Scientific Study of Religion. Sang 1991 nag-unod ini sang isa ka artikulo nga gintig-uluhan “Ang Relihiosong Tradisyon kag ang Paghulid Antes sang Kasal Pamatuod Gikan sa Pungsudnon nga Halimbawa sang Lamharon nga mga Hamtong.” Ayhan nahibaluan mo kon daw ano ka lapnag ang paghulid antes sang kasal. Sa lamharon nga edad madamo ang nagapadala sa silabo sa sekso, kag madamong tin-edyer ang nagahulid sa lainlain nga mga paris. Mabag-o bala sang mga panudlo sang Biblia ining kinaandan nga pagsulundan?

¹⁸ Ang tatlo ka magkaupod nga mga propesor nga nagtuon sa sini nagpaabot sa pagsapo ‘nga ang mga tin-edyer kag lamharon nga mga hamtong nga ginpadaku sa mas konserbatibo nga Cristianong tradisyon indi mahimo nga maghulid antes sang kasal.’ Apang ano ang ginapakita sang mga katunayan? Sa kabilugan, sa ulot sang 70 porsiento kag 82 porsiento ang naghulid antes sang kasal. Para sa iban “ang pundamentalista nga tradisyon [nagbuhin] sang posibilidad sang paghulid antes sang kasal, apang indi sa kaso sang ‘paghulid antes sang kasal sang mga tin-edyer.’ ” Ang mga mananalawsaw nagkomento tuhoy sa pila ka pamatan-on halin sa daw relihioso nga mga pamilya nga “nagpakita sing mas mataas nga posibilidad sang paghulid antes sang kasal kon ipaanggid sa tradisyonal nga mga Protestante.”​—⁠Italiko amon.

19, 20. Paano nabuligan kag naamligan sang panudlo sang Dios ang madamong pamatan-on sa tunga sang mga Saksi ni Jehova?

¹⁹ Nasapwan sang mga propesor ang kabaliskaran gid sa tunga sang mga pamatan-on sang mga Saksi ni Jehova, nga nalakip sa “grupo nga tuhay gid sa iban.” Ngaa? “Ang kasangkaron sang panaad kag sosyal nga pag-inupdanay nga tuga sang mga eksperiensia, mga pagpaabot, kag mga pagpakigbahin . . . sa kinaandan mahimo nga nakatuga sing mas mataas nga kasangkaron sang pagsunod sa mga prinsipio sang pagtuo.” Sila nagdugang: “Ang mga Saksi ginapaabot sa pagtuman sang mga responsabilidad sa pag-ebanghelyo subong mga tin-edyer kag lamharon nga mga hamtong.”

²⁰ Gani ang panudlo sang Biblia nakabulig sa mga Saksi ni Jehova sa paglikaw sa imoralidad. Nagaresulta ina sa pangamlig gikan sa mga balatian nga ginaliton paagi sa seksuwal nga paghulid, ang iban sini dimabulong kag ang iban pa makamamatay. Nagakahulugan ini nga wala sing pag-ipit nga magpaaborsion, nga ginatudlo sang Biblia nga katumbas sa pagpatay. Nagaresulta man ini sa lamharon nga mga hamtong nga mahimo magminyo nga may matinlo nga mga konsiensia. Nagaresulta ina sa mga pag-asawahay nga natukod sa mas mapag-on nga pundasyon. Amo ina ang panudlo nga makabulig sa aton sa paglandas, agod mangin mas mapagros, mas malipayon.

Positibo nga Panudlo

21. Anong mga butang ang gintagna sing husto ni Pablo sa aton tion?

²¹ Balikan naton karon ang 2 Timoteo 3:​3, 4, kag talupangda ang ginsiling pa ni Pablo nga nagahimo sang aton mga tion nga mabudlay atubangon para sa madamo​—⁠apang indi para sa tanan: “[Ang mga tawo] indi bukas sa bisan ano nga kasugtanan, mapatupatuon, wala sing pagpugong sa kaugalingon, mabangis, wala sing gugma sa kaayuhan, maluib, matig-a sing ulo, nagahabok sa pagpadayaw, [kag] mahigugmaon sa kinasadya sangsa mahigugmaon sa Dios.” Husto gid! Apang, ang panudlo gikan sa Biblia makaamlig sa aton kag makasangkap sa aton sa paglandas, sa pagdaug.

22, 23. Sa anong positibo nga laygay ginhinakpan ni Pablo ang iya listahan, kag ano ang kahulugan sini?

²² Ginatapos ni apostol Pablo ang iya listahan paagi sa paghatag sing laygay. Ginhimo niya ang katapusan nga bahin nga isa ka diosnon nga sugo nga makahatag man sa aton sing dimatakus nga kaayuhan. Ginasambit ni Pablo yadtong “may dagway sang diosnon nga debosyon apang nagapanghiwala sang gahom sini; kag sa ila magpalayo kamo.” Dumduma nga ang mga pamatan-on sa iban nga mga relihion aktuwal nga may mas mataas nga kadamuon sang paghulid antes sang kasal sangsa kinaandan. Ti, bisan kon ang imoralidad sadtong mga nagasimba yara lamang sa kinaandan nga kadamuon, indi bala ina pamatuod nga ang ila dagway sang pagsimba wala sing gahom? Dugang pa, ginabag-o bala sang relihiosong mga panudlo kon paano ang mga tawo nagapanghikot sa negosyo, kon paano sila nagapakig-angot sa mga kubos sa ila, kon paano nila ginatratar ang mga kaparyentehan?

²³ Ginapakita sang mga pinamulong ni Pablo nga dapat naton iaplikar ang natun-an naton gikan sa Pulong sang Dios, nga may paagi sang pagsimba nga nagapakita sing matuod nga gahom sang Cristianismo. Nahanungod sa sadtong ang dagway sang pagsimba wala sing gahom, si Pablo nagasugid sa aton: “Sa ila magpalayo kamo.” Maathag ina nga sugo, isa nga makahatag sa aton sing pat-od nga mga benepisyo.

24. Paano ang laygay sa Bugna kapitulo 18 nagaanggid sa laygay ni Pablo?

²⁴ Sa anong paagi? Ti, ginalaragway sang katapusan nga tulun-an sang Biblia ang malaragwayon nga babayi, ang makihilawason, nga ginatawag ang Babilonia nga Daku. Ginapakita sang pamatuod nga ang Babilonia nga Daku nagarepresentar sa bug-os kalibutan nga emperyo sang butig nga relihion, nga gin-usisa kag ginsikway ni Jehova nga Dios. Apang, indi kinahanglan nga malakip kita. Ang Bugna 18:4 nagalaygay sa aton: “Guwa ka sa iya, katawhan nakon, agod nga indi kamo makaambit sa iya mga sala, kag agod nga indi kamo makaagom sang iya mga kalalat-an.” Indi bala nga amo man sina ang mensahe nga ginpaalinton ni Pablo, “sa ila magpalayo kamo”? Ang pagsunod naton isa pa ka paagi diin makabenepisyo kita gikan sa panudlo sang Dios.

25, 26. Anong palaabuton ang ginatigana para sa mga nagabaton karon kag nagaaplikar sang panudlo gikan kay Jehova nga Dios?

²⁵ Sa dili madugay direkta nga magapasilabot ang Dios sa tawhanon nga mga hilikuton. Dulaon niya ang tanan nga butig nga relihion kag ang iban pa nga bahin sang karon malauton nga sistema. Mangin rason ina sang pagkasadya, subong sang ginapakita sang Bugna 19:​1, 2. Yadtong nagabaton kag nagasunod sang panudlo sang Dios sa duta pagatugutan sa pagsunod sing padayon sang iya mga panudlo kon ang mga problema sining makahalanguyos nga mga tion magataliwan.​—⁠Bugna 21:​3, 4.

²⁶ Ang pagpuyo sa sinang napasag-uli nga dutan-on nga Paraiso mangin makalilipay gid labaw sa mahanduraw naton. Ang Dios nagasaad nga posible ini para sa aton, kag makasalig kita sing bug-os sa iya. Busa nagahatag sia sa aton sing madamong rason sa pagbaton kag sa pagsunod sa iya mabuligon nga panudlo. San-o? Sundon naton ang iya mga panudlo karon sa aton makahalanguyos nga mga tion kag tubtob sa Paraiso nga ginasaad niya.​—⁠Miqueas 4:​3, 4.

Mga Punto nga Hunahunaon

◻ Paano nakabenepisyo ang katawhan ni Jehova gikan sa iya laygay nahanungod sa manggad?

◻ Ang isa ka Jesuita nga magasin nagpamatuod sa anong maayo nga resulta sa mga alagad sang Dios bangod sang pag-aplikar sang iya Pulong?

◻ Anong mga benepisyo ang natigayon sang mga pamilya nga nag-aplikar sang balaan nga panudlo subong sang ginpakita sang isa ka pagtuon sa Zambia?

◻ Anong pangamlig ang ginahatag sang balaan nga panudlo para sa mga pamatan-on?

[Kahon sa pahina 15]

DAW ANO KA DAKU NGA BILI!

“Ang mga tin-edyer may daku nga katalagman sa AIDS bangod luyag nila mag-eksperimento sa sekso kag droga, magpasimpalad kag magkabuhi para sa umalagi nga kalipayan, kag bangod ginabatyag nila nga indi sila mapatay kag ginabatuan ang awtoridad,” siling sang isa ka report nga ginpresentar sa komperensia sa AIDS kag mga tin-edyer.​—⁠New York Daily News, Domingo, Marso 7, 1993.

“Ang aktibo sa sekso nga mga tin-edyer nga kababayin-an amo ang masunod nga ‘manguna’ sa AIDS nga epidemia, suno sa natukiban sang isa ka pagtuon sang Nasyones Unidas sa Europa, Aprika kag South­east Asia.”​—⁠The New York Times, Biernes, Hulyo 30, 1993.

[Mga piktyur sa pahina 16, 17]

Ang panudlo sang Biblia nakabulig sa mga Saksi ni Jehova sa kongregasyon kag sa puluy-an