Paglab-ot sang Tagipusuon Paagi sa Arte sang Pagbuyok

GINATAMOD sang madamo nga tawo ang tinaga nga “pagbuyok” nga may duhaduha. Mahimo ini magapahangop sa isa ka masupog nga ahente ukon sa isa ka pasayod nga gindesinyo sa pagpatalang ukon sa pagdaya sa bumalakal. Bisan sa Biblia, ang ideya sang pagbuyok may negatibo nga kahulugan kon kaisa, nagapahangop sing pagpalain ukon pagpatalang. Halimbawa, nagsulat ang Cristianong si apostol Pablo sa mga taga-Galacia: “Nagadalagan kamo sing maayo. Sin-o ang nagapugong sa inyo sa pagtuman sa kamatuoran? Ini nga sahi sang pagbuyok wala maghalin sa Isa nga nagtawag sa inyo.” (Galacia 5:​7, 8) Nagpaandam man si Pablo sa mga taga-Colosas batok sa kay bisan sin-o ‘nga maglimbong sa ila sing mahayluhon nga mga pangatarungan.’ (Colosas 2:⁠4) Ina nga pagbuyok nasandig sa maayo nga mga pangatarungan nga napasad sa sayop nga mga sadsaran.

Apang, sa iya ikaduhang sulat kay Timoteo, gingamit ni apostol Pablo ang ideya nga pagbuyok sa lain nga kahulugan. Sia nagsulat: “Magpadayon ka sa mga butang nga imo natun-an kag ginbuyok nga tuuhan, nga nakahibalo kon kay sin-o nimo ini natun-an.” (2 Timoteo 3:14) Bangod ‘ginbuyok nga magtuo,’ si Timoteo wala ginpatalang sang iya iloy kag lola, nga paagi sa ila natun-an niya ang Makasulatanhon nga mga kamatuoran.​—⁠2 Timoteo 1:⁠5.a

Samtang napriso sa balay sa Roma, si Pablo nagpanaksi sing maid-id sa madamo, “naggamit sing pagbuyok sa ila may kaangtanan kay Jesus gikan sa kasuguan ni Moises kag sa mga Manalagna, kutob sa aga tubtob sa gab-i.” (Binuhatan 28:23) Ginpatalang bala ni Pablo ang iya tagpalamati? Wala gid! Busa, maathag nga ang pagbuyok indi pirme malain.

Gingamit sa positibo nga kahulugan, ang ginhalinan sang Griegong tinaga nga ginbadbad “pagbuyok” nagakahulugan sing pagkumbinsi, paghaylo nga bayluhan ang hunahuna paagi sa maayo, lohiko nga pangatarungan. Kon amo ang isa ka manunudlo mahimo makatukod sing isa ka Makasulatanhon nga sadsaran, nagagamit sing pagbuyok agod mapatudok sa iban ang pagtuo sa kamatuoran sang Biblia. (2 Timoteo 2:15) Sa pagkamatuod, isa ini ka tanda sang ministeryo ni Pablo. Bisan si Demetrio nga manugsalsal sing pilak, nga nagakabig sang Cristianong mga panudlo nga butig, nagsiling: ‘Indi lamang sa Efeso kundi halos sa bug-os nga distrito sang Asia ining Pablo nakabuyok sang isa ka daku nga kadam-an kag nakapaliso sa ila sa tuhay nga opinyon, nagasiling nga ang mga ginhimo sang kamot indi mga dios.’​—⁠Binuhatan 19:⁠26.

Paggamit Sing Pagbuyok sa Ministeryo

Ginsugo ni Jesus ang iya mga alagad: “Lakat kamo kag maghimo sing mga disipulo sa katawhan sang tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila sang tanan nga butang nga ginsugo ko sa inyo. Kag, yari karon! Kaupod ako ninyo sa tanan nga adlaw tubtob sa katapusan sang sistema sang mga butang.” (Mateo 28:​19, 20) Sa kapin 230 ka kadutaan, ginatuman sang mga Saksi ni Jehova ini nga sugo. Sa kada bulan sa ila 1997 nga tuig sang pag-alagad, nagdumala sila sing promedyo nga 4,552,589 ka pagtuon sa Biblia sa bug-os nga kalibutan.

Kon may pribilehiyo ikaw sa pagdumala sing pagtuon sa Biblia sa puluy-an, ayhan ginapaabot mo ang mga hangkat nga nagakinahanglan sing pagbuyok. Halimbawa, sa inyo masunod nga sesyon sa pagtuon, ang pamangkot tuhoy sa Trinidad magautwas. Ano kon nahibaluan mo nga ang imo estudyante nagapati sa sini nga doktrina? Mahimo mahatagan mo sia sing publikasyon nga nagapaathag sina. Sa tapos niya mabasa ini, masapwan mo nga nabuyok sia nga ang Dios kag si Jesus indi gali magkapareho. Apang kon may mga pamangkot gihapon, ano ang imo himuon?

Mamati sing maayo. Magabulig ini sa imo nga mahibaluan kon ano na ang ginapatihan sang imo estudyante tuhoy sa isa ka butang. Halimbawa, kon ang imo estudyante magsiling, “nagapati ako sa Trinidad,” mahimo nimo gilayon masugdan ang isa ka Makasulatanhon nga pagbinagbinag agod pamatud-an nga sayop ini nga doktrina. Apang nagakalainlain ang mga pagpati tuhoy sa Trinidad. Mahimo nga tuhay ang ginapatihan sang imo estudyante sangsa ginapahangop mo nga doktrina sang Trinidad. Mahimo nga amo man ini sa iban pa nga mga doktrina, subong sang reinkarnasyon, pagkadimamalatyon sang kalag, kag kaluwasan. Gani mamati sing maayo antes maghambal. Indi paghaumhauma ang mga ginapatihan sang estudyante.​—⁠Hulubaton 18:⁠13.

Magpamangkot. Mahimo ini maglakip sa: ‘Ginatuuhan mo gid bala ang Trinidad? Natun-an mo na bala sing maid-id ang ginasiling sang Biblia tuhoy sini? Kon ang Dios bahin gid man sang trinidad, indi bala ang iya Pulong, ang Biblia, magasugid sini sa aton sing maathag kag direkta?’ Kon nagatudlo sa estudyante, magdulog sing pulupanag-on agod makapamangkot sing subong sa: ‘Makatarunganon bala para sa imo ang aton na nabinagbinag?’ ‘Nagaugyon ka bala sa sining paathag?’ Paagi sa paggamit mo sing lantip nga mga pamangkot, ginalakip mo ang estudyante sa pagtuon. Indi lamang sia dapat mamati samtang ginapaathag mo ang isa ka butang.

Maggamit sing maayo nga pagpangatarungan. Kon nagabinagbinag sang doktrina sang Trinidad, halimbawa, mahimo makasiling ka sa imo estudyante: ‘Sang ginbawtismuhan si Jesus, isa ka tingog ang nabatian gikan sa langit, nga nagasiling: ‘Ikaw ang akon anak, ang hinigugma.’ Kon ang Dios gid man ang yari sa duta nga ginbawtismuhan, pasakaon bala niya sa langit kag pabalikon ang iya tingog agod yadtong mga pulong mabatian sa duta? Indi bala ini makapatalang? Ang Dios bala, “nga indi makabutig,” magahimo sinang malalangon nga buhat?’​—⁠Lucas 3:​21, 22; Tito 1:​1, 2.

Ang maayo nga pangatarungan nga ginapresentar sa mataktikanhon nga paagi masami nga epektibo. Binagbinaga ang halimbawa ni Barbara. Sa bug-os niya nga kabuhi, nagtuo sia nga si Jesus Dios kag bahin sang trinidad nga nagalakip sa balaan nga espiritu. Apang sang ulihi ginsugiran sia sang isa ka Saksi ni Jehova nga ang Dios kag si Jesus duha ka magkatuhay nga indibiduwal, kag ginpakita niya sa iya ang mga kasulatan nga nagasakdag sang iya ginasiling.b Indi mabais ni Barbara ang Biblia. Sa amo man nga tion, nagkasubo sia. Ti, ginapakamahal niya ang doktrina sang Trinidad.

Mapailubon nga nangatarungan ang Saksi upod kay Barbara. “Kon nagatinguha ka nga tudluan ako nga ang duha ka persona magkatupong,” pamangkot niya, “ano nga relasyon sa pamilya ang gamiton mo agod iilustrar ini?” Naghunahuna sia sing makadali kag nian nagsabat: “Mahimo gamiton ko ang duha ka mag-utod.” “Husto,” sabat sang Saksi. “Ayhan bisan ang kapid. Apang sa pagtudlo sa aton nga tamdon ang Dios subong ang Amay kag sia mismo subong ang Anak, ano nga mensahe ang ginapaalinton ni Jesus?” “Nahangpan ko na,” sabat ni Barbara, nga nagamurahag ang mga mata. “Ginalaragway niya ang isa subong magulang kag may labaw nga awtoridad.”

“Huo,” sabat sang Saksi, “kag ang Judiyong tagpalamati ni Jesus, nga nagakabuhi sa patriarka nga katilingban, nakahinakop sing amo gid sina.” Agod ipadaku ang iya punto, ang Saksi naghinakop: “Kon nakahimo kita sinang isa ka sibu nga ilustrasyon sa pagtudlo sing pagkatupong​—⁠sang mag-utod ukon sang kapid​—⁠pat-od nga si Jesus, ang Dakung Manunudlo, nakahimo man kuntani sing amo sina. Sa baylo, gingamit niya ang mga termino nga ‘amay’ kag ‘anak’ sa paglaragway sang relasyon sa tunga niya kag sang Dios.”

Nahangpan gid man ni Barbara ang punto, kag ginbaton niya ini. Ang iya tagipusuon nalab-ot paagi sa arte sang pagbuyok.

Pagpakig-angot sa mga Emosyon

Ang napasad sing mabakod nga relihiosong mga pagtuluuhan masami nga nagalakip sa emosyon. Binagbinaga ang halimbawa ni Edna, nga isa ka debotado nga Katoliko. Ginpresentar sa iya sang iya duha ka solterito nga apo ang maathag Makasulatanhon nga pamatuod nga ang Dios kag si Jesus indi isa ka persona. Nahangpan ni Edna ang iya nabatian. Walay sapayan sina, malulo apang malig-on sia nga nagsiling: “Nagatuo ako sa balaan nga Trinidad.”

Ayhan may kaanggid ka man nga eksperiensia. Ginatamod sang madamo ang mga doktrina sang ila relihion nga daw bahin na gid sang ila identidad. Agod mabuyok ina nga mga estudyante sang Biblia, indi lamang ang walay nadampigan nga pangatarungan ukon mga kasulatan nga nagapamatuod nga sayop ang iya pagtamod ang kinahanglanon. Sarang ini maathagan kon ang arte sang pagbuyok ginatimbangan sing kaawa. (Ipaanggid ang Roma 12:15; Colosas 3:12.) Matuod, ang epektibo nga manunudlo dapat may mabaskog nga mga kombiksion. Halimbawa, si Pablo naggamit sing mga prase subong sang ‘kumbinsido ako’ kag ‘ako nakahibalo kag nabuyok kay Ginuong Jesus.’ (Roma 8:38; 14:14) Apang, kon nagapabutyag sang aton mga kombiksion, indi kita dapat mangin dogmatiko, nagapakamatarong sa kaugalingon kon nagahambal, ukon mangin mayubiton ukon matinaastaason sa pagpresentar sing mga kamatuoran sa Biblia. Pat-od nga indi naton luyag nga saklawon ukon bisan insultuhon ang estudyante.​—⁠Hulubaton 12:⁠18.

Kapin pa ka epektibo nga tahuron ang mga pagpati sang estudyante kag kilalahon ang iya kinamatarong nga huptan ini. Ang pagkamapainubuson amo ang yabi. Ang isa ka manunudlo nga mapainubuson sing hunahuna wala nagabatyag nga duna sia nga labaw sa iya estudyante. (Lucas 18:​9-14; Filipos 2:​3, 4) Ang diosnon nga pagbuyok nagalakip sing pagkamapainubuson nga, sa katunayan, nagasiling: ‘Ginbuligan ako sing maluluy-on ni Jehova agod mahangpan ini. Ipaambit ko ini sa imo.’

Sa iya masigka-Cristiano sa Corinto, si Pablo nagsulat: “Ang mga hinganiban sang amon pagpakig-away indi kalibutanon, kundi may diosnon nga gahom sa paglumpag sang mga pamakod. Kami nagalumpag sang mga pagbais kag sang tagsa ka bugalon nga kaulangan batok sa pagkilala nahanungod sa ihibalo sang Dios; kag nagabihag sang tagsa ka hunahuna sa pagtuman kay Cristo.’ (2 Corinto 10:​4, 5) Sa karon, ginagamit sang mga Saksi ni Jehova ang Pulong sang Dios sa paglumpag sang napasad sing mabakod nga butig nga mga doktrina subong man sang nakapanggamot sing maayo nga mga pagginawi kag mga batasan nga wala nagapahamuot sa iya. (1 Corinto 6:​9-11) Sa paghimo sini, ginadumdom sang mga Saksi nga si Jehova mahigugmaon nga nagapailob sa ila. Daw ano ka malipayon sila nga makabaton sang iya Pulong, ang Biblia, kag magamit ining epektibo nga kasangkapan sa paggabot sa butig nga mga panudlo kag paglab-ot sa tagipusuon paagi sa arte sang pagbuyok!

[Mga footnote]

[Kahon sa pahina 23]

Paglab-ot sang Tagipusuon sang Imo Estudyante

◻ Magpangayo sing panuytoy ni Jehova sa pangamuyo nga malab-ot ang tagipusuon sang estudyante sa Biblia.​—⁠Nehemias 2:​4, 5; Isaias 50:⁠4.

◻ Hantupa kon ano ang ginapatihan sang estudyante kag kon ngaa naganyat sia sa sayop nga pagpati.​—⁠Binuhatan 17:​22, 23.

◻ Sa malulo, mapailubon nga paagi, magtukod sing lohiko, Makasulatanhon nga pangatarungan samtang nagapabilin nga may ginaugyunan.​—⁠Binuhatan 17:​24-34.

◻ Kon posible, palig-una ang mga kamatuoran sa Biblia paagi sa epektibo nga mga ilustrasyon.​—⁠Marcos 4:​33, 34.

◻ Ipakita sa estudyante ang mga benepisyo sang pagbaton sing sibu nga ihibalo gikan sa Biblia.​—⁠1 Timoteo 2:​3, 4; 2 Timoteo 3:​14, 15.