“Kutob sa Pagkalapsag Nahibaluan Mo”

SUNO sa sientipiko nga mga pagtuon sining karon lang, ang pagpakighambal sa mga lapsag nagaimpluwensia sing daku sa pagtubo sang ila mga utok, nagapalambo sang ila ikasarang sa paghunahuna, pagpangatarungan, kag paglubad sing mga problema. Amo gid sini ilabi na sa una nga tuig sang kabuhi sang lapsag. Ang International Herald Tribune nagreport nga ang pila ka mananalawsaw nagapati na karon nga “ang kadamuon sang mga tinaga nga mabatian sang lapsag kada adlaw amo gid ang labing importante nga makasugid sing abanse tuhoy sa ulihi nga kaalamon, kadalag-an sa eskwelahan kag kasangkol sa pagpakig-angot sa iban.”

Apang, ang ginahambal nga mga tinaga dapat maghalin sa isa ka tawo. Daw indi gid ini matal-usan sang telebisyon ukon sang radyo.

Ang isa ka neurosientipiko sa University of Washington sa Seattle, E.U.A. nagsiling: “Nahibaluan namon karon nga ang mga koneksion sa utok ginaporma sa maaga kaayo nga bahin sang kabuhi kag nga ang utok sang lapsag literal nga nagahulat sing mga eksperiensia agod hibaluon kon paano ginahimo ang mga koneksion. Sining karon gid lang namon nahisayran kon daw ano kaaga ining proseso nagasugod. Halimbawa, mahibaluan sang mga lapsag ang tunog sang ila tumandok nga lenguahe sa edad nga anom ka bulan.”

Ginasuay sang mga panalawsaw sining karon lang ang lapnag nga opinyon nga ang mga lapsag magaalam kon hatagan lamang sila sing bastante nga pagpalangga. Ginapadaku man sini ang pagkaimportante sang mga ginikanan sa pagtubo sang bata.

Nagapahanumdom ini sa aton sang mga pinamulong sang inspirado nga sulat ni apostol Pablo kay Timoteo: “Kutob sa pagkalapsag nahibaluan mo ang balaan nga mga sinulatan, nga makapaalam sa imo sa kaluwasan.” Mahimo gid nga ang balaan nga mga sinulatan, nga ginhambal sa lapsag nga si Timoteo sang iya tumuluo nga iloy kag lola, amo ang panguna nga kabangdanan sa iya pagtubo subong isa ka talalupangdon nga alagad sang Dios.​—⁠2 Timoteo 1:5; 3:⁠15.