Ang Katawhan Nagakinahanglan sing Ihibalo sang Dios

“Mahangpan mo ang kahadlok ni Jehova, kag makita mo ang ihibalo sang Dios.”​—⁠HULUBATON 2:⁠5.

 1. Ngaa masiling nga ang tawhanon nga tagipusuon isa ka obra-maestra sang pagpanugda sang Dios?

GINABANTA nga mga 5,600,000,000 ka tawhanon nga tagipusuon ang nagapitik sa duta sa sini gid nga oras. Sa kada adlaw, ang imo tagipusuon nagapitik sing 100,000 ka beses kag nagabomba sing 2,000 ka galon nga dugo sa 100,000 kilometros nga kaugatan sang imo lawas. Wala na sing iban pa nga maskulo ang makalabaw sa sining obra-maestra sang pagpanuga sang Dios.

 2. Paano mo ilaragway ang malaragwayon nga tagipusuon?

² May yara man 5,600,000,000 ka malaragwayon nga tagipusuon nga nagapangabudlay sa duta. Yara sa aton malaragwayon nga tagipusuon ang aton mga emosyon, mga motibasyon, kag mga handum. Sentro ini sang aton paghangop, panghunahuna, kag kabubut-on. Ang malaragwayon nga tagipusuon mahimo mangin bugalon ukon mapainubuson, masubo ukon masadya, nadulman ukon nasanagan.​—⁠Nehemias 2:2; Hulubaton 16:5; Mateo 11:29; Binuhatan 14:17; 2 Corinto 4:6; Efeso 1:​16-18.

3, 4. Paano nalab-ot sang maayong balita ang mga tagipu­suon?

³ Si Jehova nga Dios makabasa sang tagipusuon sang tawo. Ang Hulubaton 17:3 nagasiling: “Ang tunawan nga kolon para sa pilak kag ang hurno para sa bulawan, apang si Jehova ang nagausisa sang mga tagipusuon.” Apang, sa baylo nga basahon lamang ang tagsa ka tagipusuon kag imitlang ang paghukom, ginagamit ni Jehova ang iya mga Saksi sa paglab-ot sang tagipusuon sang tawo paagi sa maayong balita. Nagahisuno ini sa pinamulong ni apostol Pablo: “ ‘Ang bisan sin-o nga magtawag sa ngalan ni Jehova maluwas.’ Apang, paano ang pagpanawag nila sa iya nga wala nila matuuhi? Paano ang pagtuo nila sa iya nga wala nila mabatii? Paano ang pagkabati nila kon wala sing isa nga magbantala? Paano sila magbantala kon indi sila pag-ipadala? Subong sang nasulat na: ‘Daw ano katahom sang mga tiil sang mga nagabantala sing maayong balita sang maayong mga butang!’ ”​—⁠Roma 10:​13-15.

⁴ Nalipay si Jehova sa pagpadala sang iya mga Saksi sa tanan nga bahin sang duta agod ‘iwali ang maayong balita sang maayong mga butang’ kag pangitaon yadtong may mabinatunon nga mga tagipusuon. Nagadamo kita karon sing kapin sa 5,000,000​—⁠mga 1,200 ka tawo sa duta ang katumbas sang tagsa ka Saksi. Indi mahapos dalhon ang maayong balita sa binilyon ka tawo sang duta. Apang paagi kay Jesucristo ginatuytuyan ni Jehova ining hilikuton kag ginabuyok ang mga bunayag sing tagipusuon. Sa amo, nagamatuod ang tagna sa Isaias 60:22: “Ang diutay mangin isa ka libo, kag ang diutay mangin mabakod nga pungsod. Ako mismo, si Jehova, magapadali sini sa iya tion.”

 5. Ano ang ihibalo, kag ano ang masiling tuhoy sa kaalam sang kalibutan?

⁵ Ina nga tion amo na karon, kag isa ka butang ang maathag​—⁠ang binilyon ka tawo sang duta nagakinahanglan sing ihibalo. Ang ihibalo amo ang pagkasonar sa mga katunayan paagi sa eksperiensia, pagpanilag, ukon pagtuon. Ang kalibutan nakatipon sing madamo nga ihibalo. Ang patag sang transportasyon, pag-atipan sa lawas, kag komunikasyon nag-uswag. Apang kalibutanon gid bala nga ihibalo ang ginakinahanglan sang katawhan? Indi! Ang inaway, pagpigos, balatian, kag kamatayon nagapaantos gihapon sa katawhan. Ang kaalam sang kalibutan masami nga daw subong sang balas sa desyerto nga ginapalidpalid sang mabaskog nga hangin.

 6. Tuhoy sa dugo, paano mapaanggid ang ihibalo sang Dios sa kalibutanon nga kaalam?

⁶ Sa pag-ilustrar: Sang nagligad nga duha ka siglo, ang kinaandan nga pagpamulong amo ang pagpadugo sa isa ka tawo. Si George Washington, una nga presidente sang Estados Unidos, makapila nga ginpadugo sang nagahimumugto sia. Nakasiling pa gani sia: “Pabay-i na ninyo nga mapatay ako; indi na ako makapadugay.” Husto sia, kay sadto gid nga adlaw napatay sia​—⁠Disiembre 14, 1799. Sa karon, sa baylo sang pagpadugo, ginapadaku karon ang pagtayon sing dugo pasulod sa lawas sang tawo. Ang duha ka paagi lunsay ginaupdan sang makamamatay nga mga problema. Apang, sa sining tanan nga tion, ang Pulong sang Dios nagasiling: “Padayon kamo nga maglihi . . . sa dugo.” (Binuhatan 15:29) Ang ihibalo sang Dios husto pirme, praktikal, kag sibu sa tion.

 7. Paano mapaanggid ang sibu Makasulatanhon nga ihibalo sa kalibutanon nga kaalam kon tuhoy sa pagpadaku sa bata?

⁷ Binagbinaga ang isa pa ka halimbawa sang dimasaligan nga kaalam sang kalibutan. Tinuig na nga ginasakdag sang mga sikologo ang matinuguton nga pagpadaku sa bata, apang sang ulihi ginbaton sang isa sang mga sumalakdag sini nga sayop ini. Ang German Philo­logical Asso­ciation nagsiling anay nga ang pagkamatinuguton amo “sa dimagkubos ang indi direkta nga may salabton sa mga problema naton karon sa mga pamatan-on.” Ang kalibutanon nga kaalam mahimo nga nagabulubag-o subong nga daw ginapalidpalid sang hangin, apang ang sibu nga ihibalo sa Kasulatan dimationg. Ang Biblia nagahatag sing timbang nga laygay tuhoy sa paghanas sa bata. “Tadlunga ang imo anak kag magahatag sia sa imo sing pahuway kag magahatag sing daku nga kalipay sa imo kalag,” siling sang Hulubaton 29:17. Ina nga disiplina dapat ipadapat nga may gugma, kay si Pablo nagsulat: “Mga amay, dili ninyo pagpaakiga ang inyo mga anak, kundi sagura sila sa disiplina kag sa panghunahuna ni Jehova.”​—⁠Efeso 6:⁠4.

“Ang Ihibalo sang Dios”

8, 9. Paano mo ipaathag kon ano ang ginasiling sang Hulubaton 2:​1-6 nahanungod sa ihibalo nga ginakinahanglan gid sang katawhan?

⁸ Walay sapayan nga si Pablo isa ka edukado nga tawo, nagsiling sia: “Kon ang bisan sin-o sa inyo nagahunahuna nga maalam sia sa sining sistema sang mga butang, magmangin buangbuang sia, agod nga magmaalam sia. Kay ang kaalam sining kalibutan kabuangan sa Dios.” (1 Corinto 3:​18, 19) Ang Dios lamang ang makahatag sing ihibalo nga ginakinahanglan sang katawhan. Tuhoy sini, ang Hulubaton 2:​1-6 nagasiling: “Anak ko, kon batunon mo ang akon mga pulong kag pakabahandion ang akon mga sugo, sa paglingig sang imo dulunggan sa kaalam, sa pagpahamtang sang imo tagipusuon sa paghantop; kon, dugang pa, kon magtuaw ka para sa paghangop kag magbayaw sang imo tingog para sa paghantop, kon pangitaon mo ini subong sang pilak, kag mag-usisa sini subong sang mga bahandi nga natago, nian mahangpan mo ang kahadlok kay Jehova, kag makita mo ang ihibalo sang Dios. Kay si Jehova mismo nagahatag sing kaalam; gikan sa iya nagaguwa ang ihibalo kag paghantop.”

⁹ Ang mga tawo nga ginapahulag sang maayong tagipusuon nagapamati sa kaalam paagi sa nagakaigo nga pag-aplikar sang ihibalo nga ginahatag sang Dios. Mahinantupon ang ila tagipusuon, mahalungon nga ginatimbangtimbang ang mga katunayan nga ila ginatun-an. Daw subong bala nga nagatuaw sila para sa paghangop, ukon para sa ikasarang nga mahangpan kon paano ang nanuhaytuhay nga mga kinaiya sang isa ka butang nagainangtanay. Ang mga tawo nga may matarong nga tagipusuon nagapangabudlay nga subong bala nagakutkot sila sing pilak kag nagapangita sing mga bahandi nga natago. Apang ano ang dakung bahandi nga masapwan sang mga tawo nga may mabinatunon nga tagipusuon? Amo “ang ihibalo sang Dios.” Ano ina? Sa simple nga hambal, amo ini ang ihibalo nga yara sa Pulong sang Dios, ang Biblia.

10. Ano ang dapat naton himuon agod maagom ang maayong espirituwal nga kapagros?

¹⁰ Ang ihibalo sang Dios makatarunganon, malig-on, kag nagahatag sing kabuhi. Makapapagros ini sa espirituwal. Ginpalig-on ni Pablo si Timoteo: “Padayon ka nga magsunod sa huwaran sang makapapagros nga mga pulong nga nabatian mo sa akon upod sa pagtuo kag gugma nga may kaangtanan kay Cristo Jesus.” (2 Timoteo 1:13) Ang isa ka hambal may huwaran sang mga pulong. Sa kaanggid, ang “putli nga hambal” sang Makasulatanhon nga kamatuoran may yara “huwaran sang makapapagros nga mga pulong,” nga napasad sa tema sang Biblia nga amo ang pagbindikar sang pagkasoberano ni Jehova paagi sa Ginharian. (Sofonias 3:⁠9) Dapat naton huptan ining huwaran sang makapapagros nga mga pulong sa hunahuna kag tagipusuon. Agod indi magbalatian ang aton malaragwayon nga tagipusuon kag magpabilin kita nga mapagros sa espirituwal, dapat naton iaplikar ang Biblia sa aton kabuhi kag gamiton sing bug-os ang espirituwal nga aman sang Dios paagi sa “matutom kag mainandamon nga ulipon.” (Mateo 24:​45-47; Tito 2:⁠2) Dapat naton pirme dumdumon nga agod magpagros sa espirituwal, kinahanglan naton ang ihibalo gikan sa Dios.

11. Ano ang pila ka rason kon ngaa kinahanglan sang katawhan ang ihibalo gikan sa Dios?

¹¹ Binagbinaga ang iban pa nga mga rason kon ngaa kinahanglan sang binilyon ka tawo sa duta ang ihibalo gikan sa Dios. Nahibaluan bala nila tanan kon paano nagluntad ang duta kag ang katawhan? Wala. Kilala bala sang tanan nga katawhan ang matuod nga Dios kag ang iya Anak? Nahibaluan bala sang tanan ang mga hulusayon nga ginpautwas ni Satanas tuhoy sa pagkasoberano sang Dios kag sa integridad sang tawo? Sa liwat wala. Nahibaluan bala sang katawhan kon ngaa nagatigulang kita kag nagakapatay? Sa liwat magasiling kita nga wala. Nahibaluan bala sang tanan nga pumuluyo sang duta nga nagagahom na ang Ginharian sang Dios kag nga nagakabuhi na kita sa katapusan nga mga adlaw? Nahibaluan bala nila ang mga pahito sang hubon sang malaut nga mga espiritu? May yara bala ang tanan nga tawo sing masaligan nga ihibalo kon paano magmalipayon ang pamilya? Kag nahibaluan bala sang kadam-an nga ang makalilipay nga kabuhi sa Paraiso amo ang katuyuan sang aton Manunuga para sa matinumanon nga katawhan? Wala gihapon ang sabat sa sini man nga mga pamangkot. Sing maathag, nian, kinahanglan sang katawhan ang ihibalo gikan sa Dios.

12. Paano naton masimba ang Dios “sa espiritu kag kamatuoran”?

¹² Kinahanglan man sang katawhan ang ihibalo gikan sa Dios bangod sang ginsiling ni Jesus sa pangamuyo sa katapusan nga gab-i sang iya pagkabuhi sa duta. Ang iya mga apostoles mahimo nga napahulag sing tudok nga mabatian sia nga nagasiling: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag sa isa nga imo ginpadala, si Jesucristo.” (Juan 17:⁠3) Ang pag-aplikar sina nga ihibalo amo ang lamang nga paagi agod masimba ang Dios sing kalahamut-an. “Ang Dios Espiritu, kag ang mga nagasimba sa iya dapat magsimba sa espiritu kag kamatuoran,” siling ni Jesus. (Juan 4:24) Ginasimba naton ang Dios “sa espiritu” kon ginapahulag kita sing mga tagipusuon nga napun-an sing pagtuo kag gugma. Paano naton sia ginasimba ‘sa kamatuoran’? Paagi sa pagtuon sa iya Pulong kag sa pagsimba sa iya suno sa iya ginpahayag nga kamatuoran​—⁠“ang ihibalo sang Dios.”

13. Anong hitabo ang ginarekord sa Binuhatan 16:​25-34, kag ano ang matun-an naton gikan sa sini?

¹³ Linibo ang nagasugod sa pagsimba kay Jehova kada tuig. Apang, dapat bala naton padugayon ang pagtuon sa Biblia upod sa mga interesado, ukon posible bala nga mapadasig ang pagpabawtismo sang mga may bunayag sing tagipusuon? Ti, binagbinaga ang natabo tuhoy sa manugbantay sang bilangguan kag sa iya panimalay nga ginasambit sa Binuhatan 16:​25-34. Nabilanggo sanday Pablo kag Silas sa Filipos, apang sang tungang-gab-i, ginbuksan sang mabaskog nga linog ang mga ganhaan sang bilangguan. Sa pagdumdom nga nakapalagyo ang tanan nga bilanggo kag pat-od nga silutan sia, mahikog na kuntani ang manugbantay sang bilangguan sang nagsiling si Pablo nga yara sila tanan. ‘Ginhambal [ni Pablo kag ni Silas] ang pulong ni Jehova sa iya kag sa tanan nga yara sa iya panimalay.’ Ang manugbantay sang bilangguan kag ang iya pamilya mga Gentil nga wala sing nahibaluan sa Balaan nga Kasulatan. Apang, sadto mismo nga gab-i, nangin mga tumuluo sila. Indi lamang ina, “ang tagsatagsa, sia kag ang mga sa iya ginbawtismuhan.” Dikinaandan yadto nga mga kahimtangan, apang ang mga bag-uhan gintudluan sing sadsaran nga mga kamatuoran kag nian natun-an ang iban pa nga mga butang sa mga miting sang kongregasyon. Dapat posible man ini karon.

Ang Alanyon Daku!

14. Ngaa kinahanglanon ang pagdumala sing mas madamo nga mabungahon nga mga pagtuon sa Biblia sa mas malip-ot nga tion?

¹⁴ Maayo gid kon ang mga Saksi ni Jehova makadumala sing mas madamo nga mabungahon nga pagtuon sa Biblia sa malip-ot nga tion. Kinahanglan gid ini. Sa Nasidlangan nga Europa, halimbawa, ginalista ang mga tawo nga nagahulat sing pagtuon sa Biblia. Amo man sini sa iban nga mga duog. Sa isa ka banwa sang Dominican Republic, indi matatapan sang lima ka Saksi ang mga tawo nga luyag magtuon sing Biblia. Ano ang ginhimo nila? Ginpalig-on nila ang mga interesado nga magtambong anay sa mga miting sa Kingdom Hall samtang nagahulat sing pagtuon sa Biblia. Amo man sini ang kahimtangan sa madamong duog sa bug-os nga duta.

15, 16. Ano ang gin-aman agod mapalapnag sing mas madasig ang ihibalo gikan sa Dios, kag ano ang pila ka katunayan tuhoy sini?

¹⁵ Ang malapad nga mga teritoryo​—⁠dalagkung mga latagon para anihon​—⁠ginabuksan sa katawhan sang Dios. Walay sapayan nga si Jehova, “ang Agalon sang Alanyon,” nagapadala sing madamo pa nga mga manugpangabudlay, madamo gihapon ang dapat himuon. (Mateo 9:​37, 38) Gani, agod mapadasig ang pagpalapnag sang ihibalo gikan sa Dios, ang ‘matutom nga ulipon’ nag-aman sing malip-ot apang espesipiko nga impormasyon agod ang mga estudyante sa Biblia mag-uswag sa espirituwal sa tagsa ka leksion. Isa ini ka bag-ong publikasyon nga sarang matapos sing madasig sa mga pagtuon sa Biblia sa puluy-an​—⁠ayhan sa pila ka bulan lamang. Kag mahapos ini isulod sa aton brief­case, sa aton bag, ukon bisan sa aton bulsa! Ang mga ginatos ka libo nga nagtipon sa “Malipayon nga mga Dumalayaw” nga Distrito nga mga Kombension sang mga Saksi ni Jehova nalipay sa pagbaton sining bag-ong 192-ka-pahina nga libro nga natig-uluhan Ang Ihibalo nga Nagadul-ong sa Kabuhi nga Walay Katapusan.

¹⁶ Ang mga manunulat sa nanuhaytuhay nga pungsod gintangdo sa paghanda sing materyal nga mahalungon nga gintingob para sa Ihibalo nga libro. Sa amo, makagalanyat ini sa tanan nga pungsod. Apang madugay pa bala antes matigayon ining bag-o nga libro sa mga hambal sang katawhan sa bug-os nga kalibutan? Indi, bangod mas madali badbaron ang 192-pahina nga libro sangsa dalagku nga mga libro. Sugod sang Oktubre 1995, gin-aprubahan sang Writing Committee sang Nagadumala nga Hubon ang pagbadbad sining libro halin sa Ingles pakadto sa kapin sa 130 ka hambal.

17. Anong mga butang ang nagapahapos sang paggamit sa Ihibalo nga libro?

¹⁷ Ang espesipiko nga mga impormasyon sa tagsa ka kapitulo sang Ihibalo nga libro makabulig gid sa mga estudyante nga mag-uswag sing madasig sa espirituwal. Ang libro nagapresentar sang Makasulatanhon nga kamatuoran sa makapalig-on nga paagi. Wala sini ginatul-id ang butig nga mga doktrina. Bangod maathag ini kag lohiko, madali ini gamiton sa pagdumala sing pagtuon sa Biblia kag sa pagbulig sa mga tawo nga mahangpan ang ihibalo sang Dios. Dugang sa nabalikwat nga mga teksto, may yara nasitar nga mga teksto sa Biblia nga dapat palig-unon ang estudyante nga basahon sing abanse bilang paghanda para sa paghambalanay. Mahimo ini basahon sa tion sang pagtuon kon may panahon pa, apang indi maalamon nga ilakip ang dugang nga materyal nga mahimo magapalubog sa pangunang mga punto. Sa baylo, dapat panikasugan sang mga nagadumala sing pagtuon sa Biblia nga mahangpan kag mapaalinton sa estudyante ang punto nga ginapamatud-an sang libro sa tagsa ka kapitulo. Nagakahulugan ini nga dapat maukod nga tun-an anay sang manunudlo ining libro agod nga mag-athag gid sa iya hunahuna ang pangunang mga punto.

18. Ano ang mga panugda nahanungod sa paggamit sing Ihibalo nga libro?

¹⁸ Paano mapadasig sang libro nga Ang Ihibalo nga Nagadul-ong sa Kabuhi nga Walay Katapusan ang paghimo sing disipulo nga hilikuton? Ining 192-pahina nga libro sarang matun-an sa malip-ot lamang nga tion, kag yadtong “ginatangdo sing husto para sa kabuhi nga walay katapusan” makatuon sing bastante sa kalalangan sang ­pagtuon sini agod makadedikar kay Jehova kag makapabawtismo. (Binuhatan 13:48) Gani gamiton naton sing maayo ang Ihibalo nga libro sa ministeryo. Kon natun-an na sang isa ka estudyante sang Biblia ang daku nga bahin sang lain nga libro, ayhan praktikal nga tapuson niya ini. Kon indi, ginapanugda nga ang pagtuon sa Biblia igasaylo sa Ihibalo nga libro. Pagkatapos sining bag-ong publikasyon, wala ginapanugda nga magatuon pa sia sa ikaduhang libro. Yadtong nagabaton sang kamatuoran makahimpit sang ila ihibalo paagi sa pagtambong sa mga miting sang mga Saksi ni Jehova subong man paagi sa pagbasa sa Biblia kag sa lainlain nga Cristianong mga publikasyon sing kinaugalingon.​—⁠2 Juan 1.

19. Antes magdumala sing mga pagtuon sa Biblia sa Ihibalo nga libro, ngaa mabuligon nga repasuhon ang mga pahina 175 tubtob 218 sang Organisado sa Pagtuman sang Aton Ministeryo?

¹⁹ Ginsulat ang Ihibalo nga libro sa tuyo nga buligan ang isa ka tawo sa pagsabat sang tanan nga pamangkot nga ginarepaso sang mga gulang sa dibawtismado nga mga manugbantala nga nagahandum sa pagpabawtismo. Hanti, antes ninyo isaylo ang inyo karon mga ginatudluan sa Biblia sa sining bag-ong libro, ginarekomendar nga repasuhon anay ninyo ang mga pamangkot sa pahina 175 tubtob 218 sang libro nga Organisado sa Pagtuman sang Aton Ministeryo.a Magabulig ini sa inyo sa pagpadaku sang mga sabat sa sina nga mga pamangkot sa tion sang mga pagtuon sa Ihibalo nga libro.

20. Ano ang ginaplano ninyo nga himuon sa libro nga Ang Ihibalo nga Nagadul-ong sa Kabuhi nga Walay Katapusan?

²⁰ Dapat mabatian sang tanan nga katawhan ang maayong balita. Huo, kinahanglan gid sang katawhan ang ihibalo gikan sa Dios, kag si Jehova may iya mga Saksi sa pagpahibalo sini. May bag-ong libro na kita karon nga gin-aman sang aton mahigugmaon nga langitnon nga Amay paagi sa matutom kag mainandamon nga ulipon. Gamiton bala ninyo ini sa pagtudlo sing kamatuoran kag sa pagpadungog sa balaan nga ngalan ni Jehova? Si Jehova magapakamaayo gid sa inyo samtang nagapanikasog kamo nga ipaalinton sa madamo ang ihibalo nga nagadul-ong sa kabuhi nga walay katapusan.

[Footnote]

Paano Ninyo Sabton?

◻ Paano ninyo ilaragway ang malaragwayon nga tagipusuon?

◻ Ano ang ihibalo sang Dios?

◻ Ngaa ang ihibalo gikan sa Dios kinahanglanon sang katawhan?

◻ Anong bag-ong libro ang matigayon, kag paano ninyo ginaplano nga gamiton ini?

[Retrato sa pahina 10]

May madamong rason kon ngaa ang binilyon ka tawo sa duta nagakinahanglan sang ihibalo gikan sa Dios