“Dumilii ang Butig nga mga Sugilanon”

ANG Biblia puno sing mga eksperiensia kag mga sugilanon nahanungod sa mga tawo. Indi lamang nalipay kita sa pagbasa sini kundi nagabenepisyo man kita sa sini. Si apostol Pablo nagsulat sa Cristianong kongregasyon sa Roma: “Ang tanan nga butang nga ginsulat sadto anay ginsulat sa pagtudlo sa aton, agod nga paagi sa aton pagbatas kag paagi sa paglipay gikan sa Kasulatan may paglaum kita.”​—⁠Roma 15:⁠4.

Si Pablo mismo nag-ambit sa pagsugid sing mga eksperiensia. Ang Biblia nagasiling tuhoy kay Pablo kag kay Bernabe sa katapusan sang ila una nga paglibot subong mga misyonero: “Sang pag-abot nila [sa Antioquia sang Siria] kag natipon ang kongregasyon sing tingob, ginsugdan nila isugid ang madamo nga butang nga ginhimo sang Dios paagi sa ila.” (Binuhatan 14:27) Wala sing duhaduha nga napalig-on sing daku ang kauturan sining mga eksperiensia.

Apang, indi tanan nga eksperiensia makapalig-on. Sa idalom sang inspirasyon, ginpaandaman ni Pablo si Timoteo: “Dumilii ang butig nga mga sugilanon nga nagasumpakil sa kon ano ang balaan kag amo ang ginasugid sang tigulang nga mga babayi.” (1 Timoteo 4:⁠7) Kag kay Tito nagsulat sia nga ang matutom nga mga Cristiano “indi [dapat] magtalupangod sa Jinudiyo nga mga pabula kag sa mga sugo sang mga tawo nga nagatalikod sa kamatuoran.”​—⁠Tito 1:⁠14.

Ano ining butig nga mga sugilanon, ukon mga pabula? Ang duha ka termino naghalin sa Griego nga myʹthos (“mito”). Ang The International Standard Bible Encyclopaedia nagasiling nga ining tinaga nagalaragway sing “isa ka (relihioso) nga sugilanon nga wala sing kaangtanan sa katunayan.”

Ang kalibutan sang adlaw ni Pablo puno sina nga mga sugilanon. Ang isa ka halimbawa amo ang apokripal nga tulun-an sang Tobit, ayhan ginsulat kapin sa duha ka gatos ka tuig antes sang panahon ni Pablo. Ini nga sugilanon nagasugid tuhoy kay Tobit, isa ka relihioso nga Judiyo, nga nabulag sang mahulugan ang iya mga mata sing iti sang pispis. Sang ulihi, ginpadala niya ang iya anak, nga si Tobias, agod manukot sang isa ka pautang. Sa dalanon, sa pagtuytoy sang isa ka anghel, nakakuha si Tobias sing tagipusuon, atay, kag apdo sang isa ka isda. Masunod nasumalang niya ang isa ka babayi nga balo nga, bisan pa makapito na mamana, nagpabilin nga ulay gihapon bangod ang iya tagsa ka bana ginpatay sang isa ka demonyo sang gab-i sang kasal. Sa pagpahulag sang anghel, ginpakasalan sia ni Tobias kag natabog niya ang demonyo paagi sa pagsunog sang tagipusuon kag atay sang isda. Paagi sa apdo sang isda, napasag-uli ni Tobias sang ulihi ang panulok sang iya amay.

Maathag nga indi ini matuod nga sugilanon. Luwas nga malayo ini sa kinaandan nga nagakatabo kag sang pagkadisparatis sini, may sayop ini. Halimbawa, ang sugilanon nagasiling nga nasaksihan ni Tobit ang pag-alsa sang naaminhan nga mga tribo kag ang pagtapok sa mga Israelinhon sa Ninibe, mga hitabo sa maragtas sang Israel nga may lang-at nga 257 ka tuig. Apang, ang sugilanon nagasiling nga si Tobit 112 anyos sang mapatay sia.​—⁠Tobit 1:​4, 11; 14:​1, The Jerusalem Bible.

Ina nga mga pabula nagasumpakil sa maminatud-on nga “huwaran sang makapapagros nga mga pulong” nga ginabantala sang matutom nga mga alagad sang Dios. (2 Timoteo 1:13) Mga bunga ini sang handurawan, batok sa maragtason nga kamatuoran, ang sahi sang butang nga ginasugid sang didiosnon nga tigulang nga mga babayi. Amo ini anay ang mga sugilanon nga dapat dumilian sang mga Cristiano.

Pagtilaw sa mga Pulong sang Kamatuoran

Nagadamo karon ang kaanggid man sini nga mga sugilanon. Si Pablo nagsulat: “Magaabot ang isa ka hut-ong sang tion nga [ang mga tawo] indi magabatas sa makapapagros nga panudlo, kundi . . . italikod nila ang ila mga dulunggan gikan sa kamatuoran, samtang nagaliso sila sa butig nga mga sugilanon.” (2 Timoteo 4:​3, 4) Sa pila ka bahin sang duta, ang mga sugilanon tuhoy sa labaw sa kinaugali lapnag kag popular. Busa, ang mga Cristiano maalamon nga ‘nagatilaw sa mga pulong” sang relihioso nga mga sugilanon agod tan-awon kon nahisanto ini sa Biblia.​—⁠Job 12:⁠11.

Maathag nga madamo nga sugilanon ang wala nagahisanto sa Biblia. Sa madamo nga bahin sang kalibutan, halimbawa, kinaandan nga mabatian ang mga sugilanon nga nagasakdag sa ideya nga ang tawhanon nga kalag dimamalatyon. Ginalaragway sining mga sugilanon kon paano nagakapatay ang isa ka tawo, agod lamang magbalik liwat sa lawas sang isa ka bag-o matawo nga bata, subong isa ka espiritu, subong isa ka sapat, ukon subong isa ka persona sa tuhay nga duog.

Apang, ginapakita sang Pulong sang Dios nga ang tawhanon nga mga kalag indi dimamalatyon; ang mga kalag nagakapatay. (Ezequiel 18:⁠4) Dugang pa, ang Biblia nagasiling nga ang mga patay wala sing kabuhi sa lulubngan, wala sing ikasarang sa paghunahuna, sa paghambal, ukon sa paghimo sing bisan ano. (Manugwali 9:​5, 10; Roma 6:23) Sa amo, nagsiling si Pablo nga ang mga ginahaylo sang butig nga mga sugilanon nga nagasakdag sa ideya nga ang kalag dimamalatyon, “nagtalikod” sa “makapapagros nga panudlo” sang Biblia.

Mga Sugilanon Tuhoy sa Labaw sa Kinaugali

Ang iban nga mga sugilanon nagasentro sa mga buhat sang mga manughiwit kag mga diwatahan. Sa mga bahin sang Aprika, halimbawa, ining mga ahente sang kalautan ginasiling nga nasangkapan sing daku nga mga gahom, nga nagahatag sa ila sing ikasarang nga magbaylo sing dagway ang ila kaugalingon ukon himuon ang iban nga mangin mga reptilya, mga amo, kag mga pispis; ikasarang sa paglupad agod himuon ang ila mga misyon; ikasarang sa pagpangindulaan; ikasarang sa paglusot sa mga dingding; kag ikasarang nga makita ang mga butang nga nalubong sa duta.

Ang pagkabugana sina nga mga sugilanon, upod ang lapnag nga pagpati sa sini, mahimo nga magaimpluwensia sa pila sa Cristianong kongregasyon sa pagpati man nga matuod ini. Mahimo mangatarungan sila nga samtang indi ini masarangan sang normal nga mga tawo, masarangan ini sang mga nakabaton sing labaw sa tawo nga mga gahom gikan sa espiritu nga mga tinuga, ang mga demonyo. Ang daw sadsaran para sa sining konklusion amo ang 2 Tesalonica 2:⁠9, 10, nga nagasiling: “Ang pag-abot sang isa nga malinapason nagahisuno sa pagpanghikot ni Satanas nga may tagsa ka gamhanan nga buhat kag butigon nga mga tanda kag mga palatandaan kag may tagsa ka dimatarong nga pangdaya para sa mga nagakawala, subong balos bangod wala nila ginbaton ang gugma sa kamatuoran agod nga maluwas sila.”

Samtang matuod nga ginapakita sining kasulatan nga si Satanas may ikasarang sa gamhanan nga mga buhat, ginasambit sini nga si Satanas amo man ang awtor sang “butig nga mga tanda kag mga palatandaan,” subong man sang “dimatarong nga pangdaya.” Pirme ginapakita sang Biblia nga si Satanas amo ang puno nga manuglimbong nga “nagapatalang sa bug-os napuy-an nga duta.” (Bugna 12:⁠9) Sampaton sia sa pagpapati sa mga tawo sa mga butang nga indi matuod.

Bangod sini, bisan ang mga pagpamatuod kag mga pagtuad sang mga nadalahig sa espiritismo kag pagpangaswang masami nga indi gid masaligan. Ina nga mga tawo mahimo sinsero nga nagapati nga sila nakakita, nakabati, ukon nakaeksperiensia sing pila ka butang; apang, sa kamatuoran, wala. Halimbawa, may yara iban nga nagahunahuna nga nakakomunikar sila sa mga espiritu sang patay nga mga tawo. Apang sila nagsayop, ginlimbungan, mga biktima sang pangdaya ni Satanas. Ang Biblia nagasiling nga ang mga patay “nagapanaug sa kalinong.”​—⁠Salmo 115:⁠17.

Bangod sang madaya nga rekord sang Yawa, dapat duhaduhaan ang pagkamaminatud-on sang labaw sa kinaugali nga mga sugilanon. Ang kalabanan sini mga imbento sang disparatis nga mga pagpanghandurawan, ginpahabok sang sulitsulit nga pagpalatunlaton sini.

Ang pagpalapnag sa sinang mga pabula na­gapauswag sa mga interes sang amay sang kabu­tigan, si Satanas nga Yawa. (Juan 8:44) ­Ginapukaw sini ang interes sa mga buhat sang okultismo nga kalangil-aran kay Jehova. (Deuteronomio 18:​10-12) Ginasiod sini ang mga tawo sa lawa sang kahadlok kag disparatis. Indi katingalahan nga ginlaygayan ni Pablo ang mga Cristiano nga “indi . . . maghatag sing igtalupangod sa butig nga mga sugilanon.”​—⁠1 Timoteo 1:​3, 4.

Pagsikway sa Pamatuod sang mga Demonyo

Apang, ano kon ang mga sugilanon daw matuod? Kon kaisa may mga sugilanon nga ginasugid nga ang mga espiritu ukon mga espiritista nagakilala sa pagkasupremo ni Jehova kag sa pagkamaminatud-on sang iya mga Saksi. Dapat bala sulitsuliton sang mga Cristiano ina nga mga sugilanon?

Indi, indi dapat. Ang Biblia nagasiling nga sang magsinggit ang dimatinlo nga mga espiritu nga si Jesus Anak sang Dios, ‘malig-on [sia] nga nagsugo sa ila nga indi sia pag-ipakilala.’ (Marcos 3:12) Sing kaanggid, sang ginpahulag sang isa ka manugpamakot nga demonyo ang isa ka lin-ay nga ipakilala si Pablo kag si Bernabe subong “mga ulipon sang Labing Mataas nga Dios” kag mga manugbantala sang “dalanon sang kaluwasan,” gintabog ni Pablo ang espiritu gikan sa iya. (Binuhatan 16:​16-18) Wala pagtuguti ni Jesus, ni Pablo, ukon sang bisan sin-o sa mga manunulat sang Biblia ang mga demonyo nga magpamatuod nahanungod sa katuyuan sang Dios ukon sa iya pinili nga mga alagad.

Talalupangdon man nga si Jesucristo nagkabuhi anay sa duog sang mga espiritu antes sia magkari sa duta. Kilala niya si Satanas sing personal. Apang, wala paglingawa ni Jesus ang iya mga disipulo paagi sa mga sugilanon nahanungod sa mga hinimuan ni Satanas, ukon naghatag sia sing mga detalye nahanungod sa sarang mahimo kag indi mahimo sang Yawa. Si Satanas kag ang mga demonyo indi mga abyan ni Jesus. Sila mga tinabog, mga rebelde, mga manugdumot sa kon ano ang balaan, kag mga kaaway sang Dios.

Ginasugid sa aton sang Biblia kon ano ang dapat naton mahibaluan. Ginapaathag sini kon sin-o ang mga demonyo, kon paano nila ginapatalang ang mga tawo, kag paano naton sila malikawan. Ginapakita sini nga si Jehova kag si Jesus mas gamhanan sa mga demonyo. Kag ginatudluan kita sini nga kon kita mag-alagad sing matutom kay Jehova, ang malaut nga mga espiritu indi makahimo sa aton sing bisan anong permanente nga halit.​—⁠Santiago 4:⁠7.

Busa, upod ang maayong rason, ginadumilian sang mga Cristiano ang butig nga mga sugilanon, mga sugilanon nga nagapauswag lamang sa mga interes sang mga nagapamatok sa Dios. Subong nga si Jesus ‘nagpanaksi sa kamatuoran,’ amo man ang iya mga sumulunod karon. (Juan 18:37) Maalamon nga ginapamatian nila ang laygay sang Biblia: “Ang bisan anong butang nga matuod . . . padayon nga binagbinaga ining mga butang.”​—⁠Filipos 4:⁠8.

[Piktyur sa pahina 31]

Ang tanan nga pagpadayag sang okulto dapat likawan gid sang matuod nga mga Cristiano