Kapitulo Uno

Paghiusa sa Pagsimba sa Aton Tion​—Ano ang Kahulugan Sini?

1, 2. (a) Anong makakulunyag nga hublag ang nagakahanabo sa tion naton? (b) Ano ang makalilipay nga paglaum sang mga tawo nga bunayag sing tagipusuon?

SA BUG-OS nga kalibutan may yara makakulunyag nga hublag padulong sa paghiusa sa pagsimba. Ginatipon sini ang minilyon ka tawo sang tanan nga pungsod, tribo, kag hambal. Madamo pa ang ginatipon kada tuig. Ginapakilala sila sa Biblia nga “mga saksi” ni Jehova kag ginatawag nga “dakung kadam-an.” Nagahimo sila sa Dios sing “sagrado nga pag-alagad sa adlaw kag gab-i.” (Isaias 43:10-12; Bugna 7:9-15) Ngaa ginahimo nila ini? Bangod nakilala nila si Jehova subong ang lamang matuod nga Dios. Nagapahulag ini sa ila nga ipahisanto ang ila kabuhi sa iya matarong nga mga talaksan. Subong man, natun-an nila nga nagakabuhi kita sa “katapusan nga mga adlaw” sining karon nga malauton nga kalibutan, nga laglagon ini sang Dios sa dili madugay, kag buslan niya ini sang iya paraiso nga bag-ong kalibutan.​—2 Timoteo 3:1-5, 13; 2 Pedro 3:10-13.

² Ang Pulong sang Dios nagasaad: “Sa diutay pa nga tion, kag ang malauton wala na . . . Apang ang mga mahagop magapanag-iya sang duta, kag makasapo gid sila sing daku nga kalipay sa kabuganaan sang paghidait.” (Salmo 37:​10, 11) “Ang mga matarong magapanag-iya sang duta, kag magapuyo sila sing dayon sa sini.” (Salmo 37:29) “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”​—Bugna 21:4.

 3. Paano nagaluntad ang matuod nga paghiusa sa pagsimba?

³ Ang nahiusa karon sa matuod nga pagsimba amo ang magahuman sang nahauna nga mga pumuluyo sining bag-ong kalibutan. Natun-an nila kon ano ang kabubut-on sang Dios kag ginahimo nila ini sa bug-os nila nga masarangan. Agod ipakita ang pagkaimportante sini, si Jesus nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Si apostol Juan nagsulat: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.”​—1 Juan 2:17.

Kon Ano Gid ang Kahulugan Sini

 4. (a) Ano gid ang kahulugan sang pagtipon sa tuman kadamo sa nahiusa nga pagsimba sa tion naton? (b) Paano ginalaragway sang Biblia ini nga pagtipon?

⁴ Ano gid ang kahulugan sang pagtipon sa tuman kadamo sa matuod nga pagsimba sa tion naton? Maathag ini nga pamatuod nga malapit na kita katama sa katapusan sining malauton nga kalibutan, kag ang bag-ong kalibutan sang Dios magasugod sa gilayon pagkatapos sini. Mga saksi kita sa katumanan sang mga tagna sang Biblia nga nagtagna sining importante nga pagtipon. Ang isa sini nga tagna nagasiling: “Mahanabo sa ulihi nga bahin sang mga adlaw [sining katapusan nga mga adlaw] nga ang bukid sang balay ni Jehova [ang iya mataas nga matuod nga pagsimba] patindugon sing malig-on nga mataas pa sa putukputukan sang mga bukid [mataas sa bisan ano pa nga sahi sang pagsimba], . . . kag magadugok sa sini ang mga katawhan. Kag madamo nga pungsod ang magakadto kag magasiling: ‘Kari kamo, kag magtaklad kita sa bukid ni Jehova kag sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.’ ”​​—Miqueas 4:​1, 2; Salmo 37:34.

5, 6. (a) Paano ang mga pungsod nagaliso kay Jehova? (b) Ano nga mga pamangkot ang dapat naton ipamangkot sa kaugalingon?

⁵ Samtang wala ginapresentar sang tanan nga pungsod ang ila kaugalingon sa espirituwal nga balay ni Jehova sa pagsimba, minilyon ka indibiduwal gikan sa tanan nga pungsod ang nagahimo sini. Samtang ginatun-an nila ang mahigugmaon nga katuyuan kag ang makagalanyat nga personalidad ni Jehova nga Dios, ang ila tagipusuon napahulag sing daku. Mapainubuson nila nga ginapanikasugan nga mahibaluan kon ano ang luyag sang Dios nga himuon nila. Ang ila pangamuyo kaangay sa pangamuyo sang salmista nga nagsiling: “Tudlui ako sa paghimo sang imo kabubut-on, kay ikaw amo ang akon Dios.”​—Salmo 143:10.

⁶ Nahanduraw mo bala ang imo kaugalingon nga nalakip sa dakung kadam-an sang katawhan nga ginatipon karon ni Jehova sa nahiusa nga pagsimba? Ginapakita bala sang imo reaksion sa instruksion nga nabaton mo gikan sa iya Pulong nga imo gid ginaapresyar nga si Jehova ang Ginhalinan sini? Tubtob diin ka ‘magalakat sa iya banas’?

Kon Paano Ini Ginatigayon

 7. (a) Sa ano nga kasangkaron matigayon sa ulihi ang paghiusa sa pagsimba? (b) Ngaa madagmit nga mangin sumilimba ni Jehova karon, kag paano naton buligan ang iban nga himuon ini?

⁷ Katuyuan ni Jehova nga ang tanan nga intelihente nga tinuga mahiusa sa matuod nga pagsimba. Ginakalangkagan gid naton ang adlaw nga ang tanan nga nagakabuhi magasimba sa lamang matuod nga Dios! (Salmo 103:19-22) Apang antes ina matabo, dapat dulaon ni Jehova ang tanan nga nagadumili sa paghimo sang iya matarong nga kabubut-on. Sing maluluy-on, nagahatag sia sing abanse nga pahibalo kon ano ang pagahimuon niya, agod ang mga tawo bisan diin may higayon nga bag-uhon ang ila dalanon. (Isaias 55:​6, 7) Sa amo, sa aton adlaw “sa tagsa ka pungsod kag tribo kag hambal kag katawhan,” ining madagmit nga pangabay ginahimo: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom, kag simbaha ang Isa nga naghimo sang langit kag duta, sang dagat kag mga tuburan sang tubig.” (Bugna 14:​6, 7) Ginbaton mo bala ina nga imbitasyon? Kon amo, pribilehiyo mo nga agdahon ang iban pa nga makilala kag simbahon ang matuod nga Dios.

 8. Sa tapos matun-an ang sadsaran nga mga panudlo sang Biblia, ano pa nga pag-uswag ang dapat naton panikasugan sing hanuot?

⁸ Indi katuyuan ni Jehova nga simbahon sia sang mga tawo nga nagasiling nga nagatuo sila sa iya apang padayon nga nagahimud-os sang ila kaugalingon nga mga intereses. Luyag sang Dios nga ang mga tawo makadangat sa “sibu nga ihibalo sang iya kabubut-on” kag ipakita ini sa ila kabuhi. (Colosas 1:​9, 10) Sa amo, luyag sang mapasalamaton nga mga tawo nga nagatuon sang sadsaran nga mga panudlo sang Biblia nga magpadayon sa Cristianong pagkahamtong. Ang ila handum amo nga makilala sing maayo pa si Jehova, mapasangkad kag mapadalom ang ila paghangop sa iya Pulong, kag iaplikar ini sing labi pa sa ila kabuhi. Nagapanikasog sila nga ipabanaag ang mga kinaiya sang aton langitnon nga Amay kag tamdon ang mga butang subong sang pagtamod niya. Nagapahulag ini sa ila sa pagpangita sing mga paagi agod makapakigbahin sa nagaluwas-sing-kabuhi nga hilikuton nga ginapahimo niya sa duta sa aton adlaw. Amo man bala sina ang imo handum?​—Marcos 13:10; Hebreo 5:12–​6:3.

 9. Sa anong mga paagi posible karon ang matuod nga paghiusa?

⁹ Ginapakita sang Biblia nga ang mga nagaalagad kay Jehova dapat nga isa ka nahiusa nga katawhan. (Efeso 4:1-3) Ini nga paghiusa dapat magluntad karon, bisan pa nagakabuhi kita sa isa ka nabahinbahin nga kalibutan kag nagapakigsumpong gihapon sa aton di-kahimpitan. Si Jesus hanuot nga nangamuyo nga ang iya tanan nga disipulo mangin isa, nga may matuod nga paghiusa. Ano ang kahulugan sini? Una, dapat nga may maayo nga kaangtanan sila kay Jehova kag sa iya Anak. Ikaduha, dapat nga mahiusa sila sa isa kag isa. (Juan 17:​20, 21) Agod matigayon ini, ang Cristianong kongregasyon ginagamit subong ang organisasyon nga paagi sini ginatudluan ni Jehova ang iya katawhan.

Ano nga mga Butang ang Nagaamot sa Paghiusa?

10. (a) Ano ang ginapalambo naton kon personal naton nga ginagamit ang Biblia sa pagsabat sa mga pamangkot nga nagaapektar sa aton? (b) Analisaha ang mga butang nga nagaamot sa Cristianong paghiusa paagi sa pagsabat sa mga pamangkot nga nalista sa sining parapo.

¹⁰ Ginapakita sa ubos ang pito ka panguna nga butang nga nagaamot sa paghiusa sa pagsimba. Samtang ginasabat mo ang kaupod nga mga pamangkot, pamalandungi kon paano ang tagsa ka punto nagaapektar sang imo kaangtanan kay Jehova kag sa mga masigka-Cristiano. Ang pagpangatarungan sa sining mga punto kag ang pagpangita sa mga kasulatan nga ginsambit apang wala ginbalikwat magabulig sing daku sa pagpauswag sang imo diosnon nga kaalam, panghunahuna, kag paghantop​—mga kinaiya nga ginakinahanglan naton tanan. (Hulubaton 5:​1, 2; Filipos 1:9-11) Binagbinaga ining mga butang sing isa-isa.

(1) Ginabaton naton ang kinamatarong ni Jehova sa pagpahamtang sing talaksan kon ano ang maayo kag malain. “Magsalig kay Jehova sa bug-os mo nga tagipusuon kag indi magsandig sa imo kaugalingon nga paghangop. Sa tanan mo nga dalanon talupangda sia, kag tadlungon niya ang imo mga banas.”​—Hulubaton 3:​5, 6.

Ngaa dapat naton tinguhaan nga mahibaluan ang laygay kag panuytoy ni Jehova kon nagahimo sing mga desisyon? (Salmo 146:3-5; Isaias 48:17)

(2) May yara kita Pulong sang Dios nga magatuytoy sa aton. “Sang mabaton ninyo ang pulong sang Dios, nga nabatian ninyo sa amon, ginbaton ninyo ini, indi subong pulong sang mga tawo, kundi, kon ano gid ini sa pagkamatuod, subong pulong sang Dios, nga nagapanghikot man sa inyo nga mga nagatuo.”​—1 Tesalonica 2:13.

Ano ang katalagman sang paghimo kon ano lang ang “ginabatyag” naton nga husto? (Hulubaton 14:12; Jeremias 10:​23, 24; 17:9)

Kon wala kita makahibalo sang laygay nga ginahatag sang Biblia tuhoy sa isa ka butang, ano ang dapat naton himuon? (Hulubaton 2:3-5; 2 Timoteo 3:​16, 17)

(3) Kita tanan nagabenepisyo gikan sa isa lamang ka programa sang espirituwal nga pagpakaon. “Ang tanan mo nga anak mangin mga tawo nga gintudluan ni Jehova.” (Isaias 54:13) “Binagbinagon naton ang isa kag isa agod pukawon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang ginatan-aw ninyo nga nagapalapit ang adlaw [sang kalaglagan].”​—Hebreo 10:​24, 25.

Ano nga mga benepisyo ang maagom sadtong nagahimulos sing bug-os sang mga kahimusan ni Jehova para sa espirituwal nga pagpakaon? (Isaias 65:​13, 14)

(4) Si Jesucristo, kag indi tawo, ang aton Lider. “Indi kamo magpatawag nga Rabbi, kay isa lamang ang inyo manunudlo, samtang kamo tanan mag-ulutod. Dugang pa, indi kamo magtawag nga amay kay bisan sin-o nga tawo sa duta, kay isa lamang ang inyo Amay, ang Isa nga langitnon. Ni magpatawag kamo nga ‘mga lider,’ kay isa lamang ang inyo Lider, ang Cristo.”​—Mateo 23:8-10.

Dapat bala magpati ang bisan sin-o sa aton nga superyor kita sa iban? (Roma 3:​23, 24; 12:3)

(5) Ginapaabot naton ang panguluhan sang Ginharian sang Dios subong ang lamang nga paglaum para sa katawhan. “Mangamuyo kamo, nian, sa sining paagi: ‘Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, kon paano sa langit, subong man sa duta.’ Padayon, nian, nga pangitaa anay ang ginharian kag ang iya pagkamatarong.”​—Mateo 6:​9, 10, 33.

Paano ang ‘pagpangita anay sa ginharian’ nagabulig sa pag-amlig sang aton paghiusa? (Miqueas 4:3; 1 Juan 3:10-12)

(6) Ang balaan nga espiritu nagapatubas sa mga sumilimba ni Jehova sing mga kinaiya nga importante gid sa Cristianong paghiusa. “Ang mga bunga sang espiritu amo ang gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon.”​—Galacia 5:​22, 23.

Ano ang dapat naton himuon agod ang espiritu sang Dios magpatubas sing mga bunga sini sa aton? (Binuhatan 5:32)

Paano ang pagtigayon sang espiritu sang Dios nagaimpluwensia sang aton kaangtanan sa mga masigka-Cristiano? (Juan 13:35; 1 Juan 4:​8, 20, 21)

(7) Ang tanan nga matuod nga sumilimba sang Dios nagapakigbahin sa pagbantala sing maayong balita sang iya Ginharian. “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.”​—Mateo 24:14.

Ano ang dapat nga magpahulag sa aton agod makigbahin sing bug-os sa sining pagbantala nga hilikuton? (Mateo 22:37-39; Roma 10:10)

11. Kon ginaaplikar naton ang mga kamatuoran sang Biblia sa aton kabuhi, ano ang epekto?

¹¹ Ang nahiusa nga pagsimba kay Jehova nagapasuod sa aton sa iya kag nagabulig sa aton nga maeksperiensiahan ang makapapagsik nga pagpakig-upod sa mga masigkatumuluo. Ang Salmo 133:1 nagasiling: “Yari karon! Daw ano kaayo kag daw ano katahom sang mag-ulutod nga magpuyo sing tingob sa paghiliusa!” Daw ano ka makapapagsik nga makapalagyo gikan sa kalibutan kag sa tanan sini nga kakagod, imoralidad, kag kasingki kag makig-upod sa mga tunay nga nagahigugma kay Jehova kag nagatuman sang iya mga kasuguan!

Likawi ang Nagapabahinbahin nga Impluwensia

12. Ngaa dapat naton likawan ang espiritu sang pagkaindependiente?

¹² Gani agod indi maguba ang aton hamili kag bug-os kalibutan nga paghiusa, dapat naton likawan ang nagapabahinbahin nga mga impluwensia. Ang isa sini amo ang espiritu sang pagkaindependiente gikan sa Dios kag sa iya mga kasuguan. Si Jehova nagabulig sa aton nga malikawan ini paagi sa pagbuyagyag sang naghimuno sini, si Satanas nga Yawa. (2 Corinto 4:4; Bugna 12:9) Si Satanas amo ang nag-impluwensia kanday Adan kag Eva nga indi pagsapakon kon ano ang ginsiling sang Dios kag magdesisyon supak sa kabubut-on sang Dios. Ang resulta amo ang kapahamakan para sa ila kag para sa aton. (Genesis 3:1-6, 17-19) Ini nga kalibutan puno sing espiritu sang pagkaindependiente gikan sa Dios kag sa iya mga kasuguan. Gani dapat naton punggan ina nga espiritu sa aton.

13. Ano ang magapakita kon bala hanuot nga nagahanda kita para sa kabuhi sa matarong nga bag-ong kalibutan sang Dios?

¹³ Halimbawa, binagbinaga ang makakulunyag nga saad ni Jehova nga islan ang karon nga malauton nga kalibutan sing bag-ong mga langit kag bag-ong duta nga sa sini “magapuyo ang pagkamatarong.” (2 Pedro 3:13) Indi bala dapat nga magpahulag ini sa aton sa pagsugod sa paghanda sa pagkabuhi sa sina nga tion nga magaluntad ang pagkamatarong? Nagakahulugan ini sang pagpamati sa maathag nga laygay sang Biblia: “Indi ninyo paghigugmaa ang kalibutan ukon ang mga butang sa kalibutan. Kon ang bisan sin-o nagahigugma sang kalibutan, ang gugma sa Amay wala sa iya.” (1 Juan 2:15) Gani, ginalikawan naton ang espiritu sining kalibutan​—ang independiente nga panimuot sini, ang sobra nga pagkabalaka sini sa kaugalingon, ang imoralidad kag kasingki sini. Ginahimo naton nga batasan ang pagpamati kay Jehova kag ang pagtuman sa iya sing tinagipusuon, walay sapayan sang bisan ano man nga tuhay nga mga huyog sang di-himpit nga unod. Ang aton bug-os nga pagkabuhi nagapamatuod nga ang aton panghunahuna kag ang aton motibo ginatuytuyan sa paghimo sang kabubut-on sang Dios.​—Salmo 40:8.

14. (a) Ngaa importante nga himuslan ang kahigayunan karon nga tun-an ang mga dalanon ni Jehova kag himuon ini sa aton kabuhi? (b) Ano ang kahulugan sa aton sang mga kasulatan nga ginsambit sa parapo?

¹⁴ Kon ang gintalana nga tion magaabot agod laglagon ni Jehova ining malauton nga sistema sang mga butang kag ang tanan nga nagapili sang mga dalanon sini, indi sia magapalantang. Indi niya paisulon ina nga tion ukon islan ang iya mga talaksan agod pasundan ang mga nagatinguha pa nga manguyapot sa kalibutan samtang wala gid nagapanikasog sa pagtuon sang kabubut-on sang Dios kag sa paghimo sini. Karon na ang tion sa paghulag! (Lucas 13:​23, 24; 17:32; 21:34-36) Busa, daw ano ka makalilipay nga makita ang dakung kadam-an nga nagahimulos sining hamili nga kahigayunan, malangkagon nga nagatinguha nga matigayon ang instruksion nga ginaaman ni Jehova paagi sa iya Pulong kag organisasyon kag nahiusa nga nagalakat sa iya mga banas padulong sa bag-ong kalibutan! Kag sa labi nga pagtuon naton tuhoy kay Jehova, labi pa nga higugmaon kag alagaron naton sia.

Repaso nga Paghinun-anon

• Ano ang katuyuan ni Jehova tuhoy sa pagsimba?

• Sa tapos naton matun-an ang sadsaran nga mga panudlo sang Biblia, ano pa nga pag-uswag ang dapat naton panikasugan sing hanuot?

• Ano ang himuon naton subong indibiduwal agod mahiusa sa iban pa nga mga sumilimba ni Jehova?

[Retrato sa pahina 4]

‘Ang mga mahagop magapanag-iya sang duta kag makasapo sing daku nga kalipay sa kabuganaan sang paghidait’