Magpanaksi kay Jehova kag Indi Malapyo

“Talupangda sing maayo sia nga nagbatas sang amo nga pagsumpong sang mga makasasala . . . agod nga indi kamo paglapyuon kag pagpunawon sa inyo mga kalag.”​—⁠HEBREO 12:⁠3.

 1, 2. Anong makahalaylo nga pamatuod ang ginhatag ni Jesus sa iya mga disipulo nga sia ginbanhaw?

“NAKITA ko ang Ginuo!” Paagi sa sinang makakilibot nga mga pulong, ginbalita ni Maria Magdalena ang nahanungod sa pagkabanhaw ni Jesus. (Juan 20:18) Nagtanda ini sang pamuno sang 40 ka adlaw nga puno sang makakulunyag nga mga hitabo para sa mga disipulo ni Cristo, nga nagkasubo sang nagligad bangod sang iya kamatayon.

² Indi luyag ni Jesus magbilin sing pangduhaduha sa panghunahuna sang iya mga disipulo nga sia buhi sa pagkamatuod. Busa, subong sang panugiron ni Lucas: “Paagi sa madamong positibo nga pagpamatuod [si Jesus] nagpakita sa ila sang iya kaugalingon nga buhi sa tapos sang iya pag-antos, nga nagapakita sa ila sa sulod sang kap-atan ka adlaw.” (Binuhatan 1:3) Sa katunayan, sang isa ka bes “nagpahayag sia sa kapin sa lima ka gatos ka mga kauturan sa isa ka tion.” (1 Corinto 15:6) Sa pagkamatuod, wala na karon sing dapat pangduhaduhaan. Buhi si Jesus!

 3. Anong pamatuod nahanungod sa Ginharian ang ginpamangkot sang mga disipulo ni Jesus sa iya, kag ngaa nakibot sila sa iya sabat?

³ Sadto anay ang mga disipulo ni Jesus nagahunahuna lamang sing isa ka dutan-on nga “ginharian sang Dios,” isa nga ginpasag-uli sa Israel. (Lucas 19:​11; 24:21) Gani ginpamangkot nila si Jesus: “Ginuo, pasag-ulion mo bala ang ginharian sa Israel sa sining tion?” Walay duhaduha nga nakibot sila sa iya sabat, kay nagsiling sia: “Indi inyo ang paghibalo sang mga tion ukon mga dag-on nga ginpat-od sang Amay sa iya kaugalingon nga pagbulut-an; apang magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:​6-8) Isa gid ka hangkat karon ang ginbutang sa atubangan sang mga disipulo! Kag isa gid ka daku nga responsabilidad! Paano nila himuon ina nga hilikuton? Ang sabat nag-abot sang ulihi sa makakilibot nga paagi.

Pagbaton sa Hangkat

 4. Ilaragway kon ano ang natabo sang adlaw sang Pentecostes.

⁴ Si Lucas nagasugid: “Sang nag-abot na ang adlaw sang Pentecostes nagtipon sila tanan sa isa ka duog, kag sa hinali nag-abot ang hagunos gikan sa langit subong sang mamadlus nga hangin nga naghuyop, kag nagpuno sang bug-os nga balay diin sila naglingkod. Kag nagpahayag sa ila ang mga dila nga daw kalayo, nga natagtag kag nagatungtong sa tagsatagsa sa ila, kag napuno sila tanan sang balaan nga espiritu kag nagsugod sa pagpamulong sa iban nga mga hambal, suno sa paghambal nga ginhatag sa ila sang espiritu.” Tuman gid kagahod nga nagganyat ini sang igtalupangod sang kadam-an sang mga Judiyo nga yara sa Jerusalem para sa piesta. Natingala sila sa pagpamati sa ‘ila mga hambal sang dalagkung mga buhat sang Dios.’​—⁠Binuhatan 2:​1-11.

 5. Tubtob diin ang tagna ni Jesus sa Binuhatan 1:8 natuman?

⁵ Si Pedro wala mag-uyang sing tion sa paghatag sing dinamiko nga pamulongpulong, nagapamatuod sing indi mapangduhaduhaan nga “si Jesus nga Nazaretnon,” nga ginlansang nila, amo ang “Ginuo” nga gintagna ni David sa mga pulong: “Si Jehova nagsiling sa akon Ginuo: ‘Lingkod ka sa akon tuo, tubtob nga mahimo ko ang imo mga kaaway nga palatungan sang imo mga tiil.’ ” Nasuntok sa ila mga tagipusuon, ang mga nagapamati kay Pedro namangkot: “Mga kauturan, ano bala ang himuon namon?” Bilang sabat si Pedro naglaygay sa ila: “Hinulsol kamo, kag magpabawtismo ang tagsatagsa sa inyo sa ngalan ni Jesucristo sa kapatawaran sang inyo mga sala.” Ang resulta? Tatlo ka libo ang ginbawtismuhan! (Binuhatan 2:​14-41) Nahatag na ang panaksi sa Jerusalem. Sang ulihi, naglab-ot ini sa bug-os nga Judea, nian sa Samaria, kag sang ulihi “tubtob sa ukbong sang duta.” Tuman gid kadasig sang paglapnag sang pagbantala sang Ginharian nga hilikuton nga sang mga 60 C.⁠E. si apostol Pablo nakasiling nga ang maayong balita “ginwali sa bug-os nga tinuga sa idalom sang langit.”​—⁠Colosas 1:⁠23.

Pagpasangkad sang Ginharian kag Paghingabot

 6, 7. (a) Paano ang pagpasangkad sang Ginharian kag ang paghingabot sa mga Cristiano magkaupod sang unang siglo? (b) Anong madagmit nga kinahanglanon ang nag-utwas sa tunga sang mga Cristiano sa Jerusalem, kag paano napun-an ining kinahanglanon?

⁶ Wala madugay pagkatapos sang Pentecostes 33 C.⁠E., si Jesus may pangatarungan sa pagdumdom sang iya pulong: “Ang ulipon indi daku pa sa iya agalon. Kon ginhingabot nila ako, hingabuton man nila kamo.” (Juan 15:20) Ang Judiyong mga lider naakig sang “ang pulong sang Dios nagtubo, kag ang kadamuon sang mga disipulo nagdugang sing tama gid sa Jerusalem.” Bangod sang dimatuod nga panumbungon, si disipulo Esteban ginbato tubtob sa kamatayon. Daw amo yadto ang tanda nga ginhulat sang madamo, kay “sa sadtong adlaw nag-abot ang dakung paghingabot sa kongregasyon nga didto sa Jerusalem; kag sila tanan nag-aplaag sa bug-os nga mga ginsakpan sang Judea kag Samaria.”​—⁠Binuhatan 6:​7; 7:​58-60; 8:⁠1.

⁷ Ang paghingabot umalagi nga nag-ugdaw. Apang dili madugay pagkatapos sina, ginpatay ni Herodes Agripa I si apostol Santiago. Si Pedro nabilanggo apang ginbuy-an sang isa ka anghel. Sang ulihi ang mga kauturan sa Jerusalem nangin pigado sa materyal, kag ang bulig ginpadala sa ila sang mga masigkatumuluo sa iban nga lugar. (Binuhatan 9:​31; 12:​1-11; 1 Corinto 16:​1-3) Sa tion sang pagduaw ni apostol Pablo sa Jerusalem, ang panatisismo sa relihion makita samtang ang kadam-an nagsinggit: “Dulaa sa duta ang tawo nga subong sa iya, kay indi nagakaigo nga magkabuhi sia!” (Binuhatan 22:22) Sa pagkamatuod, ang mga Cristiano nga nagakabuhi sa Jerusalem kag Judea nagkinahanglan sing daku nga pagpalig-on agod padayon nga magpanaksi sing matutom nahanungod sa Ginharian. Si Jesus nagsaad sa iya mga disipulo nga “ang balaan nga espiritu, nga ipadala sang Amay sa akon ngalan,” magapanghikot subong “manugtabang.” (Juan 14:26) Apang paano karon ang Amay magahatag sing kinahanglanon nga bulig ukon paumpaw? Ang sabat, sing bahin, amo ang paagi kay apostol Pablo.

Ang Sulat ni Pablo sa mga Hebreo

 8. (a) Ano ang nagpahulag kay Pablo nga magsulat sa mga Hebreo? (b) Sa anong bahin sang iya sulat ihugod naton ang aton igtalupangod, kag ngaa?

⁸ Sang mga 61 C.⁠E., si Pablo ginbilanggo sa Roma, apang nakahibalo sia kon ano ang nagakatabo sa iya mga kauturan sa Jerusalem. Busa, sa idalom sang panuytoy sang espiritu ni Jehova, ginsulat niya ang iya suno sa tion nga sulat sa mga Hebreo. Puno ini sang mahigugmaon nga pag-ulikid sa iya Hebreo nga mga kauturan nga lalaki kag babayi. Nahibal-an ni Pablo kon ano ang ila ginakinahanglan agod mapalig-on ang ila pagtuo kag pagsalig kay Jehova subong ila Manugtabang. Nian sila ‘nagdalagan nga may pagbatas sang dalaganon nga ginabutang sa ila atubang’ kag masinaligon nga makasiling: “Si Jehova amo ang akon manugtabang; indi ako mahadlok. Ano bala ang himuon sang tawo sa akon?” (Hebreo 12:​1; 13:6) Sa sining bahin sang sulat ni Pablo sa mga Hebreo (kapitulo 11-13) nga luyag naton karon ihugod ang aton igtalupangod. Ngaa? Bangod ang kahimtangan nga gin-atubang sang unang mga Cristiano pareho sa ginaatubang sang mga Saksi ni Jehova karon.

 9. Anong isyu nga gin-atubang sang mga Cristianong sang unang siglo ang ginaatubang sang mga Cristiano karon, kag paano lamang ini masugata?

⁹ Sa sulod sang aton kaliwatan, ang mga kadam-an nagsabat sing positibo sa mensahe sang Ginharian paagi sa pagdedikar sang ila kaugalingon kay Jehova kag sa pagpabawtismo subong iya mga Saksi. Apang, kaupod sining pagpasangkad sang matuod nga pagsimba nag-abot ang masingki nga paghingabot, madamong Cristiano ang napatay subong kay Esteban, Santiago, kag iban pa matutom nga mga saksi sang unang siglo. Gani, ang isyu pareho karon sang nagligad: Sin-o ang makabatas sa pagtilaw sa ila integridad sa atubangan sang daku nga pagpamatok sa mensahe sang Ginharian? Dugang pa, sin-o ang makabatas sa makahalawhaw nga mga hitabo samtang ang dimatupongan nga “dakung kapipit-an” mahanabo sa dili madugay sa sining karon nga kaliwatan? (Mateo 24:21) Ang sabat amo, yadtong handa sa “pagpakig-away sang maayong pag-away sang pagtuo,” yadtong “malig-on sa pagtuo.” Amo ini sila ang makasiling sa ulihi: “Ini amo ang pagdaug nga nagadaug sang kalibutan, ang aton pagtuo.”​—⁠1 Timoteo 6:​12; 1 Pedro 5:​9; 1 Juan 5:⁠4.

Paghimulos sa Matutom nga mga Halimbawa

10. (a) Ano ang pagtuo? (b) Ano ang balatyagon sang Dios sa mga lalaki kag mga babayi sang unang tion?

¹⁰ Ano ang pagtuo? Si Pablo nagasabat: “Ang pagtuo amo ang kasigurohan sang mga butang nga ginalauman, ang pagpamatuod sang mga butang nga indi makita. Kay sa sini ang mga tawo sadtong una nga panahon ginpanaksihan.” (Hebreo 11:​1, 2) Nian ginsakdag ni Pablo ang iya depinasyon sang pagtuo paagi sa pagpakita sing pagtuo nga nagapanghikot. Gingamit niya ang mga talalupangdon sa kabuhi sang pila ka “mga tigulang,” subong man sang mga babayi kaangay nanday Sara kag Rahab. Makapalig-on gid makita nga “ang Dios wala mahuya nga pagtawgon nga ila Dios”! (Hebreo 11:16) Amo man bala sina ang masiling sang Dios sa aton pagtuo? Kabay nga wala naton sia ginahatagan sing butang nga ikahuya sa aton sa pagligad sang tagsa ka adlaw.

11. Paano kita karon makabenepisyo gikan sa ‘nagapalibot sa aton nga panganod sang mga saksi’?

¹¹ Pagkatapos sang kasaysayan sining matutom nga mga lalaki kag mga babayi, si Pablo nagasiling: “Busa, sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan kag ang sala nga nagatapik gid, kag magdalagan kita nga may pagbatas sang dalaganon nga ginabutang sa aton atubang.” (Hebreo 12:1) Bisan nagakatulog karon sa lulubngan, ining huaran nga matutom nga mga saksi buhi bala sa aton hunahuna? Kilala mo bala sila sing maayo kag ang ila mga eskperiensia sa pagsabat sing huo? Amo ini ang isa sa madamong mga padya sang regular nga pagtuon sang Biblia, nagagamit sang aton tanan nga igbalatyag sa pagbuhi liwat sa makakulunyag nga mga eksperiensia sining “panganod sang mga saksi.” Sa pagkamatuod, ang pagdumdom sa ila matutom nga halimbawa magabulig sa aton sing daku sa paglandas sa kakulang sang pagtuo. Magabulig man ini sa aton sa paghatag sing masidla kag walay kahadlok nga panaksi sa kamatuoran sa idalom sang tanan nga mga sirkunstansia.​—⁠Roma 15:⁠4.

Indi Maglapyo

12. (a) Paano kita mabuligan sang halimbawa ni Jesus nga indi ‘paglapyuon kag pagpunawon ang aton mga kalag’? (b) Ano ang pila sa karon-nga-adlaw nga mga halimbawa sadtong wala ginalapyo?

¹² Ang aton pinakadaku nga halimbawa sang pagtuo amo si Jesus. Si Pablo nagalaygay: “Magdalagan kita nga may pagbatas sang dalaganon nga ginabutang sa aton atubang, nga nagatulok sing hanuot sa Pangulo nga Ahente kag Manughimpit sang aton pagtuo, si Jesus. . . . Talupangda sing maayo sia nga nagbatas sang amo nga pagsumpong sang mga makasasala batok sa iya kaugalingon, agod nga indi kamo paglapyuon kag pagpunawon sa inyo mga kalag.” (Hebreo 12:​1-3) Daw ano ‘kaayo’ nga gintalupangod mo ang huaran ni Jesus? Daw ano ka ‘hanuot’ nagatulok ka sa iya? (1 Pedro 2:21) Luyag ni Satanas nga kita ‘lapyuon kag punawon sa aton mga kalag.’ Luyag niya nga mag-untat kita sa paghimo sang buluhaton sa pagpanaksi. Paano niya ini ginahimo? Kon kaisa paagi sa talangkod nga pagpamatok gikan sa relihioso kag kalibutanon nga mga awtoridad, subong sang nagligad nga siglo. Sang nagligad nga tuig, ang pagbantala sang Ginharian nga hilikuton gindumilian sa mga 40 ka pungsod. Apang ina bala naglapyo sa aton mga kauturan? Wala! Ang ila matutom nga hilikuton nagresulta sa 17,000 kag kapin pa nga nabawtismuhan sa sadtong mga kadutaan sang 1988. Dapat gid ini nga magpapagsik sa tanan nga nagapuyo sa mga pungsod diin may kahilwayan! Indi gid kita maglapyo sa pagbantala sang maayong balita sang Ginharian!

13. (a) Ano ang pila sa malalangon nga mga butang nga nagapalapyo sa aton sa aton pagbantala nga hilikuton? (b) Ano ang ‘kalipay nga nabutang sa atubangan ni Jesus,’ kag paano naton matigayon inang malipayon man nga panimuot?

¹³ Apang, may iban pa malalangon nga mga butang nga nagapalapyo sa aton. Nagalakip ini sang pagpamatok sa nabahinbahin nga puluy-an, problema sa hunahuna, problema sa kapagros, pag-ipit sang katubotubo, pagluya sing buot bangod sang kakulang sing positibo nga mga resulta sa aton pagbantala nga hilikuton, ukon ayhan pagbatyag sing dipagpailob bangod ang katapusan sining sistema sang mga butang wala pa mag-abot. Ti, ano ang nagbulig kay Jesus nga mabatas ang pag-antos sa hunahuna kag lawas? Amo ang “kalipay nga ginbutang sa iya atubang.” (Hebreo 12:2) Si Jesus ginsakdag sang kasadya nga nagapahalipay sa tagipusuon sang iya Amay paagi sa pagbindikar sa Iya kag paagi sa paghulat sing kalipay sa ulihi nga maagom niya sa pagtuman sa makatilingala nga mga pagpakamaayo sang Mesianikong Ginharian. (Salmo 2:​6-8; 40:​9, 10; Hulubaton 27:11) Mailog bala naton sing hanuot pa ining malipayon nga panimuot ni Jesus? Kag dumduma ang pasalig ni Pedro sa 1 Pedro 5:​9: “Ang amo man nga pag-antos ginakinahanglan sa inyo paghiliutod sa bug-os nga kalibutan.” Nakahibalo nga si Jehova nagahangop, nagabatyag sang kainit sang bug-os kalibutan nga paghiliutod, kag nagahugod sang aton mga mata sa mga kalipay sa unahan naton sa idalom sang pagginahom sang Ginharian​—⁠ini tanan magabulig sa aton nga indi maglapyo sa pag-alagad kay Jehova sa pagtuo kag sa pagbantala nga ang katapusan tuman na kalapit.

Kon Ngaa Nagadisiplina si Jehova

14. Anong mga benepisyo ang magaresulta gikan sa mga pagtilaw kag mga pag-antos nga batason naton?

¹⁴ Ginaathag karon ni Pablo ang rason kon ngaa mahimo kita magabatas sing mga pagtilaw kag mga pag-antos. Ginapakita niya nga tamdon naton ini subong isa ka dagway sang disiplina. Si Pablo nagapangatarungan: “Anak ko, dili pagtamaya ang disiplina ni Jehova, ukon mapunaw kon silutan ka niya; kay ang ginahigugma ni Jehova ginadisiplina niya.” (Hebreo 12:​5, 6) Bisan si Jesus “nakatuon sang pagkamasinulundon paagi sa iya gin-antos.” (Hebreo 5:8) Sa pagkamatuod, kinahanglan man kita magtuon sang pagkamasinulundon. Talupangda ang mapuslanon nga mga epekto sang pagtugot sa disiplina nga magdihon sa aton. Siling ni Pablo: “Sa mga nahanas sa sini, nagapatubas ini sing mahidaiton nga bunga, nga amo ang pagkamatarong.” Makapalig-on gid ina!​—⁠Hebreo 12:⁠11.

15. Paano naton maaplikar ang laygay ni Pablo nga ‘maghimo sing mga banas nga matadlong sa aton mga tiil’?

¹⁵ Kon ginabaton naton ang “disiplina ni Jehova” sa sining kapawa, dumdumon naton ang positibo nga laygay ni Pablo: “Busa bayawa ang nagapamuypuy nga mga kamot kag ang maluya nga mga tuhod pabakura, kag maghimo sing mga banas nga matadlong sa inyo mga tiil.” (Hebreo 12:​12, 13) Kon kaisa tuman kahapos ang magliw-as sa ‘masiput nga dalan nga nagapadulong sa kalaglagan.’ (Mateo 7:14) Si apostol Pedro kag ang iban pa sa Antioquia nakasala anay sa sini. Ngaa? Bangod “wala sila nagagawi sing matarong suno sa kamatuoran sang maayong balita.” (Galacia 2:14) Sa karon, dapat naton padayon nga pamatian ang aton Dakung Instruktor, si Jehova nga Dios. Dapat naton gamiton sing bug-os ang mga bulig nga ginahatag paagi sa “matutom kag mainandamon nga ulipon.” Nagapat-od ini sing ‘mga banas nga matadlong’ para sa aton mga tiil.​—⁠Mateo 24:​45-47; Isaias 30:​20, 21.

16. (a) Paano ang “makahililo nga gamut” mahanabo sa kongregasyon? (b) Ngaa gin-angot ni Pablo ang imoralidad sa kakulang sing apresasyon sa balaan nga mga butang, kag paano naton matipigan ang aton kaugalingon batok sa sinang mga katalagman?

¹⁶ Masunod nga nagpaandam si Pablo nga dapat naton ‘tatapon nga walay isa ang makulangan sang dibagay nga kaluoy sang Dios; nga walay makahililo nga gamut ang mag-ulhot kag magtublag sa inyo kag bangod sini madagtaan ang madamo.’ (Hebreo 12:15) Ang maakig, mangin dikontento, mangita sing sayop sa kon paano ginahimo ang mga butang sa kongregasyon mangin kaangay sang “makahililo nga gamut” nga maabtik nagalapta kag nagahilo sa maayong panghunahuna sang iban sa kongregasyon. Sarang naton mabatuan inang negatibo nga mga panghunahuna paagi sa pagpamalandong sa dimaisip nga mga pagpakamaayo nga gindala sang kamatuoran sa aton kabuhi. (Salmo 40:5) Ang isa pa ka katalagman amo ang imoral nga mga huyog ukon ‘kakulang sing apresasyon sa balaan nga mga butang, kaangay ni Esau.’ (Hebreo 12:16) Gin-angot sing tingob ni Pablo ining duha ka katalagman, bangod ang isa mahapos nga nagadul-ong sa isa pa. Ang Cristiano indi dapat magpadala sa sinang makagod nga mga kailigbon kon ginaaplikar niya ang mga pulong ni Pedro: “Sumpunga [ang Yawa], nga nagpangalig-on sa inyo pagtuo.”​—⁠1 Pedro 5:⁠9.

“Pagpamatuod sang mga Butang nga Indi Makita”

17. Ipaanggid ang makahalawhaw nga mga hitabo sa Bukid Sinai sa sadtong ginaatubang sang mga Cristiano karon.

¹⁷ Ang aton pagtuo nasandig gid sa “pagpamatuod sang mga butang nga indi makita.” (Hebreo 11:1) Ang iban sining dimakita nga mga pamatuod ginsambit ni Pablo sa Hebreo 12:​18-27. Ginalaragway niya ang makahalawhaw nga hitabo sa Bukid Sinai sang ang Dios nakighambal sing direkta sa Israel kag sang si Moises nagsiling: “Nagakurog ako sa kahadlok.” Nian ang apostol nagdugang: “Kundi nagapalapit kamo sa Bukid nga Sion kag sa siudad sang Dios nga buhi, ang Jerusalem nga langitnon, kag sa dimaisip nga mga anghel, sa malipayon nga pagtilipon.” Sa bahin sang dumaan nga mga Israelinhon sa Bukid Sinai, ang tingog sang Dios nagtay-ug sang duta, siling ni Pablo, apang karon Sia nagsaad, nga nagasiling: “Apang liwat pa pagatay-ugon ko indi lamang ang duta kundi man ang langit.” Bisan pa ining mga pulong una nga ginapatuhoy sa hinaplas nga mga Cristiano, ang “dakung kadam-an” sang iban pa katulad-karnero nagadumdom man sini. (Bugna 7:9) Ginaapresyar mo bala sing bug-os ang ginasiling ni Pablo? Nagatindog kita sa atubangan sang pagtilipon sang napulo ka libo ka anghel. Sa pagkamatuod, nagatindog man kita sa atubangan ni Jehova. Sa iya tuo nga kamot amo si Jesucristo. Sa pagkamatuod, yara kita sa labi pa ka makahalawhaw nga posisyon kag sa idalom sang daku pa nga responsabilidad sang sa dumaan nga mga Hebreo sa Bukid Sinai! Kag dumduma, ang pagtay-ug sang nagapakari nga inaway sang Armagedon magalaglag sa karon malaut nga langit kag duta. Sa pagkamatuod indi gid amo karon ang tion sa indi pagpamati sa Pulong sang Dios kag pagtuman sini!

18. Paano lamang kita padayon nga makapanaksi kay Jehova, nga wala ginalapyo?

¹⁸ Sa pagkamatuod, nian, nagakabuhi kita sa labi ka makahalawhaw nga tion sa maragtas sang tawo. Subong mga Saksi ni Jehova, ginpadala kita tubtob sa ukbong sang duta sa pagbantala sang maayong balita sang gintukod nga Ginharian sang Dios. Agod mahimo ini, dapat kita may pagtuo nga indi matay-ug, ang pagtuo nga wala nagalapyo, ang pagtuo nga nagahimo sa aton nga batunon ang disiplina ni Jehova. Kon may amo kita sina nga pagtuo, masapwan kita sa tunga sadtong “padayon nga may dibagay nga kaluoy, nga sa sini makadulot kita sa Dios sing balaan nga pag-alagad nga may diosnon nga kahadlok kag kahangawa.” (Hebreo 12:28) Huo, kag padayon kita nga magapanaksi kay Jehova kag indi magalapyo.

Paano Mo Sabton?

◻ Ngaa ang sulat ni Pablo sa mga Hebreo mapuslanon sa aton?

◻ Anong isyu ang dapat atubangon sang mga Cristiano karon?

◻ Paano kita makabenepisyo gikan sa matutom nga mga saksi sang una?

◻ Ngaa ginadisiplina ni Jehova yadtong ginahigugma niya?

◻ Ano ang yabi sang pagpanaksi nga wala ginalapyo?