Maghulag sa mga Saad sang Dios Paagi sa Pagpakita sing Pagtuo

“Ginhatag niya [Jehova nga Dios] sing hilway sa aton ang hamili kag tama kadaku nga mga saad.”​—⁠2 PEDRO 1:⁠4.

 1. Ano ang nagabulig sa aton sa pagpakita sing matuod nga pagtuo?

LUYAG ni Jehova nga magpakita kita sing pagtuo sa iya mga saad. Apang, “indi tanan may pagtuo.” (2 Tesalonica 3:⁠2) Ini nga kinaiya isa ka bunga sang balaan nga espiritu, ukon aktibo nga kusog, sang Dios. (Galacia 5:​22, 23) Gani, yadto lamang ang ginatuytuyan sang espiritu ni Jehova ang makapakita sing pagtuo.

 2. Paano ginapaathag ni apostol Pablo ang “pagtuo”?

² Apang ano ang pagtuo? Ginatawag ini ni apostol Pablo nga “maathag nga pamatuod sang mga katunayan bisan nga indi makita.” Ang pamatuod tuhoy sining indi makita nga mga katunayan tuman kabakod nga ang pagtuo ginpaanggid sa sini. Ang pagtuo ginasiling man nga “ang kasiguruhan sang mga butang nga ginapaabot” bangod ang nagapanag-iya sini nga kinaiya may garantiya nga ang tanan nga ginsaad ni Jehova nga Dios pat-od gid nga daw halos natuman na.​—⁠Hebreo 11:⁠1.

Ang Pagtuo kag ang mga Saad ni Jehova

 3. Ano ang maeksperiensiahan sang hinaplas nga mga Cristiano kon magpakita sila sing pagtuo?

³ Agod pahamut-an si Jehova, dapat kita magpakita sing pagtuo sa iya mga saad. Ginpakita ini ni apostol Pedro sa iya ikaduhang inspirado nga sulat, nga ginsulat sang mga 64 C.E. Ginpakita niya nga kon ang iya masigkahinaplas nga mga Cristiano magpakita sing pagtuo, makita nila ang katumanan sang “hamili kag tama kadaku nga mga saad” sang Dios. Subong resulta, “mangin umalambit [sila] sang kinaugali nga diosnon” subong mga masigkamanunubli ni Jesucristo sa langitnon nga Ginharian. Paagi sa pagtuo kag sa bulig ni Jehova nga Dios, nakalikaw sila gikan sa kahiulipnan sa malaut nga mga batasan kag mga buhat sining kalibutan. (2 Pedro 1:​2-4) Kag hunahunaa lamang! Ang mga nagapakita sing matuod nga pagtuo magaagom sing hamili man nga kahilwayan karon.

 4. Anong mga kinaiya ang dapat naton idugang sa aton pagtuo?

⁴ Ang pagtuo sa mga saad ni Jehova kag ang pagpasalamat sa aton hatag-sang-Dios nga kahilwayan dapat magpahulag sa aton nga himuon ang aton bug-os nga masarangan nga mangin huwaran nga mga Cristiano. Siling ni Pedro: “Tungod sini gid nga kabangdanan magtinguha sa pagdugang sa inyo pagtuo sang pagkatadlong, sa pagkatadlong idugang ang ihibalo, sa ihibalo ang pagpugong sang kaugalingon, sa pagpugong sang kaugalingon ang pagbatas, sa pagbatas ang diosnon nga debosyon, sa diosnon nga debosyon ang utudnon nga pagpalangga, sa utudnon nga pagpalangga ang gugma.” (2 Pedro 1:​5-7) Busa si Pedro nagahatag sa aton sing listahan nga mas maayo nga sauluhon naton. Binagbinagon naton sing maayo ini nga mga kinaiya.

Importante nga mga Elemento sang Pagtuo

 5, 6. Ano ang pagkatadlong, kag paano naton ini idugang sa aton pagtuo?

⁵ Si Pedro nagsiling nga ang pagkatadlong, ihibalo, pagpugong sa kaugalingon, pagbatas, diosnon nga debosyon, utudnon nga pagpalangga, kag gugma dapat idugang sa isa kag isa kag sa aton pagtuo. Dapat kita mangabudlay sing lakas agod himuon ini nga mga kinaiya nga importante nga mga elemento sang aton pagtuo. Halimbawa, ang pagkatadlong indi isa ka kinaiya nga ginapakita naton luwas sa pagtuo. Ang leksikograpo nga si W. E. Vine nagapakita nga sa 2 Pedro 1:​5, “ang pagkatadlong ginadugang subong kinahanglanon nga kinaiya sa pagpakita sing pagtuo.” Ang kada isa sang iban pa nga kinaiya nga ginsambit ni Pedro dapat man mangin elemento sang aton pagtuo.

⁶ Una, dapat naton idugang ang pagkatadlong sa aton pagtuo. Ang pagkatadlong nagakahulugan sang paghimo sing maayo sa itululok sang Dios. Para sa Griegong tinaga nga ginbadbad diri nga “pagkatadlong,” ang iban nga mga badbad nagagamit sing “pagkaayo.” (New International Version; The Jerusalem Bible; Today’s English Version) Ang pagkatadlong nagapahulag sa aton nga likawan ang paghimo sing malain ukon paghalit sa mga isigkatawo. (Salmo 97:10) Nagakinahanglan man ini sing maisog nga buhat sa paghimo sing maayo para sa espirituwal, pisikal, kag emosyonal nga kaayuhan sang iban.

 7. Ngaa dapat naton idugang ang ihibalo sa aton pagtuo kag pagkatadlong?

⁷ Ngaa nagalaygay si Pedro sa aton nga idugang ang ihibalo sa aton pagtuo kag pagkatadlong? Ti, samtang nagaatubang kita sing bag-ong mga hangkat sa aton pagtuo, kinahanglan naton ang ihibalo agod makilala naton ang husto gikan sa sala. (Hebreo 5:14) Paagi sa pagtuon sa Biblia kag eksperiensia sa pag-aplikar sang Pulong sang Dios kag sa pagpakita sing praktikal nga kaalam sa adlaw-adlaw nga pagkabuhi, ginadugangan naton ang aton ihibalo. Nian, nagabulig ini sa aton nga huptan ang aton pagtuo kag padayon nga himuon kon ano ang matadlong kon napaidalom kita sa pagtilaw.​—⁠Hulubaton 2:​6-8; Santiago 1:​5-8.

 8. Ano ang pagpugong sa kaugalingon, kag paano ini naangot sa pagbatas?

⁸ Agod buligan kita nga maatubang ang mga pagtilaw nga may pagtuo, kinahanglan nga idugang naton sa aton ihibalo ang pagpugong sa kaugalingon. Ang Griegong tinaga para sa “pagpugong sa kaugalingon” nagakahulugan sang ikasarang sa pagkontrol sang aton kaugalingon. Ini nga bunga sang espiritu sang Dios nagabulig sa aton sa pagpakita sing pagpugong sa hunahuna, hambal, kag paggawi. Paagi sa padayon nga pagpakita sing pagpugong sa kaugalingon, ginadugang naton sa sini ang pagbatas. Ang Griegong tinaga para sa “pagbatas” nagakahulugan sing maisugon nga pagkadimationg, indi ang masubo sing nawong nga pagbaton sa dimalikawan nga kabudlayan. Bangod sang kalipay nga ginbutang sa atubangan niya nga ginbatas ni Jesus ang usok sang pag-antos. (Hebreo 12:⁠2) Ang hatag-sang-Dios nga kusog nga ginaupdan sang pagbatas nagapabakod sang aton pagtuo kag nagabulig sa aton sa pagkalipay sa kapipit-an, sa pagbato sa pagsulay, kag sa paglikaw nga magkompromiso kon ginahingabot.​—⁠Filipos 4:⁠13.

 9. (a) Ano ang diosnon nga debosyon? (b) Ngaa dapat naton idugang ang utudnon nga pagpalangga sa aton diosnon nga debosyon? (c) Paano naton idugang ang gugma sa aton utudnon nga pagpalangga?

⁹ Sa aton pagbatas dapat naton idugang ang diosnon nga debosyon​—⁠pagtahod, pagsimba, kag pag-alagad kay Jehova. Ang aton pagtuo nagatubo samtang ginabuhat naton ang diosnon nga debosyon kag ginatan-aw kon paano si Jehova nagapakig-angot sa iya katawhan. Apang, agod ipakita ang pagkadiosnon, kinahanglan naton ang utudnon nga pagpalangga. Ti, “ang wala nagahigugma sa iya utod, nga iya makita, indi makahigugma sa Dios, nga wala niya makita.” (1 Juan 4:20) Ang aton tagipusuon dapat magpahulag sa aton sa pagpakita sing matuod nga pagpalangga para sa iban nga mga alagad ni Jehova kag sa pagtinguha nga maagom nila ang kaayuhan sa tanan nga tion. (Santiago 2:​14-17) Apang ngaa ginasilingan kita nga idugang ang gugma sa aton utudnon nga pagpalangga? Maathag nga ang buot silingon ni Pedro amo nga dapat kita magpakita sing gugma para sa tanan nga katawhan, indi lamang sa aton mga kauturan. Ini nga gugma ginapakita ilabi na paagi sa pagbantala sing maayong balita kag sa pagbulig sa mga tawo sa espirituwal.​—⁠Mateo 24:14; 28:​19, 20.

Baliskad nga mga Epekto

 10. (a) Paano kita magapanghikot kon ang pagkatadlong, ihibalo, pagpugong sa kaugalingon, pagbatas, diosnon nga debosyon, utudnon nga pagpalangga, kag gugma ginadugang sa aton pagtuo? (b) Ano ang matabo kon ang isa nga nagaangkon nga Cristiano kulang sining mga kinaiya?

¹⁰ Kon ginadugang naton ang pagkatadlong, ihibalo, pagpugong sa kaugalingon, pagbatas, utudnon nga pagpalangga, kag gugma sa aton pagtuo, kita magahunahuna, magapamulong, kag magapanghikot sa nahamut-an sang Dios nga mga paagi. Amo man, kon ang nagaangkon nga Cristiano mapaslawan sa pagpakita sini nga mga kinaiya, mangin bulag sia sa espirituwal. ‘Ginapiyong [niya] ang iya mga mata sa kapawa’ gikan sa Dios kag nagakalipat nga gintinluan na sia gikan sa nagligad nga mga sala. (2 Pedro 1:​8-10; 2:​20-22) Indi gid kita mapaslawan sa sinang paagi kag busa madulaan sing pagtuo sa mga saad sang Dios.

 11. Ano ang makatarunganon nga mapaabot naton sa matutom nga mga hinaplas?

¹¹ Ang matutom nga hinaplas nga mga Cristiano may pagtuo sa mga saad ni Jehova kag nagahimulat nga pat-uron ang pagtawag sa ila kag pagpili sa ila. Walay sapayan sang mga kasandaran sa ila banas, mapaabot naton nga sila magapakita sing diosnon nga mga kinaiya. Para sa matutom nga mga hinaplas ‘ginhatag sing bugana ang pagsulod sa ginharian nga dayon ni Jesucristo’ paagi sa pagbanhaw sa ila pakadto sa espiritu nga kabuhi sa langit.​—⁠2 Pedro 1:⁠11.

 12. Paano naton hangpon ang mga tinaga sang 2 Pedro 1:​12-15?

¹² Nahibaluan ni Pedro nga sa dili madugay sia mapatay, kag nagpaabot sia nga makabaton sing dayon nga pagkabanhaw pakadto sa langitnon nga kabuhi. Apang tubtob nga sia nagakabuhi sa “sining tabernakulo”​—⁠ang iya tawhanon nga lawas⁠—​gintinguhaan niya nga pabakuron ang pagtuo sang mga masigkatumuluo kag pukawon sila paagi sa pagpahanumdom sa ila sang mga butang nga kinahanglan para kahamut-an sang Dios. Sang magtaliwan sia sa kamatayon, ang espirituwal nga mga kauturan nga lalaki kag babayi ni Pedro makapabakod sang ila pagtuo paagi sa pagdumdom sang iya mga pulong.​—⁠2 Pedro 1:​12-15.

Pagtuo sa Matagnaon nga Pulong

 13. Paano ang Dios nag-aman sing nagapabakod sing pagtuo nga pamatuod nahanungod sa pagkari ni Cristo?

¹³ Ang Dios mismo naghatag sing makapabakod sing pagtuo nga pamatuod nahanungod sang pagkapat-od sang pagkari ni Jesus “nga may gahom kag daku nga himaya.” (Mateo 24:30; 2 Pedro 1:​16-18) Kulang sing pamatuod, ang paganong mga saserdote nagsugid sing butig nga mga sugilanon nahanungod sa ila mga dios, samtang sanday Pedro, Santiago, kag Juan mga saksi sang pagkahalangdon ni Cristo sa pagbaylo-dagway. (Mateo 17:​1-5) Nakita nila sia nga ginhimaya kag nabatian ang tingog mismo sang Dios nga nagakilala kay Jesus subong ang Iya hinigugma nga Anak. Ina nga pagkilala kag ang masanag nga dagway nga ginhatag sadto kay Cristo paghatag sing kadungganan kag himaya sa iya. Bangod sining balaan nga pagpahayag, gintawag ni Pedro ang lugar, ayhan ang alipukpukan sang Hermon, “ang balaan nga bukid.”​—⁠Ipaanggid ang Exodo 3:​4, 5.

 14. Paano ang pagbaylo-dagway ni Jesus dapat mag-apektar sang aton pagtuo?

¹⁴ Paano ang pagbaylo-dagway ni Jesus dapat mag-apektar sang aton pagtuo? Si Pedro nagsiling: “Gani napalig-on pa sa amon ang matagnaon nga pulong; kag maayo sa inyo nga magtalupangod kamo sini subong sang sa suga nga nagasiga sa duog nga madulom, tubtob sa pamanagbanag kag ang kabugwason magsubang sa inyo mga tagipusuon.” (2 Pedro 1:19) Ang “matagnaon nga pulong” ayhan naglakip indi lamang sang mga tagna sa Hebreong Kasulatan nahanungod sa Mesias kundi sa pinamulong man ni Jesus nga magakari sia nga “may gahom kag daku nga himaya.” Paano ang pulong “napalig-on pa” paagi sa pagbaylo-dagway? Ina nga hitabo nagpamatuod sang matagnaon nga pulong nahanungod sa mahimayaon nga pagkari ni Cristo nga may kagamhanan sa Ginharian.

 15. Ano ang nalakip sa pagtalupangod sa matagnaon nga pulong?

¹⁵ Agod pabakuron ang aton pagtuo, dapat naton talupangdon ang matagnaon nga pulong. Nagalakip ina sang pagtuon sa sinang pulong, nagahinun-anon sini sa Cristianong mga miting, kag nagaaplikar sang laygay sini. (Santiago 1:​22-27) Dapat naton ini tugutan nga mangin “suga nga nagasiga sa duog nga madulom,” nagasulo sang aton tagipusuon. (Efeso 1:18) Amo pa lang nga magatuytoy ini sa aton tubtob ang “bituon sa adlaw,” ukon, “ang masiga nga kabugwason,” si Jesucristo, magapahayag sang iya kaugalingon sa himaya. (Bugna 22:16) Ina nga pagpahayag magakahulugan sing kalaglagan para sa walay pagtuo kag pagpakamaayo para sa mga nagapakita sing pagtuo.​—⁠2 Tesalonica 1:​6-10.

 16. Ngaa makatuo kita nga ang tanan nga matagnaon nga mga saad sa Pulong sang Dios matuman?

¹⁶ Ang mga manalagna sang Dios indi maalam lamang nga mga tawo nga nagahimo sing maalamon nga mga pakot, kay si Pedro nagsiling: “Walay tagna sang Kasulatan nga maggikan sa kaugalingon nga pagpatpat. Kay wala gid sing tagna nga nag-abot bangod sa kabubut-on sang tawo, kundi ang mga tawo nga gintandog sang balaan nga espiritu nagpamulong gikan sa Dios.” (2 Pedro 1:​20, 21) Halimbawa, si David nagsiling: “Ang espiritu ni Jehova nagpamulong paagi sa akon.” (2 Samuel 23:​1, 2) Kag si Pablo nagsulat: “Ang tanan nga Kasulatan inspirado sang Dios.” (2 Timoteo 3:16) Sanglit ang mga manalagna sang Dios gin-inspirar paagi sa iya espiritu, makatuo kita nga ang tanan nga mga saad sa iya Pulong pagatumanon.

May Pagtuo Sila sa mga Saad sang Dios

 17. Anong saad ang sadsaran sang pagtuo ni Abel?

¹⁷ Ang mga saad ni Jehova amo ang sadsaran para sa pagtuo sang ‘dakung panganod’ sang iya mga saksi sa wala pa ang Cristianong dag-on. (Hebreo 11:1–12:⁠1) Halimbawa, si Abel nagtuo sa saad sang Dios nahanungod sa “binhi” nga magadugmok “sang man-ug” sa ulo. May pamatuod tuhoy sa pamatbat sang Dios sa mga ginikanan ni Abel. Sa guwa sang Eden, si Adan kag ang iya panimalay nagkaon sang tinapay sa balhas sang ila mga nawong bangod ang ginpakamalaut nga duta nagpatubas sing mga sapinit kag mga ragiwriw. Mahimo nga natalupangdan ni Abel ang paghandum ni Eva sa iya bana kag nakita nga gindominahan sia ni Adan. Pat-od nga ginmuno ni Eva ang kasakit sang iya pagmabdos. Kag ang gawang sang katamnan sang Eden ginbantayan sang mga kerubin kag sang nagaidlab nga espada nga nabalabad. (Genesis 3:​14-19, 24) Ini tanan naghuman sang “maathag nga pamatuod” nga nagpasalig kay Abel nga ang kaluwasan magaabot paagi sa ginsaad nga Binhi. Nagpanghikot sa pagtuo, si Abel naghalad sa Dios sing halad nga mas daku ang bili sangsa iya ni Cain.​—⁠Hebreo 11:​1, 4.

 18, 19. Sa anong mga paagi sanday Abraham kag Sara nagpakita sing pagtuo?

¹⁸ Ang mga patriarka nga sanday Abraham, Isaac, kag Jacob nagtuo man sa mga saad ni Jehova. Si Abraham nagpakita sing pagtuo sa saad sang Dios nga ang tanan nga panimalay sa duta pakamaayuhon paagi sa iya kag nga ang iya binhi pagahatagan sing duta. (Genesis 12:​1-9; 15:​18-21) Ang iya anak nga si Isaac kag apo nga si Jacob “mga manunubli kaupod niya sina man nga saad.” Paagi sa pagtuo si Abraham “nagpuyo subong dumuluong sa duta nga ginsaad” kag naghulat “sang siudad nga may matuod nga mga sadsaran,” ang langitnon nga Ginharian sang Dios nga sa idalom sini pagabanhawon sia pa kabuhi sa duta. (Hebreo 11:​8-10) May amo man bala kamo sina nga pagtuo?

¹⁹ Ang asawa ni Abraham, si Sara, mga 90 anyos kag lampas na sa edad sa pagpanganak sang nagpakita sia sing pagtuo sa saad sang Dios kag nakabaton sing gahom sa “pagpanamkon sa binhi” kag nagbun-ag kay Isaac. Busa, halin sa 100-anyos nga si Abraham, “nga daw patay na” kon tuhoy sa pagpanganak, “natawo [sang ulihi] ang mga kaliwatan nga subong kadamo sang mga bituon sang langit.”​—⁠Hebreo 11:​11, 12; Genesis 17:​15-17; 18:11; 21:​1-7.

 20. Bisan pa wala makita sang mga patriarka ang bug-os nga katumanan sang mga saad sang Dios sa ila, ano ang ginhimo nila?

²⁰ Ang matutom nga mga patriarka napatay nga wala makita ang bug-os nga katumanan sang saad sang Dios sa ila. Apang, “nakita nila [ang ginsaad nga mga butang] sa malayo kag naabiabi ini kag napahayag sing dayag nga sila mga dumuluong kag umalagi nga mga pumuluyo sang duta.” Nagtaliwan ang mga kaliwatan antes ang Ginsaad nga Duta nangin pagkabutang sang kaliwat ni Abraham. Apang, sa bug-os nila nga kabuhi, ang mahinadlukon sa Dios nga mga patriarka nagpakita sing pagtuo sa mga saad ni Jehova. Bangod wala gid sila madulai sing pagtuo, sa dili madugay pagabanhawon sila pa kabuhi sa dutan-on nga sakop sang “siudad” nga ginhanda sang Dios para sa ila, ang Mesianikong Ginharian. (Hebreo 11:​13-16) Sa kaanggid nga paagi, ang pagtuo magahupot sa aton nga matutom kay Jehova bisan pa indi naton makita ang gilayon nga katumanan sang tanan niya nga makatilingala nga mga saad. Ang aton pagtuo magapahulag man sa aton nga tumanon ang Dios, subong sang ginhimo ni Abraham. Kag subong nga ginliton niya ang espirituwal nga palanublion sa iya kaliwat, mabuligan man naton ang aton mga anak sa pagpakita sing pagtuo sa hamili nga mga saad ni Jehova.​—⁠Hebreo 11:​17-21.

Ang Pagtuo Kinahanglanon Para sa mga Cristiano

 21. Agod mangin kalahamut-an sa Dios karon, ano ang dapat naton ilakip sa aton pagpakita sing pagtuo?

²¹ Sa pagkamatuod, may kapin pa sa pagtuo sangsa pagsalig sa katumanan sang mga saad ni Jehova. Sa bug-os nga maragtas sang tawo, kinahanglan nga magpakita kita sing pagtuo sa Dios sa lainlain nga paagi agod maagom naton ang iya kahamuot. Ginpakita ni Pablo nga “sa walay pagtuo indi mahimo ang pagpahamuot [kay Jehova nga Dios], kay ang nagapalapit sa Dios kinahanglan magtuo nga amo sia kag nga sia manugbalos sang mga nagapangita sing hanuot sa iya.” (Hebreo 11:⁠6) Agod mangin kalahamut-an kay Jehova karon, ang isa ka tawo dapat magpakita sing pagtuo kay Jesucristo kag sa halad nga gawad nga gin-aman sang Dios paagi sa iya. (Roma 5:8; Galacia 2:​15, 16) Subong ini sa ginsiling ni Jesus mismo: “Ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan. Ang nagatuo sa Anak may kabuhi nga walay katapusan; ang wala nagatuman sa Anak indi makakita sang kabuhi, kundi ang kasingkal sang Dios nagapabilin sa iya.”​—⁠Juan 3:​16, 36.

 22. Ang Mesianikong Ginharian magatuman sang anong saad?

²² Si Jesus may importante nga papel sa katumanan sang mga saad sang Dios nahanungod sa Ginharian nga ginapangamuyo sang mga Cristiano. (Isaias 9:​6, 7; Daniel 7:​13, 14; Mateo 6:​9, 10) Subong sang ginpakita ni Pedro, ang pagbaylo-dagway nagpamatuod sa matagnaon nga pulong tuhoy sa pagkari ni Jesus nga may gahom kag himaya sang Ginharian. Ang Mesianikong Ginharian magatuman sang isa pa ka saad sang Dios, kay si Pedro nagsulat: “Suno sa iya saad nagahulat kita sing bag-ong mga langit kag bag-ong duta diin nagapuyo ang pagkamatarong.” (2 Pedro 3:13) Ang kaanggid nga tagna natuman sang ang Judiyong mga tinapok sa Babilonia ginpasag-uli sa ila tumandok nga duta sang 537 B.C.E. sa idalom sang panguluhan nga si Zorobabel ang gobernador kag si Josue ang mataas nga saserdote. (Isaias 65:17) Apang gintudlo ni Pedro ang isa ka palaabuton nga tion nga ang “bag-ong mga langit”​—⁠ang langitnon nga Mesianikong Ginharian⁠—​magagahom sa ibabaw sang “bag-ong duta,” ang matarong nga katilingban sang tawo nga nagakabuhi sa sining globo.​—⁠Ipaanggid ang Salmo 96:⁠1.

 23. Anong mga pamangkot nahanungod sa pagkatadlong ang masunod nga pagabinagbinagon naton?

²³ Subong matutom nga mga alagad ni Jehova kag mga sumulunod sang iya hinigugma nga Anak, si Jesucristo, nalangkag kita sa ginsaad nga bag-ong kalibutan sang Dios. Nahibaluan naton nga ini malapit na, kag nagatuo kita nga ang tanan nga hamili nga mga saad ni Jehova matuman. Agod maglakat sing kalahamut-an sa atubangan sang aton Dios, dapat naton pabakuron ang aton pagtuo paagi sa pagdugang sa sini sang pagkatadlong, ihibalo, pagpugong sa kaugalingon, pagbatas, diosnon nga debosyon, utudnon nga pagpalangga, kag gugma.⁠a Sa sining punto, mahimo mapamangkot, Paano naton mapakita ang pagkatadlong? Kag paano ang aton pagkatadlong magabulig sa aton kag sa iban, ilabi na sa aton Cristianong mga kaupdanan, nga naghulag sa mga saad sang Dios paagi sa pagpakita sing pagtuo?

[Footnote]

Ano ang Imo mga Sabat?

◻ Paano mapaathag ang “pagtuo”?

◻ Suno sa 2 Pedro 1:​5-7, anong mga kinaiya ang dapat idugang sa aton pagtuo?

◻ Ano ang epekto sang pagbaylo-dagway ni Jesus sa aton pagtuo?

◻ Anong mga halimbawa sang pagtuo ang ginhatag nanday Abel, Abraham, Sara, kag sang iban pa sang unang panahon?

[Piktyur sa pahina 15]

Nahibaluan mo bala kon paano ang pagbaylo-dagway ni Jesus makaapektar sa pagtuo sang isa ka tawo?