Pagdalagan sa Palumba nga may Pagbatas

“Magdalagan kita nga may pagbatas sa palumba nga ginabutang sa aton atubangan.”​—⁠HEBREO 12:⁠1.

1. (a) Ano ang ginabutang sa atubangan naton sang magdedikar kita kay Jehova nga Dios? (b) Ano nga sa­hi sang palumba ang dapat handaan sang isa ka Cristiano?

SANG gindedikar naton ang aton kaugalingon kay Jehova paagi kay Jesucristo, ginbutang sang Dios sa atubangan naton, sa malaragwayon nga paghambal, ang isa ka palumba. Sa katapusan sang palumba, may padya nga ihatag sa tanan nga makatapos sing madinalag-on. Ano ang padya? Amo ang kabuhi nga walay katapusan! Agod madaug ining matahom nga padya, dapat maghanda ang Cristianong manugdalagan, indi lamang para sa malip-ot nga dalaganon, kundi para sa malaba nga dalaganon. Gani kinahanglan niya ang pagbatas. Dapat niya batason ang kabudlay sang malaba nga palumba kag ang mga balagbag nga masugata sa tion sang palumba.

2, 3. (a) Ano ang makabulig sa aton agod matapos naton ang Cristianong palumba? (b) Paano ang kalipay nakabulig kay Jesus sa pagdalagan sa palumba nga may pagbatas?

² Ano ang magabulig sa aton nga tapuson ini nga palumba? Ti, ano ang nakabulig kay Jesus sa pagbatas sang sia isa ka tawo sa duta? Nakatigayon sia sing kusog gikan sa kalipay nga kinaiya. Ang Hebreo 12:​1-3 mabasa: “Busa, sanglit ginalibutan kita sing tama kadaku nga panganod sang mga saksi, isikway ta man ang tagsa ka kabug-atan, kag ang sala nga nagatapik gid, kag magdalagan kita nga may pagbatas sa palumba nga ginabutang sa aton atubangan, nga nagatulok kay Jesus nga Pangulo nga Ahente kag Manughimpit sang aton pagtuo. Kay tungod sa kalipay nga ginbutang sa iya atubang ginbatas niya ang usok sang pag-antos, nga nagatamay sang kahuluy-an, kag naglingkod sa tuo sang trono sang Dios. Sa pagkamatuod, talupangda gid ang isa nga nagbatas sang amo nga pagsumpong sang mga makasasala batok sa ila kaugalingon, agod nga indi kamo paglapyuon ukon pagpunawon sa inyo mga kalag.”

³ Sa iya bug-os nga pagministeryo sa publiko, padayon nga nakadalagan si Jesus sa palumba bangod sang kalipay kay Jehova. (Ipaanggid ang Nehemias 8:⁠10.) Ang iya kalipay nakabulig sa iya nga batason bisan ang isa ka makahuluya nga kamatayon sa usok sang pag-antos, nga sa tapos sini naeksperiensiahan niya ang indi malaragway nga kalipay sang pagbangon gikan sa minatay kag pagkayab padulong sa tuuhan sang iya Amay, agod tapuson didto ang hilikuton sang Dios. Paagi sa iya pagbatas subong isa ka tawo sa kiliran sang Dios, nagpanguyapot sia sa iya kinamatarong sa kabuhi nga walay katapusan. Huo, subong ginasiling sang Lucas 21:​19: “Paagi sa inyo pagbatas maangkon ninyo ang inyo mga kalag.”

4. Ano nga sahi sang huwaran ang ginpahamtang ni Jesus para sa iya kaupod nga mga manugdalagan, kag ano ang dapat naton tandaan?

⁴ Nagpahamtang si Jesucristo sing labing maayo nga huwaran para sa iya kaupod nga mga manugdalagan, kag ang iya huwaran nagapasalig nga kita man mahimo magdaug. (1 Pedro 2:21) Ang ginapahimo sa aton ni Jesus, masarangan naton. Subong nga nagbatas sia, amo man kita. Kag samtang ginailog naton sia sing malig-on, dapat naton tandaan ang aton mga rason sa pagkalipay. (Juan 15:​11, 20, 21) Ang pagkamalipayon magapabakod sa aton nga magpadayon sa pagdalagan sa palumba sang pag-alagad kay Jehova tubtob nga mabaton naton ang kabuhi nga walay katapusan subong mahimayaon nga padya.​—⁠Colosas 1:​10, 11.

5. Paano kita magkalipay kag mapalig-on para sa palumba sa atubangan naton?

⁵ Agod buligan kita nga magpadayon sa palumba, nagahatag si Jehova sing gahom nga labaw sa kinaandan. Kon ginahingabot kita, ini nga gahom kag ang ihibalo kon ngaa may pribilehiyo kita nga mag-antos sing paghingabot nagapabakod sa aton. (2 Corinto 4:​7-9) Ang bisan ano nga ginabatas tungod sa pagpadungog sa ngalan sang Dios kag sa pagsakdag sang iya pagkasoberano isa ka rason sa pagkalipay nga indi makuha sa aton sang bisan sin-o. (Juan 16:⁠22) Amo ini kon ngaa ang mga apostoles, sa tapos ginbakol suno sa mando sang Judiyong Sanhedrin bangod sang pagpanaksi nila sa dalayawon nga mga butang nga ginhimo ni Jehova nga Dios may kaangtanan kay Jesus, nagkalipay ‘kay gin-isip sila nga takus pakahuy-an tungod sa iya ngalan.’ (Binuhatan 5:​41, 42) Ang ila kalipay wala maghalin sa paghingabot kundi gikan sa pagbatyag sing nasulod nga kaayawan sa pagkahibalo nga napahamut-an nila si Jehova kag si Jesus.

6, 7. Ngaa mahimo magkasadya ang Cristianong manugdalagan bisan pa may mga kapipit-an sia, kag ano ang resulta?

⁶ Ang isa pa ka nagapabaskog nga gahom sa aton kabuhi amo ang paglaum nga ginabutang sang Dios sa aton atubangan. Suno sa pagsiling ni Pablo: “Magtigayon kita sing paghidait sa Dios paagi sa aton Ginuong Jesucristo, nga paagi sa iya man makapalapit kita paagi sa pagtuo sa sining dibagay nga kaluoy diin nagatindog kita karon; kag magkasadya kita, sa paglaum sa himaya sang Dios. Kag indi lamang ina, kundi magkasadya kita samtang yara sa mga kapipit-an, kay nahibaluan naton nga ang kapipit-an nagapatubas sing pagbatas; kag ang pagbatas, sing nahamut-an nga kahimtangan; kag ang nahamut-an nga kahimtangan sing paglaum, kag ang paglaum wala nagadul-ong sa kapaslawan.”​—⁠Roma 5:​1-5.

⁷ Indi ang mga kapipit-an ang makalilipay, kundi ang mahidaiton nga mga bunga nga ginapatubas sini. Ining mga bunga amo ang pagbatas, isa ka nahamut-an nga kahimtangan, paglaum, kag ang katumanan sina nga paglaum. Ang aton pagbatas magadul-ong sa aton pagbaton sing balaan nga kahamuot. Kon ginakahamut-an kita sang Dios, malauman naton ang katumanan sang mga saad nga iya ginhatag. Ining paglaum nagahupot sa aton sa aton dalanon kag nagasakdag sa aton sa idalom sang paghingabot tubtob matuman ang paglaum.​—⁠2 Corinto 4:​16-18.

Malipayon ang mga Nagabatas!

8. Ngaa indi usik sa tion ining panahon sa paghulat?

⁸ Samtang nagahulat sang tion nga gintalana sang Dios sa pagpadya sa mga manugdalagan, may mga pagbag-o nga maeksperiensiahan naton. Mga espirituwal nga pag-uswag ini sa aton nga resulta sang aton madinalag-on nga pag-atubang sa mga pagtilaw, kag bangod sini ginakahamut-an kita sang Dios. Ginapamatud-an sini kon ano kita kag nagahatag sa aton sing kahigayunan nga ipakita man ang maayong mga kinaiya sang mga matutom anay, labi na ang aton Huwaran, nga si Jesucristo. Si disipulo Santiago nagsiling: “Mga kauturan, kabiga ninyo nga bug-os nga kalipay kon makasugata kamo sing madamo nga mga pagtilaw, kay nakahibalo kamo nga ining natilawan nga kinaiya sang inyo pagtuo magapatubas sing pagbatas. Apang pahikuta sing bug-os ang pagbatas, agod nga mahimpit kamo kag mabug-os sa tanan nga bahin, nga wala sing kakulangan.” (Santiago 1:​2-4) Huo, mapaabot naton ang nanuhaytuhay nga mga pagtilaw, apang magabulig ini sa aton sa pagpalambo sing nagakaigo nga mga kinaiya. Sa amo ginapakita naton nga magapabilin kita sa sini nga palumba tubtob nga madaug ang padya, walay sapayan kon ano man nga mga balagbag ang masugata naton.

9, 10. (a) Ngaa malipayon ang mga nagabatas sining mga pagtilaw, kag paano naton dapat atubangon ang mga pagtilaw? (b) Sin-o ang mga malipayon sang dumaan nga tion, kag paano kita maisip sa tunga nila?

⁹ Indi katingalahan, nian, nga si Santiago nagsiling: “Malipayon ang tawo nga nagapadayon sa pagbatas sing pagtilaw, kay sa tapos sia mahamut-an magabaton sia sing korona sang kabuhi, nga ginsaad sang Dios sa mga padayon nga nagahigugma sa iya”! (Santiago 1:12) Gani atubangon naton sa tanan nga tion ang mga pagtilaw, nga naarmasan sing diosnon nga mga kinaiya nga magapabakod sa aton sa paglandas sini.​—⁠2 Pedro 1:​5-8.

¹⁰ Dumduma nga ang paagi sang pagpakig-angot sang Dios sa aton, indi bag-o ukon di-kinaandan. Ang matutom nga “panganod sang mga saksi” sang dumaan nga mga tion ginpakig-angutan suno sa ila katutom sa Dios. (Hebreo 12:1) Ang kahamuot sang Dios sa ila narekord sa iya Pulong, kag ginaisip naton sila tanan nga malipayon bangod nagmalig-on sila sa idalom sang pagtilaw. Si Santiago nagsiling: “Mga kauturan, gamita ninyo nga huwaran sang pag-antos sa kalautan kag sang pagpailob ang mga manalagna, nga naghambal sa ngalan ni Jehova. Yari karon! Ginatawag naton nga malipayon ang mga nagbatas. Nabatian ninyo ang pagbatas ni Job kag nakita ang resulta nga ginhatag ni Jehova, nga si Jehova tuman ka mainawaon kag maluluy-on.” (Santiago 5:​10, 11) Gintagna nga sa sining makahalanguyos nga katapusan nga mga adlaw, may iban nga magalutaw sa danyag sang kalibutan nga magaalagad kay Jehova nga may integridad, subong sang ginhimo anay sang mga manalagna sang dumaan nga mga siglo. Indi bala kita malipay nga kita ang mga nagahimo sini?​—⁠Daniel 12:​3; Bugna 7:⁠9.

Pagbaton sing Sakdag Gikan sa Makapalig-on nga Pulong ni Jehova

11. Paano ang Pulong sang Dios makabulig sa aton sa pagbatas, kag ngaa indi kita dapat mangin kaangay sang batuhon nga mga duog sa parabola ni Jesus?

¹¹ Ginpatuhuyan ni Pablo ang isa pa ka bulig sa pagbatas sang magsiling sia nga “paagi sa mapailubon nga pagbatas, kag paagi sa pagpalig-on sang Kasulatan, mahimo kita magpabilin nga malig-on sa aton paglaum.” (Roma 15:​4, The Twentieth Century New Testament) Ang matuod, ang Pulong sang Dios, dapat manggamot sing tudok sa sulod naton agod nga sa tanan nga tion magpakita kita sing nagakaigo nga reaksion. Indi gid kita makabenepisyo kon subong kita sang batuhon nga duta nga ginlaragway sa parabola ni Jesus tuhoy sa manugsab-ug: “Amo ini sila ang ginsab-ug sa batuhon nga duta: sang mabatian nila ang pulong, ginbaton nila ini nga may kalipay. Apang wala sila sing gamot sa ila kaugalingon, kundi nagpabilin sila sa diutay nga tion; nian kon mag-abot ang kapipit-an ukon paghingabot bangod sang pulong, nagakasandad sila.” (Marcos 4:​16, 17) Ang kamatuoran gikan sa Pulong sang Dios wala manggamot sing tudok sa sini nga mga tawo; busa, sa tion sang kapipit-an, wala sila sing makuha gikan sa sini subong matuod nga tuburan sang kusog kag paglaum.

12. Sa ano kita indi dapat malimbungan sang ginbaton naton ang maayong balita?

¹² Ang bisan sin-o nga nagabaton sang maayong balita sang Ginharian indi dapat maglimbong sa iya kaugalingon sa kon ano ang magasunod. Ginabaton niya ang isa ka dalanon sang pagkabuhi nga may kapipit-an ukon paghingabot. (2 Timoteo 3:12) Apang dapat niya kabigon nga “bug-os nga kalipay” ang pribilehiyo nga mag-antos sing nanuhaytuhay nga mga pagtilaw bangod sang iya pagpabilin nga malig-on sa Pulong sang Dios kag paghambal nahanungod sini sa iban.​—⁠Santiago 1:​2, 3.

13. Paano kag ngaa nagkalipay si Pablo bangod sa mga Cristiano sa Tesalonica?

¹³ Sang una nga siglo, ang mga manugpamatok sa Tesalonica nagkinagubot bangod sang pagbantala ni Pablo. Sang magkadto si Pablo sa Berea, ginsundan sia didto sining mga manughingabot agod magtuga sing dugang pa nga gamo. Sa mga matutom nga nagpabilin sa Tesalonica, ang ginhingabot nga apostol nagsulat: “Kinahanglan kami magpasalamat pirme sa Dios tungod sa inyo, kay amo ang nagakaigo, bangod nga ang inyo pagtuo nagatubo sing bugana kag ang gugma sang tagsa sa inyo ayon sa isa kag isa nagadugang. Busa ginapabugal namon kamo sa tunga sang mga kongregasyon sang Dios tungod sang inyo pagbatas kag pagtuo sa tanan ninyo nga mga paghingabot kag sa mga kapipit-an nga inyo ginaantos. Ini amo ang pagpamatuod sang matarong nga paghukom sang Dios, nga nagadul-ong sa pag-isip sa inyo nga takus sa ginharian sang Dios, nga tungod sini kamo nagaantos.” (2 Tesalonica 1:​3-5) Walay sapayan sang ila pag-antos sa kamot sang ila mga kaaway, ang mga Cristiano sa Tesalonica nagtubo sa kadamuon kag kaangay Cristo nga pagkabuhi. Paano yadto nangin posible? Bangod nagkuha sila sing kusog gikan sa makapabakod nga Pulong ni Jehova. Gintuman nila ang mga pagsulundan sang Dios kag nagdalagan sa palumba nga may pagbatas.​—⁠2 Tesalonica 2:​13-17.

Para sa Kaluwasan sang Iban

14. (a) Sa anong mga rason nga kita malipayon nga nagapadayon sang ministeryo walay sapayan sang mga kabudlayan? (b) Ano ang aton ginapangamuyo, kag ngaa?

¹⁴ Para sa pagbindikar sa Dios, una sa tanan, matutom kag wala sing reklamo nga ginabatas naton ang mga kabudlayan kag mga paghingabot. Apang may isa pa ka di-makagod nga rason kon ngaa nagapasakop kita sa sini nga mga butang: agod nga mapaalinton naton sa iban ang maayong balita sang Ginharian kag sa amo kapin pa nga mga manugbantala para sa Ginharian sang Dios ang madugang sa “dayag nga pagbantala para sa kaluwasan.” (Roma 10:10) Dapat mangamuyo ang mga nagaalagad sa Dios nga pakamaayuhon sang Agalon sang ani ang ila hilikuton paagi sa paghatag sing dugang pa nga mga manugbantala sang Ginharian. (Mateo 9:38) Ginsulatan ni Pablo si Timoteo: “Ang mga butang nga nabatian mo sa akon sa atubangan sang madamo nga saksi itugyan mo sa mga tawo nga matutom, nga sangkol man sa pagtudlo sa iban. Mag-ambit ka sa imo bahin sa pag-antos subong nga maayong soldado ni Cristo Jesus.”​—⁠2 Timoteo 2:​2, 3.

15. Ngaa dapat kita maggawi kaangay sang mga soldado kag mga manugpaindis-indis “sa mga hampang”?

¹⁵ Ginapain sang isa ka soldado ang iya kaugalingon gikan sa indi tanto ka estrikto nga pagkabuhi sang isa ka sibilyan. Subong man, indi kita dapat mag-ambit sa mga hilikuton sang mga tawo nga wala sa hangaway sang Ginuo kundi, sa kamatuoran, yara sa kontra nga bahin. Sa amo, si Pablo dugang pa nga nagsulat kay Timoteo: “Wala sing soldado nga yara sa pag-alagdan nga nagapasaw-id sa mga palangitan-an sang pagkabuhi, agod nga matigayon niya ang kahamuot sang isa nga naglista sa iya subong isa ka soldado. Dugang pa, ang manughampang sa paindis-indis indi makoronahan kon indi sia magpaindis-indis suno sa pagsulundan.” (2 Timoteo 2:​4, 5) Sa pagtinguha nga magdaug sa palumba para sa “korona sang kabuhi,” ang mga manugdalagan dapat magpakita sing pagpugong sa kaugalingon kag likawan ang indi kinahanglanon nga mga bug-at kag mga siod. Sa sining paagi makakonsentrar sila sa pagdala sing maayong balita sang kaluwasan sa iban.​—⁠Santiago 1:​12; ipaanggid ang 1 Corinto 9:​24, 25.

16. Ano ang indi magapos, kag para kay sin-o kaayuhan nga nagabatas kita?

¹⁶ Bangod ginahigugma naton ang Dios kag ang mga tulad-karnero nga nagapangita sa iya, malipayon nga ginabatas naton ang madamo nga butang agod mapalab-ot naton sa iban pa ang maayong balita sang kaluwasan. Mahimo nga gapuson kita sang mga kaaway bangod sa pagbantala sang Pulong sang Dios. Apang ang Pulong sang Dios indi magapos, kag ang paghambal sini para sa kaluwasan sang iban indi mapusasan. Ginlaragway ni Pablo kay Timoteo kon ngaa nakahanda gid sia sa pag-atubang sang pagtilaw: “Panumduma si Jesucristo nga ginbanhaw gikan sa minatay kag gikan sa binhi ni David, suno sa maayong balita nga ginabantala ko; nga bangod sini nagaantos ako sing kalautan tubtob sa punto nga ginagapos ako kaangay sang malauton. Apang, ang pulong sang Dios wala magapos. Busa akon ginabatas ang tanan nga butang tungod sa mga pinili, agod nga sila man makaagom sing kaluwasan nga kay Cristo Jesus upod sa himaya nga dayon.” (2 Timoteo 2:​8-10) Sa karon ginadumdom naton indi lamang ang diutay nga nagkalabilin sang hubon para sa langitnon nga Ginharian kundi ang dakung kadam-an man sang iban nga mga karnero sang Maayong Manugbantay, nga si Jesucristo, ang dakung kadam-an nga makatigayon sing dutan-on nga Paraiso sa idalom sang Ginharian ni Cristo.​—⁠Bugna 7:​9-17.

17. Ngaa indi kita dapat mag-untat sa palumba, kag ano ang mangin resulta kon tapuson naton ang palumba?

¹⁷ Kon mag-untat kita, indi naton mabuligan ang aton kaugalingon ukon ang iban man padulong sa kaluwasan. Paagi sa pagbatas sa Cristianong palumba, walay sapayan sang mga balagbag nga masugata naton, ginahuptan naton ang aton kaugalingon nga yara pirme sa linya nga makatigayon sing padya kag matuytuyan naton ang iban pa padulong sa kaluwasan, kag sa amo man nga tion isa ka maayo gid nga huwaran sang kusog para sa iban. Kon ano man ang aton paglaum, langitnon ukon dutan-on, maayo gid nga ilugon naton ang panimuot ni Pablo nga ‘lambuton ang tulumuron nga padya.’​—⁠Filipos 3:​14, 15.

Nagapadayon sing Malig-on sa Palumba

18. Ang pagbaton sing padya nasandig sa ano, apang agod makapadayon tubtob sa katapusan, ano ang dapat likawan?

¹⁸ Ang aton madinalag-on nga pagtapos sang aton Cristianong dalanon sa kadayawan ni Jehova kag pagdaug sang padya nga ginatigana niya sa aton nagadepende sa aton malig-on nga pagpadayon sa bug-os nga kalawigon sang palumba. Kon amo, indi kita makabatas tubtob sa katapusan kon pabug-atan naton ang aton kaugalingon sing mga butang nga wala nagasakdag sa pagkamatarong. Kag bisan pa huklason ining mga butang, ang mga ginapatuman mabudlay gihapon amo kon ngaa kinahanglan ang tanan nga kusog nga matipon naton. Busa, si Pablo naglaygay: “Isikway ta ang tagsa ka kabug-atan, kag ang sala nga nagatapik gid, kag magdalagan kita sa palumba nga ginbutang sa aton atubangan.” (Hebreo 12:1) Kaangay ni Jesus indi naton pagpadakuon ang mga pag-antos kundi kabigon sila nga magagmay nga bili nga inugbayad sa makalilipay nga padya.​—⁠Ipaanggid ang Roma 8:⁠18.

19. (a) Ano nga pagsalig ang ginpabutyag ni Pablo sang nagahingapos ang iya kabuhi? (b) Samtang nagahilapit kita sa katapusan sang palumba sang pagbatas, ano ang masaligan naton nahanungod sa ginsaad nga padya?

¹⁹ Sang nagahingapos na ang kabuhi ni Pablo, sia nagsiling: “Nakapakig-away ako sang maayong pag-away, natapos ko ang dalaganon, natipigan ko ang pagtuo. Kutob karon natigana sa akon ang korona sang pagkamatarong.” (2 Timoteo 4:​7, 8) Yara kita sa sining palumba sang pagbatas agod matigayon ang padya nga dayon nga kabuhi. Kon mag-untat kita sa pagbatas bangod lamang ang palumba daw malaba sang sa ginpaabot naton, mapaslawan kita kon malapit na naton mabaton ang ginsaad nga padya. Saligi ini. Ang padya sigurado gid.

20. Ano dapat ang mangin determinasyon naton tubtob matapos ang palumba?

²⁰ Gani kabay nga indi pagtuyhon ang aton mga mata sa pagbantay kon san-o masugod ang dakung kapipit-an, nga magalaglag una sa Babilonia nga Daku kag dayon sa nabilin nga bahin sang organisasyon sang Yawa. (2 Pedro 3:​11, 12) Bangod sang nagapamatuod nga mga tanda sa palibot naton, kabay nga magtulok kita sa unhan nga may pagtuo. Kabay nga wagkusan naton ang aton mga balikawang sing gahom sa pagbatas, kag kabay nga magpadayon kita sing maisugon sa palumba nga ginbutang ni Jehova nga Dios sa aton atubang, tubtob malab-ot naton ang katapusan kag mabaton naton ang padya, para sa pagbindikar kay Jehova paagi kay Jesucristo.

Paano Mo Sabton?

◻ Ano nga sahi sang palumba ang dapat handaan sang isa ka Cristiano?

◻ Ngaa importante gid ang kalipay sa pagdalagan sa palumba?

◻ Sa anong panguna nga mga rason ginapadayon naton ang ministeryo walay sapayan sang mga kabudlayan?

◻ Ngaa indi kita dapat mag-untat sa palumba nga ginbutang sang Dios sa atubang naton?

[Laragway sa pahina 15]

Subong sang sa malaba nga palumba, dapat magbatas ang mga Cristiano

[Laragway sa pahina 17]

Sa paglab-ot sang “korona sang kabuhi,” dapat magpakita ang mga manugdalagan sing pagpugong sa kaugalingon