Madamo nga tawo ang nasaw-ahan nga istoryahan ang parte sa sex. Sa Biblia, kon ginaistoryahan ang parte sa sex, prangka ini pero indi sa bastos nga paagi. Makabenepisyo kita sa ginasiling sang Biblia, kay man si Jehova ang aton Manunuga. Gani kabalo gid sia kon ano ang pinakamaayo para sa aton. Ginatudluan niya kita kon ano ang dapat naton himuon para mapalipay sia kag kon ano ang makabulig sa aton para mabaton ang kabuhi nga wala sing katapusan.

1. Ano ang pagtamod ni Jehova sa sex?

Ang sex regalo halin kay Jehova. Gusto niya nga malipay sa sini ang lalaki kag babayi nga mag-asawa. Paagi sa sini nga regalo, makabata ang mag-asawa kag mapabutyag nila ang ila pagpalangga sa isa kag isa. Amo kon ngaa nagsiling ang Biblia: “Kabay nga magkalipay ka sa imo asawa nga ginpangasawa mo sang bataon ka pa.” (Hulubaton 5:18, 19) Gusto ni Jehova nga mangin matutom ang Cristiano nga mga mag-asawa sa isa kag isa, para indi sila makapanghilahi.—Basaha ang Hebreo 13:4.

2. Ano ang seksuwal nga imoralidad?

Ang Biblia nagsiling nga “ang mga nagahimo sang seksuwal nga imoralidad . . . indi makapanubli sang Ginharian sang Dios.” (1 Corinto 6:9, 10) Ang mga manunulat sang Biblia nga nagsulat sa Griego naggamit sang tinaga nga por·neiʹa para sa seksuwal nga imoralidad. Nalakip sa sini ang (1) seksuwal nga mga relasyona sang duha ka tawo nga wala makasal, (2) homoseksuwalidad, kag (3) bestialidad. Mapalipay naton si Jehova kag makabenepisyo kita kon ‘maglikaw kita sa seksuwal nga imoralidad.’—1 Tesalonica 4:3.

USISAA PA GID

3. Magpalagyo sa seksuwal nga imoralidad

Indi mahapos para sa matutom nga si Jose nga padayon nga mangin matinlo sa moral. Basaha ang Genesis 39:1-12, dayon binagbinaga ini nga mga pamangkot:

• Ngaa nagpalagyo si Jose? —Tan-awa ang bersikulo 9.

• Sa banta mo, insakto bala ang ginhimo ni Jose? Ngaa?

VIDEO: Palagyo sa Imoralidad (5:06)

Gusto ni Jehova nga isikway naton ang imoralidad. Basaha ang 1 Corinto 6:18, dayon binagbinaga ini nga mga pamangkot:

• Ano nga mga sitwasyon nga posible makahimo ang isa sing seksuwal nga imoralidad?

• Paano ka makapalagyo sa imoralidad?

4. Malikawan mo ang tentasyon

VIDEO: Batui ang Pagsulay Paagi sa Pagbasa sang Biblia (3:02)

• Sa video, ano ang ginhimo sang brother sang narealisar niya nga ang iya ginahunahuna kag ginahimo posible magresulta sa pagluib sa iya asawa?

Bisan ang matutom nga mga Cristiano nabudlayan kon kaisa nga mangin matinlo ang ila hunahuna. Paano mo malikawan nga magpamensar pirme sang imoral nga mga butang? Basaha ang Filipos 4:8, dayon binagbinaga ini nga mga pamangkot:

• Ano nga mga butang ang dapat naton hunahunaon?

• Paano ang pagbasa sang Biblia kag ang masako nga pag-alagad kay Jehova makabulig sa aton nga malikawan ang tentasyon nga maghimo sang sala?

5. Makabenepisyo gid kita kon sundon naton si Jehova

VIDEO: Kulang sa Maayo nga Paghangop (9:31)

• Ngaa nakalab-ot ang pamatan-on nga lalaki sa sitwasyon nga mahimo sia matentar?—Tan-awa ang Hulubaton 7:8, 9.

• Suno sa Hulubaton 7:23, 26, malain gid ang resulta sang seksuwal nga imoralidad. Kon padayon kita nga mangin matinlo sa moral, ano ang malikawan naton nga mga problema?

• Paano ang katinlo sa moral makabulig sa aton nga mabaton ang kabuhi nga wala sing katapusan?

Para sa iban, ang ginasiling sang Biblia parte sa homoseksuwalidad wala sing pagpalangga. Pero gusto ni Jehova, ang Dios sang gugma, nga ang tanan mabuhi sing wala katapusan. Para mabaton ini, dapat naton sundon ang iya mga ginasiling. Basaha ang 1 Corinto 6:9-11, dayon binagbinaga ini nga pamangkot:

• Sa pagtamod sang Dios, ang homoseksuwalidad lang bala ang malain?

Para mapalipay ang Dios, dapat kita maghimo sing mga pagbag-o. Makabenepisyo bala kita kon himuon naton ini? Basaha ang Salmo 19:8, 11, dayon binagbinaga ini nga mga pamangkot:

• Sa banta mo, husto bala ang ginasiling ni Jehova parte sa moral? Ngaa?

SUMARYO

Ang sex regalo halin kay Jehova kag para lang ini sa lalaki kag babayi nga mag-asawa.

Rebyu

• Ano ang nalakip sa seksuwal nga imoralidad?

• Ano ang makabulig para malikawan naton ang seksuwal nga imoralidad?

• Ano ang mga benepisyo kon sundon naton ang ginasiling ni Jehova parte sa moral?

DUGANG NGA IMPORMASYON

Usisaa kon ngaa importante sa Dios nga magpakasal ang lalaki kag babayi antes sila mag-upod.

“Ano ang Ginasiling sang Biblia Parte sa Pag-live-in?” (Artikulo sa website)

Hibalua kon ngaa ang ginasiling sang Biblia parte sa homoseksuwalidad wala nagapakita nga dumtan ang mga homoseksuwal.

“Sala Bala ang Homoseksuwalidad?” (Artikulo sa website)

Hibalua kon ngaa ang kasuguan sang Dios parte sa sex proteksion para sa aton.

“Ang Oral Sex Bala Pag-sex Gid?” (Artikulo sa website)

Sa eksperiensia nga “Ginarespeto Nila Ako,” basaha kon ano ang nagpabag-o sa isa ka homoseksuwal para mapalipay niya ang Dios.

“Ang Biblia Nagapabag-o sang Kabuhi” (Ang Lalantawan, Abril 1, 2011)

Nagapati ang iban nga kultura nga mangin malipayon lang ang isa kon mangasawa sia ukon mamana. Pero, indi tanan nga mag-asawa malipayon kag indi tanan nga singgol masubo. Ang matuod, siling sang Biblia pareho nga regalo ang pagkasinggol kag ang pag-asawahay.

1. Ano ang mga benepisyo kon singgol ka?

Ang Biblia nagasiling: “Maayo ang ginahimo sang isa nga nagaminyo, apang mas maayo pa gid ang ginahimo sang wala nagaminyo.” (Basaha ang 1 Corinto 7:32, 33, 38.) Ngaa masiling nga “mas maayo pa gid” ang mahimo sang mga wala nagaminyo ukon singgol? Ang singgol nga mga Cristiano wala sing ginaatipan nga bana ukon asawa. Gani, mas madamo sila sing mahimo. Halimbawa, mapasangkad sang iban ang ila ministeryo, pareho sang pagkadto sa iban nga lugar para magbantala sang maayong balita. Labaw sa tanan, mas madamo sila sing oras para mangin malapit kay Jehova.

2. Ano ang mga benepisyo kon legal ang inyo pag-asawahay?

Ang pag-asawahay, pareho sang pagkasinggol, may mga benepisyo man. Ang Biblia nagasiling nga “ang duha mas maayo sangsa isa.” (Manugwali 4:9) Matuod gid ini sa mga Cristiano nga nagasunod sang mga prinsipio sa Biblia sa ila pag-asawahay. Ang lalaki kag babayi nga legal nga ginkasal nagpanaad nga palanggaon, respetuhon, kag pabaloran nila ang isa kag isa. Gani, makabatyag sila sing seguridad nga indi mabatyagan sang mga naga-live-in lang. Kag ang ila kabataan makabatyag man sang seguridad.

3. Ano ang pagtamod ni Jehova sa pag-asawahay?

Sang ginhimo ni Jehova ang una nga pag-asawahay, nagsiling sia: “Bayaan sang lalaki ang iya amay kag ang iya iloy kag magahiusa sia sa iya asawa.” (Genesis 2:24) Gusto ni Jehova nga magpalanggaanay ang mag-asawa kag indi magbulagay samtang nagakabuhi sila. Ginapasugtan lang niya ang pagdiborsio ukon pagbulagay kon ang bana ukon asawa nakapanghilahi. Pero, ginahatag ni Jehova ang kinamatarong sa pagdesisyon sa inosente nga bana ukon asawa kon magbulag sia ukon indi.a (Mateo 19:9) Indi gusto ni Jehova nga sobra sa isa ang bana ukon asawa sang mga Cristiano.—1 Timoteo 3:2.

USISAA PA GID

4. Gamita ang imo regalo nga pagkasinggol

Para kay Jesus, isa ka regalo ang pagkasinggol. (Mateo 19:11, 12) Basaha ang Mateo 4:23, dayon binagbinaga ini nga pamangkot:

• Paano gingamit ni Jesus ang iya regalo nga pagkasinggol para alagaron ang iya Amay kag buligan ang iban?

Ang singgol nga mga Cristiano puede man mangin malipayon pareho kay Jesus. Tan-awa ang VIDEO, dayon binagbinaga ang masunod nga pamangkot.

VIDEO: Matutom nga mga Di-minyo (3:15)

• Paano magamit sang mga Cristiano ang ila pagkasinggol sa maayo nga paagi?

Kabalo ka bala?

Ang Biblia wala nagasiling sang edad nga puede na mangasawa ukon mamana. Pero, nagsiling ini nga kon mangasawa ukon mamana na ang isa dapat “indi na sia tuman kabata,” kay amo ini nga edad nga mabudlay sa isa nga maghimo sing husto nga desisyon bangod mabaskog ang iya seksuwal nga balatyagon.—1 Corinto 7:36.

5. Pilia sing maayo ang imo pamanahon ukon pangasaw-on

Ang pagpili sang pangasaw-on ukon pamanahon isa sa pinakaimportante nga desisyon nga imo himuon. Basaha ang Mateo 19:4-6, 9, dayon binagbinaga ini nga pamangkot:

• Ngaa indi dapat magdali ang isa ka Cristiano sa pagpamana ukon pagpangasawa?

Ang Biblia makabulig sa imo kon ano nga mga kinaiya ang tan-awon mo kon nagapangita ka sang pangasaw-on ukon pamanahon. Labaw sa tanan, dapat palangga niya si Jehova.b Basaha ang 1 Corinto 7:39 kag 2 Corinto 6:14. Dayon, binagbinaga ini nga mga pamangkot:

• Ngaa dapat pareho nga Cristiano ang aton pangasaw-on ukon pamanahon?

• Ano sa banta mo ang batyagon ni Jehova kon ang aton pangasaw-on ukon pamanahon wala nagapalangga sa Iya?

6. Sunda ang pagtamod ni Jehova sa pag-asawahay

Sa Israel sang una, ginadiborsiohan sang pila ka lalaki ang ila asawa sa manabaw nga rason. Basaha ang Malaquias 2:13, 14, 16, dayon binagbinaga ini nga pamangkot:

• Ngaa ginadumtan ni Jehova ang pagdiborsio sa indi husto nga rason?

Tan-awa ang VIDEO, dayon binagbinaga ang masunod nga pamangkot.

VIDEO: Ang Pag-asawahay Isa ka Permanente nga Higot (4:30)

• Kon indi Cristiano ang imo bana ukon asawa, ano ang himuon mo para mangin malipayon ang inyo pag-asawahay?

7. Sunda ang ginasiling ni Jehova parte sa pag-asawahay

VIDEO: Masunod Mo ang Talaksan ni Jehova sa Pag-asawahay (4:14)

Basaha ang Hebreo 13:4, dayon binagbinaga ini nga mga pamangkot:

• Sa banta mo, insakto bala ang ginasiling ni Jehova parte sa pag-asawahay? Ngaa?

Gusto ni Jehova nga iparehistro sang mga Cristiano ang ila pag-asawahay kag pagdiborsio, kay amo ini ang ginapatuman sang gobierno sa kalabanan nga pungsod. Basaha ang Tito 3:1, dayon binagbinaga ini nga pamangkot:

• Kon may bana ka ukon asawa, sigurado ka bala nga ang inyo pag-asawahay narehistro sa gobierno?

SUMARYO

Ang pagkasinggol kag ang pag-asawahay pareho nga regalo halin kay Jehova. Singgol man ukon may bana ukon asawa puede gid mangin malipayon kon ginahimo nila ang kabubut-on ni Jehova.

Rebyu

• Paano magamit sing maayo sang isa ang iya pagkasinggol?

• Ngaa nagsiling ang Biblia nga mangasawa lang ukon mamana sa pareho nga Cristiano?

• Ano lang ang ginasiling sang Biblia nga rason nga puede makadiborsio ukon makabulagay?

DUGANG NGA IMPORMASYON

Ano ang buot silingon sang pagpangasawa ukon pagpamana sa “sumulunod lamang sang Ginuo”?

“Mga Pamangkot Gikan sa mga Bumalasa” (Ang Lalantawan, Hulyo 1, 2004)

Tan-awa ang duha ka video nga makabulig sa imo sa paghimo sang husto nga desisyon parte sa pag-deyt kag pag-asawahay.

Paghanda sa Pagminyo (11:53)

Hibalua kon ngaa pamatyag sang isa ka brother mas daku ang ginhatag sa iya ni Jehova sangsa bisan ano nga ginsakripisyo niya.

Nagalaum Ako Sadto nga Batunon Niya ang Kamatuoran (1:56)

Ano dapat ang binagbinagon sang isa antes sia magdiborsio ukon magbulag?

“Padunggi ‘ang Gintingob sang Dios’” (Ang Lalantawan, Disiembre 2018)