Dapat “Padayon Ninyo nga Ipakita ang Inyo Utudnon nga Gugma”!

1, 2. Ngaa ginsulatan ni Pablo ang Hebreo nga mga Cristiano?

TUIG 61 C.E. sadto, kag wala na gawa ginahingabot ang Cristiano nga mga kongregasyon sa bilog nga Israel. Napriso sadto si apostol Pablo sa Roma, pero nagalaum sia nga buy-an na. Ginbuy-an na ang iya kaupod nga si Timoteo, kag nagaplano sila nga duawon ang ila Cristiano nga mga kauturan sa Judea. (Heb. 13:23) Pero, lima na lang ka tuig kag ang Jerusalem ‘pagalibutan sang kasuldadusan,’ suno sa gintagna ni Jesus. Dapat maghikot gilayon ang mga Cristiano sa Judea, kag ilabi na ang mga nagaistar sa Jerusalem. Ginsugo sila ni Jesus nga magpalagyo dayon kon makita nila nga nagakatabo na ini.—Luc. 21:20-24.

² Sa sulod sang 28 ka tuig sugod sang gintagna ini ni Jesus, nagpabilin nga matutom ang Judiyo nga mga Cristiano nga nagaistar sa Israel wala sapayan sang grabe nga pagpamatok kag paghingabot. (Heb. 10:32-34) Pero nahibaluan ni Pablo nga atubangon pa nila ang isa sa pinakamabudlay nga pagtilaw sa ila pagtuo. (Mat. 24:20, 21; Heb. 12:4) Gusto niya nga mangin handa sila sa matabo sa palaabuton. Kinahanglan nila ang tumalagsahon nga pagbatas kag mabakod nga pagtuo nga magatipig sang ila kabuhi. (Basaha ang Hebreo 10:36-39.) Gani gintuytuyan si Pablo sang espiritu ni Jehova nga sulatan ang iya pinalangga nga mga kauturan para pabakuron sila. Ini nga sulat amo ang ginatawag subong nga libro sang Hebreo.

3. Ngaa dapat kita mangin interesado sa libro sang Hebreo?

³ Dapat kita tanan mangin interesado sa ginsulat ni Pablo sa sining Hebreo nga mga Cristiano sang unang siglo. Ngaa? Bangod pareho sa ila ang aton kahimtangan. Sa sining “makahalanguyos nga mga tion nga mabudlay atubangon,” ginbatas sang katawhan ni Jehova ang tanan nga sahi sang pagpamatok kag paghingabot. (2 Tim. 3:1, 12) Ginpamatud-an naton nga mabakod ang aton pagtuo kag debosyon. Pero madamo sa aton subong ang indi direkta nga ginahingabot. Pareho sang mga Cristiano sang tion ni Pablo, indi naton dapat pagkalipatan nga sa ulihi atubangon naton ang pinakamabudlay nga pagtilaw sa aton pagtuo!—Basaha ang Lucas 21:34-36.

4. Ano ang tuigan nga teksto sa 2016, kag ngaa nagakaigo ini?

⁴ Ano ang magabulig sa aton para mangin handa kita sa mga hitabo nga malapit na naton atubangon? Sa libro sang Hebreo, ginsambit ni Pablo ang madamo nga butang nga magapabakod sang aton pagtuo. Ang isa ka importante nga butang ginsambit sa una nga bersikulo sang katapusan nga kapitulo sini nga sulat. Amo ini ang ginpili nga tuigan nga teksto sa 2016. Ginapalig-on kita sini: “Padayon ninyo nga ipakita ang inyo utudnon nga gugma.”—Heb. 13:1.

5. Ano ang utudnon nga gugma?

⁵ Ano ang utudnon nga gugma? Ang Griego nga termino nga gingamit ni Pablo, ang phi·la·del·phiʹa, literal nga nagakahulugan sing “pagpalangga sa utod.” Ang utudnon nga gugma isa ka sahi sang pagpalangga nga may mabakod kag suod nga kaangtanan, kaangay sa mga miembro sang pamilya ukon sa mga mag-abyan. (Juan 11:36) Wala kita nagapakunokuno nga mag-ulutod kundi mag-ulutod gid kita. (Mat. 23:8) Ang aton mabakod nga kaangtanan sa isa kag isa malaragway sa sini nga mga tinaga: “Sa pagpakita sing utudnon nga gugma magpinalanggaanay kamo. Sa pagpadungog sa isa kag isa, manguna kamo.” (Roma 12:10) Bangod sini nga sahi sang gugma kag sang may prinsipio nga gugma nga a·gaʹpe, nangin suod nga mag-abyan ang katawhan sang Dios.

6. Para sa matuod nga mga Cristiano, sin-o ang ila utod?

⁶ “Ang ‘utudnon nga gugma,’” suno sa isa ka iskolar, “halos wala ginagamit sa mga literatura sang mga indi Cristiano.” Sa Judaismo, ginagamit kon kaisa ang tinaga nga “utod” bisan sa indi paryente, pero nagapatuhoy ini pirme sa mga Judiyo kag wala nagalakip sa mga Gentil. Pero, para sa matuod nga mga Cristiano, utod nila ang tanan nga tumuluo, bisan ano pa ang ila pungsod nga ginhalinan. (Roma 10:12) Gintudluan kita ni Jehova nga maghigugmaanay bilang mag-ulutod. (1 Tes. 4:9) Pero ngaa dapat naton padayon nga ipakita ang utudnon nga gugma?

7. (a) Ano ang pinakaimportante nga rason nga ipakita naton ang utudnon nga gugma? (b) Ano ang isa pa ka rason nga dapat naton pabakuron ang aton gugma sa kada isa?

⁷ Ang pinakaimportante nga rason amo nga ginsugo kita ni Jehova nga ipakita ang utudnon nga gugma sa isa kag isa. Indi naton masiling nga ginahigugma naton ang Dios kon wala naton ginahigugma ang aton kauturan. (1 Juan 4:7, 20, 21) Isa pa, kinahanglan naton ang kada isa. Matuod gid ini sa tion sang kabudlayan. Sang ginsulatan ni Pablo ang Hebreo nga mga Cristiano, nahibaluan niya nga maabot ang tion nga biyaan sang iban ang ila mga balay kag mga pagkabutang. Ginlaragway ni Jesus kon daw ano kabudlay ini nga tion. (Mar. 13:14-18; Luc. 21:21-23) Gani, dapat gid nila pabakuron ang ila gugma sa kada isa.—Roma 12:9.

8. Ano ang dapat naton himuon subong antes magsugod ang dakung kapipit-an?

⁸ Malapit na mag-abot ang pinakadaku nga kapipit-an sa kasaysayan sang tawo. (Mar. 13:19; Bug. 7:1-3) Sa sina nga tion, dapat naton sundon ini nga laygay: “Maglakat kamo, katawhan ko, magsulod kamo sa inyo mga hulot, kag isira ninyo ang puertahan. Magpanago kamo sing makadali tubtob magligad ang kaakig.” (Isa. 26:20) Mahimo nga nagapatuhoy ini nga “mga hulot” sa aton mga kongregasyon. Diri kita nagatipon sing tingob bilang mag-ulutod para magsimba kay Jehova. Pero indi lang kita dapat magtipon sing regular. Ginpahanumdom ni Pablo ang Hebreo nga mga Cristiano nga sa sini nga mga okasyon dapat nila pahulagon ang isa kag isa “sa gugma kag sa maayong mga buhat.” (Heb. 10:24, 25) Dapat naton pabakuron ang aton utudnon nga gugma subong, kay magabulig ini sa aton sa tion sang mga pagtilaw sa palaabuton.

9. (a) Paano naton mapakita ang aton utudnon nga gugma subong? (b) Maghatag sing mga halimbawa kon paano ginpakita sang katawhan ni Jehova ang utudnon nga gugma.

⁹ Kinahanglan gid naton ang utudnon nga gugma subong, bisan wala pa magsugod ang dakung kapipit-an. Madamo sa aton kauturan ang nagaantos bangod sang linog, baha, bagyo, tsunami, ukon iban pa nga kalamidad. Ang iban naton nga kauturan ginapamatukan kag ginahingabot. (Mat. 24:6-9) Kag nagaproblema man kita sa pinansial kada adlaw bangod sang malain nga sistema sang mga butang. (Bug. 6:5, 6) Samtang nagadugang ini nga mga problema, nagadamo man ang aton kahigayunan nga ipakita kon daw ano naton ka palangga ang aton mga kauturan. Bisan pa “ang gugma sang madamo nga tawo magabugnaw,” dapat naton padayon nga ipakita ang aton utudnon nga gugma.—Mat. 24:12.^[1]

10. Ano ang binagbinagon naton?

¹⁰ Wala sapayan sang madamo naton nga problema, paano naton padayon nga mapakita ang aton utudnon nga gugma? Paano naton mapamatud-an nga may amo kita sini nga gugma sa aton mga kauturan? Sa tapos ginsiling ni apostol Pablo nga “padayon ninyo nga ipakita ang inyo utudnon nga gugma,” ginsambit niya ang mga paagi nga mahimo ini sang mga Cristiano. Binagbinagon naton ang anom sa sini.

11, 12. Ano ang kahulugan sang pagkamaabiabihon? (Tan-awa ang piktyur sa umpisa sini nga artikulo.)

¹¹ “Indi ninyo pagkalimti ang pagkamaabiabihon.” (Basaha ang Hebreo 13:2.) Ang orihinal nga tinaga nga ginbadbad nga “pagkamaabiabihon” nagakahulugan sing “kaayo sa mga dumuluong.” Mahimo ini magpahanumdom sa aton sang halimbawa ni Abraham kag ni Lot. Nagpakita sila sang kaayo sa mga bisita nga indi nila kilala, nga sang ulihi nahibal-an nila nga mga anghel gali. (Gen. 18:2-5; 19:1-3) Ginpatuhuyan ni Pablo ang ila halimbawa para palig-unon ang Hebreo nga mga Cristiano nga ipakita ang utudnon nga gugma paagi sa pagkamaabiabihon.

¹² Ginaagda bala naton ang mga kauturan sa aton balay para magkaon ukon para magpalig-unay? Indi kinahanglan nga madamo ukon mahal katama ang aton ihanda para mangin maabiabihon kita. Indi man naton gusto nga agdahon lang ang makabalos sa aton. (Luc. 10:42; 14:12-14) Gusto naton magpalig-on, indi magpadayaw! Bisan pa indi naton masyado kilala ang manugtatap sang sirkito kag ang iya asawa, gusto bala naton sila abiabihon? (3 Juan 5-8) Bisan pa masako kita bangod sang mga problema kada adlaw, importante gid nga ‘indi naton pagkalimtan ang pagkamaabiabihon’!

13, 14. Paano naton ‘dumdumon ang mga yara sa bilangguan’?

¹³ “Dumduma ninyo ang mga yara sa bilangguan.” (Basaha ang Hebreo 13:3.) Wala diri ginpatuhuyan ni Pablo ang tanan nga klase sang bilanggo. Ginpatuhuyan niya ang mga kauturan nga ginbilanggo bangod sang ila pagtuo. Nabilanggo man si Pablo sing mga apat ka tuig sang ginsulat niya ini sa Hebreo nga mga Cristiano. (Fil. 1:12-14) Ginkomendahan niya ang mga kauturan bangod ‘nagpakita sila sang simpatiya sa mga yara sa bilangguan.’ (Heb. 10:34) Indi pareho sa mga nagbulig kay Pablo samtang nabilanggo sia, ang Hebreo nga mga Cristiano malayo kay Pablo. Gani paano nila sia dumdumon? Paagi sa padayon nga pagpangamuyo para sa iya.—Heb. 13:18, 19.

¹⁴ Mahimo nga malayo man kita subong sa aton mga kauturan nga nabilanggo. Mahimo nga indi naton sila mabuligan pareho sa ginahimo sang mga Saksi nga nagaistar malapit sa bilangguan. Pero mapakita naton ang aton simpatiya kag utudnon nga gugma paagi sa pagdumdom pirme sa ila kag pagsambit sa ila sa aton mga pangamuyo, nga nagapangabay kay Jehova para sa ila. Halimbawa, ginadumdom bala naton ang madamo nga kauturan kag kabataan nga nabilanggo sa Eritrea, lakip ang tatlo ka brother nga sanday Paulos Eyassu, Isaac Mogos, kag Negede Teklemariam, nga sobra na 20 ka tuig sa bilangguan?

15. Paano naton mapadunggan ang aton pag-asawahay?

¹⁵ “Dapat padunggan sang tanan ang pag-asawahay.” (Basaha ang Hebreo 13:4.) Mapakita man naton ang aton utudnon nga gugma paagi sa pagpabilin nga matinlo sa moral. (1 Tim. 5:1, 2) Kon ang isa “maglabang sa dulunan kag mamentaha” sa isa ka utod paagi sa imoral nga pagpakigsekso sa iya ukon sa miembro sang iya pamilya, maguba sini ang pagsalig nga ginahalinan sang utudnon nga gugma. (1 Tes. 4:3-8) Kag hunahunaa kon ano ang batyagon sang isa ka asawa kon mahibaluan niya nga ginluiban sia sang iya bana paagi sa pagtan-aw sang pornograpiya. Ginapakita bala sang bana nga ginahigugma niya ang iya asawa kag ginatahod ang pag-asawahay?—Mat. 5:28.

16. Ngaa makapakita kita sang utudnon nga gugma kon kontento kita?

¹⁶ “Mangin kontento kamo sa mga butang nga yara sa inyo.” (Basaha ang Hebreo 13:5.) Ang aton pagsalig kay Jehova magabulig sa aton nga mangin kontento. Mangin balanse man ang aton pagtamod sa materyal nga pagkabutang. (1 Tim. 6:6-8) Tamdon naton nga mas importante ang aton kaangtanan kay Jehova kag sa aton mga kauturan sangsa mabakal sang kuarta. Ang isa nga kontento wala nagareklamo, nagakumod, ukon nagapangita sing sala. Indi man sia mahisaon kag makagod—mga kinaiya ini nga nagapugong sa utudnon nga gugma. Sa baylo, maalwan ang isa nga kontento.—1 Tim. 6:17-19.

17. Ngaa makapakita kita sang utudnon nga gugma kon “may pagsalig” kita?

¹⁷ ‘Magsalig.’ (Basaha ang Hebreo 13:6.) Kon may pagsalig kita kay Jehova, mangin maisog kita sa pag-atubang sa bisan ano nga problema. Magabulig ini nga kaisog para mangin positibo ang aton pagtamod. Kon positibo kita kag may utudnon nga gugma, mapalig-on naton kag mapaumpawan ang aton mga kauturan. (1 Tes. 5:14, 15) Bisan pa mag-abot ang pinakamabudlay nga tion sa dakung kapipit-an, ‘makatindog kita kag makahangad sang aton ulo,’ kay malapit na ang pagtubos sa aton.—Luc. 21:25-28.

18. Paano naton mapabakod ang aton utudnon nga gugma sa aton mga gulang?

¹⁸ “Dumduma ang mga nagapanguna.” (Basaha ang Hebreo 13:7, 17.) Kon hunahunaon naton ang pagpangabudlay sang aton mga gulang para sa aton—nga wala sing bayad—magabakod ang aton utudnon nga gugma kag magadugang ang aton apresasyon sa ila. Indi gid naton gusto nga madula ang ila kalipay ukon manghayhay sila bangod sang aton ginahimo. Sa baylo, kon magtuman kita kag magpasakop sa ila, ginapakita naton sa ila “ang labaw sa kinaandan nga kaayo lakip ang gugma bangod sa ila buluhaton.”—1 Tes. 5:13.

19, 20. Paano naton padayon nga mapauswag ang aton utudnon nga gugma?

¹⁹ Kilala gid ang katawhan ni Jehova sa ila utudnon nga gugma. Amo man sini sang tion ni Pablo. Pero ginpalig-on niya gihapon ang tanan nga ‘padayon nga himuon ini sing bug-os.’ (1 Tes. 4:9, 10) Puede gid ini mapauswag!

²⁰ Sa tagsa ka tion nga makita naton ang aton tuigan nga teksto, pamalandungan man naton ini nga mga pamangkot: Mapauswag ko pa bala ang akon pagkamaabiabihon? Paano ko dumdumon ang akon mga kauturan nga nabilanggo? Ginapadunggan ko bala ang kahimusan sang Dios nga pag-asawahay? Ano ang magabulig sa akon para mangin kontento? Paano ko mapabakod ang akon pagsalig kay Jehova? Paano ako makapasakop sing bug-os sa mga nagapanguna? Kon panikasugan naton nga mag-uswag sa sining anom ka paagi nga mapakita ang utudnon nga gugma, indi lang isa ka dekorasyon sa aton Kingdom Hall ang aton tuigan nga teksto. Magapahanumdom ini sa aton nga tumanon ini nga sugo: “Padayon ninyo nga ipakita ang inyo utudnon nga gugma.”—Heb. 13:1.