Hupti nga Malig-on ang Imo Pagsalig Tubtob sa Katapusan

HANDURAWA ang isa ka magamay nga eroplano nga nagalupad samtang malain ang panahon. Indi na maathagan sang piloto ang mga tanda sang lugar. Ginlikupan sia sing madamol nga gal-um. Indi na sia makakita sa kristal sang iya bintana, apang napat-od niya nga matapos niya ang iya paglakbay nga hilway sa katalagman. Ano ang kabangdanan sang iya pagsalig?

May sibu sia nga mga instrumento nga makabulig sa iya sa pagpalupad sa mga panganod kag sa madulom nga mga lugar. Sa iya ruta, ilabi na malapit sa erport, ang elektroniko nga mga signal nagatuytoy sa iya, kag nagapakig-angot sia paagi sa radyo sa mga kontroler sang trapiko sa kahawaan nga yara sa duta.

Sa kaanggid nga paagi, maatubang naton ang palaabuton nga may pagsalig, bisan pa nga ang kahimtangan sa kalibutan nagadulom nga nagadulom sa adlaw-adlaw. Ang aton paglakbay sa sining malaut nga sistema mahimo nga mas malawig sangsa ginapaabot sang iban, apang makasalig kita nga yara kita sa husto nga dalanon kag sa husto nga oras. Ngaa makapat-od gid kita? Bangod may panuytoy kita sang Dios nga makabulig sa aton nga makita ang indi makita sang tawo.

Ang Pulong sang Dios isa ka ‘kapawa sa aton banas,’ kag ini ‘masaligan, nga nagapaalam sa mga nakulangan.’ (Salmo 19:7; 119:105) Kaangay sa mga signal nga nagapakita sang banas nga ginaluparan sang piloto, sibu nga ginapakita sang Biblia ang palaabuton nga mga hitabo kag nagahatag sa aton sing maathag nga mga instruksion agod mapat-od nga makalab-ot kita sa aton destinasyon nga hilway sa katalagman. Apang, agod makabenepisyo kita sa panuytoy sang Dios, dapat naton saligan ini.

Sa iya sulat sa mga Hebreo, ginpalig-on ni Pablo ang Judiyong mga Cristiano nga ‘uyatan sing hugot ang pagsalig nga ginhuptan nila sa pamuno nga malig-on tubtob sa katapusan.’ (Hebreo 3:14) Ang pagsalig mahimo mationg kon ang pag-uyat naton sa sini indi ‘paghugton.’ Gani nagautwas ang pamangkot, Paano naton mahuptan nga malig-on ang aton pagsalig kay Jehova tubtob sa katapusan?

Pagbuhat sang Imo Pagtuo

Antes makapalupad ang isa ka piloto nga nagasandig sing bug-os sa iya mga instrumento kag kontrol nga yara sa duta, nagakinahanglan sia sing bastante nga paghanas kag malawig nga tion sa pagpalupad. Sing kaanggid, ang isa ka Cristiano nagakinahanglan sing dalayon nga pagbuhat sang iya pagtuo agod mahuptan niya ang pagsalig sa panuytoy ni Jehova, ilabi na kon mag-utwas ang mabudlay nga mga kahimtangan. Si apostol Pablo nagsulat: “Sanglit kami may amo nga espiritu sang pagtuo subong sa iya nga nagsulat: ‘Nagtuo ako, gani naghambal ako,’ nagatuo man kami, gani naghambal man kami.” (2 Corinto 4:13) Busa, kon nagahambal kita tuhoy sa maayong balita sang Dios, nagabuhat kita kag nagapalig-on sang aton pagtuo.

Si Magdalena, nga naghinguyang sing apat ka tuig sa kampo konsentrasyon sa tion sang ikaduhang inaway kalibutanon, nagapaathag sing pagkaimportante sang pagbantala nga hilikuton: “Gintudluan ako sang akon iloy nga agod mahuptan ang malig-on nga pagtuo, importante ang mangin mabinalak-on tuhoy sa espirituwal nga kaayuhan sang iban. Nadumduman ko ang isa ka hitabo nga nagalaragway sang amon ginbatyag. Sang mapaguwa kami gikan sa kampo konsentrasyon sa Ra­vens­brück, nakalab-ot kami sang akon iloy sa balay sang Biernes. Duha ka adlaw sang ulihi, sang Domingo, nagbuylog kami sa kauturan sa pamalaybalay nga pagbantala. Nagapati gid ako nga kon magkonsentrar kita sa pagbulig sa iban nga magsalig sa mga saad sang Dios, yadtong mga saad mangin mas matuod sa aton.”​—⁠Ipaanggid ang Binuhatan 5:⁠42.

Ang paghupot sang aton pagsalig nga malig-on tubtob sa katapusan nagakinahanglan sing espirituwal nga hilikuton sa iban nga bahin. Ang personal nga pagtuon isa pa ka labing maayo nga buhat nga nagapalig-on sang pagtuo. Kon aton ilugon ang mga taga-Berea kag maukod nga usisaon ang Kasulatan adlaw-adlaw, magabulig ini sa aton “sa pagtigayon sing kabug-usan sang paglaum tubtob sa katapusan.” (Hebreo 6:11; Binuhatan 17:11) Matuod, ang personal nga pagtuon nagakinahanglan sing tion kag determinasyon. Ayhan, amo sina kon ngaa ginpaandaman ni apostol Pablo ang mga Hebreo tuhoy sa katalagman nga mangin “mahinay,” ukon matamad, sa sinang mga butang.​—⁠Hebreo 6:⁠12.

Ang matamad nga panimuot mahimo nga may malain nga mga resulta sa madamo nga bahin sang kabuhi. Nagsiling si Solomon nga “tungod sa katamad sang mga kamot nagatulo ang balay.” (Manugwali 10:18) Sa indi magdugay ukon sa ulihi ang ulan magatulo sa atop nga wala ginamentinar. Kon magtinamad kita sa espirituwal kag mapaslawan nga huptan ang aton pagtuo, mahimo nga magasugod kita sa pagduhaduha. Sa pihak nga bahin, ang regular nga pagpamalandong kag pagtuon sa Pulong sang Dios nagapabakod kag nagaamlig sang aton pagtuo.​—⁠Salmo 1:​2, 3.

Pagtukod sing Pagsalig Paagi sa Eksperiensia

Sa pagkamatuod, nagatuon ang piloto paagi sa eksperiensia kag paagi man sa pagtuon nga ang iya mga instrumento masaligan. Subong man, ang aton pagsalig kay Jehova nagatubo kon makita naton sa aton mismo kabuhi ang pamatuod sang iya mahigugmaon nga pag-atipan. Naeksperiensiahan ini ni Josue, kag ginpahanumdom niya ang iya mga masigka-Israelinhon: “Nakahibalo kamo sa bug-os ninyo nga mga tagipusuon kag sa bug-os ninyo nga mga kalag nga wala sing isa ka butang nga nakulang sa tanan nga butang nga maayo nga ginpamulong nahanungod sa inyo ni Jehova nga inyo Dios. Ang tanan nahanabo sa inyo.”​—⁠Josue 23:⁠14.

Si Josefina, isa ka minyo nga utod gikan sa Pilipinas, nakatuon sing amo man nga leksion. Ginpaathag niya kon daw ano ang kabuhi antes niya natun-an ang kamatuoran: “Ang akon bana palainom kaayo, kag kon mahubog sia, nagapangakig sia kag ginasakit ako. Naapektuhan man ang amon anak nga lalaki sang amon dimalipayon nga pag-asawahay. Kami sang akon bana lunsay nagatrabaho, nagakita sing daku nga kuwarta, apang ginapierde namon sa sugal ang halos tanan nga suweldo namon. May madamo nga abyan ang akon bana, apang kalabanan sa ila nagapakig-abyan sa iya agod bayaran niya ang ila ginainom, kag ginahubog pa sia gani sang iban agod lamang kadlawan.

“Nagbag-o ang mga butang sang makilala namon si Jehova kag tinagipusuon nga ginbaton ang iya laygay. Wala na nag-inom ang akon bana, nag-untat kami sa pagsugal, kag may matuod kami nga mga abyan nga nagahigugma kag nagabulig sa amon. Malipayon ang amon pag-asawahay, kag ang amon anak nagadaku nga isa ka maayo lamharon nga lalaki. Nagatrabaho kami sa mas malip-ot nga tion, apang mas madamo ang amon kuwarta. Ang eksperiensia nagtudlo sa amon nga si Jehova kaangay sa isa ka mahigugmaon nga Amay, nga pirme nagatuytoy sa amon sa husto nga direksion.”

Subong resulta sang ginradyo nga mga instruksion ukon pagtan-aw sa instrumento, marealisar kon kaisa sang mga piloto nga kinahanglan nila tadlungon ang ila direksion. Kita man mahimo magbag-o sing direksion suno sa instruksion ni Jehova. “Ang imo igdulungog magapamati sang pulong sa likod nimo nga nagasiling: ‘Ini amo ang dalan. Lakat kamo sa sini,’ kon magliso kamo sa tuo ukon magliso kamo sa wala.” (Isaias 30:21) Paagi sa iya Pulong kag paagi sa iya organisasyon, nagabaton kita sing laygay nga nagapaalisto sa aton sa espirituwal nga mga katalagman. Ang isa sini may kaangtanan sa pagpakig-upod.

Ang Pagpakig-upod Makapatalang sa Aton

Madali magtalang ang isa ka magamay nga eroplano kon wala ginahimo ang kinahanglanon nga pagtadlong. Subong man, ang impluwensia gikan sa guwa pirme nagasalakay sa mga Cristiano karon. Nagakabuhi kita sa mahunahunaon sa unod nga kalibutan diin madamo ang nagayaguta sa espirituwal nga mga kabilihanan, nagahatag sing mas daku nga importansia sa kuwarta kag kinalipay. Ginpaandaman ni Pablo si Timoteo nga ang katapusan nga mga adlaw mangin ‘mabudlay pakigbagayan.’ (2 Timoteo 3:​1-5) Ang mga tin-edyer nga nagahandum nga batunon kag mangin bantog, amo ang ilabi na nga madali mabiktima sang malain nga pagpakig-upod.​—⁠2 Timoteo 2:⁠22.

Si Amanda nga nagaedad sing 17 anyos, nagpaathag: “Sa makadali nga tion ginpaluya sang akon mga kabutho ang akon pagtuo sa pila ka kasangkaron. Pirme sila nagasiling nga ang akon relihion madumilion kag dirasonable, kag nagpaluya ini sa akon. Apang, ginbuligan ako sang akon mga ginikanan sa paghangop nga ang Cristianong mga panuytoy nagaamlig sa baylo nga nagadumili. Narealisar ko karon nga ining mga prinsipio nagabulig sa akon nga matigayon ang mas makaalayaw nga kabuhi sangsa akon mga kaupod anay sa eskwelahan. Natun-an ko nga magsalig sa mga nagaulikid gid sa akon​—⁠ang akon mga ginikanan kag si Jehova​—⁠kag nagakalipay ako sa pag-alagad subong payunir.”

Ano man ang aton pangidaron, makasugata kita sing mga tawo nga magapakanubo sang aton mga pagtuluuhan. Ayhan daw maalamon sila kon tulukon, apang sa Dios pisikal sila, indi espirituwal. (1 Corinto 2:14) Ang isa ka impluwensiado nga grupo sa Corinto sang adlaw ni Pablo amo ang maalamon sa kalibutan nga mga Skeptiko. Ang mga panudlo sining mga pilosopo mahimo nga ginbangdan nga madula ang pagtuo sang pila ka Cristiano sa Corinto sa pagkabanhaw. (1 Corinto 15:12) “Dili kamo magtalang,” paandam ni apostol Pablo. “Ang malaut nga mga pagpakig-upod nagadunot sang maayo nga mga pamatasan.”​—⁠1 Corinto 15:⁠33.

Sa pihak nga bahin, ang maayo nga pagpakig-upod nagapalig-on sa aton sa espirituwal. Sa sulod sang Cristianong kongregasyon, may kahigayunan kita sa pagpakig-upod sa mga tawo nga nagakabuhi nga may pagtuo. Si Norman, isa ka utod nga lalaki nga nakatuon sang kamatuoran sang 1939, nangin tuburan gihapon sang daku nga pagpalig-on sa tanan. Ano ang naghupot sang iya espirituwal nga panan-aw nga masanag? “Importante ang mga miting kag suod nga pagpakig-abyan upod sa matutom nga kauturan,” sabat niya. “Ining sahi sang pagpakig-upod nagbulig sa akon nga makita sing maathag ang kinatuhayan sa ulot sang organisasyon sang Dios kag sang iya ni Satanas.”

Ang Malimbungon nga Gahom sang Manggad

Si Brian, isa ka eksperiensiado nga piloto, nagapaathag nga “ang isa ka piloto kon kaisa mahimo mabudlayan sa pagpati sa iya mga instrumento​—⁠bangod lamang ang iya kinaugali nga huyog nagapamatok. Ang eksperiensiado nga mga piloto sang militar kilala nga nagapalupad sing suli sang ila eroplano bangod ang mga suga sa duta daw mga bituon kon tulukon​—⁠bisan pa ang ila mga instrumento nagapamatuod nga sayop ang ila ginahunahuna.”

Sing kaanggid, ang aton maiyaiyahon nga kinaugali makapatalang sa aton sa espirituwal nga kahulugan. Nagsiling si Jesus nga ang manggad may ‘malimbungon nga gahom,’ kag si Pablo nagpaandam nga ‘ang gugma sa kuwarta nagpatalang sa madamo gikan sa pagtuo.’​—⁠Marcos 4:19; 1 Timoteo 6:⁠10.

Kaangay sa malimbungon nagaigpat nga mga suga, ang nagabadlak materyalistiko nga mga tulumuron makatuytoy sa aton sa sayop nga dalanon. Sa baylo nga magmalipayon sa ‘pagpaabot sang mga butang nga ginalauman,’ mahimo kita mapatalang sang ginapakitakita sang kalibutan nga nagataliwan. (Hebreo 11:1; 1 Juan 2:​16, 17) Kon ‘determinado’ kita nga matigayon ang mahamungaya nga estilo sang pagkabuhi, mahimo gid nga diutay na lang ang aton tion para sa espirituwal nga pagtubo.​—⁠1 Timoteo 6:9; Mateo 6:24; Hebreo 13:⁠5.

Ang isa ka lamharon minyo nga lalaki nga si Pa­trick nagbaton nga ginsakripisyo nila sang iya asawa ang espirituwal nga mga tulumuron para matigayon ang mas mahamungaya nga pagkabuhi. Nagpaathag sia: “Naimpluwensiahan kami sadtong yara sa kongregasyon nga may malahalon nga mga awto kag dalagku nga mga balay. Bisan pa wala namon madula ang paglaum sa Ginharian, ginbatyag namon nga mahimo man namon matigayon ang masulhay nga kabuhi. Apang sang ulihi, narealisar namon nga ang matuod nga kalipay matigayon paagi sa pag-alagad kay Jehova kag paagi sa pagtubo sa espirituwal. Karon ang amon kabuhi nangin simple liwat. Ginbuhinan namon ang amon inoras sa pagtrabaho, kag nangin regular payunir kami.”

Ang Pagtuo Nasandig sa Mabinatunon nga Tagipusuon

Ang mabinatunon nga tagipusuon may importante man nga papel sa pagtukod sing pagsalig kay Jehova. Matuod, “ang pagtuo amo ang masaligan nga pagpaabot sa mga butang nga ginalauman, ang maathag nga pagpasundayag [ukon, “makapakumbinse nga pamatuod,” foot­note] sang mga butang nga indi makita.” (Hebreo 11:⁠1) Apang kon wala kita sing mabinatunon nga tagipusuon, mahimo nga indi kita makumbinse. ­(Hulubaton 18:15; Mateo 5:⁠6) Bangod sini si apostol Pablo nagsiling nga ‘ang pagtuo wala ginapanag-iyahan sang tanan nga tawo.’​—⁠2 Tesalonica 3:⁠2.

Paano naton nian mahuptan ang aton tagipusuon nga mabinatunon sa tanan makapakumbinse nga pamatuod nga matigayon? Paagi sa pagpalambo sing diosnon nga mga kinaiya, mga kinaiya nga nagapauswag kag nagapabakod sa pagtuo. Ginapalig-on kita ni Pedro nga ‘idugang sa aton pagtuo ang pagkahalangdon, ihibalo, pagpugong sa kaugalingon, pagbatas, diosnon nga debosyon, utudnon nga pagpalangga, kag gugma.’ (2 Pedro 1:​5-7; Galacia 5:​22, 23) Sa pihak nga bahin, kon nagakabuhi kita sing makinaugalingon ukon nagaalagad sing pasapayan kay Jehova, indi gid kita makapaabot nga magtubo ang aton pagtuo.

“Ginhanda [ni Esdras] ang iya tagipusuon” sa pagbasa sang Pulong ni Jehova kag sa pagbuhat sini. (Esdras 7:10) Si Miqueas may mabinatunon man nga tagipusuon. “Apang ako, magatulok ako kay Jehova. Magahulat ako sa Dios sang akon kaluwasan. Ang akon Dios magapamati sa akon.”​—⁠Miqueas 7:⁠7.

Si Magdalena, nga ginhinambitan kaina, mapailubon man nga nagahulat kay Jehova. (Habacuc 2:⁠3) Nagsiling sia: “May espirituwal nga paraiso na kami. Masunod, amo ang pisikal nga Paraiso sa indi madugay. Samtang wala pa ina ginatos ka linibo ang nagabuylog sa dakung kadam-an. Nalipay ako nga makita ang tuman kadamo nga nagapanong sa organisasyon sang Dios.”

Nagadangop sa Dios sang Aton Kaluwasan

Ang paghupot sang aton pagsalig nga malig-on tubtob sa katapusan nagakinahanglan sing pagbuhat sang aton pagtuo kag pagpamati sing maayo sa panuytoy nga ginabaton naton gikan kay Jehova kag sa iya organisasyon. Takus gid ini sang pagpanikasog. Ang isa ka piloto nagabatyag sing tudok nga kaayawan kon pagkatapos sang isa ka malawig, mabudlay nga paglakbay, nagapanubo sia kag sang ulihi nakalampuwas sa madamol nga mga panganod. Yara sa atubangan niya ang duta​—⁠berde kag maabiabihon. Yara sa idalom ang run­way sang erport, nagahulat sa pagbaton sa iya.

Ang makalilipay nga eksperiensia nagahulat man sa aton. Ining magal-umon, malaut nga kalibutan magabukas sing dalan padulong sa isa ka bag-ong duta sang pagkamatarong. Ang pag-abiabi sang Dios nagahulat sa aton. Makaabot kita didto kon tumanon naton ang mga pulong sang salmista: “Ikaw ang akon paglaum, O Soberano nga Ginuong Jehova, ang akon salaligan kutob sa akon pagkapamatan-on. . . . Ang akon pagdayaw mangin sa imo sing dalayon.”​—⁠Salmo 71:5, 6.