‘Paggamit sing Matadlong sang Pulong sang Kamatuoran’

ANG Pulong sang Dios isa ka talaguan sang mga prinsipio nga kinahanglanon gid para sa isa ka madinalag-on nga kabuhi. Makabulig ini sa isa ka ministro sa pagtudlo, sa pagsabdong, kag sa pagtadlong. (2 Timoteo 3:​16, 17) Apang, agod makabenepisyo sing bug-os gikan sa sining aman sang Dios nga panuytoy, dapat naton sundon ang laygay ni Pablo kay Timoteo: ‘Himua ang imo labing masarangan sa pagpakita sang imo kaugalingon nga nahamut-an sang Dios, manugpangabudlay nga wala sing dapat ikahuya, nagagamit sing matadlong sang pulong sang kamatuoran.’​—⁠2 Timoteo 2:⁠15.

Ang Pulong sang Dios ginapaanggid, upod sa iban pa nga mga butang, sa masustansia nga gatas, matig-a nga kalan-on, nagaparepresko kag nagatinlo nga tubig, sa isa ka espiho, kag sa matalom nga espada. Ang paghibalo kon ano ang ginapahangop sining mga termino nagabulig sa isa ka ministro sa paggamit sing Biblia nga may kalantip.

Paghatag sing Gatas sang Pulong sang Dios

Ang gatas amo ang kalan-on nga ginakinahanglan sang bag-o nabun-ag nga lapsag. Samtang nagadaku ang lapsag, amat-amat sia nga ginapakaon sing matig-a nga kalan-on, apang sa umpisa, makatunaw lamang ini sing gatas. Sa madamong kahimtangan, yadtong diutay lamang ang nahibaluan tuhoy sa Pulong sang Dios kaangay sa mga lapsag. Walay sapayan kon ang isa ka tawo bag-uhan nga interesado sa Pulong sang Dios ukon madugay na nga nakahibalo sini, kon may yara lamang sia hapaw nga paghangop sa ginasiling sang Biblia, isa sia ka lapsag sa espirituwal kag nagakinahanglan sing madali matunaw nga kalan-on​—⁠espirituwal nga “gatas.” Indi pa niya masarangan tunawon ang “matig-a nga kalan-on,” ang madalom nga mga butang sang Pulong sang Dios.​—⁠Hebreo 5:⁠12.

Amo ini ang kahimtangan anay sa bag-o naporma nga kongregasyon sa Corinto sang si Pablo nagsulat sa ila: “Ginpainom ko kamo sing gatas, indi sing butang nga kalan-on, kay indi pa ninyo masarangan ini.” (1 Corinto 3:⁠2) Nagakinahanglan anay nga tun-an sang mga taga-Corinto ang “nahauna nga mga pagtulun-an sang pulong sang Dios.” (Hebreo 5:12) Sa ila tion sang pagtubo, indi sila makatunaw “sing madalom nga mga butang sang Dios.”​—⁠1 Corinto 2:⁠10.

Kaangay ni Pablo, ang Cristianong mga ministro karon nagapakita sang ila pag-ulikid sa mga lapsag sa espirituwal paagi sa paghatag sa ila sing “gatas,” nga amo, ang pagbulig sa ila nga mapasad sing malig-on sa pangunang Cristianong doktrina. Ginapalig-on nila yadtong mga bag-uhan ukon dihamtong nga ‘handumon ang gatas nga walay simbog nga iya sang pulong.’ (1 Pedro 2:⁠2) Ginpakita ni apostol Pablo nga nahantop niya ang pinasahi nga pagtalupangod nga ginakinahanglan sang mga bag-uhan sang sia nagsulat: “Ang tagsatagsa nga nagaambit sing gatas wala makahibalo sing pulong sang pagkamatarong, kay bata sia.” (Hebreo 5:13) Ang pagkamapailubon, pagpasunaid, paghangop, kag pagkalum-ok ginapatuman sa mga ministro sang Dios samtang ginapaambit nila ang putli nga gatas sang Pulong sa mga bag-uhan kag dieksperiensiado paagi sa mga pagtuon sing Biblia sa puluy-an kag sa kongregasyon.

Paggamit sing Matig-a nga Kalan-on sang Pulong sang Dios

Agod magtubo sa kaluwasan, nagakinahanglan ang isa ka Cristiano sing labi pa sangsa “gatas” lamang. Sa tion nga ang pangunang mga kamatuoran sa Biblia nahangpan sing maathag kag ginbaton, handa na sia sa pagkaon sing ‘matig-a nga kalan-on nga iya sang hamtong nga mga tawo.’ (Hebreo 5:14) Paano niya mahimo ini? Una, paagi sa regular nga rutina sang personal nga pagtuon kag pagpakig-upod sa Cristianong mga miting. Yadtong maayo nga mga pamatasan magabulig sa isa ka Cristiano nga mangin mabaskog, hamtong sa espirituwal, kag mangin epektibo sa ministeryo. (2 Pedro 1:⁠8) Indi naton pagkalipatan nga dugang sa ihibalo, ang paghimo sang kabubut-on ni Jehova nagalakip man sa espirituwal nga kalan-on.​—⁠Juan 4:⁠34.

Karon, ang “matutom kag mainandamon nga ulipon” gintangduan sa paghatag sa mga alagad sang Dios sing pagkaon sa nagakaigo nga tion kag sa pagbulig sa ila nga mahangpan ‘ang nanarisari nga kaalam sang Dios.’ Si Jehova, paagi sa iya espiritu, nagabuyagyag sing madalom nga mga kamatuoran sa Kasulatan paagi sining matutom nga ulipon, nga matutom nga nagabalhag sing espirituwal nga “pagkaon sa nagakaigo nga tion.” (Mateo 24:​45-47; Efeso 3:​10, 11; ipaanggid ang Bugna 1:​1, 2.) Katungdanan sang tagsa ka indibiduwal nga Cristiano nga panginpuslan sing bug-os ining nabalhag nga mga aman.​—⁠Bugna 1:⁠3.

Sa pagkamatuod, ang pila sang mga butang sa Biblia “mabudlay hangpon,” bisan pa sang hamtong nga mga Cristiano. (2 Pedro 3:16) May makalilibog nga mga ekspresyon, mga tagna, kag mga ilustrasyon nga nagakinahanglan sing dugang nga pagtuon kag pagpamalandong. Busa, ang personal nga pagtuon nagalakip sang pagkutkot sa Pulong sang Dios. (Hulubaton 1:​5, 6; 2:​1-5) Labi na nga may responsabilidad ang mga gulang tuhoy sini kon nagatudlo sila sa kongregasyon. Nagadumala man sing Pagtinuon sa Libro sang Kongregasyon ukon sing Pagtinuon sa Lalantawan, nagapamulongpulong publiko, ukon nagaalagad sa bisan anong pagpanudlo, dapat sunado gid sang mga gulang ang ila materyal kag mangin handa sa paghatag sing igtalupangod sa ila ‘arte sang pagpanudlo’ samtang ginapaalinton nila ang matig-a espirituwal nga pagkaon sa kongregasyon.​—⁠2 Timoteo 4:⁠2.

Ang Tubig nga Nagaparepresko kag Nagatinlo

Ginsilingan ni Jesus ang Samariahanon nga babayi sa bubon nga hatagan niya sia sing mainom nga mangin “tuburan sang tubig [sa iya] nga nagaibwal sa paghatag sing kabuhi nga walay katapusan.” (Juan 4:​13, 14; 17:⁠3) Ining nagahatag-kabuhi nga tubig nagalakip sang tanan nga mga aman sang Dios sa pagtigayon sing kabuhi paagi sa Kordero sang Dios, kag ining mga aman ginpaathag sa Biblia. Subong mga indibiduwal nga ginauhaw sa sinang “tubig,” ginabaton naton ang pangagda sang espiritu kag sang nobya ni Cristo sa ‘pagkuha sing tubig sang kabuhi sa walay bayad.’ (Bugna 22:17) Ang pag-inom sining tubig mahimo magakahulugan sing kabuhi nga walay katapusan.

Dugang pa, ang Biblia nagapahamtang sing mga talaksan sa moral kag espirituwal para sa matuod nga mga Cristiano. Samtang ginaaplikar naton ining ginpatok sang Dios nga mga talaksan, ginatinluan kita sang Pulong ni Jehova, “ginahugasan nga matinlo” sa tanan nga buhat nga ginakangil-aran ni Jehova. (1 Corinto 6:​9-11) Tungod sini, ang kamatuoran nga masapwan sa inspirado nga Pulong ginatawag nga “paghugas sa tubig.” (Efeso 5:26) Kon wala naton ginapahanugutan nga tinluan kita sang kamatuoran sang Dios sa sining paagi, ang aton pagsimba indi mangin kalahamut-an sa iya.

Sing makawiwili, ang mga gulang nga ‘nagagamit sing matadlong sang pulong sang kamatuoran’ ginapaanggid man sa tubig. Si Isaias nagasiling nga kaangay sila sa “mga ilig sang tubig sa duta nga kigas.” (Isaias 32:​1, 2) Ginatuman sang mahigugmaon nga mga gulang ining paglaragway kon nagaduaw sila sa ila mga kauturan subong espirituwal nga mga manugbantay, nagagamit sing makaparepresko nga Pulong sang Dios sa paghatag sing makapalig-on, makapaumpaw, ­espirituwal nga impormasyon nga nagapalig-on kag nagapabakod.​—⁠Ipaanggid ang Mateo 11:⁠28, 29.⁠a

Ang mga katapo sang kongregasyon malangkagon nga nagapaabot sa mga pagduaw sang mga gulang. “Nahibaluan ko kon daw ano ka makapaumpaw ang mga gulang, kag nalipay gid ako nga naghimo si Jehova sining aman,” siling ni Bon­nie. Si Lyn­da, isa ka nagaisahanon nga iloy, nagasulat: “Paagi sa Makasulatanhon nga pagpalig-on, ginbuligan ako sang mga gulang nga makalandas. Namati sila kag nagpakita sing pagkaawa.” Si Mi­chael nagasiling: “Ginpabatyag nila ako nga bahin sang isa ka organisasyon nga nagaulikid.” “Ang mga pagduaw sang mga gulang nagbulig sa akon nga malandas ang tuman nga kapung-aw,” siling sang isa pa. Ang makapalig-on sa espirituwal nga pagduaw gikan sa isa ka gulang kaangay sa isa ka mabugnaw, makaparepresko nga ilimnon. Ang mga tulad-karnero ginalipay samtang ginabuligan sila sang mahigugmaon nga mga gulang nga makita kon paano ang Makasulatanhon nga mga prinsipio maaplikar sa ila kahimtangan.​—⁠Roma 1:​11, 12; Santiago 5:⁠14.

Gamita ang Pulong sang Dios Subong Espiho

Kon ang isa ka indibiduwal nagakaon sing matig-a nga kalan-on, ang katuyuan indi lamang agod manamitan sa lalim sini. Sa baylo, ginapaabot niya nga makakuha sing sustansia agod makapapagros sa iya. Kon isa sia ka bata, ginapaabot niya nga ang pagkaon magabulig sa iya sa pagtubo agod mangin hamtong. Kaangay man ini sa espirituwal nga pagkaon. Ang personal nga pagtuon sing Biblia makalilipay, apang indi lamang amo sina ang rason para sini. Ang espirituwal nga pagkaon dapat magpabag-o sa aton. Nagabulig ini sa aton nga makilala kag mapatubas ang mga bunga sang espiritu kag nagabulig sa aton nga masul-ob ang “bag-ong personalidad, nga paagi sa sibu nga ihibalo ginapabag-o suno sa larawan sang Isa nga nagtuga sini.” (Colosas 3:10; Galacia 5:​22-24) Ang espirituwal nga pagkaon nagabulig man sa aton nga magtubo sa pagkahamtong, nagabulig sa aton nga maaplikar sing maayo ang Makasulatanhon nga mga prinsipio sa pag-atubang sang aton mga problema kag sa pagbulig sa iban sa pag-atubang sang ila mga problema.

Paano naton masiling kon bala ang Biblia may amo sina nga epekto sa aton? Ginagamit naton ang Biblia kaangay sa isa ka espiho. Si Santiago nagsiling: “Mangin manugtuman kamo sing pulong, kag dili manugpalamati lamang . . . Kon ang bisan sin-o manugpamati sing pulong, kag indi manugtuman, ining isa kaangay sa isa ka tawo nga nagatan-aw sang iya kinaugali nga nawong sa isa ka espiho. Kay ginatan-aw niya ang iya kaugalingon, kag nagahalin sia kag sa gilayon nalipat kon ano nga sahi sang tawo sia. Apang sia nga nagatulok sa himpit nga kasuguan nga iya sang kahilwayan kag nagapadayon sa sini, ining tawo, bangod sia nangin, indi malipaton nga manugpamati, kundi manugtuman sang hilikuton, mangin malipayon sa iya paghimo sini.”​—⁠Santiago 1:​22-25.

‘Nagatulok’ kita sa Pulong sang Dios kon ginausisa naton ini sing maid-id kag ginapaanggid kon ano kita sa kon ano dapat kita suno sa mga talaksan sang Dios. Sa paghimo sini, mangin “manugtuman [kita] sing pulong, kag dili manugpalamati lamang.” Ang Biblia mangin may maayo nga epekto sa aton.

Ang Pulong sang Dios Subong Isa ka Espada

Sa katapusan, ginabuligan kita ni apostol Pablo nga mahangpan kon paano naton magamit ang Pulong sang Dios subong isa ka espada. Sang nagapaandam sa aton batok sa “mga punuan, batok sa mga kagamhanan, batok sa mga manugdumala sang kalibutan sining kadudulman, batok sa espirituhanon nga mga kabon sang kalautan sa langitnon nga mga duog,” ginasugo niya kita nga “gamiton . . . ang espada sang espiritu, nga amo, ang pulong sang Dios.” (Efeso 6:​12, 17) Ang Pulong sang Dios isa gid ka kinahanglanon nga hinganiban nga magamit naton sa pagdula sing bisan anong ideya nga “ginapautwas batok sa pagkilala nahanungod sa Dios.”​—⁠2 Corinto 10:​3-5.

Walay duhaduha, “ang pulong sang Dios buhi kag gamhanan.” (Hebreo 4:12) Si Jehova nagapakighambal sa katawhan paagi sa mga pinanid sang iya inspirado nga Pulong. Gamita ini sing maayo sa pagtudlo sa iban kag sa pagbuyagyag sing butig nga mga doktrina. Himusli ini sa pagpalig-on, pagpabakod, pagpaumpaw, paglipay, pagpahulag, kag pagpabaskog sa iban sa espirituwal. Kag kabay nga si Jehova ‘magasangkap sa imo sang tagsa ka maayong butang sa paghimo sang iya kabubut-on,’ agod nga mahimo mo pirme ang ‘kalahamut-an sa iya itululok.’​—⁠Hebreo 13:⁠21.

[Footnote]

[Piktyur sa pahina 31]

Ang mga gulang nagapalig-on sa iban, “nagagamit sing matadlong sang pulong sang kamatuoran”