Pagkabuhi Suno sa Putli nga Relihion Para sa Kaluwasan

“Ang relihion nga putli kag matuod sa panulok sang Dios nga Amay magapakita sang iya kaugalingon paagi sa mga butang subong sang . . . paghupot sang kaugalingon nga indi nadagtaan sang kalibutan.”​—⁠SANTIAGO 1:27, Phillips.

1. Paano ginlaragway ang relihion, kag sin-o ang may kinamatarong sa pagdesisyon kon ano ang pagkatuhay sang butig nga relihion kag sang matuod?

ANG relihion ginalaragway subong “ang ekspresyon sang pagtuo kag pagyaub sang tawo sa isa ka labaw sa tawo nga gahom nga ginakilala subong ang manunuga kag manugdumala sang uniberso.” Sin-o, nian, ang may kinamatarong sa pagdesisyon kon ano ang pagkatuhay sang matuod nga relihion kag sang butig nga relihion. Sa pagkamatuod amo gid ang Isa nga ginatuuhan kag ginayauban, ang Manunuga. Maathag nga ginpakita ni Jehova sa iya Pulong ang iya tindog sa matuod nga relihion kag sa butig.

Ang Tinaga nga “Relihion” sa Biblia

2. Paano ginapaathag sang mga diksionaryo ang orihinal nga Griegong tinaga nga ginbadbad nga “porma sang pagsimba” ukon “relihion,” kag sa ano nga mga sahi sang pagsimba maaplikar ini?

² Ang Griegong tinaga nga ginbadbad nga “porma sang pagsimba,” ukon “relihion,” amo ang thre·skeiʹa. Ang A Greek-English Lexicon of the New Testament nagalaragway sining tinaga subong “ang pagsimba sa Dios, relihion, la[bi] na kay ginapabutyag sini ang iya kaugalingon sa relihioso nga pag-alagad ukon kulto.” Ang Theological Dictionary of the New Testament nagahatag sing dugang pa nga mga detalye, nga nagasiling: “Ginabaisan ang orihinal nga ginhalinan sang tinaga; . . . ang modernong mga eskolar pabor sa kaangtanan sa therap- (‘sa pag-alagad’). . . . Mahimo man matalupangdan ang pagkatuhay sang kahulugan. Ang maayong kahulugan amo ang ‘relihioso nga kakugi’ . . . . ‘pagsimba sa Dios,’ ‘relihion.’ . . . Apang may yara man malain nga kahulugan, nga amo ang, ‘relihioso nga pagpasobra,’ ‘malain nga pagsimba.’ ” Sa amo, ang thre·skeiʹa mahimo badbaron nga “relihion” ukon “porma sang pagsimba,” maayo ukon malain.

3. Paano gingamit ni apostol Pablo ang tinaga nga ginbadbad nga “porma sang pagsimba,” kag ano ang makawiwili nga ginkomento sa pagbadbad sang Colosas 2:18?

³ Ini nga tinaga apat ka beses lamang nga nagalutaw sa Cristianong Griegong Kasulatan. Makaduha ini nga gingamit ni apostol Pablo sa pagpatuhoy sa butig nga relihion. Sa Binuhatan 26:​5, ginarekord sia subong nagsiling nga antes sia mangin Cristiano, “suno sa pinakaestrikto nga sekta sang aton porma sang pagsimba [“relihion,” Phillips] nagkabuhi ako nga Fariseo.” Sa iya sulat sa mga taga-Colosas, sia nagpaandam: “Indi pagtuguti ang bisan sin-o nga tawo nga idingot sa inyo ang padya nga nagakalipay sa pakunokuno nga pagkamapainubuson kag sa isa ka porma sang pagsimba sa mga anghel.” (Colosas 2:18) Ining pagsimba sa anghel mahimo nga lapnag sadto anay sa Frigia, apang isa ini ka porma sang butig nga relihion.⁠a Sing makawiwili, samtang ginabadbad sang iban nga badbad sang Biblia ang thre·skeiʹa nga “relihion” sa Colosas 2:​18, ang kalabanan nagagamit sing tinaga nga “pagsimba.” Ang New World Translation wala nagabag-o nga nagabadbad sang thre·skeiʹa nga “porma sang pagsimba,” kag sa kada tion nga ginagamit ini, ang footnote sa Reference Bible nagasambit sang tal-us nga badbad nga “relihion” nga ginagamit sa Latin nga mga bersion.

“Matinlo kag Walay Dagta Gikan sa Pagtamod sang Dios”

4, 5. (a) Suno kay Santiago, kay sin-o tindog sa relihion ang labing importante? (b) Ano ang makahimo sa porma sang pagsimba sang isa ka tawo nga walay pulos, kag ano ang buot silingon sang tinaga nga ginbadbad nga “walay pulos”?

⁴ Ang duha pa nga paggamit sa tinaga nga thre·skeiʹa yara sa sulat sang disipulo nga si Santiago, isa ka katapo sang nagadumala nga hubon sang unang-siglo nga Cristianong kongregasyon. Sia nagsulat: “Kon ang bisan sin-o nga tawo nagahunahuna sang iya kaugalingon nga isa ka pormal nga manugsimba [“nga ‘relihioso,’ ” Phillips] apang wala nagapugong sang iya dila, kundi nagadaya sang iya kaugalingon nga tagipusuon, ang porma sang pagsimba [“relihion,” Phillips] sining tawo wala sing pulos. Ang porma sang pagsimba [“relihion,” Phillips] nga matinlo kag walay dagta gikan sa pagtamod sang aton Dios kag Amay amo ini: ang pag-atipan sa mga ilo kag balo nga mga babayi sa ila kapipit-an, kag sa pagtipig sang iya kaugalingon nga walay dagta sa sining kalibutan.”​—⁠Santiago 1:​26, 27.

⁵ Huo, ang pagpahisuno sa tindog ni Jehova sa relihion importante kon luyag naton matigayon ang iya kahamuot kag maluwas padulong sa bag-ong kalibutan nga iya ginsaad. (2 Pedro 3:13) Ginapakita ni Santiago nga mahimo hunahunaon sang isa ka tawo ang iya kaugalingon nga relihioso gid apang ang iya porma sang pagsimba mahimo nga walay pulos. Ang Griegong tinaga diri nga ginbadbad nga “walay pulos” nagakahulugan man sing “walay bili, walay unod, walay bunga, walay gamit, walay gahom, walay kamatuoran.” Mahimo nga amo sini ang matabo kon ang isa nga nagapangangkon nga Cristiano wala nagapugong sang iya dila kag nagagamit sini sa pagdayaw kag sa pagpalig-on sa iya mga masigka Cristiano. ‘Ginadayaan [niya] ang iya kaugalingon nga tagipusuon’ kag wala nagakabuhi suno “sa relihion nga putli kag matuod sa panulok sang Dios.” (Phillips) Ang importante amo ang pagtamod ni Jehova.

6. (a) Ano ang tema sang sulat ni Santiago? (b) Anong kinahanglanon para sa putli nga pagsimba ang ginpadaku ni Santiago, kag ano ang ginsiling sang modernong-adlaw nga Nagadumala nga Hubon sa sining bahin?

⁶ Wala ginasambit ni Santiago ang tanan nga butang nga ginakinahanglan ni Jehova sa putli nga pagsimba. Nahisanto sa kabilugan nga tema sang iya sulat, nga amo ang pagtuo nga ginapamatud-an sang mga buhat kag ang kinahanglanon nga indi magpakig-abyan sa kalibutan ni Satanas, duha lamang ka kinahanglanon ang iya ginapadaku. Ang isa amo ang “pag-atipan sa mga ilo kag balo nga mga babayi sa ila kapipit-an.” Nagakinahanglan ini sing matuod nga Cristianong gugma. Si Jehova nagpakita sa tanan nga tion sing mahigugmaon nga pag-ulikid para sa mga ilo kag balo nga mga babayi. (Deuteronomio 10:​17, 18; Malaquias 3:5) Ang isa sang una nga ginhimo sang unang-siglo nga nagadumala nga hubon sang Cristianong kongregasyon amo ang para sa Cristianong balo nga mga babayi. (Binuhatan 6:​1-6) Naghatag si apostol Pablo sing detalyado nga mga instruksion sa pag-aman sing mahigugmaon nga pag-atipan sa imol nga tigulang nga balo nga mga babayi nga nangin matutom sa sulod sang mga tinuig kag wala sing pamilya nga magabulig sa ila. (1 Timoteo 5:​3-16) Ang modernong-adlaw nga Nagadumala nga Hubon sang mga Saksi ni Jehova naghatag man sing pat-od nga mga instruksion tuhoy sa “Pag-atipan sa mga Imol,” nga nagasiling: “Ang matuod nga pagsimba nagadalahig sing pag-atipan sa mga matutom kag mga maunungon nga mahimo nagakinahanglan sing materyal nga bulig.” (Tan-awa ang libro nga Organisado sa Pagtuman sang Aton Ministeryo, pahina 122-4.) Ang mga hubon sang mga gulang ukon indibiduwal nga mga Cristiano nga nagapatumbaya sa sini nga butang nagalaktaw sang isa ka importante nga bahin sang porma sang pagsimba nga matinlo kag walay dagta gikan sa pagtamod sang aton Dios kag Amay.

“Walay Dagta Gikan sa Kalibutan”

7, 8. (a) Anong ikaduha nga kinahanglanon para sa matuod nga relihion ang ginsambit ni Santiago? (b) Natuman bala sang klero kag sang mga pari ining kinahanglanon? (c) Ano ang masiling sa mga Saksi ni Jehova?

⁷ Ang ikaduha nga kinahanglanon para sa matuod nga relihion nga ginsambit ni Santiago amo ang “pagtipig sang kaugalingon nga walay dagta gikan sa kalibutan.” Si Jesus nagsiling: “Ang akon ginharian indi bahin sining kalibutan”; busa, ang iya man matuod nga mga sumulunod “indi bahin sang kalibutan.” (Juan 15:​19; 18:36) Masiling bala ini sa klero kag mga pari sang bisan anong relihion sining kalibutan? Ginasakdag nila ang Nasyones Unidas. Madamo sang ila mga lider ang nagbaton sang imbitasyon sang papa nga magsapol sa Assisi, Italya, sang Oktubre 1986 agod maghiusa sang ila mga pangamuyo para sa kadalag-an sang ginsakdag sang NU nga “Internasyonal nga Tuig sang Paghidait.” Apang, ang ila mga panikasog wala sing pulos, bangod sang minilyon nga napatay sa mga inaway sadto nga tuig kag sang mga tuig kutob sadto. Ang klero masami nga nagapakigsuod sa nagagahom nga partido politika, samtang malalangon nga nagapakig-angot sing patago sa kontra partido agod nga kon sin-o man ang magagahom tamdon sila nga “mga abyan.”​—⁠Santiago 4:⁠4.

⁸ Ang mga Saksi ni Jehova naghimo sing reputasyon para sa ila kaugalingon subong mga Cristiano nga nagapabilin nga neutral sa politika kag sa mga ilinaway sining kalibutan. Ginahuptan nila ini nga tindog sa tanan nga kontinente kag sa tanan nga pungsod, subong ginapamatud-an sang mga balita kag sang mga rekord sang modernong maragtas sa tanan nga bahin sang kalibutan. Sila sa pagkamatuod “walay dagta gikan sa kalibutan.” Ang sa ila amo ang “relihion nga putli kag matuod sa panulok sang Dios.”​—⁠Santiago 1:​27, Phillips.

Iban Pa nga mga Tanda sang Matuod nga Relihion

9. Ano ang ikatlo nga kinahanglanon para sa matuod nga relihion, kag ngaa?

⁹ Kon ang relihion “pagyaub sa isa ka labaw sa tawo nga gahom nga ginakilala subong ang manunuga kag manugdumala sang uniberso,” sa pagkamatuod ang matuod nga relihion dapat magpatuhoy sing pagsimba sa isa lamang ka matuod nga Dios, nga si Jehova. Dapat indi sini paggumunon ang paghangop sang katawhan tuhoy sa Dios paagi sa pagtudlo sing paganong mga doktrina subong sang trinidad nga Dios nga sa diin ang Amay nagapaambit sang iya pagkalabing gamhanan, himaya, kag pagkadayon upod sa duha pa ka persona sa isa ka milagruso nga Trinidad. (Deuteronomio 6:​4; 1 Corinto 8:6) Dapat man sini ipakilala ang walay tupong nga ngalan sang Dios, nga si Jehova, kag padunggan ina nga ngalan, sa pagkamatuod dalhon ang ngalan sang Dios subong isa ka organisado nga katawhan. (Salmo 83:​18; Binuhatan 15:14) Sa sini dapat sundon sang mga sumulunod sini ang huwaran ni Cristo Jesus. (Juan 17:6) Sin-o nga katawhan karon ang nagatuman sining kinahanglanon luwas sa Cristianong mga Saksi ni Jehova?

10. Agod nga ang isa ka relihion makatanyag sing kaluwasan padulong sa bag-ong kalibutan sang Dios, ano ang dapat himuon sini, kag ngaa?

¹⁰ Si apostol Pedro nagsiling: “Dugang pa, wala sing kaluwasan sa bisan kay sin-o, kay wala na sing iban pa nga ngalan [Jesucristo] sa idalom sang langit nga ginhatag sa mga tawo nga paagi sa sini maluwas kita.” (Binuhatan 4:​8-12) Busa, ang putli nga relihion nga magatanyag sing kaluwasan padulong sa bag-ong kalibutan sang Dios dapat magpapagsik sing pagtuo kay Cristo kag sa bili sang halad nga gawad. (Juan 3:​16, 36; 17:​3; Efeso 1:7) Dugang pa, dapat ini magbulig sa matuod nga mga sumilimba sa pagpasakop kay Cristo subong ang nagagahom nga Hari kag hinaplas nga Mataas nga Saserdote ni Jehova.​—⁠Salmo 2:​6-8; Filipos 2:​9-11; Hebreo 4:​14, 15.

11. Sa ano dapat napasad ang matuod nga relihion, kag ano ang tindog sang mga Saksi ni Jehova sa sining bahin?

¹¹ Ang putli nga relihion dapat napasad sa ginpahayag nga kabubut-on sang isa ka matuod nga Dios kag indi sa hinimo-sang-tawo nga mga tradisyon ukon mga pilosopiya. Wala kita sing mahibal-an tuhoy kay Jehova kag sa iya dalayawon nga mga katuyuan, ukon tuhoy kay Jehova kag sa halad nga gawad, kon indi bangod sa Biblia. Ang mga Saksi ni Jehova nagapatudok sa katawhan sing dimationg nga pagsalig sa Biblia. Ginapamatud-an man nila paagi sa ila adlaw-adlaw nga pagkabuhi nga sila nagaugyon sa ginsiling ni apostol Pablo: “Ang bug-os nga Kasulatan gin-inspirar sang Dios kag mapuslanon sa pagpanudlo, sa pagsabdong, sa paghusay sang mga butang, . . . agod nga ang tawo sang Dios mangin sangkol sing bug-os, nga nasangkapan sing bug-os para sa tagsa ka maayong buhat.”​—⁠2 Timoteo 3:​16, 17.

Ang Matuod nga Relihion​—⁠Isa ka Dalanon sang Kabuhi

12. Dugang sa pagtuo, ano pa ang kinahanglanon agod ang pagsimba mangin matuod, kag sa anong mga bahin ang matuod nga relihion isa ka dalanon sang kabuhi?

¹² Si Jesus nagsiling: “Ang Dios Espiritu, kag ang mga nagasimba sa iya dapat magsimba sa espiritu kag kamatuoran.” (Juan 4:24) Busa, ang matuod nga relihion, ukon porma sang pagsimba, indi isa ka seremonyal, ritwalistiko, naguwa nga pagpasundayag sing pagkadiosnon. Ang putli nga pagsimba espirituwal, nga napasad sa pagtuo. (Hebreo 11:6) Apang, ini nga pagtuo dapat ginasakdag sang mga buhat. (Santiago 2:17) Ginasikway sang matuod nga relihion ang popular nga mga huyog. Ginasunod sini ang mga talaksan sang moralidad kag matinlo nga panghambal sang Biblia. (1 Corinto 6:​9, 10; Efeso 5:​3-5) Ang mga sumulunod sini sinsero nga nagatinguha sa pagpatubas sing mga bunga sang espiritu sang Dios sa ila pagkabuhi bilang pamilya, sa ila sekular nga trabaho, sa eskwelahan, kag bisan sa ila kalingawan. (Galacia 5:​22, 23) Ginatinguhaan gid sang mga Saksi ni Jehova nga indi pagkalipatan ang laygay ni apostol Pablo: “Busa, bisan nagakaon kamo ukon nagainom ukon bisan ano ang inyo ginahimo, himua ang tanan nga butang sa himaya sang Dios.” (1 Corinto 10:31) Ang ila relihion indi pormalismo lamang; isa ini ka dalanon sang kabuhi.

13. Ano ang nadalahig sa matuod nga pagsimba, kag ngaa masiling nga ang mga Saksi ni Jehova relihioso gid nga mga tawo?

¹³ Sa pagkamatuod, ang matuod nga relihion nagadalahig sing espirituwal nga mga hilikuton. Nagalakip ini sang pangamuyo, sing personal kag subong pamilya, sang regular nga pagtuon sang Pulong sang Dios kag sang mga bulig sa pagtuon sang Biblia, kag sang pagtambong sa matuod nga Cristianong mga miting sa kongregasyon. Ining naulihi ginabuksan kag ginatakpan paagi sa mga ambahanon sang pagdayaw kay Jehova kag sa mga pangamuyo. (Mateo 26:​30; Efeso 5:19) Ang makapalig-on nga espirituwal nga mga tema ginausisa paagi sa mga diskurso kag pamangkot-kag-sabat nga mga paghinun-anon sa naimprinta nga materyal nga matigayon sang tanan. Ini nga mga miting masami nga ginahiwat sa matinlo apang indi madamo sing puni nga mga Kingdom Hall, nga ginagamit para lamang sa relihioso nga mga katuyuan: regular nga mga miting, mga kasal, mga serbisyo para sa lubong. Ginatahod sang mga Saksi ni Jehova ang ila mga Kingdom Hall kag ang mas dalagku nga mga Assembly Hall subong mga duog nga gindedikar para sa pagsimba kay Jehova. Indi kaangay sang madamo nga simbahan sang Cristiandad, ang mga Kingdom Hall wala ginagamit subong sosyal nga mga klab.

14. Ano ang kahulugan sang pagsimba para sa nagahambal sing Hebreo nga katawhan, kag anong hilikuton ang nagapatuhay karon sa mga Saksi ni Jehova?

¹⁴ Nakita naton kaina nga ginaangot sang mga eskolar ang Griegong tinaga nga ginbadbad nga “porma sang pagsimba” ukon “relihion” sa berbo nga “sa pag-alagad.” Sing makawiwili, ang Hebreo nga katumbas, nga ‘avo·dhahʹ, sarang mabadbad nga “pag-alagad” ukon “pagsimba.” (Ipaanggid ang mga footnote sa Exodo 3:​12 kag 10:⁠26.) Para sa mga Hebreo, ang pagsimba nagkahulugan sing pag-alagad. Kag amo sini ang buot silingon sini para sa matuod nga mga sumilimba karon. Ang labing importante nga tanda nga nagapatuhay sang matuod nga relihion amo nga ang tanan nga sumulunod sini nagapakigbahin sa diosnon nga pag-alagad sang pagbantala “sining maayong balita sang ginharian . . . sa bug-os napuy-an nga duta subong panaksi sa tanan nga kapungsuran.” (Mateo 24:​14; Binuhatan 1:​8; 5:42) Ano nga relihion ang kilala sa bug-os nga kalibutan sa iya dayag nga pagpanaksi sa Ginharian sang Dios subong amo lamang ang paglaum sang katawhan?

Isa ka Positibo, Nagapahiusa nga Kusog

15. Ano ang talalupangdon nga kinaiya sang matuod nga relihion?

¹⁵ Ang butig nga relihion nagapabahinbahin. Nagtuga ini, kag nagatuga gihapon, sing dumtanay kag pagpaagay sing dugo. Sa kabaliskaran, ang matuod nga relihion nagapahiusa. Si Jesus nagsiling: “Paagi sa sini makilala sang tanan nga kamo mga disipulo ko, kon may gugma kamo sa tunga ninyo.” (Juan 13:35) Ang gugma nga nagahiusa sa mga Saksi ni Jehova nagalabang sa pungsudnon, sosyal, ekonomiko, kag rasyal nga mga dulunan nga nagabahinbahin sa tanan nga katawhan wala labot sa ila. Ang mga Saksi “nagatindog sing malig-on sa isa ka espiritu, sa isa ka kalag nga nagapanikasog sing tingob tungod sa pagtuo sa maayong balita.”​—⁠Filipos 1:⁠27.

16. (a) Anong “maayong balita” ang ginabantala sang mga Saksi ni Jehova? (b) Anong mga tagna ang nagakatuman sa katawhan ni Jehova, kag anong mga pagpakamaayo ang nagsunod?

¹⁶ Ang “maayong balita” nga ila ginabantala amo nga sa dili madugay ang indi mabag-o nga katuyuan sang Dios matuman. Ang iya kabubut-on pagatumanon, “kon paano sa langit, amo man sa duta.” (Mateo 6:10) Ang mahimayaon nga ngalan ni Jehova pakabalaanon, kag ang duta mangin isa ka paraiso, nga sa diin ang matuod nga mga sumilimba magakabuhi tubtob sa walay katubtuban. (Salmo 37:29) Minilyon ka katawhan sa tanan nga pungsod ang nagapakig-upod sa mga Saksi ni Jehova, nga nagasiling, bilang katumanan sang tagna sang Biblia: “Magaupod kami sa inyo, kay nabatian namon nga ang Dios nagaupod sa inyo.” (Zacarias 8:23) Ginapakamaayo ni Jehova ang iya katawhan. “Ang diutay” nangin “isa ka mabakod nga pungsod,” isa ka bug-os kalibutan nga kongregasyon nga nahiusa sing bug-os sa tanan nga bahin​—⁠sa panghunahuna, sa hilikuton, sa pagsimba. (Isaias 60:22) Butang ini nga wala gid mahimo sang butig nga relihion.

Ang Kadalag-an sang Putli nga Relihion

17. Ano ang nagahulat sa Babilonia nga Daku, kag paano ini mahanabo?

¹⁷ Gintagna sang Pulong sang Dios ang kalaglagan sang bug-os kalibutan nga emperyo sang butig nga relihion, nga simbuliko nga gintawag “Babilonia nga Daku.” Ginalaragway man sang Biblia ang “mga hari,” ukon politikal nga mga manuggahom, sang duta paagi sa simbulo sang mga sungay sang isa ka mapintas nga sapat. Ginasugiran kita sini nga ibutang sang Dios sa tagipusuon sining mga manuggahom ang katuyuan nga bihagon kag laglagon sing bug-os ining tulad-makihilawason nga institusyon ni Satanas nga Yawa.​—⁠Tan-awa ang Bugna 17:​1, 2, 5, 6, 12, 13, 15-18.⁠b

18. Ano ang importante nga rason nga ginahatag sang Biblia sa paglaglag sa Babilonia nga Daku, kag san-o nagsugod ang butig nga relihion sa sining makakulugmat nga dalanon?

¹⁸ Ngaa takus laglagon ang Babilonia nga Daku? Ang Biblia nagasabat: “Sa iya nasapwan ang dugo sang mga manalagna kag sang mga balaan kag sang tanan nga ginpatay sa duta.” (Bugna 18:24) Sa pagpakita nga ining kasal-anan sa dugo sang butig nga relihion nagsugod bisan sa wala pa matukod ang Babilonia, ginpakamalaut ni Jesus ang relihioso nga mga lider sang Judaismo, nga nag-angot sang iya kaugalingon sa Babilonia nga Daku, sang magsiling sia: “Mga man-ug, kaliwat sang mga man-ug, paano ninyo malikawan ang paghukom sang Gehenna? . . . Magaabot sa inyo ang tanan nga dugo sang mga matarong nga gin-ula sa duta, kutob sa dugo ni Abel.” (Mateo 23:​33-35) Huo, ang butig nga relihion, nga nagsugod sa duta sang tion sang pagrebelde sa Eden, dapat manabat sa iya makakulugmat nga kasal-anan sa dugo.

19, 20. (a) Ano ang himuon sang matuod nga mga sumilimba sa tapos mahukman ang Babilonia nga Daku? (b) Ano nian ang mahanabo, kag anong paglaum ang magabukas sa atubangan sang tanan nga matuod nga mga sumilimba?

¹⁹ Sa tapos malaglag ang Babilonia nga Daku, ang mga sumilimba sa duta magatingob sang ila tingog sa langitnon nga koro nga magaamba sing: “Dayawa si Jah, ninyo nga katawhan! . . . Kay ginhukman niya ang dakung makihilawason nga babayi . . . , kag natimalusan niya ang dugo sang iya mga ulipon sa iya kamot. . . . Kag ang aso gikan sa iya nagatub-ok sing dayon kag dayon.”​—⁠Bugna 19:​1-3.

²⁰ Nian ang iban pa nga mga bahin sang kitaon nga organisasyon ni Satanas pagalaglagon. (Bugna 19:​17-21) Sa tapos sini, si Satanas, ang tagtukod sang tanan nga butig nga relihion, kag ang iya mga demonyo pagaitagbong sa kadadalman. Indi na sila mangin hilway agod hingabuton ang matuod nga mga sumilimba ni Jehova. (Bugna 20:​1-3) Ang putli nga relihion magadaug batok sa butig. Ang matutom nga mga lalaki kag mga babayi nga namati sa balaan nga paandam nga magguwa karon gikan sa Babilonia nga Daku may kahigayunan nga makalampuwas kag makasulod sa bag-ong kalibutan sang Dios. Didto, magakabuhi sila suno sa matuod nga relihion kag masimbahon nga magaalagad kay Jehova tubtob sa walay katubtuban.

[Mga footnote]

Tilawi ang Imo Memorya

◻ Kay sin-o tindog sa relihion ang labing importante, kag ngaa?

◻ Anong duha ka kinahanglanon para sa matuod nga relihion ang ginpadaku ni Santiago?

◻ Ano ang iban pa nga mga kinahanglanon para sa putli nga pagsimba?

◻ Anong “maayong balita” ang ginabantala sang mga Saksi ni Jehova?

◻ Paano ang matuod nga relihion magadaug batok sa butig nga relihion?

[Laragway sa pahina 17]

Relihioso nga mga lider nga nagtipon sa Assisi, Italya, sang Oktubre 1986

[Laragway sa pahina 19]

Ang matuod nga relihion nagadalahig sang pagtipon sing tingob para sa pagsimba