Malipayon nga mga “Manugtuman sang Pulong”

“Batuna nga may kalum-ok ang pulong nga ginpaturok nga makaluwas sang inyo mga kalag. Apang, mangin mga manugtuman kamo sang pulong, kag dili manugpalamati lamang.”​—⁠SANTIAGO 1:​21, 22.

 1. Paano dapat tamdon ang aton tuigan nga teksto para sa 1996?

“MANGIN MGA MANUGTUMAN SANG PULONG.” Ining simple nga pinamulong nagadala sing makusog nga mensahe. Ginkuha ini sa “Sulat ni Santiago” sa Biblia, kag makita ini sa mga Kingdom Hall subong tuigan nga teksto sang mga Saksi ni Jehova sa bug-os nga 1996.

 2, 3. Ngaa nagakaigo nga isulat ni Santiago ang sulat nga nagadala sang iya ngalan?

² Si Santiago, ang utod sa amay ni Ginuong Jesus, kilala anay sa unang Cristianong kongregasyon. Sang isa ka okasyon sa tapos ginbanhaw si Jesus, ang aton Ginuo nagpakita sing personal kay Santiago kag nian sa tanan nga mga apostoles. (1 Corinto 15:⁠7) Sang ulihi, sang si apostol Pedro nakaguwa sing milagruso gikan sa bilangguan, ginsugiran niya ang nagtipon nga Cristianong grupo: “Isugid ining mga butang kay Santiago kag sa mga kauturan.” (Binuhatan 12:17) Bisan pa indi isa ka apostol, mahimo nga gindumalahan ni Santiago ang pagsinapol sang nagadumala nga hubon sa Jerusalem sang ang mga apostoles kag ang mga gulang namat-od nga ang Gentil nga mga nakumbertir indi na kinahanglan sirkunsidahon. Ginsumaryo ini ni Santiago, kag ang desisyon nga ginpalig-on sang balaan nga espiritu ginpadala sa tanan nga mga kongregasyon.​—⁠Binuhatan 15:​1-29.

³ Sing maathag, ang hamtong nga pagpangatarungan ni Santiago may awtoridad. Apang, mapainubuson niya nga ginkilala nga sia isa lamang ka “ulipon sang Dios kag ni Ginuong Jesucristo.” (Santiago 1:⁠1) Ang iya inspirado nga sulat nagaunod sang isa ka manggad sang maligdong nga laygay kag pagpalig-on para sa mga Cristiano karon. Natapos ini mga apat ka tuig antes ang unang pagsalakay sang mga Romano sa Jerusalem paagi kay Heneral Cestius Gallus,sa tapos nga ang maayong balita ginbantala sing lapnag “sa tanan nga tinuga sa idalom sang langit.” (Colosas 1:23) Ital-ital nga mga tion yadto, kag nakahibalo gid ang mga alagad ni Jehova nga ang Iya paghukom igapatuman sa Judiyong pungsod.

 4. Ano ang nagapakita nga ang unang mga Cristiano may daku nga pagsalig sa Pulong sang Dios?

⁴ Ang mga Cristiano sadto may bug-os na nga Hebreong Kasulatan kag kalabanan sang Griegong Kasulatan. Subong sang ginpakita sang ila madamong paghinambit sa naunang mga sinulatan, ang Cristianong mga manunulat sang Biblia maathag nga nagasalig sing daku sa Pulong sang Dios. Sa kaanggid, kinahanglan naton karon tun-an ang Pulong sang Dios sing hanuot kag iaplikar ini sa aton kabuhi. Agod makabatas, kinahanglan naton ang espirituwal nga kusog kag kaisog nga ginaaman sang Balaan nga Kasulatan.​—⁠Salmo 119:97; 1 Timoteo 4:⁠13.

 5. Ngaa kinahanglan naton ang pinasahi nga panuytoy karon, kag sa diin naton ini masapwan?

⁵ Sa karon ang katawhan yara sa bibi sang “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Ang aton kaluwasan nasandig sa pagtigayon sing panuytoy sang Dios. Paano naton ini masapwan? Paagi sa pagbukas sang aton tagipusuon sa mga panudlo sang ginbugnaan sang espiritu nga Pulong sang Dios. Magatuytoy ini sa aton nga “mangin mga manugtuman sang pulong,” kaangay sang mainunungon nga mga alagad ni Jehova sang una. Dapat naton basahon kag tun-an ang Pulong sang Dios sing maukod kag gamiton ini sa pagdayaw kay Jehova.​—⁠2 Timoteo 2:15; 3:​16, 17.

Pagbatas nga May Kalipay

 6. Ngaa dapat kita makasapo sing kalipay sa pag-atubang sa mga pagtilaw?

⁶ Sa pagbukas sang iya sulat, ginasambit ni Santiago ang kalipay, ang ikaduhang bunga sang espiritu sang Dios. Sia nagsulat: “Kabiga ninyo nga bug-os nga kalipay, mga kauturan ko, kon makasugata kamo sing madamo nga mga pagtilaw, kay nakahibalo kamo nga ining natilawan nga kinaiya sang inyo pagtuo nagahikot sing pagbatas. Apang pahikuta sing bug-os ang pagbatas, agod nga mahimpit kamo kag mabug-os sa tanan nga butang, nga wala sing bisan ano man nga kakulangan.” (Santiago 1:​2-4; Galacia 5:​22, 23) Paano naton masiling nga “bug-os nga kalipay” ang makasugata sing madamong pagtilaw? Ti, bisan si Jesus nagsiling sa iya Sermon sa Bukid: “Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sang tanan nga bagay sang kalautan batok sa inyo bangod sa akon. Magkalipay kamo kag maglumpat sa kasadya, kay ang inyo padya daku sa langit.” (Mateo 5:​11, 12) May yara makalilipay nga kaayawan nga makita ang pagpakamaayo ni Jehova sa aton mga paninguha samtang nagapanikasog kita sing lakas ayon sa tulumuron nga kabuhi nga walay katapusan.​—⁠Juan 17:3; 2 Timoteo 4:​7, 8; Hebreo 11:​8-10, 26, 35.

 7. (a) Paano kita mahimo mabuligan nga makabatas? (b) Kaangay ni Job, paano kita mahimo padyaan?

⁷ Si Jesus mismo nagbatas “tungod sa kalipay nga ginbutang sa iya atubang.” (Hebreo 12:​1, 2) Nagatan-aw sing maayo sa maisugon nga halimbawa ni Jesus, kita man mahimo makabatas! Subong sang ginhinambit ni Santiago sa hingapusan sang iya sulat, ginapadyaan ni Jehova sing bugana ang mga manughupot sing integridad. “Yari karon! Ginatawag namon nga malipayon ang mga nagbatas,” siling ni Santiago. “Nabatian ninyo ang pagbatas ni Job kag nakita ninyo ang bunga nga ginahatag ni Jehova, nga si Jehova mapinalanggaon gid kag maluluy-on.” (Santiago 5:11)Dumduma kon paano ang integridad ni Job ginpadyaan sang ginpasag-uli sia sa maayong panglawas kag nag-agom sing bug-os, malipayon nga pagkabuhi kaupod sang mga hinigugma. Ang pagbatas nga may integridad makahatag man sa inyo sing kaanggid nga kalipay sa ginsaad nga Paraiso sa bag-ong kalibutan sang Dios, subong ang talipuspusan sang kalipay sa pag-alagad kay Jehova karon.

Pagpangita sang Kaalam

 8. Paano naton masapwan ang matuod, praktikal nga kaalam, kag ano ang bahin sang pangamuyo sa sini?

⁸ Ang aton makugi nga pagtuon sang Pulong sang Dios, lakip ang praktikal nga pag-aplikar sini, magaresulta sa diosnon nga kaalam, nagabulig sa aton sa pagbatas sang mga pagtilaw sa tunga sang kalautan sang nagatagumatayon nga sistema ni Satanas. Paano kita ginapasalig nga masapwan ang subong sina nga kaalam? Si Santiago nagasugid sa aton: “Kon ang bisan sin-o sa inyo nga nakulangan sing kaalam, papangayoa sia sing padayon sa Dios, kay nagahatag sia sing maalwan sa tanan kag wala nagabasol; kag hatagan sia sini. Apang papangayoa sia sing padayon nga may pagtuo, nga wala gid nagapangduhaduha, kay sia nga nagaduhaduha kaangay sang balud sang dagat nga ginapalid kag ginatumbo sang hangin.” (Santiago 1:​5, 6) Dapat kita mangamuyo sing hanuot, upod ang dimalingkang nga pagsalig nga pamatian ni Jehova ang aton mga pangabay kag nga pagasabton niya ini sa iya gintalana nga tion kag paagi.

 9. Paano ginalaragway ni Santiago ang diosnon nga kaalam kag ang pag-aplikar sini?

⁹ Ang diosnon nga kaalam isa ka dulot halin kay Jehova. Nagalaragway sinang mga dulot, si Santiago nagsiling: “Ang tagsa ka maayong hatag kag ang tagsa ka dulot nga himpit nagagikan sa hitaas, bangod nanaug ini halin sa Amay sang langitnon nga mga kapawa nga sa iya walay pagliwanliwan sa pagbalhin sang landong.” Sang ulihi sa iya sulat, ginpaathag ni Santiago ang resulta sang pagtigayon sing matuod nga kaalam sang nagsiling sia: “Sin-o bala ang maalam kag mahangpunon sa inyo? Ipakita niya gikan sa iya maayong paggawi ang iya mga binuhatan nga may kalum-ok nga natungod sa kaalam. . . . Ang kaalam gikan sa hitaas una sa tanan putli, ugaling mahidaiton, makatarunganon, handa sa pagtuman, puno sang kaluoy kag maayong mga bunga, nga wala nagahimo sing may nadampigan nga pagpasulabi, indi salimpapaw.”​—⁠Santiago 1:17; 3:​13-17.

 10. Paano mapaanggid ang butig nga relihion sa matuod?

¹⁰ Sa bug-os kalibutan nga emperyo sang butig nga relihion, sa Cristiandad man ukon sa iban nga mga kadutaan, kinabatasan na sa masami para sa mga sumilimba ang pag-amba sing pila ka himno, pagpamati sa sulit-sulit nga mga pangadi, kag ayhan ang pagpamati sa isa ka diskurso. Wala sing ginahatag nga pagpalig-on ayon sa pagbantala sang mensahe sang paglaum, kay ang kalabanan nga mga relihion wala sing nakita nga masanag nga paglaum para sa palaabuton. Ang mahimayaon nga paglaum sang Mesianikong Ginharian sang Dios wala gid ginahinambitan ukon wala mahangpan sing bug-os. Si Jehova nagasiling sing matagnaon tuhoy sa klero sang Cristiandad: “Ang akon katawhan naghimo sing duha ka malaut: Ginbayaan nila ako, ang tuburan sang mga tubig nga buhi, kag nagkutkot nga sa ila sing mga suluptan sing tubig, mga suluptan sing tubig nga tahus, nga indi makasupot sing tubig.” (Jeremias 2:13) Wala sila sing tubig sang kamatuoran. Kulang sing langitnon nga kaalam.

 11, 12. (a) Paano ang kaalam sang Dios dapat magapahulag sa aton? (b) Nahanungod sa ano kita ginapaandam sang kaalam sang Dios?

¹¹ Tuhay gid sa tunga sang mga Saksi ni Jehova karon! Upod ang hatag-Dios nga dinamikong enerhiya, ginabahaan nila ang duta sing maayong balita tuhoy sa Iya nagapakari nga Ginharian. Ang ginapamulong nila nga kaalam ginapasad sing bug-os sa Pulong sang Dios. (Ipaanggid ang Hulubaton 1:20; Isaias 40:​29-31.) Sa pagkamatuod, ginagamit nila sing praktikal ang matuod nga ihibalo kag paghangop sa pagbantala sang dalagkung mga katuyuan sang aton Dios kag Manunuga. Dapat naton mangin handum nga ang tanan sa kongregasyon ‘mapun-an sang sibu nga ihibalo sang kabubut-on [sang Dios] sa bug-os nga kaalam kag espirituwal nga paghangop.” (Colosas 1:⁠9) Bangod sini nga sadsaran, lunsay ang bata kag tigulang mapahulag pirme nga “mangin mga manugtuman sang pulong.”

¹² “Ang kaalam gikan sa hitaas” nagapaandam sa aton tuhoy sa mga sala nga mahimo magaresulta sa dikahamuot sang Dios. “Hibalua ninyo ini, hinigugma kong mga kauturan,” siling ni Santiago. “Ang tagsa ka tawo dapat mangin madagmit sa pagpamati, mahinay sa paghambal, makuli sa pagpangakig; kay ang kaakig sang tawo wala nagahikot sang pagkamatarong sang Dios.” Huo, dapat kita mangin madagmit, malangkagon, sa pagpamati sa laygay sang Dios kag iaplikar ini. Apang, dapat kita magbantay batok sa sayop nga paggamit sinang “diutay nga bahin,” ang dila. Paagi sa tinikal, dimaalamon nga kutsokutso, ukon matig-a nga pagpilit sang kaugalingon nga opinyon, ang dila malaragwayon nga makasunog sang ‘daku nga kagulangan.’ Busa dapat naton palambuon ang pagkaayo kag pagpugong sa kaugalingon sa aton tanan nga pagpakig-upod.​—⁠Santiago 1:​19, 20; 3:⁠5.

 13. Ngaa importante nga batunon naton ang “pagpaturok sang pulong”?

¹³ “Hanti,” sulat ni Santiago, “isikway ang tanan nga kahigkuan kag inang kalakasan nga butang, ang kalautan, kag batuna nga may kalum-ok ang pulong nga ginpaturok nga makaluwas sang inyo mga kalag.” (Santiago 1:21) Ining makagod nga kalibutan, lakip ang pakitakita, materyalistiko, ako-anay nga estilo sang pagkabuhi kag manubo nga moral sini, manugtaliwan na. “Apang sia nga nagahimo sang kabubut-on sang Dios magapabilin sing dayon.” (1 Juan 2:​15-17) Daw ano gid ka importante, nian, nga batunon naton ang “pulong nga ginapaturok”! Ang kaalam nga ginahatag sang Pulong sang Dios tuhay gid sa kalainan sining nagatagumatayon nga kalibutan. Wala kita sing luyag sa sinang kalainan. (1 Pedro 2:​1, 2) Kinahanglan naton ang gugma sa kamatuoran kag ang mabakod nga pagtuo nga ginpaturok sa aton tagipusuon, agod determinado kita nga indi gid maglisa sa matarong nga mga dalanon ni Jehova. Apang bastante na bala nga pamatian ang Pulong sang Dios?

Mangin mga “Manugtuman sang Pulong”

 14. Paano kita mahimo mangin “manugpamati” kag “manugtuman” sang Pulong?

¹⁴ Sa Santiago 1:​22, aton mabasa: “Mangin mga manugtuman sang pulong, kag dili manugpalamati lamang, nga nagadaya sang inyo kaugalingon paagi sa butig nga pangatarungan.” “Mangin mga manugtuman sang pulong”! Ining tema pat-od gid nga ginpadaku sa sulat ni Santiago. Dapat kita mamati, nian himuon ang “amo gid”! (Genesis 6:22) Madamong tawo sa karon ang nagasiling nga bastante na ang makapamati sing sermon ukon makapakigbahin sa pila ka pormalistiko nga pagsimba sa pulupanag-on, apang wala sila sing ginahimo nga dugang pa. Mahimo sila maghunahuna nga tubtob nagakabuhi sila sing ‘maayo nga pagkabuhi’ suno sa ila talaksan, bastante na ina. Apang si Jesucristo nagsiling: “Kon ang bisan sin-o luyag magsunod sa akon, isikway niya ang iya kaugalingon kag pas-anon ang iya usok sang pag-antos kag padayon nga magsunod sa akon.” (Mateo 16:24) Ang nagasakripisyo sa kaugalingon nga buhat kag pagbatas bilang pagsunod sa huwaran ni Jesus sa paghimo sang kabubut-on sang Dios maathag nga ginapatuman sa matuod nga mga Cristiano. Para sa ila, ang kabubut-on sang Dios sa karon pareho gihapon sadto anay sang nahaunang siglo sang ang ginbanhaw nga si Jesus nagsugo: “Busa lakat kamo kag himuon nga mga disipulo sang katawhan ang tanan nga kapungsuran.” (Mateo 28:19) Kamusta ka sa sining bahin?

 15. (a) Anong ilustrasyon ang ginahatag ni Santiago, nga nagapakita kon paano kita mahimo mangin malipayon subong “mga manugtuman sang pulong”? (b) Ngaa indi bastante ang pormal nga pagsimba lamang?

¹⁵ Kon padayon naton nga ginatan-aw ang Pulong sang Dios, mangin kaangay ini sang isa ka salaming nga nagapabanaag sa aton kon ano gid nga sahi kita sang mga tawo. Si Santiago nagsiling: “Sia nga nagatan-aw sa himpit nga kasuguan nga natungod sa kahilwayan kag nagapadayon sa sini, ining tawo, bangod sia nangin, indi malimuton nga manugpamati, kundi manugtuman sang hilikuton, mangin malipayon sa paghimo sini.” (Santiago 1:​23-25) Huo, mangin malipayon sia nga ‘manugtuman sang pulong.’ Dugang pa, importante ang mangin “manugtuman” sa tagsa ka detalye sang aton Cristianong pagkabuhi. Indi gid naton dapat dayaon ang aton kaugalingon sa paghunahuna nga ang pormal nga pagsimba bastante na. Si Santiago nagalaygay sa aton nga himuon ang pila ka bahin sang matuod nga pagsimba nga mahimo napatumbayaan bisan sang makugi nga mga Cristiano. Sia nagsulat: “Ang dagway sang pagsimba nga matinlo kag walay dagta sa pagtamod sang aton Dios kag Amay amo ini: ang pag-atipan sa mga ilo kag mga balo sa ila kapipit-an, kag ang pagtipig sa kaugalingon nga walay mantsa sa sining kalibutan.”​—⁠Santiago 1:⁠27.

 16. Sa anong mga paagi si Abraham nangin “abyan ni Jehova,” kag paano naton matigayon ang Iya pagpakig-abyan?

¹⁶ Indi lamang bastante ang magsiling, ‘Nagatuo ako sa Dios,’ kag pabayaan na lamang ini nga amo sina. Subong sang ginasiling sang Santiago 2:19: “Ikaw nagatuo nga may isa ka Dios, indi bala? Nagahimo ka sing maayo. Apang ang mga yawa nagatuo kag nagakurog.” Ginapadaku ni Santiago nga “ang pagtuo, kon walay binuhatan, patay sa iya kaugalingon,” kag nagahinambit kay Abraham, nga nagasiling: “Ang iya pagtuo nagahikot kaupod sang iya mga binuhatan kag bangod sang iya mga binuhatan ang iya pagtuo ginhimpit.” (Santiago 2:​17, 20-22) Ang mga binuhatan ni Abraham nagalakip sang pag-aman sing bulig sa iya mga himata, pagpakita sing pagkamaabiabihon, paghanda nga ihalad si Isaac, kag ‘pagpahayag sing dayag’ sang dimalingkang nga pagtuo sa ginsaad sang Dios nga “siudad nga may matuod nga mga sadsaran,” ang palaabuton nga Mesianikong Ginharian. (Genesis 14:16; 18:​1-5; 22:​1-18; Hebreo 11:​8-10, 13, 14; 13:⁠2) Sing nagakaigo, si Abraham “gintawag nga ‘abyan ni Jehova.’ ” (Santiago 2:23) Mahimo man kita maisip subong ‘mga abyan ni Jehova’ samtang ginabantala naton sing aktibo ang aton pagtuo kag paglaum sa iya nagapakari nga Ginharian sang pagkamatarong.

 17. (a) Ngaa si Rahab “ginpahayag nga matarong,” kag paano sia ginpadyaan? (b) Anong malaba nga listahan ang ginahatag sang Biblia tuhoy sadtong ‘nangin mga manugtuman sang pulong’? (c) Paano ginpadyaan si Job, kag ngaa?

¹⁷ Yadtong “mangin mga manugtuman sang pulong” sa pagkamatuod “ginpahayag nga matarong bangod sang mga binuhatan, kag indi lamang bangod sang pagtuo.” (Santiago 2:24) Si Rahab amo ang isa sang nagdugang sing mga binuhatan sa iya pagtuo sa “pulong” nga nabatian niya nahanungod sa gamhanan nga mga buhat ni Jehova. Gintago niya ang Israelinhon nga mga espiya kag ginbuligan sila nga makapalagyo, kag nian gintipon niya ang panimalay sang iya amay agod makalampuwas. Sa pagkabanhaw, daw ano gid ang iya kalipay sa pagkahibalo nga ang iya pagtuo, nga ginsakdag sang mga binuhatan, nagdul-ong nga mangin katigulangan sia sang Mesias! (Josue 2:11; 6:25; Mateo 1:⁠5) Ang Hebreo kapitulo 11 nagahatag sang malaba nga listahan sang iban pa nga ‘nangin mga manugtuman’ sa pagpakita sang ila pagtuo, kag ginpadyaan sila sing bugana. Indi man naton dapat pagkalimtan si Job, nga sa idalom sang daku nga pagtilaw nagsiling: “Padayon nga pakamaayuhon ang ngalan ni Jehova.” Subong sang nahibaluan na naton, ang iya pagtuo kag mga binuhatan nagresulta sa daku nga padya. (Job 1:21; 31:6; 42:10; Santiago 5:11) Sa kaanggid, ang aton pagbatas sa karon subong “mga manugtuman sang pulong” pagakahamut-an ni Jehova.

 18, 19. Paano ang madugay na ginpigos nga mga kauturan ‘nangin mga manugtuman sang pulong,’ kag anong pagpakamaayo ang gindala sang ila hilikuton?

¹⁸ Lakip sa mga nagbatas sing daku sa mga tinuig amo ang aton mga kauturan sa Nasidlangan nga Europa. Karon nga ang madamong pagdumili ginkuha na, tunay sila nga nangin “mga manugtuman sang pulong” sa ila bag-ong palibot. Ang mga misyonero kag mga payunir gikan sa kaingod nga mga kadutaan nagsaylo agod magbulig sa pagpanudlo kag pag-organisar. Ang sanga sang Finland kag ang iban pa kaingod nga mga sanga sang Watch Tower Society nagpadala sing eksperto nga mga manunukod, kag gingastuhan sang maalwan nga paghiliutod sa bug-os nga kalibutan ang pagpatindog sing bag-ong mga sanga talatapan kag mga Kingdom Hall.​—⁠Ipaanggid ang 2 Corinto 8:​14, 15.

¹⁹ Makugi gid katama yadtong madugay na ginpigos nga mga kauturan sa latagon! ‘Nagapangabudlay sila sing lakas kag nagapanikasog’ nga bayaran, kon sa aton pa, ang mga kahigayunan nga indi matigayon sadtong “magamo nga panahon.” (1 Timoteo 4:10; 2 Timoteo 4:⁠2) Halimbawa, sang nagligad nga Abril sa Albania, diin ang pagpugong mapintas gid sadto, ang bug-os nga suplay sang Kingdom News nga natig-uluhan “Ngaa ang Kabuhi Puno Gid sing mga Problema?” ginpanagtag sa tatlo ka adlaw lamang. Matahom gid ini nga pagsunod sa Memoryal sang kamatayon ni Jehova, nga gintambungan sang 3,941 ka tawo​—⁠nga daku gid ang kalabawon sa ila 538 ka aktibo nga mga manugbantala.

 20. Ano ang ginapakita sang ulihi nga mga tumalambong sa Memoryal kag paano mabuligan ang madamo?

²⁰ Ang iban nga mga kadutaan nakaamot man sing tumalagsahon sa mga tumalambong sa Memoryal, nga nag-uswag sining ulihi nga tinuig sa kapin sa 10,000,000. Sa madamong kadutaan ang mga bag-uhan, nga ang ila pagtuo ginpabakod bangod sang pagtambong kag pagsaulog sang Memoryal, ‘nangin mga manugtuman sang pulong.’ Mahimo bala naton mapalig-on ang madamong bag-ong kaupdanan agod makalipikar para sa sina nga pribilehiyo?

 21. Nahisanto sa aton tuigan nga teksto, anong dalanon ang dapat naton padayunon, kag upod ang anong lalambuton?

²¹ Kaangay sadtong makugi nga mga Cristiano sang nahaunang siglo, kag sang madamo pa katama sugod sadto, mangin determinado kita sa pagpanikasog sa ‘pagpadayon padulong sa lalambuton’ nga kabuhi nga walay katapusan, sa langitnon man ina nga Ginharian ukon sa dutan-on nga sakop sini. (Filipos 3:​12-14) Takus sa aton tanan nga panikasog nga matigayon ina nga lalambuton. Indi ini ang tion nga mangin mga manugpamati na lamang, kundi sa tanan nga tion ‘mangin mabakod kag mangabudlay.’ (Hageo 2:4; Hebreo 6:​11, 12) Bangod ‘ginbaton ang pagpaturok sang pulong,’ kabay nga kita ‘mangin malipayon nga mga manugtuman sang pulong’ sa karon kag tubtob sa walay katubtuban.

Paano Mo Sabton?

◻ Paano kita makabatas nga may kalipay?

◻ Ano ang “kaalam gikan sa hitaas,” kag paano naton ini matigayon?

◻ Ngaa dapat kita “mangin mga manugtuman sang pulong, kag indi manugpalamati lamang”?

◻ Anong mga report ang dapat magapahulag sa aton nga mangin “mga manugtuman sang pulong”?

[Retrato sa pahina 17]

Kabay nga buksan naton ang aton tagipusuon sa balaan nga pagpanudlo

[Retrato sa pahina 18]

Ang integridad ni Job ginpadyaan sang ginpasag-uli sia sa bug-os, malipayon nga pagkabuhi kaupod sang mga hinigugma