‘Malipayon ang mga Nagbatas’

 1. Sugod sang 1914, ano nga kahimtangan sa duta ang nagtuman sang Mateo 24:​3-8, kag ano nga mga pangangkon sang Liga de Nasyones kag Nasyones Unidas ang napaslawan?

SA IYA libro nga The Present Age, si Robert Nisbet, nagahambal tuhoy sa “Kapituan kag Lima ka Tuig nga Inaway nga nagpadayon, talagsa lang nagdulog, sugod sang 1914.” Huo, “ang mga inaway kag mga balita sang mga inaway,” lakip ang inaway kalibutanon​—⁠amo ina ang gintagna ni Jesucristo para sa sining tion sang katapusan. (Mateo 24:​3-8) Ang Liga de Nasyones ginpatok sang 1920 “agod punggan ang inaway sing dayon.” Napaslawan gid ini! Ang Nasyones Unidas gin-organisar sang 1945 “agod luwason ang masunod nga mga kaliwatan gikan sa halit sang inaway.” Apang ang libro ni Max Harrelson nga Fires All Around the Horizon nagasiling: “Sugod sang matapos ang Inaway Kalibutanon II, malaka lang ang adlaw nga wala sing inaway sa iban nga duog.”

 2. Ano ang ginapamangkot sang iban nga tawo tuhoy sa mga kahimtangan sa kalibutan, apang ano nga mga pamangkot ang dapat naton ipamangkot?

² Ang terorismo kag kasingki, kalautan kag kaimulon, mga droga kag kalalat-an​—⁠ini tanan nagadugang pa sa makapasubo nga laragway. Ang iban nga tawo mahimo mamangkot: ‘Paano mabatas sang katawhan inang makatulublag nga mga kahimtangan?’ Apang, kapin ka importante, dapat kita mamangkot: ‘Paano ginabatas sang Dios ang pag-ati sa iya dutan-on nga tinuga? Tubtob san-o niya tugutan ang malauton nga mga tawo sa paglaglag sang duta kag sa pagpakahuya sa iya hamili nga ngalan?’

 3. (a) Ano ang ginpamangkot ni manalagna Isaias, kag ngaa? (b) Ano nga sabat ang ginhatag ni Jehova, kag ano ang ginapakita sini para sa aton adlaw?

³ Amo man sini ang ginpamangkot ni manalagna Isaias. Ginpadala sia agod ipabutyag sa iya mga kasimanwa ang mensahe gikan kay Jehova. Apang ginpaandaman na sia nga indi sila mamati sa iya ni sa Dios nga nagpadala sa iya. Gani namangkot si Isaias: “Tubtob bala san-o, O Jehova?” Huo, tubtob san-o magabantala si Isaias sa sining batinggilan nga katawhan, kag tubtob san-o batason ni Jehova ang ila makainsulto nga pagpangindi sa pagpamati sa iya mensahe? Si Jehova nagsabat: “Tubtob nga ang mga siudad malaglag, nga wala sing pumuluyo, kag ang mga balay wala sing tawo, kag ang duta malaglag sing bug-os.” (Isaias 6:​8-11) Sa karon man, ginabatas sang Dios ina nga mga pagpakahuya tubtob mag-abot ang iya gintangdo nga tion sa paghukom sa kalibutan nga ang may daku nga sala amo ang dimatutom nga Cristiandad.

 4. Ano ang resulta sang pagbatas ni Job, kag ano nga pasalig ang ginahatag sini sa aton karon?

⁴ Madugay na ginabatas ni Jehova ang mga yubit ni Satanas. Sang nagligad nga mga 3,600 ka tuig, ang matutom nga si Job nagbatas man, nga nagpamatuod nga butig ang panghangkat ni Satanas nga indi niya mahuptan ang iya integridad sa idalom sang pagtilaw. Nalipay gid ang tagipusuon ni Jehova sa sini! (Job 2:​6-10; 27:​5; Hulubaton 27:11) Subong ginsiling sang ulihi sang utod ni Jesus sa iloy nga si Santiago: “Yari karon! Ginatawag naton nga malipayon ang mga nagbatas. Nabatian ninyo ang pagbatas ni Job kag nakita ninyo ang resulta nga ginhatag ni Jehova, nga si Jehova mainawaon kag maluluy-on.” Subong man, ang mga nagabatas karon upod kay Jehova ginapasalig sa isa ka makalilipay nga resulta.​—⁠Santiago 5:⁠11.

 5. Paano ginpakita ni Jesus nga ang pagbatas kinahanglan sa katawhan sang Dios karon, kag dapat sila magbatas samtang ginahimo ang ano nga hilikuton?

⁵ Maathag nga ginpakita ni Jesus nga ang pagbatas kinahanglanon sa katawhan sang Dios sa aton karon adlaw. Sa pagtagna sang tanda sang “katapusan sang sistema sang mga butang,” sia nagsiling: “Sia nga nakabatas tubtob sa katapusan amo ang maluwas.” Nagabatas samtang nagahimo sing ano? Ang masunod nga ginsiling ni Jesus nagasabat: “Kag ibantala ining maayong balita sang ginharian sa bug-os napuy-an nga duta subong panaksi sa tanan nga kapungsuran.” (Mateo 24:​3, 13, 14) Sa amo lamang nga ang ‘katapusan magaabot.’​—⁠Tan-awa man ang Marcos 13:​10, 13; Lucas 21:​17-19.

Kon Ngaa Nagabatas si Jehova

 6. Ngaa si Jehova isa ka talalupangdon nga huwaran sang pagbatas, kag ano ang isa ka rason nga nagbatas sia?

⁶ Ginpaathag ni apostol Pablo nga “ang Dios, bisan pa may katuyuan sa pagpakita sang iya kasingkal kag sa pagpakilala sang iya gahom, nagbatas nga may daku nga pagpailob sa mga suludlan sang kasingkal nga takus sa kalaglagan.” (Roma 9:22) Ngaa ginbatas ni Jehova ang padayon nga pagluntad sang malauton, ining mga suludlan sang kasingkal? Ang isa ka rason amo ini: agod ipakita nga ang paggahom sang tawo, nga napain sa Manunuga sang tawo, mapaslawan. (Jeremias 10:23) Sa dili madugay, ang pagkasoberano sang Dios mabindikar samtang ginapamatud-an niya nga sia lamang ang makadala sing paghidait, paghiusa, kag kalipay sa tawhanon nga pamilya, paagi sa paggahom ni Jesus sa Ginharian.​—⁠Salmo 37:​9-11; 45:​1, 6, 7.

 7. Ano pa ang iban nga rason nga nagbatas si Jehova, kag ano nga benepisyo ang gindala sini sa minilyon sugod sang katuigan 1930?

⁷ Dugang pa, si Jehova nagbatas “agod mapakilala niya ang kamanggaran sang iya himaya sa mga suludlan sang kaluoy.” (Roma 9:23) Ining mga suludlan sang kaluoy amo ang nagahupot sing integridad nga mga hinaplas nga “ginbakal gikan sa katawhan” agod maghari upod kay Cristo Jesus sa iya langitnon nga Ginharian. Ang pagpat-in sa 144,000 nagpadayon sugod sang panahon sang mga apostol. Nagahingapos na ini karon. (Bugna 7:​3; 14:​1, 4) Kag yari karon! Sugod sang katuigan 1930 ang padayon nga pagbatas ni Jehova nagtugot sa pagtipon sa minilyon pa, “ang dakung kadam-an . . . gikan sa tanan nga kapungsuran,” nga nagakalipay sa paglaum nga maluwas sa katapusan nga kapipit-an agod magpanubli sing kabuhi nga wala sing katapusan sa paraiso nga duta. (Bugna 7:​4, 9, 10, 13-17) Isa ka bala sa sina nga dakung kadam-an? Kon amo, wala ka bala malipay nga ginbatas ni Jehova ang presensia sang mga suludlan sang kasingkal tubtob karon? Apang, dapat ka magpadayon sa pagbatas, subong nga si Jehova nagbatas.

Ginpadyaan ang Pagbatas

 8. Ngaa dapat kita tanan magbatas, kag ano nga huwaran sang pagbatas ang dapat naton binagbinagon sing ha­nuot?

⁸ Kita tanan nagakinahanglan sing pagbatas agod mabaton naton ang mga saad. Sa tapos masambit ining sadsaran nga kamatuoran sa Hebreo 10:​36, ginlaragway ni apostol Pablo sing detalyado ang daku nga pagtuo kag pagbatas sang daku nga “panganod sang mga saksi” sang dumaan nga mga tion. Nian ginalaygayan niya kita nga ‘batason ang dalaganon nga ginabutang sa aton atubang, samtang nagatulok kita kay Jesus nga Pangulo nga Ahente kag Manughimpit sang aton pagtuo. Bangod sang kalipay nga ginbutang sa iya atubang,’ nagbatas si Jesus sa bug-os tagipusuon nga pag-alagad, nga wala gid ginakalipatan ang padya. Ang iya huwaran nagapalig-on gid sa aton nga magbatas man!​—⁠Hebreo 12:​1, 2.

 9. Ano ang resulta sang modernong adlaw nga mga huwaran sang pagbatas?

⁹ Madamo man sing modernong-adlaw nga mga huwaran sang pagbatas. Ayhan may kilala ka ukon nakilal-an nga mga utod nga lalaki kag babayi nga nangin talalupangdon sa ila pagbatas. Ang ila katutom nagpukaw gid sa aton! Kag kada tuig, samtang ginareport sang mga Saksi ni Jehova ang ila bug-os kalibutan nga napanghikutan sa Watch Tower Society, dugang pa nga makakulunyag nga mga kasaysayan sang pagbatas kag paghupot sing integridad ang ginabaton. Ang tsart sa masunod nga apat ka pahina nagapakita sang dakung hilikuton nga nahimo sa tion sang 1989 samtang ining mga Saksi ‘nagdugang sa ila pagtuo sing pagbatas.’​—⁠2 Pedro 1:​5, 6.

Ang Aton Pinakadaku nga Tuig

10. (a) Pila ka kadutaan kag mga isla ang nagpakigbahin sa pagbantala sing maayong balita sang Ginharian sang 1989, kag pila ang nagpakigbahin sa sining hilikuton? (b) Pila ka payunir ang nagreport sa bulan nga may pinakamataas nga kadamuon sang mga payunir, kag pila ang kabilugan nga kadamuon sang oras nga nahinguyang sa pag-alagad sa latagon?

¹⁰ Subong ginapakita sang nauna nga tsart, 212 ka kadutaan kag mga isla ang nagpakigbahin sa pagbantala sang nagapakari nga Ginharian ni Jehova. Mahal nga bumalasa sang Lalantawan, nakatigayon ka bala sing pribilehiyo nga mangin isa sa 3,787,188 nga nagpakigbahin sa sining dakung hilikuton? Isa ka bala sa 808,184 nga nagreport subong mga payunir sa bulan nga may pinakamataas nga kadamuon sa amo nga serbisyo? Ano man ang imo naamot sa bug-os globo nga kabilugan nga kadamuon sang 835,426,538, ka oras nga nahinguyang sang 1989 sa pag-alagad sa latagon, may rason ka sa pagkalipay.​—⁠Salmo 104:​33, 34; Filipos 4:⁠4.

11. (a) Pila nga tumalambong sa Memoryal sang nagligad nga Marso 22 ang kabangdanan sa pagkalipay, kag ngaa? (b) Pila ang nabawtismuhan, kag anong mga pungsod sa tsart ang talalupangdon sa sining bahin?

¹¹ Magkalipay, man, sa daku nga kabilugan nga 9,479,064 nga nagtambong, sang nagligad nga Marso 22, sa bug-os kalibutan nga pagsaulog sang Memoryal sang kamatayon ni Jesus! Nagapakita ini nga 5,691,876 ang posible nga mangin dugang pa nga manugwali sang Ginharian, kon ining interesado nga mga tulad-karnero mahigugmaon nga matuytuyan padulong sa toril, agod makatigayon sing regular nga bahin sa pag-alagad kay Jehova. Mabuligan bala naton sila sa sini? (Juan 10:​16; Bugna 7:​9, 15) Madamo na ang nagasabat, subong ginpakita sang dakung kabilugan nga 263,855 ka bag-ong mga Saksi nga nabawtismuhan sa tion sang 1989 nga tuig sang pag-alagad.

12. Ano ang pila ka bahin nga wala ginapakita sang tsart (a) tuhoy sa mga pabrika sang Watch Tower Society? (b) tuhoy sa napahamtang nga mga magasin kag suskripsion?

¹² May iban pa nga mga bahin nga wala ginapakita sang tsart. Ang kauhaw sa mga publikasyon​—⁠mga Biblia, mga libro, mga brosyur, mga magasin​—⁠indi mapaayawan. Subong resulta, ang mga pabrika sang Watchtower sa Nueva York naggamit sing 25,999 ka tonilada sang papel sa pag-imprinta sing 35,811,000 ka Biblia, mga libro, kag mga brosyur, 101-porsiento nga pag-uswag sang sa 1988. Ang iban man sang dalagku nga mga pabrika sang Watch Tower Society, labi na sa Alemanya, Italya, kag Hapon, nagtrabaho sa ekstra nga relyibo, sa pagsakdag sa “matutom kag mainandamon nga ulipon” sa paghatag sing espirituwal nga “pagkaon sa nagakaigo nga tion.” (Mateo 24:45) Sang Abril kag Mayo, tumalagsahon nga kadamuon sang napahamtang nga mga magasin kag suskripsion ang ginreport sa madamo nga kadutaan, nga may pinasahi nga pagpadaku sa pagpanagtag sang mga guwa sang Lalantawan tuhoy sa “Babilonia nga Daku.” (Bugna 17:5) Wala sing duhaduha, sa sining nagapakari nga Abril, ang mga auxiliary payunir kag iban pa nga mga Saksi magapanong sa kalibutan nga latagon nga mangin ang pinakamaayo nga kampanya naton sa pagpanaksi sa 1990 nga tuig sang pag-alagad.​—⁠Ipaanggid ang Isaias 40:​31; Roma 12:​11, 12.

13. Ano nga mga pungsod ang nalista sa tsart nga wala malista sang nagligad nga tuig? Ipaathag.

¹³ Tan-awa liwat ang tsart. Nakita mo bala ang pila ka pungsod nga wala malista ang ngalan sang nagligad nga tuig? Ang Hun­gary kag Poland, nga sa diin ginlegalisar na ang aton hilikuton kasan-o lang. Nagapasalamat kita sa awtoridad sining kadutaan nga sila karon nagapakita sing konsiderasyon sa mga Saksi ni Jehova. Sa sining bahin, ang mga pangamuyo sang bug-os kalibutan nga paghiliutod ginsabat, “agod nga magkabuhi kita sing malinong kag mahidaiton nga may diosnon nga debosyon kag pagkaligdong.”​—⁠1 Timoteo 2:​1, 2.

14. Ihatag ang pila sang dalagku nga mga punto sang “Diosnon nga Debosyon” nga Distrito nga mga Kombension sa Poland.

¹⁴ “Diosnon nga debosyon”! Ti, ang “Diosnon nga Debosyon” nga Distrito nga mga Kombension ginhiwat bisan gani sa Poland, sa tatlo ka lokasyon, sang Agosto! Daw ano ka dalayawon ang aton 91,024 ka Polaco nga kauturan! (Hebreo 13:​1, 2, 16) Subong nga daw isa ka milagro, linaksa sang aton kauturan​—⁠mga Czech, mga Aleman, mga Ruso, kag iban pa​—⁠ang nakatigayon sing visa sa pagkari paagi sa bus, tren, kag bisan sa paglakat. Linibolibo man ang nag-abot paagi sa eroplano gikan sa Amerika, Nakatundan nga Europa, kag sa malayo nga mga duog subong sang mga isla sang Pasipiko kag Hapon. Ang dalagku nga mga istadyum, nga ginpatinlo gid sang aton kauturan, hustohusto lang para sa 65,710 sa Chorzów, 40,442 sa Poznan, kag 60,366 sa Warsaw​—⁠sa kabilugan 166,518 ang nagtambong! Sa tagsa ka sentro, ang pagtan-aw sa bawtismo nagpatulo sang mga luha sang kalipay. Sa Poznan, may 9 anyos kag 90 anyos nga nabawtismuhan, kag sa kabilugan 6,093 ang gintugmawan sa tatlo ka kombension lakip ang madamo nga tin-edyer, madamo sini naghalin sa kadutaan nga ginsiling anay nga ang relihion mapatay upod sa mga tigulang. Indi subong sina sa matuod nga relihion nga napasad sa Pulong sang Dios! (Ipaanggid ang Salmo 148:​12, 13; Binuhatan 2:​41; 4:⁠4.) Daw ano ka dalayawon nga ginpadyaan ang pagbatas sang aton kauturan sa Sidlangan nga Europa!

Padayon nga Katutom sa Idalom sang Pagtilaw

15. Paano ang mga Saksi sa Lebanon nagpakita sing pagbatas kag pagkalig-on, kag ano ang maayong mga resulta?

¹⁵ Kaangay ni apostol Pablo, ang mga Saksi ni Jehova kinahanglan magpakita sing pagbatas sa idalom sang madamo kag nanuhaytuhay nga kahimtangan. (2 Corinto 11:​24-27) Sa Lebanon, ang inaway sibil nagabalingaso. Ano ang reaksion sang aton kauturan? May kalig-on kag determinasyon. Sobra nga pagpalupok kag pagpamomba ang natabo sang 1989, apang bisan sa mga duog nga mabaskog gid ini, ang kauturan determinado nga indi maghinay. Ang isa ka kongregasyon sa Beirut nagreport: “May regular nga grupo para sa pag-alagad sa latagon nga ginahimo sa tanan nga gab-i sang semana. Walay sapayan sang mabudlay nga mga kahimtangan, ang aton kauturan wala magluya. Kapin pa nga mga teritoryo ang nakobrehan namon. Sang Abril nalab-ot namon ang pinakamataas nga kadamuon sang mga payunir. Bag-o nga mga pagtuon sa Biblia ang nasugdan, kag kapin nga mga magasin kag mga libro ang napahamtang.”

16. Paano ang aton kauturan sa Colombia nagpakita sing pagbatas paagi sa pagdala sing maayong balita sa mga banwa nga sa diin wala sing mga Saksi?

¹⁶ Ang Colombia pirme nga yara sa balita bangod sang pagnegosyo sing droga kag sang kasingki. Apang ang matutom nga pagbatas sang mga Cristiano didto isa man ka balita. Kasan-o lang, ginpadala ang temporaryo nga mga espesyal nga payunir sa 31 ka banwa nga may napulo ka libo ukon kapin pa nga pumuluyo nga sa diin wala sing mga Saksi. Sa isa ka banwa, sang mahibal-an sang bag-o nga mga interesado nga ang mga payunir magatener didto sing pila ka bulan lamang, nagpakiluoy sila nga magpabilin ang mga payunir. Sa isa pa ka banwa, 18 ka interesado nga mga tawo ang nagpirma sing isa ka sulat sang pag-apresyar sa espirituwal nga bulig nga ginhatag sa tion sang tatlo ka bulan nga pagtener sang mga payunir kag nangabay sila sing dugang pa nga bulig. “Isa ini ka serioso nga butang,” siling nila. Indi na paghambalon pa, sa sining duha ka kaso, may kahimusan nga ginhimo agod padayon nga mapalambo ang interes. Ang pagpalambo sa sinang malayo nga teritoryo nagakinahanglan sing pagbatas, apang ang lakas nga pagpangabudlay sang mga payunir nga nagahimo sini ginapakamaayo sing bugana.

17, 18. (a) Sa idalom sang anong mga kahimtangan nagbatas ang mga Saksi ni Jehova sa Italya? (b) Ano ang natabo sa mga Saksi walay sapayan sang kabutigan nga ginpalapta nahanungod sa ila?

¹⁷ Sa Italya, ang mga Saksi ni Jehova mabaskog nga ginapamatukan sang klero, apang paagi sa kusog ni Jehova nakabatas sila. Sa nanuhaytuhay nga parokya, ang klero nagpanagtag sing mga sticker agod itapik sa puwertahan sang mga puluy-an sang ila mga katapo nga nagasiling sa mga Saksi ni Jehova nga indi pagpatunugon ang doorbell. Madamo nga pari ang nagsuhol sa mga bata nga lalaki agod ipatapik ining mga sticker sa tanan nga puwertahan sa isa ka partikular nga duog​—⁠bisan sa mga puluy-an sang Saksi nga mga pamilya! Apang, indi madali mahadlok ang mga Saksi, kag sa masami ginagamit nila ang mga sticker sa pag-umpisa sang paghambalanay. Dugang pa, ginkobrehan sang pamantalaan kag pungsudnon nga telebisyon ini nga hitabo, nga ginapakamalaut ang relihioso nga pagkapanatiko nga ginpakita kag ginpadaku pa nila nga ang mga taktika subong sini isa gid ka tanda sang kaluyahon sa bahin sang iglesia. Ang isa ka propesor sa unibersidad naakig gid sa kontrobersial nga mga sticker batok sa mga Saksi nga nagsuskriber sia sa Ang Lalantawan kag Magmata!

¹⁸ Ginagamit pa gani sang Katoliko nga Iglesia sa Italya ang mga apostata sa pagpalapta sing kabutigan nahanungod sa katawhan ni Jehova, apang wala man ini magmadinalag-on bangod ang 172,382 ka manugbantala kilala kag ginatahod. Ginsugiran sang isa ka tawo ang nagaduaw nga mga Saksi nga nakabasa sia sing malain nga mga butang nahanungod sa aton sa literatura nga ginsulat sang mga Saksi anay. Busa, namatok gid sia sang mangin isa sa mga Saksi ni Jehova ang iya utod nga lalaki. Apang, wala magdugay, natalupangdan niya ang maayong epekto sang bag-o nga relihion sa iya utod. Nagpamensar sia: ‘Paano ang butang nga tuman kalain makapatubas sing maayo gid nga mga resulta?’ Busa, ginpangabay niya ang nagduaw nga mga Saksi nga magtuon sila sa Biblia.​—⁠Ipaanggid ang Colosas 3:​8-10.

Paglandas sa Indi Pagsapak

19, 20. (a) Anong kahimtangan ang nagkinahanglan sing pagbatas sa bahin sang mga Saksi sa Finland, kag ano gid ang talalupangdon nahanungod sa surbe nga ginhimo sang iglesia? (b) Anong eksperiensia ang nagailustrar sang pagkaimportante sang pagbatas sa pagbantala sing maayong balita?

¹⁹ Sa kadutaan nga sa diin ang mga Saksi pirme nagaduaw, masami nga may yara lapnag nga indi pagsapak sa maayong balita. Amo gid sini ang nagakatabo sa Finland. Nagsurbe ang iglesia sa sadto nga pungsod kag nasapwan sini nga 70 porsiento sang pumuluyo ang indi gusto sa pagduaw sang mga Saksi sa ila mga puluy-an. Apang, 30 porsiento ang wala nagapamatok sing mabaskog, kag sa sini, 4 porsiento ang nagsiling nga naluyagan gid nila ang mga Saksi ni Jehova. Isa ini ka daku nga numero. Ang kuwatro porsiento sang pumuluyo sa Finland nagakahulugan sing 200,000 ka tawo. Ipaanggid ina sa kadamuon karon sang mga manugbantala nga 17,303!

²⁰ Ginpatalupangod ini nga surbe sa isa ka manugbantala nga nagguwa sa latagon kag ginpamangkot sia: “Wala ka bala makahibalo nga 70 porsiento sa amon ang indi luyag sa inyo? Ngaa nagabalikbalik pa kamo?” Ang manugbantala nagsabat: “Huo, apang ginpakita sang amo man nga surbe nga 4 porsiento sa inyo ang luyag sa amon. Ginapangita namon ini nga mga tawo. Bisan pa kon sila 1 porsiento lamang, magapamalaybalay gihapon kami agod pangitaon sila.” Ang tagbalay naghunahuna sa makadali kag nagsiling: “Amo gid bala sina ka importante sa ila ang inyo mensahe?” Ang manugbantala nagsabat paagi sa pagpamangkot: “Luyag ka bala mamati sa sini?” Wala magdugay ining tagbalay nagpakita sing interes sa maayong balita.

Ang Ginatigana sang Palaabuton

21. (a) Ano nga sahi sang pagpakig-away ang dapat himuon naton sa sining sistema, kag ngaa? (b) Ano mahimo ang dapat nga batason naton, kag ano ang ginapasalig sa aton sang tagna ni Habacuc?

²¹ Kamusta naman kita karon? Determinado bala kita nga magbatas upod kay Jehova kag kay Cristo Jesus tubtob sa katapusan? Mahimo nga indi na ini magdugay, apang dapat kita magbatas! Sa sistema ni Satanas, dapat kita magpakig-away sing lakas para sa pagtuo, kay ginapalibutan kita sang imoralidad, kalautan, kag dumot sang kalibutan. (Judas 3, 20, 21) Mahimo nga dapat kita magbatas sing nanuhaytuhay nga sahi sang paghingabot. Bisan sa karon, linibolibo sang aton kauturan ang nagaantos sa mga bilangguan, kag ang iban mapintas nga ginasakit. Nagapasalamat ini sila sa aton mga pangamuyo. (2 Tesalonica 3:​1, 2) Sa dili madugay, ang karon nga sistema madula na! Subong ginsiling ni Habacuc: “Kay ang palanan-awon naigo pa sa pinat-od nga tion, kag nagadalidali sa katapusan, kag ini indi magbutig. Bisan magpalantang, hulata ini; kay sa pagkamatuod magaabot ini, indi ini magpalantang.”​—⁠Habacuc 2:⁠3.

22. Ano nga resulta ang masaligon nga mapaabot naton kon ilugon naton ang pagpailob sang mga manalagna kag ang pagbatas ni Job?

²² Ang disipulo nga si Santiago mahigugmaon nga nagasiling sa aton: “Mga kauturan, gamita ninyo nga huwaran sang pag-antos kag sang pagpailob ang mga manalagna nga naghambal sa ngalan ni Jehova.” Kita karon nga nagahambal sa ngalan ni Jehova mahimo mangin mga manughupot sing integridad sa tion sang mabaskog nga mga pagtilaw, subong nanday Isaias, Jeremias, Daniel, kag sang iban pa. Kaangay ni Job, makabatas kita. Daw ano ka dalayawon nga ginpadyaan ang iya pagbatas! Ang kaawa kag mahigugmaon nga kaluoy ni Jehova magahatag sa aton sing kaanggid man sina nga mga padya​—⁠kon magbatas kita tubtob sa katapusan. Kag kabay nga matuman sa tagsatagsa sa aton ang ginsiling ni Santiago: “Yari karon! Ginatawag naton nga malipayon ang mga nagbatas.”​—⁠Santiago 5:​10, 11; Job 42:​10-13.

Paano Mo Sabton?

◻ Ano nga pagkinahanglan sing pagbatas ang ginpadaku ni Jesus?

◻ Sa anong mga rason nagbatas si Jehova?

◻ Ano ang pila sang dalagku nga mga punto sang dakung hilikuton nga nahimo sang 1989?

◻ Paano ginpadyaan ang pagbatas sang aton kauturan sa Poland?

◻ Paano ang mga Saksi sa Lebanon, Colombia, kag Italya nagpakita sing katutom sa idalom sang pagtilaw?

[Tsart sa pahina 20-23]

REPORT SA 1989 NGA PAG-ALAGAD SANG MGA SAKSI NI JEHOVA SA BUG-OS KALIBUTAN

(See bound volume)