Gamita sing Maalamon ang Inyo Cristianong Kahilwayan

“Mangin subong sang hilway nga mga tawo, apang nagagamit sang inyo kahilwayan . . . subong mga ulipon sang Dios.”—1 PEDRO 2:16.

1. Ano nga kahilwayan ang nadula ni Adan, kag sa ano nga kahilwayan ipasag-uli ni Jehova ang katawhan?

SANG magpakasala ang aton unang mga ginikanan sa hardin sang Eden, nadula nila para sa ila mga anak ang isa ka makalilipay nga palanublion—ang kahilwayan gikan sa sala kag kaduluntan. Subong resulta, natawo kita tanan nga mga ulipon sang kaduluntan kag kamatayon. Apang, sing makalilipay, katuyuan ni Jehova nga ipasag-uli ang matutom nga mga tawo sa isa ka dalayawon nga kahilwayan. Sa karon, malangkagon nga ginahulat sang mga matarong sing tagipusuon “ang pagpahayag sang mga anak sang Dios,” nga subong resulta sini sila “hilwayon sa kahiulipnan sang pagkamadinulunton kag makaagom sang mahimayaon nga kahilwayan sang mga anak sang Dios.”—Roma 8:19-21.

‘Hinaplas sa Pagbantala’

2, 3. (a) Sin-o “ang mga anak sang Dios”? (b) Anong dalayawon nga tindog ang ila ginaagom, nga nagadala sing anong salabton?

² Sin-o ining “mga anak sang Dios”? Amo sila ang hinaplas sang espiritu nga kauturan ni Jesus nga magagahom kaupod niya sa langitnon nga Ginharian. Ang una nga mga katapo sini naglutaw sang unang siglo C.E. Ginbaton nila ang nagahilway nga kamatuoran nga gintudlo ni Jesus, kag sugod sang Pentecostes 33 C.E., nagpakigbahin sila sa mahimayaon nga mga pribilehiyo nga ginsambit ni Pedro sang ginsulatan niya sila: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga isa ka pinasahi nga pagkabutang.’”—1 Pedro 2:9a; Juan 8:32.

³ Mangin pinasahi nga pagkabutang sang Dios—isa gid ka matahom nga pagpakamaayo! Kag ang modernong-adlaw nga nagkalabilin sining mga hinaplas nga mga anak sang Dios may amo sining ginpakamaayo nga tindog sa Dios. Apang upod sa sining mataas nga pribilehiyo amo ang mga salabton. Ginpatalupangod ni Pedro ang isa sini sang magsiling pa sia: “‘Dapat ninyo ibantala ang mga kadungganan’ sang nagtawag sa inyo gikan sa kadudulman pakadto sa iya kalatingalahan nga kapawa.”—1 Pedro 2:9b.

4. Paano gintuman sang hinaplas nga mga Cristiano ang salabton nga nagaupod sa ila Cristianong kahilwayan?

⁴ Natuman bala sang hinaplas nga mga Cristiano ining salabton nga ibantala ang mga kadungganan sang Dios? Huo. Nagapamulong sing matagnaon tuhoy sa hinaplas sugod sang 1919, si Isaias nagsiling: “Ang espiritu sang Soberanong Ginuong Jehova yari sa akon, bangod nga ginhaplas ako ni Jehova sa pagwali sing maayo nga mga balita sa mga mahagop. Ginpadala niya ako sa pagbugkos sang buong sing tagipusuon, sa pagbantala sing kahilwayan sa mga bihag; sa pagbukas sang bilangguan sa mga binilanggo; sa pagbantala sing tuig sang maayong kabubut-on ni Jehova kag sing adlaw sang pagtimalos sang aton Dios.” (Isaias 61:1, 2) Sa karon, ang hinaplas nga nagkalabilin, bilang pagsunod sa halimbawa ni Jesus, nga amo ang una nga naaplikaran sining kasulatan, makugi nga nagawali sa iban sang maayong balita sang kahilwayan.—Mateo 4:23-25; Lucas 4:14-21.

5, 6. (a) Ano ang nangin resulta sang mapagsik nga pagbantala sang hinaplas nga mga Cristiano? (b) Ano ang mga pribilehiyo kag mga salabton sang dakung ka­dam-an?

⁵ Subong resulta sang ila mapagsik nga pagbantala, naglutaw sa kalibutan ang isa ka dakung kadam-an sang iban nga mga karnero sa sining ulihi nga mga adlaw. Nagguwa sila gikan sa tanan nga pungsod agod magbuylog sa mga hinaplas sa pag-alagad kay Jehova, kag ginhilway man sila sang kamatuoran. (Zacarias 8:23; Juan 10:16) Kaangay ni Abraham ginapakamatarong sila pasad sa pagtuo kag nakasulod sa suod nga kaangtanan kay Jehova nga Dios. Kag kaangay ni Rahab ang pagpakamatarong sa ila nagabutang sa ila sa linya para sa kaluwasan—sa ila bahin, kaluwasan sa Armagedon. (Santiago 2:23-25; Bugna 16:14, 16) Apang ining mataas nga mga pribilehiyo nagalakip man sing salabton nga isugid sa iban ang himaya sang Dios. Amo kon ngaa nakita sila ni Juan nga nagadayaw sing dayag kay Jehova, “nga nagasinggit sa mabaskog nga tingog, nga nagasiling: ‘Ang kaluwasan utang namon sa amon Dios, nga nagalingkod sa trono, kag sa Kordero.’”—Bugna 7:9, 10, 14.

⁶ Sang nagligad nga tuig ang dakung kadam-an, nga karon kapin sa apat ka milyon ang kadamuon, upod sa diutay nga hubon sang hinaplas nga mga Cristiano, nakahinguyang sing halos isa ka bilyon ka oras sa pagwali sang mga kadungganan ni Jehova. Amo ini ang posible nga labing maayo nga paggamit sang ila espirituwal nga kahilwayan.

“Padunggi ang Hari”

7, 8. Anong salabton sa kalibutanon nga awtoridad ang ginalakip sang Cristianong kahilwayan, kag sa sining bahin, anong sayop nga panimuot ang dapat naton likawan?

⁷ Ang aton Cristianong kahilwayan nagalakip sing iban pa nga mga salabton. Ginpatuhuyan ni Pedro ang pila sini sang magsulat sia: “Padunggi ang tanan nga tawo, higugmaa ang bug-os nga paghiliutod, kahadluki ang Dios, padunggi ang hari.” (1 Pedro 2:17) Ano ang ginapahangop sang ekspresyon nga “padunggi ang hari”?

⁸ “Ang hari” nagarepresentar sa kalibutanon nga mga manuggahom. Sa karon, ang espiritu sang indi pagtahod sa awtoridad nagtubo sa kalibutan, kag madali ini makalaton sa mga Cristiano. Mahimo nga matingala pa gani ang isa ka Cristiano kon ngaa dapat niya padunggan “ang hari,” samtang “ang bug-os nga kalibutan yara sa gahom sang isa nga malauton.” (1 Juan 5:19) Bangod sining mga pulong, mahimo batyagon niya nga hilway sia sa paglalis sa mabudlay sundon nga kasuguan kag indi magbayad sing buhis kon indi sia mamutikan. Apang pagsupak ini sa sugo ni Jesus nga “ihatag kay Cesar ang mga butang nga iya ni Cesar.” Sa epekto, ‘paggamit ini sang iya kahilwayan subong kunop sang kalautan.’—Mateo 22:21; 1 Pedro 2:16.

9. Ano ang duha ka maayong rason sa pagtuman sa kalibutanon nga awtoridad?

⁹ Ang Cristiano obligado nga magpadungog sa awtoridad kag magpasakop sa sini—bisan pa kon ini sa relatibo nga paagi. (Binuhatan 5:29) Ngaa? Sa 1 Pedro 2:14, 15 ginapakita ni Pedro ang tatlo ka rason sang magsiling sia nga ang mga gobernador “ginpadala [sang Dios] sa pagsilot sa mga nagahimo sing malaut kag sa pagdayaw sa mga nagahimo sing maayo.” Ang kahadlok sa silot isa na ka rason nga tumanon ang awtoridad. Makahuluya gid kon ang isa sang mga Saksi ni Jehova multahan ukon bilangguon bangod nanakit sia, nangawat, ukon nakahimo sing iban pa nga krimen! Handurawa kon daw ano kadaku ang mangin kalipay sang iban sa pagbalita sina nga butang! Sa pihak nga bahin, samtang ginapalambo naton ang reputasyon nga masinulundon sa kasuguan, makabaton kita sing pagdayaw gikan sa walay nadampigan nga mga manugdumala. Mahimo nga hatagan pa kita sing dugang nga kahilwayan sa aton pagbantala sing maayong balita. Dugang pa, ‘sa paghimo sing maayo ginapahipos naton ang pagkakulang sing ihibalo sang indi makatarunganon nga mga tawo.’ (1 Pedro 2:15b) Ikaduha ini nga rason sa pagtuman sa awtoridad.—Roma 13:3.

10. Ano ang pinakamabaskog nga rason sa pagtuman sa kalibutanon nga awtoridad?

¹⁰ Apang may mabaskog pa nga rason. Ang mga awtoridad ginatugutan ni Jehova. Subong sang ginasiling ni Pedro, ang politikal nga mga manuggahom “ginpadala ni” Jehova, kag “ang kabubut-on sang Dios” amo nga magpasakop ang mga Cristiano sa ila. (1 Pedro 2:15a) Sing kaanggid, si apostol Pablo nagasiling: “Ang nagaluntad nga mga awtoridad nagatindog sa ila relatibo nga mga katungdanan suno sa pahanugot sang Dios.” Busa, ang aton nahanas sa Biblia nga konsiensia nagapahulag sa aton nga tumanon ang mga awtoridad. Kon indi kita magpasakop sa ila, ‘nagasumpong kita sa kahimusan sang Dios.’ (Roma 13:1, 2, 5) Sin-o sa aton ang luyag magsumpong sa kahimusan sang Dios? Mangin isa gid ina ka sayop nga paggamit sa Cristianong kahilwayan!

‘Higugmaa ang Kauturan’

11, 12. (a) Anong salabton sa mga masigkatumuluo ang nagaupod sa aton Cristianong kahilwayan? (b) Sin-o labi na ang takus sang aton mahigugmaon nga konsiderasyon, kag ngaa?

¹¹ Nagsiling man si Pedro nga dapat ‘higugmaon [sang isa ka Cristiano] ang bug-os nga paghiliutod.’ (1 Pedro 2:17) Isa pa ini ka salabton nga nagaupod sa Cristianong kahilwayan. Ang kalabanan sa aton katapo sang isa ka kongregasyon. Sa pagkamatuod, kita tanan katapo sang internasyonal nga asosasyon, ukon organisasyon, sang kauturan. Ang pagpakita sing gugma sa sini isa ka maalamon nga paggamit sang aton kahilwayan.—Juan 15:12, 13.

¹² Espisipiko nga ginsambit ni apostol Pablo ang isa ka grupo sang mga Cristiano nga takus naton higugmaon. Sia nagsiling: “Magmatinumanon sa mga nagapanguna sa inyo kag magmapinasakupon, kay ginabantayan nila ang inyo mga kalag nga subong bala sila ang manabat; agod nga himuon nila ini nga may kalipay kag indi nga may pagbakho, kay makahalit ina sa inyo.” (Hebreo 13:17) Ang mga nagapanguna sa kongregasyon amo ang mga gulang. Matuod, indi sila himpit nga mga tawo. Walay sapayan, gintangdo sila sa idalom sang pagdumala sang Nagadumala nga Hubon. Nagapanguna sila paagi sa halimbawa kag may patugsiling, kag gintangdo sila sa pagbantay sa aton mga kalag. Mabug-at gid nga tulumanon! (Hebreo 13:7) Sing makalilipay, ang kalabanan nga kongregasyon may maayo kag kooperatibo nga espiritu, kag ang mga gulang malipayon sa pagpanghikot upod sa ila. Mas mabudlay kon ang mga indibiduwal wala nagakooperar. Ginahimo gihapon sang gulang ang iya hilikuton, apang subong sang ginasiling ni Pablo, ginahimo niya ini nga may “pagbakho.” Sa pagkamatuod, indi naton luyag nga magbakho ang mga gulang! Luyag naton nga mangin malipayon sila sa ila hilikuton agod nga mapalig-on nila kita.

13. Ano ang pila ka paagi nga makakooperar kita sa mga gulang?

¹³ Ano ang pila ka mga paagi nga makakooperar kita sa mga gulang? Ang isa amo ang pagbulig sa pagmentinar kag sa pagtinlo sang Kingdom Hall. Ang isa pa amo ang pagkooperar sa hilikuton nga pagduaw sa nagabalatian kag pagbulig sa may sablag. Dugang pa, makatinguha kita nga magpabilin nga malig-on sa espirituwal, agod indi kita mangin lulan. Ang isa ka importante nga bahin sang pagkooperar amo ang pagtipig sa moral kag espirituwal nga katinlo sang kongregasyon, paagi sa aton kaugalingon nga paggawi kag paagi sa pagreport sang mga kaso sang mabug-at nga sala nga mahibaluan naton.

14. Paano kita dapat magkooperar sa disiplina nga ginhimo sang mga gulang?

¹⁴ Kon kaisa, agod matipigan ang katinlo sang kongregasyon, kinahanglan nga idisfellowship sang mga gulang ang isa ka dimahinulsulon nga nakasala. (1 Corinto 5:1-5) Ginaamligan sini ang kongregasyon. Mahimo nga makabulig man ini sa nakasala. Sa masami, ina nga disiplina nakabulig sa nakasala nga makamaradmad sia. Apang, ano kon ang isa nga nadisfellowship isa ka suod nga abyan ukon isa ka paryente? Halimbawa ang indibiduwal amo ang aton amay ukon iloy ukon ang aton anak nga lalaki ukon babayi. Ginatahod bala naton ang aksion nga ginhimo sang mga gulang walay sapayan sini? Matuod, mahimo nga mabudlay ini. Apang isa gid ka sayop nga paggamit sa aton kahilwayan kon duhaduhaan naton ang desisyon sang mga gulang kag padayon nga makig-upod sa espirituwal sa isa nga napamatud-an nga isa ka malain nga impluwensia sa kongregasyon! (2 Juan 10, 11) Ang katawhan sang Dios sa kabilugan ginadayaw bangod sang ila pagkooperar sa sini nga mga butang. Subong resulta, ang organisasyon ni Jehova nagapabilin nga walay dagta sa sining dimatinlo nga kalibutan.—Santiago 1:27.

15. Kon ang indibiduwal makahimo sing isa ka mabug-at nga sala, ano dapat ang himuon niya sa gilayon?

¹⁵ Ano kon makahimo kita sing mabug-at nga sala? Ginlaragway ni Hari David ang mga nahamut-an ni Jehova sang nagsiling sia: “Sin-o bala ang magatukad sa bukid ni Jehova, kag sin-o bala ang magatindog sa iya balaan nga duog? Ang may mga kamot nga matinlo kag tagipusuon nga putli, nga wala magbayaw sang iya kalag sa kabutigan, kag wala magdala sang Akon kalag sa walay kapuslanan, kag wala magsumpa sing malimbungon.” (Salmo 24:3, 4) Kon bangod sa pila ka rason indi na kita ‘matinlo sa aton mga kamot kag putli sa tagipusuon,’ dapat kita maghikot sa gilayon. Ang aton walay katapusan nga kabuhi yara sa katalagman.

16, 17. Ngaa indi dapat pagtinguhaan sang isa nga nakasala sing mabug-at nga mga sala nga lubaron ang iya pagpakasala sa iya kaugalingon lamang?

¹⁶ Ang iban nasulay nga taguon ang mabug-at nga mga sala, ayhan nagapangatarungan: ‘Nagtu-ad na ako kay Jehova kag naghinulsol. Gani ngaa dalahigon ko pa ang mga gulang?’ Mahimo nga nahuya ukon nahadlok ang nakasala kon basi ano ang himuon sang mga gulang. Apang, dapat niya dumdumon nga bisan pa si Jehova lamang ang makatinlo sang aton sala, ginpahamtang Niya ang mga gulang subong amo ang una nga may salabton sa kaputli sang kongregasyon. (Salmo 51:2) Ginpahamtang sila agod ayuhon, agod “pasibuon liwat ang mga balaan.” (Efeso 4:12) Ang indi pagkadto sa ila kon nagakinahanglan kita sing espirituwal nga bulig kaangay sang indi pagkadto sa doktor kon nagamasakit kita.

¹⁷ Masapwan sang iban nga nagatinguha sa paghusay sang ila problema sing isahanon nga pagligad sang mga binulan ukon mga tinuig, ginatublag gihapon sila sang ila konsiensia. Malain pa, ang iban nga nagatago sang ila mabug-at nga sala nagakahulog sa sala sa ikaduha kag ikatlo pa gani nga tion. Kon ini nga pagpakasala mahibaluan sa ulihi sang mga gulang, isa ini ka kaso sang sulitsulit nga pagpakasala. Mas maayo gid nga sundon ang laygay ni Santiago! Sia nagsulat: “May nagamasakit bala sa inyo? Magpatawag sia sang mga gulang sang kongregasyon, kag pangamuyuan nila sia, nga ginahaplasan sia sing lana sa ngalan ni Jehova.” (Santiago 5:14) Magkadto sa mga gulang samtang tion pa ini sa pag-ayo. Kon padugayan pa naton, mahimo nga magbatinggilan na kita sa dalanon sang sala.—Manugwali 3:3; Isaias 32:1, 2.

Panagway kag Paglingawlingaw

18, 19. Ngaa maayo ang ginkomento sang isa ka pari tuhoy sa mga Saksi ni Jehova?

¹⁸ Sang nagligad nga lima ka tuig, sa isa ka magasin sang parokya, ang isa ka Katoliko nga pari sa Italya makunyagon nga naghambal tuhoy sa mga Saksi ni Jehova.⁠a Sia nagsiling: “Kon sa akon kaugalingon, naluyagan ko ang mga Saksi ni Jehova; ginabaton ko ini sing prangka. . . . Ang mga kilala ko sa ila maayo gid sing batasan, malulo maghambal . . . [kag] maayo magkombinsi. San-o pa naton mahangpan nga ang kamatuoran dapat ipresentar sa kalahamut-an nga paagi? Nga ang mga nagapahayag sang kamatuoran indi dapat mangin pakulahaw, mabaho, mahigko, kag taramhak?”

¹⁹ Suno sa sining ginhambal, nahamuot ang pari, lakip sa iban nga mga butang, bangod sang pamayo sang mga Saksi kag pagpresentar nila sang ila kaugalingon. Maathag, ang iya mga nakilala namati sa laygay sang “matutom kag mainandamon nga ulipon” sa sulod sang mga tinuig. (Mateo 24:45) Ang Biblia nagasiling nga ang panapton para sa mga babayi dapat mangin ‘nagakaigo kag maugdang.’ (1 Timoteo 2:9) Sa sining malain nga tion, ina nga laygay kinahanglanon man para sa mga lalaki. Indi bala makatarunganon nga dapat mangin desente sa mga tagaguwa ang mga tiglawas sang Ginharian sang Dios?

20. Ngaa dapat mangin mahunahunaon ang isa ka Cristiano sa iya pagpamayo sa tanan nga tion?

²⁰ Ang iban mahimo magaugyon nga sa mga miting kag sa pag-alagad sa latagon, dapat sila maghalong kon paano sila nagapamayo, apang mahimo batyagon nila nga ang mga prinsipio sang Biblia wala naaplikar kon kaisa. Apang, may tion bala nga indi kita mga tiglawas sang Ginharian sang Dios? Matuod, wala nagapalareho ang mga kahimtangan. Kon nagabulig kita sa pagpatindog sing Kingdom Hall, tuhay ang aton bayuon sang sa kon kita nagatambong sa miting sa sina gihapon nga Kingdom Hall. Kon nagapamasyar kita, mahimo nga mangin mas komportable ang aton pagpamayo. Apang sa bisan ano man nga tion nga makita kita sang iban, ang aton pagpamayo dapat pirme nga nagakaigo kag maugdang.

21, 22. Paano kita naamligan batok sa makahalalit nga kalingawan, kag sa anong paagi dapat naton tamdon ang laygay sa sini nga mga butang?

²¹ Ang isa pa ka bahin nga nakabaton sing daku nga igtalupangod amo ang kalingawan. Ang mga tawo—labi na ang mga pamatan-on—nagakinahanglan sing kalingawan. Indi isa ka sala ukon uyang sa tion nga ang pamilya mag-iskedyul sing tion sa pagpahuwayhuway. Bisan si Jesus nag-agda sa iya mga disipulo nga “magpahuway sing diutay.” (Marcos 6:31) Apang maghalong nga ang kalingawan wala nagabukas sang ganhaan padulong sa espirituwal nga pagdagta. Nagakabuhi kita sa kalibutan diin ginapadaku sang kalingawan ang seksuwal nga imoralidad, daku nga kasingki, pagkamakakulugmat, kag espiritismo. (2 Timoteo 3:3; Bugna 22:15) Ang matutom kag mainandamon nga ulipon alisto sa sini nga mga katalagman kag pirme nagapaandam sa aton batok sa sini. Ginabatyag mo bala nga ining mga pahanumdom isa ka paghilabot sa imo kahilwayan? Ukon nagapasalamat ka bala nga ang organisasyon ni Jehova nagaulikid sa imo paagi sa pirme nga pagpatalupangod sa imo sang mga katalagman?—Salmo 19:7; 119:95.

²² Indi gid pagkalimti nga bisan pa ang aton kahilwayan nagahalin kay Jehova, manabat kita sa kon paano naton ginagamit ini. Kon sikwayon naton ang maayong laygay kag maghimo sing sayop nga mga desisyon, indi naton mabasol ang iban. Si apostol Pablo nagasiling: “Ang tagsatagsa sa aton magahatag sing husay sang iya kaugalingon sa Dios.”—Roma 14:12; Hebreo 4:13.

Hulata ang Kahilwayan sang mga Anak sang Dios

23. (a) Anong mga pagpakamaayo tuhoy sa kahilwayan ang ginaagom naton karon? (b) Anong mga pagpakamaayo ang ginahulat naton sing malangkagon?

²³ Kita sa pagkamatuod isa ka ginpakamaayo nga katawhan. Hilway kita gikan sa butig nga relihion kag disparatis. Bangod sa halad nga gawad, makapalapit kita kay Jehova nga may matinlo nga konsiensia, hilway sa espirituwal nga paagi gikan sa pagkaulipon sa sala kag kamatayon. Kag sa indi madugay magaabot “ang pagpahayag sang mga anak sang Dios.” Sa Armagedon, ang kauturan ni Jesus sa ila langitnon nga himaya ipahayag sa mga tawo subong mga manuglaglag sang mga kaaway ni Jehova. (Roma 8:19; 2 Tesalonica 1:6-8; Bugna 2:26, 27) Pagkatapos sini, ining mga anak sang Dios ipahayag subong mga alagyan sang mga pagpakamaayo nga magailig gikan sa trono sang Dios padulong sa katawhan. (Bugna 22:1-5) Sa ulihi, ining pagpahayag sa mga anak sang Dios magaresulta sa pagpakamaayo sa matutom nga katawhan sing mahimayaon nga kahilwayan sang mga anak sang Dios. Ginakalangkagan mo bala ina nga tion? Nian gamita sing maalamon ang imo Cristianong kahilwayan. Magpaulipon sa Dios karon, kag matigayon mo inang dalayawon nga kahilwayan sing dayon!

[Footnote]

Kahon Para sa Repaso

◻ Paano ginhimaya sang hinaplas kag sang iban nga mga karnero si Jehova?

◻ Ngaa dapat padunggan sang mga Cristiano ang kalibutanon nga awtoridad?

◻ Sa anong mga paagi makakooperar ang isa ka Cristiano sa mga gulang?

◻ Tuhoy sa pagpamayo, ngaa tuhay gid ang mga Saksi ni Jehova sa madamo sa kalibutan?

◻ Ano ang dapat naton likawan kon tuhoy sa kalingawan?

[Laragway sa pahina 17]

Ang mga gulang takus labi na sang aton gugma kag kooperasyon

[Mga laragway sa pahina 18]

Ang bayo sang isa ka Cristiano dapat mangin nagakaigo, maugdang, kag bagay sa okasyon