“Magpatawag Sia sang mga Gulang”

“May nagamasakit bala sa inyo? Magpatawag sia sang mga gulang sang kongregasyon.”​—⁠SANTIAGO 5:⁠14.

1, 2. (a) Sa anong makatalagam nga kahimtangan nasapwan karon sang mga alagad ni Jehova ang ila kaugalingon, kag ano ang ila ginabatyag? (b) Anong mga pamangkot ang nagakinahanglan karon sing mga sabat?

YARI na ang “makahalanguyos nga panahon nga mabudlay pakigbagayan.” Ang mga tawo makagod, materyalistiko, bugalon, masami nagatuga sing gamo sa sining “katapusan nga mga adlaw.” (2 Timoteo 3:​1-5) Subong mga Cristiano nga nagakabuhi sa karon malaut nga sistema sang mga butang, nasapwan naton ang aton kaugalingon nga nagaatubang sa tatlo ka dakung katalagman: si Satanas nga Yawa, ang kalibutan sang didiosnon nga katawhan, kag ang aton mismo napanubli nga makasasala nga mga huyog.​—⁠Roma 5:12; 1 Pedro 5:8; 1 Juan 5:⁠19.

² Bangod sining mga katalagman, mahimo nga kon kaisa magbatyag kita nga wala sing mahimo. Diin, nian, kita makakita sing bulig agod makabatas sing matutom? Kay sin-o kita makakuha sing panuytoy kon ginaatubang sing mga desisyon nahanungod sa aton Cristianong mga hilikuton kag sa aton pagsimba?

Bulig nga Matigayon

 3. Gikan kay sin-o kita makatigayon sing makalulugpay nga pasalig, kag paano?

³ Ang paghibalo nga si Jehova amo ang Tuburan sang aton kusog nagahatag sa aton sing makalulugpay nga pasalig. (2 Corinto 1:​3, 4; Filipos 4:13) Si salmista David, nga nakatigayon sing bulig sa Dios, nagsiling: “Itugyan kay Jehova ang imo dalanon, kag salig sa iya, kag magapanghikot sia.” “Itungtong kay Jehova ang imo lulan, kag sia magaalay-ay sa imo. Indi sia magtugot nga malingkang ang matarong.” (Salmo 37:5; 55:22) Nagapasalamat gid kita sa sinang supurta!

 4. Paano naghatag sing lugpay sanday Pedro kag Pablo?

⁴ Makatigayon man kita sing lugpay gikan sa paghibalo nga wala kita nagaisahanon sa pag-atubang sa mga pagtilaw kag mga katalagman. Si apostol Pedro naglaygay sa mga masigka Cristiano: “Sumpunga [si Satanas nga Yawa], nga nagpangalig-on sa pagtuo, nga nakahibalo nga ang amo man nga pag-antos ginakinahanglan sa inyo paghiliutod sa bug-os nga kalibutan.” (1 Pedro 5:⁠9) Pat-od gid nga handum sang tanan nga mga Cristiano nga magtindog sing malig-on sa pagtuo. Matuod, mahimo kita magabatyag sa masami nga “ginaipit sa tagsa ka luyo,” kaangay ni apostol Pablo. Apang, “wala [sia] mapiuti.” Kaangay niya, mahimo kita magpalibog “apang wala mawad-i sing paglaum.” Bisan kon kita ginahingabot, ‘wala [kita] ginapatumbayaan.’ Kon “ginapanglampusan, wala [kita] malaglag.” Gani, “wala [kita] nagapakaluya.” Nagapanikasog kita nga ‘magtulok, indi sa mga butang nga makita, kundi sa mga butang nga dimakita.’ (2 Corinto 4:​8, 9, 16, 18) Paano naton ini ma­himo?

 5. Anong tatlo ka bulig ang ginaaman ni Jehova?

⁵ Si Jehova, ang “Nagapamati sang pangamuyo,” nagaaman sing tatlo ka bulig. (Salmo 65:2; 1 Juan 5:14) Una, ginahatag niya ang panuytoy paagi sa iya ginbugna nga Pulong, ang Biblia. (Salmo 119:105; 2 Timoteo 3:16) Ikaduha, ang iya balaan nga espiritu nagahatag sa aton sing kusog nga himuon ang iya kabubut-on. (Ipaanggid ang Binuhatan 4:​29-31.) Kag ikatlo, ang dutan-on nga organisasyon ni Jehova handa sa pagbulig sa aton. Ano ang dapat naton himuon agod matigayon ang bulig?

“Mga Dulot sa mga Tawo”

 6. Anong bulig ang gin-aman ni Jehova sa Tabera, kag paano?

⁶ Ang isa ka hitabo sang panahon ni manalagna Moises nagabulig sa aton sa pag-apresyar sang mahigugmaon nga pag-ulikid ni Jehova sa pag-aman sing bulig para sa Iya mga alagad. Natabo ini sa Tabera, nga nagakahulugan “dabadaba; daku nga sunog; kalayo.” Sa sining lugar sa kamingawan sa Sinai, ginsunog sang Dios sa kalayo ang reklamador nga mga Israelinhon. Ang “nagsalakot nga kadam-an” nga nag-upod sa katawhan sang Israel paguwa sa Egipto nagbuylog sa ila sa pagpabutyag sing pagkadikontento sa gin-aman sang Dios nga pagkaon. Natalupangdan ang kaakig sang Dios kag ginabug-atan sang daku nga salabton sa katawhan kag sa ila mga kinahanglanon, si Moises nagsinggit: “Ako indi makadala, nga isa lamang, sini tanan nga katawhan, bangod nga tama kabug-at ini sa akon. Kon amo ini ang ginahimo mo sa akon, patya ako sa gilayon, kon nakapahamuot ako sa imo itululok, kag dili ako pagpatan-awa sang akon pagkakailo.” (Numeros 11:​1-15) Ano ang sabat ni Jehova? Nagtangdo sia sing “kapituan ka lalaki sa mga tigulang sang Israel” kag ginbutang ang iya espiritu sa ila agod mahimo nila sing nagakaigo ang administratibo nga hilikuton kaupod ni Moises. (Numeros 11:​16, 17, 24, 25) Bangod sang pagtangdo sa sangkol nga mga lalaki, natigayon sa gilayon sang mga Israelinhon kag sang “nagsalakot nga kadam-an” ang bulig.​—⁠Exodo 12:⁠38.

 7, 8. (a) Paano gin-aman ni Jehova ang “mga dulot sa mga tawo” sa dumaan nga Israel? (b) Anong unang-siglo nga aplikasyon sang Salmo 68:18 ang ginhimo ni Pablo?

⁷ Pagligad sang madamong tinuig nga ang mga Israelinhon didto sa Ginsaad nga Duta, si Jehova malaragwayon nga nagkayab sa Bukid nga Sion kag ginhimo ang Jerusalem nga kapital sang isa ka tipiko nga ginharian upod kay David subong hari sini. Sa pagdayaw sa Dios, “ang Isa nga Labing Gamhanan,” ginbayaw ni David ang iya tingog sa pag-amba: “Nagkayab ka sa hitaas; gindala mo ang mga bihag; nagbaton ka sing mga dulot sa mga tawo.” (Salmo 68:​14, 18) Sa pagkamatuod, ang mga tawo nga gindala nga bihag sang madaug ang Ginsaad nga Duta nagbulig sa mga Levinhon sa ila mga katungdanan.​—⁠Esdras 8:⁠20.

⁸ Sang nahaunang siglo C.E., ginpatalupangod sang Cristianong si apostol Pablo ang isa ka matagnaon nga katumanan sang mga pinamulong sang salmista. Si Pablo nagsulat: “Sa tagsatagsa sa aton ginhatag ang dibagay nga kaluoy suno sa talaksan sang dulot ni Cristo. Busa nagsiling sia: ‘Sang pagkayab niya sa hitaas gindala niya ang mga bihag; kag naghatag sing mga dulot sa mga tawo.’ Sa pagsiling ‘nagkayab sia,’ ano bala ini kundi nga sia man nagpanaug sa naidalom nga mga bahin, nga amo, ang duta? Ang isa nga nagpanaug amo man ang nagkayab sa ibabaw pa sang tanan nga langit, agod nga mapuno niya ang tanan nga butang.” (Efeso 4:​7-10) Sin-o ining “isa”? Wala sing liwan kundi ang tiglawas ni Jehova, ang Daku Pa nga David kag Mesianikong Hari, si Jesucristo. Sia ang isa nga ginbanhaw sang Dios kag ginbayaw sa “superyor nga posisyon.”​—⁠Filipos 2:​5-11.

 9. (a) Sin-o ang unang-siglo nga mga dulot sa mga tawo? (b) Sin-o ang modernong-adlaw nga mga dulot sa mga tawo?

⁹ Sin-o, kon amo, ining “mga dulot sa mga tawo” (ukon, “nagalakip sang mga tawo”)? Ginpaathag ni Pablo nga “ginhatag [sang Puno nga Tiglawas sang Dios] sa iban nga mag-apostoles, sa iban nga magmanalagna, sa iban nga mag-ebanghelisador, sa iban nga magmanugbantay kag magmanunudlo, nga sa paghimpit sang mga balaan, sa buluhaton sang pagpanghikot, sa pagpalig-on sang lawas ni Cristo.” (Efeso 4:​11, 12) Ang tanan sa mga sumulunod ni Cristo nga nag-alagad subong mga apostoles, mga manalagna, mga ebanghelisador, mga manugbantay, kag mga manunudlo naghimo sini sa idalom sang teokratikong panuytoy. (Lucas 6:​12-16; Binuhatan 8:12; 11:​27, 28; 15:22; 1 Pedro 5:​1-3) Sa aton adlaw, ang sangkol sa espirituwal nga mga gulang nga gintangdo sang balaan nga espiritu nagaalagad subong mga manugtatap sa mga 70,000 ka kongregasyon sang mga Saksi ni Jehova sa bug-os nga kalibutan. Sila ang aton mga dulot sa mga tawo. (Binuhatan 20:28) Bangod sang madasig nga pag-uswag sang bug-os kalibutan nga pagbantala sang Ginharian, dugang kag dugang pa nga mga kauturan nga lalaki ang “nagahandum” kag nagaabaga sang mga responsabilidad nga nadalahig sa “palangakuan sang manugtatap.” (1 Timoteo 3:⁠1) Sa pagtangdo sa ila, sila man nangin mga dulot sa mga tawo.

 10. Paano ang paglaragway ni Isaias sa “mga prinsipe” nagakaigo sa katungdanan sang Cristianong mga gulang karon?

¹⁰ Ining Cristianong mga gulang, ukon mga dulot sa mga tawo, nagakaigo sa laragway nga ginhatag ni manalagna Isaias sang gintagna niya ang katungdanan sang “mga prinsipe,” ang mga administrador sa idalom sang paggahom sang Ginharian. Ang kada isa mangin “subong sang palalipdan sa hangin kag palanaguan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.” (Isaias 32:​1, 2) Nagapakita ini kon daw ano dapat ka masinakdagon ang mahigugmaon nga pagtatap sining gintangdo nga mga lalaki. Paano ka makabenepisyo sing labi gid gikan sa sini?

Paghimo sing Inisyatibo

 11. Kon nagaluya sa espirituwal, paano kita makabaton sing bulig?

¹¹ Ang nalumos nga tawo kinaugali nga nagasinggit sing tabang. Wala sing pang-alag-ag. Kon ang kabuhi yara sa katalagman, indi na kinahanglan suguon ang isa nga mangayo sing bulig. Indi bala sulitsulit nga nangayo sing bulig si Hari David kay Jehova? (Salmo 3:4; 4:1; 5:​1-3; 17:​1, 6; 34:​6, 17-19; 39:12) Kon nagaluya sa espirituwal, ayhan nadulaan sing paglaum, kita man makapangayo kag makapakiluoy kay Jehova nga tuytuyan kita paagi sa iya balaan nga espiritu. (Salmo 55:22; Filipos 4:​6, 7) Nagakuha kita sing lugpay gikan sa mga Kasulatan. (Roma 15:⁠4) Nagakuha kita sa Cristianong mga publikasyon sang Watch Tower Society sing praktikal nga laygay. Nagabulig ini sa masami sa paglubad sang aton kaugalingon nga mga problema. Apang, kon daw ginabug-atan kita sing mga problema, makapangayo man kita sing laygay gikan sa gintangdo nga mga gulang sa kongregasyon. Sa katunayan, mahimo nga may mga tion nga kinahanglan gid naton ‘magpatawag sang mga gulang.’ Ngaa magtawag sang Cristianong mga gulang? Paano nila mabuligan yadtong nagakinahanglan sing espirituwal nga bulig?

 12-14. (a) Ano ang maalamon nga himuon kon ang isa nagamasakit? (b) Suno sa Santiago 5:​14, ano ang ginalaygay nga himuon sang “nagamasakit” nga mga Cristiano? (c) Anong sahi sang masakit ang ginapatuhuyan sang Santiago 5:​14, kag ngaa amo sina ang imo sabat?

¹² Kon kita magmasakit, nagapahuway kita agod tugutan nga manghikot ang ikasarang sang lawas sa pag-ayo. Apang kon magpadayon ang aton masakit, maalamon kita nga nagakadto sa doktor. Indi bala dapat man naton ini himuon kon magaluya kita sa espirituwal?

¹³ Talupangda ang ginlaygay sa aton ni disipulo Santiago nahanungod sini. Sia nagsiling: “May nagamasakit bala sa inyo? Magpatawag sia sang mga gulang sang kongregasyon, kag pangamuyuan nila sia, nga ginahaplas sia sang lana sa ngalan ni Jehova.” (Santiago 5:14) Ano nga sahi sang masakit ang ginapatuhuyan diri ni Santiago? Ang iban nga mga komentarista sa Biblia nagahinakop nga ini pisikal nga masakit, nagapangatarungan nga ang paghaplas sang lana isa ka kinaandan nga batasan sa pagbulong sadto anay. (Lucas 10:34) Nagapati man sila nga ginahunahuna ni Santiago ang milagruso nga pagbulong paagi sa dulot sang pagpang-ayo. Apang, ano ang ginapakita sang konteksto?

¹⁴ Ang “malipayon” ginapaanggid sa “nagaantos.” Nagapakita ini nga ginapaathag ni Santiago ang espirituwal nga masakit. (Santiago 5:13) “Mga gulang [mga tigulang, King James Version] sang kongregasyon,” indi mga doktor ukon bisan yadtong may milagruso nga dulot sang pagpang-ayo, ang dapat tawgon. Kag ano ang himuon nila? Siling ni Santiago: “Pangamuyuan nila sia. . . . Kag ang pangamuyo sang pagtuo magaayo sang nagamasakit.” (Santiago 5:​14, 15; ipaanggid ang Salmo 119:​9-16.) Ang nagapamatuod gid nga ginapatuhuyan ni Santiago ang espirituwal nga masakit amo ang katunayan nga ginapalig-on niya ang pagtu-ad sang mga sala may kaangtanan sa ginalauman nga pag-ayo. Sia nagsulat: “Magtinu-aray kamo sang inyo mga sala kag magpangamuyuay kamo, agod nga mag-ayo kamo.” Kon ang grabe nga sala amo ang ginatunaan sang espirituwal nga masakit, ang tawo nga nagamasakit ginapaabot nga magaayo lamang kon magasunod sia sa laygay pasad sa Pulong sang Dios, magahinulsol, kag magatalikod gikan sa iya makasasala nga dalanon.​—⁠Santiago 5:16; Binuhatan 3:⁠19.

 15. Ano nga sahi sang buhat ang ginarekomendar sa Santiago 5:​13, 14?

¹⁵ May butang pa nga dapat talupangdon gikan sa laygay nga ginhatag ni Santiago. Kon nagaantos, ang Cristiano dapat “magpangamuyo.” Kon malipayon sia, “mag-amba sia sing pagdayaw.” Ang tagsa ka kahimtangan​—⁠ang isa nagaantos man ukon malipayon⁠—​nagakinahanglan sing paghulag. Ang pangamuyo ginakinahanglan sa isa ka bahin, ang malipayon nga pagdayaw ginakinanglan man sa pihak nga bahin. Kon amo, ano ang dapat naton paabuton sang namangkot si Santiago: “May nagamasakit bala sa inyo?” Sa liwat ginapanugda niya ang positibo nga paghulag, huo, paghimo sing inisyatibo. “Magpatawag sia sang mga gulang sang kongregasyon.”​—⁠Salmo 50:15; Efeso 5:19; Colosas 3:⁠16.

Kon Paano Makabulig ang “mga Gulang”

 16, 17. Paano kita ginabuligan sang mga gulang sa pag-aplikar sang mga prinsipio sa Biblia?

¹⁶ Kon kaisa nabudlayan kita sa paghibalo kon paano iaplikar ang mga prinsipio sang Biblia sa aton personal nga mga kahimtangan. Diri sini nga ang Cristianong mga gulang mangin hamili nga tuburan sang bulig. Halimbawa, nagapangamuyo sila tungod sa isa nga nagamasakit sa espiritu kag ‘nagahaplas sa iya sang lana sa ngalan ni Jehova’ paagi sa malantipon nga pagpadapat sang nagapakalma nga instruksion gikan sa Pulong sang Dios. Busa daku ang mabulig sang mga gulang para sa aton espirituwal nga pag-ayo. (Salmo 141:⁠5) Sa masami, ang lamang nga ginakinahanglan naton amo ang pagpalig-on nga nagapangatarungan kita sa husto nga paagi. Ang pagpakigsugilanon sa isa ka eksperiensiado nga Cristianong gulang magapabakod sang aton determinasyon nga himuon kon ano ang husto.​—⁠Hulubaton 27:⁠17.

¹⁷ Kon ginpatawag sa pagduaw, ang Cristianong mga gulang kinahanglan “magpamulong sing malinugpayon sa napung-awan nga mga kalag.” “Sakdagon [man nila] ang mga maluya, [kag] magmabinatason ayon sa tanan.” (1 Tesalonica 5:14) Inang suod, mahinangpanon nga kaangtanan sa ulot sang “mga gulang” kag “mga maluya” nagabulig sa bug-os nga pag-ayo sang espirituwal nga kapagros.

Personal nga Responsabilidad kag Pangamuyo

 18, 19. Ano ang katungdanan sang Cristianong mga gulang may kaangtanan sa Galacia 6:​2, 5?

¹⁸ Ang Cristianong mga gulang dapat mag-abaga sang ila responsabilidad sa panong sang Dios. Dapat sila magmasinakdagon. Halimbawa, si Pablo nagsiling: “Mga kauturan, kon ang isa ka tawo makahimo sing sayop nga tikang antes sia makamulalong sini, kamo nga may espirituwal nga mga kalipikasyon magatinguha sa pagpasag-uli sa sina nga tawo sa espiritu sang kalulo, samtang ginabantayan mo ang imo kaugalingon, basi kon ikaw man pagsulayon. Padayon kamo nga magdinalhanay sang mga lulan sang isa kag isa, kag sa amo matuman ang kasuguan ni Cristo.” Ang apostol nagsulat man: “Ang tagsa ka tawo magdala sang iya kaugalingon nga palas-anon.”​—⁠Galacia 6:​1, 2, 5.

¹⁹ Paano kita padayon nga magdinalhanay sang mga lulan sang isa kag isa kag sa gihapon magpas-an sang aton kaugalingon nga palas-anon? Ang kinatuhayan sa kahulugan sang Griegong mga tinaga nga ginbadbad “lulan” kag “palas-anon” nagahatag sing sabat. Kon ang isa ka Cristiano may daku gid nga problema sa espirituwal nga tuman kabug-at para sa iya, ang mga gulang kag ang iban pa nga mga masigkatumuluo magabulig sa iya, busa nagatabang sa iya sa pagdala sang iya “lulan.” Apang, ang indibiduwal mismo ginapaabot sa pagdala sang iya kaugalingon “palas-anon” nga responsabilidad sa Dios.⁠a Ang mga gulang malipay sa pagdala sang “lulan” sang ila mga kauturan paagi sa pagpalig-on, Makasulatanhon nga laygay, kag pangamuyo. Apang, wala ginakuha sang mga gulang ang aton personal nga “palas-anon” sang espirituwal nga responsabilidad.​—⁠Roma 15:⁠1.

 20. Ngaa indi dapat pagpatumbayaan ang pangamuyo?

²⁰ Ang pangamuyo kinahanglanon kag indi dapat patumbayaan. Apang madamong nagamasakit sa espirituwal nga mga Cristiano ang nabudlayan sa pagpangamuyo. Kon ang mga gulang nagapangamuyo sa pagtuo tungod sa isa nga nagamasakit sa espirituwal, ano ang katuyuan? “Si Jehova magabangon sa iya,” gikan sa pagkawalay paglaum, kag magapabakod sa iya sa pagpadayon sa dalanon sang kamatuoran kag pagkamatarong. Ang nagamasakit sa espirituwal nga Cristiano mahimo nga may sayop nga panimuot apang mahimo nga wala nakahimo sing daku nga sala, kay si Santiago nagsiling: “Kag kon nakasala sia, patawaron ini sa iya.” Ang Makasulatanhon nga laygay sang mga gulang upod ang hanuot nga pangamuyo nagatiklod kon kaisa sa maluya sa espirituwal nga tawo sa pagtu-ad sang serioso nga mga sala nga nahimo niya kag sa pagpadayag sing mahinulsulon nga espiritu. Ini, man, nagakinahanglan sing kapatawaran sang Dios.​—⁠Santiago 5:​15, 16.

 21. (a) Ngaa ang iban nga mga Cristiano nagapang-alag-ag sa pagtawag sa mga gulang? (b) Ano ang pagabinagbinagon sa masunod nga artikulo?

²¹ Ginaatubang sang hangkat sa pag-atipan sa kadam-an sang mga bag-uhan nga nagasulod sa Cristianong kongregasyon, ang mapisan nga mga gulang madamo sing hilimuon sa paghatag sing nagakaigo nga pagtatap. Sa pagkamatuod, ining mga dulot sa mga tawo isa ka matahom nga aman halin kay Jehova sa pagbulig sa aton sa pagbatas sa sining makahalanguyos nga panahon. Apang, ang iban nga mga Cristiano nagaisol sa pagpangayo sing bulig sa ila, nagahunahuna nga ining mga kauturan tuman kasako ukon nabug-atan na sing mga problema. Ang masunod nga artikulo magabulig sa aton sa pag-apresyar nga ini nga mga tawo malipay sa pagbulig, kay nagaalagad sila sing kinabubut-on subong kabulig nga mga manugbantay sa Cristianong kongregasyon.

[Footnote]

Paano Mo Sabton?

◻ Kon nagakinahanglan kita sing bulig, anong tatlo ka bulig ang ginaaman ni Jehova?

◻ Sin-o ang modernong-adlaw nga mga dulot sa mga tawo?

◻ San-o kita dapat magpatawag sang mga gulang?

◻ Anong bulig ang mapaabot naton gikan sa Cristianong mga gulang?

[Piktyur sa pahina 15]

Natigayon mo bala ang espirituwal nga mga benepisyo sang pangamuyo, pagtuon sa Biblia, kag bulig gikan sa Cristianong mga gulang?